رسائل المجموعة

نخجل لذالك .. + صور من عدستي الرقميه Nikon D80

بسم الله الرحمن الرحيم 
بسم الله نبدأ وبسم الله نختم لقائنا ..
بإسمه الواحد الأحد يبدأ كل شي وينتهي عندهـ كل شي ..

 طبعا موضوعنا راح ينقسم لقسمين .. 

قسـم ( نخجل لذالك )
قسم ( عدستي الرقميـه Nikon D80 )

 وراح أبدأ مع قسـم عدستي الرقميه Nikon D80
الحمدلله بعد عناء طويل     إشتريت D80 باركولي (:
وانا مبتدئ بالتصوير وماعرفت الإ للوضع P حاليا من الدائرهـ الى فوق الكاميرا ..
فذالك لأصحاب الخبـرهـ لايبخلـون علينـا بتوجيهاتهم P:
أما بالنسبـه لـ M , S , A
هذولي واجهت مشاكل معهن وخاصه M والله يانا فحطة لما قلت بس علشان اطلع منه بصورهـ ..
وليته صوره زينه ..
طبعا الصور راح تكون عبارهـ عن ورود وبعض الاشجار لأن هن الوحيدات الى لقيتهن ثابتات ..
عندك الطيور والنمل وأي شي يتحرك عجزت اصورهن
الطير اذا قربت له هج
وقالي واحد لزم يكون عندك عدسه مثل 18 – 300 علشان تجيبهم من بعيد
والنمل احط المرشح وحالتي حاله والاحق وحده ومأدري الا مندسه بمكان  ):
بالاخير إستسلمت وقلت يازين الورد والشجر هههههههههه

 

الأدوات المستخدمه
عدسة 18 – 135
ومرشح تكبير +4

 (1)
عندما تحاكي القطرات ألوان الزهور والأوراق ينتج لنا تهيج يطلق عليه ( إنجذاب ) للمنظر

        

 

        

        

 (2)
الأبيـض .. شبيـه بالنـور .. والنـور إطلق عليـه أخ السعادهـ .. فلنسعد بالتأمل بـه

        

(3) 
إندماج .. زهرهـ تلي زهـرهـ .. لكل زهرهـ ميزهـ عن غيرها

 

(4)
سبحان الخالق .. نعجب للأشجار الكبيـرهـ فكيف بشجرهـ تخرج شجيرات ..

        

(5) 
ثمار وأوراق كتب عليها الموت وتساقطت .. فاجتمعا بمكان واحد ليرسموا منظر رائع ..
هذا يطلق عليه وفاء مابعد الموت ..

        

        

(6) 
وهذي اعتبرها من المتحركات لكن المتحركات البطيئه ومع ذالك ماطلعت معه الا بصورهـ
وحدهـ حلوهـ .. ):

        

نصائح :
1- أنصح للمبتدئيـن أن يقتنيوا كتاب إسمه ( أسرار التصوير الرقمـي )
للكاتب : سكوت كيلبي
وهذا صـورتـه ..

        

جدا رائع وأنا إستفدت منه أشياء حلوهـ وانا بالبدايـه ..
لكن فيه حاجه غريبه بالكتاب P:
بنهاية الكتاب فيه عنوان يقول أنصح بإستأجار عارضـه ( أجرها أرخص مما قد تعتقد )
إشطبوا على العنوان هذا لأنه موب حاصل عندنا
<< يخاف يقوم واحد ويخربها هههههههههه

2- للمبتدئ .. لايتعدى D80 إذا كان ملزم يقتني كاميرا إحترافيـه ..
لأني قابلت مبتدئيـن يرغبون با إقتناء D200 وصعبه هذي الكاميرا .. اغلب التحكم فيها عن طريقـك
فلذالكـ غب دراهمـك ووفرهن لأغراض D80 وإشتر عدسهـ 18-300 او 18-200
3- يمكن أول ماتشتري الكاميرا .. راح تحس بتضايق لأنك واجهت أشياء جديدهـ ماتعرف تتحكم فيها
لايضيق صدركـ هذي بدايـه .. ووحدهـ وحدهـ راح تكتشـف إن الأمر سهل ..


 4- إنتبه !!
لاتصير مثلي بغيـت اروح ملح
لاتصير فرح ومن شفته تصورهـ تحسب الدعوهـ فري
خل بدايتكـ مع الشجر والطيـور مثلي مايقولن شي هههههههههه
وبكرهـ إذا عرفوكـ الناس إقعد صورهـم
وهذا والله أعلم .. وأتمنى إني أعجبتكم بالصـور .. وإستفدتوا من النصايح ..
ونستقـبل إنتقاداتكم وأرائكم ونصايحكم بكل صدرن رحـب على

مدونتي

 


 أما الأن مع القسم الأخر ( نخجل لذالك )

فنبدأ من عند ( الهوى الغايب ) ألبوم يفتتح به نصف السنـه لأصحاب القلوب المريضه فهوا مخدر جديد لهم ..
وننتصف عند ( إحساس ) وماقصر هذا الشخص .. فقد أضاف أوهام جديدهـ وأمال مختلفه ..
 ومن ثم يأتي ( راشد وأحبابه ) ويضفون اللمسات قبل الختام ..
وننتهي عند ( روح روحـي ) .. فشكرآ فقد أعطيتنا مخدر يضل لنهاية السنه ..
 
عجب العجاب .. ماينتهون هؤولاء ؟
ردح خلف ردح
 
والطامه الكبرى الحيـن فيه فنان ماقصر بقولتـه الرسول سعودي

وطريقة الإفتاء بمجال الغناء عندما قال الاغاني 95% حرام شرعا ..
مادري لايصير الأخ داخل يساهم بشركه ؟!
وكلمته عن طلال مداح وعن هدفه بموته على المسرح !!
أي هدف وأي مبتغى من يختم أعماله ممسكا بالملهيات ..
هذا هوانا الغايب ( فنان العرب ) فشكرآ لك على توضيحك لدين الاسلام وعلى جعلك الناس يقتدون بطلال مداح ..
 
ومن ثم نأتي لصاحب الرومنسيه ( إحساس ) من بعد ماكان الطبل والهيص لعبته ..
إتجه للرقه والنعومـه .. والله يستر وش راح يسوي بعدين ..
 
ولا ننسى المود الجديد من الإغنيه المتداوله بين الجميع ..
إدعي علي بالموت ولا سمني ؟!
من ألبوم ( راشد وإهباله )
فباللهي هذي كلمات ؟!
والغريبه إني أسمعها من ناس يرددونها على ألسنتهم ومادري هم يعرفون معناها ولا لا ..
ولا بس أعجبهم اللحن ووزن القافيه وقال هذي هي ..
وشفته بواحد انا أعرفه ..
يرددها على لسانه .. وبديت وراه كل ماقالها أقوله يارب موته وأردده ..
قالي منصور وش فيك ؟!
قلت أنت تقول إدعي علي بالموت ولا سمني ولو معي سم كان ماقصرت معك
طبعا الحوار هذا جايبها من باب المزح بيني وبينه ..
لكن أبي أبينله إنك قاعد تقول شي ممكن ربك يقبلها ويصير شي لايحمد عقباهـ ..
 
وننتهي على الى أزعجنا كثر مانسمع منه ( روح روحي .. ياروح الروح .. أرواح عمري .. ياروح المقناص )
أنا مادري كم روح عنده ذا ؟!
صارلي موقف مع واحد بخصوص هالأدمي ..
طبعا إحتدينا بالحوار عن الفنانين .. فقالي خالد عبدالرحمن رجل ..
قلت رجل ؟
قال إيه ونعم الرجال
قلت والسبب ؟
وإسمعوا الجواب .. لو هو قايلي يكفي إنه بعيني رجل أرحم

قالي يكفي إنه مايجيب بنات بالفديو كليب
هذا جواب ؟!
انا احسب يبي يقول إنه يتبرع للفقراء ويقوم بأعمال خيريه ..
أنا مادري وش فيهم العالم صارت الرجوله على كيفهم ..
 
 
طبعا يمكن تتسألون ليه أنا شاب على الفنانين ؟!
مو علشانهم طلعوا بهالصورهـ .. ولا علشانهم يأتون بأمراض النفوس من كل مكان ..
ولا علشان زلاتهم ولا لو على الزلاة حدث ولا حرج ..
أنا شاب علشان أبين وش هم بالأصل .. لجل الى قاعد يدافع عنهم يعرف وش يدافع عنه بالضبط ..
فمسألة الرسول سعودي ..
 قريت المواضيع المتنوعه بخصوص هالأمر .. ولقيت الى قاعد يبرر لهذا الشخص ..
وش عليه تبرر ؟!
طيب فرضا طلعوا كل الناس غلط وانت الصح .. وين ينتهي هالشي هذا ؟!
 ينتهي إنه مغني مايجلب غير الذنوب والمعاصي
تحبه ؟!
انا ماقولك لاتحبه ..
حبه وعساك تنحشر انت وياهـ بيوم القيامه .. ووقته تعرف إنك غلطان بمحبتك لمثل هالاشخاص
( إعذرون على هاللفظ لكن انا بهالمواقف الى تحمي تسبدي أصير بدوي )
 لكن يا عزيزي غيرك هنا قاعد يصلح المجتمعات الهايمه خلف هالامراض وانت قاعد تهدم كذا ..
كلنا عارفين إن من أهداف الإسلام هو اسعاد الانسان ودفع المضار عنه
وماينتجه مثل هالاشخاص ماغير التعاسه والمضرهـ ..
فلا تأتي متطوال بلسانك ومتحاذق بذكائك تعتقد أن ماتفعله هو الصحيح ..
لا والله .. وأقولكـ من الحيـن بقلبك مرض ..
ومرضـك هذا إذا ماعالجتـه الأن .. راح تندم ندم ..
 
نقطه بنهاية السطر ..
 
مانستفيدهـ من بعد هذا الموضوع ..
 
1- النور نور والظلمه ظلمات

 ولو إدقق أخي القارء بالجمله إن النور وضعته بالنهايه مفرد .. عكس الظلمه بالجمع ..
لأن النور .. هو نور واحد وهو طريقك لربك .. ماتتركهـ لأجل ربك يعوضك الله بخيرا منه ..
لكن الظلمه ظلمات .. الله وحده يعلم كم ظلمـه تذهبك عن أجمل نور .. نور ربك ..
فابحث عن نورك ولا تستسلم لظلماتك ..
 
2- قال الرسول اللهم صلي وسلم عليه .. (( المَرْءُ معَ مَنْ أَحَبّ ))
يالى قاعد إدافع تحت سقف المحبـه لهم .. باللهى عليك لو أنت عاقل
هل ترضى أن تبعث وبجانبك شخص لم يعرف الإ بالغناء ؟!
وإذا كانت الإجابه نعم .. لأن البعض ( المهبل ) وصل فيهم الامـر لكذا
فالله يعيـنك على المصيبه الى أنت فيها ..
 
3- أنا ادري فيه ناس راح يدخلون من باب الإسلام وراح يقولون
هذا مسلم ومن حقه إننا إندافع عنه ..
انا ماقلت لا دافع .. دافع لكن بشي معقول ..
إذكر محاسنه على الاقل ..
 مع إني متأكد لو تبحث صح ماراح تلقاء الإ العكس
يعني ماتجي وتقول إنه ماقصد بقولته إن الإسلام 95% حرام والباقي حلال ..
هذا شي مايبيله نقاش ..
وقولته اصاب الهدف طلال مداح بموته على المسرح ..
يعني فيه إمور .. وقف عندها .. وكلنا عارفين إنه غلط ..
ولو تقول عكس الشي هذا .. يدل على نقـص بتفكيـركـ ..
 
4- تنوعت الكلمات .. وتشكلت الصور .. فهذهـ تحلف بغير الله وهذا يتمنى من يدعى عليه بالموت
 إذا كنت شخص مبتلا بالسماع والنظر الى ماحرم الله .. فا أجعل ذنبك على نفسك .. ولا تطلقها بين الملاء
بترددك لها .. ونصحك للناس أن يستمعوا وينظروا إليها ..
فقد قال الله تعالى (  إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ  )

5- أتمنى ومن كل قلبي .. إن الموضوع يقراء أكثر من مرهـ لأجل أن يستوعب بشكل أكبر ..
فسبب بعض الأخطاء أعزائي من بعض الاخوان
إنه يقراء الموضوع مره ومايصدق على الله يخلص الكلام يقوم ويبدا يحكم ويقذف ..
فلذالك .. الموضوع أمامك .. ماراح يهج .. بس إقراه بهداوهـ .. وإفهم حلاوتهـ ..
 
هذا والله أعلم ..
كل ماكتبت إجتهادا لمرضاتك يارب فما كان من صواب فبعون منك

وماكان من خطأ فمن نفسي ومن الشيطان ..

Mansour

مقالات ذات صلة

‫35 تعليقات

  1. أعجبني شيئين في إيميلك الرائع .. أولا روعة التصوير واللقطات << حطيتها خلفيات .. ثانيا غيرتك المحمودة والرائعة ومن يقرأ ما بين السطور يجد نفورك من المعصية والجهر بالمعاصي وهذه والله وتالله وبالله إنها نعمة عظيمة إذا دخلت القلب جعلته أبيضا نيرا , للأسف نرى رسائل كثيرة فيها من الإبداع ولكن نجد صور لنساء وأغاني أو كلمات أغاني وفحش لا ترضي رب العالمين , محمد عبده الصعلوك يتطاول على نسب رسول الله وحبيبه وخير خلقه والسراج المبين والنور الهدى والحق محمد الهادي المتهدي محمد رحمة للعالمين يتطاول على نسبه هذا الصغير الحقير الفقير المرير ويأتي من أخواننا من ينافحون عنه !!؟ لو فكروا قليلا لرأوا أنهم وقفوا ضد رسول الله صلى الله عليه وسلم واصبحوا خصومه يوم القيامة نسأل الله السلامة والمعافاة . أخي الكريم أشكرك من أعماق أعماق قلبي وأتمنى أن تواصل رسائلك الهادفة وتمتعنا بتصويرك المذهل , وأنا لا أعتقد أنك مبتدئ على الاطلاق .. وواصل الله يوفقك

  2. ماشاء الله عليك خيال الصور وخصوصاً الشجرة (: بالنسبة لموضوعك من جد حاجة مخجلة لما نجي نبرر لشخص غلطان خصوصاً إذا كنت معجب فيه : وعين الرضا عن كل عيب كليلة .. بالنسبة لي كنت أشوف شاعر هو الأفضل لكني صدمت به ووقتها عرفت انه اقيم الشخص على مااقدم لاعلى شخصيته اما كلمات الأغاني فحدث ولا حرج مهزلة غير عن اللي فيها لفاظ شركية وهي كثيرة شكرا لك وعذراً على الإطالة

  3. ما اش ءالله تبارك الله أسلوبك جدا جميل وكلامك 100% أنا عن نفسي أصوتلك الأخت مين قلها برنامج مسابقات بارك الله فيك أخي وكثر من أمثالك

  4. . . . . كنت احسبك محترف تصوير فقط ….. . . . لكن بصراحة …اتحفتني …بتعليقك …البطل . . . تسلم ..يالغلا …وتسلم يمناك على ما خطت … . .ويعطيك العافية

  5. بارك الله فيك اخوي منصور وكثر الله من امثالك بالصراحه كلامك ع الجرح

  6. تصويرك عجيب ماشاءالله واسلوبك اعــجب.. عــسى المعجــبين المهبليسمــعون بقلوبهم ويعرفون انحلالفنانينهـمالأخــلاقي لــوين وصــل من جــد -نخجل لذلك- يارب جعله في ميزان حسناااتك

  7. يعـطيك العـافيـه على المـوضـوع اللي مافيـه أجمـل منـه وخـاصتن المقـال الروعـه ,واللـه صـدقت بكـل شيء قلتـه وأن شاء الله الواحـد يراجـع نفسـه ويعـرف أنـه مـاشي غلـط بـ غلـط . . أوووه لـو فيـه منكـ أثنيـن

  8. ماشاء الله عليك والله قمه كلامك ياليت اللي يدعون مثل اسلوبك والله مقنع ومن جد قريت الموضوع للنهايه وتصدق حمست كبدي بعد

  9. مرحبا اخوي مشكور علي هالمواضيع الرائعه بس حبيت اعرف كم سعر الكميرا D80?? بصراحه حابب اشتري كاميرا بروفيشونال

  10. ينصر دينك ياخي , والله إنك بردت تسبدي من هالطبالين ذولا. أنا ما قهرني إلا إن فيه ناس تدافع عن هذا الي يقول الرسول عليه الصلاة والسلام سعودي ويكبرونه ويقدرونه ,, على وشو؟ طبااااااال أبو عود ما عنده شي , الله لا يفتنا بس

  11. الصوره كانت اكثر من رائع وعقبال تنزل صور طيور وحباري وضبان (طبعا بالتمرس لان الضب مو من الزواحف من الطيور من سرعته)

  12. صورك رائعة وممتازة بالنسبة لمصور مبتئ سيكون لديك مستقبل كبير إنشاء الله في الفن (فن التصوير P: ) ملاحظة أكثر شيئ أعجبني بصورك هي صورة السلحفاة، ياترى هل هي لك؟

  13. لا فض فوك وبورك ماخطته يمناك،أسأل الله لك الثبات أجمل ماكتبت في موضوعك(نخجل لذلك) -بل والله يتفطر القلب وتغار النفس على دينها لذلك- آخر السطور(مايستفاد من الموضوع) نسأل الله العفو والعافيه ونسأله تعالى لنا ولهم الهداية وعن الصور أنصحك بأن تهتم بموضوع الصوره لا لجمالياتها،وكذلك أنصحك بإختيار الزاويه المناسبه للتقاط الصوره،وأنصحك أيضاً بتصوير الشروق والغروب،البحر… وأعتذر على الإطاله،جزاك الله خيراً وفق الله الجميع

  14. بوركت ياأخي رائع..مبدع.. وأتمنى لك المزيد من فتح أبواب الخـــير

  15. بسم الله الرحمن الرحيم بداية أسأل الله العلي العظيم أن يجعل ما كتبته في ميزان حسناتك .. صراحة وتؤمن بالله إني كنت أتوقع معد به أحد من الشباب ما يسمع أغاني… ياخي والله العظيم إني حتى بال school مع خوياي يقولون غريبة أنت ماتسمع أغاني…؟؟؟ تطور كل البشر يسمعون..!!!!!!1 للأسف أن بعضهم وصل به الأمر إلى أن يجعل من أولئك السفلة مثالاً وأنموذج له… صراحة أنا أسأل الله لي ولك ولجميع المسلمين الثبات وأن يهدي الغافلين.. وأسأله سبحانه أن يجزيك خير الجزاء …

  16. روعه… التصوير خليه شوي على جنب.. القسم الثاني عبرت عن كل اللي بخاطري.. ما اقولك انا مااسمع بس مو مثل الشعب اللي 24 ساعه لدرجه اعرف بنات وهم يذاكرون يسمعون اغاني!! حياتهم اغاني ماادري كيف عايشين وليش عايشين!! ولووو سمحت ياويلك ان غلطت على فنانها المفضل!! ناس عقووولهم كذا (.) ربي يسعدك ع هالكلام.. واحلى شي يوم طلعت حرتك وقلت تحشر معه بيوم القيامه

  17. السلام عليكم ورحمة الله رائع رائع رائع بكل ما تحمله الكلمة من معنى اخي الكريم من العام 1396هـ وانا اتعبث بالتصوير والى اليوم احس اني مثل اللي يتقدم خطوة ويتراجع خطوتان 🙂 قرأت اربعة او خمسة سطور وسأعود لموضوعك الثري بحق واذا وجدت فرصة فسأضيف تعليقا اخر بعد القراءة تقبل تحيتي واحترامي

  18. السلام عليكم ورحمة الله وبركاته اول شي خلني اقولك ما اشاء الله عليك الصور روعه وفنانه ثانيا الله يجزاااااااااااك كل خيير على كلمة الحق اللي كتبتها وانا معاك في كل حرف … تسلم وعساك ع القوه

  19. كلام رائع..بس ياليت خليت كلامك اقل حده من كذا..لان الذمم بيد الله..بس كلامك مقنع مااالله..الله يباك فيك..

  20. ما شاء الله صور روعه كنت احسبك محترف ولو ما ذكرت انك مبتدئ ما بين .. وشكر كبير على الكتاب القيم .. تحياتي (F)

  21. لله درك أخوي والله يكثر من أمثالك.. السؤال اللي يطرح نفسه.. أن اللي تحمسوا لمحمد عبده وقلبوا الدنيا عشان يلاقونله أعذار.. ياترى كلفوا نفسهم بشيء قليل من التعصب للرسول عليه الصلاه والسلام.. للاسف تركنا شفيعنا يوم القيامه.. وصرنا نجري وراء ممثلين ومغنيين.. هذا حال أفضل أمه أخرجت للناس..

  22. السلام عليكم ورحمه الله وبركاته تسلم ايدك على الصور اخوي منصور اول شي راح اقولك عليه هو الاشياء الي تبي تعرفها عن الكاميرا m : هو انك تستعمل الكاميرا يدوي تماما تحدد كل شي بنفسك من ناحيه فتحه العدسه و سرعه الغالق والايزو وغيره . A : هذا فتحه العدسه هنا انت تتحكم بفتحه العدسه والكاميرا تعطيك سرعه الغالق طبعا هالتقنيه مريحه جدا احسن من اليدوي . s : هذي سرعه الغالق انت تحدد سرعه الغالق والكاميرا تعطيك فتحه العدسه يعني تريحك بدل ما تحسب حساباتك وتتعور راسك P : هذا الاختيار لا يستعمل ابدا ابدا لانه معقد جدا يعني حتى لما كنت ادرس التصوير المعلمه كانت تقول اننا ما نستعمله ابدا لان ماله فايده تذكر نظرا لتعقيده . انشاء الله اكون افدتك يارب وبالنسبه للصور لي ملاحظه اخوي اختيارك للموظوع جدا رائع لاكن الصور غير ناجحه فنيا اقولك ليش لو ركزت بالسلحفاه اساسا هي صغيره انت داخل زوم عليها بقوه و فتحه العدسه غير مناسبه تلاحظ هالشي بالجهه اليسار للسلحفاه ضاع منك الفوكس بالنسبه للصوره الاولى ضايعه معالم الصوره لعده احتمالات ممكن تكون مصورها على سرعه غالق بطيئه بدون حامل للكاميرا وطبعا مستحيل تنجح الصوره بدون حامل في حاله سرعه الغالق اقل من 60 وما دون او انك ماضبطت الفوكس مضبوط وعلى فكره بالنسبه لنوعيه الصور الي انت عرضتها مايجتاج لها مرشح انت لو تبي تصور اشياء صغيره زي قطرات الندى و النمل و غيره لازم يكون عندك عدسه ماكروو اسفه على الاطاله بس تسعدني جدا محاولاتك الجاده للتصوير خاصه انك تعلم نفسك بنفسك وهالشي جدا رائع وفي مواقع جيده لتعليم التصوير الفوتوغرافي تقدر تستفيد منها انتظر محاولاتك الجايه قبل لا اروح انت قلت ان في احد نصحك بعدسه 18 – 300 العدسه هذي جدا متقدمه وماراح تستفيد منها حاليا لان هالرقم ماراح يفيدك غير في الزوووووم اقولك حيله انا اسويها بالصور عشان اجيب الزوم بطريقه افضل طبعا انا عدستي نفس عدسه الكاميرا ماغيرتها بعد ما اصور اقوم ادخل على المنيو واعمل قص للصوره قبل القص اقرب اكثر شي واقص تجي الصوره مثل ما ابيها بالضبط خاصه الاماكن الواسعه الي ماتجيبها الزوم عندي خلاص والله ماراح اقول شي ثاني لاني طولتها تحياتي

  23. ما أجمل أن يغار المسلم على ما يمس دينه واسلامه فعلا يدافعون عن انااس لاتستحق اصلا ان ينظر لهم فالله عز وجل لاينظر الى الأشكال ولا الى الاجسام ولكن ينظر الى القلوب والسعيد من آتى الله بقلم سليم جزاك الله خيرا اخووووي

  24. جزيت الجنة على التصوير الرائع والتعليق الاكثر من رائع ونسأل الله الهداية للجميع

  25. مشكور اخويهـ على الصور الحلوة انت دومك ابداع وفن ولا تحرمنا من ابداعاتك

  26. كلام جميل وأسلوب رائع وتصوير فعلاً ينم عن ذوق رفيع وإحساس مرهف وشعور نقي أما موضوع الفنانين فقد أصبت كبد الحقيقة وكنت محايداً ووسطياً في طرحك وكذلك منطقياً إلى أبعد الحدود مشروع كاتب وناقد وفنان (مصور) لا يشق لك غبار سر إلى الأمام وأتمنى أن أقرأ لك مستقبلاً فأنا من هواة النقد والرسم والتصوير إلى أبعد الحدود ، بالتوفيق أن شاء الله

  27. الاعلام عندنا يروج لمثل هالامور وتجد في الوسط الاعلامي من يبجل اللاعب والفنان ويجعل من حركات سخيفة تصدر منهم اعمال بطولية !

  28. السلام عليكم اشكرك على الصور ولكن ازداد شكري لك عندما قرات الموضوع الثاني اكيد ان هذا يدل عاي وجود الايمان والايمان خاصة في وقتنا الراهن قال تعالى(كل من عليها فان) فماذا اعددنا

  29. هلا اخوي منصور موضوع رائع خاصة في قسمه الثاني و ازين شي يوم عصبت يا حليلك و الله هذي العصبية اللي نبيها التعصــــب للدين مع اني ما فهمت اكثر اللي قلته لاني و لله الحمد ما اسمع غنا ثاني شي انا معي كاميرا مدمجة لها سنتين معي و دايم اطلع على منتديات التصوير المتخصصة عدسات عربية و غيرها ابي نصيحتك اشري احترافية و لا انتظر بعد ؟ و وش رايك في الكانون d350 خيصة بس مدري عن امكانياتها اخر شي بكم شريتا ال d 80 جزاك الله خير

  30. السلام عليكم جزاك الله خيرا اخي الكريم واكثر الله من امثالك لازلت اقول ان الدنيا بخير والناس فيهم بذرة طيبة عندما اشاهد غيرتك انت وامثالك الطيبين ننتظر قادمك الطيب بحراااااااااااره وشكراا..

  31. موضوع رائع وصور اروع .. بالنسبه للكتاب وين القاه في اي مكتبه بمدينه الرياض ؟

  32. آهليين أخووي بصرااحه صورك كمبتدأ رائعه جدآ واتمنى لك التوفيق بس سؤال صغونن بكم شريت كاميرتك؟؟>> ادري لقافه بس انا ودي اشتري لي وحده ودي اعرف كم سعرها والكتاب اللي حطيته وين القاه بالضبط باي مكتبه ،، وشكرا لك

  33. لا اعلم هل اتعجب من روعة تصويرك المحترف او من حلاوة وروعة منطقك وعقلك وغيرتك الاسلامية اولا : سوف اسرق بعض هذه الصور كخلفية للشاشه وان شئت فأقم الحد علي او اقعده 🙂 وبالنسبة لموضوعك الاروع فساقتطعه لأرسله لأناس من اصحابي لعل الله ان ينفع به وجزاك الله خيرا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى