رسائل المجموعة

و الله يا عالم أحبهم ** حب من خالص غلاهم

~] و الله يا عالم أحبهم ** حب من خالص غلاهم [~

هذي مشاركتي الثانيه من بعد
خطوط سريعه
وان شاء الله تعجبكم ..

مســ ــاء الطاعه
لكل أعضاء و رواد قروب بونواف  ..

من فتره كنت أتسكع على أرصفة المواقع و من موقع لي موقع ثاني و بحوستي المعتاده بعد منتصف الليل وصلت لملف صوتي كنت أدوره و بوصولي له وصلت لملف صوتي ثاني وكان يحمل هالكلمات :

يا ما دعيت في صلاتي
للي ماخذ كل غلاتي
و الغلا لأمي و أبوي
و هم كل شي بحياتي
يا حلو طلة وجيهم
و يا حلو نبرة حجيهم
يا بشر ما ادري شواصف
الله يا عمري عليهم
يا كبر حظي معاهم
و يا كثر فيني عطاهم
و الله يا عالم أحبهم
حب من خالص غلاهم
يا هلا بإلي عطوني
يا هلا بإلي كرموني
يا هلا بقلبي و روحي
و إن بغيتو في عيوني

بصراحه ظليت أعيد هالنشيده مليون مره لأن جد الكلمات وايد جذبتني خاصه انها كانت بالعاميه و حسيت هالكلمات طالعه من القلب و أكيد موجوده بقلب كل واحد منا
لأحلى اثنين بحياته الي ما لها معنى بدونهم إلي هم

امه و ابوه

ما اعتقد ان في احد ما يحب امه و ابوه و ان كان فأكيد لأسباب تسببو فيها له خلته يكرهم و هالشي بكون نادر بالنسبه حق الي يحبون أمهم و أبوهم ..

لي رجعنا لورى لأيام الطفوله أكيد بنتذكر لحظات تأففنا فيها من أوامر الوالد و الوالده و قلنا
يعني كلا انا ماكو أحد غيري كا مريوم قاعده ما عندها شي
كلا تطرشوني أففففففففف
و نقوم واحنا كلش مو من خاطرنا نسوي الشغله
بصراحه ليمن اتذكر اضحك على عمري صج ياهل ما حسينا بقدر الام و الابو الا يوم كبرنا و عرفا انا ما نقدر نتحمل بعدهم و فراقهم و هالشي شفته فيني
يوم ابتعدت عن امي اسبوع و يوم رجعت البيت قلت حق امي
تصدقين يما ولهت على كلمة يما
ومحد يوله على الشي الا لي كان يحبه و يعزه
كله بصوب و يوم سافر أبوي لمدة شهر جد كانت ايام الله لا يذوقكم اياها كانت مأساة بالنسبه لي
و صح لسان الشاعر الي قال :

تبي تحس بقيمة الي تحبه *** خله يغيب ايام و تحس بالموت

و دينا الحبيب ما قصر بهالشي يوم يوضح قدرهم بقوله تعالى :

وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلاً كَرِيماً * وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيراً[الإسراء:23-24].

و بحديث الرسول صلى الله عليه و سلم
(( حين سأل رجل الرسول صلى الله عليه وسلم : يا رسول الله من أحق الناس بحسن صحابتي ؟
قال : أمك قال : ثم من ؟ قال: أمك قال : ثم من ؟ قال : أمك قال : ثم من ؟ قال : أبوك ))

و إن رضى الله من رضى الوالدين طبعا بما يرضي الله تعالى

و قصة الرجل الذي استأذن الرسول للجهاد وحين سأله عن والديه قال بأن لديه أم فقال له ففيها فجاهد ..

وماكو شي احلى من ان الواحد لي غلط على امه و ابوه حب راسهم و تأسف لهم
و اعترف بغلطه لأنه أبد ماله غنى عنهم و صدقوني مهما غلطنا عليهم دوم يسامحون و يتجاوزون لان قلوبهم كبيره و ما أعتقد إنا ممكن نلقى أحد مستعد يضمنا بقلبه و يتجاوز عن غلطاتنا مثل أمنا و أبونا ..

أتمنى كل واحد يراجع نفسه و يفكر ان كانوا امه و ابوه راضين عنه و ان كان ميننهم و ملعوزهم اتمنى يعاهد نفسه انه يرضيهم و يفتح صفحه يديده ما يشوفون فيها منه الا كل شي يرضيهم
و صدقوني ان عصبوا علينا و دعوا علينا تراها مو من قلبهم واكبر دليل انهم يتضايقون لي دعوا علينا خاصه ان دعوة الام مستجابه و يتعوذون من ابليس و بصراحه كلا منا نقهرهم ليمن يعصبون علينا ..

يلا اشوف كل واحد يروح يحب راس امه و ابوه
و يطلب رضاهم و يشتري لهم هديه يونسهم فيها
على فكره لا تشتري حق امك بروحا او ابوك
يفضل ويا بعض تشتري لهم
لأنهم يغارون  من بعض ..

و ان شاء الله يعجبكم موضوعي البسيط

ودمتم برضى الرحمن ..

اختكم
نديمـ الروحـ

مقالات ذات صلة

‫16 تعليقات

  1. الله يعطيك العافيه على الاهتمام الوالدين وتذكيرنا باهمية الوالدين الي للولا الله ثم اهم ماطلعم\نا على الدنيا وحبيت اشكرك على الموضوع المهم عند كل واحد ووحده وشكرا

  2. مشكوره اختي نديم على الموضوع الأكثر من رائعيسمع هذا الصراحه رجعتينا ايام زمان يوم كنا صغار والله ايام حلوه واتمنى من كل غلط في حق والديه انه يراجع نفسه ويتذكر كلام الله ورسوله وسوووووري على الإطاله

  3. في البداية اشكرج خويتي الغالية عالموضوع الطيب .. فعلا مافي اغلى واثمن واخلص حب وغلا الا حبنا وغلانا لوالدينا حب نظيف وخالص لوجة الله سبحانه وكفيتي ووفيتي بارك الله فيج خويتج : ^MissTkana^

  4. كل واحد يروح يحب راس امه قبل ما يتمنى يحب راسها والله اني اتمنى شوفتها راحت قبل 6 شهور الى خالقها وهو ارحم الراحمين الله يرحمك يا يمــــــــــــــــــــــــــــــــــــــه

  5. جزاك الله خيرا على هذا الطرح المبارك أسأل الله تعالى أن يحفظ والدينا ويديمهم ويطيل أعمارهم على طاعة الله وتقواه دمتم بحفظ الله

  6. مشكور كثير بارك الله فيك لانه لازم نشوف مثل هالتنبيهات المهمه بين الفينة والاخرى لكن نسيت تحط الشي الي افتتحت به الموضوع وين رابط القصيدة الي سمعتها ما تخلينا نسمعها معاك

  7. ما شاء الله أحسنتي الإختيار.. الكلمات تجنن.. يسلموووووووووووووووو نديم عالكلمات الروعه…

  8. يكفي ان الاسلام موصي فيهم…. عاد انتي يوم تقولين ان لا تطاقون مع اهاليكم…. تذكرت نفسي انا وامي…. آآآآآآسسسسفففففه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى