رسائل المجموعة

سياحة – رحلتي الى مكاو

مكاو

صباحكم فل وكاااادي
الرحله الماضيه كانت عن هونج كونج علىالرابط هذا

دايم احرص على زيارة الدول القريبه وقبل اوصل هونج كونج شفت بالخريطه ان مكاو قريبه
سألت المكاتب السياحيه اذا فيه برنامج لزيارة مكاو قالوا لي نعم فيه زياره لمدة يوم كامل
اتقفت انا وخويي اننا نخصص لها يوم وكان اليوم الاخير لنا
طبعا تأجلت الرحله يوم بسبب مرضي دفعنا 100 دولار ضريبه بسبب التأخير

وصلنا الميناء في منطقة شن تاك كان الميناء كأنك في صالة مطار منظم ومرتب ختمنا جوازاتنا خروج من هونج كونج

مكاو

وركبنا السفينه طبعا سعر التذكره تقريبا 150 دولارهونج كونج ذهاب وعوده لكن حنا اخذنا باكيج كامل بسعر 750 دولار للشخص
داخل السفينه كان كل شي مرتب وكأنك ترك طائره مضيفين يورونك مقعدك وكانت المقاعد فخمه ومريحه وكان فيه شاشات عرض

لبرامج سياحيه وعلميه تحتوي السفينه على طابقين ومطعم

مكاو

هذي سفيتنا

مكاو

الصينيين ماعندهم وقت يضيعونه تلقى كل واحد مطلع جهاز الكتروني ويشتغل فيه
ماهوب خويي اللي بس يلعب بسبحته>>>بيتمردغ

غادرنا ميناء هونج كونج الساعه 8 الصبح وبعد ساعتين وصلنا ميناء مكاو وقبل نطلع من ميناء هون كونج قالت لنا موظفة
المكتب السياحي انكم الوحيدين اللي يلزمكم فيزا ورسمت لي خارطه وقالت اذا وصلت مكاو امش على الخارطه

مكاو

الصراحه كان وصفها دقيق كانوا كل المسافرين صافين سرا جنبنا على كاونترات الجوازات ويطالعون فينا مستغربين ليه حنا
لحالنا عطيناهم جوازاتنا وجلسنا نعبي استمارات الفيزا وموظف الجوازات يتصفح الجواز ويطالع بجواز خويي ويقوم وينادي
باقي الموظفين ويوريهم الجواز خويي قال وش السالفه
قلت والله مدري بس انت شبهه من ايام سيرلانكا قال الموظف بليززززز بطاقه
يوم قال بطاقه خويي جاته الصيحه
قلت وش تبون بالبطاقه قالوا بتاكا ماهو بطاقه هذي عملتنا
دفعنا 50 بتاكا واللي تعادل 50 دولار هونج كونج
كانوا المسافرين اللي يضحكون علينا مقهورين وحنا نخلص قبلهم لان الاجرائات اخذت 3 دقايق بس

طلعنا بعدها ورحنا للمكتب السياحي المسؤل عنا وجلسنا 25 دقيقه ننتظر باقي المسافرين اللي مشتركين معنا بنفس الرحله

مكاو

وصلوا كل المسافرين الا شايب جلسنا ندوره لكن خويي ماشاء الله عليه حافظ شكل الشايب حتى ملابسه يعرف وش لابس وراح
وجابه يوم جانا طلع اسرائيلي تحسفنا يوم جبناه لو درينا كان دفيناه بالبحر
اكتمل العدد وركبونا باص حجمه متوسط وكانت المرشده السياحيه اللي ترافقنا صينيه تتكلم معنا بالانجليزي والصيني
واحمد ربك اذا لقيت صيني يعرف غير اللغه الصينيه

مكاو

مكاو

علم مكاو

مكاو

شعار مكاو

مكاو

خارطة مكاو

تقع مكاو جنوب الصين وغرب هونج كونج ويفصل بينها وبين الصين نهر تتكون مكاو من ثلاث جزر اكبرها العاصمه مكاو وجزيرة
كولون ثم الجزيره الصناعيه تايبا وفيها المطار ويربط بين الجزيرتين وجزيرة مكاو جسرين
مساحتها 28.2 كم مربع يعني مجمع الراشد اكبر
كانت مكاو تحت الاستعمار البرتغالي من القرن السادس عشر وحصلت على استقلالها ديسمبر 1999
اللغه الصينيه والبرتغاليه هي اللغه الرسميه وتستخدم الانجليزيه في الاماكن السياحيه والفنادق
اسم مكاو لم يكن الاسم الاصلي للبلد ولكن للاسم حادثه طريفه
كان يوجود بهذه الجزيره معبد بوذي مشهور اسمه مجاو وعند وصول البرتغاليين الى الجزيره جاء احد الضباط الى صياد سمك
وسأله عن اسم هذه الجزيره ولكن الصياد لم يفهم مقصد الضابط وكان يعتقد انه يسأل عن اسم المعبد قال له مجاو
ولكن اللهجه البرتغاليه غيرت الاسم الى مكاو
عدد السكان: 531,400
الديانه البوذيه وتمثل نصف السكان والكاثوليكيه الديانه الثانيه ويوجود ديانات اخرى
العمله بتاكا وهي تقريبا نصف ريال
تعتبر مكاو من الدول الغنيه ودخل الفرد عالي حيث يحضى السكان على التعليم والرعايه الصحيه مجانا الى سن 18 سنه
وتعتمد مكاو في دخلها على التجاره والسياحه
والصراحه مكاو من انظف الدول اللي زرتها وبلد منظم
لاس فيجس الشرق
اطلق هذا الاسم على مكاو لانها تقارع لاس فيجس الامريكيه ليس بمبانيها ولكن بكازينوهات القمار

اشتهرت مكاو عالميا بأنها مدينة القمار حيث تسمح به الدوله قانونيا ويوجود بها اعلى مبنى قمار بالعالم

مكاو

مكاو

مكاو

مكاو

مكاو

اكبر مبنى للقمار بالعالم وهو على شكل سنبله
يوجد في مكاو 27 كازينو مخصص للقمار ودخل مكاو يعتمد الى القمار والسياحه

كانت اول الاماكن اللي زرناها هي قلعة علاء الدين

مكاو

قلعة علاء الدين بنيت على البحر

مكاو

مكاو

نسخه طبق الاصل لاحد البراكين والذي كان يثور كل مساء في مكاو وارتفاعه حوالي 40 متر

مكاو

جانب من قلعة علاء الدين

مكاو

بعدها ذهبنا الى برج مكاو
برج مكاو هو رقم 10 في أعلى مباني العالم و الثامن في آسيا
ارتفاعه الإجمالي 338 ولكن الشرفة الرئيسية على ارتفاع 223 متر تعادل مبنى من 72 طابق

مكاو

تذكرة الصعود للشرفتين الداخلية والخارجية 75 بتاكا ويطل على النهراللؤلؤي

مكاو

فيه داخل البرج شرفه دائريه تلف على البرج وارضيتها من الزجاج عشان الواحد يشوف الارض

مكاو

لقطه من اعلى البرج لمكاو

مكاو

يوجد مطعم وكوفي شوب داخل البرج

مكاو

مكاو

مكاو

كاتدرائية سان باولو

مكاو

هذا اشهر معلم سياحي في مكاو تشوفونه في قناة العربيه كل يوم
هذي كانت اقدم كنيسه في اسيا لكن احترقت الظاهر ورع كان يدخن ورى الكنيسه وولع فيها
بعد احتراقها مابقى منها الا هالجدار اللي صار اشهر منها

مكاو

نزلت مع الممر هذا ودخلت شوارع صغيره

مكاو

كان على اليمين وعلى اليسار محلات تبيع البسكوت ومكاو مشهوره بصناعة البسكوت

شوفوا الزحمه على البسكوت

مكاو

مكاو

افضل هديه الواحد ياخذها معه من مكاو هو بسكوت جوز الهند

مكاو

طبعا كل المحلات يحطون عينات للتجربه وانا طبيت بالبسكوت وجربت كل الانواع عشان اشتري
لكن يوم وصلت اخر نوع الا انا شبعان شربت ما وطلعت

وعندهم اعتقاد يقولون ان الماء هذا مقدس وكان عليه زحمه مدري تافل فيه البوذا حقهم بس شكلهم نصابين لان طعمه عاااادي

مكاو

مكاو

انا يوم شفت هذا احسبه قمر الدين وجلست اكل واقولهم ليه ماهو زي اللي عندنا مالح هذا
قالوا ياخوي هذا لحم مجفف

قلعــــة مونت
قلعة برتغالية قديمة تقع بجانب أطلال كاتدرائية سان باولو لكن مشكلتها ان الوصول لسطح القلعه متعب لان درجها عالي
يعني اذا بتطلع لازم تجي من بعيد وتاخذ عزم لكن اذا وصلت فوق بتشوف منظر رائع لمكاو من فوق القلعه

مكاو

لقطه لمكاو من فتحة الحصن

قلعة مونت بنيت عام 1616م وبنيت للدفاع عن الكنيسه قبل احتراقها عام 1838

مكاو

احد المدافع فوق سطح القلعه

مكاو

في فصل الصيف جو مكاو معتدل تقريبا وتكثر الامطار والحراره تقريبا 30 درجه

مكاو

شوفوا اللوحه
يعني انت دبر عمرك

على غرار الشانزليزيه في باريس واكسفورد ستريت بلندن يقع ميدان النواب وسط مكاو وهو اشهر المناطق السياحيه

مكاو

ميدان النواب اذا مشيت فيه كأنك تتمشى في اوروبا كل المباني اللي فيه طرازها اوروبي والمقاهي والمطاعم المشهوره منتشره بكل مكان

مكاو

من اشهر المطاعم في ميدان النواب مطعم مارجريت واذا طلبت قهوه لاتنسى تطلب معه فطيرة الدي ناتا وهي برتغاليه الاصل

مكاو

فيه مقاهي حلوه مثل مقهى ناتا ومقهى اللورد في ميدان النواب هالمقاهي دايم زحمه رحت بتقهوى فيها لكن مافيه امل
كانت زحمه بس الصراحه فنجال قهوه على هالجو مايتفوت قررت اروح ستاربكس وجلساته الخارجيه حلوه والجو بالضل بارد

كنت امشي في ميدان سانديو وشفت ناس دخلوا مكان دخلت معهم قلت بشوف وش السالفه

مكاو

دخلت وشفت نوافير غريبه وحديقه صغيره وكانوا يطالعون فيني قالوا خير وين رايح قلت بتفرج قالوا ياخوي هذا بيتنا

قلت واذا صار بيتكم يعني مايدخله الا انتم>>>بغى يتصفق

مكاو

هذي المرشده حقتنا واللي على اليمين الشايب اليهودي اللي ضاع

مكاو

وقت الغداء رحنا لمطعم كان محجوز لنا بالكامل وكان الغدا عباره عن بوفيه مفتوح طبعا انا ما اعجبني اكلهم بعكس خويي
ماشاء الله عليه كل شي يمشي معه حتى الخنافس هواش هو الصينيين عليها

كل انواع الاكل تلقاها في مكاو المطبخ البرتغالي والصيني والهندي و انصحكم بتجربة طريقة الديم سم وهي طريقه مشهوره في شرق اسيا

مكاو

اشهر الاكلات في مكاو اكله اسمها باكلهو>>اخاف باكل هوا بس محرفه
باكلهو عباره عن سمك القد المجفف وينقع بالماء لمدة 20 ساعه لين يروح الملح اللي فيه وله اكثر من طريقه مشوي او مقلي او
مطبوخ او على شكل كرات ويقدم مع الرز انا جربته مع الرز الصراحه ماهوب شين بس الرز اللهم لك الحمد احد يحط بالرز سكر
دام الرز بالسكر والدجاج بالعسل اجل وشلون الحلى حقهم

مكاو

مكاو

اكبر كنيسه في مكاو مع ان نسبة الكاثوليك قليله جدا لكن البرتغاليين هم اللي بنوها

مكاو

سيارة الامام حق الكنيسه ماعنده لعب والله بنوراما ورقم مميز
مايصلي بالكنيسه الا خو وعياله

فيه اماكن كثيره تستحق الزياره في مكاو مثل المتحف الثقافي ومتحف الفن ومتحف جراند بركس ومضمار لسباق الخيول
طبعا الخيول ماتسلم من المقامره عليها

راح تتفاجأ وانت تمشي بالشارع انك في حلبة سباقات سيارات

مكاو

هنا تقام سباقات جراند بري للدرجات والسيارات لكن بعد نهاية السباق يرجع شارع عام

مكاو

العمارات العاليه والمكتظه بالسكان من علامات مكاو لانه يعيش نصف مليون شخص في منطقه صغيره جدا

مكاو

طبعا السواقه عندهم زي هونج كونج دركسون يمين

مكاو

مكاو

مكاو

مكاو

مكاو

المبنى هذا يشبه الامباير ستيت في نيويورك

مكاو

مكاو

مكاو

الورع هذا معنا بالرحله وكان معه اخوانه ثنين وامه واشوف المرشده مبتلشه فيهم تحاول تشرح لهم لكن ماهم فاهمين
وكانت تنادي وحده ثانيه تشرح لهم استغربت قلت يمكن من اليابان سألتهم قالوا حنا صينيين قلت طيب وليه ماتفهمون
على كلام المرشده قالوا حنا لغتنا غير

مكاو

صياد سمك مكاوي

مكاو

اي مبنى لونه احمر مبنى حكومي وفوقه علم الصين ومكاو
طبعا مكاو حكمها الداخلي خاص فيها ولها تشريع خاص لكن السياسه الخارجيه مسؤله عنها الصين ومسؤله عن الدفاع عنها

مكاو

مكاو

مكاو

طول الجسر 2.2 كم وبنوه عام 2004

مكاو

مكاو

بنايه غريبه

مكاو

كمبيوتر عملاق على احد المباني
يقولك اذا فتحوا المسنجر اللي بالصين يقرون المحادثه

مكاو

خويي لقيته زعلان يقول تكاسيهم ماتوقف قلت له وين التكسي قال هذا وكان يأشر على دورية الشرطه

مكاو

شرطتهم كرولا وواجد عليهم اصلا الحرامي مايمديه ينحاش

بعد الظهر رحنا لاكبر واقدم معبد في مكاو عمره حوالي 200 سنه

مكاو

مدخل المعبد

مكاو

مكاو

اول ماوصلنا للمعبد كنا جوعانين ويوم شفت المحل هذا داخل المعبد ويطلع منه دخان رحت للرجال وقلت بالله 2 زعتر قال وش زعتره قلت هذا ماهو محل معجنات قال لااااااا ياخي هذا مدخل الغرفه اللي فيها الاله حق البوذا

قلت طيب الاهكم وش يطبخ بغى يخمني بصنم صغير

مكاو

سله معبينها ما ويحطون فيه تبرعات الناس للمعبد قلت لخويي غط علي خلني اخذ من فلوس هالخبول
دخلت يدي وصرت اخذ من الفلوس بدون ما اطالع بالسله يوم طلعنا رحنا ورى المعبد نبي نشوف كم طلع معنا
يوم طلعتهم الا كل اللي اخذته اوراق شجر خخخخخخخخ

مكاو

مكاو

بغيت اجي واجلس جنب البوذا يمكن يرمون علي فلوس زيه بس خفت واحد يجي يولع شمعه ويشب بي
والا بوذي مسوي له مصيبه يقعد يصيح عندي

مكاو

هذا الظاهر حارس المعبد

مكاو

هذا القارب اللي فازت فيه مكاو في احد البطولات ومقدمة القارب راس تنين

مكاو

العجوز اللي بالصوره ابلشتني قاعده تأشر لي من بعيد يوم وصلت قلت وش تبين قالت ماتبي تشتري شمع عشان تولعه بالمعبد

قلت الا اذا عندك بانزين عطيني اولع بالمعبد

مكاو

طبعا الجهه المقابله الصين ويقولون ان عيال مكاو وعيال الصين يتحاذفون بالحصى من قربهم
المهرجانات في مكاو غريبه وعجيبه وبعضها يخرع
بعطيكم بعض اسامي المهرجانات اللي تصير عندهم
مهرجان التنين السكران ويعتقدون انه يبعد مرض الطاعون
مهرجان الاسد النشيط مع ان الاسد مايحتاج يصير نشيط وهو نايم يخرع
مهرجان القبعه ويعتقدون انه يعالج المرضى
مهرجان استحمام اللورد
مهرجان مركب التنين وهو مهرجان لاحياء ذكرى شاعر عندهم اسمه واط رمى نفسه بالنهر احتجاجا على الفساد
مهرجان الاشباح وهذا تملي الشوارع بريحة البخور ويقدمون اللحم والفواكه للاله
مهرجان ميدينز او يسمونه مهرجان الاحبه وهذا للبنات اللي ما اعرسن يتجمعن يمكن تلقى لها عريس
مهرجان القمر وهذا المهرجان رايق يصلحون فيه كعك يسمونه كعك القمر ويولعون الفوانيس الملونه
مهرجان المحبين هذا شكله زين
مهرجان شنج ينج وهذا بعد مايصلون على القبور يروحون يطلعون الجبال>>>والله من الفضاوه

هذي بعض المهرجانات يعني كل السنه احتفالات ياحظ الطلاب مايدرسون الا اسبوعين بالسنه والباقي فله ووناسه

مكاو

منظر لغروب الشمس في مكاو

مكاو

اكثر شي لاحظناه حب المكاويه للحم مجفف

مكاو

ميدان سينادو المرصع بالفسيفساء الملونه بالليل اجمل

من اشهر الشوارع عندهم شارع ايفيندا دي الميدا ريبيرو على ماتقرا اسم الشارع الا متعدي المحل اللي تبيه

مكاو

بالليل مكاو شكل ثاني انوار الكازيونهات كانت قمة الروعه

مكاو

بعد يوم حافل بالاثاره رجعنا لهونج كونج وجلسنا يوم فيها وبعدها سافرنا لدوله ثانيه
راح تشوفونها قريب ان شاء الله

مقالات ذات صلة

‫39 تعليقات

  1. تسلم اوي اوي عالموزوووووع والصور القميله اوي اوي بصراحة < <قلب سعودي < والله توي ادري ان مكاو كذا ياشيخ فلة انا كنت احسب انها اقل جدا من هالمستوى تشكر جدا على هذه الصور والتعليقات الحلوه بس والله اني انصدمت جدا في هالديره

  2. صباحك اجمل واحلى الله يجزاك خير على المشاركه المتميزه فعلا انت غير وسردك غير وطرحك بس ترى هالمره طولت علينا بالمشاركه انا واحد مدمن شي اسمه رحلات فايز والله ننتظرها بفارغ الصبر لاني اعيش معك الجو واكيد كثير يوافقوني بالراي مهما كثرت الرحلات يبقى فايز غير ورحلات لها نكهه خاصه الف شكر لك ونجي للرحله الصراحه الدوله هذي غريبه واول مره اسمع عنها==>بالجغرافيا صفر واضح من كلامك ان مكاو مافيها عرب البلد جميله وبعدستك اجمل اكيد نجي عاد للتعليق على مواقفك اللي ماتخلص الصراحه اني تمزعت ضحك على سالفة المعجنات هههههههه لانه فعلا من الدخان اللي طالع كنك في مطعم كثير مواقف ابي اعلق عليها بس وقتي مايسمح فايز ماشاء الله الله لايضرك انت مسافر مع مرتبة الشرف تحياتي لك اخوك الصغير حمد الصاهود

  3. ماشاء الله لو صرت مدرس جغرافيا كان تسوي درس على الطبيعة مايحتاج كتب او منهج اتمني الرحله التالي اكون خويك راح انسم معاكم للمواصلة bmw_843@hotmail.com

  4. السلام عليكم كالعاده يافايز مميز ومبدع واظنك بالرحله هذي انفردت لاني اول مره اشوف احد يتكلم عن الدوله هذي والحقيقه اني اسمع فيها بس مدري وينهي فيه وتبي الصراحه بس ماتضحك علي كنت اتوقعها بامريكا الجنوبيه تعجبني تعليقاتك وروحك المرحه اهنيك على اسلوبك والمعلومات اللي قلتها عن مكاو و صورك الرايقه قولنا وين كانت رحلتكم بعد مكاو ومتى بتنزلها؟

  5. صباحكم سكر يا احلى قروب اليوم فتحت بريدي ولاصدقت الايميلات اليوم رسايل المجموعه من الوزن الثقيل مفاجأه رائعه بالقروب اليوم fayez يابعدهم ورقة بلوت جلوكوز وباقي الاسماء شكرا ابونواف على الاربعاء الجميل مع نخبة المجموعه ————— فايز ترى مايصير تمغط فينا لك اكثر من شهر مانزلت موضوع يعني كل هذا تغلي ترى معجبينك كثير وانا اولهم الصراحه انا بالدوام ولاقدرت اشوف الرحله كامله رحلتك يبغى لها dsl لانها دسمه حبيت اشكرك ولي رجعه وتعليق مطول شااو

  6. من غاب غيبتك جاب الهديه وانت غبت لك فترة بس جبت احلى هديه يعطيك العافيه اخوي فايز الرحلة رووعه والصور احلى والي محليها زيادة تعليقاتك الي تخليني اضحك من قلب انتظر الرحلة الجاي على احر من الجمر

  7. خطيرررررررره ماشاء الله واهم شي الخريطه خخخخخخخخخخخخخخخخخخخخ الرحله مررررررررره ماشاء الله تهبببببببببببل

  8. واااااااااو ماشاء الله عليك موضوعك يبي له قعده وبيالة شاهي لي رجعه على رواقه

  9. وااااااو ماني مصدق أكون أول واحد يرد عليك !!! فايز بقولك شغلة مهمة ………. الله يكفيك شر العين

  10. من جد روعه يافايز…..احجز لي معاك المره القادمه….انا عالباب الايمن…هالمره صامل ومافيها رجعه….سلام

  11. السلام عليكم ورحمة الله وبركاته اهديك اجمل تحيه من فلسطين على تميزك وانفرادك بهذا النوع من المشاركات رغم اني مشاركه بهذه المجموعه من 5 اعوام لكن هذه اول مره ارسل رد لكن روعة مشاركاتك تجعل لوحة المفاتيح ترد اجباري على هذا الابداع شكرا شكرا شكراااااااااا اخي العزيز فايز ياسر/القدس

  12. هلا فايز صور و موضوع روعة دائماً مواضيعك أكثر من رائعة بانتظار جديدك بالتوفيق

  13. هلابك والله يعطيكم العافيه والحمد لله ان الرحله اعجبتكم رديت عليكم على السريع بحاول ارد بوقت ثاني بالتفصيل شكرا لكم

  14. والله يا خوي يا فايز انك مبدع والله حمستنا للسفر ومواضيعك ممتازه ومميزه وسجل عندك مقعد لي لاي رحله راح تسافر لها وللمعلوميه فيه خطأ بالموضوع وهو: ذكرت انه لما كنتو تنهون اجراءات الفيزا طلب منكم 50 بتاكا وقلت 50 بتاكا تساوي 50 دولار ثم ذكر بعدها ان البتاكا تساوي نصف ريال… (دفعنا 50 بتاكا واللي تعادل 50 دولار هونج كونج) (العمله بتاكا وهي تقريبا نصف ريال) ومشكور وننتظر جديدك على احر من الجمر

  15. قمة الروقان الرحله اعجبني الاسلوب الممتع بطرح الموضوع ودقتك في اشياء اكثرنا ماينتبه لها تسلم على خفة دمك وقفشاتك المرحه دمت بود ——— حنين———-

  16. مساء الخير لقروب ابونواف مساء الخير اخوي فايز اهنيك اخوي على الرحله الجميله واللي سافرنا معك من خلالها دايما تعجبني مواضيعك مشالله عليك وعندي سؤال صغير اذا تسمح لي هل مكاو تصلح شهر عسل؟

  17. وش ذي الصور شي خونفشاري الصدز ياملحهم وياملح ديرتهم والله ياانا خقيت خققان على معبدهم اعوذ بالله شوي الا اقلب مثلهم الحمد لله على سلامتكم والمره الجايه خوذوني معكم محرم

  18. سفيرنا العالمي الله يعطيك العافيه ماشاء الله تبارك الله صاير ابن بطوطه السعودي انا متابعه كل رحلاتك وحافظتهم بملف خاص يمكن يوم نتهور ونسافر واستفيد من خبرتك كل شي بالرحله حلو الا شي واحد وشلون تاكل رز بالسكر اللهم لك الحمد لو انا كان سويت اضراب عن الاكل لين ارجع فايز انت فعلا انسان مرخ ماشاء الله عليك واللي يسافر معك اكيد ينبسط ننتظر الرحلات الباقيه

  19. والله اني اسمع عن مكاو ولاتوقعتها كذا ابد كنت متوقعه انها زي بنغلادش تسلم والله يافايز دايم مبدع

  20. It seems that Macau is a very CoOoL place…but what’s CoOoLER is your comments ….they R so funny Thaaaanx Fayez 4 sharing this awesome trip with us 🙂

  21. اللللللله يرجك ياشيخ اجل الماي تافل فيه البوذا هههههههههههههه سلم الله هالاصابع يافايز

  22. رائع ماشاء الله .. أشكرك أخي fayez على التقرير الرائع حفظت التقرير في الجهاز لأنني سأحتاجه يوما ما وفقك الله أخي العزيز

  23. والله موضوع رائع وقمة في الابداع انا حقيقة استفدت منه كثير خصوصا اني كنت متردد في زيارة مكاو لاني ناوي على هونج كونج والصين فقط لكن بعد هذا التقرير ناوي اضيف مكاو

  24. فايز …دائما تبهرني بمواضيعك اللي تعيش معها جو ثاني .. وعللى فكرة أحب أقرأ مواضيعك بالليل او بعد الغداء لاني أصير مروق شوي أتمنى تتحفنا بصور لليابان اذا أنت زرتها ..!! فهي البلدة اللي أتمنى أعرف عنها الكثير محبك صالح 🙂

  25. ماشالله بلدااان اوول مرا اسمع فييهااا بس عليهم تطوووووور وحضااارة ثانكس فااايز …….. من جد ماشالله علييييييييك

  26. هناء تسلمين ويعطيك العافيه عتيق انا مثلك ماتوقعتها كذا الا بعد مابحثت عنها قبل اجيها وهذا اللي شجعني جوال اذا انت تقصد جوانزو الصينيه اقول لاتستعجل لانك بتشوفها هنا رنا تسلمين والمره الجايه باخذ عليك رسوم الصاهود تسلم ويعطيك العافيه جرحي عميق الله يحييك معي اصلا مانبي الا منسمين هههههههه الاميره شكرا لك ماتجي مكاو بامريكا الجنوبيه وحنا لاعبين معهم في بطولة اسيا بدر ان شاء الله ماراح اتأخر بالرحله الجايه قمر جده تسلمين وابشري قريب عمر تسلم اخوي طايرتن بالعجه وش دعوه قرطاس هههههههه ابوحمد ضبط الشاي وارجع مبارك وين اول واحد يرد ههههههههههه ابوعمر على الباب الايمين ليه رايحين بددسن خخخخخخخخخ ياسر هلابك وهلا باهل فلسطين كلك ذوق ايما شكرا ويعطيك العافيه علي والله ياعنتر مانسنتغني>>>يبي يكرفه فهد شكرا لك بس انا اقصد دولار هونج كونج مو امريكي دولار هونج كونج = نصف ريال تقريبا حنين تسلمين كلك ذوق مثل الزمن وانت اروع شكرا لك احمد شكرا روريتا تسلمين واهم شي اعجبتك روح انتي اروع الله يعطيك العافيه فري هارت والله حتى انا امنيتي اروح امريكا الجنوبيه تسلم اخوي انسان عادي الحمد لله اني قدرت اغير الفكره اللي حاطها ببالك عن مكاو وليد وانت ابست ههههههههه هلا تصدقين اني كرهت قمر الدين بعدها ههههههه ابوهشام ابشر ابشر ابشر ويعطيك العافيه نجد مساء النور فيه دول كثير احلى من مكاو لشهر العسل وحده بناخذك معنا ونحطك بالمعبد والفلوس اللي يحطونها قدامك النص بالنص خخخخخخخخخخ شماليه شكرا لك عالمي مره وحده كبرتي راسي ترى اخر العنقود بنغلادش عاد ههههههههه ابي للحين تبين اليابان والا هونتي العماد تسلم لي اخوي ولد الخفجي يقولون لي الما زين عن ضيقة الصدر وشربته عبدالكريم ان شاء الله اني افدتك اكرم اذا رحت هونج كونج لاتفوتك خصوصا انها قريبه صالح تسلم لي والله ياصالح ان شاء الله القادم اجمل وابالنسبه لليابان مازرتها والله

  27. هلا اخ فايز و الله رحلتك عجيبه و بلد عجيب بعد اتحفتنا بهالتميزز دمت له و قده و قدود شنج تشااو يعني باي بالصيني

  28. أكثر من انك رائع في التصوير والوصف والتعليق والاختيار كل صوره معها حكايه موتنا ضحك عل الزعتر وبيت الناس اللي انت وراهم وراهم الله يوفقك وبانتظار الرحله الجايه حفظك الله في الحل والترحال

  29. صور ولا أروع ماشاء الله مادري الرحله حلوه ولا الاسلوب والتصوير؟؟ مجرد اقرا واستمتع بالصور احس اني فعلا منب في الرياض وخاشه جو من قلب واذا صكيت الصفحه واتلفت اتحطم ماحولي الا برد وشهاب خخخخ مشكوور وفي انتظار تقارير ثانيه

  30. هلا والله بفايز ورحلاته تصدق ان لك شعبيه عندنا بالدوام اذا نزلت رحله ذاك اليوم الدوام تطنيش يعني اذا جانا انذار تراك انت المسؤل هههههههه رحله كالعاده يافايز قمة الابداع والله انك تخششنا جو برحلاتك امنيتي اخاويك لو للصومال ماهيب شينه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى