السلام عليكم
حياكم الله جميعا
رد على استفساراتكم في موضوعي السابق والذي هو بعنوان
تجربتي مع الديكور ، صور شقتي بعدسة عبد الرحمن الفنتوخ
قبل لا ابدا فيه توضيحين بسيطين
الاول
انا ماكنت ساكن بهذي الشقه استلمت الشقه وهي كذا يعني المستاجر الاول كان عايش كذا وبرضوه العماره الي سكنت فيها قديمه لسببين اولا علشان السعر مناسب لي ثانيا هي عماره واحد قريب لي علشان كذا عارف انه ان شالله ما يطلعني وبعدين البلاط والبويه هي الشيئين الي مقدر اخذهم معي وهم ارخص شي بالشقه والباقي كله اقدر انقله
الثاني
هو انه فيه ناس فاهمين الموضوع غلط يعني بنتقدون ويقولون مهب حلو ومادري ايش
ويعرضون علي صور واشوفها وبالنهايه تكون صور لديكورات كلاسيك يا ناس لازم تفهمون فيه نوعين من الديكور
الكلاسيكي
والعصري او الحديث
بيوت اول والبيوت الي يكون فيها اكثر شي اللون البني والبيج والحجر من الداخل والخشب
هذا كلاسيكي
اما مثل شقتي هذا اسمه عصري .. هذا له ناسه وعشاقه وهذا برضوه له ناسه وعشاقه
ندخل بالموضوع
الصراحه لم اتوقع ربع هذه الردود ولا اخفيكم انني
تورطت توريطه بنت كلفس يوم اني حطيت في اخر ايميلي كلمة اي احد يبغى مساعده او شي يراسلني لووول
اولا وقبل ان اتكلم بالتفاصيل ما ابغى اي احد يزعل مني ويحسبني طنشته قسم بالله انه الرسايل الي جتني بالايميل
وتطلب مني تصميم تفوق الخمسين رساله
والموقع تشوفون الردود والطلبات تجاوزت المائه وخمسون رد
يعني اكثر من 200 واحد ينتظروني في اخر الشارع كل واحد ماسك معه عصى يبي يكسر راسي
فاتمنى انكم تعذروني وتقدرون موقفي لانه من الصعب جدا اني ارد على كل رسالة ..خاصة ان معظم الاسئلة والطلبات متشابهه فارجو انه ما احد ياخذ بخاطره مني وبحاول اساعدكم بالي اقدر عليه وان شالله يكون ايميلي هذا كافي ووافي وان شالله ماني مقصر معكم ابدا
الارضيات
هناك خمس انواع من الارضيات
ولكل نوع ايجابياته وسلبياته اللي الكل يعرفها
فرشه- موكيت
واعتقد انه انتهى زمنها لأسباب كثيره وعلى رأسها تجمع الوساخات وصعوبة تنظيفها
الا ان وجودها مهم احيانا في بعض الغرف مثل غرف الملابس او غرف الاطفال الصغار
بورسلان
وهو السائد هذه الايام والسبب ان سعره مناسب مقارنة بشكله الجميل والذي يعطي مثل الرخام وبنفس الوقت هناك الوان ساده بدون عروق بعكس الرخام الذي تدخل فيه العروق
ويوجد منه الوان واذا لاحظتم محلات الاثاث المودرن معظمهما حاطه بورسلان اوف وايت او رمادي بدرجاته وبرضو في لامع وفي مطفي والرمادي فخم جدا مثل الي انا حاطه
سيراميك
وهو ليس بعيد ابدا عن البورسلان ولكن الفرق بالماده المصنوعه وغالبا دورات المياة يستخدم فيها السيراميك
باركيه
وهي الارضيات الخشبيه وانا من وجهة نظري انها هي الافضل حتى الان لجمال شكلها وكذالك لانها تكون بارده في الصيف ودافئه بالشتاء وكذالك بامكانك الجلوس عليها
وميزتها انها دائمه يعني مو موضه وتروح لا بالعكس وتقدر تستخدمه في المودرن والكلاسيك
رخام
وهذا مايحتاج اني اتكلم عنه بس حرام يوضع بشقه اجار يصلح للفل والقصور وهو الي يعطي الشكل الاجمل من بين كل الارضيات
لايمكن ان نقول انه الارضيه هذي اغلى او ذيك.. هناك بورسلان اغلى من اغلى رخام والعكس
وذوقك ومبلغك المتوفر هو اللي يحدد ايش اللي يناسب بيتك
انا شخصيا افضل الباركيه ولكن مشكلته سعره غالي شوي يعني المتر بحدود ال 80 ريال
وانا شقتي 100 متر يعني لو بصلحها باركيه راح توصل 10000 ريال
فقررت اني اسوي بس غرفة النوم لأنها صغيره حطيتها باركيه وتعبت علشان احصل باركيه ابيض ذاك الوقت
واخذته من محل في طريق الملك عبدالله اسمه اعمال الرسيل او شي قريب ترى فيه اثنين هو الثاني يعني هو الاقرب للممشى حق جامعة الامير سلطان وانت راجع للدائري
وطبعا فيه المحل المشهور هو باقر بالتخصصي وهو بعد اصول المعمار قبل ماتوصل العزيزيه بنده على اليمين باول العماره الي قبله ..عموما محلات الباركيه كثر التراب يعني لا تركزون بالي قلت لكم
اما باقي الشقه فبحث في السوق ولا اخفيكم انه الموجود بشقتي بورسلان ساده صيني سعر المتر 28 ذاك الوقت يعني بلطت شقتي كلها ب 1500 ريال وللمعلوميه كل مازاد حجم البلاطه كل ماصار المنظر اجمل بمليون مره يعني الي اقولكم سعر متره ب 21 هذا بلاطته خمسين في خمسين سنتيمتر طبعا
انا اخذت 60 في 60 طبعا اغلى صار ب 28 المتر ولكن شفتو كيف اعطى منظر حلو كنت بحط متر في متر ولكن سعره كان غالي مره ما اتذكر رغم انه كان صيني
ولكن قلتلكم كل ماكبر حجم البلاطه زاد سعره وصار شكله احلى
الجدران
الاصباغ-البويه
الالوان الساده وهذه هي الرائجه والسائدة هالحين اما التعتيق هذا انتهت موضته الا الراغبين في تأثيث كلاسيك
في شقتي اللون الاساسي الاوف وايت والصاله جدار احمر واحد والمدخل برتقالي كامل الجدران اما المجلس ازرق فاتح واخضر فاتح وكلفتني تقريبا 2500اذا مب اكثر قليلا
ورق الجدران
طبعا ورق الجدارن هو القمه ولكن سعره غالي والاحلى انك تحط جدار واحد في اي غرفه ورق مو كل الغرفه الا في بعض الحالات عاادي
الإضائه
اللمبات يعني الاضاءه تعبت علشان القى مودرن رخيصة كله غالي مثل بكيكا الي بمخرج تسعه تقاطع طريق الملك فهد وبالناصر الي بشارع الكهرباء الي بالملز واي دي ديزاين الي قدام جامعة الملك سعود وكذالك اناره عندهم شي يسدح ولكن مع شلة الغاليين مرره
اما الي سعره معقول وهو مودرن موجود برضوه بشارع الكهرباء الي بالملز وبالتحديد محلين العواد والدخيل وبرضوه ايكيا
والثلاثه الاخيرين هم الي شريت منهم اضائتي او بالعربي لمباتي
واقصد غاليه يعني ارخص شي اللمبه ب خمسميه الى سبع مية ريال
اما الي انا شريت منهم مثلاا حقات المجلس الدخيل اللمبتين ب 450 ريال وحقات الصاله من ايكيا نفس السعر المدخل من العواد ب 170 ريال الحبه اما الي بالمطبخ تشوفونها معلقات على طاولة البار على قولتهم هذي من ايكيا الظاهر الوحده ب خمسين اما الي بالسقف تعبت علشان القاهم واخذتهم من محل صغير بشارع الكهرباء بالملز
اسمه الحجاج وكانت الوحده ب 35 ريال فقط
المطابخ
اولا
طبعا اغلى مطابخ الي موجوده بكيكا اوربي (نمساوي)بحت يعني شغل قوي لدرجه مبالغ فيها
يعني لو يبون يصلحون مثل مطبخي يمكن يكلف ال 90 الف ريال
واذكر انهم عندهم بالاربعين الف وفوق حسب اختيارك
بس ولو سعر مبالغ فيه الا اللي معه بسلامته
ثانيا
قباني وعضاضه وهذا اغلبه خشب يعني مايصلح ولو انه فيه جزء ستنلستيل
ولكنه غالي يعني زي مطبخي يمكن 50 الف واكثر
ثالثا
كافكو وهذا موجود بشارع التخصصي اول ماتدخل من خريص اول اشاره ارجع تحصله على اليمين هذا رح اسرق منه افكار هو مميز عن غيره بالاوان وحتى هو من الناس القلائل الي يكون الالمنيوم ناعم والبقيه الموجودين بالسوق خشن وانا ما احب الخشن وشكله مايصلح
اذا تبي مطبخ حلو طبعا هو يسوي زي مطبخي واحلى ولكن ب 27 الف ريال ولكن يستاهل هو الي سعره فيه طبعا انا ما فصلت عنده ولا واحد منهم كلهم غالين وانا منب قدهم
رحت بحثت كثير بالسوق وحصلت ناس تسوي الي براسي والي هو صاج المنيوم ناعم ولماع وبنفس الوقت الدواليب مستطيله لأنه فكرة المطبخ ماخذها من موقع اوربي.. بالعربي بحثت عن تصاميم 2008 وطحت بالموقع هذا واكتشفت ان الموضه القادمه وكذالك الشكل الاجمل انه يكون مستطيل رغم اني الى الان لم اجد اي بيت مسوي مثلي
نبدأ بالتفاصيل ادق وادق
الفرشه الي تشوفونها تسمى بالسوق مكرونه وهي موجوده بالعويس اوحتى بشارع المفروشات الي بشرق الرياض شارع الامام احمد بن حنبل وسعرها تقريبا ثمانين ريال فقط
وحتى بسوق المينا بجده
وفي الصوره تشاهدون لمبة المدخل الي تكلمة عنها وهي مربعات مثل الثلج
الدعاسه الي عند المغسله شاريها من السواني كانو مخفضين من 140 اخذتها بسبعين
والصراحه حصلت الوان كثيره بنفس المستوى وحلوات بمحل نسيت اسمه بعزيز مول بجده جنب الدرج فيه محلين متقابلات يفصلهم الدرج واحد مفارش نوم والثاني فوط ودعاسات واكسسوارات ولقيت فرع منه بالرمال مووول الي جنب ايكيا بمخرج 17 اول ماتدخل تبي تلقاه على اليسار بعد بدي شوب او زهور الريف نسيت او يمكن نكتار خخخ
يقلع ام الوصف
اما الارفف الي موجوده بالزوايا هذي من عند النجار قصيتها ورشيتها وركبتها وشايلها بمسكات موجود منها كثير بساكو وايكيا
الصور مع البراويز الي حول المغسله من ايكيا اما المغسله نفسها من محلات المغامس بالتخصصي وكلفتها مع الخلاط يعني البزبوز تقريباا 800 ريال
طبعا زي ماوضحت لكم بخصوص المطبخ انا لم اقم بتصليح المطبخ من اي مكان من الي ذكرت لأنه كلهم مافيه ولا واحد اقل من عشرين الف انا بختصر عليكم اذا تبون نصيحتي اذا الشقه او البيت ملك فصل مطبخك من كافكو واذا ايجار وتبي شي زين فصل من ايكيا
اما عن مكان تفصيلي لمطبخي وبكم سعره انا ما انصح لأنه تعاملهم سيء وما انسى ذاك الشخص اسمه رباح بمحل اسمه المطابخ الامريكيه الي بطريق الملك بعد العزيز بعد فال على اليمين وانت متجه لطريق الملك عبد الله هم الي صلحو مطبخي ولكن هم تخصصهم خشب ويوم وراني العينه بعد الاتفاق طلعت خشنه وتهاوشنا ويالله يالله جاب لي ناعمه ومشي الحال بعد تسحيب ومشاكل فعلشان كذا ما انصح فيهم وكلفني المطبخ تقريبا 12000 ريال
ولو اني اقول نصيحتي فصل من ايكيا ضمان 10 سنوات وشغلهم حلو والمطبخ الاحمر حقهم والاسود مرررررره حلوات ولكن اذا تبيه يطلع شي اتفق معهم يركبون لكم المطبخ بدون السطح وبعد مايركبون لك رح لأي محل مطابخ وابحث عن رخامات سامسونج وركب منها حلوه والونها متعدده ويبي يطلع مطبخ سعره رخيص وشكله خياالي
الكراسي هذي حقات طاولة الخدمه البار على قولتهم فيه منها ب اي دي ديزاين وديموس ولكن نصابين سعرها حول 300 ريال انا حصلتها بالصناعيه وبالعويس ب 100 ريال وبجده تحصلونها بسوق المينا
اللوحه والبرواز الي بالمدخل من ايكيا وسعرهم على بعض 70 ريال
يمكن اقل بعد
الرفوف المعلق الي بالصاله هذي موجوده بأيكيا ولكن لونها بيج يعني لون الخشب الاصلي انا شريتها ووديتها للصناعيه هناك فيه شي اسمه بويه ناريه خاصه للخشب تعطي منظر كأنك شاريها ولونها كذا طبعا لا تتعب نفسك اي نجار تعطيها اياه يسويها لك
الحبه بايكيا ب 125 ورشة البويه نفس السعر
نبدا من يمين الرفوف تكلمت عنها جميع لوحاتي من محل اسمه قرمزي بطريق الملك عبدالعزيز يكفي انه الي يصممها سعودي وسعره مرررره رخيص ومتعاون جدا وعنده لوح تتعب عينك وتحتار ولوحه مره رخيصه ومميزه مقارنه بالسوق وانا درت وشفت ولو شريت من غيره تراك تبي تندم لأن سعره على لوحاته الخياليه مستحيل انك تبي تحصلها بمكان ثاني واحلى ما فيه الرجال ان اسمه مساعد مثلي
واذكر انه عطاني كم لوحه بدون فلوس عشان اشوف وش يناسبني بالبيت واللي ناسبني اشريه واللي ماناسب رجعته
جميع طاولاتي بالبيت من ايكيا
الجلسه كثير يحسبني شاريها من احد المحلات المودرن مثل
ايكيا
اي دي ديزاين
ارجرتيينا
ديموس
ستي دبليو
ولكن جميع اقمشة كنباتي ماخذها من القثمي ومفصلها انا
وبسعر رخيص زي كنبة الصاله مثلا القماس بألف والتفصيل بألفين
لو عندي كان اقل شي اخذت اقمشتي من كي اي او من ارض الحرير
الفرشه مثل سالفة حقت المدخل مكرونه ب 120 ريال
الستاره هذا التفصيل الروماني مو كثير الي يظبطونه اذا جيت تسوي اطلب منه انه يخفي كل شي المكينه الي فوق وكل شي علشان تكون بالجدار مثل اللوحه الفنيه وغير كذا سهله مررررره فتحها وتسكيرها اما تحطلي دناديش وخرابيط فوق ما يمشي هالكلام وسعر تصليحها بالسوق تقريبا 400 ريال
الفراغ الي يسار هذا فوق فيه لمبات اولعها واقصر على النور حق الصاله تعطي شكل قوي تقدر تحط مكانها سبوت لايت والدواليب الي على شكل حرفين سي متقابلات هذولي الصيدليه خخخخ وشاريهم من ايكيا الواحد يمكن ب تسعين ريال والرف الي تحت برضوه من ايكيا ولكن لونه كان خشب صبغته مع الرفوف الي على اليمين
البلاط هذا شريته من اصول المعمار الي بالتخصصي وهو بعد مطابخ كافكو على اليمين
عنده اشياء مررره حلوه عموما نصيحتي اي احد يبي يسوي شي لايطلع من التخصصي لاني درت الرياض كلها طلع السعر والكيف هناك
والصراحه ما انسى امتداد مخرج 9 فيه كم واحد حلو وعلى رأسهم سيراميك مدري بلاط الاندلس نسيت اسمه بس معروفه له كم فرع هو وكم محل جنبه حلوات وانت بمخرج تسعه رايح للدائري تبي تلقاه يمينك قبل اشاره وحد من التقاطعات
واضح كلامي
عموما مثل بلاط دورة المياه ايطالي وغالي بس خربتها انا لأن حجمه صغير سعره ذاك الوقت ب 80 ريال طبعا لو تبيه يحط لك اشرطه راح يدبل سعر الحمام وانت بكرامه ويمكن فوق الدبل بس الشكل يبي يصير يسدح بس طبعا بيت العمر حط فيه اشرطه
فيه نفس الوكيل حق الشركه بأيطاليا موجود بجده عند مطعم الوزان الي قدام ايكيا حتى دورة المياه حقتي شفتها بالعرض على الشارع
القزازه حقت الشوراخذتها من بيت الاباء الي على طريق الخرج ولكن ندمت لاني لقيت ناس تفصل بــ نص السعر عند حقين القزاز والالمنيوم زي النجارين هذولاك
ونصيحتي الاكبر من القزاز انك ما تحط بانيو لانه انتهى وراحت موضته ويجمع وسخ واتربه حط شور عاادي يعني جدار وانت تدخل بالوسط وبس وحط باب وانتهينا انظف واحلى شكل وعلى الموضه 
طبعا مثل ماحنا عارفين انه السرير الياباني هو الموضه والي يكون نازل بالارض كثير تبون الصدق كنت ضايع طول عمري وانا انام على السرير القديم والقروي اليبغى لك سلم على شان تطلع فوقه تنام ولو تقلبت وطحت تكسرت عظامك هذا غير نومته الصحيه والقويه وغير انه الموضه هي السرير الياباني النازل طبعا انا شريته من ديموس ويوم جبت النجار يصنفر ابواب شقتي ويرشهن شافه وقال انا اسوي لك احلى منه ولو ماصار مثله واحلى لاتحاسبني وقلتله بكم وقالي بنص سعر ديموس هذا وديموس صيني
خخخخخ
بس لو رجع بي الزمن ورى كان فصلت عند النجار واذا تبون الصدق فيه محل اسمه ستي دبليو بمخرج 12 على الدائري عنده غرف نوم تاخذ العقل الا تفصخ العقل فصخ وسعره مرررررره مناسب
مفارش نومي اغلبها من السواني ودبنهامز
اتمنى اني اكون وفيت وكفيت اما بخصوص التصميم انا يا جماعه ماني محترف انا جبت افكار اساسيه والموضه السائدة وانا اصلا احب الالوان فاشتغلت عالاشياء الاساسيه وكملت انا وزوجتي الباقي يعني بالنهايه ترجع لذوق الشخص يعني انا لو بصلح بصلح نفس كذا لأني احب الاحمر والاورنج والاصفر والالوان الي شفتوها
ولا انسى اقولكم انه شقتي اقل من كذا ولكن ماشالله تبارك الله تصوير عبد الرحمن الفنتوخ خلى شقتي شي انا ماتوقعته ابدا فالتصوير لعب دور كبير جدا بأظهار الشقه بهذا الشكل
تكفون لايضحكون عليكم مصممين الديكور ترى العمليه ترجع لذوق الشخص انت ابحث بالانترنت وترجم الي تبيه من عربي الى انجليزي وتبي تلقى صور لشقق وبيوت اوربيه خذ الفكره وصلحها وانتهت السالفه..وعندك محلات الديكور كثر التراب جوله لمدة شهر عليها والله ان تحتار من كثر الاسعار والمنافسه والاشكال الحلوه
وبالنهايه
لا احد يعتقد انه اذا صارت شقتي كذا اني 24 ساعه مبسوط وزوجتي مبسوطه وحنا مثاليين وانا ملياردير ترى هذا على اسمه ديكور والا الله من مره ومره نمت بالبرحه
خخخخخ
ادعوا لنا بالتوفيق وبالذرية الصالحه والرزق الحلال
ولاتنسون تذكرون الله اذا اعجبكم 🙂
