رسائل المجموعة

قصيدة – الواسطة

حبايبي وربعي قروب ابو نواف والله اني عاجز عن الشكر وصراحه اني تحمست اطلعكم على الشي اللي احس انه يناسب اذواقكم ..
اليوم عندي قصيده عن السيدة المبجلة (
الواو)
تبغون تعيشون حياتكم صح .أول شي عندكم ((
واسطه)).هاه لاتقعدون تتذكرون او تستعينون بصديق المسأله أيه والا لا أكيد لا أجل اقول الله يعينكم على حياة النكد والغرابيل والله يكتب لكم حظوظ من عنده قولوا آمين واقروا هالقصيده بخصوص الواسطه لابارك الله بالشيطان .

(الواو) حرف من الهجا ايَت كتاب يضمها
لكنها تمردت واصبح لها قدر وجلال

كبرت وصارت (واسطه) والواصل اللي خمها
واللي عجز ماخمها يصبر على نطح الجبال

الله على خطابها صاروا عيال لعمها
كل(ن) يقدم شبكته يبغى من (الواو) الوصال

يدرون فيها ظالمه خالط حلاها سمها
لكن عربنا (قصروا) واليوم يبغون الكمال!

(الواو) للي مرتكي بنت وخفيف(ن) دمها
لامن بغاها جابها يقودها في سلك شال

والا الضعيف المشتقي يركض ولاهو يمها
لو جالها بيقودها تقطع جديدات الحبال

اكبر قهر كيف الردي رجولته ماتمها
والواسطه) تاقف معه (يالا) شغاميم الرجال

اللي ماعنده (واسطه) سعادته ماشمها
يبحث عن الحاجه جنوب وحاجته باقصى الشمال

هذي سلوم (الواسطه) ماحد(ن) بقى ماذمها
كل(ن) شكى من ظيمها واولهم عيال الحلال

تخيلوا قرده غزال اسبابها(الواو)امها
وان صارت(الواو)امها فالقرد بعين امه غزال

يعني عشان (الواسطه) كل(ن) تصير يهمها
مانيب ابالغ بالحكي (الواسطه) فوق الخيال

(الواسطه) عند العرب تفاخروا في سلمها
وبديرة الغرب تهبا ماحصلت فيها مجال

ملعون ابو (هالواسطه) هم وذبحنا غمها
ركض(ن) بلياها مثل ركض العليمي بالنعال

الله يكرَمكم أجل لاجا الأمر من فمها
قام الدجاج بلا حيا ياطا على خشم الجمال

ياليت يصحى سلمنا يفكنا من همها
كان النظام العالمي يكتب بجرأتنا مقال

راشد السكران شاعر المشاعر

مقالات ذات صلة

‫8 تعليقات

  1. السلام عليكم اخوي من جد طرحت موضوع مهم في هذا الزمن هوا الي سائد من غير الواسطه اخواننا موجودين في المنازل معنا لا شغل ولا مشغله لازم واسطه وخبره بلواو تتنسي الخبره والغير مسموح يصير مسموح في الواو كله خير واسفه على التطويل بس عجبني موضوعك وحبيت اشارك

  2. ألصراحه .. الصراحه .. انو انا القصيده ذي ما قريتها بس اني قد مره قريت لك قصيده وعجبتني بس منذو مبطي يعني لا تسألني وشهي خخخ .. الموهيم ما علينا بما انك تعرف تقصد وكيذا وراا ما تقصد فيني .. منها انك تطور مهارتك النبطيه > تسمع فيها خخخخ ومنها انك تدخل السعاده على قلب مسلمه .. >باللهي !خخخخخخخخخ وفالك التوفيق .. 😀

  3. تخيلوا قرده غزال اسبابها(الواو)امها وان صارت(الواو)امها فالقرد بعين امه غزال يكفيني هذا البيت .. راشد فالك القصيد كله .. بصراحه أبدعت تحياتي

  4. والله ( وطيت وفركت الوتر الحساس ) ضربت على الوتر ياخوي راشد فعلا الواسطة بالزمن ذا للأسف كل شي صار للواسطة حتى بالمطاعم ينجز لك طلبك إذا جبت واسطة … شكرا لك عزيزي

  5. مشكور وصح لسانك على هالقصيده. بس كان ودي اعلق على بيتك اللي قلت فيه انه الغرب ما عندهم واسطه. صدقني طال عمرك انه الواسطة موجوده بكل محل. حتى الغرب عندهم هالشي وعارفينه بس ماشية حياتهم. يعني اللي عنده واسطه تتسهل حياته ويصير له افضلية على غيره أما عندنا للأسف حياتك ما تمشي إلا بواسطة. ينمسح فيك البلاط وباليالله يمشي شغلك لو ما عندك واسطة. يعني للاسف صارت شي اساسي بحياة اي شخص في مجتمعنا

  6. الله أكبر … الواسطه هم الفقير وعار الكبير.. قصايدك جميله ولذيذه, وأبدعت في التعبير. والواو ترى أفه كل مجتمع مو بس هنا. ولا تظلم العرب… ترى مثل مافيهم المعتل .. فيهم الصاحي.. وصح لسانك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى