رسائل المجموعة

قصة قصيرة : عواد خلف القضبان

في البدايه السلام عليكم ورحم الله وبركاته/<< مسوي حركه جديده الحين
فيه الحقيقه والواقع والاكيد اني كل ماكتبت قصه اشيل هم المقدمه قسم بالله مادريت ان المقدمات صعبه للدرجه هذي ياناس حسيت من كثر مانشكر ابو نواف ونمدح فيه الرجال حس اننا نصابين بس ترى والله بالنسبه لي يابو نواف ماني نصاب واشكرك كل الشكر على ماتقدمه لنا بهذا القروب الرااائع اللي بدون مبالغه يعتبر شي اساسي عند دخولي للنت(( وش رايكم عاد بالمقدمه مدحته باسلوب خطير وترى والله مابي لا رنج ولا شي<< اقول اها بس ولا يكثر/))
على العموم اخليكم مع قصة بطلنا عواد وان شاء الله انها تنال على اعجابكم ورضاكم واعتذر عن اي خلل بالقصه واحمل كامل المسئوليه من الان لعواد /


عواد خلف القضبااان

/

بعد مرور خمس اعوام على سجن عواد بسجن الاستقلال قرر عواد الافصاح عن قصته للجميع وكان الهدف من ذلك هو العضه والعبره ولا يريد من وراء هذا كله المال والسلطه/<< ضيع المؤلف ههههههههههههه

يقول عواد بقصته المثيره
كنت جالس عند باب الشارع حق بيتنا كالعاده واتفرج على اللي رايح واللي جاي/ كنت انبسط لا مر واحد ودق بوري وسلم احس اني موجود بالدنيا واحس ان الدنيا بخير وانقهر لا مشى من جنبي مجموعة بنقلاديشيه مع انهم يسلمون بس يقهروني لاني ماقدرت طول هالفتره احلل الشي اللي يسونه … ابي افهم يا اخوان ليه الحين البنقلاديشيه لاجو يمشون مستحيل يمشون جنب بعض لازم ورى بعض لو انهم اثنين بس تحصلهم ماشين ورى بعض وعادي يسولفون وفالينها/ ههههههههههههه مادري هم يتخيلون انهم راكبين سياره وواحد يسوق فيهم وهم جالسين ورى بعض ولا وش سالفتهم/؟؟

المهم مابي اطلع عن الموضوع حقي كنت جالس يوم عند الباب شوي الا توقف سيارتين وينزلون ويتضاربون وهذا يضرب والثاني يضرب وانا مالي اي دخل بالموضوع/ اتفرج وبس من بعيد لاني ماحب المشاكل ابدا/ …. طبعا بالنهايه لازم واحد يكون اقوى من الثاني او بالاصح اللي صار انه كان واحد على ثلاث بالاخير استسلم الواحد وجااء يركض وماكان قدامه الا بيتنا جاني مسرع وهو كله دم وقالي بصوت كله حزن (( انا دخيلك /))<< واحد يبي يحزنكم غصب /ههههههههههههههههههههه

عاد هناا انا حسيت بشي غريب حسيت جسمي يحكني وتذكرت اشياء كثيره مرت علي تذكرت الزير سالم وتذكرت غليص وتذكرت ابو شهاب وتذكرت ماجد عبدالله/<< مادري وش دخله اخر واحد هههههههه
انا اقولك وش دخله ماجد عبدالله /…. زمان ماجد يوم كان يلعب لما الجمهوور يصااارخ ويقوله تكفى نبي قول مستحيل يردهم ويجيب لهم انواع الاهداف والبطولات الحين جمهور النصر دموعه نزلت ولا فيه احد ينتخى به …<< سكتني صراحه ياعواد/<< مؤلف موسوس/ هههههههههههههههههههههههههه

دخل الرجال لبيتنا وجلست انا اطالع بالثلاثه اللي جاين لي يركضون يبون يدخلون وراه … عاد تخيلوا خليتهم يدخلون/ كان من جد اصير شوهة صورت العرب كلها/ … هم يركضون وانا افكر وش اسوي المشكله بحياتي كلها ماعمري تضاربت مع احد /ولا احب المشاكل اكبر مضاربه سويتها كانت مع ولد خالي اللي اصغر مني وماتضاربت معه الا لما تشارطت معه انه مافيه مسك شعور ولا تفصيخ سراويل لاني عارف ولد خالي يحب لاتضارب يتمسك بسروال اللي قدامه المهم شوي الا الثلاث قدامي قالوا لي طلعه
عواد : اطلع مين/؟؟<< فاهم الانكار غلط/

الثلاثه : انت شكلك تبي تلحقه انت وخشمك اللي كنه ملقاط شيشه
عواد : الحق مين/؟؟
الثلاثه : اقول تبي تطلعه ولا فقعنا وجهك ودخلنا طلعناه/؟؟
عاد هنا جاني احساس موو طبيعي احساس لازم اسوي شي لازم اغير اسلوبي واسالتي الغبيه
عواد : اللي ماتطوله بيدك وصله برجلك .. وابن امه يقرب للباب
وعلى طول قمت وفصخت الشماغ وفصخت الثوب وعلقتهم على باب الشارع … واجلس اطالع فيهم

شوي ماشوف الا خشبه جايه بين عيوني واطيح على الارض/ … كلها دقايق بس واصحى على صوت امي تصارخ والشباب يتضاربون بحوشنا … قلة ادب من جد حلبة مصارعه مو بيت /وادخل انا مسرع واحصل خشبه واجي باقوى ماعطاني ربي اصكها براس واحد منهم من ورى وعينكم ماتشوف الا الدم اللي طلع كنه نافوره الا المضاربه وقفت والاثنين قاموا يصارخون ويصيحون على خويهم اللي ضربته ويشيلونه للمستشفى /… وانا اقوم مادري انبسط اني فقشته ولا اصيح على حظي الوصخ واطالع با امي الا تقول (( عفيه عفيه على وليدي ايه من اول فقشهم/ )) وانا اطالع فيها باستحقار واقول بقلبي (( والله مانتي رايحه السجن انا اللي باكلها لاصار فيه شي)) واقوم والبس ثوبي وشماغي اللي معلقهم على باب الشارع والحقهم بالمستشفى ونجلس ساعه بعدها طلع لنا دكتور ووقف قدامنا

عواد : هاه بشر يادكتور/<< قوي عين ضارب الرجال وجاي يتطمن عليه هههههههه
الدكتور هز راسه وقال لاحول ولاقوة الا بالله البقيه بحياتكم ياخوان/<< متاثر بالمسلسلات المصريه

وقتها عرفت اني خلاص انتهيت ورحت فيه .. كلها دقايق الا الشرطه جايه وشالوني على التوقيف واخذوا اقوالي كلها واعترفت طبعا لان مالها داعي انكر واتصفق بعدين اعترف خليني اعترف من البدايه ازين لي
بعد السالفه بفتره عرفت ان الولد اللي ضربته ومات كان وحيد امه وابوه من العيال/ … وعرفت بعد ان اللي دافعت عنه هو صاحب المشكله بالاساس بس هالمره ماقدر عليهم وحاول ينحااش منهم وكنت انا الضحيه /
واللحين مثل ماتشوفون انا بالسجن وكل اطراف القضيه خارج السجن مع اني مالي اي دخل باساس الموضوع … جالس انتظر حكم القصاص او العفو ان الله راد /…. وانا ماقول هالقصه عشان تقرونها وبس لا كثير قصص مثل هذي تصير هالايام وكثير بعد سمعنا عن واحد دافع عن جيرانهم وذبح واحد وبالاخير هو اللي انسجن وسمعنا عن واحد انذبح بس لانه كان يفك بين اثنين وجت السكين بالغلط بصدره سمعنا وسمعنا/

والشي اللي يقهر انه بالاساس المضاربات والمشاكل اللي تصير 90% منها الواحد يستحي يقولها بس اكثر شي يقهرني بالمضاربات اللي تكون بدايتها (( ليه تطالع؟؟ _ ليه تدق بوري ؟؟<_ وش عندك تفرفر هنا؟؟_ ليه اخوك الصغير يضرب اخوي؟؟)) من جد هالنوعيه من المضاربات احس جميع اطراف القضيه يعانون من مشكلة خلقيه/ << يرحم امك لا عاد تتفلسف ياعواد ههههههههههههههه

العسكري : يالله انت وياه خلصت الزياره/ << خاش عرض هالعسكري ههههههههههههههههههههه
عملاق الصرقعه : اقول لاتنفخ/ لا اجي افقع عينك

فنظر عواد بعملاق الصرقعه نظره غريبه ولسان حاله يقول (( هذا انتم مستحيل تتغيرون والشرهه موو عليكم على اللي يجي يقص لكم معاناته عشان تستفيدون/ )) فذهب عواد وهو متحطم ههههههههههه

النهايه


حديث ابى هريرة رضى الله عنه ان رسول الله صلى الله عليه وسلم قال :ليس الشديد بالصُّرَعةِ ، انما الشديد الذى يملك نفسه عند الغضب . متفق عليه

اخوكم: عملاق الصرقعه
http://www.joreyat.net/vb/

/

مقالات ذات صلة

‫9 تعليقات

  1. صدز ان ممكن يكون سبب المضاربه ماله داعي بس الحميه لها دور … لو احد استفزع فيك مستحيل ترده هذا شيء معروف . يمكن ياكلها في وجهه ويمكن يسلم والله يعطي كل واحد على قد نيته تقبل فلسفتي 8)

  2. :$يستاهل وشو له يفتح باب الشارع أصلا كان دخل لبيتهم وافتك واستراح هو بلانا الا من طلعة الشوارع وفتح الباب طمبق طمبق زين يا عواد هاللي انت فيه الحين كله من الباب(اقلعوا الباب وريحوها) خخخخخخخخخخخخخخخخخ جدا رائع موضوعك استمر

  3. سلمت يالغالي كلنا نزعل ونعصب بس عند الشدايد يظهر معدن الناس دمتم بالف خير لكم ودّي

  4. اتذكر ابوي مره لقى اثنين قدام بيتنا يتذابحون جا بيفك بينهم خذوا عقاله يتجالدون به فسحبه منهم وجلدهم ال2 B اخر شي بعدوا ووقفوا يناظرونهم<<يعني وش تبي انت:~ ابوي حار ويوم ما وقفوا جلدهم بس كانوا شباب وابوي رجال كبير فحلو منهم انهم احترموا شيبته ولا جلدوه:$ المشكله هذي دائما فك بينهم ولا تحاول تميل لاي طرف الله يصلح الاحوال

  5. روووووعه القصه .. سلطت الضوء على نوع من القضايا الحاصله بمجتمعنا تطرقت لها من خلال قصتك لكن مااقول الا ابعد عن الشر وغنيلو 😀 يعطيك الف عافيه .. واصل ابدآعكـ 8)

  6. يااااااااااااااااااااحراااااااااااااااااااام كسر خاطري عواد 🙁 دايم هالمسكين حظه شين بهالدنيا شكله بالسجن يردد هاالبيت الاياحظي المقفى علامك للشقى مطفوق انا طالبك لاتفتح لعيني سد واديها <<<< هوا 😮 فالي التوفيق فديتني والله القوووصه جد جد جووووووووووووووووونان بس تحزن :(:( راحمه عواد ودي افديه بروحي <<< بدا الحب من جد استاذ عملاق باشا انت ابداع في ابداع بالتووووووووووووووووفيق ياعسل وعساك ع القوه القوووصه الجايه خل عواد يعرس عشان نحضر عرسه << ودي ارقص من زمان مارقصت <<<< برا برا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى