رسائل المجموعة

قصه : حقي (الجزء الثاني)

الجزء الاول من القصه هنا

(( حقي ))
الجزء الثاني والاخير
قصة وسناريو وحوار

Fox

بعد ان خرج خالد من مكتب المدير في الخدمه المدنيه استقل اول تاكسي قابله وطلب منه التوجه الى مسجد قريب من منزله ودار حوار بينه وبين سائق التاكسي .

سائق التاكسي: مبين عليهم شايتينك .

خالد : العن من الشوته والله …كانو بيشغلوني زبال.

سائق التاكسي: اف اف شدعوه سعودي زبال ..قويه .

خالد : لا وبيعطوني بدل ريحه وبدل ذبان الله يخرب بيتهم .

سائق التاكسي:  ( يضحك بقوه) : ياخي وش صاير بالبلد؟؟؟!!!..طيب بدل ماتدور على وظيفه ليه ماتقدم على تصريح تكسي مثلي  يعطونك سياره وتسددها على اقساط والله فيها خير .

خالد :  ادري عنها لكن من وين ادفع لهم قسط السياره؟؟  ماعندي أي دخل.

سائق التاكسي: انت بتاخذ الليموزين تعلقه على الجدار؟؟؟؟..ياخي دخلك من المشاوير يجيب لك القسط وزياده

خالد : اما يجيب لي قيمة القسط وزياده كثر منها..ليه انت كم دخلك؟

سائق التاكسي: انا ادخل قيمة القسط  وفوقها اللي يكفيني اكل وشرب اضافه الى ان راتبك بيدك متى مااحتجت فلوس روح وصل الناس . بس شيل من راسك جوال وتلفون وتلفزيون وكل الكماليات لازم تحرم نفسك منها عشان تعيش .

خالد : يارجال انا محروم منها بتكسي وبدونه… المشكله لو طلعت التكسي اخاف الناس ماتركب معي لانهم مايحبون الا الهنود ومع احترامي لك لوما الحر ماركبت معاك .

سائق التاكسي: انت رزقك  اغلبه من الحريم بتوفيق الله والحريم صارو يخافون من الاجانب بسبب الجرايم اللي سووها ومايركبون الا مع سعودي .

خالد : تصدق احس جتني طاقة وحماس ومن بكره بقدم على التصريح ..بس كم ياخذ ويعطوني؟

سائق التاكسي: اذا اوراقك جاهزه يطلع خلال شهر بالكثير  اهم شي ماتكون عندك وظيفه .

خالد : الله كثير شهر ….. الله يصبرني بس … ماتعرفنا عليك اخوي ؟

سائق التاكسي: انا اسمي سامر مصطفى

خالد : معليش بالسؤال …لكن انت سعودي؟

سائق التاكسي: انا امي سعوديه وابوي اجنبي.

خالد: انا اقول السحنه ماهي سعوديه والاسم كمل عليها..طيب شلون عطوك الليموزين وانت منت سعودي ؟

سائق التاكسي: طلعته باسم اخوي لانه سعودي .

خالد : وش هالحوسه..طيب ليه اخوك اخذ الجنسيه وانت لا ؟

سائق التاكسي: تاخرت عن المده المسموح فيها بالتقدم ورفضو يستثنوني وهذاني احاول فيهم ؟

خالد : اجل اخوك اكيد ماعنده وظيفه والا كان ماعطوه .

سائق التاكسي: لا اخوي موظف بشركه ومهنته بالاحوال متسبب عشان كذا عطوه تصريح .

خالد : ياعيني على الحوسه …يالله فمان الله يابوسمره .

ينزل خالد من الليموزين وهو سعيد لانه لن يشحذ ويحمدالله لانه سخر له هذا الشاب الذي اعطاه امل بالحياه …..ثم يدخل بيته ويجد زوجته ساميه تنتظره اما الباب :

ساميه : هلا خالد حبيبي نورت البيت .

خالد : هلا بوجه النحس.

ساميه : مقبوله منك……… ترى الغدا جاهز .

خالد : تونه طبعا .

ساميه : هذا الموجود حبيبي .

خالد : تصدقين قبل مااطلقك كنت احس اني كلب من معاملتك لي. والحين احس اني قطو  تدلعيني وتأكليني تونه كل يوم .

ساميه : كنت غلطانه ياخالد خلاص انسى الى متى وانت شايل علي .

خالد : الين ارتاح منك ومن شوفة وجهك وابشرك ترى البقال رفض يعطيني على النوته يعني لاتونة بعد اليوم.

ساميه : حرام عليك ياخالد والله اني عجزت ابي ارضيك ماعرفت.. ليش تعاملني كذا صرت ماأشوف تلفزيون وصايره مثل الخادمه عندك حرام عليك خلاص انسى الماضي كنت في فترة مراهقه وانتهت .

خالد : قال ايش قال مراهقه …..اصلا ماعقلتي الا يوم طلقتك ورميتك بالشارع…. واللي مصبرني عليك انك مقطوعه ماعندك اهل والا كان انتي عندهم من زمان.

ساميه (تبكي) : خالد ح ح ح……

خالد مقاطعا: بلا حا بلا ماني بقادر انسى تعاملك وتفضيلك الوصخ مهند علي …كنت احتاجك باخس الظروف وماالقى الا شين النفس منك.ومهما سويتي ماظنيت اني بنسى ماضيك .

يتجه خالد الى غرفته ويقفل الباب وبعد ساعتين تأتي له ساميه وتطرق الباب :

ساميه : خالد ترى مافي مويا بالبيت وانا بموت من العطش .

خالد : ماعندي فلوس .اشربي من الحنفيه….. والاتبيني اسرق؟

ساميه: طيب ليه ماتبيع التلفزيون والكرسي دامنا مانشوف تلفزيون من سنين .

خالد : انا مخليهم قدامك عشان كل ماتشوفينهم ضميرك يأنبك على السنين اللي ضيعتيها عليهم .

ساميه : الله يسامحك ياخالد والله يحنن قلبك علي .

بعد شهر يحصل خالد على الليموزين ويبدا في وظيفته الجديده ..وتمر عليه شهرين عاش فيها افضل حالاته النفسيه وكان يأتيه مايكفيه طيلة الشهر لتوفير اكله وشربه دون ان يحتاج لاحد …وذات يوم كان عائدا الى بيته فانتبه لشاب يطلب منه الوقوف والساعه كانت تشير الى الثانيه عشر ليلاً فتوقف له ظناً منه بأن الشاب لن يجد تاكسي بسهوله في ذلك الوقت . ركب الشاب وكان على عجله من امره .

خالد : شكلك من زمان موقف.

الشاب: لا توني واقف.اطلع على العرضيه بسرعه.

خالد : وش عرضيته بهالوقت .

الشاب: ياخوي وش عليك انت اطلع بسرعه لايفوتني الاكشن .

خالد : ياخوي تروح البر في الليل ومنطقه مقطوعه !!! لايكون ناوي تخطفني ؟!

الشاب: من زينك عشان اخطفك …اقول بتروح وانت رجالن تضحك وماني بنازل من السياره الا بالعرضيه .

خالد : المشكله انك عصل يعني لو انفخ بوجهك طرت….. انزل بس لااشوتك من السياره .

الشاب: بتروح غصبن عنك.

خالد : وش هالبزر اللي مسوي فيها قوي ..اقول انزل دام النفس عليك طيبه .

 الشاب يتمسكن : تكفى يرحم والديك ودني اخوي مخطوف من يومين ودق علي من جوال قبل شوي وعلمني انه هناك وحالته صعبه .

خالد : انت صادق؟؟!!

الشاب: اقسم بالله اني صادق والشرطه راحت هناك وماعندي احد يوديني .

خالد : مع اني احس انك تخف فيني لكن بوديك وان طلعت نصاب ياويلك .

 وعند وصوله للعرضيه وجد تجمع كبير من السيارات والاشخاص:

خالد :  وش انت… اخوك وزير والا وشو ..بعدين وين الدوريات؟

الشاب: انت مصدق انت ووجهك …هذا احلى مكان بالدنيا وفيه اكشن ماعمرك شفته .

خالد : وش قصدك ؟

الشاب : ياعمي هذا شارع  تفحيط وفيه كبارية التفحيط ابو لزقه وابو قلص وابو سطحه وذولي مايجون الا بفلوس هنا من قوة شهرتهم .

خالد : الله يخرب بيت ابو شكلك جايبني محل تفحيط .

الشاب يهم بالنزول : يلا اقلب وجهك.. وابشرك فلوس مافيه .

يمسك خالد بالشاب من ثوبه ويهدده بالدفع والا ذهب به للشرطه ويبدا عراكهم  واثناء ذلك وفي عتمة الليل تأتي سيارة المفحط ابو لزقه وتصطدم بتاكسي خالد في حادث شنيع يصاب خالد بسببه بجروح وكسور تقعده بالمستشفى لمدة شهرين ,وبعد خروجه يراجع المؤسسه لطلب تعويضه عن الحادث واعطائه تاكسي جديد, ولكن يرفض طلبه والسبب قيامه بالتفحيط والخطا كان عليه مئه بالمئه لانه انقلب بالسياره اثناء تخميسه بالسياره.فيجن جنون خالد ويحكي لهم القصه ولكن لا احد يصدقه ويحاول بشتى الطرق ان يقنعهم ولكن دون جدوى ,فيعود الى وضعه السابق ويقرر ان يعود الى الشحاذه ويقول :

مكتوب عليك الشحاذه ياخالد .

يذهب الى احد المساجد ليبداً مهنته الجديده وبعد ان يفرغ من الصلاه  يدعو الله ان يرزقه بوظيفه تغنيه عن الشحاذه ثم يخرج فيكتشف بانه تأخر كثيرا بالخروج فالمصلين اغلبهم خرجو من المسجد ولكن يجلس وهو في قمة ارتباكه على الارض وفي قلبه غصه ودموعه محبوسه غير مصدق بأنه وصل لهذه المرحله  وغير مقتنع بما سيقوم به .

واثناء جلوسه على الارض يأتي له امام المسجد الشيخ ابوزهره ويبدا الحوار :

ابوزهره: خير ياخوي وش بلاك جالس كذا على الارض عسى ماشر .

خالد : لم يستطع تمالك نفسه فيبكي بكاء من القلب : ياشيخ انا حالتي تعبانه وماابي اشحذ

ابوزهره: وش حادك يااخي وش قصتك …… انت مدمن ؟؟؟

ويحكي خالد للشيخ قصته كامله …..وبعد ذلك :

ابوزهره: انت في ديرة خير وبركه وتشحذ!!! وبعدين وش الفرق بين عامل النظافه والشحاذ

بالعكس انا اشوف ان عامل النظامه افضل من انك تذل نفسك وتطلب الناس .

خالد : ماارضاها على نفسي اشتغل زبال لو اموت وانا عندي الشحاذه اشرف وكل واحد وتفكيره.

ابوزهره: طيب قدم على الجمعيات الخيريه يصرفون لك راتب شهري اذاماعندك دخل .

خالد : قدمت عليهم قالو ابوك عايش يقدر يصرف عليك و قالو لي بعد جب تزيكه من امام المسجد انك تصلي الصلوات الخمس مع الجماعه.

ابوزهره: طيب التزكيه تقدر تجيبها لكن كيف ابوك عايش وتشحذ..ياخي امرك غريب .

خالد : انا اصلي في برتبل قدام بيتي ومافيه امام رسمي كل يوم يصلي واحد فينا مره باكستاني ومره هندي ومره شايب موب حافظ الا المعوذات ويغلط فيها بعد, حتى معاذ ولد جارنا اللي عمره 12 سنه يصلي فينا ..من وين اجيب تزكيه بالله عليك ؟

ابوزهره : ياخي امر التزكيه سهل لكن المشكله في ابوك …ليش مايساعدك .

خالد : ابوي تعب وهو يساعدني والحين هو بالمستشفى صار له فتره طويله في غيبوبه بعد مااعطى كل حلاله لتاجر اسمه ( لمه اللمه) اخذ فلوس الناس عشان يستثمرها وسحب عليهم والى يومك ماعطاهم شي .

ابوزهره : طيب ابوك ماعنده دخل ثاني .

خالد : اقولك خسر كل فلوسه ومريض ولايحس بلي حوله .

ابوزهره: قلت للجمعيه ان ابوك مريض ومعسر؟

خالد : قلت لهم لكن مافي فايده قالو انت ماتستحق الزكاه ولو بنعطي كل عاطل راتب مابقى فلوس بالجمعيه والتجار يتبرعون بالقطاره .

ابوزهره : طيب احضر  لي صوره من دفتر العايله وصوره من تقرير لابوك انه مريض وجب لي ورقه عليها شاهدين انك ماتشتغل ولاعندك دخل وانا بدلك على طريقه تساعدك .

يتجه خالد مسرعا الى البيت ويجهز ماطلبه ابوزهره ثم يعود لابوزهره ويعطيه اياها .

ابوزهره:  لاتعطيني اياها خذ هذا الخطاب وروح للشيخ (مليان خلقه) وهذا تاجر كبير وبيساعدك بمبلغ تبدا فيه مشروع صغير وياااخوي خالد تقرب من ربك اكثر واكثر ترى ماحد بينفعك الا دينك وصلاتك  .

خالد : الحمدلله على كل حال مايحتاج توصي .

يتجه خالد الى منزل الشيخ( مليان خلقه) ويعطي الحارس اوراقه ويطلب منه ايصالها للشيخ

الحارس : جاي تشحذ اكيد .

خالد : لا جاي اصور معاك انت ووجهك .

الحارس :  ياخي غريبه على بلد فيها نفط والعالم كله يجري وراه واولادها يشحذون .

خالد : ياخي غريبه على واحد مثلك حارس جحلط وجالس يتفلسف .

الحارس :  انا الحمدلله اخذ راتب مو زيك اشحذ من الناس .

خالد : اقسم بالله ان ماسكت ورحت لشيخك تودي له الورقه لا اسويك مع الارض .

الحارس :  شكلك ماتعرف الشيخ…. لكن من الحين اقولك مارح يعطيك شي .

يتجه الحارس لداخل القصر وبعد فتره يعود الى خالد ويطلب منه الدخول

يدخل القصر وينبهر مما شاهده  وتعود له الغصه التي جائته امام المسجد ويكاد يبكي من شدة قهره ولكنه يتمالك نفسه  واثناء انتظاره بصالة الجلوس يسمع الشيخ مليان خلقه وهو يتكلم بالهاتف

الشيخ يتحدث بالهاتف : طال عمرك اتشرف بحضورك لزواج بنتي على ابن الشيخ متروس بن منفوخ .

خالد بهمس : بل وش ذا الاسم شكل ولده كبر بير النفط .

 الشيخ : ايه طال عمرك نانسي وهيفاء ومطربه جديده اسمها شايله بيحييون الحفل بصالة الرجال والساعه 12 برسلهم لصالة الحريم .

خالد بهمس : ياسلااااااااام نانسي وهيفا اللي يحبهم خويي ابو سلمى ..ليته يشغلني عنده شكله رايق بقوه .

 الشيخ : والله انك صادق طال عمرك ملايين تطير بيوم واحد لكن هذي بنتي الوحيده ولازم اسوي لها عرس الكل يتكلم عنه .

ثم يغلق الشيخ الهاتف ويطلب من الحارس ادخال خالد

 الشيخ : هلا حياك الله …..انت اللي جاي من طرف الشيخ ابوزهره ؟

خالد : اي نعم طال عمرك .

 الشيخ : والله ياولدي انا استغرب انك سعودي وجاي تطلب مساعده !!

خالد باحراج: مرت علي ظروف الله اعلم بها طال عمرك .

 الشيخ : طيب انت في بالك مشروع معين .

خالد : والله ودي ارجع التكسي اللي كنت اشتغل عليه واذا عليك تكليف وماودك تدفع شوف لي واسطه عشان يعوضوني .

الشيخ: اي تكسي ياخي اقولك مشروع تقولي تكسي .

خالد: سم طال عمرك اجل تبي مشروع ثاني؟ ..ابشر ..مممممممممم بصراحه انا ماودي اكلف عليك وبقاله صغيره تفي بالغرض, واوعدك ماابيع دخان فيها .

 الشيخ : ياخي انت اهبل والا شكلك كذا؟

خالد : نبيع دخان ليش لا اهم شي رضاك طال عمرك ولو تبي استورد شروت للتواجير شرواك ابشر من عيوني .

 الشيخ : ياأخي عندك مشروع زي الناس فيه ربح مجزي لي ولك والا مع السلامه .

خالد: والله انا جاي على انك بتعطيني فلوس وبفتح مشروع على قدي مادريت انك تبي تشاركني .

 الشيخ : مخلفك وناسيك عشان اعطيك بدون مقابل .

خالد : اعتبرني نانسي عجرم وعطني..ومستعد اسوي لك سامري بعرس بنتك واخلي الشيخ متروس  ينام عندك من زود الوناسه .

            الشيخ يصرخ : تتسمع على مكالمتي ياقليل الادب.

وينادي مرزوق كبير الحراس .

مرزوق: سم ؟

 الشيخ :شيل الشحاذ هذا وارمه برى ..قال ايش تساعدني ..فاتحها جمعيه خيريه؟

خالد يصرخ : حتى لو فاتح جمعيه نظاما مااستحق لان ابوي عايش !!!!

 الشيخ : شيلووووه .

ويعود خالد مشيوت للشيخ ابوزهره ويخبره بما حصل :

ابوزهره : ياخي صدمتني من جد انا افكره رجل تقي اثره راعي نانسي وطختها .

خالد : افاااااااا….انت تعرف نانسي ياشيخ ؟

ابوزهره بإحراج : مو توك تقولي السالفه ياخي وش بلاك انت….استغفر الله العظيم .

خالد : طيب والحل ياشيخ .

ابوزهره : اذا الشيخ مليان خلقه ماعطاك اجل ماحد بيعطيك.

خالد : شكله راهي بقوه بو خلقه هذا .

ابوزهره : يقول صاحب لي ان عنده بحساب واحد بس نص مليار ريال .

خالد : العن امه كل هالمبلغ عنده ويبي يشاركني ببقاله .

ابوزهره : استغفر الله ياخي اللعن مايجوز انت وين تبي الله يرزقك وهذي الفاظك والحسد مالي عينك .

خالد : استغفر الله والله قلتها بدون شعور .

ابوزهره : خلاص وش تبي الحين مقدر اسوي لك شي .

خالد : افا وش هالجحده؟ يعني ارجع اشحذ .

ابوزهره : والله بكيفك انا حاولت اساعدك وماقدرت .

يعود خالد الى البيت ويجد ساميه بانتظاره كالعاده :

خالد : والله شكلك انتي اللي ناحستني الله يخرب بيتك ياشيخه ويفكني منك .

ساميه تبكي: انا تعبت خلاص تعبت .

خالد : عساك التعب ياشيخه .

في صباح اليوم التالي يذهب خالد لزيارة والده في المستشفى بعد ان اخبروه بانه بدأ يتكلم.

خالد : هلا بو خالد سلامات ماتشوف شر تكفى اصحى ياشيخ ترى الفلوس وصخ دنيا .

ابوخالد بحسره: فلوسي….فلوسي .

خالد : فلوسك خلاص بح شح مح خذها الطير وطار .

ابوخالد: فلوسي شقى عمري ياام خالد .

خالد : انا لله وانا اليه راجعون .

خالد للممرضه: الحين وش سالفة ابوي يادكتوره.

الممرضه : دكتور يجي الحين .

بعد دخول الطبيب

الدكتور : انا الدكتور عماد المسئول عن حالة والدك من اليوم ورايح .

خالد : وش فيه ابوي يادكتور؟

الدكتور عماد: ابوك مصدوم وحالته بتجلس كذا على طول مع الاسف.

خالد : ينظر الى ابوه ويتذكره عندما قال له مارح اساعدك الا اذا شفتك تشحذ ثم يدخل في نوبة بكاء ويقبل راس ابوه ويقول : ابوي تكفى اصحى ماعندي احد غيرك انا احس اني بغربه .

الدكتور عماد: لاتتعب نفسك اخوي والله يكون بعونك .

يخرج خالد من المستشفى و يتجه الى مسجد  آخر ويجلس نفس الجلسه وهو يبكي .

واثناء ذلك يأتيه  شاب يلبس بدله وكرفته وآخر انتكه :

توضيح لبعض الكلمات في الاسفل ( وئعت = وقعت)  (لزئه = لزقه) (ئولت = قلت) (يدوك= يعطونك .

 ( قهاز = جهاز) (قاي = جاي) (سدئت= صدقت) (بهرج = امزح) (دلوئتي = الحين) .

الشاب: انتا وئعت واحنا كولنا حنسمي عليك .

خالد : بسم الله … وش تقول انت ؟؟

الشاب : معاك زكي من شركة ال زد جي اتش ( (LZGH  للتسويق وده الكرت بتاعي .

خالد : وهو ينظر للكرت : ههههههههههههه اسم الشركه  لزقه ؟

زكي : لزئه دي عندكو هنا وانما في الدول المتقدمه شعار لاكبر شركات التسويق .

خالد : شكلك تخف فيني لكن امرني وش بغيت .

زكي :احنا شركة تسويق وبنسوق لكول حاقه في الدنيا من دبة النمله لغاية التجاره في الكواكب…انت قاي تشحت صح ؟

خالد : يعني….. جالس اتباحث مع نفسي لسه .

زكي : طيب لو انتا عاوز تشحت الشركه ممكن تسوق لك مهنتك …ئولت ازاي ….احنا بنوفر ليك كل الوسائل اللي تخليك تشحت زي الاوادم . يعني مثلا نخلي موظفين عندنا يمشو قدام الناس اللي مليانه ويدوك 500 ريال فلما تشوفهم الناس المليانه حيدوك 500 زيهم أو اكثر عشان عيب ده يدي 500 وانا ادي اقل وبكدا نضمن لك دخل 2000 ريال باليوم باذن الله .

خالد : الله وش هالتطور ..طيب هل ال500 الي بيعطيني اياها موظفكم تصير لي والا تاخذونها وكيف بتعرفون الناس المليانه من الناس الفاضيه .

زكي : لا طبعا ترجعها للموظف بعد ماتمشي الناس …وبالنسبه للناس المليانه عندنا قهاز لما يمر اي واحد منه يبان اذا كان جيبه مليان والا فاضي .

خالد : ياشييييخ …طيب مرره علي خلني اشوف .

يمرر زكي الجهاز امام خالد : يااااااه دنتا مليااااان .

خالد : قل قسم بالله .

زكي : مليان هم ياعيني .

خالد : اعوذ بالله حتى الهم يطلعه بعد ؟؟؟!!!

زكي : انتا سدئت ..دنا بهرج هههههه..طبعا فاضي .

خالد : احسبك صادق الله يرجك..طيب انا ماودي اخدع الناس بصراحه لكن ابي اجرب الجهاز… كيف طريقة الاشتراك عندكم .

زكي : ولا حاقه: مجرد رسوم سنويه ناخذها منك وهي مبلغ ولا حاجه يعني بيسموه عندكو هنا (طفسه) .

خالد : كم يعني ؟

زكي : قبل مااقولك كام انت عملت دراسة جدوى للشحاته بتاعتك ؟

خالد : فاتح شركه استثماريه عشان اسوي دراسة جدوى؟!

زكي : بالعكس دي تفيدك أوي لان التخطيط المسبق يساعد في نجاح المشروع … طيب مش مهم احنا حناخذ منك ثلاث الاف ريال كل سنه وتقدر تدفعها على اقساط كل شهر 250 ريال ونضمن لك مافيش خساره باذن الله .

خالد : دام في ضمان اجل موافق توكل على الله .

زكي : حتدفع اد ايه دلوئتي؟

خالد : ولا ريال ..ماعندي شي الحين… توني فاتح !!! .

زكي : ماينفعش لازم تدفع .

خالد : خلاص اجل يفتح الله .

زكي : طيب ادفع 50 دلوئتي وبعدين تكمل الباقي عشان اقدر اسجل اسمك  .

خالد : والله ماعندي ولا ريال .

زكي : طيب حستناك لغاية مايمشي كل المصلين يمكن يدوك حاجه مع اني متاكد مش حيدوك اي حاجه لان لبسك نظيف وشكلك نظيف .

خالد : معليش توني مااخذت خبره .

ويمر المصلين ولاياخذ خالد اي ريال فيأتي اليه زكي :

زكي : مالكش بالطيب نصيب انا اسف قدا ودام انتا بصحتك روح شوفلك شغله تانيه احسن .

خالد بنرفزه : وانت ليش ماتشوف لك وظيفه زي الناس بدل ماتعلم الناس الشحاذه

زكي : انا عندي بكالوريوس تسويق والشحاته مش صنعتي لكن اوامر الشركه ولازم انفذها والا حخسر الوظيفه وانا مابعملش حاقه غلط على فكره ومابعلمش الناس الشحاته وانما اسوق لأي مهنه وبس لكن انت اللي بتعمل غلط لما تشحت وبلدكو فيها خير كتير لكن عاوزه ناس تتعب عشان تجني .

يقتنع خالد بكلام زكي ويقرر نسيان الشحاذه والتفكير في طريقه للحصول على مبلغ مالي لفتح بقاله واثناء تفكيره يتذكر صديقه سعيد الذي لم يقابله منذ عدة سنوات ويقرر بأن يتصل عليه كون حالة والده الماديه كانت جيده وقد يستطيع مساعدته بمبلغ فيتصل على صديقه ناصر يساله عن سعيد فيخبره ناصر بان سعيد يعمل في شركة ارامكو ولايملك سوى رقم مكتبه فياخذه منه .

في صباح اليوم الثاني :

خالد : السلام عليكم

سعيد: عليكم السلام

خالد : سعيد معاي؟

سعيد: اي نعم اخوي من يتكلم؟

خالد : انا خالد الديري ياوجه الطبل .

سعيد: هلا اخوي خالد حياك الله .

خالد : وش هالاستقبال البارد

سعيد: اعذرني والله ضايق صدري على مايكل توفى امس .

خالد : افاااا .عظم الله اجركم …ياخي وش حادكم على السواقين وانتو بصحتكم.عسى السياره ماجاها شي بس ؟

سعيد: وش سواقينه ووش سيارته الله يصلحك انا اقصد مايكل جاكسون .

خالد : االلله ياقدمك الى الحين تسمع له؟! ..خبري به على ايام الددسون والبريك دانس والطاقيه ام جنيه ..ياخي استح على وجهك رجال وش كبرك وتسمع لمايكل وهالخرابيط .

سعيد: ياخي يقولون انه مات مقتول .

خالد : اقول سعيد ماودك تشاركني بمشروع..انت بالفلوس وانا بالمجهود .

سعيد: وش فيك دخلت عرض!! ….لا ماودي .

خالد : ليه تصكها بوجهي كذا طيب ؟!

سعيد: ياخي سالتني ودك وجاوبتك ماودي وخلاص …من عرفتك وانت مصلحجي ياخالد …عموما لو تبي تمويل تقدر تقدم على قرض وتفتح اللي تبي .

خالد : ياخي ماعندي وظيفه وحالتي الماديه صفر وعلي قرض لمؤسسة تمويل التكاسي .

سعيد: طيب قدم على ابومتعب تراه يسدد عن الضعوف اللي مثلك .

خالد : شكرا على وقفتك السلبيه ياسعيد فمان الله .

ينصدم خالد من رد فعل صديقه سعيد ثم يتجه الى مجلس صديقه ابوسلمى ويحكي له ولناصر كل ماحدث له ويطلب من ابوسلمى سلفه ولكن ابوسلمى يتعذر بانه ليس لديه مال ويكفي مااقرضه اياه على مدار هذه السنين .

واثناء ذلك يعرض التلفزيون الاخبار ويشاهد ملك الانسانيه ابومتعب وتنزل دموعه فيقول

ياخي احبك والله احبك ولو اوصلك والله منت مقصر لكن كيف اوصلك ؟

ناصر : سهله ياخي روح الديوان ادخل عليه والله لو درى بحالتك مايخليك كذا.

ابوسلمى : يارجال البلد مليانه من اللي مثل خالد ولو بيعطونهم كلهم فلست الديره خاصه ان في ناس ماعندها بيوت يعني وضع خالد احسن من وضعهم ساكن في بيت ابوه بعد ماماتت امه الله يرحمها .

خالد : الله يرحمها ماتت من الحسره على ابوي  الله يشفيه .

ناصر : ياخي خله يروح وش بيخسر….. انا اعرف واحد قدم على ابومتعب وصكه بخمسين الف سدد القرض اللي عليه للبنك .

خالد : ياخي اللي يدخل عليه بيحصل خير بس كيف ادخل عليه؟

ناصر : طيب ارسله برقيه عن طريق الهاتف وتوصل للديوان ثاني يوم وبعدين تابعها بالتلفون .

خالد : اجل بكره بسويها .

ناصر : خذ خمسين ريال حق البرقيه معاك .

خالد : افااا بفلوس اثرها …حتى ملكنا اخاطبه بفلوس..طيب ماعنده بريد الكتروني اوفر .

ابوسلمى: الا عنده….وعنده مسنجر وتلاقيه بالشات كل يوم ..الظاهر ان عقلك طار من الفقر .

خالد : طيب يابوسلمى دامك مروق عطني سبعين ريال عشان اروح للهاتف بتكسي تعبت من النقل الجماعي حر وريحه ولك وعد مني لو عطاني ابومتعب فلوس وفتحت البقاله بعطيك على النوته .

ابوسلمى بنرفزه: آخر سبعين اعطيك اياها  ياخي ابتلشت فيك والله .

يتجه خالد الى شركة الهاتف ويقدم خطابه ويطلب من الملك مساعدته في سداد دينه ومنحه مبلغ لبدء مشروعه الصغير وبعد عدة ايام يبدا بالاتصال على الديوان للاستفسار عن البرقيه وفي كل مره يخبره الموظف بأنها مازالت تحت العرض وتمر عدة ايام على خالد وساميه لايأكلون فيها سوى وجبه واحده كل يومين ويحضر ماء من المسجد يروي عطشهم .

اكمل خالد سنتين وموضوعه مازال تحت العرض!!!

توفي ابوه مقهوراً وموضوعه مازال تحت العرض!!!

باع منزل والده بسعر زهيد لسداد ديونه ولم يكفي المبلغ لسداد كل ديونه وسكن شقه مشتركه مع خمس عوائل في حي الدخل المحدود وموضوعه مازال تحت العرض!!!

رغم ظروفه القاسيه ساميه لم تستغني عنه وظلت تخدمه وموضوعه مازال تحت العرض!!!

 لمن يريد الوقوف مع خالد ومساعدته ماديا  فعليه أن……………. ينسى لان خالد شخصيه وهميه..ورغم واقعية ماحدث له حتى لو بالغت  لكن يظل شخصيه وهميه من الواقع ولو فكرنا في مساعدته ماديا فلن تكفي نقودكم لمساعدته لان صديقنا خالد ليس خالد واحد ولاعشرة وانما اعداد كبيره من الخولدز< جمع خالد حصلت لهم ظروف مشابهه لخالد مع اختلاف الاسباب فمنهم من كانوا يعيشون في ستر وعافيه فانكب عليهم اعصار مساهمات الشركات الوهميه ونفضهم ثم جائهم اعصار سوق الاسهم ونفضهم ومازالو يرتشفون اعصار ارتفاع الاسعار الخيالي .

منهم من خسر ماله ومنهم من خسر ماله وصحته ومن من خسر ماله وصحته وحياته .

 والمصيبه التي يندى لها القلب وتدمع لها الاعين بان المتسببين في انهيارات المواطنين مازالو يتمرغدون في حياتهم الرغيده .

خالد لم يدخل الاسهم ولم يساهم في الشركات الوهميه ولكن نفضه اعصار الظلم دون ان يقترف اي ذنب

الحمدلله على كل حال

وصية خالد قبل وفاته : بلادي وإن جارت علي عزيزة….وأهلي وإن بخلوا علي كرام م .
– النهايه –

Fox

مقالات ذات صلة

‫41 تعليقات

  1. وصلت على الإيميل كنت أنتظر النهاية بس ما توقعتها كذا … محزنه مره 🙁 ايه والله فيه كثيرين مثل خالد بس من يدري عنهم المشكلة ؟ كل شي تحت العرض! ألحين يشغلون سعوديين وسعوديات عمال نظافه والراتب ما يتعدى ألف ريال كله لأنهم محتاجين واستغلوا حاجتهم 🙁 الله لا يحطنا مكانهم ويرزقهم يعطيك العافية ما شاء الله كتابات هادفة وننتظر جديدك ولا تبطي

  2. قصه رووعه خيوو ويعطيك العافيه وصاادق في كلامك حتي لو البلاد جارت عليك تكووون عزيزه على قلبك مهماا كان تحيااتي لك أختك فرفوشه ..

  3. قصة حزينه وإن قلنا فيها طرافه ولكن الواقع مؤلم ويوم عن يوم تثبت لي الحياة إنها قاسيه سبحاان الله قلت لكم خالد بيموت في الجزء الثاني وصدق مااات ياليتني قايله بيصير غني وبيعيش سعيد يمكن صدق صااار 🙁 يعطيك العافيه

  4. بارك الله فيك تمتعت في قراءة الجزء الآول ولم اعلم ان هناك غيره متعتي زادت اليوم قصة رائعة وتحكي حال الكثير للآسف لا تحرمنى من جديدك

  5. والله أنك كفو بالله لا تحرمنا من القصص الحلوة ذي أخوك : سعود الحربي

  6. مِن أروَعَ القِصَصَ التَيَ قَرأتُهآ .. قرأتُ الجُزءَ الأوَل و أنتَظَرتُ الجُزءَ الثآني شَسء مُذهِل الصَرآحَه نِرجَع لِلقِصَه مآ شُفت مُبآلَغَه فيهآ مَعَ إحتِرآمي لِلجَميع بَس إنَهآ تِوصِف حآل مُجتَمَعنآ غِنآنآ لِغِيرَنآ الأجآنِب أبدَعت في القِصَه وأتمَنَى أشوف جَدِيدَك دآئِماً .. أُختَك : S.B.R

  7. يسلمووو ايديك على القصه فيها كوميديا بس للأسف هذا الشئ حقيقي جدا في مجتمعنا استمر على هذا المنوال وحاول تذكر المطلقاتو الارامل والايتام في قصصك يمكن احد يحس تحيااااااتي

  8. ياخوي انا رجال اتابع مسلسلات وافلام عربية كثير واول ما الاحظ فيها هو سخافة ورتابة وبياخة النصوص .. والله لمن قريت قصتك تركت كل الصفحات اللي كنت اشتغل عليها وكملت القراءة للنهاية .. ماشا الله عليك نص عالي وذكي وحوارات وقصة شيقة جدا جدا .. والحمد لله ان ماخاب ظني لاني فكرتك في النهاية لمن جبت سيرة الملك – اسمح لي عاد – فكرتك مثل السلاتيح اللي يدخلوا القيادة الرشيدة في كل شي لكن ما اقول الا الله يوفقك ويبارك في موهبتك .. على فكرة ليش مالتشتغل في التمثيل يعني تكون كاتب ولا مخرج ولا شي زي كذا ؟؟ مالي شغل عاد ههههههههههههه لكن اخوي فوكس ابغا ادلك على كاتب له نفس طريقتك بل واشوف انك راح تتعلم منه الكثير لان له اكثر من 15 سنة وهو يكتب اعطيك اسمه للفايدة : د. احمد خالد توفيق .. كاتب مصري .. يكتب سلسلة روايات اسمها ( ماوراء الطبيعة ) لها اسلوب ومشوق وجميل جدا جدا وكتبه تنباع في مكتبة جرير .. هي روايات صغيرة بس اعدادها كثير وراح تعجبك باذن الله على العموم والله اعجبت فيك والله يحفظك ويوفقك

  9. طيب إلى متى الوضع اللي احنا فيه . عندي فكره أتمنى من اللي عندها استطاعه يعملها . نسوي حمله ونشوف كم العدد يوصل لعل وعسى يوصل الوضع لمليكنا المحبوب أبو متعب .

  10. الله يسلملنا أيدينك على هالقصة الرائعه ابدعت أخوي في اسلوبك وفي مجريات واحداث القصه بصراحه ابكتني رغم الاسلوب الكوميدي الي اخترته ..وصيته من جد تحزن رغم كل شي مر فيه ختم وصيته ب بلادي وإن جارت علي عزيزة….وأهلي وإن بخلوا علي كرام . وهذا وهو ماشاف منهم خير أبد ..الله يعين أمثال خالد ..قصة هادفة ومفيدة شكرا لك .. وعندي اقتراح لو تكتب سيناريو مسلسل 37 درجه يكون احسن ..كل شي حلو بهالمسلسل وفكرته الا السيناريو فاشل ياليت القائمين عليه يعينونك عشان نستمتع اكثر بهالمسلس وينجح..

  11. كتابتك فوكس رائعه فعلا ونتطلع للمزيد .. والاخوان والاخوات ما قصروا بتعليقاتهم وردودهم ,, وفعلا كانت تحكي واقع مرير يعيشه الكثير من اخواننا في بلدنا اليوم ,, واحب اضيف نصيحه للقراء ,, ما دام انتم عارفين انه فيه ناس ضعاف وحظهم ردي ,, يا ليت انكم ما تعتمدون على الجمعيات الخيريه وغيرها ,, يعني الكثير منا يتبرع للجمعيات ويقول هم يودونها للمحتاجين ,, صدقوني انه مو كل الجمعيات صادقين مع احترامي لهم لكن ما دام سويتوا خير سلموه بانفسكم للمحتاجين شوفوا بعيونكم اماكن عيشهم ولبسهم واكلهم عشان تحن قلوبكم اكثر وتصير صدقاتكم بشل دوري و دائم ,,و مهم نعرف انه لازم نبدا بالاقربون ,, يعني الاهل ثم الجيران ثم الصدقاء ثم الناس اجمعين .. عسى الله يهدينا ويرزقنا ويبارك لنا في رزقنا .. آآآمين 😀

  12. حقيقي من الف هذه القصة فهو مبدع و صاحب خيال واسع و تقبلوا تحياتي

  13. ما شاء الله تبارك الله ابداع واتمنى تستمر في الكتابة والقصة تصور حال الكثير بشكل عام شارفت على البكاء عند النهاية

  14. رائع رائع رائع بناء قصة ادبيى متكامله ومتناسقه الى الامام دوما . تقبل تحياتي . ظلم اجحاف كوميديا سخرية جلد للواقع .. لله درك انت غيرهم

  15. ما شاء الله ابداع مابعده ابداع :$ صدق هذا حال كثير من الناس والبلاد تحت ارضها كنز تحياتي لك والى الامام

  16. الله يعطيك العافية على الابداااااع والله يفك ضيقة كل الي مثل خالد

  17. حبيت اشكرك على القصة واقول الله يرحم حالنا بس ويرزق كل محتاج وشئ مؤسف ان هذا حال السعوديين! الله لايحوجنا لاحد

  18. هذي مو قصه .. هذا الواقع الذي يعيشه الشاب السعودي من هدم للمواهب وتحطيم للمعنويات و تيؤوس في الذي يحلم للوصول له كلنا خوالد اشكرك ياfox والى الامام الله يزين حالنا كن قريب من الرب تكون قريب من النجاح

  19. الله المستعان هذا حال كثير من بلاد العرب والمسلمين بس جد قصة روعة

  20. وصية خالد قبل وفاته : بلادي وإن جارت علي عزيزة….وأهلي وإن بخلوا علي كرام تبطييييييييي تصير عزيزة

  21. مشكور حبيبي على القصه بس تراها مؤثره جدا وفيها حس فكاهي الله يعطيك العافيه و كل شي قسمة ونصيب والارزاق بيد الله سبحانه

  22. احب ان احي الكاتب على ما كتبه بابداعه وروعت ما نثره صراحه ابع الكاتب ابداع ما شاء الله لاتحرمنا من كتاباتك اخوي

  23. السلام عليكم الجمعيات الخيريه بحاااجه الى أعادة هيكله بالعربي تنظييييف من بعض الاوادم اللي فيها شكرا فوكس دمت متالق والاخ اللي يقول تبطي تصير عزيزه ؟؟؟ لو كل واحد قال تبطي تصير عزيزه بالله من يهتم فيها ؟؟؟ دمتم بود

  24. بصراحة عجزت وانا ادور كلمات للرد عليك ,, ابدعت اخوي الله يعطيك العافية والى الاماام ,, اتمنى ان القصة تكون في احد المسلسلات الرمضانية ويشوفوها الناس .. دمت سالما معافى اخوي

  25. قصة حلوة جدا وفعلا بلادي وأن جارت علي عزيزة بالتوفيق أنشاءالله

  26. انا شخصيا لي سنة وانا اتعامل مع اسرة فقيرة ومثل ما قلت لم تدخحل سوق الاسهم ولم تتعرض لظلم انما الكمد و الظلمة والغلااااء اطاح بكاهلها الله يرفع عنهم وبجد الواح اصبح يخجل منهم لعدم قدرته على المساعدة فلا اهل يساعد ولا المجتمع يساعد وكلهم يرونهم شحاذين مع انهم اغنياء من التعفف الله المستعان مرة اخرى

  27. حسبي الله ونعم الوكيل أرحموا من في الأرض يرحمكم من في السماء حتى في معاملت الناس بعضهم ببعض نجد الرحمه بينهم نادره ما عاد أحد يرحم أحد كل واحد يقول نفسي نفسي وهو في الدنيا الدنيه التجار صابهم الجشع والنهم والوزراء وما دونهم بها القرارات الصارمه من تدبيل قسايم وسعوده وقطع مكافآت وعدم تبني الافكار……… أكثروا من حسبي الله ونعم الوكيل ومهما كان بلادي وان جارت علي عزيزة يكفي أنها قبلة المسلمين اشكرك أخي على الطرح الاكثر من رائع ولك ودي وتقديري

  28. مشكوور ومـــــآآقصرت يا الموهووب .. كمل إبداعاتكـ ..:D كم فيه ناس مبدعين زيكـ .. موومشهرين قصدي موكتاب ولاشىء .. والي كتاباتهم ….. وللآسف هم الي مشهوورين 🙁 وإن شــآآء الله نشووفك أعلى الكتاب 8) والله يووفقكـ في المجال الذي أنت فيه ..إن شــآآء الله 😀

  29. السلام عليكم ورحمة الله وبركاته اخوي فوكس الفكره جدا رائعه واتمنىآ منك اخوي فوكس وهذا اللي واضح من قصتكـ اتمنىآ ان تضع المشاكل الليت نواجهها وصدقني قصصك عليها اقبال كبير والكل راح يستفيد صدقني بالتوفيق يالغالي

  30. أول شي أحب اقدم لك كامل احترامي وتقديري على ماقدمته وأبدعت في تقديمه .. ومانقول غير الله يرحم شعبنا ويستر عليه ..

  31. قصه جميله ووتحكي رواية مجتمعنا اليوم ابداااااااااااااااااااااااااااااااااااااااااااااااااااااع & تميز بلا حدود الى الامام ننتظر الجزء الثالث والرابع والخامس وال …….. بالتوفيق FOX

  32. مشكور أخوي على ماتقدم وهو والله أكثر من رائع في إظهار الواقع دمت بكل خير ولاتحرمنا من جديدك الواقع

  33. قصـه جميـله .. وتحكي عن وآقع مؤلـم وصرآحه فيـه نآس كذآ .. بس وش نقول .. الله يعينهم ويرزقهم ويوفقهم يآرب .. مآقصرت يالغالي على طرحك الروعه

  34. قصه خياليه جميله تحاكي واقع شباب الله يعينهم يكفي مدحا فيها ادب قلمك اخ فوكس و بلادي وإن جارت علي عزيزة….وأهلي وإن بخلوا علي كرام

  35. ابدعت FOX . قصه تحكي واقع ناس كثير هنا . صراحة بالعاميه اللي يمغصك ويفقع مرارتك انه في مهندسين ودكاتره خالطتهم عرب دايما على لسانهم انت سعودي اكيد معك سياره اكيد معك لاب توب اكيد معك فلوس ( مادرو عن خالد) رساله الا كل شخص يتوقع انه كل شاب سعودي مرتاح ماديا (كفاية حسد في ناس ماعندها بيوت ولا اكل ليومها بس ) يعني حرام محسودين على شي مو عندنا صاحب القصه وفقت في موضوع القصه واسلوبك جميل تحيــاتي

  36. 🙁 والله قصة توجع القلب ….. ما احب هذي القصص 🙁 والله يعين الي بمثل هذا الحال ويعافينا ولا يبتلينا ………. وماشاء الله عليك يا اخي فوكس خليتني أعيش معاه القصة وأتمنى له الخير لكن النهاية قطعت قلبي فلا تعيد تكتب غيرها 🙁 وجزاك الله خير

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى