رسائل المجموعة

ياربّـي ! ، البالتوك .. والله مصييييبة !

السلام عليكم ورحمة الله وبركاته ،،
مسّاكم الله بالخير كلـّكم من أوّلكم لآخركم ..
ومسّأك الله بالخير ابو نواف وياجعلـّك ياربي بالجنـّة ،

قبل شوي إنتهيت من مشاهدة برنامج من البرامج التلفزيونية ،
البرنامج كان له أثر كبير جداً في نفسي .. وقبول طيّب ، صحيح إنـّه ضاااق صدري على الوضع الموجود .. وإنسدّت نفسي من كلام اللي قاعد يتكلـّم ..
لكن مؤمن تمام الإيمان بأن البرامج – رغم ماسبق ذكره – كان له وقع وتأثير ..

الصراحة ماأتمنى يكون بيننا ولافينا أحد له في أمور البالتوك ، اللي أغلبه دمار ووجع قلب قسم بالله ! ، إن ماكان كلـّه .
ماأتمنى فينا أحد دائم الدخول له أو مدمن عليه أو له يد في إدارة الرومات الموجودة فيه ..

في البالتوك أمور – ماتخفى عليكم – ، سبق إن أطلـّعت عليها بنفسي .. وربّي إنها توجع القلب وتسدّ النفس ..
مدري مايخافون الله ؟
أو عندهم عهد من الله بالجنـّة وبنجاة من النار ؟
مدري ماعندهم قلوب ؟ أو قلوبهم سوداء ؟
مدري ماكفاهم مافي حياتهم من ضيق وهم وغمّ ؟
مدري ماعرفوا إنّ الراحة وسعادة قلبك يابن آدم وطمأنينته كلها موجودة في قربك من ربّي ؟

يمكن بينقز أحد وبيقول ..
تركي ، لانتـّب مطوّع .. ولانتـّب شيخ .. وفيك وفيك ! ، وعندك وعندك ! ، وقاعد تنصحنا ؟ .. أنصح نفسك !
ياجماعة مافي ابن آدم ماعنده ذنوب ،
وكلـّنا مقصرّين وخطـّائيين ..
وكلـّنا عندنا أشياء ماأقول الا يارب تجاوز عنها وأغفرها لنا ،

لكن هل هذا يمنع إن الإنسان يكون قريب من ربـّه ؟
هذا أبداً مايمنع إنـّه كل ليلة وقبل ماينام يطفـّي اللمبات .. يصلي له ركعتين .. ويوتر بعدها بركعه .. ويدّعي ربـّه فيها !
أبداً مايمنع إنـّه كل شهر ياخذ من راتبه/مكافئـته 200 ريال بس .. ويتصدّق بها ، أو يكفل بها يتيم !

مايمنع أبداً إنـّه ( ولو كان يسمع أغاني ) يحطّ في سيارته أشرطة قرآن .. للقطامي والدوسري والجليّل .. واللي يحبّهم من قـُرّاء ويداوم بالإستماع لهم ، لاركب سيارته الصبح بيروح للدوام .. والا وهو راجع .. والا وهو بيقضّي مشوار بسيط ، مع الوقت … بيلقى نفسه حفظ سور كثيييرة .. وآيااات كثيييرة .. وبنفس الوقت بيلقى قلبه مرتاح أكثر من أوّل .. وحالته – إن شاء الله – أفضل بكثير من أوّل ..

 أنا يمكن أسهبت ( وبقوّة ) بالكلام ..
ونسيت أعطيكم أو أعلـّمكم وش هو البرنامج اللي شفته واللي كان سبب لكل اللي قاعد أسوّيه الحين ،

برنامج
 [ الجانب المُظلم ]
،
اللي يعرض بقناة المجد .. مساء الجمعة ..
مثل هالبرامج ماأحب أشوفها إلا لحالي ،
ولاأقدر أشوفها مع غيري !

لذلك ماتابعتها وقت بثــّها الرسمي في التلفزيون .. وحملـّتها من النت .. وشفتها قبل شوي : )
تبونها ؟!

 بالاخير عـُذرا إنـّي طوّلت ..
وعسى ربـّي ينفع بما كـُتب ،
ولاتنسوني من صالح دعائكم ..

أخوكم / تركي
ابو ريناز

مقالات ذات صلة

‫16 تعليقات

  1. السلام عليكم .. عزيزي الكريم .. اولا انا من رواد هذا البرنامج و لي فيه قرابة السبع سنوات .. أعلم انه يوجد رومات قذره و تدعو الى الرذيله و لكن على الجانب الاخر هناك رومات للاسهم ورمات مسابقات ثقافيه ورومات دينيه و يحضر اليها مشائخ معروفون ومنهم الشيخ عائض القرني و يمكنك التأكد من هذه المعلومه .. فأتمنى الا تعمم على جميع من يدخل هذا البرنامج انه ( خربان ) . اقدر لك غيرتك على ابناء دينك .. لكن اسمح لي ان اقول لك انك لم توفق في طرحك .. عموما تبقى وجهة نظر واحترمها .. لكن لا يجب ان تمليها على خيرك .. دمت بود

  2. تسلم والله ابو ريناز ..كأنك عارف اني ادور الحلقه من زمان .. جزاك الله الخير والبالتوك هذا على ان لي 5 سنوات ادخل نت ماجاني فضول ودخلته .. ولا ادري وش سالفته .. بس اسمع فيه ولا قد ذقته :d << حده منتديات وقرويات

  3. الله يجعلها في ميزان حسناتك ويجزاك الجنه وجميع المسلمين . بالذات الشيوخ (القطامي والجليل والدوسري)

  4. وعليكم السلام والرحمه … يزاك الله خير على الموضوع الطيب و التذكره القيمه ( فذكر فان الذكرى تنفع المؤمنين ) والله يرحمنا برحمته و يغفر لنا و يثبتنا على دينه وطاعته ولا يفتنا بما يردينا في نار جهنم و يرزقنا حسن الخاتمه ..

  5. اخوي …موضوع في قمة الروعة والله مع اني والله أسمع بالبلاتوك بس عمري مادخلته حتى للفضول …عسى الله يهدي الناس كلهم يارب يعطيك العافية وماتقصر

  6. . . . السلامـ عليكمـ ورحمة الله وبركاته ؛ حلقه مخيفه .. وصراحه ما توقعت ان في ناس كذا سعوديين بس هالحلقه فتحت عيونا .. الله يكفينا شرهم .. ويهديهم للي يحبه ويرضاه (((((((((((( ولكن …!!!! )))))))))))))) الله يهدي المجد بينت الجانب السيء جدا ً للنت كله ليه لأن الوالد و الوالده ما يعرفون للنت وعلى بالهم ان النت كله مثل هالحلقه يعني بإختصار وسوستوا بـ أمي .. ليلة البرنامج ما نامت قاعده جنبي عـ النت .. وانا والله حدي منتديات و مسنجر مع صديقاتي بس صارت ما تصدقني .. بالله عليكمـ .. هذا شي ما يضايق ان امي تشك فيني يعني حرام عليهمـ ياليت يعرضون كل الشرائح يعني حتى وانا ماشيه صح ياربي لك الحمد دخلوا الشك في هالسالفه .. وصارت كل يوم تهزئني .. ماادري ايش اقول …!!! بس ياليت ما يسودون الدنيا بعيون الاميين والسلام خير ختام دمتم في حفظ الرحمن . . .

  7. الله يجزاك خير اولا واخيرا وبالنسبه للبالتوك اعتقد من يفعل هذي الامور من القله والا الحمد لله المجتمع صالح

  8. السلام عليكم .. احب اهنيك اخوي ابو رناز ع طرحك لكن التمست فيه الحماس والانفعال وانا ما الومك انا شفت شوي من الحلقه وضاق صدري فما بالك بالحلقه كلها اممم انت حكمت حكم كلي ع البالتوك .. صحيح ما عمري دخلته ولا ادري وشو .. لكن قد سمعت مقطع عن مجموعه من الشباب الشيعه انتسبو ا للسنه بفضل الله ثم النقاشات عبر البالتوك يعني هو زيه زي اي تقنيه في الدنيا لها مساؤوها ومحاسنها ويدخلها الخم والطري فأنا مع الاخ رويال .. و ايضا مع الاخت ضفاف حلم انهم بينوا اسؤ جانب في النت

  9. السلام عليكم أخذت المقطع كاملاً لأني كنت أنوي كتابة موضوع يتعلق بهالبرنامج اللي أفسد الأمم والأخلاق .. لكنك سبقتني وذلك لفضلك وكرمك وحبك للخير .. برنامج البال توك لها محاسن كما له مساوئ .. ولكن البعض الله يهديه ماعرف كيف يستخدمه بالشكل الطيب وركب راسه الشيطان وصار يموج في بحر الظلمات والحرام .. بيّض الله وجيه المسؤولين عن البرنامج اللي كشفوا الستار القبيح للبرنامج .. لعل وعسى أن البعض يرتدع ويعرف طريقه قبل يصير مصيره مثل مصير تلك الفتاة الله يعفو عنّا وعنها .. شكراً لك وللإخوه والأخوات

  10. بصراحه قصه البنت اللى ماتت من كثر ماهي مأساويه وشنيعه ماقدرت اصدقها احس انها خياليه…الله يعفو عنا وعنها كل حلقات هذا البرنامج تعوور القلب..وماتخليني انام بالليل..واحس انها تفتح عيون ناس غافلين لأشياء شينه عموما مو انا اللى انقد مثل هذا البرنامج >>ضفاف حلم>>رحمتها تقول امها صارت تشك فيها بعد البرنامج 🙂 الحمدلله امي ماشافته

  11. الاخ الكريم ابو ريناز جزاك الله خيرا على غيرتك على ابناء المسلمين ولكن لى وجهة نظر ارجو ان يتسع صدرك لها انا لى تجربة جديدة على البالتوك ولقد سمعت بأذنى بعض الاشياء التى يندى لها الجبين من سب واهانة لرسولنا الكريم عليه السلام …. ولكن اتعلم ان هذه الامور كان لها وقع مختلف تماما على عقلى فقد جعلتنى افيق من غفلتى واحاول ان اجادل بالتى هى احسن كما قال رسولنا الكريم وعسى ان يهدى الله بي رجلا واحدا خير لى من حمر النعم …. لقد جعلنى هذا البالتوك اتساءل كثيرا وافكر اكثر …. ليس البلتوك وحده سيئا ولكن حتى الانسان نفسه في داخله جانب للخير واخر للشر … فليحاول كل منا ان يطغى خيره على شره وجزاكم الله كل خير

  12. بدئت بتحميل المقطع وبعد قرائتي للتعليقات وقفت التحميل … لان قريت كثير ذكروا انهم لم يستطيعوا النوم بعد المشاهده.. ياليت احد يبين لنا ايش فيها الحلقه بالظبط ؟

  13. بالفعل اخي احس انواع السماجه والضعف النفسي والصغر في العقل والعاهه المستديمه والتخبط بالعقل واللي مامنه رجا اللي يدخل على مثل هذي المواقع جزيت خير اخوي وانا احذر الناس منه وانا مادخلته لكن من كثر ماسمعنا من بلاويه الله يجيرنا جميع

  14. اولا بالنسبه للي سالوا عن الحلقه وش فيها حلقه عاديه مافيها شي يخوف ثمن اللي قال ان المجد بينت الجانب السيء ؟ اجل مووضوع مثل ذا تبونهم يقدمون الحلقه وهو متشققين وناسه وبعدين مقدم البرنامج قال بالفم المليان االانترنت فيه الزين وفيه الشين بس هذه حلقه اشوفها مهمه للآباء يشووفونها عشان يعرفون عيالهم وبناتهم وين يخشون ويتابعونهم فيه اباء مساكين يجيبون النت لعيالهم يبونهم ينبسطون وهم مايدرون مساكين مثل اللي صار للبنت هذي الله يرحمها وبس ويغفر لها صح انتي او انت بتقول والله انا الحمدلله حدي منتديات عاديه لكن غيرك مو مثلك فيه ناس قلوبها ضعيفه الله يجيرناو ياكم ويرحمها رحمه واسعه ويهدي كل الشباب ذكورا واناثا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى