:::كوماندوز شارع المرقب والريل :::

قبل لا ندخل في الموضوع احب اشكر برنامج مكافي واللي اخترعه واللي يخلي الفيروس يقول ياكافي
بصراحه هالبرنامج حسسني بنعمة الامن اللي نفقدها هاليومين في كل مكان الى درجة ان جهازي الكمبيوتر
فقد الامن ولكن مع مكافي الامن يالله ياكافي وبحكم تجربتي مع المكافي اللي هو يطرد الفايروسات داخل الجهاز
وانا واقف عند فتحة السي دي روم احتري اي فايروس بس يطلع لو رويسوه على طول بالمربوعه على دمجته ويجيك مجاوب
ولذا ومن حكم خبرتي وتجربتي انصح الدوله ايدها الله ورعاها انها تركب برنامج مكافي لمكافحة الارهاب مثلي

أ.هـ

حاولت اسمن شوي واعدل من جسمي النحيف ،، كل من شافني يرحمني ويقول ياحول وش هالمسكين ..
واخرون يغزون علي بأصابعهم ويقولون لعيالهم هذا نهاية اللي مايشرب حليب او مايطيع امه
دفعت نص راتبي في البحث عن السمنه ، اريد ان اكون سمين ،، اريد ان " اربرب شوي "
صرت ااتنقل من عطار لعطار .. ومايصلح العطار ما افسد الدهر اعلانات الجرايد وش كثرها خاصة اعلانات " قبل وبعد "
نعالج الصلع ، مشاكل السمنه ، مشاكل التجاعيد وشد الوجه العلاج عن طريق البصمه
حشى مهوب مستشفي شكله ورشة زيود ……….

:::::::::::::::::::::::::::::::::::::::::::::::::::

طلعت الى احد المراكز المشهور طبعا شهرته فاقت كل الحدود مو بالعلاج لا بالعاملات اللي فيه اللي خلني اروح كان معي واحد سمين
وكنت احسده واتمني لو اشبك هوز واخذ منه شوي :ss:قال خاوني للمركز نشوف وش عندهم طلعنا هناك وقالت الحلوه اللي في
الاستقبال " وجيه مانحلم نشوفها ولا .. " معليش خيو بدى عزبك معايا .. عندي بعض الاسئلة لازم نسئلكون عنها ئبل ماتدخلو على الدكتور .
قلنا : لا عادي خوذي راحتك ماعندنا شي اخذت بعض الاسئلة عن العمر والدم وكل شي عن خويي .
بعدين بدت تشرح لنا طريقة نظام الحميه الغذائية عندهم وقالت عنا ثلاث وجبات باليوم نرسلها لعندك بالبيت حسب الوقت
قال خويي من زود الشفاحه وهو اللي ماقد شاف خير : وشوله تتعبون ارواحكم انا اجي اكلهن عندكم
وبيني وبينكم وهي تسولف مافيه الا استعراض وتصوير من فوق لحدر . لاتشرهون .
خلصت من حديثها قال خويي وانت وراها ماتسألها
قلت لها : طيب وانا ودي اسمن هي طالعت فينا عرفت انه ماحولك احد وكرشتنا مع الباب طبعا مو هي
السيكورتي اللي حاطينه واجهة استقبال للمركز

:::::::::::::::::::::::::::::::::::::::::::::::::::

اللي خلني افكر بجد كيف اسمن واضيع راتبي على السمنه .. والاكل . هو حبيبتي " انتصار " == والله اسم بعد
كل ماقابلتها في الحاره والا اذا جوا عندنا اهلها . اقوم اترزز عندها . واكشخ بالبدله بس ماش حسيت ان شكلي غلط من عقب
ماقالت لي : الحين بازن بالبنطلون هذا طالعن تقول سيلاني توه جاي من ديرته حرام عليك ياانتصار واناا اللي يقالي متكشخ علشانك
ومتسلف هالبدله من رشيد سواق جارنا قالت لي : ياخي من زين جسمك المخيس تقول هيكل عظمي في معمل مدرسة الـ72 حقت البنات
"انواع جمع التبرعات هالمدرسه كل سنه تبرعوا نبي نشتري معمل ونجهزه والى يومك عشر سنين ندفع وماشفنا شي "

بعدها فكرة بجد اني املى عينها واسمن شوي على الاقل املى ثيابي اذا لابستها وربي اني البس اصغر مقاس ومع ذلك يدخل معي
ادمي ثاني بالملابس .. وطلعت ادور في شوارع الرياض والا اشوف نادي " بودي ماستر " حاطين لوحه وش كبرها جسم واحد
عضلات ورافع حديد . قلت بس مالك الا هالحديد ويطلع جسمك مضبوط

:::::::::::::::::::::::::::::::::::::::::::::::::::

دخلت النادي واقابل الكابتن عطيه عويس ,, وحاطين صورته وكاتبن " تدرب مع بطل العالم في كمال الاجسام " و نبذه عنه :
بطل مصر في العاب القوى ، بطل مصر في العاب الكاراتية ، بطل القاهره في رفع الاثقال ، بطل منتخب مصر في كمال الاجسام
مدرب المنتخب السعودي لالعاب القوى …. وغيره من هالخرابيط ومرفق معها صور وهو لابس " بكيني ازرق والا احمر "
ويستعرض بجسمه ..
اتحداك ماتدخل اي نادي حديد ماتلقي هالخرابيط ونفس الشهادات موجوده .
الظاهر كل المدربين مزورين شهاداتهم من عند مزور واحد

طلعت عنده ، قلت له ياكابتن ودي اللعب حديد عندكم علشان اسمن شوي . قام يطالع في جسمي وقلب شوفه علي ..تقول
يقلب في بضاعه وشوي الا يقولي ماشاء الله تبارك الله بسم الله عليك ماشاء الله ، والله قسمك " جسمك " كويس ومتناسق
جسمك رياضي وحلو . وخاصة مع الجنز بيطلع اخر قدعنه وراح تطيح البنات عندك ، بس تحتاج شوي تمارين حديد ونشد لك
عضلة البطن ونطلع الاكتاف شويا وتطلع ماشاء الله ولا فاندام انا صدقت روحي وقمت انفخ راسي
وسجلت وبدية تدريبات . وصرت ما امشي الا وانا نافخن صدري ومعرض كتوفي وبارز يديني يعنني عندي عضلات
واللي يشوف شكلي يقول وراه هالادمي يمشي كذا تقول بطه

:::::::::::::::::::::::::::::::::::::::::::::::::::

وبعد مده وهو يلعب علي ماعليك جسمك حلو جسمك رايق جسمك دلع وانا ياحول ضعيف الله اصدق
وصرت كل ما رفعت لي وزن والا طبقت لي تمرين رحت على طول عند المرايا وجلست اقلب ذرعاني هناك
واقعد استعرض بعضلاتي لكن المصيبه انه ماطلع لي شي جديد في جسمي انا زي ما انا حتى مره سويت فيها فتوه
على اهل الحاره وانطقيت طق الله لايوريكم
رجعت للمدرب بقوله اني ما استفدت من هالتمارين . لكن لقيت عنده زبون " ضحيه " جديده والمشكله انه دب سميين وقاعد يقوله المدرب ،،
بسم الله ماشاء الله عليك والله جسمك متناسق وصدقني لو تلعب شويا تمارين حديد وتشد البطن
بيطلع شكلك تاني مع البدله والبنطلون .. بسم الله ماشاء الله عليك والله احسدك على الجسم القنان دا
" دنااان دنااان والله دناان " == الاغنيه اللي مدري وش تبي