رسائل المجموعة

رمضان أقبل .. جهّزوا ملعب الطايرة ياشباب !

إهداء
للوالد والوالدة .. كل عــــام وانتم بخير والله يسخّرك يابوي لامي والله يكفيك شرّ العرس ، ترى العرس على أم العيال غثا وهمّ ومشقة ! 

 

إهداء
لولد عمّي ناصر بمناسبة شهر رمضان وكل عام وانت بخير والعيد عليك مبارك قبل الزحمه لأن جوّالي بيفصلونه الاتصالات بعد اسبوع ، بس ان احتجـــت لك والا شي ترى برسل لك كول مي ودق علي .

 

إهداء
لخالي حمد بمناسبة هالشهر الكريم واقول لاتنسانا بسابع يوم من الشهر ، ترى الفطور عندنا والوالد موصيني عليك لأنك ( خال ) والخال جذّاب ، وانت جاي الله لايهينك جب معك لي مفرش نوم ترى مفرشي حال عليه الحول وحلّت زكاته .. والهديه على قدر مُهديها .

  

رمضان أقبل .. لا .. اليوم حلّ .. وحلّ ضيفن عزيز

قبل أشُهر ليست بالبعيدة كنت أقول في نفسي .. يابعد رمضان .. بس صارت الأيام سريعة .. تخطفت الاوقات واليوم حلّت ..

آآآآه ياسرع الايامـ ..

بالسنة 12 شهـر .. ألذها إلى قلب الإنسان شهر ( رمضان ) .. الذي أُنزِلَ فيه القُرآن ..
شهر تزداد فيه فُرص الخير .. يقبل العبد إلى ربه بإنابةِ وتضرّع ..

قبل 12 شهر إلا يومين طرحت موضوع عن ( المجاعة ) قبل دخول الشهر .. أنواع التلحوس عند المحلات التجارية … لضمّ وضفّ أكبر عدد من علب التونه والفيمتو .. وكلّه لخاطر ( البطن ) ومايهوى …

وهاأنا أعُيد الكرّه لكن بشكل مُغاير .. بصراحة : مللنا من اللهم واللتّ والعجن وحشو البطن مما لذ وطاب .. !

أحياناً أدق طنب مع نفسي وابدا أفكر ( كيف راح أملى وقتي الايام الجايه ) … ومع إقبالة ( شهر رمضان ) .. يصير السؤال أكبر وأمتن وأصعب في الهضم .. هع .. والله البلشه .. ( 30 ) يوم .. واليوم ياهو طويييل .. يمكن أمشّي النهار إلى قبل الظهر بسحبة الشفّاط ودعسة النومه وتكبير المخده .. لكن بعد الظهر مشكله .. خاصّه إذا كنت من النوع اللي يحب أتبطّح عند التلفزيون .. وياهم قرادة بعد هاللي يعدّون البرامج .. مايحطون برامج الطبخ المليح إلا بعزّ النهار .. يعني ياتفطر بالقوه والا رح قشّر بصـل !

 

طبعاً وبِحُكم أني جالس أشوف البرنامج بعيوني الاربع مع الاستعانة بحركة اليد بالمسح على البطن أصير مُجبر أني أضفّ وجهي غصب واتوجّه مُباشرة للمطبخ واسأل امي بعد ما أتلحوس عندها واقول وعلى بالي مستحي وفاتحن خشتي بمقاس واحد صانتي طول في اثنين وربع صانتي عرض ( اليوم وش بتلصحون على الفطور الله يخليك ) ! … وكالعادة الوالدة تلتفت وتقول ( رح اقرا قُرآن ولاتشغلني واللي يرحم والديك ) !

 

بعد العصر ثلاثين مرّه أروح للبقالة .. مرّه أشتري الغرض وتسعه وعشرين مره أروح أرجّع نفس الغرض لأن الأخت في الله ماعطتني الغرض والوصفة صحّ .. ماتنلام .. غلطانه الله يطوّل بعمرها ! .. بس يمكن زود العبادة أثّر عليها ..

عاد قبل أذان المغرب .. أنواع الزحمه عند مطاعم الرز .. والضعيّف عامل المطعم خطر يطبون في بطنه ويرفسونه .. نصف حبّه بُخاري يامعلّم .. ثلاث حبّات مظبي واسحبها زين الله يخليك وزوّد الكشنه .. حبتين مندي وكثّر شطّه ولاتنس البصل وانتبه لايجي الرز بارد !

بحياتي أمنيتين .. الأولى يموت كل بنقالي على وجه الأرض والثانية يجي يوم واشوف الشعب العربي تاركن عنه همّ بطنه ومخفف الدعسه شوي عليه غديه يرد صحته وعافيته .. !

سنبوسه ولقيمات وشوربة وفيمتو وقهوه وتمر .. هذي راس المال على سفرة الفطور .. والا الخنبقه الباقيه فهو ترزز للحرمة عند رجلها ( وتراي اعرف اطبخ وماقصّرت عنك يومك تشغلني وتهزأني وتقول اطبخي زي حريم اخواني ) وكمان ترزز للشغالة اللي توّها واصلة من شهر ونصف من ( مانيلا ) الكريمة .. ( وتراي وحتى لو كنت اطبخ بديرتي اندومي تراي اضبط عنـــــدكم اصابع الجُبن والبف باستري 

 

بالنسبه لي .. أحـــــسّ بوناسة كبيره إذا شفت شنب أخوي الصغير ( أحمر )   .. هع .. كنّه ( سهم التعمير ) بعزّ سوق الاسهم 

 

طبعاً أسرع صلاة يصليها الفرد هي صلاة المغرب بشهر رمضان … قلبه قلبه .. ولعيون خاطر الـ TV تحلى قضبة الباب بسرعه …

العجيب أن الأكل اللي مع الأذان ومع أنه يحوي جمع أصناف الطبخ والطبيخ إلا أنه يُسمى في علم دبغ النعمة (( خفّافي )) .. يعني بعد الصلاة لزوم الثقيل والرز والمكرونة وثلاثه واربعين صنف .. واذا خلصت لزوم تلحّف النعمه بكاسين لبن .. وأدامك تكلفت وفتحت فمّك أجل دلّع عمرك وخذ لك رشفتين شاهي .. ثنتين بس عشان ماتصيّر كثّرت أكــل 

 

ومع أذان العشاء تختبص السيارات كلّن يبي يلحق على موقف لسيارته للصلاة مع صاحب الصوت الحسن .. عاد أنا حظّي تعيس .. ما أصلي إلا مع شايب باطراف الديرة مع طويل العمر ( والدي العزيز ) .. مدري وش محبب الوالد في هالشايب .. لاصوت ولاتأني أو قراءة خاشعه .. ومن زود القهر من اطلع من الصلاة وانا افترّ في الشوارع واتسمع هالصوت المزيون لواحدن توّه ماسكن مسجدن حول البيت !

 

ومن يوم تحين الساعة التاسعة واثنين واربعين دقيقه وخمس ثواني من مساء كُل يوم رمضاني إلا وملعب الطائرة والم .. واكبس ياراشد واستقبلها ياحمد .. هع .. وناصه ياجماعة الله يديمها من نعمــة .

طبعاً .. بعدها عوده .. وتمردح وتقطيع وقت ثم سحورن دسم يشفي الغليل ويزبّن الآدمي من هجعة وغفلة اليوم التالي .

رمضان .. فُرصة للعبد للتقرّب بالطاعة والاستزادة من الخير ..
فُرصة ستنتهي لحظاتُها بعد أيام ثم لن تعود إلى في عامٍ مُقبل .. ولا نعلم هل سنكون من زوّار ذلك الشهر أم سنكون في عِداد الموتى الذين يتمنون نِعمتنا العظيمة في هذا الشهر الكريم ..

شهر رمضــان ليس موسماً ( للحم الأبيض ) المتنيّل بطرطوشة ذنوب .. وليس موسماً ( لدبغ النعمة وزيادة الوزن ) وليس أيضاً موسماً ( لتسحيب الرجلين ) في ممرات الأسواق التجارية .. بل موسماً لاستغلال الفُرص وتحيّن الأوقات المُناسبة لتقديم كُل عمل صالح .. وليس المُراد في حين إيناس النفس أن تكون مُنقطعاً عن الأعمال الجليلة .. بل الأصلح أن توفّق في وقتك من دون تضيّيع له ..

عن اذنكم .. ربعي يحتروني بالمعلب ويقولون ( الجوكر ) تأخر !

 
سلامو .. وكل عام وانتم وسنبوسة اللحم بألف خير

:: مُدمن شاهي ::

مقالات ذات صلة

‫22 تعليقات

  1. بسم الله .. مدمن .. هالمقال بصراحة تشخيص استشاري لواقعنا ..!!! اسلوب اكثر من رائع .. وفحص دكتور اد الدنيا ويابعدي يا سهم التعمير . . . صلوحكا

  2. مشكوووووووور على الموضوع الجميل خليتني أتذكر ايام راااحت يعطيك العافيه أخوك:مدمن قهوه

  3. ههههههههههه ههههههه ياملحك ياولد بس ماعجبني بالسالفه الا الاهدائات والامنيات متعوب عليها هههههه وانا معك بحق البنقاليين .. الله يجزاك الف خير دائما مواضيعك تحمل المتعه والفائده وكما قلت شهر رمضان فرصه للعبد للتقرب بالطاعه اللهم اعني على ذكرك وشكرك وحسن عبادتك لافض فووووك مدمناا تحياتي

  4. السلام عليكم ورحمه الله حي الله مدمن .. عز الله انك جبته .. جهزوا الطايره يازقرت .. صدقت والله بكلامك عن أن اكثر الناس يستقبلون رمضان بـ زيادة أصناف الأكل وتسدّح أكثر من اللازم مدزابل الـT.V عاد الله من دزل(قل) السناعه عند أكثر الناس الله يعين بس وجعلك الله ممن صام رمضان وقام ليله .. واعاده الله عليك سنينن طوال .. نشوفك على خير يالطربه 🙂

  5. والله ياخوي عجبني موضوعك وبصراحه اشوف معك حق رمضان مايجي غير مره بالسنه والناس ماغير تملي هالسفره بما لذ وطاب وكنهم السنه كلها بمجاعه وماذاقو الاكل ابد وماغير تقلب بهالقنوات والريموت من ايد لايد وكل واحد يحط على مسلسل ولا مسابقه وتاركين العباده والصلاة ولا يروحون لها وهم في نفسهم يقولون يالله متى بيخلص نبي نطلع وننبسط ….. ماكأن رمضان شهر عباده الله لا يلهينا عن طاعته وسلامتك يعطيك العافيه

  6. كل عام وانت بخير يامدمن وموضوعك كول ورهيب وحلو كالعاده ، ربي يحميك

  7. موضوع كا العاده روووعه. مبين انك ما تقوى تصلي بعد ما تدحى ها البطن

  8. السلام عليكم ياحظي حظاه اول وحدة ترد والله موضوعك رهيب وعندي ملاحظة مالها دخل بس طرت وانا اقراء الموضوع اللقيمات لية ناكل اللقيمات ولا فيها اي فايدة عجين مقلي وفوقة سكر وعندي سؤال وش لعاقة اللقيمات والشوربة والسمبوسة و ( المسلاسلات ) بشهر رمضان؟؟!! سؤال محير عجزت القا له اجابة وثانكس لموضوعك الرائع مشاعل

  9. تحيه عطره لمدمن 00 اما بعد اتفق معاك انه مافي داعي للاصناف الكثيره من الاكل وعجبني انكم تلعبون طائره انا بجد افرح لما اشوف شباب يلعبون احس الاونه الاخير صارو الشباب شياب ماغير تبطح علي النت ولا عند التلفزيون او ترزز في بيت فلان وعلان وسوالف بس حبيت اقول لك ليه ماتقرا قران (نفس امك ها هههههه) في فتره الظهر والعصر اسرح وامرح 00ودامك تصلي في المسجد فهذا امر زين علي الاقل تختم القران مع اللامام وفيه دروس كثيره برمضان في المساجد حتي لو كنتو تعرفون ايش راح ينقال فيها مثل بر الوالدين او اي موضوع انتو تعرفونه ترا يكفي انك تكون في مجلس علم وتحفك الملائكه وتنكتب عند الله من اللي حضرو مجلس علم ايضا ممكن تعتكفون يوم من صلاة الظهر للمغرب او في العشر الاواخر من المغرب للفجر او الوقت اللي يريحك حتي لو كانت بين صلاتين اعتكاف اهم شئ تنوي انك تعتكف في فتره معينه وانا بنت كنت اعتكف في الحرم من المغرب للعشاء واحيانا من الفجر للشروق واقرا قران ولا اكلم حد تقدر ايضا تروح العمره او تودي احد من حريمك وهاذا فيه اجر كبير مايخفي عليك فالعمره في رمضان كالحجه مع الرسول وممكن تختم ختمه لجدك او جدتك المتوفاة اغتنمو هالشهر ترا يعادل الف شهر او اكثر وهو نعمه من ربي لنا ياامه محمد لان اعمرنا قليله مقارنه بالاقوام السابقه اللي كانت تعمر لل900 سنه فعوضنا الله فيه عشان اعمالنا ماتكون اقل منهم ولاتنسونا من صالح دعائكم ولك جزيل الشكر يامدمن والله يوفقك يارب دايم

  10. بصراااااحه اسلووووووووووب راااائع وفضيع عن جد مبدع خيو مدمن وتقبل مروري على موووضوعك اختك ضيوووو

  11. مرااااااااااااااااااااحب الشهر عليك مبااارك وعيدك مبارك قبل الزحمه << ماتقلد ابد بصراحه عليك موضوع خبااال بس تراه صدز احسك توصف الشعب السعودي كله بس بيني وبينك الا بيتنا لاننا ماناكل شي غير الفطور و رز ولا مكرونه ولا شي يعني الى 12 هومين نجيب لنا بريدز (ابريق) شاهي وفطاير من عقب الفطور وان بغينا ناخذ جو جبنا فصفص من باجه << لزوم التهزيء من الوالد طال عمره على فكره انا فيه شي قاهرني وباط تسبدي صدز وش علاقة الفيمتو برمضان ؟؟<<احس اني مثقفه على هالسؤال عموما الله يعطيك العافيه وسلم على الوالده وقل لها تدعي لي وسلااااااااااااااااااام

  12. مشكور مدمن على الكاتابه الرائعه الي توضح الواقع بصوره فكاهيه هادفه وللاسف هاذا واقعنا وياليت نلتفت لما هوه افضل من ملي البطن…. تحياتي المافيا الناعمه

  13. يعطيك العافية مدمن هاشي كلام سليم و موضوع مميز .. بس أمنيتك غريبة شوية يموت كل بنقالي !؟ مين ينظف الجامعة بعدين ؟؟ أخويا مدمن شاهي .. كل عام و إنت بخير ( دائما طرح مميز ) ..

  14. كل عام وانت بخير ، شكراً يامدمن يامملوح << تمووون بعدين رجاءً لاتقول شي في البنقاليين هم اللي يغسلون سيارات الشوارع وينظفون المطاعم مدري وش قصتك معهم من تالي دايم تسب فيهم ، الله يستر مع السلامه حبوب القروب

  15. توووووووووووووووووووووووووووووووحفة قسم بالله موضوعك خيالي.. بس خبري فيك ول ماتالف موضوع تقعد تنزله فكل منتدى الين يطلع مه خشووومنا ..

  16. اتعب وانا اقول بطل كل مقال يقول للثاني وخر خل اقعد مكانك .. حلوه الاهداءات والتقضي العصر لاختك 🙂 يسلمو ولا تحرمنا

  17. كـــــــ عام وانت بخير يامدمن ـــــــــــل وسلمت يمناك على موضوعك الاكثر من رائع والله يبسطك ويسعدك مثل مافتحت انفسنا بموضوعك الحلو وانتبه لا تكثر من الشاهي بعد الفطور 🙂

  18. اسلوب رائع نستمتع بقراءة سطوره وما بين السطور ( حلها عاد !) لك مني كل الشكر والتقدير

  19. والله وانا اختك ماعندك الا قربٍ مشقوقه دام الوالده فيه الله لا يخلينا والمجتمع القديم لازال يربي المجتمعات الحديثه احلمو يتغير الوضع اولهم انا وانت وكل اللي ردو ويناشدون بالتغيير:) لو بنتولى مسئولية الفطور عنهم بتلاقي نفسك (اشد حرصا منهم ) على ملء البطون تخيل عاد مازينت قهوه والا ماحطيت فيمتو والا قلنا مافي مالح اليوم ..اقرب خمس فناجيل طايره مايردهم الا جبهتي:) عشان كذا بنرضى بالواقع وبنسكر خششنا لا يفلقونا اهلنا وسنستمتع مع كل بزر مستمتع ومتعلق بمرايه المغسله وهو يتخيل نفسه رجااااال اد الدنيا بهالشنب ..والله لا يخلينا من الفيمتو ولا من السنبوسه ولا من اللقيمات وماعلي منك ابي فيمتو:( <<مالت عليها هذي تاليتها

  20. السلام عليكم كل عام وانت بخير والى ربك اقرب كالعاده ماجبت جديد ، مبدع الله لايضرك تسلم والله لايحرمنا منكـــ .. تشاو

  21. بالفعل هذا الوضع العام لأغلبية الناس .. .. أسأل الله أن يجعلنا ممن قام وصام رمضان إيمانا ً واحتسابا ً ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى