رسائل المجموعة

سويسرا … قلت ما مثلك على الدنيا وصيف … لا حشى مالك وصوف (ج3)


مساااااااااااااااءك ورد ….
مسااااااااااااءك حـبـ ….
مساااااااااااااااااءك دفى ……
مسااااااااااااااااااااءك ليله … ويا هي ليله … ليلة خميس
كيفهم حبايبي ..!! …. ان شاء الله بخير وعاااااااااافيه ياربـــ …..

اليوم راح نكمل مع بعض حلقاتنا الثالثه … من حلقات رحلتي الى سويسرااااااااا …
الحلقة هذه تاااااااابعه للحلقة الثانيه …
يعني يالطيب … يالحبيب …. يابو ….. اذا كنت ما قريت الحلقة الثانيه ….
ارجع ورا شوي .. واقراها … بعدين تعال هنا ….
صدقني راح نحتريك … ما راح نبدا لين تجي
طيب قبل ما نبدأ الحلقة الثالثه ….
كولو .. كولو .. كولو … كولو … حااااااااااقه قهزه ؟!!! ….
مو اذا بديت تقول وقفو شوي …. بروح اجيب مفرحاتي ….!!! … لالالالالا …
انا عني … الببسي هذا هو .. ما تدري هو ببسي والا كاس ثلج ….
وهنا جالسي ساااااااااااااااايح ….من حلاوته مدري من وين آكله …
وهنا كاس مويه … يمكن أغص وألا شي … اشرب ….
والجوال … كأني به ينور في جيب ثوبي … بكيفه ….نبدااااااااااااااا ………!!!!

هياااااااااااااااا بنا …..

في الحلقة الثانية … كنا تكلمنا عن رحلة لمدة يوم كامل مع أحد الشركات السياحية السويسرية …..
لكن وصلنا إلى منتصف اليوم … بعد ما زرنا مع بعض مصنع الشوكولاته

ووين رحنا بعد ( فيس يحك راسه ) … ايه ايه رحلنا لأحد القلاع ….. وجلسنا شوي هناك …

وتقهوينا … وعطيناكم آيسكريم … قل بعد أننا ما عطيناكم آيسكريم ….

ايووووووووه اسمع الكلام
كانت آخر نقطه توقفنا عندها … هي لما ركبنا القطار …
طيب طيب طيب ….
اليوم بعون الله … راح نكمل مع بعض هاليوم ….

بعد ما ركبنا هالقطار … جانا المرشد السياحي …. قال أنه حسب الخطه اللي حنا راسمينها …. المفروض نزور مصنع الجبن …اوكي ..!! … لكن كلمني واحد من المصنع من شوي … يقول أن عندهم بعض المشاكل في المصنع ….
من ناحيه صياااااانه أو مدري وش شب فيهم
فنبي نغير الوجهه ….
قلت معصي … تبي تغير الوجهه غير لحالك … اليوم ماكل جبن يعني ماكل جبن
خلاااااااااااص مسكت … لو اشتري بقره وأجلس اربيها لين تطلع لي جبن بعدين اشتري خبز حار وآكل الجبن .. لحالي … عادي جدا
اقول لك جبن يعني جبن
طبعا كل هالسطرين اللي قلتها فوق .. قايلها بيني وبين نفسي هناك … وإلا كان ذبني من فوق القطار ….
قلنا طيب يابو الشباب وش الحل … قال ما عليكم …. بوديكم لواحد شايب يعيش في كوخ …
يعيش مع بنته … يصلح جبن يحبــــــه قلبكم
على طول قلت في نفسي … هاااااااااااااايدي

والله من اللعانه في عيونك يا بيتر ….أنت وشنطتك السماويه …والا الثلاث نقط اللي تحت كل عين من عيونك …
عشان عيونك مهمه يعني حاط تحتها ثلاث نقط ؟
قلت الله الله … نبي نزور هايدي .. وجدها … وأروح أجلد بيتر .. حاااااااقد عليه …. طبعا اللي نبي نروح نزوره مو هو بيت هايدي المعروف واللي عرض في المسلسل ..
اللي عرض موجود في جبال الألب … وممكن أحد يزوره …المهم … قال آسفين على هالتغيير وكيذا يعني
قلت شف … اليوم طالعين طلعه … ونبي نخربها لأي مكان تبي…. أي مكان بس رح له .. وحنا قداااااااااام معك …
قال اوكي …. المهم …
دقيقه ….
اسمع صوت ….

من هذا صوته

 ……………. …………..

^^
^^
^^

يؤ … يؤ …. جو خويانا الأثنين ….. ومسرعين بعد .. يبون يلحقون ….
من علمهم بس … توني مخليهم نايمين

المهم الجميع وافق … وقالو ما فيه مشكله .. جبن جبن … ما ورانا شي … ….
بعد ما وصلنا للمكان … لقينا الباص حقنا واصل قبلنا … ومنتظرنا …
نزل أول شي المرشد السياحي … وقال هيا بنا .. أتبعوني يا أخوتي ….
<<<<<<< اجل يقول أخوتي … والله من الشسمه *
>>>>>>> ههههههههـ …. ملاحظ أنت .. من أولها شسمه …
وبدينا نمشي …


ونبدااااااااا نمشي في جو رااااااااااايق …
طبعا هناك تمشي لك مسافه كبيره .. والله ما تحس … لأن الجو يرد الروح … والمناظر سبحاااااااااااان من خلقها …
المهم وحنا نمشي … شفنا هاللوحه ..

الله … يعني الجبن قريب
ونكمل المشي …. المهم وانا امشي شفت حصان

مثل ما أنت شايف … حصان مثل كل الحصانات ( جمع خيل ) ….
جالس يتغدا ومرووووووووق … لكن وش الغريب في السالفه كلها ….
الغريب أنه قبل ما أشوف هالمنظر … كنت حاط في بالي معلومه معينه … أن الخيل ما يقدر يجلس …. أو ينام ع بطنه …..
<<<<<<< تصدق عاد أني ما احب أنام الا ع بطني ..!!
>>>>>>> أي والله حتى أنا … مفترش
المهم … شوي .. وأطالع هالخيل .. جلس ياكل .. وياكل .. وياكل … ليـــــــــن مررررررره شبع بقوه
حنا عادة الواحد اذا شبع مره وش يسوي ..!! … يختمها بكاس لبن … بعدين وش يسوي ؟؟!!
ايووووه .. يتسدح في أقرب مكان
أبد الخيل سوى نفس الحكايه …. لكن ما شرب لبن … أكل … وأكل .. وأكل … بعدين انسدح
بوص حضرتك …


هههههههههههـ … أحسه ماكل بقوووووه … يقول لنفسه وينك يالنادي ….
طبعا خليكم من هالتحشيش .. بس هذا أحد المناظر اللي شفتها ع الطريق وحنا نمشي …
استمرينا في المشي … والتوجه كان لبيت جد هايدي
عاد اقول لنفسي … تتوقع يالمايسترو .. نبي نلاقي هايدي فيه
<<<<<<< شف شف شف .. جته الحاله .. بدا يكلم نفسه
>>>>>>> قل الحمد لله .. لا يبلاك ربي مثله
<<<<<<< اي والله انك صادق … الحمد لله يارب …

المهم … جالس اقول لنفسي … يارب ألاقي هايدي … مو مثل العاده .. طاير بها بيتر فوق الجبل

 


مهوب لله يا بيتر … تخطط على هالجبن اللي يصلحه جد هايدي لها .. وانت تاكله ومسوي لي فيها تضحك
المهم وصلنا للكوخ …. طالعو معي شكله من برى …

وهذه برضو صوره ثانيه … بوص يافندم …

الكوخ هذا وش سالفته …!!!
أبد … واحد كبير في السن ( يعني شايب ) .. ساكن مع بنت له … وعنده كم بقره وماعز
الا ع طاري البنت .. وش الفرق بين الماعز والتيس
مين يطلع حليب ومين يطلع جبن
المهم الشايب يصلح الجبن … ويعطي بنته تبيع ….
طبعا أول ما تروح هناك … عادي جدا … يجلس ويصلح لك الجبن وأنت تشوف … ويعطيك تذوقه …
وبعدها تشتري من اللي يعرضه داخل الكوخ … وش رايكم ندخل الكوخ مع بعض …!!!
<<<<<<< يا حوبي لك .. تسنك داري أني احب الجبن
>>>>>>> أي والله حتى أنا
^^
^^
وش تبون أنتم … ما فيه دخول … حنا بس ….
ما عليكم من هالاثنين اللي فوق … يالله ندخل الكوخ …!!! هياااااااا بنا …


مثل ما أنت شايف … كوخ كله من الخشب … طالع شكله راااااااااااااايق …
اول ما دخلنا … قابلنا جد هايدي … وأخبارك يالمايسترو وش مسوي ..
وأنا اللي أنزل راسي … وأسوي حيااااااا …قلت أنا بخير دامك بخير طال عمرك .. انت بشرني عنك … والله بخير وعافيه ..وأخبار الأهل والأخوان … على ما يرام طال عمرك
<<<<<<< اقوووووول .. اشغلتنا بالسلام أنت وهالشايب .. !!!
>>>>>>> أي والله .. أخلص علينا .. بطني يتضور جوعن …
^^
^^
رح أنطقها أول صح .. بعدين تعال
المهم بعد ما سلمنا على جد هايدي … شرح لنا بعض الأشياء … بعدين قال يالله … الآن ببدا اسوي الجبن … .
وأنتم تطالعون من الأول للأخير …
اول شي وش سوى ..!!!
أول شي راح يشب على النار ….


طبعا مثل ما أنت باصص ( يعني شايف ) … ما فيه غاز ما غاز … لالالالالا ..
النار كلها حطب .. مكسره هو بنفسه ….
بعد ما ضبط النار … وصارت تشتغل …. مو تشتغل .. يعني شبت ….
راح وجاب الحليب …. عاد لا أحد يسألني … هو حليب ماعز والا تيس …
ما أدري … اللي اعرفه أنه جانا حليب…. شوف معاي …

هالشايب وش بيسوي ..!! .. بيحط هالحليب فوق النار … ويخليها تغلي .. وتغلي .. وتغلي ..
ليــــــــن يطلع لنا جبن
شغل طبيعي … لا مصااااااااانع ولا شي …
المهم … ويشيل قدره الأبلح … اللي فيه حليب … ويحطه فوق النار … بوص معايا …

قال لنا … هذا بياخذ وقت … ياليت تتمشون لكم شوي … حول الكوخ ….. لين خلص صفرت لكم
<<<<<<< أجل صفر ..!! .. متعود ينادي الشسمه
>>>>>>> لا تلومه … شايبن عايشن في قلعه وادرين … ما تعود ع الاتيكيت …
<<<<<<< ما تلاحظ اليوم أنك جالس تذب كلمات أكبر منك .!!
>>>>>>> سلك لي … الله يرضى عليك
طبعا ما قال بصفر لكم …. قال خذو لكم جوله حره حول الكوخ … الساعه الفلانيه نرجع لنفس هالمكان ….
قلنا أبشر … وطلعنا حول الكوخ نتمشى …
وصورت كم صوره … شوف معاي …


هالمنظر خلف الكوخ مباااااااااااااشره ….
وفيه برضو قدام الكوخ … مثل السيارات الصغيره .. ممكن تستأجرها .. وهي خاصه للأطفال … شوف

وأروح أمشي شوي … وألاقي البقر اللي يرعاها أبو هايدي مدري جدها مدري وش يصير لهم …


يا هو فاااااااااااالها هالبقر … لو تقول له طلع لي عسل .. شرط ما يقصر … مدلعينه بقوه …
المهم … وأتمشى في المنطقه اللي حول الكوخ … لقيت مثل الشقق الفندقيه اللي تأجر … شوف معاي …

الله الله الله …. هذه لو تروح لأطلق مكتب سياحي في السعوديه تقول لك أستأجر لي هنا .. ما عرف أسمها …
وشوف برضو …

مكان يرد الروووووح ….
تقوم على الفجر … تفتح هالشباااااااااك .. جنبك الكوفي … والهواااااا الرايق يضرب فيك … وتشوف هالمناظر قدامك ..


في سويسرا ,,,,
أبي أكتب قصيدة حب …
أبي جزلة معانيها …
أريدك بين هالعالم …
تفاخر يوم تقراها …
ابيك لحرفها تطرب …
أبي غيرك يغنيها …
أبي لامن سألك انسان …
من الي فيك سواها !!! …

تقول اللي سكن قلبي وروحه … لي مهديها …
الله الله … تنسى كل همومك .. وتعبكـ
وأرجع للكوخ … قلت ما راح أبعد .. عشان ما يخلص الجبن علينا
<<<<<<< ألا خفت تضيع….
>>>>>>> لا ما عليك .. بيصفر له بيجي على طول ههههههههههه
^^
^^

المهم .. وأرجع للكوخ .. وأروح من وراه … قلت بشوف وش يحط هالشايب ورا …. وأصور صوره جانبيه له …


طبعا كوخهم طامن …. ( أي ليس بذاك الأرتفاع ) …..
ولسى برجع للقروب اللي معي … إلا اسمع صوت جرس
قلت ياااااااااربيه … كأني سمعت صوت جرس
وشو هالصوت ؟!!! … بدت فسحتهم والا وش السالفه …
قلت يا ولد بلا هواجيس … أرجع أدخل للكوخ .. وتعوذ من أبليس … وأنا راجع .. ألا برضوووووو رجع صوت الجرس
لا حول ولا قوه الا بالله … وين هالصوت يجي .. وين وين وين … أنا أطالع فوق … خايف من الأشياء اللي تجي من فوق …
ما فكرت شي تحتي … المهم وأنا اللي أطالع .. ألا شفت هالأطخمااااااااااااني …

هههههههههههههـ .. وقفت أسد ….
وقفه كلها شموخ وكبريااااااااااء ومهاااااااااابه ….
يا حوبي له … جلست ألاحقه … وهو ينحاش … مو حبن فيه لالالالالالالا … عشان بس أسمع الجرس
درقن … درقن … درقن .. درقن …
<<<<<<< يؤ
>>>>>>> يؤ
من جد صوت يوسع الصدر … وهو مصدق عمره يتوقع أني ألعب معه … ما يدري أني أقول في نفسي ..
يا زين من سقطك في برميل مندي
كان يسقطني الشايب وراه
<<<<<<< ما قلت لك من آثار محاكاه النفس … اللعب مع الحيوانات …!!!!>>>>>>> الله يستر بس … شف اذا تبي تستمر حالته كيذا .. نبي نمشي ونخلي له التقرير
^^
^^
من زمااااااااااان أمش أنت ويااااااااااه …. بجننكم معي
المهم وسعت صدري شوي مع هالماعز …. لالالالالالالا .. مو ماعز … ماعزه … لأنه كان أنثى
رجعت للكوخ … نبي نشوف هالجبن … خلص والا لا …. والله لوه مفطح كان خلص
وأدخل .. ألا اشوف المكان اللي ينام فيه جد هايدي … بوص معايا …

أنت بس شف السرررير … سليب هاي ما يسوى عنده
وألا هالمكتب اللي قدامه … أقل عطسه … دردوب .. جاي ع وجهك انت وكرسيك …
بس بيني وبينكم …. حق مذاكره من جد …. ( فيس يبي يضيق صدور بعض الناس ) …
المهم يوم وصلنا داخل … لقينا بنت الشايب … حاطه لنا الجبن في قدر خشب صغير مثل كيذا .. شوف

طبعا الجبن اللي تشوفه الان مو جاهز للاكل …. لالالالالالالالا ….
قال لنا … الحين نضيف عليه مويه شوي .. ونجلس نحرك . ونحرك .. ونحرك .. ليــــــن يطلع جبن ساااااااااااايل …
قلت ابشر بس …. هات لي قدر فاضي … ..
قال لالا .. ما راح اجيب لك بس قدر … بجيب لك هالاغراض كلها … شوف …

مثل ما أنت شايف اللي على اليمين … منقد غاز صغير .. هذا نبي نحط فوقه القدر الصغير ….
ويجيب لنا قدر صغير فاضي .. ونحطه فوق النار … بعدين نحط فيه شويه مويه ..
وشوي من الجبن اللي طلعناه من القدر الكبير .. ونجلس نحرك .. ونحرك .. ونحرك …
شوف معاي …

الله الله .. لسى باقي له شوي
حركت .. وحركت .. ليــــــــن تعبت ….


بعدين جاب لنا مثل الخبز الفرنسي … وقال يالله …. جرب … وأحط شوي جوا الجبن … طبعا كان حااااااااااار …
ياااااااااهو طعم … صراحه رووووووووووعه …
أفضل جبن أكلته بحياتي ..
يمكن لأني مصلحه … وتبارك فيني ….
لا جد … طعمه مررررره روعه …
<<<<<<< ياااااااربيه …. طيب وحنا مالنا شي ..!!!>>>>>>> ما ظنيت يبقي لنا شي هذا : ( ….
^^
^^
لا مالكم شي .. براااااا .. يا شريرين
المهم .. كان فيه برضو أنواع كثيره من الجبن مصلحها أول .. حطينا لكل واحد في صحنه …

وكان برضو فيه بعض اللحوم … اللي يبي يحلي

بعدها .. أخذت صحني .. وقلت صراحه أنا باكل برى … وأطلع وأجلس على هالطاوله …


وجلسنا شوي عند الكوخ … فيه اللي جلس يشتري جبن .. وبعض المنتجات الثانيه اللي يسويها هالشايب …
وبعدها قال لنا المرشد السياحي … هيااااااااااا بنا إلى البااااااااااااص …. ورجعنا نمشي للباص .. مثل ما جينا …
ركبنا البااااااااص .. وأنطلقنا … وين وين وين نبي نروووووووووح !!! …
قال نبي نروح مكان مررررره حلو وودي تشوفونه !!! …
قلنا وش هو … !!!
قال نبي نروح لقريه صغيرررررره .. اسمها Chexbres ….هالقريه ياااااااااربيه بس … هذه اذا ضيقوك أهلك .. وأزعجوك .. أنحاش لها
من جد قريه ترد الروح ….
طيب هالقريه .. وين مكانها بالنسبه لسويسرا … بوص معايا ع الخريطه …


اللي يعرف سويسرا .. بيعرف مكان القريه .. ع طريقك لفيفي ولوزان …
قلنا قداااااااااااام … ما همنا شي …. اليوم طالعين ننبسط … لو تبي تودينا لشسمه .. عادي
جلست أصور بعض الصور بالطريق … شوف معاي …

وهذه …

طيب … قلنا له وين نبي نروح بالضبط في قريه chexbre ..!!!
قال نبي نروح لكوفي هناك .. عازمينكم هناك … قلت بعدي والله … شركتن طيبه
<<<<<<< طيب حنا نبي نروح معكم
>>>>>>> بليز بليز … نبي نروح
^^
^^
تصيرون عاقلين .. آخذكم معي …
المهم قلنا اوكي .. نروح للكوفي هذا يعني نروح له .. ما ورانا شي …
ونمشي حتى وصلنا للكوفي … ويوقف الباص .. وننزل ….
يالله ندخل الكوفي مع بعض .!!! … هياااااااااااااا بنا
قبل ما ندخل .. وش قصه هالكوفي ..!!!
هالكوفي أطلق … وأجمل … وأحلى .. وأروع … وأحمد وحسن… لالالال
من جد .. والله أروع كوفي تقريبا دخلته … ….
لأنه في مكان غريب .. جدا جدا …. تروح بس عشان تجلس فيه ….
الكوفي هذا .. تابع لفندق قدامه …. طبعا راح نزور هالكوفي .. وبرضو نتكلم عن الفندق …يالله يالله ندخل …. جااااااااااااهزين ….!!!
شوف معاي مدخل الكوفي …


عزل


بعدا ما تدخل من هالمدخل … نشوف هاللوحه قدامك …

هذه لوحه الكوفي .. مع لوحه الفندق ….
طيب خلونا نشوف هالكوفي الخرافي …
شوفو معاي جلسااااااااااته …
هذه الجلسات المغطاه …


وهذه الجلسات المفتوحه …

يا عيني .. يا عيني .. شوف بس وش يطل عليه ….
وشوف هذه …


طبعا القروب معنا … كل واحد جلس في مكان .. واللي بدا يطلب … واللي بدا يصور …


طبعا هالكوفي … برضو عنده أكل .. يعني لو مسكت معاك وجايع
<<<<<<< أي والله أني جايع
>>>>>>> توك ماكل جبن وين جعت معه
المهم … هالكوفي ممكن تطلب منه طلبات جانبيه … شوف معاي صوره من المنيو …

يبي لنا أحد الأعضاء يسوي لنا تقرير سعسعه …. عن هالكوفي
طلبت أنا طلبي … وجلست أطالع المناظر اللي ترد الروح … شوف معاي بعض المناظر .. صورتها وأنا جالس في الكوفي …

لاضاقت الدنيا علي قلت .. وينك ؟
ياللي تسلي وحشتي كل ماضيق ..
ان كان إنعقد حبل الوصل في يمينك ..
من يسقي الضامي وهو ناشف الريق …!!!
عذرك معك وإن شنت الشين مايشينك ..
وإن زنت فإنت الزين من دون تعليق …
الله الله .. تنسى كل هموكـ ….
وشوفو كيف الناس داخلين جو في الجلسات …

هدوووووووووء .. مناظر طبيعيه … جلسه مع اللي تحبه … صدقني تنسى كل شي متعبكـ
بعد ما خلصت طلبي … قلت بشوف وش قصه هالفندق اللي خلف الكوفي … أو بالاصح … اللي تابع الكوفي له …
طبعا بين الكوفي والفندق .. تقريبا 50 متر … يمكن من هنا لشقه أبو حسن
شوف معاي صور خارجيه للفندق .. مصوره وانا داخل الكوفي …

ورحت للفندق .. قلت بشوف وضعه كيف من جوا … أول ما وصلت له .. صورت لكم شعار الفندق …

فللللللللللله
وهذه صوره ثانيه للوحه اللي عند مدخل الفندق …


بعدها رحت للفندق .. ما لقيت أحد في الريسبشن … لقيته حاطه ورقه .. كاتب أنه بيروح مشوار لمده نص ساعه وراجع
قلت بعدي والله
طبعا الفندق .. جاي مرتفع شوي عن الكوفي … وصورت لكم هالصوره من مدخل الفندق .. بوص يا ضنايا …


هذه صوره الكوفي من فوق .. وانا عند باب الفندق مبااااااااااااشره …
طيب .. وش رايكم نتكلم عن الفندق شوي ..!!!
يمكن تمسك معك .. وتروح له …!!!
<<<<<<< أي والله .. الواحد مو طايق ذا الحر ..: (
>>>>>>> شايف أنت كيف ..: ( .. كمل يالمايسترو .. تسني بديت أحبك يوم صرت تمشينا معك
^^
^^
ما أحبكم وخرو عني بس انتم
طيب … نتكلم شوي عن الفندق …
الفندق اسمه …

le baron tavernier hotel

وين موقعه بالضبط من قريه Chexbres ..!!!شوف معاي موقعه …

طبعا هذا برشور أخذته من الفندق قبل ما أطلع من عندهم … تصوير باليد الواحده
وشوف برضو خريطه ثانيه …


شوف هاللي ينبض … ابد .. هذا مكان الفندق …
<<<<<<< يووووه رجعت البراويز الورديه
>>>>>>> اوص اوص .. اسكت لا يرجعنا
^^
^^
انضبط أنت وياه

 


من جد لأنه كان يوم حااااااااااااااااااااااااافل … ومن أروع الأيام ..
قال لنا المرشد السياحي … الحين نبي نرجع لجنيف … وبالطريق نبي نشوف بعض المناظر الروعه ..
ركبنا الباص … ورجعنا لمحبوبتنا … جنيف …


وصلنا تقريبا على مغيب الشمس … ابدا ما غابت الشمس ألا حنا في جنيف .. وفي نفس محطه الباصات اللي بدينا منها …
طبعا وصلت وانا جسمي …. مررررررره مهدود .. لأني من الصباح صاحي … لكن كانت متعه غير طبيعيه …
قبل لا أنسى … هذه شركه وحده من شركات كثيره تسوي لك رحلات يوم واحد … شوف معاي مثلا هالشركه


اول ما تدخل موقعهم .. يطلع لكـ … متل هيكـ …


شوف بس كيف تنظيم الرحلات ….
وقفنا في محطه الباصات … ودعنا بعض ….. رجعت للفندق … ريحت جسمي شوي … وأخذت لي شور ..
بعدها طلعت أحجز تذكره قطار ….. ( جنيف – انترلاكن ) …
لأن اليوم هذا … هو آآآآآآآآآآآخر يوم لي في جنيف … ومن بكره لازم أطلع لأنترلاكن …. محطتي الأخيره
طلعت من الفندق .. وحجزت تذكره من محطه القطارات اللي قدامي … واخذت لي لفه ع البحيره .. مع أني منهد … بس مسكت
بعدها رجعت للفندق .. وحطيت راااااسي .. ونمـــــت …
استعدادا ليوم آخر … يوم راح اسافر فيه لأنترلاكن .. مدينه الهدوووووووء .. مدينه الروعه .. مدينه الجمال …
مدينه وهبها الله من الطبيعه ما وهبها …
تبي تسافر معي لها …!!!
تبي أخذك هنااااااااااك .. بعيد معي ؟؟؟!!!
خلاص … الحلقه الجايه .. بيكون تقريرنا عن أنترلاكن … وأول ايامي هناك …

طيب تبي تمشي كيذا على طول ؟؟؟ … موش مومكين ….
عاد هاليومين حر … فلازم ندور شي يبرد على قليبكـ ….

خـذ


/
\
/
\
واذا خلصت …. حلي بهذه …

بسرررررررررعه … قبل ما تسيح الشوكولاته ع القروب ….

بالعافيه على قليبكـ

/
\
/
\
اشوفكم على خير …
دمتم في أمان الله وحفظه
دمتم بكاااامل عافيتكمــ ،،،
وطبعا ….
لكـــ …. انت بس … مو لغيركـ ..
المايسترو ،،،

متنفســـ
خذني معك الى أبعد حدود الكون
خذني معك
الى دنيا الجنون
خذني حبيبي .. ماعاد أبيني
خذني فرح .. خذني شقى
خذني ياغالي ماعاد بقى
فيني صبر
شف هالاماني تحتظر
ماعاد تقوى غيبتك
تبيك ياروحي مفر
تحتاج حضنك لوه جمر
واتوووه في دنيا حنانك
فيها تحسسني بأمانك
وأغفى معك طول العمـــر
خذني حبيبي .. وذا أمـــر
ماعاد تسوى دنيتي
من غير قربك منيتي
خذني أمل .. خذني ألم
خذني معك دنيا الوهم
خذني دقايق أو ثواني
تكفيني والله شوفتكـ

مقالات ذات صلة

‫24 تعليقات

  1. شكرا ياميسترو اخذتنا بجولة تجنن حيل واي وش هالمناظر الي يرد الروح سبحان من ابدع في خلقة ياليتني الله يطعمني واروح يم سويسرا واي والله شدني مسطحات الخضراء يالله احس هواء بارد وخفيف مايسترو الله يسعدك عطني برنامج كامل افضل الاماكن والسعر واللغة وافضل شركة سياحية والله يسعدك وجميع المسلمين

  2. مشكور اخوي امتعتنا بس والله ينت شهويتني بالجبن ولا زدت الطين بله بالحلا بالعافيه على قلبك اخوي (والله ياهي طبيع خلابه (تشق الوجه) )

  3. جد القصيده الاخيره مدري الخاطره مره منتازه تقرير منتاز منتاز يالله يارب تجيني بعثه لسويسرا .. بروح هناك بكمل دراستي الجامعيه والماستر والدكتوراه وكل ابو شي .. اصلا مارح ارجع <<تكفيين مره منتاز اسلوبك وتقريراتك وتصويرك .. متابعين لكل جديدك تحياتي لك يابطل ساندي بل

  4. شوي عليييييييييها تجنن سبحاااااااااانك ربي يارب لا تحرمنا من الجنــــــة تقرير أكثر من راااااااائع دمتم بحفظ الله ( الجبن أحلى مقطع بكل التقرير ههه وصف دقيق ) موفق اخوي

  5. مرحبا يعطيك العافيه على هالتقرير الاكثر من رائع ومو شي غريب عليك انه تقريرك يطلع بهالروعه رابط الكاميرا اللايف على الكوفي مايتشغل :p <<<<< مب ناويه تتفرج على الخلق ابد :p مشكووووووووور فمان الله

  6. ماشاء الله عليك ياماسترو دائما مبدع دائم انتظر مواضيعك بفارق الصبر لا هنت

  7. من جد تسلم على هيك تقرير يعطيك العافية (قلت ما مثلك على الدنيا وصيف … لا حشى مالك وصوف )..صدقت سبحان اللي خلق وصور هالطبيعه . . . الله يجعلنا في الفردوس الأعلى يارب ووالديك والمسلمين اجمعين

  8. بيض الله وجهك على التقرير يالمايسترو فعلاً حسيت أني مصيف في سويسرا دقة في التوصيف حتى حسين أني معك أكل جبن … بس وش أسم بنت الشايب لا يكون أسمها لميس تراني أعرفها ..هههه

  9. تصويرك شي شي ,, والمواقع اللي رح لها بعد شي ,, وتعليقاتك بعد شي واخوياك رووعه ,, واذا غايتك ترسم الابتسامه ع وجيهنا فأبشرك الا ابتسامه وضحك ومتعه عيشتنا جوو من أحلى الأجواء ,, الله يحفظك ويخليك لعينٍ ترجيك ,,

  10. ماشاء الله عليك والله دخلتني جو معك تقول كأني انا معك بس والله يازين الجبنة لما تكون حااااااااارة وناسة الله يسعدك ويفرحك اخوي

  11. مرخشا ماشالله جدا رايقه صور .. عجبتني الى النخاع بس سؤال صوغنن اذا مافيه مشاكل نوع كاميرتك وشو ؟ – ميغسي

  12. يعطيك العافية يالمايسترو ماشاء الله تبارك الرحمن .. الله يرزقنا الجنة بس إلي أنا أعرفه أن بيت هايدي بالنمسا بالقرب من زلامسي ولاهذا كوخ يشبه له

  13. عز الله انها جنة الله في الدنيا هي لهم بالدنيا وباذن الله لنا بالاخرة …..آمين

  14. سبحان الله مناظر روعه تاخد العقل يسلمــــــــــــــــو تقرير رائع .,.,.,.,.,.,. ننتظر الحلقة القادمة ان شاء الله

  15. وااو روعه يالغالي برد علينا والله يوم انه يسوي الجنبه ريحتها عندي كيف مدري رابط الفندق لايف في نقطه زياده امسحوها يشتغل الرابط <<<<<< لاتسوي تمون

  16. السلام عليكم شحالك ؟؟ انشاء الله بخير المهم انا متابعتنك من بدايه تقارير رحلات بس كنت اتبع بصمت واليوم قررت اني اعبر عن مدى شكري لك بصراحه حبيت اشكرك على هالتقارير الوااايد عجييبه كنت كل اسبوع انتظر التقرير بفارغ الصبر ^ــــ^ امممم شو بعد ……. ما اعرف شو اقووول ^ـــ^ لاتحرمنا من هذي المشاركات انتظرالتقرير الياي بــــــاي

  17. مشاءالله عليك اخوي المايسترو من جد تقاريرك أكثر من رائعه وأسلوبك في طرح الموضوع مرررررررره رائع مشاءالله عليك وأشكرك أشكرك أشكرك أنك شاركتنا رحلاتك الرائعة وان شاءالله تتكرر لك يارب ويكتب لنا سفرة كمان ^_^ بس حابه أسئلك سؤال بره الموضوع شوي تصويرك مشاءالله مره حلو ياريت لو تعلمني أيش نوع كاميرتك وهلي هي سهلة الاستخدام للمبتدئين تقبل تحياتي دمت بحفظ الرحمن ورعايته

  18. والله جمال وطبيعة خلابة تصوير رائع اتمنى اني اروح بس ما…………..يحصل لي يالله بالجنة

  19. رووووووعه رووووووعه رهيب ماسترو عشت معاك جوو كمل بسررررعه تكفى

  20. صراااحه أخوي انا من أكبر المعجبين بتقاريرك الرائعة .. انا متابعه من اول حلقة لك في لندن .. صراااحه ابداع من ناحية التصوير والتعليقات المضحكه والصور الحلوه .. طبيعة ترد الروح .. اشتهيت اروح لسويسرا(: مشكووور اخوي

  21. اسلوب حلو وبصراحهـ حسيت اني عايشهـ ف الموقف .. تصوير حلو .. وخواطر احلى .. نترقب جديدك بكل شوق ^_^

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى