رسائل المجموعة

معلومات : الانتقال من ويندوز إلى ماك

منذ نعومة اظافري وأنا استخدم نظام الويندوز
ولكي اصدقكم القول ماعرفت ان فيه انظمة غيره الا من سنتين الظاهر

نعم، تهورت وشريت ماك .. بعد إقناع شخص عزيز علي بإقتناءه، وبعد ماطمني بأنه بيدبرني ويضبطه لي إذا شريته .. وللأمانه جتني لحظات تحسفت فيها لكني تشجعت وواصلت المشوار

في البداية خلوني أقول لكم رأيي وإنطباعي عن الجهاز حتى الآن ، كثير يسألوني عنه وعن أستخدامه وكثير يبون يحولون بس مترددين من البرامج والاستخدام وهل الجهاز صعب ومدري ايش .. في نظري هالشيء يعتمد على إستخدامك للجهاز .. يعني مثلاً واحد مايستخدم اللاب توب الا عشان يتصفح الجرايد .. طبيعي ماراح يفقد ولا برامج في الويندوز لانه بس يستخدم المتصفح .. بالنسبه لي أنا استخدامي يعتبر استخدام جائر، ( يعني : جفاسه، كرف، تحميل، تصميم .. ) ما اطفي الجهاز أبد واستخدم فيه برامج كثيره وأخر جهاز كان معي حفرت كيبورده الين ما بقى الا شوي وأدخل على المذربورد .. وعشان أكون معكم صريح أكثر، في اخر الأيام حسيت أصابعي صارت تلمس الويندوز

نجي لنوع الجهاز اللي شريته
ماك بوك برو MacBook Pro

ماك

تقدر تطلع على موصفات الجهاز وشكله من الموقع الرسمي : هنا

إستجابة الجهاز

الجهاز للأمانه سريع في تشغليه وتطفيته، ماتحس فيه ولا تجلس تنتظره، لذا أقيمه بأنه سريع التشغيل واستجابته عالية (ممكن يختلف الكلام مع اختلاف موصفات الجهاز)، هذي نقطة في صالحه لكن برضو سرعة الإستجابة ممكن تحصلها في أي جهاز جديد عالي الموصفات ، بس الشيء اللي لفت نظري وعلى طول حبيته وتعودت عليه هو ( الماوس باد ) .. استجابته لليد رهيبه .. وأهم شيء أنه يتحرك بـ التوتش زي الايباد والايفون يعني

واجهة الجهاز والإختلافات الموجودة فيه

كنظرة أولى للجهاز وواجهته بتحس أن أهلك حاطينك في السوق وناسينك .. بتحس كل شيء تغير عليك وأنك ضايع وحوسه .. لكن بعد دقايق بس بتكتشف أنه زي الويندوز أو أي نظام تشغيل غيره لكن مع أختلاف المسميات والأماكن، يعني على سبيل المثال : بدال مايكون شريط اللغة والساعة تحت صارت فوق،  بدال كلمة أبدأ حطو لك فايندر مثلاً، بدال برامج كتبوا لك تطبيقات

تثبيت البرامج

تثبيت البرامج ممكن يكون عن طريق تحميل البرنامج مباشرة من الموقع وبعدين تسوين له ( install ) واللي بشكل عام قريب جداً من طريقة الويندوز .. أو يكون عن طريق الـ App Store وهذي ميزة حلوه مهيب موجودة في الويندوز .. ممكن تفتح الاب ستور وتجلس تتمشى فيه وتشوف التطبيقات اللي تعجبك سواء من العاب أو برامج او تطبيقات اجتماعية  ( تويتر, فيس بوك ) وبالضبط مثل الاب ستور حق الايباد والايفون ونفس اليوزر اللي تستخدمه هناك تقدر تستخدمه هنا وتشتري وتحمل وتسوي اللي تبي ( اضغط هنا لشرح طريقة التسجيل في الاب ستور )

البرامج اللي كنت أستخدمها في الويندوز وبدائلها

هالنقطة كانت مخوفتني كثير خصوصاً إني أحب يكون الجهاز اللي أستخدمه فيه كل البرامج والإضافات اللي أنا احتاجها واستخدمها، عشان كذا يسموني أخويائي : عدو الفورمات .. لكن اكتشفت كثير برامج تكون تلعب على شارعين على قولتهم، تسوي البرنامج لكل أنظمة التشغيل لأن هدفها يكون ربحي أو الإنتشار والسمعه، لذا خلونا نأخذ لنا جولة بسيطة على بعضها

ادوبي Adobe

adobe

كل برامج الادوبي موجود منها إصدار للويندوز والماك، الادوبي ريدر ( حق الـ PDF ) والادوبي فوتوشوب والإلستريتور والدريم ويفر والبريمير، هذي وغيرها كثير موجودة للنظامين ولكن بشكل غير مجاني، لذا الله يخلي التورنت

برامج التحميل

utorrent

متوفر للماك برامج تدعم التحميل المباشر وبرامج ( تسريع التحميل ) على قولتهم ، والأهم برامج التورنت الموجودة في الويندوز موجودة في الماك وتقدر تحملها من الموقع الرسمي حقها، مثل الـ Utorrent

مشغلات الفيديو

vcl

كثير من المشغلات الموجودة للويندوز موجودة للماك بعد، مثل VLC, RealPlayer وفيه مشغلات حلوة ثانية مثل Movist, MPlayerX

برامج تصميم وتحرير الصور والمواقع

بالنسبة لتصميم الصور فمثل ماقلنا قبل شوي، تقدر تستخدم الفوتوشوب أو أبحث عن بدائل له ( أنصح بإستخدام هالموقع الرائع : Alternative To ) بخصوص برامج تحرير الصور وعمل الشروحات عليها ففيه برامج مثل SEASHORE, Skitch

اما بالنسبة للتعديل على المواقع فاللي يستخدم برامج تعتمد على الـ HTML مثل الأدوبي دريم ويفر أو المايكروسوفت فرونت بيج (FrontPage) يقدر يستخدم في الماك الدريمويفر (Dreamweaver) أو KompoZer أو NVU

وفيه غيرهم برامج لكنها تكون في الغالب خاليه من التعامل مع أكواد HTML ويكون التحرير فيها سهل ومهوب متطور وبقوالب جاهزه، مثل برنامج Freeway, RapidWeaver, flux, iWeb

برامج الحماية

avg

برامج الحماية متوفرة للماك مافيها كلام ، فيه برامج مشهورة في الويندوز وتركب على الماك مثل الكاسبر سكاي Kaspersky, AVG .. وفيه غيرهم برامج كثير

المسن

المسنجر

مالي استخدام يذكر للمسن خصوصاً أن مواقع الشبكات الإجتماعية والجوالات الجديدة خلتنا شبه نستغني عنه ..  موجود للماك المسن الرسمي من موقع هوتميل لكني جربته ومدري ليه ماحسيته حلو وما ارتحت له .. فيه برنامج ثاني اسمه aMSN ويقال أنه كويس لكن ما أقدر احكم عليه لأن استخدامي جداً قليل .. وأعتقد ماراح يكون بجودة المسن الموجود على الويندوز

ضغط الملفات

وين

طبعاً كلنا نحتاج برامج ضغط الملفات، لأن مثلاً لو عندنا مجلد في الجهاز مليان ملفات مهمه، ماتقدر ترسله بالبريد أو ترفعه على موقع رفع إلا لما تحطه في ملف مضغوط .. موجود للماكنتوش برنامج ضغط ملفات مجانية مثل الـ WinZip, StuffIt Expander

المتصفحات

المتصفحات

تقريباً جميع المتصفحات تركب على الماك ( فايرفوكس، قوقل كروم، اوبرا ) وطبعاً السفاري يجي متصفح إفتراضي في الجهاز .. حاولت أحمل متصفح الإكسبلورر 9 من موقعهم الرسمي لكن رفض لأني ما أستخدم ويندوز .. ممكن فيه طرق تحايل تخليني اركبه لكني للأمانه مادورت .. بالطقاق، اللي مايبيني ما أبيه <<- قفلت معه

ملفات الورد والبوربوينت

فيه مجموعة مخصصة للماك أسمها ( أي ورك  – iWork ) وهي مقدمة من شركة أبل طبعاً، تحوي هالمجموعة على ثلاث برامج ( بيجيز – Pages ) وهذا شبيه بالورد لكن متطور أكثر من وجهت نظري، تصميمه وطريقة التعامل معه جداً سهله يجي معها تيمبليت جاهزه بتصاميم مختلفه تقدر تختار منها اللي يناسبك وتبدأ تشتغل وتعدل عليه ( يختصر عليك وقت ويعطيك أفكار جميلة تناسب شغلك، سواء كتابة رسالة أو بطاقة أو نشرة بريدية ) والجميل في البرنامج أنه يدعم عربي ويفتح ملفات الورد ( .doc ) وممكن يحفظ الملف لو تبي بصيغة ملفات الورد اللي ذكرناها قبل شوي
مثال للتمبلت الجاهزه في البرنامج : اضغط هنا

البرنامج الثاني في المجموعة هو  ( كينوت – Keynote ) وهالبرنامج شبيه ببرنامج البوربوينت ويقوم تقريباً بنفس عمله لكن ميزته أكثر أحترافيه وفيه حركات كثيره مهيب موجودة في البوربوينت بالإضافة إلى تيمبليت جاهزه برضو .. ويدعم ملفات البوربوينت وممكن يحفظ شغلك لو تبي بصيغة المايكروسوفت بوربوينت ( .PPT )
مثال للتمبلت الجاهزه في البرنامج : اضغط هنا

واخيراً برنامج ( نمبرز – Numbers ) الشبيه بعمل برنامج المايكرسوفت إكسيل، مخصص للتقارير الحسابية ومشتقاتها، يدعم اللغة العربية ويدعم ملفات الإكسيل ويمكن حفظ الملفات بصيغة ( .XLS )
مثال للتمبلت الجاهزه في البرنامج : اضغط هنا

شاهد فيديو عن مجموعة “أي ورك” في الموقع الرسمي : اضغط هنا

الجميل في الأمر أن هذه المجموعة موجودة للأيباد ايضاً، بإمكانك شرائها عن طريق الأب ستور ومن ثم متابعة أعمالك وتعديلها وقت ماتشاء عن طريق الايباد أو الايفون

اللي ذكرتها كلها برامج إضافية تحملها أنت بحسب رغبتك وإحتياجك، وفيه غيرهم كثير على حسب اللي تحتاجه، أما بالنسبه للبرامج الإفتراضية اللي تجي مع نظام الماك فاللي يبي يعرف عنها أكثر يقدر يطلع على هالموضوع ( أشهر برامج الماك )، أو هذا الموضوع للي يبي يتعرف على النظام أكثر وبعض خصائصه ( لمحة عامة على نظام الماك )

بالنسبه لغالبية البرامج المذكوره هنا، موجودة بالإضافه لبرامج غيرها في مكتبة البرامج، تقدرون تحملون اللي تبونه من هن
( مكتبة البرامج )

بالنسبه لعيوب الجهاز من وجهة نظري، سعره مبالغ فيه !! .. شكله الخارجي حلو لكني أحسه يتمخش بسرعه .. تحتاج تحط عليه كوفر أو تصير محافظ أو ما تدقق في اللي يجيه .. وعشانه يعتبر المنيوم احسه إذا أحتر شوي يصير يولع حراره ويكوي

* ملاحظة كبر وجه ورقة بلوت  : أنا هنا ما أقنعك تشتري ماك أو غيره، الموضوع عبارة عن معلومات لتجربة شخصية إن شاء الله تفيد الناس المحتارين في هالنقطة، ويساعدهم على إتخاذ القرار .. يا يهون ويشيل الفكرة من راسه وإلا يشغل سيارته ويروح اكسترا عاد


TICHNO تـكـنـو
تغطية شاملة لكل ماينشبك في الكهرب 
www.tichno.com

صفحة

 

 

مقالات ذات صلة

‫12 تعليقات

  1. للمعلومية برامج الحماية ليست لحماية الماك برامج الحماية للويندوز فقط يعني اذا كنت تتنقل ملفات من اصدقأك ،لاتريد نقل الفيروسات بينهم اما الماك فهو محمي ولا توجد فيه فيروسات حتى الآن

  2. تصدق اخوي انا مثلك بالضبط بكل شىء ذكرته وضحكتني بصراحة يوم تقول كأن اهلك قاطينك بالسوووق هههه فعلا نفس الاحساس نذكر بس الشباب ان الكي بورد مختلف وسهل يصبح مثل الويندوز عموما – اللي استخدامه ماهو قوي خله على الويندوز ارخص واريح للبال مع اني حبيت الماك

  3. الجهاز جدا جميل بس فية مشكلة واحدة هو اللغة على ماعتقد مافية عربي اما من ناحية الانترنت فية بس يريحك من شي اسمة فرمتة وفيروسات ومافات تجسس وامور كثيرة تحية طيبة لك

  4. مصيرك ترجع للويندوز 🙂 هالكلام حسب تجربتي وتجربة الكثير حتى لو لسبب بسيط وتافه لابد ترجع له أو تستخدمه كنظام وهمي على الأقل .. مو عشانه الأفضل فقط لكن لأنه النظام الأكثر شعبية في العالم

  5. الف مبروك يالحبيب تكسره بالعافية 😀 ماشاء الله الشرح كافي ووافي ماقصرت الله يعطيك العافية بس ياليت كان كتبت السعر .. وهل هو للبيع في مكتبة جرير مع العلم أنا من سكان جدة

  6. الماك للمؤسسات والشركات وليس لمن يستخدم ويندوز من نعومة اظفاره (اسطوانة ويندوز مقرصنة) من الاخير رح لعلي وطلع قروشك من عيونه

  7. ابل لا تتميز سوى بغرافيك ولا شيء اخر وكل ما نزل من مميزات مسروقه من بيل غيتس نعم مبيعات ابل في ارتفاع ولكن ليست بافضل من ويندوز وكما ان ابل ماسونيه وستفس جوبز ماسوني من الدرجه 22 والاثبات في ذلك هو شعار ابل التفاحه المقضومه ادم عليه السلام نزل للدنيا بسبب قضمه الثمرة المحرمه وهي التفاحه وفي الاخير ويندوز الافضل ولو كرهتم استغفر الله لو الجنه بيد ابل افضل دخولي النار بدلا من اني اشتري جهاز من ابل ايا كان ولو حاتي معتمده على جراحه وفيها تقنيه من ابل الموت افضل واشرف لي من هذة الشركة الماسونيه المدمرة

  8. والله معلومات حلوة عن النظام .. مشكور عليها .. أنا كنت مسميه ويندوز ماك هههههه << الظاهر اذا اتحدت الشركتين بيسمونه بذا الاسم 😀 .. مع اني ما دخل مزاجي من أول .. أبد 🙁 .. تحياتي

  9. سبحان الله .. كان خاطري حد يطمني لاني ناويه اشتري لاب ابل ماك اير .. ودي في لاب سكيني وخفيف … 8) بس كنت خايفه من البرامج .. قالولي ينزلون ويندوز على الابل .. بس انا حبيت الماك .. جزاك الله الف خير .. بسير دبي وبآخذ لي ابل .. 8)

  10. ســـــــــــــــــ:$ــــــــــــــــــــــــــــــــــــــــــــــــلام اخوي عندي سوائل ؟تنصص ان الواحد يشتريه؟؟؟؟؟؟؟؟؟؟؟؟؟؟؟؟ اي ولا لا بس المعلومات الي عطيتنا اياها كثيره اووافياه بس ما اقتنعت بالجهاز بس مشكور

  11. السلام عليكم حبيت اسالك اخوي انا ركبت نظام ويندوز عالماك وابي الحين ارد للابل ماك كيف؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى