هالمره مافيه موضوع جدي ولا عمي .. هالمره بعطيكم بعض المتخرمات التي ما تنفك ان تراود خيالي اثناء انشغالي خاصه اذا كنت بالدوام ومايحلى لافكار وبناتها انها تجيك الا وانت في قمة الشغل
– قبل تقريبا سنه كلنا سمعنا عن اعصار توسونامي اللي ضرب شرق اسيا واثاره المدمره بيني وبينكم يقولون ان هالاعصار وصل الى حدود عمان يعني قريب من الدول الخليجية وابشركم مادرينا الا هاليومين اثرنا ماحولك احد يصير حادث باخر حارتنا بالربوه واللي بالسويدي يدري عن السالفة المهم وجى بعد تسونامي اعصار كاترينا اللي ضرب مناطق امريكية ضربهم ضربه جامدة
وحاسهم وعفسهم فوق حدر ومع ذلك ياحليلهم يدلعونه كاترينا والا ربعنا حدهم سنة الغرقة وسنة الجراد وسنة السبلة
وسنة الجرب امحق مسميات ياخي تلقى جاهم رش مطر وفاض عليهم شعيب مخرج 13 طبعا ذيك الايام مخرج 13 ماكان مسفلت كان توه ردميه عاد من هالمسمى تخاف تقول اكيد الحين الرياض غرقة بشبر ميه وهي رشة خفيفة
والا سنة الجراد العالم كله يكافح الجراد و يحاول يمنعه من اتلاف المحاصيل الزراعية وياحول هالضعيف من دخل من الشرقية ما يمداه يوصل الغربية الا وهو ماكول عن بكرة ابيه امسحوه عربنا مسح وبعذرة والله مسافة الفين كيلو مافيها شي ينوكل حتى محطات ساسكو الله يديم النعمة برستدهم ودورة المياة الله يكرمكم.
طيب حنا وش فرقنا عنهم ليه ما ندلع الحوادث والكوارث لاسمح الله اللي تصيبنا وش رايكم من الحين لو جانا زلزال وش نعطيه اسم ؟ عن نفسي افكر اسميه زلزال نانسي تحس ان الاسم يفتح النفس
– وحده من المتخرمات اللي تمر في بالي دائما هي التناقض العجيب في واقعنا !! تقولون لي وشلون انا اقولكم
من فيكم عيونه الله بالخير ( لاترفع يدك ياسوالف القايلة عارفك ) عاد اكيد رحتوا لدكتور عيون مالاحظتو شي عليه ؟
كل اطباء العيون يلبسون نظارات !! و اللي يسوي لك عملية تشطيب او ليزك يلبس نظارات طيب ليه هو ما يسوي لنفسه ؟
لا وبعد فيه شي ثاني اعظم واكبر من هالمصيبه عند حقين عيادات الرجيم والدايت كلهم دببه سمانين ومن زين الطبايع ينصحونك ببرامج التخسيس والرجيم ومثلهم الاطباء اللي يسوون عمليات شفط دهون وهم يحتاجون الى حفار ابار ارتوازيه من كثر الشحوم اللي فيهم لكن مانقول الا (أتأمرون الناس بالبر وتنسون أنفسكم ) والله شي عجيب بالله لاحظوا معي هالشي ياجماعة وقولوا الحمدالله على كل حال
