إلـى فـخـامة الرئيس : إيـمـيـل بـن لـحـود
صبـاح الخـيـر فخـامة الرئيس .. أنا مواطن سـعـودي مـخـلص للبـنـان .. أبـعـث هذه الـبـرقية إلى سـعـادة فخـامتكم المـصـون .. و أتـمـنى مـنـكم قرائتها بـتـمعـن و تفـهـم وجهـة نظري التي تـخـدم شعب لبـنـان المخلص .. الموحد بجميع أطـيـافه من مسلمين و مسيحيين ودروز وكل اللي عندكم ….
يا بو لحود … ترى الشعب السعودي يعيش حالة من الغضب … بسبب ماحصل قبل أسبوعين عندكم …. بعد ما كان الشعب السعودي مضبط عمره في الصيف عندكم .. الحين كل واحد خايف … اللي صار عندكم خرب خطط كل طبقات الشعب السعودي… خرب خطط الشيبان يروحون بذا الجبل يشمون الهوى … خرب خطط العوائل تروح هناك و أنواع الرحلات بين الجبال و خرب خطط المتزوجين جدد يروحون يهناك يتعشون لهم بكم مطعم مع دق طبول و رومانسية … و خرب خطط الدشير إللي يروحون يبون يرقمون وتعرف عندنا نسبة ضئيلة جدا جدا من الشباب ( إمحق ضئيلة ) يحبون شغلات النص كم …
يا بو لحود … إنت و الأخ كرامي رئيس الوزراء … لازم تشوفون لكم حل … داخلين على الله ثم عليكم … لا تخربون سفراتنا في الصيف … ترى حنا نجمع بذا الراتب … وحاجزين من شهرين التذكرة و الفنادق ومزبنين عمرنا ..
إللي يبي يودي زوجته أسبوعين أبها و بعدين يبي يرجعها و يهج لكم .. و إللي مصرف أهله و قال لهم رايح حائل و مغطها لبيروت …. وإللي و إللي … دبر عمرك ياخوي …. شف لك حل مع السوريين …. لف عليهم و إلا إلعب الأكة وقدم الخسارة … ( هذي حق مطفوقين البلوت )…. ترى جنبلاط قاعد لكم قعدة… و بصراحة معه حق ياخوي … السوريين جايبين فيكم العيد …. محكمين على ولد الديمن و عندهم أربع إكك!!…. (هذي بعد لنفس الربع )….
في آخر هذه الرسالة يابو لحود .. أتمنى منك إيجاد حلول سريعة … و ياليت ترسل لي الرد بأسرع وقت .. علشان أضبط الحجوزات .. أبتل على لبنان … و إلا أدور لي ديرة ثانية و الله يعين … ترى والله ديرتكم ديرة الحي يحييك …. و ماودنا بغيرها .. بس تكفون نبي نروح و نضمن روحنا .. ما تسوى علي أتفجر وأنا بحفلة بونورة … و إلا يتفجرون ربعنا في قهاوي السوليدير و تضيع مشاريعهم إللي في البلوتوث…
عموما الوضع مو عاجبني .. وشف لك حل
الأخ الغيور على لبنان و شعبه وزواره …
