آهات في مطاعم المطارات


بسم الله الرحمن الرحيم
أسعـد الله أوقاتكم بكـل خير
عندي موضوع اليوم .. ودي اكتب وجهة نظري فيه ,, واكيد اتمنى اشوف وجهات نظركم في هذا الموضوع ..

موضوعنا اليوم يتكلم عن (
آهات في مطاعم المطارات )

الكـثير منا في المملكة العربية السعودية او حتى من خارجها , غادر أو وصل الى مطاراتنا السعودية ..
ولعل مطار الملك عبدالعزيز في جدة هو الأكثر زيارة من الوفود الأجنبية .. نظرا ً لكثافة الحجاج والمعتمرين ..
في البداية .. خلوني اتكلم بالعاااامية ,, عشان اطلع الحررررة مضبوط

 
الجـشــع هو العنوان الأبرز في مطاعم المطارات والمقاهي المنتشرة ..
جـَـشـَع بكل ماتعنيه الكلمه من معـنى .. ناهيك عن المحلات الثانية ,, محلات العطورات .. والاتصالات .. والاحذية – اعزكم الله – والمكتبات … الخ
لكن خلوني اليوم اركز على موضوع المقاهي والمطاعم في المطارات السعودية ..
انا رحت كثيررر لمطار الملك خالد الدولي في الرياض .. ورحت كثيررر لمطار الملك عبدالعزيز في جدة ..
الملاحـظ .. في هذي المطاعم والمقاهي .. هو الاستــغلااااال الفاحش للمسافرين
اسعااار مضااااعفة اكثر من ست او سبع اضعاف عن الاسعار خارج المطار !!
وللأسف في جميع الاصناف … يعني الارتفاع ماهو حكر لـ صنف دون آخر !!
محلات الاحذية والاكسسوارات وغيرها … قد يجد صاحبها أو حتى البائع , مخرج من حرج السؤال ,, في حال تم توجيه السؤال له .. عن سبب ارتفاع اسعاره !!
يمكن يقول صاحب هذي المحلات .. اي عذر ,, لأنه يبيع سلع اسعارها غير ثابته .. الدول المصنعة لها مختلفة .. تكلفتها مختلفة …. الخ
لكن المصيبة في السلع اللي اسعارها معروفة وثابتة …!!
مثال .. علبة البيبسي ,, سعرها برا المطار ريال ,, لكن تدخل المطار , عشان تشتري علبة بيبسي لازم تدفع 6 ريال !!
المويه .. عشان تشتريها لازم تدفع 5 ريال , يعني لو انت رايح مع عائلتك .. وتبون تشربون مويه ,, وكان عددكم 5 اشخاص
راح تدفع 25 ريال عشان تشترون 5 علب مويه …!!
 
انا قبل ايام .. كنت في مطار الملك عبدالعزيز في جدة … وكان الوقت في الظهر
كنت ابي افطرقبل اقلاع الطيارة … رحت لأحد المطاعم ..
( فطور الظهر .. سلكوا لي لا تدققون )
لقيت عنده كروسان بالجبن .. سألته بكم ؟
قال ما تقدر تطلب كورسان لحالها .. لازم تطلبها مع وجبة !!
طيب لو اني ما ابي وجبة وش السواة ؟؟ بس ابي كروسان !!
قال لا .. لازم وجبة ..!!
قلت طيب .. الوجبة وش يجي معها ؟؟
قال معها كاس عصير وصحن صغير سلطة
قلت طيب بكم هالوجبة ؟
قال 35 ريال …….!!!
 
كان فيه جنبي ثلاثة شباب .. شكلهم يبون يتغدون ,, قالوا بكم نص حبة مع الرز ؟؟
قال 49 ريال ……!!!! طبعا سعر نص حبة مع الرز برى المطار 10 ريال ..
تركت هالمطعم .. ورحت لواحد ثاني ,, تذكرت يوم شفته اني قد شريت منه وجبة لأخوي .. وجبة كروسان وعصير وبطاطس .. بسعر 40 ريال !!!
لقيت واحد هندي يتمشي بالمطار .. معاه عربية وفيها كروسونات وسندويشات وبباسي ومويه وبايسن وكاوكاوااات وشغل مرررتب ..
قلت عاد هذا .. هو اللي اسعاره زينه ,, على الاقل لعل وعسى يبيع المويه بريالين ,, بزيادة ريال عن خارج المطار
قلت بكم المويه … قال ثلاثة ريال ( جزاه الله خير .. بس زيادة ثلاث اضعاف عن السعر العادي )
والكروسان الصغيره اللي بريال .. سعرها ثمانية ريال
والجوكليت اللي بريالين .. سعره خمسة ريال ..
والشاهي بأربعه ريال ..

لعنبو بلبسكم .. علبة ليبتون بثنعش ريال .. وتقعد اسبوع او اكثر
اووووه نسينا المقاهي .. المقااااهي يبي لهم الظاهر موضوع لحاله ,, اسعاااار خرافية .. كوب شاهي اصغر من النملة ( اتعب انا على الوصف
 ) تلقاه بتسعة ريال .. عااادي
لا ويمكن اذا طلبته وجابه لك على الطاولة .. اذا جيت تحاسب قالك 11 ريال !!
عشان السيرفس 20% وسسسسسع صدرك .. مادام ماحولك احد
كني اشوف واحد منكم .. يقول ياااااخي ترى الايجار عندهم غااااالي ,, بعذره لو يرفع الاسعار .. معه حق ,, بعدين ياخي انت مو مجبر .. تبي تشتري ادفع , ما تبي لا تدفع ..




طيب .. عطوني مبلغ فلكي .. مبلغ خراااافي .. ممكن انه يكون ايجار للمحل هذا ؟؟ علما ً بأن مساحة المحل ماتتجاوز 15 متر
يعني كم ايجار المحل بالسنة ؟؟؟ نقول مية ألف ؟؟ نقول ميتين ألف ؟؟
نقول ربع مليون ؟؟
طيب خلونا نقول ان ايجار المحل نص مليون ( 500 ألف ريال ) … حلو ؟؟
 
طيب خلوني اقولكم معلومة عن مطار الملك خالد في الرياض ..
سألت احد موظفي المطار .. كم رحلة يوميا في مطار الملك خالد ؟؟
قال المتوسط المتوسط … 180 رحلة يوميا ….!!! ولكن بعض الايام توصل 300 عااادي ..
طيب خلونا ناخذها بالمتوسط زي ما قال ..
كل رحلة من هالرحلات الـ 180 ,, بيكون فيها كم راكب ؟
نقول 100 راكب ؟؟ مع انه اكثر .. بس خلونا نقول 100 راكب ..
اذا كان في كل رحلة يوميا ً 100 راكب , وعندنا 180 رحلة ( متوسط عدد الرحلات اليومية )
هذا يعني انه عندنا 18000 راكب يوميا ً ..
لو قلنا كم راكب من هذا العدد الكبير .. راح يفطر او يتغدى او يتعشى او يتقهوى …؟؟
 
ماراح اقولكم خلونا نقول نص هالركاب بيشتري شي ,, لكن خلونا نقول ان 40% منهم بياكل او يتقهوى .. خصوصا ً ان مواعيد اقلاع الرحلات عندنا ماشاء الله .. تمشي بالضبطططط بنفس الوقت اللي يقولون !!!!!!
اغلب الرحلااااااات تتأخر .. مير تأخير ساعتين ذي مافيها طقة عصا .. بااااردة على القلب
من شان هيك .. تلقى اللي يتأخرون .. يا يتقهوون او ياكل شي .. او يخلي عياله ياخذون عصيرات والا عسكريمات …
اذا قلنا 40% من الركاب راح ياخذون من هالمطاعم او المقاهي ..
معناته انه عندنا 7200 راكب يوميا ً يشتري من المقاهي او المطاعم ( 18000 * 40% )

انتم لاحظتوا بعض الاسعار اللي قلتها لكم .. واللي كثيررررر منكم لاحظها بنفسه ..
عطوني مبلغ تتوقعون انه راح يدفعه كل شخص منهم ..
اذا كان سعر الوجبة 35 او 40 , والمويه 5 ريال والببسي 6 ريال .. والشاهي 9 ريال .. والحلويات والكيك 15 ريال وفيها …
يعني خلونا نقول متوسط المبلغ اللي راح يدفعه كل شخص في حدود 15 ريال !!
معنى هالكلام انه بيكون عندنا المجموع 108.000 ( 7200 راكب * 15 ريال )
هذا متوسط الدخل اليومي لمطاعم المطارات ,, اعتقد فيه مطعمين او ثلاثة فقط ( ما اتكلم عن المطاعم المعروفة .. دومينيز بيتزا وكودو وماكدونالدز وغيرها … )
 
اتكلم بس عن المطاعم الصغيرة اللي في المطار ..
خلونا نقسم هالمبلغ على ثلاث مطاعم ..
108.000 / 3 = 36000 ريال
هو متوسط الدخل اليومي للمطعم في مطار الملك خالد بالرياض
معنى هالكلام ان المطعم في أقل من 14 يوم يقدر يدخل مبلغ الايجار حق المحل .. واللي قلنا انه نص مليون ريال ..!!
لأن 36000 ريال * 14 يوم = 504.000 ريال
في اسبوعين فقط
انا ما أحسـد احد على الربح … لا والله , ولكن هذا اسمه استـــغلال يا جماعة الخير …!!

هذا اسمه جــــــــشــــــــــع !!!

وين حماية المستهلك عن هذا الإحتيــــــال …!!!
وين المسؤول عن هذي الأسعـــــــار ….!!!
انا ماني مقتنع أبد بمقولة تبي تشتري ادفع .. ماتبي انت مو مجبر على الشراء
هذي المقولة فيها لوي ذراااااع يا جماعة الخير …
هذي اسعار معروفة … كيف ترتفع بهالشكل هذا ….!!!
يمكن نقول معه شي من الحق .. لو ارتفعت الاسعار الى ضعف او حتى ضعفين !!!
لكن اللي نشوفه .. ان الاسعار مضااااعفة 6 او 7 او حتى 8 مراااات ….!!!
هذي وجهة نظري كتبتها لكم … لايمكن ان تكون صائبة تماما .. ربما يتفق معي البعض فيها .. ويختلف معي الكثير
.
.
.
صلوحكا


تعليقات 22

  1. ألف شكر أخوي صلوحكا على الموضوع الخطيررر ^_^ كنك تقول حماية مستهلك هعهع المفروض يغيرونها لـ((نسعى لضرر المستهلك))خخخـ من جد والله شي يقهر ويرفع الضغط وانـــا اختك قبل لاتسافر مر على بقالة حارتكم وعب لك اللي تبي اريح لك من نصبهم المحتاالين الله لنا وحسبي الله عليهم الله يعطيك العاافيه مووضوعن تووحفه ^_^

  2. والله ياخوي صلوحكا انا اقول نسوي مثل أيام المدارس كل واحد يجيب له قوطي جبن وسندويشات وماي وعصيرات .. وكفى الله المؤمنين شر القتال ولاتدري كيف .. لايسافر من اساسه لان اللي بيخسره في المطار اكثر من اللي بيخسره سياحة ..

  3. أنت تقول الكلام هذا وهو بالمطار طيب لانروح بعيد الأسعار برا المطارات بدت ترتفع وأنت تقول حماية المستهلك..أي حماية ياشيخ.. الناس تعبت وهي تقول وتكلم ولا عندك أحد

  4. السلام عليكم اشكرك اخوي على موضوعك الجميل انا صار لي الموقف مع الحلاق كنت قاصد اجي للمطار جده بدري عشان اتغدى , طبعا اسعار نار بس كان عندي خبر عن اسعار الأكل , ويوم خلصت من الغدى و اشوف ان معي وقت , قلت يا ولد خلني احلق و اتضبط , مبطي ما رحت لأهلي و الله و اروح للحلاق و بدون ما اسأل عن السعر , قلت اذا طقتها الحمى بتوصل خمسين ريال , و اقول له حلق دقن مكينه صفر , و تحديد شعر , لا وبغى يلعب علي و يخليني اسوي تنضيف وجه , بس اشوى الرحله ما بقى لها الى شوي , قلت ما يحتاج . والله يوم خلصت و اقول كم الحساب قال 150 ريال و الله اني انصدمت , لا و من زين الطبايع يوم استفسرت عن المبالغه في السعر , قال لي اذا تبي تدفع ولى عادي , وقسم با الله انها حلاقه اقل من عاديه , نعنبو بليسك , حلاقه دقن مكينه و تحديد شعر با 150 , من بعدها لو زواجي بعد ما انزل من الطياره والله ما احلق عندهم لكن الشرهه مهيب عليهم الشرهه على الي تارك لهم الحبل على ,,,

  5. عن جد صلحوكا تسلم يدك عالموضوع الفظيع وربي طول مانا اقرء وانا اقول برافو عليك ياصلوحكا وحسبي الله ونعم الوكيل عليهم .بجد ابدعت في الكلام والوصف وهم ابدعو في النصب والاحتيال علينا اله لايربحهم خير وتسلم يدك وشكرا

  6. مساء الورد.. بصراحه موضوعك اكثر من رائع والاسعار في الوقت الحالى مرتفعه بشكل خطير…. والاخطر من كذا سعر الرز..هههههه ماشاء الله الاخ محاسب بصراحه حسبه خطيره بس دخنا معك بالتوفيق اخوي

  7. اخوى صلوحكا اشكرك على موضوعك الى مافى احد من الناس الى تهمهم البلد راح يرد عليك ..الحين احنا فى زمن الفلوس ..وكل من يقول يانفسى ,,اخوى صلوح انا اقول لو تقعد بديرتك وتاكل خبرة وجبنة اوفرلك,, ولا هالمصاريف الى تصرفها حتى قبل سفرتك…ويسلموا على الموضوع

  8. بصراحه الله يعطيك العافيه والله قمة الاستغلال لو الواحد فيهم يفكر يخلي الربح ضعف او ضعفين راح يزيد عدد المستهلكين لاكن الطمع عامي قلوبهم

  9. بالعكـــس .. انا اختلف معك تماما اخ صلوحكا .. المفروض تكون الاسعار اعلى من كذا ,, انا لو كان لي محل بالمكار بخلي سعر كوب الشاهي 20 ريال .. وفيه من راح يشتريه بهذا السعر وانا وش علي مو البلد كلها نهب في نهب .. كلها حرامية وفساد .. واختلاسات .. وقفت على كوب شاهي يعني .. !!! يا عزيز احنا شعب اخرس … شعب يحب المرمطه .. خلينا كذا .. نستاهل … مو لو انا وانت والثاني والثالث .. مما اشترينا من مطاعم المطارات اللي انا اكثر واحد يعرفها … كان شفت الاسعار المضبوطه بضرب لك مثال صغير … الحي اللي انا ساكن فيه في بقالة صغيره .. فيها يمني يوصل الاغراض للبيوت … وكنت احاسبة بدون ما ادقق في الحساب ذاك الزود الى ان جاء يوم ولاحظت ان كرتون الموية زايد 3 ريال سعر .. قلت له ليش هالزيادة؟ قال حق التوصيل مع العلم انه يوصل الاغراض مشي لقربه الشديد من البيوت قلت له هالمره راح امشيها لك … وترى ريالين ما تستاهل تحطها في ذمتك رجع وسواها مره ثانية .. وبكل بجاحه اللي سويته انا اني قلت للجماعة الجيران على هالموضوع ووعيتهم علية … بعد اسبوع .. قفل ابو يمن البقالة كأني طولت بالحكـــــــــــي ..!!!

  10. يسلموووووووووو على الموضوع .إنت عارف اليوم الخميس الفجر الساعهاربعه وثلاثه عشر دقيقه شوفت الموضوع وكنت بالسوق يوم الاربعاء يوم مانزلت الرواتب وخبرك عارف مستلزمات البيت واله الزياده بكل شي والله إني انعميت بس مجبرا اخاك لابطل مانقول إلا حســــــــــــــــــــــــبي الله ونعم الوكيل نعم المولى ونعم النصير هذا تعبنا وهذا رزق عيالنا وهم ياخذونها من فم عيالنا

  11. وآلـله مآغـلطت بـ كلمة قلتهـآ كل هذآ آستغلآل .. نهب فـXـي نـهب آرحمونـآ يآنآس .. قـسم بالله مهزلة الوضع .. ومن المفروض المفروض المطار يشوت ذا الاشكال ويحط نآس تقـدر المشتري … بس لآحيآة لـ من تنآدي .. ومآقصـرت عالموضوع ..

  12. صباح الخير على الجميع اخوي بصراحة بردت خاطري وطلعت اللي بقلبي عليهم الوالد الله يجزاه خير ويطول بعمرة لو هو ميت من العطش ماشراء من المطار اذا عارف ان الدعوة فيها مرمطة ولطعة بالمطار ياخذ زمزمية شاهي وقهوة من البيت ويروق هناك زي ماقلت ساعتين ماتعوق لطعة وبالنسبة لحماية المستهلك ردد

  13. بصراحه تشكر على الموضوع وانا عقب ماقريت موضوعك يا صلحوكا بصراحه اجتمعت مع نفسي الحالي او لقيت حل قبل السفر بساعتين او ثلاث خذ صحن فول او سندوتش فلافل صبه او ببسي عائله طريقه مجربه تجلس 36ساعه ما تشتهي شي . وشكرا

  14. السلام عليكم ورحمة الله وبركاتة لا اطيل عليكم بكل اختصار أخوي صلوحي وأي قارئ لردي هذا …… هل تعمل كم اجارات هذه المطاعم والمقاهي بالمطارات ؟ اسعارها خياليه جدا فلا تلوم اصحابها اذا باعو بهذه الاسعار وجه الو لمن يملك هذا المواقع كي يستاجرها تجار هذه الشغله …. وشكرا

  15. والله بردت حرتي معى العلم اني مااوادي المطارات ولاقد سافرت بطياره ولكن حكاية الطمع والجشع هذا الي ما ارضاه وكلمة لوووي الذراع هذي في الصميم وهذا هو التفسير المنطقي يعني مكانك راااااوح

  16. لا تتحمس واجد يا صلوحكا .. تقول انك اكثر من مرة رحت لمطار الملك خالد والملك عبدالعزيز.. والغريب انك ماشفت مطارات غيرها عشان تعرف اننا زيهم مهنا فرق كل مطارات العالم في هذه الارض المعمورة دايم تكون اسعارهم مرتفعه

  17. بسم الله .. حياكم الله اخواني واخواتي جميعا .. واشكركم جزيل الشكر على تواصلكم واطلالاتكم وتشريفكم .. اسعدني حضور الجميع .. واشكر كل من كتب وعلق وادلى بدلوه .. ولازلت متمسك بوجهة نظري بأن مايحدث في ارض المطار .. استغلاااال فاااحش .. وجــشع مبااالغ فيه مايهمني اذا كان هالامر موجود في خارج المملكة او اكثر .. انا يهمني الشيء الموجود عندنا …!!! كل الشكر للجميع على التواصل والتشريف .. وما قصرتوا . . . صلوحكا

  18. ياخي المره الثانيه جب مويتك ولا فطورك من البيت ثاني شي انت ما تدري بكم يأجر المطار المحل مب اقل من4000،00

  19. بسم الله .. اخوي abo 9agr انت تقول : ثاني شي انت ما تدري بكم يأجر المطار المحل مب اقل من4000،00 لو قرأت موضوعي كويس .. كان لاحظت بأني قلت ان ايجار المحل قد يصل الى نصف مليون ريال ..!!! ومن خلال الموضوع .. اتضح ان المحل يستطيع جني اكثر من نصف مليون في اسبوعين ..! لا يمكن ان اكون مصيب تماما ً .. ولكنها اجتهادات .. اعتقد انها تقترب من الصحة وقد يختلف معي الكثير … شكرا لتواصلك يا عزيزي . . . صلوحكا

  20. جزاك الله الف خير على هذا الموضوع ما خلاهم يتمادون الا انهم لاقين ناس ساكته.. وماعليهم رقيب.. وهو الارتفاع الفاحش في الاسعار مو بس في المطارات.. حتى المواد الغذائية والخضار ومواد البناء…………. الخ ياتجار ياعالم خافوا الله.. فيه من المجتمع فئات حيموتوا جوع لو استمر الوضع على كذا.. فيه الارامل.. المطلقات.. ذوي الدخل المحدود.. فيه من يعيش على الضمان 1000 في الشهر.. ياناس شركاتنا الوطنيه ترفع الاسعار ليش؟؟ وهي لا جمرك ولاشي.. وسيبوكم من الحجج والاعذار الواهيه.. اتمنى الصوت يوصل للمسؤؤؤؤؤؤلين..

  21. مشكور يا أخي الكريم صلوحكا ،، الأمر في نظري هو جشع مثل ما تفضلت و هو لا يكاد يخلو من أحد أمرين و للأسف .. 1/ إما تواطؤ رئاسة الطيران مع أصحاب المحال التجارية 2/ جشع الرئاسة نفسها و عدم النظر للمسافر و خصوصاً في الرحلات الداخلية كـ مواطن و إبن لهذا البلد !! بإعتقادي أن العملية هي حصر لهاتين النقطتين !! حسبي الله عليهم حتى (( جغمة الماء )) بـ 5 أضعاف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

آهات في مطاعم المطارات

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول