رسائل المجموعة

رحلتي الى الصين ، غوانزو ، China, Guanzoho

صباحكم فل
وكل عام وانتم بخير
ادري طولت عليكم هالمره يمكن سنه ماكتبت رحله بس حبيت اريحكم شوي مني
هذي رحله كانت قبل سنه وهي امتداد لرحلة سيرلنكا وهونج كونج ومكاو
رحلتنا هالمره لبلد العجائب الصين
كانت الصين الوجهه الرئيسيه لرحلتنا
كان عندنا ثلاث خيارات للوصول لمدينة غوانزو القطار – الباص – الطائره
بعد التشاور قررنا السفر بالقطار
اخذنا تكسي ورحنا لمحطة القطار كانت محطة القطار منظمه ومرتبه قصينا التذاكر وكانت قيمة التذكره ذهاب وعوده 400 دولار ختمنا جوازاتنا وركبنا القطار كانت مدة الرحله
ساعتين تقريبا قبل ندخل حدود الصين وزعوا علينا كروت دخول عشان نعبيها وكانت الاسأله كثيره وغريبه كان واحد من الاسأله عن الامراض اللي فيك لازم تكتبها قال خويي ليه
يسألون عن الامراض قلت الظاهر فيه طبيب يبي يمر علينا ويكشف لكن هذي فرصتك اذا فيك شي اكتبه
الصين تحتاج تأشيره لدخولها انا اخذت الفيزا من البحرين خلال ساعتين وقيمتها 240 ريال واذا منت مستعجل تقدر تاخذها خلال 4 ايام بسعر 120 ريال
لكن بسبب اولمبياد بيجن 2008 صارت معقده جدااااا وصعب الحصول على فيزا وشروطهم تعجيزيه لكن ممكن يفتحون المجال في شهر اكتوبر

كانت اول المدن الصينيه اللي وصلناها مدينة شنزن مدينه كبيره وتشتهر بمصانع الالكترونيات وصلنا بعد ساعتين لمدينة غوانزو بعد اجراءات الدخول مرينا على مكاتب حجز
الفنادق وشفنا هناك شي عجيب متعودين على مكاتب الحجز عندنا اذا كثروا 5 مكاتب ولا فيها احد بعد هناك ماتشوف اخر المكاتب وتلقى المكتب يشتغلون فيه 20 موظف
اخترنا مكتب من المكاتب وشوي الا يوم جا مديرهم قال ياسلام وين باقي الموظفين لعنبو ابليسك 20 موظف في كشك صغير وتقول وين باقي الموظفين اجل كم عددهم
المهم عطيناهم اسم الفندق اللي نبي نحجز فيه لكن عرضوا علينا فندق غيره قالوا هذا افضل واذا ما اعجبكم نوديكم لفندقكم قلت لخويي وش رايك قال نشوف اتفقنا معهم وكان
التوصيل مجانا قالت الموظفه تعالوا وراي وركبونا فان صغير ومشينا من المحطه وبعد ربع ساعه وقفنا عند فندق شكله مناسب ونظيف وتقريبا يتكون من 25 دور
ونفس الشي لقينا الرسبشن فيه 14 موظفه بس للاسف ولا وحده تتكلم انجليزي قلنا هذي البدايه الله يستر
قلنا نبي نشوف الغرفه وطلعنا وشفنا الغرفه كانت مناسبه بس قلت لخويي خلنا نساومهم شوي قال اوكي
قلت لهم الغرفه ماتصلح خلاص ودونا الفندق اللي نبيه قالوا لييييييه قلت الغرفه صغيره وجلسوا يتشاورون وبعدين قالوا بنعطيكم غرفه بنفس السعر
بس اكبر قلت نشوفها بعد ماشفناها قلت لا لا خلاص ماعاد نبي قالوا طيب تعالوا بنعطيكم احسن جناح عندنا والنت مجانا وفعلا كان جناح فخم
قلنا خلاص كان سعرها تقريبا 280 ريممبي
ريحنا شوي بس كالعاده خويي قال انا جوعان قلت انزل للمطعم نزل وشوي وهو راجع قال ماش مطعمهم مايصلح قلت انزل دور مطعم برى
راح وبعد نص ساعه رجع وقال الحققققققققق قلت خير؟
قال تعال بوريك شي يوم نزلنا الا والله تقول ساكنين بتنزانيا ماهو الصين
خوال بكل مكان شسالفه قال والله مدري
والله البلشه وش الحل هالحين وهالناس مافيه احد يتكلم انجليزي ابد
اخذت الجوال واتصلت على واحد من الشباب دايم يروح للصين وقلت له افزع متوهقين ترى قال خلاص هذا رقم صديق لي كلمه وبيساعدك
اتصلت على الرجال وقال وين ساكنين؟ قلت والله مدري بس كلها افارقه حارتنا قال طيب وقف لك تكسي وعطه الجوال اكلمه
قلنا اوكي وقفنا تكسي وجلس يتكلم ويأشر بيديه وانا أشر على الجوال يعني بخليك تكلم واحد الرجال جلس يهز راسه قال خويي فهم؟
قلت فهم طل ترى بيودينا لمجمع اتصالات هالحين
اتصلت على خوينا وعطيت الجوال صاحب التكسي وتفاهم معه وقال خلاص قلت له يوصلكم لمطعم عربي وهناك تقدر تصرف فلوس
قال اذا وصلتوا المطعم فيه واحد اسمه فهد بيساعدكم مشينا وبعد 10 دقايق وصلنا للمطعم ونزل خويي وراح لمحاسب المطعم قال انت فهد
قال ايه قال عطني 25 ريممبي وعطاه من دون مايسأله ليه وحاسبنا التكسي ونزلنا

جمهورية الصين الشعبية واسمها المختصر الصين تقع في شرق آسيا مساحتها حوالي 9,6 مليون كم وتعتبر أكبر دولة آسيوية مساحة وثالث أكبر دولة
في العالم بعد روسيا وكندا وتجاورها برا كوريا الشمالية ومنغوليا شمالا وروسيا من جهة الشمال الشرقي وكازخستان وقرغيزستان وطاجيكستان من جهة الشمال الغربي
وأفغانستان وباكستان والهند والنيبال وبهوتان من جهتي الغرب والجنوب الغربي وبورما ولاوس وفيتنام جنوبا كما تواجه بحرا كوريا الجنوبية واليابان والفلبين وبروني وماليزيا
واندونيسيا من جهتي الشرق والجنوب الشرقي

وهذا النشيد الوطني الصيني
انهضوا يا من ترفضون أن تكونوا عبيد>>>الظاهر يقصدون الحي اللي جيناه
من دمنا من لحمنا نبني لنا سورا عظيما جديد
الأمة الصينية اليوم تواجه الخطر الأكبر
من كل صدر يتعالى زئير غاضب
انهضوا انهضوا انهضوا يا ملايين الشعب بقلب واحد
مدافع العدو لا نهابها تقدموا
مدافع العدو لا نهابها تقدموا
تقدموا تقدموا تقدمو

الصين دولة متعددة القوميات حيث يوجد56 قومية مثل قوميات هان ومنغوليا وهوي المسلمة والتبت والويغور ومياو ويي وتشوانغ وبويي وكورية
ومنشوريا وأتشانغ وتشيانغ>>>ماهيب قوميات هذي شكله واحد يعاطس وجينغ وجينغبوه وهاني وخه تشه وباوشان وقهلاو والقازاق والفرغز ولاهو ولي ولي سو ولوبا
وماونان ومولاو ومن با وناشي ونو وألونتشون وأونكه وباي وباو آن وشه وبنغ لونغ وبولانغ وبومي وشوي وروسية وداوه أر وسيبو وسالا وداي والتاجيك والتتار وتو وتوجيا
ودولونغ وتونغ ودونغ شيانغ والازبك ووا وياو ويوي قو

خريطه توضح حدود الصين
وتوجد في الصين 137 مدينة سياحية على مستوى الدولة منها شانغهاي وبيجن وتيانجين وتشونغتشينغ وشنتشن وهانغتشو وداليان ونانجينغ وشيامن وقوانغتشو وتشينغدو وشنيانغ
وتشينغداو ونينغبو وشيآن وهاربين وجينان وتشانغتشون ولاسا
مدينة بيجن عاصمة الصين والمركز السياسي والثقافي فيها تقع في شمال منطقة السهول الشمالية للبلاد وعلى نفس خط العرض مع مدينتي روما الإيطالية ومدريد الإسبانية

غوانزو مدينه تجاريه تقع في جنوب غرب الصين وتعج بالاسواق والمجمعات التجاريه عدد سكانها حوالي 16 مليون نسمه

غوانزو لقطه اخذتها من قوقل ايرث

يعد نهر اليانغتسي أطول نهر في الصين وهو ثالث أطول نهر في العالم بعد نهر النيل في إفريقيا ونهرالامازون في أمريكا الجنوبية و النهر الأصفر ثاني أطول نهر في الصين
ويوجد العديد من الانهار مثل نهرهيلونغجيانغ وتشوجيانغ ولياوخه وهايخه وهوايخه>>>تقول اسامي طقاقات

اكبر انهار غوانزو اسمه زهوجانج او النهر اللؤلؤي

مع ان غوانزو فيها حوالي 16 مليون شخص الا انك ماتشوف الزحمه الا نادر

في غوانزو الاسواق متخصصه مثلا الالكترونيات كل المجمعات الخاصه بالالكترونيات جنب بعض ومجمعات الملابس في منطقه ثانيه ونفس الشي لمجمعات الاكسسوارات ومجمعات
الجلديات ومجمعات الساعات ومجمعات الملابس ومجمعات الالعاب ومجمعات الادوات الكهربائيه ومجمع النظارات ومجمع الهدايا والتحف ومجمع ادوات البناء وهذا افضل
لكن فيه مجمعات شامله

جراند فيو مول من اكبر المجمعات ويزوره يوميا 800 الف زائر ويوجد فيه فندق خمس نجوم ومكون من 48 طابق

كان فيه عرض ازياء وقت دخولنا المجمع
بعض المحلات تلاحظون حاطين ستاير على باب المحل ماتشوف شي او مغطين بعض بضايعهم بستاره والسبب عشان ماينسرق الموديل اللي عنده
او الديزاين اللي ابتكره هو لكن اذا تبي تشتري يقفل المحل بستاره ويوريك بالضاعه خصوصا محلات الجلديات

دخلنا مقهى داخل المجمع وكان فيه بنت تشتغل فيه تتكلم انجليزي مكسر قلت لها ليه انتم ماتتعلمون انجليزي وردت علي بسرعه وقالت ليه انتم ماتتعلمون صيني
قلت انا ماقلت لك تعلمي عربي انا اقول انجليزي واللغه الانجليزيه لغه عالميه قالت اللي يبينا يتكلم لغتنا احسها بغت تخمني بالصينيه اللي معها

احد مجمعات الالكترونيات
معروف عن البضايع الصينيه ان جودتها اقل من غيرها والحقيقه ان هذا غلط فيه بضاعه ممتازه لكن سعرها غالي حتى البضاعه المقلده انواع
ممكن تحصل شنطه من ماركة جفنشي مقلده لكنها ثلاث فئات كلاس اي وكلاس بي وكلاس سي طبعا كلاس اي ماتفرقه عن الاصلي ابد وسعرها غالي شوي

مجمع لبيع الملابس

هالمجمع بالليل شكل ثاني مع الانوار

مجمع ملابس النساء من الداخل
مع ان المحلات صغيره لكن تشوف ان اللي يشتغلون فيها كثير تحس مالهم داعي لانهم مايتكلمون انجليزي واكثر الزباين تجار اجانب واذا سألتهم عن حاجه قالوا مني مني
يعني انت بتشتري كميه كبيره

مجمع الالعاب وادوات الزينه
لاتتوقع ان السعر اللي يعطونك السعر الحقيقي للبضاعه وتأكد انهم رافعين السعر اقل شي الضعف ولازم تكاسر بالسعر
بعطيكم مثال دخلت مره مجمع الالكترونيات وكنت اسأل عن الفلاش مومري واول محل سألته قال لي80 ريممبي واكثرهم يضايقك يبيك تشتري غصب
وصرت اطلع من محل وادخل الثاني ولا اعطيهم سعر من عندي اسألهم عن اخر سعر بكم وصرت ادور على المجمع كله واطلع واروح المجمع اللي بعده
لين نزل السعر من 80 الى 19 ريممبي
طبعا مايبي لها كلام انت بالصين ونسبة الغش كبيره بس فيه بعض المحلات ينصحونك ويعلمونك الاصلي من المقلد واذا انت تبي تشتري كميه كبيره
خذ عينه وجربها بالفندق

لاحظنا ان الصين غيرت اسم العاصمه من بكين لبيجن ايام الاولمبياد لكن هالشي ماهو جديد هم يسمونها بيجن من زمان
نصحنا واحد وقال لايفوتكم بيجن رود قلت له وش معنى بيجن قال يعني بكين بس هم يسمونها بيجن والسوق هذا يقفل وقت متأخر تقريبا 10 بالليل

بيجن رود

عباره عن شارع مرصوف مخصص للمشاه فقط وفيه محلات ومطاعم ودايم زحمه

في اخر الشارع مطاعم صينيه ريحة اكلهم تجيب الغثيان

الصينيين الظاهر كل شي يتنفس ياكلونه مايعوق معهم شي خنفس بريعصي صرصور مافيه مشكله
اصلا الحلى حقهم عناكب هههههه شوفوا اللي بالصوره بالوسط

شوفوا الكافتيريا كيف

الشوارع تقريبا خاليه الى الساعه 6 المغرب بعدها يطلعون ملايين بالشارع من اعمالهم

وقت خروج الموظفين
كنا نمر على منتزه وحنا راجعين للفندق كل يوم وكانت مساحته اللي على الشارع صغيره ولاتشجع اللي يزوره لكن يوم من الايام قلنا للتكسي يوقفنا عنده
دخلنا المنتزه وشفناه شي ثاني اكبر من ماتصورناه بكثييييير
شوفوا الصور

بنت تستعرض بالزي الصيني التقليدي

صينيه>>>اجل سعوديه

لاحظنا العائله هذي واهتمامهم بالعجوز واظن انها جدتهم كانت تمشي شوي شوي وهم معها واذا وقفت وقفوا كلهم حسينا ان عندهم ترابط مع بعض

وحنا نمشي بالحديقه لقينا طياره ودبابه ومدافع قلت لخويي خلنا نبلغ الشرطه اتوقع ان فيه انقلاب والثوار داسين دباباتهم هنا

تماثيل لبعض الحيوانات

البزر يلعب كرة الريشه وضرب واحد من الخوال طبعا مايبيلها كلام البزر تمردغ هههههه

وانا امشي لقيت هالشيبان يلعبون لعبه زي كرة الريشه لكن تلعب بالرجل والناس يحبون هاللعبه والظاهر من شروطها لازم يكون معهم عجوز

لاحظت ان الشايب اللي على اليمين مزلبينه مايناولونه قلت لهم ليش قالوا دلخ مايعرف يلعب وبعدين مايتحرك بس واقف كذا
قلت لهم ليه قالوا هذا يوم كان صغير طايح من سيكله وصاير كذا واذا شاف سيكل حتى لو بالتلفزيون يجلس يصيح ههههههههههههه

حلوه حركة العشب

المنتزه كبير وكانت الرطوبه عاليه وخويي مايتحمل الرطوبه اللي يشوفه يقول عايش بجنيف
كانت ملابسه مبلله والناس يحسبونه طالع من البحيره قال انا برجع للفندق ومشيت الى اخر المنتزه واكتشفت ان البوابه الخلفيه جنب الفندق

مجموعه من الالعاب في وسط المنتزه

Liurongمعبد الطويل
عمره اكثر من 1000 عام
يوجد في الصين اكثر من 30 الف مسجد

كاثدرائية القلب المقدسِ
في الصين 4600 كنيسه
غوانزو ماهي مدينه سياحيه لكن فيها اماكن تستاهل الزياره مثل جبل باين اذا وصلته تكمل بالتلفريك وسعر التلفريك حوالي 45 ريممبي وفيه شلالات وحديقه خاصه
بالطيور وسعر تذكرة الدخول بحدود 15 ريممبي
بحيرة باين يوجد فيها قوارب للتنزه في البحيره
حديقة السفاري لكنها خارج غوانزو بعيده شوي لكن دخولها يكون بالسياره والحيوانات حره بدون حواجز وتذكرتها غاليه شوي 120 ريممبي
حديقة حيوانات داخل غوانزو وفيه بعض المتاحف والحدائق لكن المشكله كيف توصلها اذا عنوانها ماهو معك بالصيني انسى انك تجيها

الأطباق الصينية مختلفة وأكثرها شهرة أطباق شاندونغ وسيتشوان وقوانغدونغ وفوجيان وجيانغسو وتشجيانغ وهونان وآنهوي
وهي أفضل ثمانية أطباق صينية

مطعم سبأ صاحبه يماني اسمه علي يشبه الفنان احمد فتحي هههههههه ويشتغل معه اولاده وبعض الموظفين العرب والصينيين والصراحه ان المطعم جيد والاكل فيه لذيذ
خصوصا الخبز اللي يسمونه ملوح
صاحب المطعم عاش في جده حوالي 40 سنه وعياله من مواليد جده
وصلنا لغوانزو وقت مباريات كأس اسيا وكان في المطعم تلفزيون كبير ينقل المباريات طبعا المباريات كانت بالليل في شرق اسيا بعكس الخلييج كانت الظهر تقريبا
بعد ماوصلنا التكسي للمطعم دخلنا وشكرنا فهد وجلسنا وكنا جوعانين ولنا اسبوعين ما اكلنا اكل عربي نادينا اللي يشتغل بالمطعم وقلنا له وش عندك وجلس يعدد
الاكل ومن ضمن الاكلات لحم مدفون قلت اصبر اصبر وش لحم مدفون يعني تعطوني كريك واروح ادوره قال لاوش كريك بجيبلك وجربه
طبعا جلسنا بالمطعم من الساعه وحده الظهر الى الساعه 11 بالليل
في المطعم عرفنا كل شي عن غوانزو طبعا من صاحب المطعم ومن التجار اللي يجون للمطعم وافادونا كثير وعطونا عناوين ونصايح كثيره
وكان فيه واحد صيني يصرف عمله للناس وكان يصرف مبالغ كبيره طبع ماصرفنا عنده الا بعد ماسألت كم واحد وقالوا الرجل ثقه اصرف عنده وانت مغمض
صرفنا من دولار الى ريممبي وكانت قيمة الصرف مية دولار 750 ريممبي وشريت منه شريحة جوال
طبعا فيه مطاعم عربيه كثيره منها مثلا مطعم التراس والمائدة والسدة والبيت الشامي وباشا والسندباد والرافدين وألف ليله وليلة ومقهى ليالي لبنان ومطعم البسفور
اليوم الثاني من وصولنا غيرنا الفندق وطلعنا من حارة الافارقه وسكنا في فندق قريب من المطاعم العربيه وكان سعره اغلى شي بسيط عن الفندق الاول بس بشكل عام
اسعار الفنادق في غوانزو رخيصه واعتقد افخم فندق مايكلف 350 ريال باليوم

منظر لغوانزو من غرفتنا بالفندق

نفس اللقطه لكن بالليل

هذا درج الفندق اقول لخويي تصور يخرب المصعد وننزل من هنا قال والله ما انزل لو ايش
كنا بالدور 32 تقريبا
وبعد يومين تعطل المصعد هههههه وبدال ماينزل طلع 32 دور

قطو صيني حتى مياو مايعرف يقولها

كل يوم اشوف الفراغ اللي بالدرج واقول اكيد ماحطوه عبث وفعلا صار الفراغ للسياكل

الصيني انسان عملي ونادر ماتشوف احد جالس وقت الدوام بدون شغل حتى بعض المحلات ادخل عندهم واشوف صاحبة المحل تخيط ملابس اذا مافيه زباين
الصينيين شعب مايحترمون الذوق العام وتشوفهم يتكلمون بصوت مرتفع ويضحكون بوجهك عادي وياكل قدام محله والله عاد من زين ريحة الاكل
نصيحه لاحد يدخل السوق وقت الغدا
كنت امشي باحد الشوارع الصبح ولقيت عجوز تصلح خبز شكله زي التميس وجلست اتفرج عليها قامت وعطتني قطعه قالت جرب
اكلت قطعه صغيره بغيت اضربها بالكاميرا على جبهتها كان فيه طعم غريب قلت والله شكله تميس بالخنافس

تزوير العمله منتشر بشكل رهيب في الصين واي محل تحاسبه بعمله من الفئه الكبيره يجلس يفحص العمله
واكثر من يتعامل في تزوير العمله اصحاب التكاسي لان الراكب ماعنده وقت يفحصها
وطريقة فحصها سهله وراح تلاحظها من الارقام المكتوبه على العمله لانها تعطي اكثر من لون اذا حركتها لكن اذا ماتغيرت الوانها فهي مزوره
وحتى ملمس العمله المزوره يكون خشن شوي
لكن حنا دايم ناخذ معنا فكه عشان مايرجع لنا التكسي شي نعطيه حقه كامل والحمد لله مامرت علينا العمله المزوره

سفن اب صيني
مره كنا نمشي على الرصيف الساعه 9 بالليل وزي العاده كل الصينيين برى بيوتهم اللي يلعب واللي ياكل واللي يسولف
وكان قدامي علبة بيبسي طبعا مايبي لها كلام لازم اشوتها بوز قدام هههههههههه
المهم بعد ماشتها بوز مادريت الا يوم قام واحد من الصينيي وقال امر وش تبي
قلت انت اللي وش تبي
قال انت ناديتني
قلت ياخوي اصلا ماعرف اسمك
قال وش دعوه الا قايل اسمي الرباعي بعد
بعدين اكتشفت اني يوم شت العلبه بوز طلع اسمه من صوت العلبه على الرصيف هههههههههههههه
خويي استانس على الحركه يوم شاف قدامه برميل دفه برجله يبي يستهبل بس المقرود مقرود طلعوا لنا شرطه قال ماشاء الله تسب الريس هاه

الصين بلد آمن وكنت امشي بوقت متأخر وسط حاراتهم وبين بيوتهم والوضع عادي
الصينيين شعب طيب ويحب المساعده لكن مشكلتهم اللغه واللي يتكلم اللغه الانجليزيه شبه معدوم واذا لقيت احد يتكلم انجليزي تكون لغته مكسره
ومثل وجهه>>>الله من زين التشبيه
في الصين التكاسي لها عدة الوان مثل اللون الاخضر والازرق والاحمر والوردي والبنفسجي بس الازرق افضلهم سياراتهم جديده
واول ماتركب راح تشوف ان العداد حسب عليك 4 ريممبي وهذ شي طبيعي

في جوانزو 84 شركة سيارة اجره و16000 سياره
اذا واحد جلس يلف ويدور معك مع ان هالشي نادر بس اتصل على الرقم هذا وعطهم رقم التكسي
096900
وقلهم انا من طرف فايز>>>ايه هين
لاتحاول تتكلم مع صاحب التكسي ابد لانه ماراح يفهم عليك ولاتتوقع انه بيسكت راح يجلس يتكلم بالصيني لين توصل مع انه يدري انك منت فاهم بس تحس انه محد معطيه
وجه ويبي يفضفض لك هههههه
اهم شي اذا وصلت الفندق خذ كرت الفندق واذا خلصت من السوق او اي مكان وقف تكسي وعطه الكرت وراح يوصلك
وبالنسبه لباقي العناوين ماقصروا مطعم سبأ طابعين دفتر وفيه كل العناوين المهم مصل الاسواق والمجمعات والمساجد والمطار ومحطة القطار ومواقف الباصات واماكن
التنزه وعناوين السفارات يعني تروح للصين معك الدليل هذا ماتحتاج اجد ابدااا

هذا ملف مضغوط فيه دليل العناوين

دليل غوانزوا

حاجز حديدي يفصل السايق عن الركاب تقول بسجن

مره كنا راكبين تكسي وخويي جالس يستهبل ويخربط بالكلام مسوي نفسه يتكلم صيني مادرينا الا يوم مسك بريك بسرعه راعي التكسي خويي طبعا مايبي لها كلام
فتح الباب وانحاش وراعي التكسي فتح الشنطه واخذ مفتاح الكفرات لاحووول اثر مفتاح الكفرات لغه دوليه مسكت السواق وقلت عين خير يارجال ترى مايقصد
قال وش فيك؟ قلت انت ماتبي تفقع وجه خويي؟ قال لااااا ياخوي ماتشوف الكفر مبنشر
طبعا كنا نتردد على المطعم مرتين باليوم على الاقل وكنت افضل الطرق المختصره بعكس خويي
طبعا كان مروري وسط الحارات وكنت اشوف الصينيين على طبيعتهم حتى هم حفظوا وجهي وصاروا ينادوني اجي اتفرج على العابهم مع انهم مايفهمون علي
ولا افهم عليهم

هالشيبان كل يوم امر عليهم وهم يلعبون اللعبه هذي ولايملون منها ومره قلت خلني اشوف وش سالفتهم جيت وجلست معهم
ويوم شافوني جيتهم جلسوا يتكلمون معي وانا مدري وش السالفه بس فهمت من كلامهم ان واحد من الشيبان هو اللي قاعد لهم ولاحد يفوز عليه

تصوير جوال

Sun Yat
بنيت عام 1930 وامامها تمثال الدكتور شين
ما انصح احد يجيب معه عمله غير الدولار لاتجي معك فلوس سعوديه لانك ماراح تلقى احد يصرف لك غير الدولار
واذا تبي تستخدم بطاقة الصراف دور بنك شاينا بس
خويي اخذ بطاقته وراح يجرب كل الصرافات مع اني قايله لاتصرف الا في شاينا بنك لكن مقرود راح ودخل بطاقته بجهاز خربان وسحبت بطاقته والمشكله ان البنك
مقفل لانه ويك اند عندهم

هذي مشكلة الصين اللي يبيعون بالمحل اكثر من الزباين
هذا صف واحد بسوبرماركة في8 موظفات

خويي يقول خيييير وش فيه هذا قلت عادي صيني ماهو اصلي يمكن هنق ههههه
بعد 7 ايام غادرنا غوانزو والصين الى هونج كونج بالقطار ومن هونج كونج الى بانكوك وكولمبو واخيرا مطار البحرين

محطة قطارات غوانزو
ودعت الصين لكن وعدتها بزياره ثانيه

 

مقالات ذات صلة

‫71 تعليقات

  1. يعطيك الف عافيه على هالتغطيه بصراحه تغطيه روعه حمستنا على الصين بس من جد بلد رائع ومختلف

  2. الله يجزاك الف خير يا اخوي فايز على الموضوع والصور الطيبة والشرح الكافي والوافي . وعز الله انك ماقصرت وبيضتها ياطويل العمر لك مني الف شكر وتتحية وتقدير على مجهودك الجبار اخوك / احمد العطار دولة الكويت

  3. هلا وغلا اخوي فايز يااااااااحلوك ماتغيرت تقرير ولا اروع منه وعزالله انه جا بوقته انا ابي اسافر بعد العيد للصين ومشكلتي متوقفه على الفيزا الله لايوفقهم تقريرك افادنتي كثيييييييييييير بس عسى الله يسهل وتنح مشكلة الفيزا ولا را استغني عنك وعندي بعض الاسأله وتسلم لي هالايادي والله

  4. هههههههههههههههههههههههه هههههههههههههههههههههههههه ههههههههههههههههههههههههههههه رهيب يافايز وياحبي لاسلوبك:D من جد اسلوبك يجنن ومره خفيف دم بس شلون تمشي بهالاماكنB والله قلبك قوي مشالله عليك

  5. كل عام وانت بخير اخي fayez رفع الله قدرك وبارك لك في مالك واهلك على هذا التقرير الرائع تصوير اكثر من رائع وسرد جميل جدا كأني مسافر فعلا للصين وخفة ظل احسدك عليها يعطيك العافيه اخوك ابوقيس الاردن

  6. رووووعه يااخوي فايز…! والحمدلله علىـآ سلآمتكم ….! وصرآحة حمستني وآيد..! وتصوير كذلك تحفهـ….! أهنيكم علىـآ هيك رحلة صرآحة…! موفق خير…ّ

  7. أي كلمة باقولها ماتوفي بحقك بصراحة استمتعت بهالرحلة يمكن أكثر منك مع اني مارحت الصين ولا اظن بروح:D:D 😀 بس الصراحة حسيت اني معكم بالرحله من تقريرك تسلم ايدك اخوي على التقرير والصور والجهد وخفة الدم الله يعطيك 10000 عافية

  8. الصراحة الله يجعلها سفرة مباركة لك ولاخوك والصراحة انا استفدت كثير من التقرير لاني ناوي بعد سنة استقر بالصين لمدة 4 سنوات وافتح مكتب تجاري في كوانزو بس انا ان شاء الله لي زيارة للصين في الشهر الخامس اشكرك فمان الله

  9. الله يعطيك العافيه على التقرير مبدع كالعاده اسلوب ومعلومات وصور حسستني انا اللي سافرت مو انت 😀

  10. ماشاء الله تبارك الله جهد رائع ومتعوب عليه ماقصرت ياخوي والله حسيتني كني رحت للصين ,, عجيبه والله ماتوقعتها كذا جميله جدا حمستني مره عليها

  11. هلا فايز دائماً تتحفنا بمواضيعك الحلوة كتيررررررر صور و رحلة كتير حلوة بانتظار جديدك دائماً بالتوفيق 😀

  12. كعادتك , تقريرك وافي وكافي .. اللي عجبني المعلومات اللي فيه من جد تغني والواحد وهو مغمض يروحها وبطنه بطيخه صيفي.. وليش مضلل على صور الحريم:$ تعليقاتك فقعتني ضحك.. باانتظار تقريرك الجاي..

  13. ياسلام علييييييييييييك كنك داري اني بروح بشهر 11 والله تقريرك نفعني كثيييييييييييير خصوصا العناوين كنت شايله هم بس يوم شفت التقرير والعناوين انبسطت وارسلت الرابط على زوجي الله يعطيك الفففففففففففف عافيه ويجزاك خير يارب بغيت اسألك عن سعر الصرف بعد الغلا اللي صاير اكيد تغير صح؟؟

  14. مساك الله بالخير اخوي صحيح كثير اللي يكتبون رحلات بس انت اسلوبك غير والله اني ضحكت لين دمعت عيوني :$:$:$ ودي اخاويك والله

  15. السلام عليكم ورحمة الله وبركاته كل عام وانت بحير اخوي فايز تقريرك روعه كالعاده اخوي وكنت محتاج معلومات عن غوانزو وتقريرك جاوب كل اسألتي تقريبا بس عندي سؤال بسيط بخصوص مواد البناء وخصوصا السيراميك هل فيه فرق كبير بالسعر لو اجيب من هناك ومشكوور اخوي وبيض الله وجهك

  16. يعطيك الف عافيه… اجل بغيت تصفق العجوز على جبهتها؟؟؟ وعععععع لاعت جبدي من الوصف. 😀 بس انا ماني فاهمه كم فرع ماكدونالدز في المول الواحد؟؟ واجهة المولات كلها دعايات له!! بس من جد نفسي اشوف مول الملابس.. اااه من يهدني فيه بس كان اوريكم شغل الحريم السنعات:D:D

  17. ررررررررررائع والله سنة ولا مو سنة ماشاء الله ما فقدت لياقتك الكتابية 🙂 تقرير مميز باسلوبك الرائع الله يسعدك دووم

  18. :D:D:D:D:D:D:D:D:D:D:D الله يرجك ياشيخ والله انت حفله طحت على ظهري من الضحك على سالفة البرميل ههههههههههه اجل يسب الريس كفيت وفيت ابوالفوز ولاعاد تبطي علينا ترانا من متابعينك ومتابعين رحلاتك

  19. الأخ الكريم fayez إبداع بلا حدود الله يحفظك بصراحة أتمنى إنك تجوب العالم لكي نتعرف على دول العالم بوضوح وبدقة مجهود كبير تشكر عليه أسأل الله أن يبارك فيك

  20. ههههههههههه اجل الطبيب بيمر خخخخخ شانغهاي وبيجن وتيانجين.. اللخخخ حسيت انهم رامين درزن صحون خخ المنتزه مررررررررررره خطييير الله يخلف على الي عندنا الرحله جدا خطيره كالعاده

  21. حلو إن اسم المعطم مكتوب بالعربي:D أعتقد أصل الرجال من اللي سافروا من اليمن لشرق آسيا للتجارة

  22. يعطيك الف عااااااااااافيه اخوي فايز انا متونسه اني اكون اول شخص يرد على تقريرك:D موفق اخوي وجد وحشتنااااااا رحلاتك وتعليقاتك عليها وعلى سالفه احترامهم للكبير انا لاحظت هذا الشي فيهم وياليت نتعلمها منهم بس سؤؤال : كيف فرقت بينهم احسهم كلهم يشبهوا بعض خخخخخخخ

  23. :$يعطيك العافية خيال وربي كأني رايحةواسلوبك خطييييييييير ماشاءالله تبارك الله وبأنتظارالسفرة القادمة وبأذن الله تكون قريبة ودعواتي لك بالتوفيق :$

  24. ابداع وابداع من عدسة الرحال فايز غيرت رايي بالصين بعد هالتقرير وما كنت متصور ان الصينيين طيبين واصل هالابداع وحنا بنتظار الرحلات القادمه تعوده بالصحه والعافيه نسيت اعلق على سالفة البنت اللي تقول ليه ماتتعلم لغتنا ترى هذا الواقع الحين لازم الواحد يتعلم صيني لانهم راح يسيطرون على كل شي بالعالم دمتم بخير:D

  25. مشكور اخي فائز على الرحله الممتعه واستفدت منها كثير خصوصا الدليل لكن المشكله بالتأشيره فعلا معقده جدا لكن سمعنا ان بعد العيد راح تتسهل هل عندك خبر؟؟

  26. مساء الخير خيوو فااايز,,, صرااااحه من زمان نفسي اقرا عن سياحة الصين,,, لأني قريبا بزورها باذن الله 😀 موضوعك جدا راااااااااااائع

  27. اولا شكرا اخوي على هذى الايميل الحلو لكن لو تسوي كتيب صغير وتجمع فيه جميع سفرياتك (بالترتيب) يكون احلى لأني حاولت أن اشوف رحلاتك القديمة لاكنها تطلع (غير مرتبه) يعني جديد وقديم مخلط وملخبط حاول تجمع جميع رحلاتك بترتيب وتنظيم وترسلها على الجروب يكون شيء جميل فعلا لأن البعض دوبه اشترك في هذي المجموعة الرائعه ومالحق يشوفها من البداية مجددا شكرا اخي

  28. اهم شي مستانسين يارب كلنا مستانسين

  29. ام الكواسر الدليل بينفعك هناك وبدون بتصيرين ضايعه خليه معك هو وعنوان الفندق اللي بتسكنين فيه فهد السديري تسلم اخوي والله يحييك hnoy شكرا لك اسامه انا مريت على مجمع مواد البناء لكن ماشفت عندهم سيراميك واللي اعرفه ان السيراميك في مدينه ثانيه الصافي مطعم ماكدنوالدز واحد بس هذي لوحاته جايه كذا وبالنسبه للملابس الصراحه انها عاديه اللي شفت روح حسيت اني راس حربه على هالتعليق :$ فهد تسلم اخوي عساك كل يوم منصرع من الضحك :$ والله ياخوي حتى انا ودي اجوب العالم بس كل شس غالي هالحين saad ghamdi يالله الواحد يجوب الثقبه :$ توفي اي درزن صحون هذي تريله كلها صحون منقلبه لكل شي اذا ماتم نقصان B كل المطاعم هناك مكتوبه بالعربي وبالنسبه للمطعم صاحبه طلع من السعوديه ايام حرب الخليج وجلس في اندونيسيا 10 سنوات وبعدها جا للصين قمر جده تسلمين بس منتي اول من يرد :$ اخت اخوها تسلمين شكرا اوركيد دام كأنك رايحه هاتي قيمة التذكره مافيه شي ببلاش ابومشاري انا زيك بعد كنت متوقع بشوق شعب سيء لاني قابلت صينيين يكرهون العرب في سنغفورا وماليزيا بس الحمد لله اكرم الله يعينك مالك الا الانتظار بس كأني سمعت انها راح تفتح في اكتوبر مورا توكلي على الله وروحي بس جمعي معلومات قبل تروحين وفيه منتديات متخصص بالصين بتفيدك فتى مكه صح كلامك بعظها غير مرتب والمشكله مني انا ماهي من الموقع بس انا اكتبها على حسب زيارتي لها وفكرة الكتاب ماهي شينه الله يعطيك العافيه سمر اهم شي انتي مستانسه :$

  30. والله الرحلات مالها الا فايز تخلي الواحد يعيش معك الجو وكنه رايح هناك حسيت اني معكم بالسوق وبالمجمعات والمحلات اللي زرتوها الصراحه كلمة روعه شوي بحقك رووووووووووووووح الله يوفقك ياشيخ ويوسع صدرك بالعافيه يارب

  31. حياللله السمي 😀 صور جدااا روعه وقفشات ومواقف ظريفه لكن سالفة البنات اللي يشتغلون بالمحل جد شي غريبB الناس شلون يتسوقون دام اللي يشتغلون كذا لاتبطي علينا هالمره سماح

  32. اهلين اخوي فايز والله ما قصرت متعودين دايم على تقاريرك الحلوه (احلا ما فيها تعليقاتك الحلوة-تصويرك الواضح) حلوه سالفه السفن اب ضحكتني موووت هههه بسألك (ما ادري انت رايح سياحه او تجاره) بس يقولك الصين رخيصه والاثاث تشتريه بالماي ما ادري اذا تعرف وين نحصل محلات الاثاث باي منطقه سؤال ثاني شلون الجو هناك نفس بانكوك او شلون(يقولون بارده) والمنطقه اللي انت رحت لها يعني داخل العاصمه؟ اذا تعرف بالسوق شلون بضايعهم يعني تستاهل الواحد يشتري منهم (يعني بضايعهم غريبه و اسعارهم شلون نفس اسعار اوروبا او تايلند) ادري غثيتك بالاسئله بس انت كريم واحنا نستاهل

  33. السلام عليكم .. متشوقين نزور الصين صراحة بس لازال فيه خوف .. عالم غير و احس ما راحوا له ناس كثير عشان نتطمن .. على العموم الله يقويك .. ملحوووظة صغيرة : ياخي بغيت انبه على التعليقات ما تصير من نوع سخرية في ناس اشكالهم وشخصياتهم وما الى ذلك .. الواحد يحرص وش جالس يكتب الله يقويك 🙂

  34. الله يعطيك العافية فوق أن الرحلة مبيّن عليها رائعة و هذا ما بدى لي من واقع الصور، فأنت تتمتع بحس فكاهي ظريف ، تغبط عليه! دُمتَ سالمُ إن شاء الله.

  35. ماااااااااااااااااااااشاء الله عليك كفيت وفيت والله احنا مخططين على كوانزو وهونج كونج بشهر ديسمبر ان شاء الله وصدفه جاني ايميلك ماصدقت عيوني تبي الصج استفدت وااايد من رحلتك للصين ورحلتك لهونج كونج ونسخت العناوين عندي وباخذها وياي والصراحه الرحله كوم والتعليقات كوم :$ انت رحاله رقم واحد الله يحفظك

  36. السلام عليكم .. أخوي فايز الف حمدلله على سلامتكم وماشاءالله تبارك الله رحله ممتعــه وروووعه وبصراحه تصوير إبدااااعـ عساك على القوة إن شـاءالله بأذن الله أني راح أسافر للصين وراح أتصل عليك وأخذ رقم فهد:$:$ تحياااتي ..

  37. مرحبا اخوي فايز كل شي قلت صحيح 100% ماشاء الله انا زرتها قبل سنتين فعلا وصفك دقيق ذكرتني بغوانزو وشنزن بس استغربت ماكتبت عن شنزن لانك على كلامكم مريتوها معقولها ماجلستوا فيها كل الاسواق اللي حطيتها جيتها الا اسواق الكمبوتر تخصص زوجي بس انا دورني عند الاكسسوارات والملابس والجلديات تسلم اخوي على تقريرك الراااااائع

  38. تسلم يا ابو الفوز على هالتقرير الجميل للغيه انا ابي مجمعات الكمبيوترات والجوالات وبعد يا ليت نلتقي على الماسنجر اذا امكن تقبل فائق الاحترام

  39. انت قلت انك جلست عند الشياب اللي يلعبون على الطاوله انت اللي جالس على يمين ابو زقاره ويسار ابو فنيله علاقي هههههههههههههههههههههههههههههههههههههههههههههههههههههههههههههههههههههههههههه

  40. :$:$:$:$:$:$:$:$:$:$ :$:$:$:$:$:$:$:$:$:$ مع اني متابعه رحلاتك كلها ولايفوتني شي لكن اول مره ارد ياشييييييييييييخ روح الله يوسع صدرك مواقف تسدح الواحد من الضحك ااه بس من نزلني بغوانزو بين المجمعات وخلاني افرفر ماشاء الله عليك لاتقول عطتني عين خخخخخخخ

  41. ودولونغ وتونغ ودونغ شيانغ والازبك ووا وياو ويوي قو وجينغ وجينغبوه وهاني وخه تشه والفرغز ولاهو ولي ولي سو ولوبا وماونان ومولاو ومن با وناشي ونو وألونتشون وأونكه وباي وباو آن وشه وبنغ لونغ وبولانغ وبومي وشوي يلونغجيانغ وتشوجيانغ ولياوخه وهايخه وهوايخه :> Fayez ما أروع الصيــن حين تكتبها أنت ..،، لا زالت تحملنا كلماتكَ كالعادة .. حيث نسافر .. و نحنُ بنفسِ المكان لكَ الخير كل آن ،، 8)

  42. يا حي الله فايز اشتقنا والله لك ياشيخ , ولتقاريرك واسلوبك اللي مرة نايس :$ لا تقطع علينا وعلى الاقل في الشهر رسالة 😀

  43. مسائك ورد على طريقتك:D وكل عام وانت بخير مدري ليه يافايز كل ما اشوف ررحلاتك احس انك تكتبها لي يمكن عشان احب الرحلات ويمكن عشان ادمنا اسلوبك وطريقتك بالسرد كل ما اشوف رحله لك اتمنى اني معك بالرحله احس الرحله معك غير فيها اكشن ماشاء الله علييك ماعندي تعليق على الرحله كالعاد التميز عنوان رحلاتك وصحييح مالها الا اهلها عساك على القوه بس وين الرحله الجايه شرق والا غرب مايهم دام يكتبها فايز تسلم ياخوي ويعطيك الف الف الف عاااااااافيه….

  44. جزاك الله خير عندي سؤال بخصوص الاسعار هل تشجع الواحد يشتري كميه بغرض التجاره؟ ومشكور اخي فايز

  45. فهد:تسلم ويعطيك العافيه البحار الرابح: الله يبارك فيه ويسلمك فايز: سميي ماشفت شي الخافي اعظم كل المحلات كذا بنوته كويتيه :تسلمين وكلك ذوق بالنسبه لاسألتك رحلتي لقافه لاسياحه ولاتجاره لاتسألين عن الاثاث لاني مدري عنه بس اللي اعرفه انه بمدينه ثانيه الجو بالصيف رطب وحر خفيف غوانزو ماهي العاصمه تبعد عن العاصمه 3 ساعات بالطائره ام ام: جزاك لله خير تسلم اخوي الله يعطيك العافيه:MaximusQ8 قطريه ونص:ان شاء الله استفدتي من الرحله عبادي:ههههههههههههههه فهد تاب ماعاد يعطي احد ترى ام نايف:والله كنت ناوي اجلس بشنزن لك مافيه وقت حمد:هلا والله ابشر والله تراني اللي لابس فنيله علاقي هههههههههه شجرة الدر:شكرا لك هتلره:حسيت اني كاتب كبير ترى هههههههههه الله يعطيك العافيه

  46. السلام عليكم يعطيك العافية اخوي فايز ماشاء الله رحلة موفقة ابدعت بالصور بارك الله فيك تيب وين الهدايااااااااااااا ههههههههههه يسلمك ربي والله ما قصرت

  47. انت مبدع وتعيشنا المكان والزمان احس وانا بقرأ اني معكم بالرحله من دقة الوصف تحياتي لك وكل عام وانتم بخير

  48. :$ما خليت مكان يا اخوي فايز الا وزرته على فكرة انا من سكان مدينة جوانزو إن كان لك زيارة ثانية فعلمنا

  49. تسلللللللللللللللللللللم والله على هالمعلومات وخصوصا العناوين انا بروح بعد شهر ونص بأذن الله والصراحه اني ماتوقعتك تكتب عن الصين لاني متابع لرحلاتك كلها تقريبا ومن اششد المعجبين باسلوبك الكومدي ان شاء الله اذا رجعت بكتب عن قوانزو وبنافسك :$

  50. هههههههههههههه الله يقطع سوالفك والله من كثر ما ضحكت بطني عورني …!! بس المره الجايه اذا جيت ترووووح قولي خلني اشوف هذول اللي مايعرفون انجليزي ..!! هههههههههههههههههههههههههههههههههههه

  51. سلااااام الله عليكم8) :$:$:$:$:$ههههههههههههههههههههه والله اسلوبك يضحكني كل شي ياكلونه مايعوقن الصراصير

  52. هلا والله يالله حيه من جد المره هذي ابطيت علينا بس مثل كل مره ترجع لا بالسمين نقرا ونشوف رحلات كثير بس مثل اسلوبك ومواقفك مااافيه مع ان الصور المره هذي مافيها مناظر حلوه مثل باقي رحلاتك بس الرحله شيييييي ثاني فتحت رحلتك وانا بالعمل وقروها كل الزملاء وسويت لك شعبيه لوووووووول مشكووووور وعساك على القوه دايم يابوالفوز

  53. السلام عليكم والله ياخوي فايز مدري وش اقول احس اني رحت لـم الصين عقب هالتقرير الشامل والصراحه اني ودي اعلق على نقاط وصور كثيره اعجبتني بس وش اعلق عليه وش اخلي منه تقرير وافي وكافي باسلوب رائع بقالب فكاهي قلما نرى مثله يعطيك الف عافيه

  54. السلام عليكم والرحمه حلوه الصور ..ووايد عيبتني صورة الصينية فإذا ممكن تحطها من غير التظليل ع فيسها لاني ابي استخدمها :$إذا ممكن

  55. بولافي هلابك ياخي جيتي بالسلامه اكبر هديه ههههههههههه شهرزاد مشكوره ويعطيك العافيه باسم هلا والله فيك وانا لي زياره قريبه لغوانزو ويشرفني معرفتك ولد شمر تسلم اخوي ويعطيك العافيه فوفو مشكوره وانسي احد يتكلم انجليزي نوير ليته على الصراصير بس والله مايخلون شي اعوذبالله ابوطلال تسلم لي والله السبعاني شكرا والله ومن ذوقك دلوعه مشكوره ويعطيك العافيه نحوله والله مقص الرقيب مايخلي صوره لكن الصوره موجوده عندي اذا تبينها ابشري

  56. :D:D هلا اخوى فايز صراحه تنفع مرشد سيااحى فعلا والحمد لله على السلامه…. واحمدوربكم لقيتو مطعم عربى ولا يخلف الله عليكم ههههههههههههههههههه صراحه تصوير حلو وتعليق احلا وتحمسك صراحه بروح مثلك لقاافه بس بطول ويااليت ترسلى يااخوى فايز اى شى يتعلق بالصين اهم شى المطااعم ههههه وشكراااا,,,,,,,,,,,,, سديراوى

  57. وناااسه الرحله .. واللي محليها أسلوبك .. (L) وبصراحه أكثر شي جاز لي فيها الأسواق ! شي خيااالي .. ليت من يروح لها بس 🙁 يا مال العافيه يا فايز .. وإن شاء الله نشوف لك رحلات ثانيه .. : $

  58. تحياتي للشباب، والله مشكورين للمعلومات والتعليقات الحلوة،والصور الجميلة،ويعطيكم الف عافية أخوكم علي

  59. السلام عليكم ماشاء الله تبارك الله تقرير حلو والحمد لله على السلامة عندي سؤال بخصوص الخطوط وش الافضل من ناحية الخدمة والراحة بانتظار باقي التقارير

  60. كل الشكر والتقدير عزيزي على المشاركة القيمة ولو تكرمت افادتنا عن الجو بشكل عام بشهر 11 وهل نأخذ معانا صيفي ولا شتوي ؟؟؟

  61. هلا اخوي معليش انا عندي مجموعة فنادق بغوانزو ان شاء الله تفيد اللي بيسافرون ويعطيك العافيه كفيت ووفيت والله. 01.White Swan Hotel 02.Guangdong Victory Hotel 03.Liuhua Hotel 04.China Merthants Hotel 05.DongFang Hotel 06.China Hotel 07.Furama Hotel Guangzhou 08.Guangdong Guest House 09.Guangdong Hotel 10.Hotel Canton 11,Hotel Landmark Canton 12.Li du Hotel 13.Rosedale Hotel 14.Globelink Hotel Guangdong 15.Guangzhou Jiangwan Hote 16.Aisa International Hotel Guangdong 17Guangdong International Hotel 18.Baiyun Hotel Guangzhou 19.The Garden Hotel 20.Holiday Inn City Center Guangzhou 21.Ocean Hotel 22.Guangdong Foreign Businessman Club 23.Ramada Pearl Hotel 24.Star Hotel 25.Grand Palace 26.Tianlun International Hotel 27..China Mayors Plaza 28.Grand Palace China Hotel 29.New Pearl River Hotel

  62. والله الصين جنان ادعيلي اني ازورها الله يعطيك الف عافيه على الصور والتعليق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى