رسائل المجموعة

مغامرات الفضاء Grandizer جرندايزر

بسم الله الرحمن الرحيم
السلام  عليكم ورحمه الله وبركاته
** ينصح بإطفاء الانوار و تغميض العينين حتى تخش جو وترجع لطفولتك << وشلون بيقراء الموضوع اذا غمض عيونه

جرندايزر – مغامرات الفضاء

مغامرات

 عارف اني قلبت المواجع للبعض .. و البعض الأخر ضاق صدرهم << شكلهم كانوا يتابعون هايدي و فلونه 

شخصيه غرنديزر شخصية لا تنسى في تاريخ الرسوم المتحركة و من أفضل ما عرض على القناة الأولى . وهو انمي ياباني ويعد من اشهر المسلسلات الكرتونية في العالم العربي . يتكون من 74 حلقه مختلفة وهو من عمل المؤلف جو نوجاي . ولم يلقى في اليابان نجاحا يذكر قارنه بما لقيه في الدول العربية .

القصة :

صراع بين الخير والشر , قائد الشر فيغا الكبير وهو الد الاعداء لكوكب الارض ولي شخصيا نوايه واضحة من شكله وهو ويا  خشته وهي  السيطرة على الكون عن طريق رجال آليين وحوش ضخمته يقودها اعوانه ( بلاكي الشرير و قندال وباقي الشلة) . وفي مره من المرات وهو جالس يدمر في هالكواكب طاح في كوكب فليد المسالم وبدا بتدميره وهرب منه ابن الملك ( دوق فليد ) على المزيون جرنديزر ( ويسمى قرنديزر بلغه اهل السويدي و لبخه وحويته ) والي كان يطور ويجهز بأحدث التقنيات . عندما هرب قرنديزر من كوكب فليد وبدا يهيم في الفضاء الخارجي سقط على كوكب الأرض بعد أيام متعبا ً وعثر عليه الدكتور امون رئيس مركز ابحاث الفضاء في اليابان وقام بتبينه ( الوصخ كان طامع في قرنديزر ) وأطلق عليه اسم دايسكي .

مغامرات

في الفضاء الخارجي و تحديد في مجلس الرجال في سفينة فيغا الكبير . كان فيغا  جالس يسوي قرعه < يبي يشوف وش الكوكب إلي جاء عليه الدور عشان يدمره طاحة القرعة على كوكب الأرض وعندها قال بلاكي : وش رايكم نعيد القرعة ؟ << في باله كوكب ثاني .  أرسل فيغا أعوانه للبداء بالتدمير وعندنا يصل رجال فيغا تفاجأو بوجود قرنديزر ( زين الحلايا )  على الارض .

مغامرات

في بداية المسلسل كان تركيز فيغا على تحديد موقع اختباء قرنديزر السري ومعرفه من يكون هو دوق فليد . وكلما تقدم المسلسل يركزون على إيجاد نقاط ضعف لـ قرنديزر لكي يتمكنوا من القضاء عليه وكلما تقدم المسلسل كلما  انضم أبطال والى جانب دوق فليد للدفاع عن كوكب الأرض . ( مثل : كوجي و هيكارو و ماريا أخت دوق فليد ) وفي نهاية المسلسل يتمكن دوق فليد و فريقه من القضاء على فيغا الكبير واسطوله قضاء نهائياً يغادر بعدها دوق فليد و أخته ماريا الأرض عائدين إلى وطنهم الأصلي كوكب فليد ولكنهم يعدون في العودة يوما ما . ( ترى الوعد الحر دين وما زلنا ننتظرك<<< تحمس )

 مغامرات

اللغات والنسخ :

ترجم قرنديزر الى عده لغات لان النسخه اليابانيه لم تلقى روجا كبيير كما اللغه العربيه . والسبب هو لان اليابانيين لم يتقبلوا ان يأخذ دور البطوله شخصا غير كوجي وان يمثل دورأ ثانويا . لان شخصيه كوجي كانت بطله انمي سابقه وهي مزنجر زد ( Mazinger Z  ) وبعدها جريت مزنجر ( Great Mazinger ) . في  مسلسل قرنديزر تظهر شخصية كوجي كطالب ياباني يدرس في شركة ناسا الأمريكة وبعد تخرجها منها يعود لليابان ومعه مشروع التخرج الخاص ( التيفو ) .

مغامرات

أسماء جرندايزر باللغات المترجم إليها :
1-     الاسم بالأسباني : Duke Fleed
2-     الاسم بالياباني : UFO Robo Grendizer
3-     الاسم بالإنجليزي : UFO Robo Grendizer
4-     الاسم بالفرنسي : UFO Robo Goldrak
5-     الاسم بالإيطالي : Atlas UFO Robot
6-     الاسم بالعربي : مغامرات الفضاء جرندايزر

يتكون مسلسل الجرندايزر من 74 حلقه مده الحلقة الواحدة حوالي ( 21:45 ) واحد وعشرين دقيقه و خمس وأربعون ثانيه . << ترى تزيد وتنقص مهوب القاكم جالسين بكره تحسبونهن عشان تحجرون لي

مغامرات

معلومات عن فريق العمل :
مؤلف مسلسل قرنديزر هو الياباني الشهير ( جو نواجي ) وله عده أعمال مشهورة كـ مزنجر و سلسلة ديفل مان .
تاريخ الانتاج : 1975-10-05
تاريخ الانتهاء : 1977-02-27

مغامرات

أسماء المدبلجون للغة العربية :
دايسكي : جهاد الاطرش .
كوجي : عبد الله حداد.
هيكارو : نوال حجازي .
ماريا : ريما حداد.
جورو : سوسن.
دامبي : مروان حداد.
فيغا : صبحي عيط .

مغامرات

مواصفات جرندايزر :
تم تصنيع قرنديزر في كوكب فليد المتطور علميا ً . وهو يعد من أقوى المركبات في العالم ( بعد الكامري << مراهق في حي الشفا ) . يتكون قرنديزر من قسمين رئيسيين هما دايزر وسبيزر
دايزر هو الرجل الألي و سبيزر هو الصحن الطائر الذي يحمل الدايزر ولا يستطيع دايزر الطيران بدون سبيزر ومصدر قوتهما الطاقه الفتونية ( طاقه ضوئية )

مغامرات

مواصفات الدايزر :
الطول : 30 م .
الوزن : 280 طن .
طول محيط العنق : 7.5م . << ساده ولا قلابي ؟
طول محيط الصدر : 21 م .
طول محيط الذراع : 7.2م
طول محيط الساق : 8.8م.
طول الذراع : 10.5 م .
طول الساق : 16.3.
طول القدم : 5 م .
السرعه : فوق الضوئية .
قوة القفز : 1000 م .
القدرة 1.800.000 حصان .
(( جميع المواصفات صحيحه 100% وقد اخذت من خياط قرنديزر الخاص ))

مغامرات

مواصفات سبيزر :
الطول 34 م .
الطول عند اتحاده  مع دايزر : 40 م . << 6 م كلها من قرون قرنديزر 
الوزن : 150 طن . << بالاستبنة والتانكي فل .
الوزن الكلي م دايزر : 430 طن .
السرعة ( الطبلون يعني ) : 9 ماخ . < ماخ هي سرعة الصوت

مغامرات

(( ترى التندهـ ما تمخشت ))

اسلحة جرندايزر :
يوجد هناك العديد من الاسلحة والتي كان يستخدمها قرنديزر وهناك نوعين , اسلحة من دايزر واسلحة من سبيزر .

الاسلحة الصادرة من سبيزر :
1-     الصحن الدوار .
2-     الثاقب الدوار .
3-     الصحن الثاقب .
4-     الرشاش الصاهر .
5-     الامواج المغناطيسية . < لم يستخدم هذا السلاح الا مره واحدة فقط عندما يحاول وحش من فيغا الامساك بقرنديزر وهو ينفصل عن سبيزر .
6-     مشوش الرادار .
7-     السرعة القصوى .

مغامرات

مغامرات

الاسلحة الصادرة من دايزر :
1-     قوس الكتف المرتد .
2-     الرزة المزودجة .
3-     الزرة المفردة .
4-     رعد الفضاء .
5-     عاصفة مضادة للجاذبية .
6-     اللكمة المخلبية .
7-     اللكمة الساحقة .
8-     لكمة دايزر .
9-     شعاع اليد .

10- صاروخ اليد . << لم يستخدم سوى مرتين في جميع الحلقات في حلقة 47 و 66 .
11- شعاع دايزر  . << يخرج من العين ولا يعتبر سلاح فعال ولم يستخدم سوى مرتين .

مغامراتمغامرات

مغامراتمغامرات

مغامراتمغامرات

قاعدة جرندايزر :

مغامرات

بعد أن وجد الدكتور امون قرنديزر و دوق فليد قام ببناء قاعدة له تحت مركز أبحاث الفضاء وهي عبارة عن مخرج رئيسي و 8 مخارج إضافية مختلفة قليل ما يستخدمها قرنديزر .
* المخرج الطبيعي : يخرج من الشلال الاصطناعي من مركز أبحاث الفضاء وهو أكثر مخرج استخدم في المسلسل  .
عندما يقرر قرنديزر الخروج من غير المخرج الرئيسي فانه ينزل بـ قرنديزر إلى الأسفل حيث يوجد 8 بوابات . والبوابات رقم ( 1- 3- 6 8 ) لم تستخدم ابدا في المسلسل .
·        المخرج رقم 2 : ينطلق قرنديزر خلال كهفين كبيرين في جبلين أثنين , لينهي به الماطف خارج من بين أشجار كثيفة . < استخدم في الحلقة 45 .
·        المخرج رقم 4 : ينطلق قرنديزر خلال جبل بركاني ويعبر في طريق انشـأ خصيصا لعبور قرنديزر و الحمم البركانية تبدوا في أسفل انطلاقة لينهي به المطاف خارجا من الجانب الأخر للجبل . استخدم في الحلقة 35 و 40 و 50 . << يقولون والعلم عند الله ان ما يروح مع ذا الطريق اذا كان المكيف خربان .
·        المخرج رقم 5 : ينطلق قرنديزر خلال طريق كأنبوب لينتهي به الماطف خارجاً من تحت سطح البحيرة القريبة .
·        المخرج رقم 7 : ينطلق قرنديزر من خلال كهوف جليدية لينتهي به المطاف خارجا ً من شلال ماء بعيد بعض الشيء عن مركز ابحاث الفضاء .


بينما أنا ابحث عن قرنديزر وجدت حلقة غريبة جدا للمسلسل وعلى حد علمي انها ما نزلت عندنا في السعودية , وهي عبارة عن اتحاد بين 3 شخصيات في مسلسل واحد . وهم : قرنديزر و قريت مازنجر و قيتا روبو جي ( Grendaizer & Great Mazinger & Getter Robo G)
أنا أتوقع أن هذا الانمي نزل بعد قرنديزر  كـ تجربة و بائت بالفشل  .

صور من المسلسل …

قرنديزر

قرنديزر

قرنديزر


Mr. A

مقالات ذات صلة

‫27 تعليقات

  1. ياخي والله انك فله ذكرتني بايام زمان وتوني اعرف اشياء عن جرانديزر ما كنت اعرفها طريقة طرحك للموضوع جدا رائعة << اول واحد علق على الموظوع 🙂

  2. هههههههههههههههههه… الله يعطيك العافية والله رجعتنا لأيام زمان وحلاوة ذيك الايام.. وماشاء الله عليك حافظ أبوه حفظ ها المسلسل… حتى أنا والله يأني احبه هالقرندايزر.. والتعليقات مرررررره حلوه.. وخصوصاً حقة المكيف خربان كككككككككككككككككككككككككككككككك ومره ثانية يعطيك العافية.. وننتظر جديدك

  3. بارك الله فيك أخى موضوع رائع جدا و فكرتنا بالذى مضى بس كان نفسى الموضوع يحتوى على حلقات من المسلسل

  4. مشكووووور عزيزي على المعلومات الثمينه 🙂 عاد انا شخصياً ماتابعت المسلسل .. بس ناويه ان شاءالله 🙂 لكن كان اخوي يمووووووت فيه .. واكيد راح ارسل له هالمعلومات .. : : : على فكره !! أذكر (( علوك )) بنص ريال كانو يبيعونها فيها صور لقرندايزر .. والله ياكانت شي ..!! ريحتها تقعد الرااااس 🙂 يسلمووووو عزيزي ..

  5. آسف اخوي لكن اعتبر هالشغل هذا فضاوهـ !! موضوع ماله داعي من الاساس يعني تبي اعضاء قروب بونواف يتابعون مغامرات الفضاء ؟!! إلا إذا القروب يشمل اطفال وصغار سن ممكن !!!!!!

  6. ههههههههههههه الله المستعاااان ايام كانت حلووهـ وبرائه يعطيك العافيه على التقرير المفصل وزي ماتفضلت في بداية موضوعك قلت موضوعك يرجع لأيام الطفوله === أبو سليمان زائر 13438 ملاحظه 24/10/2007 10:10:16 آسف اخوي لكن اعتبر هالشغل هذا فضاوهـ !! موضوع ماله داعي من الاساس يعني تبي اعضاء قروب بونواف يتابعون مغامرات الفضاء ؟!! إلا إذا القروب يشمل اطفال وصغار سن ممكن !!!!!! ======== لا تتاسف للرجال تاسف من نفسك وردك ياخي الرجال ذكر في بداية موضوعه انه الموضوع مجرد ذكريات ايام الطفوله والطفوله بنوع الموضوع ولا كانت قناة المجد طفوليه اذا جابت كرتون اطفال وقنوات كثيرة كبيره وتجيب برامج اطفال واذا انت منقهر عشانك ماتذكر جرندايزر مو ذنبا تراهم يجيبونه الحين بقناة سبيس تون لاتفوتك وكمان سنديباد كانك تبي تتابع عالم ماتعرف ترد واذا كنت تحس نفسك انك احسن منه باختيار المواضيع والطرح ورنا شطارتك وعطنا المفيد ولاتبخل علينا ترانا هنا نستقبل المفيد والمرح مادام الشي مافيه معصية للرب ————– والسلام عليكم ورحمه الله وبركاته

  7. صراحة قريندايزر هذا ماينسى ولاننسى التشقلب والملازخ بعد انتهاء الحلقة لكن فيه حلقة جديدة لقريناديزر راح تنزل تقريبا بعد شهرين او اقل رسوم ثري دي وبس :$

  8. ياهلا مستر اي وش ذا الحركات الله يرجك وانا قاعد اطالع الموضوع بغيت اطب من فوق المحلق متاثر بطمرة دوك فليد في الماصوره المفروض يكون موضوعك رسالة دكتوراه اول مره اشوف قرنديزر مفتوح كبوته هههههه من جد مبدع ومبدع تسلم على المجهود الرائع ———– ابوسليمان هذى مسلسل كرتوني له ذكريات شكل ماعندكم تلفزيون ذاك الوقت او ان لك مبسط في سوق الخضار كل عصر .. واهلكت طفولتك لي اجل الماء لماذا تقتل طفولتك ؟؟؟ المفروض نرفع عليك قضيه لانك هدمة طفولتك وسلبتها اعز ماتملك منك لله روووووووووح منك لله خخخخخخخخخخخخخخ اقول يامستر اي وين صورة هيكارو محبوبت الجميع هي اول من شغلة الحب داخل قلبي هههههههههههههههههه بنتظار جديدك يااحسن واحد يعرف يسوي مواضيع <<<< راضع مع مصري

  9. السلام عليكم .. الاخ ابو لانـــا مع التحيه .. دامك ذكرت لي ان هالفلم هذا يجي على سبيس تون الآن !!.. يكفي ذلك لان عرفت مستوى عقلك وتفكيرك !! شكرا لك

  10. والله ذكرتنا ايام الطفوله احلى ايام خصوصا قبل مايبدى المسلسل نروح للبقاله عشان تعرف لزوم شي يحرك الضرس واحنا نتابع واكثر شي يعجبني في المسلسل الموسيقى المصاحبه له لما يروح مع البوابه وينزل مع ذاك السيب اللي كانه زحليقه ويركب قراندايزر تخققني هالموسيقى ههههههه لي اللحين حافظتها موضوع بطل زيك تسلم عليه

  11. ااااااااااه يا مستر لقد جددت المواجع وقلبت الذكريات << تذكر بيت خالته ساميه يومه يقوم الصبح هو ولد خالته الساعه 8 الصباح وينقزون للفديو ( الصغير ) ويشوفون قرانديزر وتجيهم سندوتش صامولي الجبن اااااااااه والله انك مبدع جبت أشياء لو أعيد المسلسل عشر مرات ما عرفتها أجل وزنه وسرعته وطوله وعرضه يا خي اللي أعجبني انك وصلت لليابان أجل تقول ليش ما نجح عشان الزلابه كوجي مستر تقبل ودي وشكري عقبال ما تكمل بسلسلة من الذكريات الجميلة ( هايدي - عدنان ولينا - سانشيرو - نينجا - الرجل الحديدي - سندباد - جزيرة الكنز - ليدي - سالي - كعبول وبسيط والشلة ) مستر تقبل مروري وإعجابي _________________________________ أبو سليمان ربما لم تعش طفولتنا فنحن عشنا (ولازلنا ) نعيش مرحلة الطفولة لذلك أرجوك لا تحرمنا من أن نتمتع بها إن لم تكن تريد أن تشاركنا ولو أعلم أن قناة سبيس تون تنقل هذه المسلسلات صدقني سأنافس البزور عليها .

  12. ياااااااااااااااااااااااااااااااااااااااااااااااااااسلام عليك أبدععت صدقني أنك جيت مسرع وأخترقت الزمن ورجعت الطفولتي وسحبت من عندها جرنط وأستفهمت في المخيخ عشان تطرح موضوعك اللي داعب طفولتي البريئة من دم دجاجة الجيران …. وكنت أذكر واحد حلو مملوح يوم كنت صغير ينادونه أبو رامي لمتد تحس أن الولد ل كامل الشاهد في السالفة أنه كان يحب قرنديزر مثل حبه لمشروم هارديز والقيمات …. وكثر من هالمواضيع لا يغرونك العذال واللي محرومين من طفولتهم عموماً ما ودي أطول عليكم وكثر من هالمواضيع يالغالي …لاحظ يالغالي

  13. من جد قلبت عليا المواجع رجعتني لورا اكتر من ………..ماتعدش.مشكور عزوز

  14. الصرااااحة والله قلبت المواجع وخليتنا نفتكر أياااام زماااان الموهم شكرا على موضوعك الرائع والمتكامل بس الصراحة أنا من زمان ادور على الكرتون القديم والحاجات المغبرة اللي زي عدنان ولينا وغرندايزر بس مني عارف كيف أجيبها واسويلها داونلوود يا ريت تفيدنا إذا سمحت وجزاك الله خير

  15. حياكم الله في كوكب فليد .. حسستوني انكم ما زلتوا تكنون الوفاء لدوق فليد المغترب عن ديرته خخخخ تستاهلون كل ابوكم دوره مع دوق فليد على قرنديزر .. والحق حق ترى اول واحد بيركب هو اول واحد رد خخخخخخخخ << ما نسيتك يا كويس هههههههه ملاحظه : تر ى قرنديزر ما فيه الا مرتبه وحده يعني الله يعينكم تدورون شيء تتمسكون فيه .. خخخخخخخخ وترى العشا زاهب راح يجيبه دامبي لا احد يروح خخخخخ .. والقهوه مدري ليه تأخرت راحت هيكارو تجيبها والظاهر ان عرق الاثله خطفها هههههههه ____________ ابو لا نا : اشكرك على ردك .. وما اخفيك انك حسستني اني كوجي وانت دوق فليد .. دايم تفزع لي ههههههههههه ________________ ابو سليمان : ههههههه وش فيك معصب الله يهديك .. اذا الموضوع ما اعجبك سكره .. ونأسف على ازعاجك .. ولك مني احرم الباقين الي اعجبهم الموضوع من مواضيعي الجديده لعيونك .. ( وترى هذا رايك وانت حر !! ) وما اخفيك اني شكيت انك من اتباع فيغا الكبير .. متنكر بنك ابو سليمان خخخخخخخخخخ _____________ حياكم و ترى قرنديزر يسلم عليكم واحد واحد .. وفرح بكم يوم رديتوا خخخخخخخ ننتظركم في مزرعه دامبي على العشاء .. << ترى المزرعه للبيع .. ان خبرتوا لها زبون خخخخخخخ

  16. والله الصراحه انت بعالم ثاني الحين افلام الكرتون صارت ينتجونها للكبار قبل الصغار والتفكير حقك بدائي والله وحتى البلاي ستيشن ترى فيه العاب للبالغين وللرجال وسبيس تون احياناً يجيب افلام كرتون للكبار جداً ولو تشوف كونان يصير فيه ضحايا وقتلى وتحريات والمفروض ما يعرض وما يضرهم لو عرضوا غراندايزر وشكراً…

  17. ياهلااااااااااااا يا حي الله دووووووق فليد والله وناااااااااسه بيني وبينك ودي ازنة ((مصطلح تعبيري يعني البكاء بدون صراخ )) ايام حلوة ياشيخ انت فلة تحمست شكلي بخلي اول موضوع لي عن عدنان ولينا (( هنك تقول تراه محجوز )) هههههههههههههههههه الف ششششششششششكر لك

  18. روح اللهي يوفقك ياشيييييخ.. والله العظيم ذكرتني بالماضي الجميل وزمن الطفولة والله الواحد كان مايهتم من حاجة يازين ذيك الايام. أبو سليمان الله يهديك أنت في كل موضوع نشوفك معترض ومعصب؟؟ انت حد غاصبك تقرأ مواضيع القروب يا أخي اذا انت مو عاجبتك حنا عاجبتنا خلك ارقى من كذا

  19. أبدعت يامستر .. والله لوني عارف أنك تسوي مثل كذا .. لخليك مراقب عندي .. بس وش نقول .. أنشاءلله يصادفنا واحد مثلك .. وأبغا منك طلب .. وشلون أناظر المسلسل .. لأني وبكل صراحه ماقد كملته .. كل ماعرضوه على قناه مايكملونه ولا أنا ما أتابعه كامل .. لك مني ورده .. بس للأسف الخدمات قليله .. نعطيكياها بعدين

  20. الصراحة أكثر من رائع ياخي عجزت أوقف ضحك خاصة طريقة الوصف لبعض الأمور وبالمناسبة ذكرني هذا بأستاذ اللغة العربية اللي كلما جاوب طالب صح قال له: جرانديزر عاد أنا أموت من الضحك #ننتظر منك مغامرات ماوكلي#

  21. والله رجعتنا زمان ايام كانت حلوه ايام الطفوله الله يعطيك العافيه وطرحك جدا رائع

  22. يا قدمك ياخوي ذكرتني حي اليمامة يوم نلزقك الصور — هيكارو – على الساكل هههههههههههههههههه

  23. يؤ يؤ صرتوا كثيرين .. على كذا قرنديزر ماعاد يقدر ياخذ بكم كل ابوكم دوره … ترى واره ملازخ مع فيغا .. خخخخخخ خلاص خمس يركبون مع هيكارو وخمسه يركبون مع كوجي .. طبعا ميا يحتاج اقول لكم العرق اكيد مع هيكارو ههههههه مشكورين على مروركم وان شاء الله تشوفون الي يرضيكم ..

  24. امس بس سالني ابني البالغ من العمر اربع اعوام وهو يشاهد احد الرسومات الغريبة الشكل والمضمون وقالي ابي لما انت صغير كنت تحب هاتاتليز (ولا مش عارف شو) قلتله لما كنت صغير مكانش عندنا هذي كان عندنا السندباد وتكاية تدروكي سباق السيارات وغرندايزر وقعدت نشرحلة شرح مبسط علي كل وحدة وهو مستغرب وعينة على التلفزيون وودنه معاي ومرة مرة يعطيني اسم باهي …..عنكم وانا اجيبه المهم اخي مشكور جدا لحسن سردك الموثق بالصور وبصدق تمنيت لو اجده حلقة من الحلقات لاريها لابني ولكني سحبت صورة ملونة لاريها له بعد اذنك واذن ابو نواف وشكرا مرة اخر والســــــــــ عليكم ـــــــــــــــــــلام

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى