أسطورة بقلم : د. هيفاؤووه برعي الضمنهوري

قبل الكلام ؛؛ يحلوّ السلام

وعندك اقدع تعظيم سلام وتحيه لاقدع ناس في الحته وصلحووووووو

تقول الاسطوره الاغريقيه مثل ما وردت في الياذه هوميروس :

ان الإله (زيوس ) وإله البحر ( بوزيدون ) ؛؛ تخانقوا عشان يعرسون من الآلهه الفاتنه ثيتوس)؛)

ودار هالحوار بين زيوس وبوزيدون :

زيوس : ثيتوس لي يعني لي ؛؛ من يوم اني كيــد وانا احبها وأشريلها عسكريم فراوله والحب موب رايح كذااا ؛؛

تبي تلهطها مني ببلاش بارده مبرده ؟ وتعرس عليها معصييي

بوزيدزن : تخسي وتعقب نوو ثم نوو يابعدي ؛؛ قظوا بنات خلق الله تقعد تناشبني بهذي؟

اقول حامظ على يور بوووز !؛

زيوس : ان كان في يور ماذر خير خلها تروح تخطبها لك و شوف وش بيصير لك !؛

بوزيدون : اتز اوووكي هيّن !! أفتر القايله وحنا عندهم ؛؛ ومن سبّق لبق ؛

__________________________

راح بوزيدون لامه وقال له على اللي صار مع زيوس وردت عليه :؛

هذي الساعه المباركه ياوليدي ؛؛ ثيتوس ونعم فيها حتى تنبأت لها الكاهنه ( عناقز نفره ) بان اللي يتزوج منها بيجيه ولد اقوى من أبوه !

وخير البروو عاجله متي تبيني اخطبها لك ؟

بوزيدزن : هاه ! اقول يمه خلني افكر بالموضوع آند ذين بردلتس خبر ؛

_________________________

باختصار قامت نزعه الغيره واصبح يتمم وهو بطريقه الى القهوة :؛

شلووون اجيب ولد يكون اقوى مني ؟ ماباقي الا يربيني احسن آي كانت بليف إت أويلااه ؛

سمعه زيوس بهاللحظه وقال له :؛

عسى ماشر يابوزيدون ليــه الحزن عليك بــادي؟
صعب ينهد شامخ اخبرك باردن حيل وهادي

بوزيدون وقد سفههو سفه التسلابه ولا كأنه سمع شي !؛

زيوس : افاااا لهالدرجه ؟ وتس أب ؟ علامك ؟ ؛

بوزيدون : ما ادري ياخوك بس تذكر ثيتوس اللي تخانقنا عليها ؟ يقولون انها ان جابت ولد بيكون أقوى من هيز دادي وانا ما ودي ؛

زيوس : أووه شيت واعقب !! لا بالله اجل حتى انا هونت ؛

_____________________________

وتمضي الاسطورة في فصولها لتقول لنا :؛

انه بعد مارفضو كل الالهه بالزواج منها ؛؛ قال أبو ( ثيتوس ) : وشوله اركّب بنتي قطار العنوسه ؟ لابوهم لابو اللي بيعرس عليهم

ودخل على ثيتوس وقال : أول عريس بيطق الباب بزوجتس اياه لعنبو دارتس طقيتي الاربعين

ثيتوس : يبه انا توني بعنفوان شبابي ؟ خلاص انا بتزوج باي احد يتقدم لي عندك سواء بشر ولا جن ولا ان شالله فار ؛؛ أهو ظل راقل ولا ظل حيطه ياخواتي ؛

وتزوجت برجل من البشر اسمه ( ببليوس )؛

وسرعان ما نرى نتاج هذا الزواج المختلط بين الالهه الفاتنه( ثيتوس ) وبعلها البشري النبيل ( ببيلوس ) ؛

وخلفوا لنا ورع صغيرون اسمه ( آخيل ) ؛

_________________

مواصفات آخيل كما وردت بالاسطوره <<< اقول انجزي علينا اسطوره واسطوره طايحة لي هاليومين تكثرين من قرايه الاساطير

وتذكر الاسطوره حان آخيل ؛؛ شاب شديد الفتنه يعني وسيم مثل سعود الدوسري خخخخخ وطويل وبياض وشقااار خخخخخ حتى ان فيه شامه بخده << ياقدمك ؛

وكان كل بنات الحي يحبونه منهم الالهه ( هيرا – وأثينا ) اللي كانوا انواع التلزق عنده

لكن هو لانه كان خط 220 كان ثقيييييييييل ماعنده هالحركات ماكان يعطي وجه ابداً

وكان عنده مبدأ انه حتى لو عرف فنون الحب والمغازل ويميل له لكن يرفض ان يسلم قلبه لإمرأة و

يرى أن الرجولة لا تكتمل للفتى إذا هو استهوته عيون الفاتنات واللثمه ام شيله حرير ؛؛

أو بكت عيناه من فرط الصبابة !! <<< متعوب عليها ؛

المهم ان الولد هذا كان شخصيه ؛؛ لا وازيدكم من الشعر بيييت؛؛ كانت امه تجيب له مدرس يدرسه

الشعر ؛؛

ومدرس يدرسه فنون القتال يعني كأنّه خريج كليه (ساندهيرست) العسكرية ومتعلم في السوربون !

يعني هذا لو يتقدم لي ما اقول لا ؛

___________________

نتوغل بالاسطورة فنجد احداثها تتكلم ان بهالفتره قامت حرب بين الطرواديين والاغريقيين

وان ام آخيل الالهه ( ثيتوس ) خافت عليه لاتفقده وهو وحيد امه ياعييني ؛؛ فقامت ارسلته الى

جزيره اسمها ( سيروس ) بين نساء نيكوميد الطخمااات ذوات الجمال الفاحش ؛

تخيلوا جزيره عايش فيها واحد بين الاف البنات والحريم الطخمااات ؛؛ انواع الرغد والدلال وكلهن

بخدمته ؛؛ يعني شي بصراحه << موب كأنتس خقيتي مع ذا الاخيل ؟ ؛

الا والله كأني ؛

المهم ان الاغريقين بدأوا يخسرون الحرب ضد الطرواديين ؛؛ وبدأوا يتذكرون آخيل ؛؛

لانه المنقذ الوحيد لهم ؛؛ وصاروا يدورونه ؛؛

وانا اقول لهم : والله موب فاظي لكم ولا راح يطلع لكم لو تلحسون السماء ؛؛ بس مالت محد سامعني <<<

وعينوا فارس مغوار مهمته فقط يدور آخيل ؛؛ واسمه ( عوليسس)؛؛ ودور عليه لحد مالقاه بالجزيره ؛؛

لكن من كثر ما اخيل جميل وفاتن عجز يميزة بين هالصبايا المهضومين ؛

عوليسس : احووووول ؛؛ وش هالبلشه بحق السماء ؟ الحين وشلون اميزه بينهم؟

مافيه الا اني ارمي جواهر والماسات وبينهم سيف ؛؛

اللي يختار السيف اكيد بيكون آخيل !

جاب عوليسس ببقشه مليانه الامييص وفيه سيف واحد ورماها عندالبحيره اللي آخيل جالس يتسبح فيها

ناظروا البنا ت وقالوا : بنااات الحقووو الاميييص ؛؛

تقول اخرى اقول وخري بسسس ؛؛ الياقوته الحمرا لي من الحين ؛

وآخيل قلبه يقول : طربق طربق ؛؛ وصار يقول :؛

السيف مايزهى سوى كف سيـــــاف .. والخيل دون حصانها مستخيـــــــره

عوليسس : اخييييل ؛؛ واخيراً لقيتك ؛؛ يالله امش معي انت املنا الوحيد بالفوز ضد الطرواديين

آخيل: طيب لحظه خل البس صروالي ؛

وشاء الله ان يقتل آخيل بالمعركه

!!!!!!!!!!!!!!!!!!

__________________________

تقول الاسطوره ان امه( ثيتوس) نشدت له الخلود حين ولادته فأمرتها الألهة ان تغمره في بحيرة الخلود !

فمسكته امه من كعبه وغمرت جسده الصغير بالماء وابتل كله ماعدا كعبه !

وكانت صرخاته تدوي بالمكان : واااء واااء ياكرهني للمويه لاتحطون شمبوا بعيوووني ؛ <<حشى هذا الدحمي ولد خالتي منيره موب آخيل !؛

تخبرنا الأسطورة أيضاً ا ان الكعب كان نقطة ضعف ( آخيل) وانه لن يموت الا اذا سددت له طعنة او صوب له سهم في كعبه وقد كان !
انتهت حياة هذا الفارس الخالد بسهم وجه الى كعبه فمات ( راح عريس الهنا )؛
بعد حياة طويلة خاض فيها حروبا واجه فيها الموت مئات المرات وفر الموت من وجهه مولولاً !؛

تعرف ( نقطة الضعف ) في علم النفس بكعب آخيل ! ؛

____________________

الزبدة

رغم ان ابطال ( هوميروس ) كلهم اما أرباب او ربات

او انصاف ربات وأرباب ؛؛الا انهم يحملون نفس( عقد ) (ونقاط ضعف) كالتي لدينا
ولهم مصائرنا نحن البشر ! ؛

طبعا هي اولا واخيرا اساطير غير واقعيه لكن وضعت لأخذ العظه والعبره

؛****لماذا يتصارع الرجال للفوز بقلب إمرأة؟

حتى وهو عارف انه اقوى منها ؛؛ لكن مردّه لها ايستغني

؛*** ماسر (غيرة) الأب احيانا من ابنه الذكر ؟

يعني هو مايبيه يصير متعلم اكثر منه ؟ او له صيت اعلى من صيت والده

عموما تعتبر عقده ؛

؛*** ماسر ارغام المرأة وحتى المرأة الألهه ( ثيتوس ) ؛

للإقتران بمن يختاره اولوا القرار لها !؛

وهذا موب اللي قاعد يصير الى الان بواقعنا ؟

يعني حتى هم ؟ ؛

؛****ماسر خوف الأمهات على ابنائهن الذكور ؟

لا من جد وش معنىىىى هالاهتمام من الامهات ؟ ؛

ماتبيه يدخل الحربيه ولا الامنيه ولا الجويه علشان تخاف عليه من الاوضاع الامنيه

لايجونه الارهابيين ولا يشقلونه للعراق ؛

فعلا هالاشياء اشوفها بالواقع !

*** حكاية الصراع الأنثوي بين ربات الجمال مين الاجمل ومين اللي بتعجب اخيل اكثر

موب قاعد يصير بمسابقات الجمال بهالوقت ؟

يعني يدل هالشي ان هالصراع أزلي ؛

وغيره وغيره ؛

ودي اسكر الموضوع بس مدري كيف جاز لي التفلسف ترى اذا تبون جزء ثاني انا ماعندي مانع ؛
ونعتذر عن عدم وجود صور خخخخخ ترى الصور مضره بالصحه ؛

دمتم سالميـــــــــــن

اختكم / هيفاؤووه