رسائل المجموعة

وعدكـ متى..؟؟ الصّيف ولّى والشتاء..!!

///

<بالله ما أشتقتوا لـ تيمون..؟! / <<لا يكثر بس خخخ

بسم الله الرحمن الرحيم
السلام عليكم ورحمة الله وبركاته يا أطلق قروب فالعالم width=19
شخباركم يالربع والربعات؟ ان شاء الله بخير وتزقحون وكلش؟ /
وشسمه هذا الشي والله لكم وحشه الله ياخذكم<من زود الحماس يعني هههه /
الله ياخذكم للجنه يعني قصدي.. بعد عمرن طويل في طاعة رب العالمين.. اللهم آمين
هذا الجزء الثاني من موضوع ماليزيا.. بحاول أني ما أطول فيه.. وأجيب المختصر المفيد من سوالف وصور ومعلومات وكلش..
واللي يبغى الجزء الأول يطلع على هالرابط:
اضغط هنا

وترى الجزء الأول المفروض يجي بعد هذا لكن فيه أشياء تسبق أشياء بسبب لخبطة الصور عندي في الجهاز, لكن ألحين بديت أرتبها وكذا..
ببدأ من الرحلة في الطيارة .. أول شي رحنا عن طريق طيران الخليج المخيس.. صح أنه حطنا فالدرجه الأولى وجاب لنا كاجو وشغلوا لنا فلم مخيس وجابو فوط نمسح بها خششنا.. لكن يظلّون أطلق بمليون مره من الخطوط السعودية السروقة.. /
.
/
.
/
.
هذي من الرياض للبحرين, أما من البحرين لماليزيا درجة سياحية مخيسه لكن ميزتها الوحيدة انه تحقق حلمي وركبت جنب الشباك.. /
.
/

وهذي صورة لطاولتي يوم أكتب الجزء الأول من موضوع ماليزيا.. والحوسه اللي عليها..
طبعاً هذا سكن تبع الشركه, يعني نجمتين ونص.. وكان فيه صوارير توسع صدورنا وكذا /

/

هذي كانت بعض الصور اللي فاتتني فالموضوع السابق..
وإن شاء الله أنكم تستمتعون بالرحلة معي.. ودعواتكم لي بالتوفيق والنجاح.. في ظهر الغيب~
,
على طاري الاستمتاع.. الله يعينكم ياللي فالسعودية والرياض خاصه, والدول المجاورة عامة.. أنصحكم تهجّون لأبها أو الطايف.. يقولون فيها برادن يردّ الروح, والذمّة على الراوي..!! /
,
على طاري الراوي, أمنية حياتي أن شركة الكهرب ماتطلع فالصيف وتقول ماعندنا قدرة إستيعابية لتشغيل الكهرباء لأهل المملكة الله يحفظهم, ويبغى لنا مولدات كهرباء بتكلفة كذا وكذا مليون.. وبعدها تطلع وتسوي حملات إرشادية لتخفيف إستهلاك الكهرباء للمواطنين.. والمصانع وبعض القصور شغاله 24 ساعه وعليهم بالعافيه!! /
,
على طاري ساعه.. ودي بعد أن شركة المياة البايخة ما تقطع المويه عن بيتنا اللي فالرياض..
كل يومين جايبين وايت.. وأنواع الأسواق السوداء والقلق عشان تشتري مويه.. عشان تعيش.. بس! وكل يوم والثاني أخوي داق علي يقول كم رقم حق الوايتات اللي يعرف صديق خوي ولد عم خال صديقك /!!
سحقاً لمن ينهب ثروات البلد بإسم الوطنية وإنشاء المشاريع الوهمية ورحلات الحفر والبحث عن الكنز.!!
,
ويوم أننا سولفنا عن الكنز.. هذاك اليوم خويي ياسر كان تعبان ومزكم.. المهم أننا رحنا للدوام وفجأة تعب زيادة,,
خمس دقايق وتجمعوا 4 ماليزيين لابسين كمامات وقفازات ويمسكون ياسر وينادوني أنا وخوينا طه ويركبوننا سيارة زي الفان وكلنا ورا وهم قدام.. ويدعسون للعيادة ويكشفون علينا .. أشتبهوا أنه فينا أنفلونزا الطيور ههههه.. /
لكن الحمدلله ربي ستر.. وما صار في ياسر شي ولا فينا بعد,,
لما رجعنا للمكتب أنتشرت إشاعة أنه فينا الانفلونزا وكل العالم يبعدون عننا , وكل ما مرّينا من مكان تفرقعوا العالم هههههههههههه.. / إحساس بايخ جداً تحس أنك ماتروشت من أسبوع واللي جنبك ينحاشون منك ههههه /
لكن الحمدلله اسبوع وكل شي رجع مثل أول..
,
ودام جبنا طاري أول.. شرايكم أبدأ في موضوع ماليزيا..؟ أزين من هالخنقبه اللي فوق والمقدمه اللي ماتخلص.!! /

/

][مدخل][

وعدك متى ؟!..
الصيف ولّى والشتاء ؟!..
وأنا على الوعد القديم..
على رصيف الوقت.. ولهان يتيم!!
~
لا قلت باكر صار أمس..
وتمرّ بي شمس ٍ وشمس..
أرعى قمر..
ليل وقهر..
شطّ البحر..
أكتب به حروفي نثر..
أكتب به حروفي شعر..
يقبل ولا راح..!!
راح البحر..
يمحي السطر..!!
أنشدك علمني..
متى وعدك متى..؟!
~
//

/

Shoping][= التسوق لغير الناطقين بالسعودي][

بعض الأسواق التجارية اللي زرتها وأنصح بها:

Twins Towers

/

وهذا هو أفخم سوق عندهم, عبارة عن برجين تحتوي على محلات لأغلى الماركات العالمية وأفخمها..
يعني اللي يقولون هذا وعع وهذا بعشره مانبيه.. يروحون هناك ويطيرون فلوسهم بسرعة البرق.. /
لكن التمشية فالتوينز تاورز ممتعه جداً.. وأنصح بها وقت الصباح أو يعني قبل الغروب عشان اللي يبي يطلع أعلى البرج ويتفرج يمديه.. لأنه في الليل يسكرون المطلّ..

China town

/

هذا اللي نسميه يا عيال الرياض – سوق السويلم – تلقى فيه كلش رخيص.. وكلش تقليد.. /
اذا بتروح له ومعك عائلة أنتبه لهم وحاول تخفف اللي معك (مثلاً عربية أطفال) لأن الممرات ضيقة جداً هناك.. وزحمه برضو..
لكن فيه بضايع حلوه – ساعات – شنط – اكسسوارات – فواكه – خردوات – جزم وملابس
واللي يبغى يشتري لازم يتعلم فن (المكاسره), يعني اذا قال لك هالساعة بمية رينجت..
قل باخذها بخمسه وعشرين, وبينزل السعر وانت ارفع شوي.. لكن لايلعب عليك لأنه كسبان في كل الحالات لو يبيعها برينجت واحد..
أهم شي أنتبه لجيوبك ومحفظة النقود وجوالك, وحرمتك تنتبه لشنطتها وتتعلق فيها زين.. لأنه مع الزحمه يكثرون السروقين.. والحافظ الله,,

B B Plaza – bukit bintang plaza

/

سوق حلو موجود في منطقة بوكيت بينتانج – شارع العرب – قريب من قهوة ستاربكس, تلقون فيه أشياء حلوة وبأسعار متوسطة, يصلح لشراء الأغراض الشخصية مثل الملابس والجزم, وفيه كشكات ومحلات صغيرة تقدرون تشترون منها بعض الهدايا, لكن أهم شي تكاسرون فالسعر لأنهم من يدرون من خشتك أنك عربي يضربون فالسعر فوق,, /
يعني مرّه رحت بشتري هدية شنطة نسائية.. قال لي بـ280 رينجت, وجلست أكاسره لما وصلت لـ 100رينجت.. لكن ماشريتها لأنه ماكان معي غير 47رينجت وربع.. /

/

][فاصل][

هذي الليالي زغردت..
حتى ورق زهر الخريف.. أتورّدت..
أتخيلك لا جآ الوعد.. وحنـّآ جميع..
خصلات شعرك.. بس يوم أتمردت..
الصيف هو ويـّا الشتاء.. وفصل الخريف..
صاروا ربيع !!..
~
الدمعة اللي بالصُدف..
مثل اللآلئ بالصَدف..
نادر تشوف الدمعة..
اللي تنتظر موعد حبيب..
فيها فرح مع خوف..!!
فيها شوق مع موقف غريب..!!
أتخيلك في الموعد المقبل..
ولا أدري بس متى ؟!..
فيها أريج الورد لا غنى وعزل..
والموج لا طرز خزل..
فوق الشطوط اليانعه..
//

/

][أسباب الحوادث المرورية][

هذي بعض الصور أرسلتها لي الأخت ريما.. وحابه أني أنشرها للفائدة..
وإن شاء الله تنال إعجابكم..
وهي عبارة عن تصاميم لأشخاص كانوا يكلمون أشخاص آخرين عن طريق الجوال وهم يقودون السيارة.. فإنظروا وش صار فذاك..!!

/

/

/

/

/

][رحلة مصوّره إلى جينتنج][

في البداية بعرفكم على مدينة أو منطقة جينتج.. هي منطقة تقع فوق الجبال.. جوّها بارد نوعاً ما.. الفنادق فيها تناطح السحاب والضباب.. يوجد فيها مدينتي ألعاب خارجية وداخلية وأماكن تسوق ومطاعم ومركز مساج كبير والعديد من الأنشطة المتعددة..
تحتاج للذهاب اليها يوم واحد فقط.. المشوار ياخذ تقريباً ساعه الا ربع بالسيارة, واغلب الناس يروحون بالباص بدل التاكسي ارخص وافضل (وجهة نظر)..
الفندق اللي جربته هو first world وهذي صورة له:

/

فندق رائع جداً من ناحية خدمات ونظافة وإطلاله ع الحديقة او الجبال او المكان اللي تبغى.. واسعاره معقوله جداً..
وهذي صورة للإطلاله ومعانقة الضباب:

/

وباخذ جوله سريعه بالصور داخل مدينة الألعاب.. ويارب تعجبكم وتاخذون فكره عنها لو كتب لكم ربي تجون ماليزيا..
نستفتح بلعبة البزارين.. /

/

نافورة صغيرة راقصة .. ورئصني ياقدع.. /

/
.
هذي لعبة البزارين المراجيح يوم هجّت / شفتوا انها حقت بزارين ههههه

/
.
كل هذولا صافين سرا عشان لعبه وحده..
وخذ مننا الطابور تقريباً ساعه الاربع عشان لعبه بس.. الله لا يردّها /
غلطتنا جينا في وقت اجازة طلاب في ماليزيا.. لذلك كانت زحمه جداً ..

/

سباق سيارات.. طبعاً عكس مسارات السعودية ماشين ع النظام الاوروبي ..
يا كم مرتن بغينا نروح وطي , نبغى نقطع الشارع ونناظر يمين والسيارات جايه يسار / ههههه

/

هذي لعبة مخيسه نسيت وشي بس حبيت احط ذالمجسم .. عجبني وصورته /

/

هذي لعبة السفينة.. فيه ناس أبد ما أرتاعوا يوم ركبوها / هههههه
من ركبناها وهم حاطين يدينهم على وجيههم هههههههه / بدون ذكر أسامي طبعاً ههههههههه

/

هذي اللعبه تقول لك قوّي آلبك بس وآركب /

/

هذي اللعبه كل واحد ينبطح على بطنه زي سوبر مان.. ويتعلق فالحديده.. وتنصك من وراك حديده ثانيه..
والدببه ماتنفع لهم أبد.. الحديده ماتنصك ههههه /
وفيه ناس رجعوهم طبعاً.. وزن زايد.. شخبارك ياصديقي,, /

/

بعدين تطير في هالمسار كذا.. وتحس أنه وشسمه.. شوفوا الصورة بس.. /

/

نرجع للعبه اللي قبل شوي.. اللي عليها زحمه..
تخيلوا كم ارتفاعها بس..

/

طيب شلون لو كنت بتطير وسط الضباب؟ ههههه شعور مجنوووون!!

/

وهذي وجيههم.. ياهي أنعفست ههههه /

/

لقطة أخيرة قبل نطلع من الألعاب.. على الأسماك:

/

سبحان الله بس~
ايه صح قبل أنسى.. عندهم مثل اللي عندنا فالثمامه ههههه بعضهم يلعبون ع العالم بهالألعاب..

/

رجعنا للغرفة وضفينا عفشنا.. ولما طليت مع الشباك بودع المكان البطل اللي كنا فيه.. ويطلع لي هذا الشي وروعني , بسم الله الرحمن الرحيم ههههه /

/

قررنا نرجع بالتلفريك.. الله يا أبها بس <<لايكثر ههههههه /

/

حسبي الله على بليسك يا ياسر.. أنا وش لي بذالخرابيط هههه والله جابت لي المغص!! /

/

منظر خوقاقي يستاهل العنوـه!!

/

مدري وشو ذا بس ان كانه بيت مدري وش يحسون به وهم ساكنين هنا..

/

القطار اللي ركبنا فيه ورجعنا للمدينه اللي نحنوو فيهاا..

/

وهذي آخر صورة قبل نوصل الشقه من القطار على أحد الشوارع.. الله يذكرك بالخير يازحمة طريق الملك فهد خخخخ /

/

/

][م ـخرج][

أرعى قمر..
ليل وقهر..
شطّ البحر..
أكتب به حروفي نثر..
أكتب به حروفي شعر..
يقبل ولا راح..!!
راح البحر..
يمحي السطر..!!
أنشدك علمني..
متى وعدك متى..؟!

//

/

][ختاماً][

ختاماً.. أشكركم على متابعتكم الموضوع للآخير, متمنياً أن يحوز على رضاكم وينال ذائقتكم الراقية..
دعواتكم لأم سلطان وأم مصعب بالشفاء العاجل.. ويرجعون بالسلامه..
وألف مبروك للناجحين والخريجين.. مقدماً,
سبحانك اللهم وبحمدك, أشهد ألا إله إلا أنت, أستغفرك وأتوب إليك
لا إله إلا الله وحده لا شريك له, له الملك وله الحمد وهو على كل شيء قدير
سبحان الله وبحمده, عدد خلقه, ورضى نفسه, وزنة عرشه, ومداد كلماته
اللهم صلي وسلم على سيدنا ونبينا محمد وعلى آله وصحبه أجمعين
حسبي الله لا إله الا هو عليه توكلت وهو ربّ العرش الكريم

للمزيد:
مدونة بدر الشوق
www.b-alshoq.com
من إختياري:
موقع القرآن الكريم
www.tvquran.com

كتبه وأملاه:
باء نقطة شين
بدر.الشوق
وفي رواية:
أبو سعد

///


تابع جديد رسائل المجموعة على تويتر

/
twitter.com/AbuNawafNet

مقالات ذات صلة

‫18 تعليقات

  1. والله عشت الجو حتى خويك اللي ردوه عن اللعبه شكله شرب شاهي على ما اتخلص اللعبه يعطيك العافيه عالموضوع

  2. طبعا يعطيك العفية على الصور وماقصرت بس حبيت اخبرك بان مدينة لنكاوي افضل واجمل مدن ماليزيا طبعا من ناحية المناخ والطبيعة الخلابة حيث انها تعتبر افضل مدينة ريفية بماليزيا وغير هذا يوجد تلفريك فيها يعتبر افضل رابع تلفريك بالعالم وزد على هذا نهر التماسيح وقرية النسورتخيل تجلس بالقارب والسواق يطفية ويقعد يصفر وبخلال 2 تجد النسور على كتفك وكهف الخفافيش . . . الخ فلنكاوي افضل مدن ماليزيا وسلامتكم

  3. يعطيك العافية على الصور الرائعة وصار خاطرنا نروح ماليزيا

  4. سباق سيارات.. طبعاً عكس مسارات السعودية ماشين ع النظام الاوروبي .. يا كم مرتن بغينا نروح وطي , نبغى نقطع الشارع ونناظر يمين والسيارات جايه يسار يعطيك العافية على الموضوع الرائع والله انك أكثر شخص انتظر رسائله بالمجموعه ~

  5. تبي الصراحة رحلة فله ووناااااسه يالبى ماليزيا والله العظيم انك مبدددددددع وصور احلىىى ابداااع يمه ابي اروووح ماليزيا مااابي مااابي ابي ارووووح

  6. السلام عليكم ورحمة الله وبركاته والله يا اخي الفاضل رحلة تجنن خاصة وانا لم اسافر الى هناك ولكن الصور جميلة وهنيالك يا عم تحياتي

  7. هذه الالعاب جميلة جدا بس انا اخاف من العالى وعمرى مافكرت اركب اى لغبة فى اللاهى

  8. :D:$ابدااااااع يابدوووور >>مسوية تموون هههههه المهم بجد الصور رووعه ومتعووب عليها والتعليقات اروع يعطيك العافيه عالمجهود الرائع وسلمت يمينك :D:$

  9. تعليق بسيط وهو تصحيح املائي ( وعدك متى ؟؟ الصيف ولى الشتاء ) تكتب (والا) ليس (ولى) وتشكراااااااات على الموضوع D:

  10. مـــــشــكــووووووور ع الـــصــوووور وسعت صدورنا شوي.. الله يــوفــقــكـ دنــيـا وآخــرهـ:D

  11. مشكور يالغالي ورحله موفقه واقتراحي لك أنك تعرض هذي الرحلات بدون صور نساء وموفق يالحبيب

  12. يسلمو على التقرير والتغطيو الرائعة بس اخوي يقول جوها حار بالحيل والله لو اجيد التصوير كنت صورت رحلتي لالمانيا يوم الخميس 8في الشهر للنمسا و شوارفسكي و ميونخ وبرلين وزلمسي و لاهنت

  13. مشكلة الي يتفلسفون وما عندهم الا الدجة .. الرجال يقصد ولى يعني (راح) (ذهب)… الدرعمة ماهي بزينة .. افهم أول بعدين انتقد الناس

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى