أبو نواف فوق المجهر – المقابلة


السلام عليكم ورحمة الله وبركاتة

مرحبا بكم اعضاء ومحبين قروب ابو نواف في اطلالة جديدة من… مجلة قروب ابو نواف في ‎عضو تحت المجهر

لقد تم الاعلان مسبقا عن اجراء حوار مع صاحب القروب أبو نواف وبسم الله نبدأ بالحوار


اعلان





التفكير أعدمني ،، والطيبه ضيعتني ،، والاستعجال وهقني
الكمبيوتر عدوها اللدود ،،، والحمد لله الاسلاك سليمة
شغالتكم وبروك شيلدز أحلى فتاتين ،، وهذا الفيلم أبكاني
المفاجآت كثيرة ،،، وهذي اللي راح أصرح به ،، والقادم أحلى
عين فراش وعين غطا أقولها للاعضاء ،، وصح للناس الحلوه

المجلة : أخوي أبونواف كلمة تقولها للاعضاء قبل مانبدى الحوار الله لايهينك ؟
أبو نواف : أحب أقول للاعضاء كل الشكر لكم لانكم منحتونا الثقه في تواجدكم معنا وهذا أكبر شرف لنا وإن شاء الله نكون قد الثقه اللي منحونا اياها وأحب أشكر المسؤولين على المجله وعلى رأسهم صاحب الفكره خلووودي وصاحب الجهد سوالف القايله وأقول للاعضاء استروا ماواجهتوا قبل ماتبدى المقابله .
أبو
صورة أبو نواف وعمرة 3 سنوات

المجلة : كثير من الاعضاء ودهم يعرفون أبو نواف وش هو من رجال فياليت تعرفنا ببطاقتك الشخصية :
أبو نواف : اسمك الحقيقي اذا امكن : سعد ويدلعوني هيثم
عمرك : 26 سنه
مؤهلاتك : ثانوية عامة
المهنة : موظف أنترنت ،، الا شراف على مواقع في ادارة الانترنت في أحدى المؤسسات
الحالة الاجتماعية : متزوج وعندي ولد أسمه نواف وعمره ثلاث أشهر الله يصلحه ويهديه
المدينة : أصلي قصيمي من مدينة البكيريه بالتحديد ،،، بس مولود وترعرعت بالرياض
المجلة : البكيرية تلك المدينة الحـــالمة ….. حدثنا عن طفولتك بين مزارعها و سواقيها ؟
أبو نواف : راحتي النفسيه ألقاها في هالمدينه اللي لقبت المدينة الصحية الاولى في المملكه ،،، ومتعتي في الجلسه في المزرعه
المجلة : احس ويحس الاخرون عندما تكتب بحساسيه مفرطه تحسسنا انك حساس . هل تحس بذلك ؟
أبو نواف : أقول … الظاهر انك تحكك و بك حساسية وانت تسأل السؤال هذا
المجلة : بنت البحرين تسأل : بما انك مدير القروب ماهي الصفة التي تكرهها في شخصيتك؟؟؟؟ مارأيك بالنقد؟ وهل أنت من
المتقبلين للنقد؟؟
أبو نواف : بالنسبه للصفات اللي أكرهها في شخصيتي ،، كثرة التفكير ،، والطيبه الزايدة اللي ضيعتني ،، والاستعجال وهقني كثير ، النقد أعتبره طريقة من طرق البناء لانه بدون نقد ماراح نكتشف الاخطاء ،، وأنا أتقبل النقد ولا أتقبل التجريح لان ناس كثير يخلط بينهم .
المجلة : كيف طرت على بالك فكرة القروب ؟ ومتى كانت بدايته ؟ وليش سميته أبو نواف ؟ وهل لاقى القروب نجاح من بداية أم أنكم
عانيتم في البداية وصبرتم فكان هذا نتاج صبركم ؟
أبو نواف : فكرة القروب بدت بأربعين شخص وكانوا هم الناس اللي كنت أعرفهم بالنت وكنا نتراسل بكل جديد وغريب بالنت وكان هالشي قبل أكثر من سنتين بالتحديد يوم 29 – 10 – 2000 وسبب تسميته أبو نواف لاني كنت ألقب بهالاسم بين معارفي ولحبي لاسم نواف وأحب أقول لنواف بيك أن معنى أسم نواف هو العالي ، المشرف ، والمُتفوِّق ،،،، وبالنسبة للنجاح أكيد ماراح يجي بالساهل لازم الواحد يتعب شوي وأكيد أني تعبت كثير وصبرت والحمد لله وصلنا ماوصلنا له .

المجلة : كيف وصلت لهالمستوى ؟ وكيف وصل عدد الاعضاء الى هذا العدد الكبير ؟ وبعد هالنجاحات وش أنطباعك ؟؟ وهل أحد
ساعدك على تطويره بهالشكل ؟؟ ومن هو مستشارك الخاص بالقروب ؟؟

أبو نواف : الوصول لهذا المستوى ماكنت أنا سببه ،، كله كان بفضل الله وتوفيقه ثم بجهود الاعضاء هم اللي وصلوا القروب لهذا المستوى وبالنسبه لوصول عدد أعضاء القروب الى أكثر من 35 ألف عضو هو إنتشار الاسم والقروب بين الاعضاء وبين الناس وزي ماقلت انه سببه هو توفيق الله ثم جهود الاعضاء ،،،،، وانطباعي أكيد ابكون مبسوط بوجود هالاعضاء الطيبين بيننا بس في نفس الوقت الثبات على القمه هو اللي يحتاج له مجهود أكبر ،،، والتطوير والاشراف على القروب وتنظيمه كان بمجهود شخصي بس كان بإستشارة بعض الاخوان ويهمني رايهم كثير بكل تطوير للقروب أمثال سوالف القايلة وعزيز بن عزيزه وخلوودي واالجريح

المجلة : توقعاتك و مخططاتك المستقبلية لتطوير القروب ؟؟
أبو نواف : التوقعات والمخططات الصهيونيه أقصد المستقبليه هو الانتشار بشكل أكبر في عالم النت ويمكن نقلبه عالمي بس يبغاله وقت ومن الخطط مع انه مستحيله حبتين بس إن شاء الله راح نخربها ونسويها هي ان كل العرب بالنت يكون مشتركين بالقروب ومن المخططات ظهور قروبات ثانية تابعة للقروب الاساسي وتكون متخصصة بس أتمنى ان الله يحيينا ونحققها وشكلنا بنقلبها شركه مساهمه <<<< مهوب عاقل شركة الاتصالات خخخخخ
المجلة : كم الوقت اللي تقضيه على القروب ؟ هل فيه تعارض بين تنظيمك للقروب وحياتك الشخصيه ؟؟ وأم نواف ما تعتبر القروب
أو الكمبيوتر ضرة لها ؟؟
أبو نواف : الوقت اللي أقعده بالنت يمكن الكثير يستغرب منه بس هذا اللي صاير وهو 12 ساعه باليوم بحكم ان عملي يتطلب تواجدي أون لاين ثمان ساعات وبالبيت 4 ساعات والقروب ياخذ من وقتي غالبا ثلاث ساعات يوميا لانه يوصل للقروب أكثر من 300 رساله يوميا وبالنسبه للتعارض حدث ولا حرج أنواع التعارضات وبعض المرات أختفي عن اقاربي وزملاي فتره مايشوفوني وأم نواف أبشركم كرهت الكمبيوتر وتعتبره عدوها اللدود بس في نفس الوقت متفهمه وضعي الحمد لله ولا كان تقطعت الاسلاك وتكسرت الشاشه من زمااااان .
المجلة : سوالف القايلة يسأل : ابو نواف في الصوره اللي قدامك عندك خمس إختيارات ياليت تحدد ؟؟؟ من الاشخاص الي
يتناسبون مع كل خيار وسلامتك توهيق
أبو

أبو نواف : والله ياعليك سؤال مادري وش يبي بس أبحاول أخربط يمكن يطلع معي شي ،،، أقول صح للناس المتميزه وأقول أستمر للناس المتابعة وأقول نأسف للناس اللي ترسل أشياء مكرره أو أكثر من 3 رسايل باليوم وأقول خطأ للناس المميزين اللي كانوا يرسلون وتوقفوا والزباله عاد هذي مايبغالها شيخ هذي طول الله عمرك للناس اللي ترسل أشياء مايرضاها الله ولا خلقه
المجلة : مجموعة من الاعضاء تسأل ليش رسايلنا ماترسل للقروب ؟؟ يعني ماتمشيها ؟
أبو نواف : أنا أقولكم ليش السبب ياناس قلناها أكثر من مره ان المشاركات تكون متكرره أو تكون غير مطابقة للشروط وحنا قلنا من قبل …المشاركه ماهي بالكم ولكن بالكيف ….يعني الشخص اللي يبدع من نفسه يفرض نفسه في القروب

المجلة : خلوووودي يسأل : بالثانوي ما كان لك لا حس ولا خبر .. لدرجة اني كنت أحسبك العصا حقت الاستاد! كيف تفجرت هذه
الطاقات وطورت نفسك في الكمبيوتر ووصلت لهالمواصيل
أبو نواف : هلا خوخه ،،، المتعارف عليه دايم أن المؤدبين دايم يكونون شاطرين صح ؟ بس بالذات أنا تصدق اني داج ومن الناس اللي ياخذ السنه بسنتين ويمكن مسألة التفجيرات حقت امريكا مالي دخل فيها <<< يسمع بالفهم ،، اقصد الطاقات المتفجره كان بدايتها هواية والحمد لله هذا من فضل ربي وصلت الى ماوصلت اليه ،،، ولا تنسى ترى بيل قيتس كان فاشل بدراسته <<< يقلد
المجلة : خلوووودي برضه يسأل : تذكر يوم يفوز فصلنا بالكاس حق الدوري وأسلم على المدير ويلبسني المداليه ؟ -هالسؤال مهم
ترا بالنسبه لي ولمشاعري – قل أيه حتى لو انك ما تذكر المدرسه كلها
أبو نواف : شرهتك على اللي يتذكرك أيام الثانوي ماأذكر الا كرشة المدير ….وهواوي حافظها زين …. والوحيد اللي كنت أذكره هو أبو خليل تدري ليش ؟؟؟ كان هو الوحيد اللي بالثانويه كان له عوارض ( لحية مخففه )الظاهر من أول ماأنولد وهو له عوارض ،،، وأعتقد لو حلقناها الحين يمكن نلقى قراطيس شاورما و مفك صلصة تحت لحيته
المجلة : خلوووودي برضه يسأل : هل انت هلالي والا نصراوي ؟ وهل تتابع الرياضه العالميه ؟ اذا كان ايه منهو فريق المفضل <–
قل ميلان ويعطيك بوسه ومن هو لاعبك المفضل محليا وعالميا ؟
أبو نواف : بدينا بالخنبقه ،،، أقول انا ماأشجع الا الصناعة الوطنية << يسمع بالتشجيع ،،،، والرياضة العالمية تشدني بس ماعطيتها وجه و أشجع ميلان تدري ليش ؟؟ مهوب علشانك ، علشانه أزين من نابولي اللي أزعجنا فيه أسامه كي ولاعبي المفضل محليا هو شركة الاتصالات لانها لعبت بحسبتنا بقوه وعالميا شركة مايكروسوفت اللي كل برامجها تهنق
المجلة : خلوووودي برضه يسأل : وش أحسن فلم أمريكي أعجبك ؟ ومنهو الممثل العالمي اللي يجذب اهتمامك ؟ ومن احلى
وحده في العالم <– ام نواف بالزنوبه تكفين هههه
أبو نواف : لاتقلب المواجع الله يخليك ،،، أحلى فلم شفته وفي نفس الوقت بكيب يوم خلص هو بريف هارت حق ولد أبن جبسون وبالنسبه للمثلين مااعتقد ان هوليود جابت مثل ألبتشينو وربرتو دنيرو ،،، وبالنسبة لأحلى وحده بالعالم هذي يتنافسون عليها ثنتين شغالتكم وبروك شيلدز <<<< كح كح قديمه بس حلوه
المجلة : خلوووودي برضه يسأل : مواليد سنة كم ؟ واذا الله ان شاء الله رزقك بمولود ثاني وش بتسميه واذا بنت وش بتختار لها اسم
؟ والله يرزقنا حنا وياك والمسلمين ويجعلهم من عباده الصالحين
أبو نواف : انا مواليد 1977 ميلادي 1397 هجري ،، وولدي الثاني ان شاء الله ، الله يجيبه أبسميه مساعد واذا صارت بنت أبسميها شعاع على أسم خالتي مزنه
المجلة : خلوووودي برضه يسأل : لماذا لا يكون هناك مسابقات سنويه او شهريه ويتكفل بجوائزها احد المحلات نظير الاعلان في
القروب او تكون الجوائز مساهمه من أعضاء القروب الراغبين في ذلك
أبو نواف : الفكره كانت راح تطبق في رمضان الماضي بس الراعي للمسابقة ماصحى من النوم الا عاشر ايام رمضان ولا يمدينا نلحق عليها وإن شاء الله ناوينها قريب وأنتظروها .
المجلة : *+*+ athaaab *+*+ تسأل : من ترشح يكون خليفه لك بعد عمر طويل في خلافة القروب طبعا مع احتفاظ القروب باللقب
تبعه
أبو نواف : خليفتي بالقروب إن شاء الله بعد عمر طويل هو نواف ،،، تدرين ليش؟؟ ماأضمن هالعيره ( الشباب ) يخلونه على أسمه على الاقل نواف راح يمسك أسم أبوه
المجلة : *+*+ athaaab *+*+ برضه تسأل : لو غمضت عينك وفتحتها ولقيت قدامك مليون ريال وش اول شي بتسويه
أبو نواف : أعطيك نصفه ،، بس أنتبهي لايغمى عليك ،،، الحين خليه يجي ويحلها ربك
المجلة : *+*+ athaaab *+*+ برضه تسأل : لو قابلت المجرم شارون وش بتقوله
أبو نواف : ابقوله : يابايخ ليش تسوي كذا بالفلسطينيين ،،،، أكيد مانيب قايله شي أبذبحه ان كنت أقدر
المجلة : أشواق القلوب تسأل : مين مصمم لك الموقع يا ابو نواف ؟؟ يعني هل هو من تصميمك او من تصميم شركه ؟؟
أبو نواف : الموقع من تصميمي أنا …. وإن شاء الله التصميم القادم راح تمسكه شركه بتغير كل تصميم الموقع
المجلة : عزوز الدرعاوي يسأل : أبو نواف بما أنك الراس الكبيرة والمعزب للقروب , فشي طبيعي تجيك يومياً رسايل , اذكر لنا اغرب تلك الرسايل ووصلتك من مين إذا ممكن .. ؟
أبو نواف : هلا والله باللي يتغلى ،،، شف أغرب رساله وصلتني من واحد من الشباب اللي فاقدين حنان ،،، المشكله انه مرسل الرساله لكل القروب ويقول فيها شي ماينقال والمشكله انه بدى يطلع أشياء خاصة فيه وبخويته ,,,
المجلة : عزوز الدرعاوي برضه يسأل : عمر القروب سنتين ماشاء الله , وخبرتك في هذا المجال كبيرة , فبماذا تنصح اللي وده يفتح
قروب أو عنده قروب بس انه فاشل
أبو نواف : أنصح اللي بيسوي قروب يفكر زين لاكثر من سبب من هالاسباب هو انه شغلانه ومسؤوليه وغثا ومتعب وان كانه قد هالاشياء ويقدر يتحملها يسوي قروب بس يتقي الله في خلقه واللي عنده قروب فاشل يفكر زين وش الاسباب اللي خلته بالمستوى هذا ويحاول يصلح أغلاطه علشان يطلع مثله مثل القروبات الباقيه
المجلة : عزوز الدرعاوي برضه يسأل : من خلال هذه المجلة هل من مفاجأه أو مشروع تطويري للقروب سيرى النور قريب ,, ياليت
تنشره لنا اييييييييه على طاري قروب أبو نواف ,, وشخبار ولدك نواف عساه بدا يقول اغغغه
أبو نواف : ياحبك للعجله ،، شكلك قصيمي ،، والمفاجأة صراحه ماهي وحده فيه ثنتين الاولى ابصرح فيها والثانيه ابخليها فعلا مفاجأة ،،،، انه راح يكون فيه منتدى يجمع الاعضاء ويكون فيه إتاحة الفرصه للنقاش والحوار ،،، وعلى طاري نواف أبشرك بدا يغاغي ويخرطم بعد ،،،، يغاغي = يقول أغغغغه ،،، ويخرطم = يعفط برطمة السلفي تعبيرا عن الزعل
المجلة : اجوان تسأل : ايش رد فعلك علي الي يحاول يشوه القروب وكيف تتعامل معاه؟
أبو نواف : أكيد راح أتضايق ،، بس ماراح أتعامل معاه لانه راح يشوه القروب بأشياء ماهي موجوده فيه علشان كذا راح أكبر راسي شوي وماأترك له فرصه وراح أرفع نفسي عنه .
المجلة : محمد بن الحسين يسأل : لما لا يتم اقامة حوارات بين الاعضاء مباشرة ؟
أبو نواف : راح يكون فيه حوارات في المنتدى اللي راح يرى النور قريبا جدا
المجلة : الفيصل المنهالي يسأل : حبيت اسأل هل انت حسيت باي منافسه من اي قروب ؟ ورايك الصريح عن شعب الامارات وهل
زرت الامارات من قبل ؟
أبو نواف : شوف أخوي الفيصل المنافسه موجوده وأعتبر كل القروبات منافسه لي ولازم أتميز عنهم ورأيي بالاماراتيين هم أهل الخير ولا يهونون أخواننا الخليجيين والعرب كل اللي يجمعنا ألاخوه بالاسلام والمحبه ،،،، وراح أزور الامارات قريب ان شاء الله
المجلة : هواوي يسأل : كل شخص له طموح معين في مجال معين … هل حققت هذا الطموح في النت واذا تحقق بنسبة بسيطة
فكم النسبة ؟؟؟
أبو نواف : حققت الطموح اللي في بالي بالنت بس نسبته 5 % والباقي بالطريق إ ن شاء الله والقادم أحلى
المجلة : هواوي يسأل : لو جائك ابنك نواف في يوم من الايام وقال … ابوي ابي اشتري كمبيوتر عشان ادخل النت فماذا سيكون
ردك ؟؟؟
أبو نواف : أبشرك ابشتري له قبل مايقولي ،، بيني وبينك اللي مايعرف النت الوقت هذا راح يكون شبه جاهل واللي مايعرف النت بعد عشر سنوات هذا أكيد جاهل …

المجلة : كلمة أخيره نقفل فيها شكلنا طولناها مع الاعضاء ؟
أبو نواف : أشكر كل الاعضاء اللي سألوا واللي تابعوا الحوار هذا ,اقولهم أستروا ماواجهتوا وأحب أقول لكل الاعضاء طوال تواجدكم معانا في قروبنا المتواضع تأكدوا اننا راح نكون لكم عين فراش وعين غطا وأعذرونا على التقصير إذا بدر منا وأشكركم على ثقتكم بي وبقروبي .
في النهاية وصلتنا رسايل كثيرة تسأل عن كيفية أرسال المشاركات للقروب … اللي عنده أي مشاركه ويبغى يرسلها للقروب يرسلها على العنوان هذا :
[email protected]

المجلة : في النهاية نشكر أبو نواف على طولة باله معانا
والحقيقه وصلتنا المئات من الرسائل التي تحمل في طياتها العديد من الاسئلة وبعد تصفية و فرز الرسائل , اخترنا عدد منها وذلك
حسب تميز الاسئله

والشكر موصول لكل من : عزيز بن عزيزه – سوالف القايلة – خلووودي – لمشاركتهم بإعداد هذه المقابلة
——————————-
أجمل التحيات وأجمل الاوقات نتمناها لكم في قروب أبو نواف … مجلة القروب


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

أبو نواف فوق المجهر – المقابلة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول