رسائل المجموعة

قصة : عكس عكاس – الجزء الثاني

بسم الله الرحمن الرحيم

(عكس عكاس)
الجزء الثاني والاخير

قصة وسيناريو وحوار
Fox


استثناء : شكر خاص جد لفضيلة الشيخ الدكتور/ محمد بن عبدالرحمن العريفي حفظه الله ورعاه

/

لقبوله دعوتي للمشاركه في كتابة حواره الذي ستقرأونه في سياق القصه علماً باني أرسلت لأكثر من شيخ معروف بنفس الوقت ولم تردني اجابه سوى من فضيلته فقط (التمس العذر لهم طبعا) .
الشيخ محمد العريفي بتواضعه المعروف عنه الوحيد الذي تجاوب معي رغم انه لايعرفني وماذكر باسمه في الحوار ادناه بخط كيبورده شخصيا دون أي اضافه مني .

اسال الله أن يثيبه ويجزيه خير الجزاء ويكثر من امثاله .


الجزء الاول من القصه هنا

جزء من اخر مشهد بالجزء الاول :

ام وليد : وشووووووووووووو!!! (بلقت عيونها) تكفى لاتقول انه كان لابس تي شيرت احمر ؟!!!

حسام : اجل بيرجع ملتزم مثل خاله بندرههههاااي .


ام وليد : ورى ماتسكت انت .

بدر : تفضلو ياخاله حياكم الله انا بدر خوي وليد بالغرفه .

ام وليد : الله يهديك ياوليد هذا وقت مفاجآت… خليتنا نخسر كل هالخساير .

بدر : ماعليه ياخاله هونيها وتهون انا وهو واحد ..انتو كم يوم جالسين هنا ؟

ام وليد : لاتقول ياخاله الله يخليك نادني ام وليد .

بدر : اسف!! .

ام وليد : الحين عرفت ليش ابووليد خاف اكيد دخل البيت وشاف وليد… الله يستر لايكون جته سكته من الخرعه .

بدر : هو كان يبي يسوي لكم مفاجأه……انتو كم يوم جالسين هنا ؟

ام وليد : جواله وجوال ابوه مسكرين ياناس انا خايفه على زوجي ..بتصل على اخوي بندر .

ام وليد على الهاتف : السلام عليكم …. .بندر ان نوره اكلمك من رقمي الجديد .

بندر : هل بالمتأمركه والعياذ بالله حمد الله على السلامه وراك ماعلمتينا بالرقم الله يهديك خليتينا نحاتيكم .

ام وليد : بندر تكفى انا حالتي حاله روح بيتنا شوف ابو وليد كان يكلمني وشاف وليد وتخرع وخايفه يكون صار له شي .

بندر : أي وليد اللي شافه!!!! انتي وينك فيه الحين ؟

ام وليد : انا بسياتل وليتني ماجيتها ..لان وليد طلع مسوي لنا مفاجأه وراح الرياض .

بندر : افااااااااااااااااااااا.. سوى لك عكس عكاس الدلخ..حركته مالها داعي بضربه ضرب ان شفته .

ام وليد : وش دخلك انت تضربه!! وبعدين اذا هو دلخ انا ادلخ منه لاني سويت مثله..الحين انا ابي اعرف وش صار على ابوعيالي .

بندر : هذاني ركبت السياره دقيقه وانا واصل بيتكم وبتصل عليك ..اجل صرتي من شعب الرفاهيه ههههههههههه .

ام وليد : والله انك رايق …روح بسرعه وطمني انا جالسه انتظر ..مع السلامه

بدر : انتو جايين تتمشون بسياتل و.. ؟

ام وليد : لا جاين نبيع فقع .

بدر : فقع!!!

ام وليد : مدري عنك …. اكيد جايه اتمشى واشوف ولدي .

بدر : انا اقصد لو كان وليد هنا هل بتجلسون في سياتل و…

ام وليد : عندك مويا ؟

بدر : اووه سوري دقيقه اجيب العصير.

ام وليد : مويا مويا ماأبي عصير.

يأتي اتصال من جوال شقيقها بندر :

ام وليد : بشرني بخير الله يخليك .

ابو وليد : هلا ام وليد .

ام وليد : هلا بحبيب قلبي الحمدلله انك بخير..شفت وش صار لنا ؟

ابو وليد : قالي بندر لكن وليد ماجاني وجواله مسكر ؟

ام وليد : وشووووو ..اجل وراك قمت تصارخ وتتعوذ وطفيت جوالك ؟

ابو وليد : لو شفتي اللي طلع لي والله انك تختمين القران من الخرعه .

ام وليد : يعني اللي طلع لك موب وليد ؟

ابو وليد : يوم دخلت البيت كان اظلم وشفت لي قطو اعوذ بالله اسود وعيونه تقول زينون ويوم شافني جاني يركض يبي يطلع برى وانا تخرعت وقمت اركض ورميت الجوال وتفكك .

ام وليد : قلت السالفه لاحد ؟!!

ابووليد : بس بندر ومن قلت له وهو ميت ضحك .

ام وليد : بلى من الفضيحه يضحك..يابوليد لاتقول السالفه لاحد والله فضيحه رجال بكبرك ويسوي اللي سواه .

ابووليد : ايه رجال ولكن هالمواقف مافيها رجوله فيها حطت رجل لاني قلت يمكن انه متلبس بسم الله الرحمن الرحيم والبيت اظلم يعني قدري الوضع !!

ام وليد : خلنا من هذا الحين وشوف لي وليد ابي اتطمن عليه .

ابووليد : المشكله جواله مسكر!!

ام وليد : مصيبه الحين تطمنت عليك ورجعت اقلق عليه الله يستر
انا برسل له رساله من رقمي الجديد اعلمه اني بامريكا عشان اول مايفتح الجوال يدق…..حنا الحين بسكن الجامعه وبنطلع للفندق .

ابووليد : الله معاكم واذا دق علي وليد علمتك ..مع السلامه .

ام وليد : معليش يابدر قبل شوي ماكنت بوعيي لايكون غلطت عليك ترى اسويها .

بدر : لا ياخاله بالعكس على قلبي زي العسل .

ام وليد بنرفزه: يوم اقولك لاتقول ياخاله كنت بوعيي يعني لاتقولها الله يخليك. المهم لازم نطلع نسيت نفسي مايجوز اجلس هنا وانت غريب عني.. اللي صار ينسي الواحد اسمه .

بدر : انا اعتبرك مثل امي قسم بالله .

ام وليد : ايش !!!!

بدر بارتباك : اممختي .

ام وليد : وشو !!؟؟

بدر : اختي الصغيره والله

ام وليد : هههههههه كم عمرك انت؟

بدر : 21

ام وليد : ماشاء الله بس جسمك مايدل على عمرك .

بدر : لا 21 قسم بالله ..كم مدة سفرتكم ياام وليد؟

ام وليد : ليه ماتستغل وجودك بامريكا وتخفف اكل وتتمرن .

بدر : المشكله هنا الشباب بالسكن مايعطونا فرصه يسوون كبسات وحنا من الشفقه ناكل كبسه ثلاث مرات باليوم نطلع من شقه وندخل شقه كأنها لجنة تحكيم احسن طبق .

ام وليد : ماعليكم لوم لكن برضو لازم تخفف عشان صحتك .

بدر : ان شاء الله بحاول … انتو كم ليله جالسين هنا؟

ام وليد : انا مايذبحني الا بحاول هذي كل ماقول لواحد شي يقول بحاول…ابيك تشيلها من عقلك وبدل ماتقول بحاول تعزم على طول وانت الربحان بالاخير. المهم حنا بنمشي للفندق الحين عيالي نامو من التعب مساكين…. مشكور وماقصرت يابدر واسمح لي اذا قسيت عليك والا شي .

بدر : بالعكس ماجاني منك الا كل خير ..انا بوصلكم للفندق بسيارة خويي
وكل يوم بجيكم امشيكم واذا تبون اجيكم اليوم بالمساء تامرين امر بس ماقلتي لي كم مدة رحلتكم ؟

ام وليد : ماشاء الله عليك الله يحفظك لامك ونعم الولد خاصه اني كنت معتمده على وليد لكن انت الحين مكانه ودام عمرك 21 تقدر تناديني ياخاله ههههههه… بس مانبي نطلع اليوم بنجلس بالفندق انا شايله هم وليد .

حسام : جايين عشان نجلس بالفندق؟ ..انا مابي اجلس مالي دخل .

ام وليد : يازينك نايم..وشلون تروح تتمشى واخوك ماندري وينه؟

حسام : يعني نحبس روحنا حتى بالسفر.

ام وليد : خلاص خلاص فكنا بنوديك نمشيك.

تخرج ام وليد وابنائها من سكن الجامعه وتتجه الى الفندق وفي الطريق :

حسام : شفتي شلون وليد مسوي سبايكي ومعلق قلاده مثل الكفار..انا بسوي مثله.

ام وليد : سوه وشوف وش يجيك.

حسام : اشمعنى وليد طيب ؟

ام وليد : وليد بتفاهم معاه اذا شفته .

حسام : خلاص انا بسويها وتفاهمي معنا مره وحده .

ام وليد : ايه ذكرتني بدق على خالك يلغي حجزنا لولاية اورلاندو خلاص ماله داعي نروح ديزني لاند ….عندن ملاهي الحكير احلى منها بكثير.

حسام : عادي مانبي نروح لهذي الولايه بس نبي ديزني لاند .

ام وليد : مادريت؟؟ مو ديزني لاند ركبوها في اورلاندو .

حسام (يحك راسه) : هاه ….اصلا انا ماني بمجنون عشان اقلد الكفار .

ام وليد : ايييوه هذا ولدي اللي اعرفه .

وفي الطريق يشاهدون تجمع لمظاهره امام احدى المباني :

ام وليد : عاد جينا لديرة المظاهرات وش يطالبون فيه بعد؟

بدر : لو اقولك بتنصدمين …مسوين مظاهره عشان مسلسل!! .

ام وليد : كيف يعني ؟

بدر : مسلسل امريكي مسوين له اربع مواسم وذولي يبونهم يسوون موسم خامس غصب .

ام وليد : ياحليلنا حنا مدلعين اجل ..طاش ماطاش سووه 16 موسم بدون مانسوي مظاهرات !!

بدر : خخخخخخخخ حلوووه……….الفندق الموجود بالحجز فخم ورايق وقريب من كل شي .

ام وليد : هذا حجز بندر اخوي ماشاء الله عليه .

بدر : كم ليله بتجلسون هنا؟

ام وليد : البكج 20 يوم جوله في كم ولايه وفي سياتل خمس ايام .

بدر : اخيراً (يرقص حواجبه) .

ام وليد : وشو اللي اخيراً .

بدر : احم ….اخيرا وصلنا يعني .

ام وليد : وينه الفندق ؟

بدر : قدام شوي .

تصل ام وليد الفندق ويكمل لهم بدر اجراءات الدخول واثناء وجودهم بالغرفه يأتي اتصال على جوال ام وليد :

ام وليد : هذا وليد وليد …الو الو ؟

وليد : هلا يمه…….. انتي من جدك بامريكا؟

ام وليد : الحمدلله انك بخير ..ايه انا بسياتل ….ابي اعرف وش هالمفاجأت الماصخه اللي تسويها.بعدين معقوله توك واصل الرياض من اول امس ؟

وليد : انا بامريكا مارحت الرياض لانهم وقفوني بالمطار اشتباه بالاسم وطلعت اليوم عن طريق السفاره ..واول ماشفت رسالتك انهلعت من المفاجأه .

ام وليد : ليش مشتبهين فيك ؟!!

وليد : تذكرين سالفة الطالب اللي قلت لك عنه قبل فتره انجن وصار يهددنا انه بيقول لل اف بي آي ان حنا ارهابييين ؟

ام وليد : ايه وش فيه ؟

وليد : سحبوه قبل كم يوم من كثر مايتكلم قدام العالم وماخلى اسم ماقاله يتبلى وانا كنت من ضمنهم ..ويوم شافوني بسافر مسكوني تحقيقات وبعدين سمحو لي ادق على السفاره ويوم دقيت قالو بكره نرسل لك المحامي يشوف وضعك . .

ام وليد : وش هالمصخره ليش السفاره يخلونك الى ثاني يوم .

وليد : قالو ان المحامي بيجي من واشنطن بالطياره……. طيب كلموهم تلفون بدل ماتجون..قالو لا ذولي مايتفاهمون الا وجهاً لوجه .وجاني اليوم ووضح لهم كل شي وطلعت قبل شوي ولا كأن صار لي شي الحمدلله .

ام وليد : اجل بهدلوك حسبي الله عليهم ..طيب لاتروح الرياض ارجع سياتل؟

وليد : ايه الحين بحجز على سياتل بكره الصبح ….. بس والله احلى مفاجأه يايمه غلبتيني هالمره .

ام وليد : تعلم من امك وانا امك ههههههههه…يالله روح احجز يمكن تلاقي رحله الحين وتجينا على طول وكلمني علمني وش يصير معك .

وليد : مافي امل الاقي غير بكره الصبح..عموما اول مااحجز بعلمك….بدق على بدر اوصيه عليكم .

ام وليد : بدر ماقصر وبيجينا اليوم يمشينا مايحتاج توصيه .

وليد : ايه خابره نشمي …خلاص يمه بروح احجز فمان الله .

ام وليد لحسام : بسك نوم قم صل المغرب اخوك وليد ماراح الرياض وبيجينا بكره .

حسام بتعب : حلو حلو …بس بصلي اذا قمت .

ام وليد : قم صل وارجع نام …..بكيفك بنطلع نتمشى ونخليك .

حسام يفتح عين وحده : كم يأذن عندهم طيب ؟

ام وليد : ثمان ونص .

حسام : يالله تو الساعه سبع ونص حرام عليك خليني انام .

ام وليد : ساعتك اللي بيدك بتوقيت السعوديه يافتى النوم والحين سبع ونص الصبح بالسعوديه عشان تفرح بس .

حسام : حنا بسفر عادي لو نأخرها .

ام وليد : مافي تأخير صل الصلاه بوقتها عشان الله يحفظك بالسفر .

حسام : بصلي بس توديني ستار بكس مو تقولين لي مقاطعه عادي في السفر نسوي اللي نبي .

ام وليد : لو قاطعناهم بنموت جوع …. حنا بديرتهم يااهبل . الله يسامحنا بس مضطرين ومع هذا بوديك ستار بكس مره وحده عن خاطرك وبعدين بنخلي بدر ووليد يودونا مطاعم عربيه اذا كان فيه .

حسام : شلون بسهر اليوم وانا ماشبعت نوم ؟

ام وليد : نايم من العصر مايكفيك ؟ ….. طبعا ماقلت اذكار المساء

حسام : ايش ايش ؟؟ حتى الاذكار نقولها بالسفر..لاتخافين الامريكان ماينظلون .

ام وليد : منت بصاحي …الاذكار بتحفظك من كل شي باذن الله مو من العين بس ….ماتخاف وانت ماشي يدوسك امريكي سكران والا تطيح في بالوعه مليانه فيران تاكل وجهك ؟

حسام بعصبيه : قسم بالله احس اني بالرياض .

ثم يأتي بدر ليأخذهم بجوله في المدينه :

بدر : حمد لله على سلامة وليد ياخاله؟

ام وليد : الله يسلمك يابدر…..الحمدلله الحين نقدر نتمشى على راحتنا .

حسام : بدر… نبي نروح ستار بكس .

بدر : ابشرو بوديكم اول مقهى لستار بكس فتح في العالم وبوديكم مصنع ستار بكس بعد .

ام وليد : امركم غريب يالشباب تحفظون اللي ماله سنع ولو اسالك اذا حافظ شي من القران بتقول لا .

بدر : شدعوه معلومة عاديه هذي ….عموما انا حافظ جزء عم الحمدلله والله يرزقني حفظ القران ……..الظاهر ماتبين معلومات عن المدينه هههههه ؟

ام وليد : لا والله انا ابي اتمشى واشوف طبيعه .

وبعد نزولهم من السياره واتجاههم الى ستار بكس :

شحات امريكي يقول لام وليد : سكارت سكارت ليدي .

بدر : ماعليكم منه واصلو مشي .

ام وليد : يطلب مني انا زقاير هالعفن .

الشحات وهو يلاحقهم : ماي موذر ديد ان ناين إليفين, بت ذات دزنت نيسيساريلي ميين ذات آي هايت أرابز, بيكوز ديب ديب داون آيام شور ذات ماي غوفرنمنت كوسيد ايت .

بدر : لاتوقفين ياخاله ترى هذا مجنون ؟

ام وليد : لحظه خلني ارد عليه ….فرند مي سيم سيم يور بيبي نو سي ماي مذر بليز ..قال ايش قال ياامي وانا كبر بنته هلي مايستحي ….. بعدين وش باقي كلامه انا مافهمت الا ياامي .

بدر يضحك بصوت عالي : خخخخخخخخخخخخخخخخخخخخخخخخخخ
آآآه يابطني خخخخخخخخخخخخخخخ .

ام وليد : بطنك !!!! يمكن ضحكتك فيها سم هههههههههه…وش يقول هالامريكي شكله سبنا .

بدر : آآآه ياخاله الله يوسع صدرك ليت وليد طالع عليك كان ماحسيت بالغربه. الامريكي يقول ان امه ماتت في تفجيرات 11/9 بس هو مايكره العرب لأنه متأكد ان حكومتهم تسببت في هالشي .

ام وليد : ياحرام رحمته الضعيف ..طيب قله دامه يحب العرب ليه مايعتنق الاسلام ابرك له .

بدر : لأ…مانقدر نقوله لانه لو اشتكى نروح بداهيه .

ام وليد : والله ودنا له بالهدايه شكله طيب وحبوب ….وش جالس يشرب لايكون خمر؟

بدر : ايه خمر .

ام وليد : عشان كذا يحب العرب لكن لو صاحى بيسب فيهم سب..خله يولي اجل .

وقبل دخولهم المقهى :

حسام : امي امي شوفي اللي طالع من المجمع كأنه الشيخ محمد العريفي؟

ام وليد : وينه؟؟…..اي والله هذا هو ماشاء الله… وش يسوي بامريكا ؟

بدر : الشيخ محمد دايم يسوي محاضرات دعويه داخل وخارج السعوديه .

ام وليد : تتوقع لو سألناه واستفتيناه بيردنا ؟

بدر : الا بيرحب فيكم ومعروف عنه هالشي ……دقيقه بروح اسأله .

يتجه بدر الى الشيخ محمد العريفي :

بدر : السلام عليكم مساك الله بالخير ياشيخ محمد .

الشيخ محمد العريفي : وعليكم السلام مرحبا ولدي .

بدر : ياشيخ الخاله ام وليد ودها تستفتيك في بعض الامور اذا ماعندك مانع .

الشيخ محمد العريفي :لا بالعكس قلها تسال وتاخذ راحتها واذ كانت تخجل تقدر تكتب لي الاسئله بورقه وانا سأجيب عليها باذن الله .

يعود بدر الى ام وليد ويخبرها فتفضل مواجهة الشيخ وتذهب له :

ام وليد : المعذره ياشيخ اشغلناك لكن ودي استفتيك في بعض الامور .

الشيخ محمد العريفي : تفضلي يااختي .

ام وليد : انا البس الحجاب في ديرتي وفي السفر بنفس الطريقه ونظرة الناس لي تحسسني كأني عامله جريمه رغم اني مااحط المكياج وعباتي فضفاضه داخل وخارج البلد وودي انك تعلمني اذا اللي اسويه محرم والا لا وهل يجوز اني مالبس العباه خارج السعوديه عشان مااتعرض لمضايقات من الاجانب ؟

الشيخ محمد العريفي : شوفي يا أم و ليد .. أولا أنا أشكرك على حرصك وعنايتك بحشمتك وطاعة ربك عز وجل .. والله تعالى قال للمؤمنات ( ولا يبدين زينتهن ) .. وهذا عام في السفر والحضر .. أمام رجال مسلمين أو كفار .. عرب أو أعاجم …. واليوم مع انتشار الفضائيات والنت أصبح منظر الثوب للرجل والعباءة للمرأة أمراً عاديا تعودت عليه العيون .. بل إني أذكر أني في أوروبا في رمضان وغيره أخرج في شدة البرد من صلاة التراويح علي الثوب والشماغ والمشلح ( الوبر ) أمشي لسكني وأمر ع البقالة وأشتري والناس لا يستغربون لبسي .. بل عااااااادي جدا ..وأنت ترين الحجاب منتشر سواء بتغطية الوجه أو غيره .. وقد تعود الناس على رؤيته ..فاستمري أم وليد على ما انت عليه من الاحتشام .. وكوني جريئة بطلة .. والمؤمن القوي خير وأحب إلى الله من المؤمن الضعيف ..

أم وليد : طيب يا شيخ دخول المقاهي وأماكن الاختلاط في السفر ؟

الشيخ محمد العريفي : أم وليد .. هالمقاهي لا تخلو من قوم يشربون الخمر .. ويلبسون اللباس الفاضح .. مع موسيقى صاخبة غالباً .. وهذه أمور تجعل المسلم لا يدنس دينه فيها .. أما إن كان مقهى ليس فيه خمر بل قهوة وشاي بأنواعها .. وجلست مع ولدك أو صاحبتك في مكان على جنب .. فأرجو أنه لا بأس به أما أماكن الاختلاط فإن كانت عامة كالأسواق الكبرى والمطاعم .. وحافظت المسلمة والمسلم ايضا على الحشمة .. فلا بأس ..

أم وليد : ماشاء الله …الله يبارك فيك ياشيخ ماني بقادره اوصف لك سعادتي بجوابك…طيب سؤال ثاني … حنا بالرياض مقاطعين المنتجات الامريكيه وانا جايه هنا عشان ولدي وليد يدرس بالجامعه وهذا ولدي حسام وملزم الا يبي يدخل مقهى ستار بكس وودي انك توجهه للطريق الصحيح لانه معجب بشخصيتك وراح يسمع كلامك .

الشيخ محمد العريفي : الله يوفقك .. ويجزيك خير على غيرتك .. القضية يا أم وليد ليست في منتجات أمريكية .. القضية أن ستار بوكس ثبت دعمه للجيش الأمريكي بوسائل متعددة .. فالتعامل مع غيره أولى ..ولا أقول حرام الشراء من ستار بوكس .. لكن غيره أولى .

أم وليد : اخر سؤال ياشيخ وارجو المعذره .

الشيخ محمد العريفي : بالعكس خذو راحتكم .

أم وليد : ودي انك تنصح حسام عشان يصلي الصلاه بوقتها بالسفر وغير السفر ويقول الاذكار .

الشيخ محمد العريفي بابتسامه : افا ياحسام وراك تأخر الصلاه ؟

حسام بحرج : اصلي والله العظيم بس اذا كنت نايم اصلي اذا قمت .

الشيخ محمد العريفي : ولدي حسام .. صلاتك هي أول ما تسأل عنه يوم القيامة .. ومن أهم شروطها صلاتها في وقتها ( إن الصلاة كانت على المؤمنين كتاباً موقوتاً ) أي فريضة موقتة بوقت .. احرص ولدي وتدبر نفسك بأي طريقة للاستيقاظ وصلاتها في وقتها ..

أم وليد : واذكار الصباح والمساء ياشيخ لانه يستثقل يقولها .

حسام : ياشيخ صحيح لو اني ماقلت الاذكار بتدوسني سياره او اطيح في بالوعه فيها فيران تاكل وجهي ….لان امي دايم تقولي كذا ؟

ام وليد بحرج شديد : هههههه ياحليله حسام يمزح .

الشيخ محمد العريفي : لا .. عادي .. بس ولدي حسام .. ما فيه شيء في الدين إلا مهم وله حكمة .. ما أمرنا الله تعالى بشيء عبثاً .. ولا علمنا رسولنا صلى الله عليه وسلم الأذكار حتى يتعبنا ويضيع أوقاتنا .. هذي لها فائدة كبيرة .. وتقوي علاقتك بالله تعالى .. وتجعلك مقتدياً بالنبي صلى الله عليه وسلم .. وتحفظك .. وتريح قلبك ..
والأذكار الواردة كثيرة متنوعة .. فاحرص على أهمها ..

ام وليد : الله يجزيك خير ياشيخ كفيت ووفيت وسامحنا على تعطيلك .

الشيخ محمد العريفي : حياكم الله بأي وقت .

أم وليد : الله يحفظك ويخليك ويبارك فيك..فمان الله .

الشيخ محمد العريفي : في حفظ الرحمن .

وبعد مغادرة الشيخ :

بدر : ماشاء الله عليك ياخاله خليتيه يسوي محاضره بالشارع هههههههه .

أم وليد : والله لو تدري وش كثر ارتاح قلبي من اجابته احس ان الضيقه اللي بقلبي راحت..والحين بمشي رافعه الراس ومرتاحة البال .

بدر : بشوف لكم مكان على جنب بستار بكس مثل ماقال الشيخ .

حسام : في مطاعم عربيه هن ؟

ام وليد بهمس : ياااااارب لك الحمد .

بدر : هههههه الا في شارع فيه مطاعم عربيه وويقدمون مشروبات ساخنه اذا انت تحبها.

حسام : انا احب الفرابتشينو .

بدر : في مطعم يسوي ميلك شيك بالعسل او التوفي راااايق بتكره الفرابتشينو عقبه .

حسام : اجل مانبي ستار بكس .

واثناء عودتهم للسياره :

نفس الشحات الامريكي : سكارت سكارت .

أم وليد : ماخلصنا منه هالعفن .

بدر : يبي دخان .

أم وليد : قل والله …حسبته يبي شيشه……وراه لاحقنا طيب .

بدر : هههههههههههههههههههههه .

الشحات الامريكي : ماي وايف واز كيلد ان ايراك, بت آي ددنت كاير ذات متش, شي واز أقلي اني واي, از أماتر اوف فاكت آي فييل أ بيت اوف غراتيتيود ذيس بيبول, ان اواي ذاي هاف بروفايديد مي ويذ ا هيوج فايفور .هاهاهاهاهاهاهاها .

أم وليد : قبل شوي امه والحين زوجته….وش يقول بالضبط ؟

بدر : لاتوقفين ياخاله خلك ماشيه بترجم لك …. يقول ان زوجته قتلت في العراق وعادي مو مهتم لانها كانت قبيحه والعراقيين سوه فيه جميل ماينساه لهم .

أم وليد : هالامريكي فيه عرق سعودي على عربي هههههههه .

بدر : الرجال كلهم من طينه وحده بالعالم وتفكيرهم واحد .

أم وليد : موب كلهم عاد مانبي نظلمهم كثيره منهم يجيك زين والبقيه انذال مثل هالامريكي……وش هذا لاحول ولاقوة الا بالله مظاهره ثانيه وش قصتهم مع هالمظاهرات في كل زاويه مظاهره .

بدر : هذي مظاهره يطالبون فيه بالاستغناء عن النفط عشان مايتنزلون لنا لانهم مايرضون بالذل على قولتهم .

أم وليد : ودك من يكتب لهم على لوحه كبيره هالجمله ….نحن نعلفكم بالبترول وانتم مثل القطط تأكلون وتنكرون .

بدر : خخخخخخخخخخخخخخخ والله لو اطاوعك ياخاله ذبحوني الامريكان .

أم وليد : ماعليك منهم ترى الامريكي جبان لو تقوله تت تت هاجر من البلد .

بدر : لا مايحتاج انا احب امشي جنب الحيط .

ثم يعودون الى الفندق وفي اليوم التالي :

حسام : أمي يلا قومي صلي الفجر .

أم وليد : متى يأذن عندهم ؟

حسام : اربع وربع .

أم وليد : ياربي الساعه ثلاث ونص حرام عليك خلني انام .

حسام : لاياشيخه !!!

ام وليد تضم حسام : هههههههه ياحبي لك يافلذتي يارب تستمر على هالحال يارب…انا صحيت على منبه جوالك .

حسام : طيب صلي وقولي الاذكار عشان اوديك مطعم ماما جوليا هههههههههههههههه.

– النهاية –


ملاحظه 1 : القصه تأليف من اولها الى آخرها ماعدا بعض القفشات البسيطه والشكر الجزيل لمن زودني بها .

ملاحظه 2 : سأعود بعد العيد باذن الله بقصه جديده من الواقع <<يعني حزينه؟<< جداً <<< طيب ليه ماتخلي النهايه سعيده وتريحنا ؟ << لا اعدك بذلك ولكن سأحاول باذن الله ان اجعــل النهــايه مرضيه للجميع<<تكلم نفسك؟<< لأ …..اكلم ضميري .

كل عام والجميع بخير ورمضان كريم

Fox
/

مقالات ذات صلة

‫26 تعليقات

  1. هلا والله بـ فقس آآ قصدي فوكس:$ ~~~~~ وأنا من هنا أتقدم بالشكر لفضيلة الشيخ على إهتمامه ومشاركته ~~~~~~ وماقصرت ياعم أشبعت فضولنا :$

  2. الحين وش دخل الشيخ الدكتور محمد العريفي في الموضوع ولاتدخله على عشان الشهرة والمهرجة أنا اعرف الشيخ محد معرفه شخصية ولا اكذب وحنا في رمضان والشيخ الدكتور محمد العريفي ما يحب المواضيع هاذي وراح اسأله عن الموضوع واشوف انت صادق ولا لا

  3. هلا بالغالي يركدون احرجتني بحضورك وردك ولاتحرمنا طلاتك هلا اخوي عبدالعزيز ولاشكر على واجب اخوي مزيون مطير هدي اعصابك ياعم ستوب لوز وبالنسبه للشيخ محمد العريفي خذ راحتك واساله واتمنى اضافه رده عليك في تعليق جديد وهدفي من ادارج حواره الفائده للجميع كونه من المشائخ المؤثرين باسلوبهم ولو ابي شهره كان كتبت باسمي الحقيقي عموما قرائتك للقصه اسعدني وشكرا لك

  4. بالفعل انت رائع وقصصك مثيره ومشوقه وبصراحه متاابع كل ماتقدمه فقط إستمرر ولو نشوف بعض الرسومات او الرموز مع القصص ممكن تشد اكثر واكثر مجرد اقتراح ياغالي .. تقبل مروري .. ودمت مبدعاً تحياتي

  5. روووووووووووووووووووووووووووووووووووووووووووووعه من زمـآآآآآآآآآآآآآآآآآآآآآآآآآآآآآآآآآن وانـآآآآآآآآآآآآآآآآآآآ انتضر رسالتك دايما اذا ارسل القروووب بسرعه افتح واشوف انتِ مرسل ولا لا (أعشق القصص×نو روايـآت×) مشكوووووووووووووووووووور يعطلك العافيه يـآآآآآآآآرب

  6. مزيون مطير ,, انت ما تكذب وحتا في رمضان ,, بس ليه تكذب الأخ فوكس ؟؟ وحنا في رمضان عموما حنا ننتظر تعليقك الثاني بعد ما تسأل الشيخ محمد ,,

  7. صراحه ماشاء الله القصه خطيييييره ورووووووعه للمعلوميه انا توني مشترك واول قصه اقراها هههههههههه:D يعني جديد بس صراحه مشكور وبعدين يا اخ مزيون مطير اولا هذي ماهي غريبه على الشيخ وبعدين وش مصلحته يكذب ممكن يقول انهم شافو شيخ بس بدون ذكر اسم على العموم الله يهديك ويهدينا

  8. القصه حلوه ومشكور .. بس فيه شي مافهمته ..؟ حجاب أم وليد كيف يقول الشيخ انه كويس وهي كاشفه وجهها ؟ ولا انا فاهمه الموضوع غلط ؟ 😀 أرجو الرد .. ويسلمو ع القصه مره ثانيه ..

  9. 😀 اهنيك يابطل ع القصه خاصه ان البطلوله فيها مره ام وليــــــــــــــد حبيتها الصراحه اجل ماتبي احد يقولها ياخاله 😀

  10. أشكرك أخوي فـgكس ع الحتوتة اللزيزة .. صراحة أبدعت .. أنتظر جديدك بشغف .. =) تحياتي لكـ ..^^

  11. يعطيك العافية فوكس وأجمل استضافتك للشيخ العريفي الله يطول بعمره على الطاعه بس قاهرني شي ليش كل ما سأل بدر أم وليد كم بتجلس تصرففف ؟ :$ مشكور والله يجزاك الجنة ننتظر القصة الجاية ومعنا كرتون فاين 🙁

  12. اببببببببداااااااااااااااااااااااااااااااااااااااااااااااااااااااااااااع احلى شي اكلم ضميري ههههههههههههههه الله يرجكـ والله يجزاه خير الشيخ ما قصر ’’ استمر fox بنتظاركـ يااجميل ,,

  13. حياكم الله جميعا وسعيد جدا جدا بما يخطه كيبوردكم لي بالنسبه للرسومات اخوي الحربي لم اجد من يتعاون معي وفضلت الاستمرار بدونها اما الرموز فقد تفقد القصه رسميتها بعض الشي اشكرك على الاقتراح اختي أنوووووش الشيخ قال لام وليد استمري على ماانتي عليه ويقصد انها تستطيع ان تلبس الحجاب دون ان تغطي وجهها اذا كانت لاتضع المكياج ولاتتزين اختي حلا الروح اشكرك على حضورك الدائم وتعليقك اللذيذ على كل مااكتبه ويشرفني ذلك اما بخصوص ام وليد وليش ماردت على بدر لانها تكون مشغوله بالشق الاول من سؤاله وماتنتبه للشق الثاني ولكن بعدين جاوبته يوم ركزت معاه وفرح يوم يقول اخيرا يجب علي ان اشكركم فردا فردا mshaal خالد روح الهوا غيم السراااااب ابوحرب ابوسعد أنوووووش بيدي راح يتغيرthe word Fabulous q8.210 smile بقاياانسان حلا الروح

  14. اخوي foxقصه حلووووووووووووه مرررررررررره الله يحلي ايامك ونقرا لك قصص اجمل واجمل الله يوفقك

  15. انا ماتوقع الشيخ يرضى بمثل هالقصه لأنه صار فيه فتوى على لسانه وهو مايدري واذا كان يرضى فنه طاح من عيني على العموم القصه جيده ومشوقه بس يعاب عليها الكذب على شخصيه معروفه وادراج الفتوى على لسانه

  16. تووفيـ 🙂 هدى ابوراما الف شكر على الرد الله لايحرمني من ارائكم وملاحظاتكم اخوي ابوراما بالنسبه لحوار الشيخ وضعته كما وصلني وفضيلته ابدى وجهة نظره لام وليد ردا على سؤالها وماقاله ليس الزاميا لاحد شكرا لك

  17. اخوي اشكرك على سعة صدرك لا كن معليش انا ماقلت انه الزامي على احد هذي فتوى لما وحده تثق بالعريفي وتسمع هالقصه بتقول اكيد يجوز كشف الوجه اذا كان بدون مكياج وتكون بكذا استندت على الفتوى اللي بالقصه

  18. ابدعت يا فوكس واصل والله معاك بعدين يوم قالت ام وليد….(((( أم وليد : هالامريكي فيه عرق سعودي على عربي هههههههه . )))) ههههههههههه والله اني ميت من الضحك الله يجزاك خير…. ويثيبك و يوسع صدرك بعد المخلص / ابو حسـام

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى