{ SAW 2 … وتستمر لعبـة الموت }


الســــلام عـلـيـكــــــــــــم ؛

كيفكم ؟ اليـوم مافيه فيديو وصـور اليوم فيه رعـب يعني الي خايف يـرَوَح وكل واحد يتمسك في الي جنبه علشان ننطلق <<<– أسمع بالتشويق , المهم جايب لكم اليوم فيلم من احلى افلام الرعـب بالسنة الماضية الي هو بجزئه الثانـي بعـد ما انطرح جزئه الأول قبل سنتين .. حيث يستمر فيه اللعـب مع الموت saw

SAW ll

SAW




-: إخـــراج

Darren
Darren Lynn Bousman

يعتبر عمله SAW2 مخرج هالفيلم يعتبر تقريباً أول عمل له ! اذا تجاوزنا العملين العاديه الي قدمها في بداية الألفيه ف الأول في مجال الإخراج لكن الطريق أمامه واسع اذا عرفنا ان عمره مايتجاوز 27 سنه فقط , اما الجزء الأول اخرجه الشاب الماليزي جيمس والي ما ادري ليش استبعد من اخراج هذا الجزء وخلوه منتج فقط ! يمكن لانه مو امريكي <<– ياقافطهم يا أنا

-: الـكُــتــاب

Leigh Whannell
Darren Lynn Bousman

-: بـطـولــــــــة

Tobin
Tobin Bell AS Jigsaw

Shawnee
Shawnee Smith AS Amanda

Donnie
Donnie Wahlberg AS Eric Matthews

Erik
Erik Knudsen AS Daniel Matthews

Franky
Franky G AS Xavier

Glenn
Glenn Plummer AS Jonas

:

-: الـســــالفــــــة

على الرغم من انه في افـلام الرعب مانهتم كثير للقصـة بقدر الاهتمام بالمؤثرات وطريقة الاخراج والمدى الي يخليك المخرج فيه تقمط ام العافية , الا ان القصـة في فيلمنا كان لها حظور مميـز .. فـ جيغسو العقل المدبر في الفيلم يقوم بجمع مجموعة أشخاص يزعم بأنهم مايعرفون قيمة الحياة ومستهترين فيها ويقفل عليهم في منزل على أساس يبي يربيهم ويعلمهم معنى الحياة .. لكن الظاهر انه مايعرف يمزح لانه يمارس معهم ألعاب مختلفة فيها دروس والفشل فيها يعني الموت

طبعاً الشرطة تكتشف الموضوع من بدايته لكن مافي أحد يعلم موقع المنزل وكل ماقدروا يوصلون له هو العقل المدبر جيغسو والي دلهم على موقعه وحب يتفاوض معهم وجهاً لوجه , والأسوأ كان بأن الضابط او التحري المسؤول عن العملية هو والد أحد الضحايا دانييل الي محتجز مع البقية في المنزل

هذا المنزل موصل بتهوية تبث غاز سام مايحتاج اكثر من ساعتين حتى يقضي على الموجودين ! يعني مافيه احد يقول بجلس انتظر الشرطة لين تجي تطلعني .. الي يبي يطلع يحاول يطلع بنفسـه ويواجه ألعاب الموت الي وضعها جيغسـو او بالأدق انه يبحث عن الإبر الي تحتوي المصل المضاد للتسمم وهي موزعه في ارجاء المنزل , الضحايا هذي المرة ستة أشخاص فيهم تاجر المخدرات وفيهم المستهتر بالحياة وفيهم وفيهم ويشتركون كلهم بعـدم معرفتهم لقيمة الحياة

وفي الجهـة الأخرى كان مدبر هذي الألعاب جيغسو يتفاوض مع إيرك ماثيوس بكل برود أعصاب , لأن أي عمل يمارسه

ايرك ضد جيغسو ماراح يكون في مصلحة الضحايا المحبوسين في المنزل

الألعاب او التحديات الي وضعها جيغسو لضحاياها عـديدة في الفيلم ماحب أحرقه بذكرها لكن بكتفي بأول لعبة والي اكتشفت معها الشرطة بوجود المسألة بكاملها وكانت البداية

SAW

الضحية الأول يفتح عيونه ويلقاه في غرفـة ومربوط في راسه جهاز او قناع الموت والي مليان من كل جهه بالمسامير .. بعد ما استظرف جيغسو مع الضحية شوي قاله مكان المفتاح الي يقدر يفك فيه الضحية القناع , والي قدر القاتل ان يزرعه داخل عين الضحية بعد ماخدره وترك مصيره في يـده وقاله المفتاح خلف عينك .. تبغـى تفك القناع وتعيش طلع عينك وخذ المفتاح .. لكن الوقت دائماً أسـرع ؛

SAW

SAW
( ما مات ما مات ترا ( يقالي مااحرقت الفلم ) خخخخخخ )


:

-:صور

SAW
( والله يالمشهد يوجع )

SAW
( مسوي فيها قوي الحين ؟ طيب نشوف)

SAW
( هذا دخل للفرن يبي يسوي لقيمات مايدري انها تتسوى بالزيت ( م ا ص ل ) هع )

SAW
( الظـريـف جيغسو )

SAW
( وراه ماتصيح احسن يازلابه ؟ ومسوي القوي قبل شوي )

SAW
( ياعزتي لتس )
:

-:مـقـتـطـفــــــات عن التصوير

الفيلم اخذ من الطاقم 25 يوم تصوير فقـط , وكافة مشاهده تصورت في بنايه وحده بس


البوستر بتاع الموفي الي حاطه انا والي كان بالبداية هو الرئيسي انطلب انهم يغيرونه لان حركة الاصبعين ماكان مفهوم انها تعني الجزء الثاني .. لذلك نشوف فيه للفيلم اكثر من بوستر

في مشهد حفرة الأبر .. استخدموا 120 ألف إبـرة علشان يطلع المشهد كذا !! ليتهم معطينها مستشفى الملك خالد أبرك و لما بغوا يصورون مشهد سحب الأبر من يد اماندا استخدموا يد مزيفه الظاهر قالت لهم الدعوه ميب حلى أبي يديني , واخيراً احتاجوا أربعة اشخاص على مدى اربع ايام برضوا علشان يستبدلون رؤوس الأبر الحقيقه برؤوس من الليف

في بداية الفيلم لما ابو إيريك راح لمركز الشرطة حتى ياخذ ولده الصايع .. هالمركز ماكان الا غرفة الملابس لطاقم الفيلم !

شاوني سميث الي لعبت دور اماندا كانت اثناء تصوير حامل , لكنها ماعلمت المخرج او اي احد علشان ما يمسكونها الباب خخخخخ بس بالأخير بنتها كبت العشا وقالت للمخرج ترا امي حامل

اغلب الممثلين في الفيلم لما عطوهم النص ماعطوهم آخر 25 صفحه منه علشان يغبون نهاية الفيلم عنهم ! وماكان يعرف النهاية الا الممثلين الرئيسيين والمخرج والكتاب بس ! الله يخلف على طاش ما طاش

:
:

SAW lll

SAW

الجزء الثالث من الفيلم الآن شغالين عليه <<– اعقل يالكومبارس .. وراح ينزل في اكتوبر من هالسنه وبيكون من اخراج نفس صاحبنا مخرج الجزء الثاني , وبيكتبه مخرج الجزء الأول جيمس وان وأحد كتاب الجزء الثاني لي وانل وبيشارك فيه بعض ابطال الجزء الثاني ايضاً وهذولي هم الي بيلعبون البطولة فيه :-

Tobin Bell AS John Kramer
Angus Macfadyen AS Jeff Reinhart
Dina Meyer AS Kerry
Kim Roberts AS Deborah
Shawnee Smith AS Amanda Young
Bahar Soomekh AS Dr. Lynn Denlon

فــبإنتظار الجزء الثالث ؛

:
:

واخيراً اتمنى التقديم و الفيلم عجبتكم وان شاء الله اقدر اواصل سلسلة الاستعراض للافلام المميـزه .. ولا غنى عن اختياراتكم واقتراحاتكم وملاحظاتكم (( وإنقهر يابطارخ رح بع جح احسن لك ( يعني تراي انافسك ) )) .. واعتذر عن اي غلطه لاني شايف الفيلم من فترة مو قريبه

تحياتـي

Yazeed


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

{ SAW 2 … وتستمر لعبـة الموت }

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول