رسائل المجموعة

سياحة : رحلتي الى مدينة كاندي Kandy

صباح الفل والكادي

الحلقات السابقة من الرحلة :
رحلتي الى سيقيريا Sigiriya
رحلتي الى دمبولا Dambulla

رحلتنا الماضيه كانت عن منطقة دمبولا وكانت دمبولا مرور فقط الى مدينة كاندي
الصراحه كان الطريق مليان بنقاط التفتيش وبالحواجز العسكريه
كان خويي راكب قدام وانا ورى وكل ماجينا نقطة تفتيش وقفونا ويطلبون اثبات خويي ويكلمون بعضهم شوي وبعدين نمشي
صارت معنا يمكن ثلاث مرات وحنا مستغربين منهم لكن بعد كم كيلو وقفونا نقطة تفتيش ونزلونا وقعدوا يحققون معنا انتم من وين
وليش جايين وطبعا وريناهم جوازاتنا وبعد التحقيق قلت للسواق اسألهم وش السالفه؟
قال يقولون انهم كانوا يشكون بخويك وانه يشبه واحد من زعماء نمور التاميل
قلت لا قلهم خويي من زعماء نمور الثقبه

رحلتي
وش تفتش من كبرها عاد ارفعها بيدك وهزها واذا فيها شي بيطيح

بعد ما افتكينا من الشرطه قلت للسواق وش السالفه
قال نمور التاميل خاطفين 3 اشخاص امس والتفتيش شي طبيعي تعودنا عليه بس يزيد اذا صار فيه مشاكل وهاليومين استنفار امني بكل مكان
قلت طيب نمور التاميل وين مكانهم قال بالشمال ماهم بعيد قلت طيب خلنا نروح للشمال
التفت علي قال انت تتكلم جد
قلت ايه قال اذا رحنا اول شي بياخذون سيارتي ويقتلوني
قلت طيب وحنا قال انت ماراح يسوون لكم شي
قلت طيب يالله مشينا
قال وش فيك انت اقولك بياخذون سيارتي ويقتلوني قلت طيب السياره للشركه وانت اذا ذبحوك خذ ارجع بتكسي لاهلك
التفت علي ومسك واحد من هالاصنام اللي على الطبلون بيضربني فيه
قلت خلاااااااص وش فيك محد يمزح معك انت


وصولنا لكاندي بعد ظهر يوم الاربعاء20-07-2007 وكان حجزنا بفندق ريجنسي ويقع على ضفاف نهر مهاويل
كاندي من اكبر المدن السيرلنكيه وهي ثاني اكبر مدينه بعد العاصمه كولمبو وتعتبر عاصمة الثقافه وذلك لكثرة
المعابد فيها والمتاحف
 ترتفع كاندي حوالي 500 متر فوق سطح البحر وتحيط بها الغابات كما يوجد بها العديد من
الشلالات والانهار والبحيرات ومن اكبر انهارها نهر مهاويل
كان اسم كاندي قديما كاتوبولو نوارا فتغير الى كندايوداراتا>>>اسمها الاول اسهل
كندايوداراتا تعني ارض الجبال واليوم تسمى كاندي

رحلتي
صوره اخذتها من قوقل ايرث لوسط مدينة كاندي

كاندي ارض الاثار المخفيه

وصلنا مدينة كاندي بعد الظهر وكان وقت خروج الطلاب من مدارسهم وكنا نشاهد الطلاب بكل مكان باعداد ضخمه
عدد المسلمين في كاندي اكثر من باقي المدن والدليل كثرة الطالبات المحجبات والمساجد
وفي سيرلنكا لك الخيار بأختيار مدرسه مختلطه او غير مختلطه

رحلتي
احد الاسواق الشعبيه وسط كاندي

سمعت ان كاندي فيها محلات تسوق جميله مقارنة بالمدن الاخرى ومحلات معجبنات وحلويات
دخلنا وسط كاندي واسواقها الشعبيه ووقفنا عند محل المعجنات

رحلتي
طبعا تدرون ان هالاقرع خويي والشايب اللي جنبه السواق
ان طبعا جالس احرس الكيكه

 المحل نظيف وفيه كل شي انواع المعجنات والحلويات اكلنا فيه واخذنا بعض المعجبنات
صاحب المحل سيرلنكي اشتغل في دبي وفي الدمام ويتكلم عربي
وعرض علي اشتغل معه تصدقون بغيت اوفق قلت اشتغل عنده يومين وبعدها انحاش
واصير ابيع بطاقات سوى وامرر مكالمات لاني اشوف البنغاليه عندنا معينين خير من هالسوالف بس قلت ياولد ماتسوى عليك بكره
تمسكني جوزات سيرلنكا ويرحلوني لبنغلادش

كاندي بالنسبه للمدن الباقيه كانت اجمل ومنظمه وشوارعها نظيفه
وقفنا عند سوبرماركة كبيره ولها مواقف خاصه وبعد ماتسوقنا قلنا للسواق يودينا الفندق

فندق ريجنسي يعتبر افخم الفنادق في مدينة كاندي وكان السعر 90 دولار لشخصين شامل الفطور
 الفندق على اطراف مدينة كاندي ويقع على نهر مهاويل مباشره وكانت اطلالة الفندق رائعه

وهذاموقع الفندق

رحلتي
مدخل الفندق

كان الفندق مزدحم بالسياح وخصوصا من الخليج

رحلتي
 استقبال الفندق

رحلتي
اللوبي

الفندق غريب اللوبي والمطعم بمبنى والغرف بمبنى ثاني يعطونك المفتاح ويقولون لك روح دور غرفتك
رحنا ندور غرفتنا وتقول بلعبة متاهات تصدقون مالقينا غرفتنا الا ثالث يوم هههههههه

استلمنا غرفتنا و كانت بالدور الرابع كانت الغرفه جميله ونظيفه

رحلتي

وبعد راحه لمدة ساعه نزلنا نتمشى حول الفندق

رحلتي
حمام السباحه الخاص بالفندق والمبنى المقابل المطعم ومدخل الفندق واللوبي


كانت بداية جولتنا من حديقة الفندق
كان الفندق محاط بحدائق جميله ومرتبه بعنايه

رحلتي
هذا الممر اللي يوصل من اللوبي والمطاعم الى باقي مرافق الفندق لان هالفندق تصميمه غريب شوي


اخذت لكم هاللقطه الرائعه لاحد الاشجار

رحلتي
الفندق تقريبا مبني على تل وهذي الغابات خلف الفندق مباشره

غابات على مد البصر في كاندي
كان الجو رااائع مع بعض الرطوبه لكن البرودة المنعشه تخليك ماتحس برطوبة الجو

رحلتي
تكثر الجبال والغابات في كاندي

رحلتي
جسر فوق نهر مهاويل يوصل للفندق والضفه الاخرى من كاندي

وصلنا لنهر مهاويل وصرنا نمشي بمحاذات النهر

رحلتي
كانت المياه بالنهر قليله

كنا نشوف من بعيد ناس يتسبحون بالنهر

رحلتي
فالينها الشباب وتسبح وشمبو

رحلتي

رحلتي


كنيسه تطل على النهر
لاحظوا مكتوب على الكنيسه اسم فاطمه

رحلتي
تكثر الغربان والكلاب اعزكم الله في سيرلنكا وباعداد خياليه

وانت تمشي بسيرلنكا لازم تنتبه من الغربان لان بعضها يجيك من ورى يمشي طبلونه وممكن يضربك
انا الحمد لله قرعة خويي فكتني لان الغربان يحبون الراس الاقرع يمكن تبي تعطيه كف حلاقه الله اعلم

رحلتي
منظر رائع لغروب الشمس خلف الاشجار

رحلتي
لاتدققون منتم شايفين شي

مع غروب الشمس رجعنا للفندق وجلسنا بالكوفي شوب وبما انك في بلد الشاي لاتستغرب تشوف
انواع كثيره من الشاي


جميع انواع الشاي موجوده

بعدها رجعنا لغرفتنا وبدلنا ملابسنا لان بعض الفنادق مايسمحون لك تدخل المطاعم بشورت
 دخلنا المطعم وكان عباره عن بوفيه مفتوح واكلهم لذيذ ومايحتاج تطلب اكل سبايسي لان حتى الحلى فيه فلفل
 الصراحه كانت الحلويات عندهم لذيذه وتشتهر كاندي بالحلويات


صادف وجودنا بالفندق على مدى يوم وليله 3 حفلات زواج
طبعا كانت فرصه لي اتفرج واشوف كيف اعراسهم بس انا طمعت شوي لاني كلمت العريس وقلت له ابي احضر واصور
وابي معلومات عن عاداتكم وتقاليدكم وكنت حاط في بالي ان نسبة طردي تسعين بالميه لكني تفاجأة برده
قال ابشرررر ومسك يدي ودخلنا الحفل طبعا الحفل مابدا وقال تعال اوريك

كانت قاعة الاحتفال مقابل المطعم والمطعم طبعا مكشوف والناس تتفرج من بعيد وشافوني وانا اكلمهم وادخل معهم
استغربوا وش عنده ذا لايكون خواله سيرلنكيين


بعد الزفه يجلس يوقف العريس وعروسته ويهنونهم اهلهم واصدقائهم ويلتقطون الصور التذكاريه

رحلتي
هذي الطاوله اللي يكتبون عليه العقد>>>بيستاجر سياره ماهو عرس
كرسي للشيخ وكرسيين للعريس وعروسته وكرسيين لابوها وابوه


بعد كتابة العقد يجون هنا المعاريس ويقطعون الكيكه
طبعا بيجون ويلقون طرف الكيكه ماكول
مايضر قطعه صغيره ماهي مخربه العرس

رحلتي
بعد كذا يبدون بالعشاء او الغدا وعباره عن بوفيه مفتوح وعلى يختلف من عايله لعايله على حسب حالتهم الماديه

طبعا الزفه لازم يكون فيها فرقه من رقاصين ومطبلين يمشون قدام المعاريس واهلهم من بوابة الفندق الى صالة الحفل

رحلتي
اعضاء الفرقه على هاللبس تقول سيارة باكستاني مزبرقها

طبعا العريس اللي جلست معه كن السالفه جازت له جلست انا واياه وطنش العروس واهلها شكلها طايحه بتسبده
قعدنا بالصاله وصار يشرح لي مراسم العرس كامله

وحنا نسولف جا واحد للعريس وعطاه سيف
قلت بسسسس الرجال استدرجني بالصاله عشان يذبحني قربان للالهه حقتهم
شاف وجهي تغير يوم جابوا السيف وقعد يضحك
قلت له دام انت ملزم على الاقل سن السيف لاتعذبني والكبد عطوها خويي ترى يموت بالكبده
ووزعوا لحمي على الفقراء والسواق حقنا لايذوق مني شي مايستاهل

قال لاتخاف اقولك وش سالفة السيف الحين

طقوس الزواج تقام في بيت العروس ولكن الاغنياء استبدلوا بيت العروس بالفنادق الفخمه وتبدأ طقوس
الزواج بحضور اهل العروسين الى المكان ثم يقوم اقرباء الزوجه او احد اخوتها بغسل رجل الزوج في اناء مذهب دلاله على قبوله
 بعائلة الزوجه ثم يدخل اهل العروسين وبرفقتهم العريس فقط بالدخول الى مكان الحفل واماهم الفرق الاستعراضيه والطبول
 والمزامير وتكون العروس مخفيه خلف ستاره وحولها ورود جوز الهند والفوانيس >>>تقول دعاية جبنة بوك
تزين العروس من قبل قريباتها وامها بالذهب والذي يتكون من سبع سلاسل من الذهب والاقراط
وغطاء الرئس الابيض المطرز بالذهب

ثم تزف العروس للفندق او مكان الحفل قبل العريس حيث يوضع قماش ابيض لكي تمشي عليه وامامها الفرقه
التي تغني اغاني الفرح والمباركه للزوجين وبعد الجلوس يحضرون ثمرة جوز الهند وتضرب بالسيف ضربه واحده
قلت ايه اشوا الله يبشرك بالخير
الاب او الخال هو من يقوم بالعمليه حيث تنقسم الى قسمين ثم ترش بالماء وبعدها يذهب الزوج والزوجه الى طاوله عقد القران
وهناك يتم الزواج رسمي وذلك بحضور الشهود وبعدها يقومون بقطع كيكة الزواج
بغيت اقول ايه كيكة الزواج اعرفها خخخخخ>>>اكل نصها
وبعد مراسم الزواج يذهب العريس والعروس الى منزل العريس ولكن الان يذهبون الى شهر العسل واذا عادوا يقوم اقربائهم بزيارتهم
وتقديم الهدايا والتي تتكون من المواد الغذائيه واهمها الموز>>>وش دعوه قرود
والله اني بغيت اقول شف لي  اخت مرتك بس عشان اخلي اخونها يغسلون رجلي ويهمزونها

 جلسنا شوي وبدت طقوس الزواج والناس تقول خير وش عنده هذا جاي معنا وانا اقولهم انا صديق العريس

رحلتي
هنا زفة العرس بس اشوف كلهم رجال قلت ياولد لايكون هذا عرس شواذ بس

وهذي لقطة فيديو للزفه
رحلتي

رحلتي
وهذي الفرقه واللي على اليمين كنه سندباد استنزل علينا اثره مايتحمل السامري حقهم المسكين
واللي على اليسار لابس لبس كنه ثوب هذا الشيخ شرندي اللي يكتب لهم العقد


ياخوفي ان هاللي قاعد اصوره الجزار حق الذبايح وانا احسبه العريس
طبعا هذا الزي الرسمي للزوج

رحلتي
هذا الزواج الثاني كان في قاعه مقابله بس شكله عرس شيوخ
طبعا كل اللي يتزوجون بالفنادق هم الطبقه المخمليه وعيال الشيوخ

رحلتي
وهذي كيكتهم الله ستر عليها>>> شبعان بالعرس الاول


هذا واحد من الورعان اللي يمشون مع العريس

حظرت بنفس الليله زواجين وكانوا موظفين الفندق يشوفوني وانا احضر الزواجين كلهم
وانا طالع من عندهم قالي واحد ترى بكره الصبح فيه عرس بعد

رجعت للغرفه وقلت لخووي بكره قومني بدري معزوم على عرس
وفعلا بعد ما افطرنا الصبح كان المفروض اننا نغادر الفندق لكن بعد ماطلعت من المطعم صادفت العرس وكنت انا فوق بالدور الثاني

رحلتي
طبعا قعدت اصارخ عليهم يوقفون لين اجي
وهم مايدرون وش السالفه وقفوا خخخخخخخخ

رحلتي
وهنا نزلت لهم وقلت يالله وهم يتلفتون ببعض وفيهم ضحكه

لقطة فيديو للعرس الثالث
رحلتي


طبعا اللي يشرف على ترتيبات الحفل محلات متخصصه والفندق ماله دخل
 بالعرس هذا ماشفت العروسه وقلت يمكن ماتجي الفندق
وانا راجع لغرفتي باخذ شنطتي صادفت العروسه ومعها هالمزايين


لقيت العروسه هنا ووقفتها على الدرج وهات ياتصوير هههههههه
الظاهر تحسبني المصور اللي متفقين معه

رحلتي
جيت عند العريس وقلت له كم دفعت مهر قال حوالي 7 الاف دولار
قلت هذي 8 الاف وعطني ملابسك واكمل العرس عنك
قال هاه
بغى يوافق ههههههههه

عادات السيرلنكيين معقده ومنها على سبيل المثال يتفائلون بحمل العروس بشهر ابريل وتقام احتفالات اذا حملت بهذا الشهر
من احتفالات اهل كاندي هو احتفالهم بالقمر في شهر اغسطس ويسمى اسالا بيراهيرا حيث تقام الاحتفالات لمدة عشرة ايام
ويشارك في الاحتفالات الفرق الشعبيه والفيله ويلبس خلالها ملابس خاصه وهي طقوس دينيه

غادرنا الفندق وكانت الساعه حوالي 10 صباح وكانت وجهتنا مدينة نوراليا

رحلتي
ورد في احد نوافير الفندق


اعجبتني هالحركه

 
بحيرة في وسط مدينة كاندي

رحلتي
كان فيه قصور كثيره حول البحيره

رحلتي

رحلتي
 طبعا من اهم الاشياء عندي اني اخذ تذكار من اي مكان ازوره وطلبت من السواق يودينا محل تحف وهدايا تذكاريه

رحلتي

رحلتي

رحلتي
 صورة التمثال لانه يشبه واحد من الشباب بس

غادرنا مدينة كاندي حوالي الساعه الحاديه عشر صباح يوم الخميس متجهين الى مدينة نوراليا والمزيد من الاثاره والمغامرات


 بعد العيد ان شاء الله الجزء الرابع وهو مخصص لمدينة نوراليا
وكل عاااااام وانتم بخير

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى