رسائل المجموعة

صور : زيارة الى البيوت القديمة .. من خربات سدير

السلام عليكم ورحمة الله وبركاته
اليوم راح أمشيكم في بيوتنا القديمة …..

في زيارتنا هذي نبي نتمشى في البيوت القديمة…
طبعا الفلاليح دائما مايكون عندهم بيتين.. بيت المزرعة ..ويكون داخل المزرعة .. وبيت الديره(ويكون داخل القرية) …اما بيت المزرعة يسكنون فيه بالصيف ..لان المزارعين يكونون مرابطين للمحاصيل مثل .. العيش والزرع والنخل والعنب والخضرة..الخ..واذا جاء الشتاء يرجعون لبيت الديره لقلة المحاصيل في الشتاء .. وفي أوقات الربيع يخرجون للبر للاستمتاع بالربيع ولفائدة المواشي..

/

اماا الصورتين الي تحت ..فهي صورة المصابيح والمنور …وانتم خابرين الأولين لا أنوار ولا شي .. والمصباح أو المنور يجلسون فيه لوجود الإضاءة ..ويغسلون مواعينهم ..والخلاقين ..الخ..والغرف الباقية خرمس يتلمسون الأشياء فيها ولا يحطون فيها نبر في الأعلى للإضاءة
/

والان نجي لباب الدرجة.شوفو الفرق بين درج السراميك الموجود الان ودرج الحيفانه الي عندهم .. تبنى بالحجر والطين فقط ..الله يجعلهم في الجنة ..
/
/

والصورة الي تحتها لباب الصفه..والصفه هي غرفه تكون تحت ودائما تكون للبهائم والعيش والحطب ..الخ ..ونشوف داخل الصفه الجصه ..
الجصه هي حجيره صغيره لهاا باب يحطون فيهاا التمر ..وتحتها المدبسه ..لاستخراج الدبس ..
/

اماا الصورة هذي فهي صورة قرو الأولين وهو من الأشياء الضرورية عند الأولين يوضع فيه الماء وله استخدامات كثيرة ….
اماا الصورة الي تحتها فهو جزء من المطبخ..ونشوف فيه التنور للخبز واطهي وغيره .. ويتضح فيها البساطة ..
/

وهذي صورة الغماء(السقف) حق البيت .. وهو من جريد النخل والأثل..وطامينه بتراب …عازل طبيعي ..
والصوره الي تحتهاا صورة باب الدار الخارجي … ويوضع الباب كبير عشان تدخل البقرة والبعارين .. يعني يحسبون حساب كل شي ..

/

في هذي الصوره نشوف الديره من بعيد بعد هطول الأمطار ..
والي تحتها صورة القهوه (المجلس) ونشوف الزخرفة الجميلة فيه ..حتى المحماس مبني له مكان لوضعه وحفظه ..
والصورة الاخيره هي صورة درجة السطح ..وهو السطح العلوي ..ودائما يرقدون فيه أيام الصيف ..

/

والان نشوف صورة مجابيب الديره ..وهي غرف تربط فوق السكه بين البيتين للتوسعه ..وفي بعض الاحيان يكون بينهم باب للزياره ..
اما الصورة الثانية
فهي احد الغرف من الداخل ويسمى الروشن …
والصورة الاخيره صورة المدي ..وهو موضع للماء يكون في وسط الديره تشرب منه البهائم ويغسلون فيه ويتوضون منه في بعض الأوقات …

/

نجي للاغراض داخل الروشن …
يوجد مراة العروس ورفوف تحفر بالجدار لوضع المشط والبودرة والديرمه والمشاط وأدوات الزينة ..وهي مماثله للتسريحه في وقتنا الحالي …

/

وفي الختام وبعد ظلام الليل أعجبتني تلك اللمبة الصفراء في ذالك الروشن ..فقلت لابد من مقارنتها بالثريات الموجودة في وقتنا الحالي …
وقبل ان نغادر تلك البيوت ..لابد من ان نشرب بيالة شاهي في مجلس هذا البيت …
اللهم اغفر لهم واجمعنا معهم في جناة النعيم ..
اللهم امين ..
وشكرا

مقالات ذات صلة

‫29 تعليقات

  1. :Dأيـــــــة يازين ذيك البيوت والنفس الطيبة فيــــــــها وزين الـــشاى بعد العصر في ذا البيت:D

  2. السلام عليكم مشكوووووور جدا يابو حذيفة على تعليقك على الصور الحلوووة وانا متابع مواضيعك باستمرار والله يوسعك صدرك والى الامام ,

  3. ألف ألف شكر أخي محمد على موضوعك والصور الأثرية الجميلة ومشكوك أيضاً على التوضيحات يعطيك العافية وتقبل تحياتي

  4. اللااااااااااااااااااااااااااااااااااه…:( ودي أبكي و أنا أشوف هالصور الرائعة ..صحيح زماننا فيه إمكانات كبيرة و راحة متناهية مع هذه النعم الموجودة الآن لكن زمان فعلاً شيء ثانيسعة صدر و طيبة قلب و بساطة و ناس متحابة الله يسقي هذيك الأيام <—–تكفى يالشايب:D. الله يعطيك العافية أخي و زاد حلى الصور غبداع أناملك الله لا يحرمك الأجر.:)

  5. الله يسلمك ويعافيك على هالصور اللي دوختني شي روعه اللي ماله اول اكيد ماله تاللي اول ياكلون تبن هالبزران من يوم يذن المغرب وكل واحد ماسك فراشه مهوب زي الحين يسهرون لين تطلع الشمس الف شكر لك محمداتو لا تحرمنا جديدك قديمك

  6. مشاركة رائعة .. التصوير أذهلني جدا جدا .. تسلم يديك.. معليش سؤال .. ما هو نوع الكاميرا ؟ وإذا كنت تستخدم أيضا عدسة أم لا؟؟ نترقب جديدك..

  7. مدري وش اقول بس الله يوسع صدرك بالعافيه يازين هااااااااااااك الايام زيناااااااااااااااااااااااااااااه

  8. قواك الله اخ محمد كان لنا الشرف بقدوم لمدينتكم الجميله ورايت الحاضر والماضي بها واعجبني باقي هذا الارث من المباني الذي اتمنى الا يزول يزما ما والحمد لله خرجت ببعض الصور من هذا المكان اخوك ايمن المرواني مجموعه مصوري املج

  9. شكرا اخي الكريم على هذه المشاركة الجميلة والعريقة كالبيوت القديمة العريقة تحياتي الك

  10. شكرا لك هذه الاشياء يذكرهالنا الأجداد و لم نكن لنرها لولا الله ثم ابدعاعك في رصد التراث تحية شكر وتقدير لابداعك المتواصل

  11. هلا وغلا بالجميع … شاكر لكم جميعاا …. ومثل ما قلتووو الي ماله اول ماله تالي …. الصوره منوعه في جميع مناطق سدير… الروضه ..الحوطه …التويم …جلاجل….المجمعه ….الداخله …. نوع الكميرا …. كانون d400 العدسه التابعه لها …. الصور كلها مصوره قبل 3سنوات تقريبا … وشكراا للجميع

  12. كان وريتهم من جمال سدير خلاص الرسالة الجاية جب الزين من سدير 🙂

  13. رايح لي خرابه ومصورها وتقول تراث ومدري ايش بس على العموم شكورن 8)

  14. ياليتك ماتكلفت ورديت الخرابه اللي تقولها عنها هي مكان اجدادك وشي طبيعي بتكون خرابه كم لها سنه؟؟ يعطيك العااافيه اخوي وبصراحه مره مثأره صورة النار بحزة المغرب

  15. صور رائعها صراحة وخاصة صور البيبان والمرآه والرفوف شئ رائع تشكر عليه

  16. السلام عليكم ورحمة الله وبركاتة بارك الله فيك يااخ محمد وسلمت يمينك على هاذة التصاوير الرائعة لدور الاباء والأجداد إنتقائك للأماكن وزوايا التصوير والتوقيت لاتعقيب عليه دائمآ مبدع في عملك تبارك الله جزاك الله خيرآ واثابك وجعله في ميزان عملك

  17. اخوي محمد اسعد الله اوقاتك ماتقوم به مجهود تشكر عليه هذا توثيق لاشياء اندثرت اوهي على وشك الاندثار

  18. يااااااااااااه .. ذكرتني ببيت جدي الله يغفرله ويرحمه لنا ذكريات حلووووه بهالبيوت .. وأحلى شي لا اجتمعوا البزران يلعبون .. محد يدري عن ترابهم على صغر بيوتهم .. لكن المخابئ كثيرة8) مو بمثل اللحين البيوت كبيرة .. وازعاج البزران طول الوقت يرن بأذنك مبدع يامحمد عسى يدين صورت لنا هالأبداع تحرم عن النار

  19. :(:(:( الله يعصر جرى لأم تينة مايرجع كود الاموات يحيون الله يرحم الاولين والله يامحمد رجعت ذكريات الغالين الله المستعان مشكور اله يعطيك العافية

  20. ابداااعك في التصوير ساعد في نقل جمالية الحياة واجمل ما فيها .. البساطة رغم أننا لا نتسشعرها هذا الأمر سلمت يمناك وعيناك

  21. الله وربي قمة الرووووعه حسيت للحظات ان ودي اعيش فيها صور جونان وتصوير اروووع تسلم يدك اخوي لاهنت

  22. هلا وغلا بالجميع … اسعدني مروركم الكريم والمشاركه … المكان …. المملكه العربيه السعوديه … منطقة سدير 150كم شمال الرياض بالتوفيق

  23. يعطيك الف عافـــــــــــــــــــــيه اخوي محمد وربي استمعت بهالصور يالتني ولد وكنت معكم بيكون اسعد لحظات حياتي وتراني انتظر قصة صرار دعيج >>>>تراني ما نسيتها ارجع لرسالتك اللي قبل هذي وانا اخر وحده رديت وبتتذكر ايش السالفه [نعال الاولين (زهابات) قس والبس انت وعيالك] اشكرك على هالايميل الرائع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى