الحين يوم انك


يتمتع بعض أفراد مجتمعنا بصفات وسلوكيات خاصه قد لانجدها في أي مكان على وجه المعمورة, وعندما اقول صفات أو سلوكيات أقصد الغير حميدة منها. باختصار قد تتفاجأ في أحد الأيام بأن يأتي أقرب الناس إليك- سواء أخ او عم أو ابن خالة أبوك من الرضاعة أو حتى جارك قبل 30 سنه – وبدون أي سبب يأخذ نفساً عميقاً, ويوجه لك هذه العبارة: "تراني شرهان عليك" !!! ثم يردفها بعبارة "الحين يوم انك" ….إلخ, وبالنهاية تكتشف أنه شره عليك لأنك لم تحضر زواج ابنه الذي أقامه في قرية تبعد عن مكان إقامتك 550 كيلو.

وبالطبع لابد في هذه الحالة أن تبعد عن الشر وتغني له, ولا بد من أن (ينط عِرق المجاملة) عندنا فتعتذر بأنك كنت مشغولاً جداً أو ماعندك إجازة, فتتفاجأ مرة أخرى بقوله: طيب , "الحين يوم انك" حضرت زواج فلان اللي كان قبله بأسبوع وماحضرت زواج ولدي. تقول في نفسك: (الله اكبر وش ذا الزواج اللي تبيني أحضره), مجموعة من البشر حضروا بعد صلاة العشاء لمكان إقامة حفل الزواج , وسلموا على بعض, وجلس كل ثلاثة منهم بشكل انفرادي في زاوية.


اعلان





في الزاوية الأولى: – شفت فلان مر من عندنا ولا سلم؟
– ماعليك منه شايف نفسه.
– أبسألك العريس موظف؟
– لا مو موظف, بس يطقطق بالمحاماة
– ايه أجل معقب؟ ليه زوجوه؟
– لا مو معقب, تراه شريك في مكتب محاماة وعنده خير
– ماشاء الله, أجل تدري خلني أروح أبارك له مره ثانيه, "يستاهل"
———-

في الزاوية الثانية: – شفت مشلح العريس؟
– لا, وش فيه؟
– قصيّر ومغبر!!!
– يارجال مشلحه يهون عند مشلح أبوفلان اللي ماغيره من عرفته
– إلا على طاري فلان, هو جاي الزواج؟
– إيه, شفه جنبك, خلنا نسلم عليه
– بعد السلام مباشرة: "يالغالي ما تزوجت؟ متى تبي تتزوج؟
– طبعاً يرجع (ينط عرق المجاملة) ويقوله فلان: يله على إيدك
يتنتهي الحوار بابتسامة صفراء, ونظرة ساخرة, مع رشفة بيالة الشاي
———–

في الزاوية الثالثة: – فلان وش اخباره؟
– بخير بس من زمان ماكلمته لأنه يكمل دراسته برا
– كم له مبتعث؟
– له سنه
– وش بيدرس؟
– دكتوراه
– مهب كنه طول؟ لا يصير رسب
– وين مبتعث؟
– لبريطانيا
– ايييييه بريطانيا, لايهمك تراها سلق
– إلا قلي انت وش صار عليك؟
– ابد والله فصلت من شغلي, ومالقيت وظيفة تعرف مامعي إلا متوسط, بس شكلي بقدم على ابتعاث, فلان مهب أحسن مني !!!
——–

الزاوية الرابعة: – ياخوي ماتلاحظ إن العشاء تأخر؟
– إيه والله, امتلت بطوننا من شاهيهم الحالي
-(اقلطوا حياااكم الله)-
– اقول, ماتلاحظ إن الأكل بارد
– إلا, وماتلاحظ إن الخيار اللي بالسلطه كثير
– إلا, هذا وهم مسوين الزواج بفندق, على بالهم متمدنين
– وراهم حاطين بيبسي وماحطوا سفن أب
– تدري خلني أروح آخذ لي حلى قبل مايخلصونه ذالمشافيح
وبالطبع آخر من يطلع من وليمة العشاء أبطال الزاوية الرابعة , وكل واحد منهم بفمه خمسة أعواد أسنان
——-
تنتهي وليمة العشاء, وبنهايتها ينتهي حفل الزواج الممتع بهروب العريس من بثارة اللي عازمهم, وبعد كم يوم تقابل عم العريس ويقولك: "الحين يوم انك" ماحضرت الزواج؟ تقوله إلا حضرت, وبالتحديد يالحبيب أنت كنت قاعد في الزاوية الثالثة. يقول إيه زين بارك الله فيك, طبعا أنت تفرح لأنك في الحقيقة لم تحضر الزواج لكنك معتاد وتعلم بأنه من عشاق الزوايا, لكنك تتفاجأ بأنه يرجع ويقول لك: طيب "الحين يوم انك" شفتني ولا جيت سلمت, انت ماتستحي؟؟؟!!!

خاتمه: في مجتمعنا الكثير من السلوكيات والأخلاقيات المتعبة والمؤذية , والتى كم تمنيت أن تنقرض, إلا إنني وأنا أتمنى جاني أبوزاوية وقال: "الحين يوم انك" تتمنى؟ ماتبينا ننبسط يالوقح!!!


تابعوا جديد شبكة أبونواف على فيس بوك وتويتر

   


تعليقات 15

  1. والله وجبتها .. وهذا اللي صاير بالفعل كلام في الصميم .. وسلمت يداك يعطيك العافية

  2. السلام عليكم 🙂 ياخي أحس إنك تعقدت من كثر ما صارت لك المواقفّ هذي! xD بالفعل, الناس مالها شغل إلا أنها تاكل ببعضها (إلا من رحم ربي). وبالفعل, من راقب الناس, مات هماً. بس ما قلت لي, الحين يوم انك تنتقد نقد بناء, ورى ما كتبت من زمان؟ xD واصل كتاباتك أخي أبو علي, والله يوفقنا واياك الى كل خير وطاعة. دمت بود 🙂

  3. السلام عليكم الحين يوم انه عندك اسلوب حلو ماشاء الله ورا ماتتحفنا بالهمواضيع الحلوه هع بس صراحه اسلوب ولا اروع ومشكله مالها داعي انا بصراحه لو كنت احب هذا الشخص وفي يوم قالي طيب يوم انك … طواااااالي اكرهه 🙁 معرف ليه كذا من ربي وشكراً 🙂

  4. في الصميم الكلام في كل المجتمعات يكون هناك الحوار نفاق ومجامله وحسد وبعض الاحيان الحقد ولاكن يبقى فينا خير على الاقل احد حظر عرسه و الباقي يهون كلام وبيروح ..مجرد راي

  5. الحين يوم انك تعرف تكتب وخطك حلو وعندك اسلوب … وينك ما لك مشاركات مثل ورقة بلوت اللي ازعجنا بالمجموعة:( << دعابه 😀 الحين يوم انك منتقد لهذه السلوكيات ،، ليش تتعامل بها ، وش حدك؟ هل تتوقع أن المجتمع سيكون على نمط واحد ؟ وقلب واحد ؟ وبتوجه واحد ؟ … طبعا لا ،، ولو افترضنا حدوثه لصارت الحياة مملة. ومع ذلك ، ايميل رائع … اشكرك عليه

  6. هههههههههههههههههههههههههههههههههههههههههههه الله يسعدك يابو علي على الطرح الرائع…….. تحياتي للزاويه الاولى ههههههههههههههههههههههههههههههه

  7. اخوي اجبرني اسلوبك وفكرة موضوعك اني اقرآ الموضوع اتمنى للك التقدم وادعو الله لك بالسعاده الله يسعدك والله انها فترة اختبارات وقريت موضوعك و وسعت علي بالمقال… انتظر جديدك

  8. معليش أخوي .. بس كل الكلام الي قلته موجود في المجتمع النسوي .. نادرا ..جداا .. أسمع هالكلام من أحد لكن مع كذا اي واحد يسمعه ينقد عيه .. على العموم مشكوور

  9. كلامك سليم أخوي وعساك على القوة والله يقدرنا ان احنا نحسن من انفسنا من عيالنا يعطيك العافيه ياخوي وماتقصر

  10. فعلا هذا واقع مجتمعنا للاسف نتمنى انها مع الوقت تزول يعطيك العافيه

  11. الحين يوم انك ماحضرت عرس الرجال حنا وش دخلنا بالموضوع < نوعيته مثل الرجال الي ماحضرت عرس ولده هههههه> هالحين الرجال يقول ماتسوى على هاليوم انك ليتني ماارسلت الموضوع < دعابه

  12. سلام عليكم موضوع جيد لاكنه ضد التواصل والتراحم وانا لا اوافقك عليه عشان شويت ناس تجمع يعيدون الذكريات خلاص نتنكر لهم طيب ايش رايك ان ابناء اخ ولا ابنا عم ماحضروجوازجك وانت مكلف ذبائح وقصر عشان من عشان يفرحون لفرحك الطقطقه في مكان العمل بالأستراحة في السيارة في الطيارة مثل كلام الصحف اليوميه المكرر وكما قال بعض ألأخوة ألأعضاء غالبا تجد الكلام هذا في المجتمع النسائي. خلي القطار يمشي بشويت محبه وتراحم لا تقطعنافهذا يقطع القطر مشكور النقد لا يفسد للود قضية تحياتي

  13. صرااااااااحه قمه الروعه وابداااااااااااااااااااااع وراقي في اسلوبك وفي موضوعك المطروووح يعني موضوع محد منتبه له بس انت بصراااحه جبتها على الجرح اشكرك واتمنى جديدك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الحين يوم انك

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول