إذا فاتتك ( فاطمه ) .. فلا تفوتك ( نويّر ) … ترى عليها عرض


أحلى طحينية بأحلى صباح متنيّل بنيله ورديه ..

 
عشان مانطول .. لأننا بزمن السرعة والواحد مايمديه يفكّر بمعلومه إلا وخويه اللي جنبه ينغزّه بكل ما أوتيَ من قوّه ويقول له : لاتسوي كذا .. سوا كذا أحسن 


اعلان





 هع .. لندرف مع مدخل الماضوع وخلونا نشوف وش نهاية هالرومانسيه اللي داخله عرض كن فيها بعج !

الموضوع رومانسي غصبـ(ن) على دحيّم واللي خلّف دحيّم .. وهالماااضوع ماطلع إلا يوم اني هوجست كعادتي وطلعت براسي ألف سالوفه وسالوفه .. سويّر – حسبي الله عليها – خلّفت براسي عُقده أسمها عُقدة ( حبّها ثم ابلش فيها ) ..

 

زينت الواحد بهالنت أنه يقدر يلاقي ناس تسمع له وتداوي همومه وتمسح على جراحه وتهوّن بلشته بقول ( أصبر ترى الدنيا عبْر ) ..

وعشان كذا أنا كتبت هالكلام عشان أفضفض عليكم ليس إلا .. وترى اللي باشوفه يقعد يبربس فتراي باتعلّق باستار الكعبه وادعي عليه .. ياتهوّنون علي مُصابي أو فكّوني من شرّكم وعويذ الله من الملعون بوش !

سويّر أعرست ( غصبن علي ) .. وقلنا ( الشكوى لله والدنيا حضوض ) … لكن تولد وتفقّس ثم تجيب ولد .. فهذي ( علمن ثاني ) والدعوه فيها وَرَاثة و( نسلن ) راح يقعد بتسبدي طول عمري ..

ماتتخيلون ياجماعة أني ماحبيّت بهالدنيا وحده مثل سويّر .. وماعرفت المصايب إلا يوم اني حبيتها .. عاد المشكلة أني طحت في هالمقروده اللي طبّقت نظام ( حاخونك من ورى حِتّة جدار البيت ) .. ويوم أني طبقت هالنظام رحت أدوّر لي ( نظامن ) يمشّي أموري لين تلقح اللقمة في بطني الممرور بحب هالعلّه .. بس عجزت .. حتى أني استعنت بأنظمة ( هيئة التحقيق والادعاء العام ) وعلى راسها ( نظام الإجراءات الجزائية ) اللي تطلّع صاحب أكبر جريمة وبلوى من أطرف زنزانة .. بس مهناش علم ياجماعة !

ولدها عاد صار زين وفيه ( ملحن ) يمشّي الحال .. والله يحسن خلقنا ماخلقنا .. واللي أنا متأكد منه وباصمن عليه باصابع رجولي الصغار أن شبهه جاي من طرف ( خواله ) .. لأن أبوه وعمّانه شيون نمرة واستمارة .. والخال جذّاب وددسن العراوي دايم ( مرْكبه وافي ) ..

وسبحان الله .. من اعرست سويّر وامي كل يوم ( تهدّ ) فيني .. وترجّي فيني خير .. وتقول باتسر ياولدي تبي تبيّض الوجه وترفع الراس و( بنزوّجك اطلق بنت بالديرة ) … عفيه عليتس يايمّه بس القلب ونّان ..

بس اللي أكتشفته من خِلال حتسي الوالده لي .. أن الواحد ومهما ( حبّ ) أو جلس يتقلّب طول ليله على ظهر المخدّه أن اليوم الحلو راح يمرّ عليه بأي شكـل .. زواج على عانس .. زواج بنيّة عفّه وستر .. زواج مسيار و ( برايفت إلك ) يامؤسسة بن باز الخيرية لتزويج الشباب والمقسوم بيكتبه الله غصبن عن اطلق شنب ..

قبل كم يوم كنت بسوق الزلّ مع الوالد ..
رايحين نشتري لنا كم غرض خفّافي لبيتنا العتيق .. وبالصدفة شميّت ريحة واحدن من عايلة سويّر .. صار اخوها زيد جعله الفتاق متوجّهن لاحد المحلات ومرّ من جنبي وشطف كليتي اليُسرى .. من شطفني وانا مستحسّ أن ورى هالشطفة علمن مهوب زين .. عاد ناديته وسألته عن اخته الربشى .. (( ولاأحد يستغرب منّي لأني سألته عن اخته وهي معرسه .. لأن الدعوة عندي متساويه وريحتي فايحتن بحبها في الديرة من سنة ( أقلطوا وقضّوا الباب ) أيام فتحوا الرياض على يد المرحوم )) .. عاد يقول لي ( زيد ) أن اخته مستانسه وتبي تسافر مع رجلها دحيّم هالايام لمكّه يبون ياخذون لهم عمره وبيروحون بعدها لجدّه أم الرخى والشدّه عشان يقعدون عند البحر من باب الاستجمام والتفصّخ .. ثم يقعدون يحتسون بالديرة انهم شافوا البحر وسبحوا فيه – ألا يا جعلهم يغرقون فيه وياكلهم سمك القرش ويلفضهم على حدود مفرق سيناء – آآآمين – !! … هع .. الدعوه ظاهر من قلب !

  

والله وتحوم تسبدي على هالسالفة المخيسه اللي تفوح خناز من طاري السفرة الزوجية المحفوفة بالحب والدلع .. عاد ماعرف الدلع إلا هالدحيّم اللي طول عمره يحك ركبته بجدار المدرسة عشان تنضف .. أمحق دلع يابو وجهن تقول ( غطى قدر ) متسفيّن على قفاه ..

ومير أطلّق بالثلاث أن اعوّد للبيت وان ماشتري زلّ مع الوالد .. واروح اركب الموتر واطقها هواجيس .. عاد عقب هالهواجيس أخذت على نفسي عهد وتعهّد ووقعته وبصمت عليه بجبهتي أني ماعاد أفكّر فيها أبداً .. واني كل ماتذكّرتها احاول اشغل عمري باي شي ثاني حتى لو ارتكب جريمة يُعاقب عليها القانون ومايشملها نظم الكونقرس الملعون ..

* الحكمة تقول : بدل أن تلعن الظلام مليون مرّه أشعل شمعة وغيّر حياتك واعرس على وحدتن تغيّر منظومة الدنيا بعقلك .. يعني لو أنك حاط ( فاطمة ) براسك تبي تعرس عليها ثم اعرست ودفّتك بظهرها .. فلا تفوتك ( نويّر )
ترى عليها عرض !

  

احوبكم كولكم


سلامو ياعرب .


تعليقات 12

  1. ماشالله عليك كيف تجيب الكلام هذا وكمان قابل للقراءة قلنا ماشاااااااالله

  2. الحين انت يوم تحب البنت ليه ..ما تستحي خلك رجال ذرب ..الحب ما يجي الا بعد الزواج بعون الله بعدين هب يالسمرمدي ما عندك مشكلة أبد تخلص من سوير ..وتدور على نوير؟؟؟؟

  3. الله يعينك يامدمن على قلبك يوم يحب ويم يكرة وعلى قولة المثل::: نظر عينك حظ غيرك ابألك سؤال بعد اذنك في كلمة مافهمتها ابيك تشرحها لو يكرمت وهي .. والله يحسن خلقنا ماخلقنا وش معناها والي يعرف يشرحها لي وشكراااا

  4. ماقصرو الشباب بالتعليق ولكن ماقول إلا ماشاء الله تبارك الله عليك … كلام كبير ومنطق وماترمي إليه واضح 🙂 ويعطيك العافيه على الأفكار … مبروك عليك وعلى كل القراء للموضوع شعبان والله يبلغنا وياهم رمضان .. آمين

  5. هلا بك مدمن.. ياشيخ سويّر ذي بدالها عشرين بنت .. طز فيها .. اللي باعك لا تشتريه :):) وبعدين تعال .. بما اننا في الهواء سواء خلنا ندور على أختين ونعرس عليهن مسيار وأهم شي تصير موظفه عشان نستفيد من جميع النواحي >>> بينجلد ههه المهم قل تم..

  6. المهم وانااختك لامنك لقيت نوير اعرس عليها بسرعه من غيرحفل وعشاء ازين لاتطيرمثل اللي قبلها

  7. بدل أن تلعن الظلام مليون مرّه أشعل شمعة وغيّر حياتك هذي افضل جمله في الموضوع مشكوور

  8. اقول يمال الحره اللي تحر كبدها وتخليها تتحسف على كل عمرها اللي ضيعته بدونك..(هذا اذا كانت هي ساحبه عليك) 🙂 اما اذا كنت انت اللي جاحدها همن تحسفت عليها فأنت تستاهل كل الحرات اللي بلعتها انشهد انها عرفت تكويك<<اطلعي برا بس في شتى السبل عيش حياتك دور الاشياء الثانيه اللي تحبها وكرررررررررس احلى اوقاتك لها (اللي تحبها مو المغصوب عليها) وكدا كدا شويه شويه بتنتصر على هوى فطوم وهوى نوره وماراح يهمك الا هوى ضميرك ..خذ الوصف وبعطيك ضمان ست شهور اذا مافاد مهك تعال افلقني <<تستنى العجرا وخشتها تطل بابتسامه عريضه من غرفة القلب (قصدي من الثقه) :d والحين اودعك على امل اللقاء <<حنت للطابور:) والله يخليك لعين ترجيك وبرزقكك ماتتمنى ..وكان حارتن قلبك بنت اللذينا الله يحرها في عمرها <<ولو تشوفا تراها منقهره معك ربي لا يحرمنا من طلتك ياشطور <<بتنكمخ بباي:)

  9. ياحبيلك يامدمن ياحبيلك للتميلح ترا ملينا من سالفة العرس وراه ماتعرس وتفكنا سويت لنفسك عرض الله يصلحك وماتبي احد يطلب بدك المهم شخبارك كل عام وانت بخير توي واصل من مكه وداعيلك ربي يزوجك ..

  10. بجد الله يعينك يا مدمن اشهد انها نكبه وربنا يكون فى عونك وخليك مع العروض دايما عشان يمكن يجي مع العروسه عروسه كمان واذا اجا شي حلو لا تنسا تقولن وش هيه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إذا فاتتك ( فاطمه ) .. فلا تفوتك ( نويّر ) … ترى عليها عرض

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول