::: يوم في حياتي (DSL) :::

صباح الخير ومساء الخير على قلوبكم جميعاً ،،

طبعاً الغالبيه العظمى منكم أذا ماكان كلكم عندكم خبر بـ مغامرة تركيب خط الDSL في أي بيت !!

الجميل هنا في المملكه الحبيبه إنه اذا تبي تركب أي خدمه في بيتك (هاتف – كهرباء – عداد المياه ،، الخ)

لازم تاخذ فكره عن خطوات عمل اكثر من وزاره ،، وجزاهم الله خير على التثقيف الغير مباشر! بس شكراً محد طلب منكم

يعين أنا مو فاهم شركة الإتصالات شتبي من رقم عداد المياه علشان تركب خط الهاتف عندك؟!

شركه شكبرها ودخلها اللهم لاحسد ينافس شركات البترول وماعندهم خرائط دقيقه للمدن؟!

من كثر الأسئله الغريبه توقعت يسألني عن رقم لوحة سيارتي وألوان ملابسي !،،

ماعلينا ،، ماابي اتكلم عن هالموضوع كثير ، أكتفي بقول الله يعدّل الحال ..

اللي أمه داعيه عليه ، يطب في موظفين أعطال الهاتف قسم الDSL وهو ماعنده خبره ,, تعالوا نقرب أكثر ونشوف (( اللون الأسود موظف الإتصالات))

ألو ،، السلام عليكم

– وعليكم السلام ورحمة الله ياهلا اخوي تفضل كيف أقدر أخدمك؟

عندي DSL وإشتراك وكلهم أوكي بس النت مايشتغل!

– ممم طيب أخوي شنو نوع المودم اللي عندك؟ >>> بدأ الموظف يسوي فاهم

نوعه ××× وشريته بالشي الفلاني

– ماشاء الله ، المودم ممتاز جداً ،، طيب أخوي اطفي المودم 10 دقايق وإرجع شغله بيضبط معك

طيب أخوي شكراً لك

-ياهلا وتشرفنا بخدمتك

(( بعد ربع ساعه ))

الو السلام عليكم

– وعليكم السلام ورحمة الله ياهلا اخوي تفضل كيف أقدر أخدمك؟

الله يسلمك عندي مشكله في الDSL وكلمتكم قبل شوي قالي الموظف أطفي المودم 10 دقايق وأرجعه أشغله بيضبط ،، بس ماصار شي!

–لا يااخي مافي شي اسمه اطفي المودم ،، أصلاً المودم مصمم إنه يشتغل على طول >>> لا هذا باين عليه فاهم شوي

طيب يعني شنو الحل؟

-انت مشترك في أي شركه؟

مشترك في شركة ×××× وماخذ الإشتراك بالشي الفلاني

طيب اخوي سوي Reset للمودم وأرجع دخل الإشتراك من جديد بيشتغل ،، الشركه اللي انت مشرتك فيها دايم هذي مشكلته

أكيد يالحبيب؟

– إن شاء الله أكيد ،،

شكرا لك الله يعطيك العافيه

– ياهلا وتشرفنا بخدمتك

(( بعد أكثر من ساعه شامله التفحيط مع المودم لين تعرف تركب إعداداته ))

الو ،، السلام عليكم

وعليكم السلام ورحمة الله ياهلا اخوي تفضل كيف أقدر أخدمك؟

ياخي عندي مشكله كذا وكذا وقلتولي على كذا وكذا وماصار شي!!

طيب شنو نوع المودم اللي عندك؟

ياخي مالك شغل شنو نوع المودم ،، ولا لك شغل في الشركه اللي مشترك فيها

الله يسلمك عزيزي بس علشان أعرف مشكلتك وين بالضبط

طيب المودم كذا وكذا والإشتراك كذا وكذا>>> واعزتيلي ،، والله إني كسرت خاطر نفسي

طيب ياعزيزي ممكن تعطيني رقم هاتفك؟

تفضل 13456789

لحظه شوي … (( دقيقتين )) ،، أخوي رقم هاتفك مافيه DSL أصلا!!

نعم؟؟!! شنو اللي مافيه

مثل مااقولك أخوي ،، الخدمه مو مركبه عندك أساساً وأنا سويتلك طلب تركيب مستعجل ولا تزعل >>> يقاله فزع الحين

الله المستعان

(( وتتوالى الإتصالات ،، عندك DSL ، لا ماعندك ، السلك طويل ، السلك قصير ، أطفي المودم ، طبطب على المودم ، غسل المودم ، جيبله عصير ، لاتعطيه ظهرك علشان مايزعل ،،، الخ))

وانت يالغلبان اللي ماعندك خبره ماغير تدربي براسك وكل واحد يجي يسوي معلم وفاهم على راسك ،، وبالأخير إشتراكك خلص

وصرت مديون للإتصالات وجيبك فاضي من كثر ماتغير في هالمودمات ،، انا للحين مغير 3 مودمات

واللي يبي يجبر بخاطري يشتري مني هذا الآخير بما إن الاثنين اللي قبله الله يرحمهم