رسائل المجموعة

رحلتي إلى أوروبا – جنيف + ميلانو – الجزء الأخير

السلام عليكم ورحمة الله وبركاته

عن أبي الدرداء رضي الله عنه أنه سمع رسول الله صلى الله عليه وسلم يقول : (ما من عبد مسلم يدعوا لأخيه بظهر الغيب إلا قال الملك ولك بمثل) .. وعنه صلى الله عليه وسلم انه قال : (دعوة المرء المسلم لأخيه بظهر الغيب مستجابه , عند رأسه ملك موكّل كلما دعى لأخيه بخير قال الملك الموكل به : آمين ولك بمثل) .. العم محمد (أبو سعد) عبد مؤمن .. ماتعرفه ولا يعرفك .. انقطع عمله من الدنيا .. وانتقل إلى جوار الرب جل جلاله بعد معاناة مع المرض .. دعوه خفيفه قد تحتقرها او تستصغرها .. لكن أنا متأكد انه مستعد يشتريها بالدنيا كلها .. لذلك لا تحرم شخص محتاج من شئ لن يكلفك لا مال ولا أدنى جهد .. افعلها لانك عاجلا او آجلا بتكون في نفس وضعه .. ويمكن تكون محتاج للدعاء أكثر منه .. وربما تجد من يدعي لك وهو ما يعرفك مثل ما دعيت للشخص هذا اليوم .. القرار بيدك انت .. اغلب شيطانك واذكر الموت واستشعر حاجته لدعائك .. وأرجوا من الله أن يرقق قلب من يقرأ هذه الكلمات .. وأن يغلبه على نفسه وشيطانه

: من دعاء النبي صلى الله عليه وسلم للميت

اللهم اغفر له وارحمه , وعافه واعف عنه , لقّه الأمن والبشرى والكرامة والزلفى , اللهم إن كان محسناً فزد في حسناته , وإن كان مسيئاً فتجاوز عن إساءته , اللهم اغسله بالماء والثلج والبرد , نقه من الخطايا كما ينقى الثوب الأبيض من الدنس , أبدله أهلاً خيراً من أهله , وداراً خيراً من داره , وجيراناً خيراً من جيرانه , اللهم لا تحرمنا أجره , ولا تفتنّا بعده , واغفر لنا وله


جنيف

الوصول : 24 – 8 – 2008
المغادره : 27 – 8 – 2008
Mercure Annemasse Porte De Geneve : الاقامه

للاطلاع على الاجزاء السابقه
رحلتي إلى أوروبا – فيينا – ج1
رحلتي إلى أوروبا – فيينا – ج2
رحلتي إلى أوروبا – سالزبورغ – ج3
رحلتي إلى أوروبا – زيلامسي – ج4
رحلتي إلى أوروبا – انترلاكن – ج5
 رحلتي إلى أوروبا – لوزان – ج6
 رحلتي إلى أوروبا – جنيف – ج7

بالنسبه لهذه السلسله .. فإنها مكتوبه مسبقاً إلى آخر جزء .. ومحتفظ فيها في الهارد دسك .. وكنت قبل لا انشر أي جزء .. أعيد تنقيحه وأفرز الصور وكذا .. لكن الهارد دسك عندي ضرب .. وفقدت جميع المعلومات اللي فيه .. والتقارير راحت كلها ..وراح اللي أهم منها بعد .. ولا أخفيكم اني حزنت عليها حزن شديد .. وحاولت بشتى الطرق اني استرجع المعلومات المفقوده لكن ما استطعت .. والحمد لله على كل حال .. وبالنسبه للتقارير اللي فقدت .. فقد كانت رحله إلى جنوب فرنسا (نيس – كان – موناكو) ..كذلك رحله إلى مدينة ليون الفرنسيه .. واخيراً رحله إلى ديزني وباريس .. وتقرير خاص بمتحف اللوفر في باريس .. وهذا التقرير بالذات هو أكثر تقرير زعلت عليه .. وكم تمنيت انه يُنشر .. ما أود قوله أن هذا التقرير سيكون الخاتمه لهذه السلسه .. تمنيت اني اكملها معكم .. لكن الله قدّر خلاف ذلك

.. بسم الله نبدأ

الجزء الماضي تكلمت عن أحداث اليوم الأول في جنيف .. في هذا الجزء الخوي قرر يروح ايطاليا وميلانو تحديداً .. عشان يحظر مباراة انترميلان مع اودونيزي في افتتاح الدوري الايطالي .. والخوي لمن لا يعلم .. نصراوي برشلوني انتراوي الميول .. وكان من ضمن احلامه حضور مباراة لبرشلونا او الانتر .. لذلك تم الاتفاق على انه يروح وانا ابقى في جنيف .. لذلك سيكون محتوى هذا الجزء مقسوم لقسمين .. يوم في جنيف ويوم في ميلانو .. الخوي حجز بالقطار من جنيف لميلانو الصباح .. بـ 70 يورور تقريبا .. والعوده في نفس اليوم على الساعه 7 او 8 المساء .. ومدة الرحله 4ساعات تقريبا


ميلانو ايطاليا

اتفقنا أنا والخوي على انه لما يصحى من النوم ياخذ السياره ويوقفها في محطة القطارات في جنيف .. ويركب قطاره ويروح .. عشان اذا رجع يجي في السياره على طول .. وأنا راح ادبّر نفسي .. وهذا ما حصل .. ولما صحيت من النوم لقيت رساله في جوالي من الخوي يقول فيها انه ركب القطار وطالع في الطريق .. وانا متأكد انه وقتها كان متشقق على الآخر .. وهذي محطة القطارات اللي نزل فيها في ميلانو .. تحس انه نازل في ورشة حداده

الخوي طلع الصباح .. ووصل ميلانو على العصر .. ركب التكسي وقال له على السان سيرو لو سمحت ياسطه

DSC04303.jpg

هذا راعي التكسي

DSC04304.jpg

راعي التكسي هذا اسمه توني .. والعياره حقته سوبر ماريو .. عنده مطعم عائلي يقدم فيه اكل ايطالي .. ويكون في نفس الوقت واجهه يعقد فيها صفقات المخدرات وكذا .. واثنين من اولاده قتله مأجورين .. عشان يستعملهم في التخلص من الأعداء .. واخوه محامي .. عشان يطلّعه منها لما تكبس عليه الحكومه .. وجهه من النوع الصغير المدوّر .. وصاحب هذا النوع من الوجيه , يولد مجرم بالفطره .. بعدين ممكن ينصلح حاله على حسب الظروف والمحيط اللي يعيش فيه .. شنبه موجود منذ الولاده وغير قابل للحلاقه .. الكحول داخله ضمن تركيبة دمه الأساسيه بنسبه لا تقل عن 30% .. يعني لو يطيح فيه مصاص دماء كان سكر .. عيونه صغيره لكن نظراته ثاقبه .. والكاريزما حقته عنوانها الرئيسي يهمس في اذنك ويقول .. خلك بعييييييييييد ياشاطر .. الشخص هذا – بعيد عنكم – مطلوب في اكثر من قضيه قتل وسلخ وتهريب وتعذيب وتنتيف .. لكن ما قدروا يمسكون عليه شي

هذي بوابة السان سيرو

DSC04305.jpg

الجو في ميلانو كان شديد الحراره على حسب كلام الخوي .. ويُلاحظ العدد كبير من الجماهير الايطاليه اللي لابسين فنيلة النصر العالمي .. وفيه واحد كاتب ماجد في قلوبنا

المباره حماسيه والجمهور مستمتع والله يخزيك يا شيطان اللاعبين بدؤوا في الاصطفاف والمباراه ستبدأ بعد لحظات .. لكن قبل لا تبدأ المباراة .. المنظمين قاعدين يشاورون اعمارهم .. كانوا طفشانين ويبون يوقفون دقيقة صمت على أي أحد .. شافوا من هنا وهناك .. مالقوا احد من اللي ماتوا مؤخّراً يستاهل .. لذلك صرفوا نظر عن الفكره

DSC04314.jpg

شوف الشعارات والاعلام .. كذلك واضح ان المروّجين قاعدين يلعبون لعبتهم الكبيره

DSC04315.jpg

المنطقه هذي ما يقعد فيها الا مدمن .. لانها منطقة الترويج المفضله .. بما انها صادّه ومحد حولك .. والزوايا فيها كثير .. والمدمنين يقدّرون الزوايا

DSC04316.jpg

لوحة الملعب في خاطرها كلام تبي تقوله

DSC04322.jpg

زانيتي يعطي التوجيهات الاخيره .. وكان ينادي عليهم زملاااااااي زملااااااااي .. اذا غفلوا عنكم .. طبقوا خطّة الكماشه .. واركدوا والعنوا الشيطان .. والله الله في زملاكم ثم هالله الله في زملاكم .. كل واحد يناول لزميله اللي جنبه .. ولحد يضرب الحكم .. واذا خلصت المباراه ترا عشاكم عندي يالربع .. قولوا تم .. انتوا زملاي وتستاهلون .. الله الله

DSC04328.jpg

الزميل كروز متحمس

DSC04326.jpg

وهذي هجمه خطيره

DSC04330.jpg

الزميل فيجو متمركز ويطلب الكره من الزملا .. لكن محد ناول له

DSC04331.jpg

فيجو زعل وقال الشرهه على اللي يلعب مع مبزره .. سود الله وجيهكم من زملا

DSC04332.jpg

الزملا يحاولون يطبقون خطة الكماشه لان زميلهم زانيتي ازعجهم

DSC04334.jpg

مانشيني غير الخطه الى 8 وسط .. و 3 مهاجمين .. وآخر واحد يحرس

DSC04335.jpg

الزميل فيقو انحسر ويبي يروح دورة المياه الله يكرمكم .. والزميل زانيتي يصارخ عليه يقول لا تخرّب خطة الكمّاشه يازميل رقم 7 .. زميل رقم 7 .. يا ورع .. لكن الزميل ما اعطاه وجه

DSC04341.jpg

جماهيرية الفريق وكونه احد اقطاب مدينة ميلانو .. بالاضافه الى فضاوة الشعب الايطالي وارتفاع نسبة البطاله .. كل ذلك أدى الى حضور هذا الكم الكبير من الجماهير المفاصيخ

DSC04345.jpg

احب اطمّن الاخوان الانتراويه ان خطّة الكماشه نجحت .. والزملا جابوا قول

DSC04344.jpg

عموما يا فرحه ما تمت .. لأن المباراة انتهت بالتعادل .. والناس ذبحهم الحر .. وراحوا بيوتهم .. والخوي فضّل انه ينتظر شوي .. ويلتقط بعض الصور .. ولاحظ ان الخوي كان في أقصى حالاته الكرويه .. ما ترك علم الا ولبسه .. ما ناقصه الا كوره يسنّد عليها رجله زي الكابتن ماجد .. تحس انه من هالمهبولين اللي يطوفون العالم على سيكل او منطاد .. اللي معهم اعلام كثيره وملزقين على اعمارهم ستيكرات وطوابع وشغلات

DSC04358.jpg

ولاحظ شال النصر اللي شراه من الفانز ستور حق السان سيرو .. نعم .. موجود هناك .. لانه فريق عالمي وكل العالم تعرفه .. واعلامه تباع في اي مكان في العالم بجانب اعلام ريال مدريد وليفربول ومن على شاكلتهم من الفرق العالميه .. فيما غيرهم اكبر همّه يجيب الدوري السعودي وكنه جايب كأس العالم .. ويتبجّحون بعدد البطولات اللي من بينها بطولة حليب السعوديه وسن توب وسريلاك وتايد وبف باف .. مادري وين يطيحون على هالبطولات .. الظاهر انهم يلعبونها في مواقف بنده .. والمشكله على عدد بطولاتهم لو تجيب واحد من الكويت .. من قريب يعني .. وتسأله عن الفريق هذا .. ماراح يعرفه .. وفيه نقطه ثانيه .. ياخي يموتون على لقب (عميد لاعبي العالم) .. لدرجة ان الفيفا يفكّر يغيّر اللقب الى (عميد لاعبي العالم غصب) .. كذلك يحبون يعدّون اغراضهم وشغلاتهم .. ويروحون يفتخرون فيها .. مثل اكثر لاعب سنتر .. اكثر حارس خبط في العارضه .. اكثر لاعب يطيح .. اكثر لاعب يدور على نفسه .. اكثر لاعب يراكض .. واحس انهم لولا الحيا كان قالوا احنا اكثر نادي فيه لمبات .. اكبر حوش .. اكبر بوابه .. وهكذا

بدأ العاملون في تنظيف الملعب والخوي مازال موجود

DSC04360.jpg

الشباب خلصوا شغلهم ويبون يقفلون الملعب .. لكن مستحين من الخوي

DSC04362.jpg

ياحي من زار وخفف يالخوي

DSC04366.jpg

وهذا الفانز ستور حق السان سيرو .. وطبعا ما يبيع الا لقطبي مدينة ميلانو .. الانتر والميلان .. والنصر بعد .. كضيف شرف عالمي

DSC04367.jpg

الخوي ولله الحمد طلع من الملعب .. واتوقع انه ما طلع برضاه .. ويقال ان فيه ناس شافوه يهرب ووراه واحد يلحقه بالشبشب ويقول اطلع برا يا كلب .. ما علينا .. المهم توجّه للسنتر .. وابي اقول شغله .. انا مارحت مع الخوي ميلانو .. لكن لما شفت الصور .. تأكدت ان ابناء البلد هذي .. الفن يمشي في دمهم .. ابتداء من رعيل الفنانين الاول .. انتهاءاً بالوقت الحاضر .. طول عمر الايطاليين متربعين على قمّة الفن بجميع أشكاله .. وهم أسياده بلا منازع .. وانا من وجهة نظري ان الايطاليين هم اكثر ناس في العالم تفهم في الفن وتتذوقه .. والفن داخل في تفاصيل حياتهم بشكل كبير .. اخليكم مع الصور التي التقطت في الساحه الأشهر في ميلانو

شوف الحمام

DSC04375.jpg

DSC04383.jpg

وعلى حسب ما قرأت مؤخراً .. ان الحكومه الايطاليه اصبحت تفرض غرامه جامده – عباره عن مبلغ مالي وكفّين – على اللي تصيده يطعم الحمام في الساحات العامه .. وأرجعوا سبب ذلك الى ان الحمام صار يخرّب التماثيل والتحف والشغلات الأثريه اللي هم على الله ثم عليها .. لكن المشكله ان فيه ناس يبيعون اكل الحمام هذا للسياح .. وفاتحين بيوت من ورا هالشغله .. لذلك عملوا مظاهره يعارضون فيها القرار .. واللي فهمته بس مو متأكد .. ان الحكومه في الاخير منعت اطعام الحمام وأقرّت العقوبه لكن ما منعت الباعه من بيع اكل الحمام .. يعني تجي في أمان الله وتشتري اكل حمام .. وانت الى الآن في السليم ولا احد يقدر يقول لك شي .. بعدين تتوجه للحمام عشان تطعمه وتعيش اللحظه .. وياغافلين لكم الله .. تاخذ لك مكان مناسب وتتمركز كويس وعين الله عليك ..مازلت في الامان .. دخّلت يدك في الكيس .. جمعت لك كم حبه .. اخرجت يدك من الكيس .. رميت الأكل .. الحين اقدر اقول انك غلطت غلطة عمرك .. وراح تسمع واحد ينادي بـ أعلى صوته .. القواااااات تتقدم .. انتشروووووا .. وانت تتلفت حولك ما تدري وش السالفه ولسان حالك يقول اللهم اجعلو خير .. وتكتشف بعدين ان الحكومه كبست عليك .. وهنا اقدر اقول لك .. راحت عليك ياصاحبي

بالعربي الدعوه منكح يا اخوان .. لذلك ارجوا الانتباه والتأكد من هذه النقطه

هذي في رأيي انها من أحلى الصور اللي التقطها الخوي .. هذا التمثال يشكل عند الايطاليين القدامى آلهة الهياط

DSC04377.jpg

وهذي كاتدرائية الدومو

DSC04384.jpg

الصراحه ما اقدر اقول شي .. تحفه .. بناء عظيم جداً بعظم اهميته لدى أتباع هذه الكنيسه التاريخيه .. الكنيسه هذي مبنيه من القرن الـ 13 .. تعتبر ثالث أكبر كنيسه في أوروبا .. أكثر من 140 رأس مدبّب تزين طرف الكنيسه العلوي وكأنها تاج .. كذلك 2000 تمثال تندمج مع البناء على طريقة المباني الأوروبيه التاريخيه .. أو تنتشر داخل ممراته وغرفه .. ويقولون ان جرس الكنيسه كبر برج الفيصليه .. لا امزح .. المهم البناء يعجز عنه الوصف

الخوي جمع الفنيات كلها بهالصوره .. خلط تمثال آلهة الهياط بالكنيسه .. والظاهر لو أراد انه يصور زيها مره ثانيه ما عرف .. يعني تقدرون تقولون بيضة الديك

DSC04388.jpg

وهذا سوق فيتوريو ايمانويل كما عرفت من النت .. طبعاً ميلانو مدينة الموضه .. وهذا اشهر سوق في مدينة الموضه .. واذا بتروح ايطاليا لا تشتري الا من ميلانو ومن هذا السوق بالتحديد .. التمثال في الصوره اعجبني مره .. واعجبني اكثر موقعه .. وتمنيت اعرف لأي شئ يرمز

DSC04374.jpg

وهذي صوره أخرى للسوق

DSC04390.jpg

شوف التصميم الداخلي للمبنى .. وشوف كيف انهم مهتمين بالتفاصيل اهتمام كبير .. شوف التماثيل بين الشبابيك .. وشوف اللوحه اللي فوق في الزاويه .. وشوف التمثالين على يمين اللوحه ويسارها .. وشوف الزخرفه اللي على القوس فوق اللوحه .. يعني أماكن تتضائل احتمال انه احد ينتبه لها ويشوفها .. ومع ذلك يعطونها حقها بشكل كبير جداً .. بل تكاد تكون أجمل ما في البناء .. وأنا صحيح اني اتكلم عن هذا المبنى تحديداً .. لكن هذا الفكر المتّبع في البناء – أي الاهتمام بالتفاصيل بغض النظر عن موقعها او حجمها , وإضفاء اللمسات الجماليه – موجود في كل المباني التاريخيه او القديمه في أوروبا

DSC04392.jpg

وشوف الأرضيه بعد من الرخام المفتخر

DSC04409.jpg

وهذا تمثال دافنشي .. مافيه منه الشخص هذا .. بتاع كلو .. فنان ومخترع وله في التشريح والهندسه الميكانيكيه و و و .. يعني لو عاش شوي كان يمكن يصير طيار

DSC04403.jpg

صور عامه للمدينه

DSC04401.jpg

DSC04402.jpg

الخوي مع شارون

DSC04414.jpg

لما قرب وقت رحلة عودة الخوي (ميلانو – جنيف) .. أخذ تكسي ورجع لمحطة القطارات .. وقعد يتفاهم معهم بلغة الاشاره الين ركبوه قطاره .. ووصل الفندق على الساعه 12 او 1 بالليل تقريباً

هذا ما يتعلق برحلة الخوي لميلانو

اليوم الثالث من جنيف

ابي اتكلم عن نقطه في البدايه عشان تكونون بالصوره .. لما كنت صغير كنت أروح مع ابوي المسجد عشان نصلي الجمعه .. وفي كل مره كنا نروح فيها .. كنت أضيع .. ويقعد ابوي يدوّر علي, واخوي الكبير معه .. والمشكله اني ما كنت أنتظر في مكاني الين يحصّلوني .. بل كنت أروح أدوّر عليهم انا بعد .. أو أدوّر على السياره .. لذلك يستمر البحث مده طويله ولا كنا نرجع الا قريب العصر .. وكان الشئ هذا يتكرر كل جمعه .. واستمر عدة سنوات .. لدرجة انه تحول لـ نشاط اسبوعي .. يعني امي لما تكون قاعده مع ابوي صباح الجمعه على القهوه .. تسأله وين بتروح اليوم؟ .. يقول بروح أسلم على فلان وأمر على فلان في المستشفى .. وأرجع البيت آخذ العيال ونروح نصلي الجمعه .. بعدين أدوّر على فهد وأجيكم للغدا .. كما أن ابوي فقد التدرّج المنطقي الذي يأتي في مثل هالحالات .. وصار التدرّج على هذا الشكل .. نروح للمسجد ونصلي .. بعدين نقعد شوي .. ولما يطلعون أبوي واخوي , ما يتوجهون للسياره وينتظروني , واذا تأخرت يقلقون بعدين يبدؤون بالبحث .. لا .. صار لما يطلعون من المسجد مباشرةً كل واحد منهم يغطّي منطقه , ويروحون يدوّرون علي .. لأني أكيد بكون ضايع .. وبعد فتره صارت المسأله تمشي في دمهم .. وصاروا يسوونها تلقائياً .. لدرجة اني مره ما جيت معهم المسجد .. فـ لما طلعوا صاروا يدورون علي الى المغرب .. وانا ما جيت معهم أصلا .. لا أمزح .. لكن الصحيح ان المسأله هذه ظلت تلازمني إلى الآن ولو انها أقل وطأه من أول .. لذلك أنا أصنّف نفسي من الناس اللي يضيعون بسهوله .. واحتمالات ضياعي في أي مكان هي الأعلى في العالم .. يعني في أي لحظه ممكن أضيع وما تلقاني .. ولم أستطع إيجاد سبب منطقي لذلك .. وفي الأخير اعتبرتها كـ نقطة ضعف لا أكثر

الخوي عكس ذلك تماماً .. انسان تقدر تقول لاقي نفسه تماماً – ماشاء الله عليه – .. مستحيل يضيع في مكان .. قدرته في تثبيت الأماكن عجيبه وتتعدا حدود المنطق .. تحس انه جهاز ملاحه متحرك .. ما شاء الله عليه مره ثانيه .. وفي هذه المسأله أنا أعتمد عليه اعتماد كلي .. لذلك لما غاب عني عانيت كثير من مسألة التوهان هذي

نفس اليوم اللي قضاه الخوي في ميلانو .. أنا قضيته في جنيف .. ولما صحيت الصبح حصّلت رساله في جوالي منه .. يقول انه ركب القطار وفي طريقه لميلانو.. طلبت فطوري للغرفه وافطرت واخذت لي دش وبدلت ملابسي واخذت اغراضي ونزلت .. رحت للاستقبال و سألتهم عن أقرب محطة نقل عمومي تصل لـ جنيف .. طلّعوا لي الخريطه وأشّروا على المحطه اللي كانت على الحدود بين المدينه الفرنسيه اللي انا فيها وسويسرا .. وكانت محطة قطارات .. أخذت شنطتي واوراقي ومسكت الخريطه ومشيت .. وكانت المسافه بعيده شوي اذا بتقطعها مشي .. وبمساعدة الخريطه استطعت أن أصل للمحطه .. تجاوزت نقطة الجوازات ووقفت عند القطار .. وكان فيه زي الجهاز تقطع منه التذاكر .. قعدت أطالع فيه وما عرفت شيء .. مع ان الشرح كان واضح بس أنا حبيت أتأكد .. لذلك وبمساعدة شخص فرنسي استطعت قطع التذكره .. وركبت القطار وتأكدّت من السواق ان القطار هذا متوجه لـ جنيف .. وصلنا للسنتر وكان اليوم هذا عندهم اجازه نهاية الاسبوع وكل المحلات مقفله .. لما نزلت مشيت ولفيت المدينة على الاقدام .. وكان فيه أنشطه رياضيه وعزف ووناسه .. وهذي الصور

هذي أول ما نزلت من القطار في وسط جنيف

SSA40770.jpg

وهذه الصور التقطت أثناء التجول .. غالباً ما راح تشوف سيارات واقفه داخل المدينه .. خصوصاً في المنطقه التجاريه والسياحيه .. لأن تصميم هذه المنطقه يدعم المشاة بشكل كبير .. والسيارات مخصصين لها مواقف خاصه غالبا تكون تحت الأرض أو في مبنى خاص .. أو على أطراف الشوارع خارج منطقة المباني التجاريه او على جانبها .. لكن فيه ترام تقدر تستخدمه في التنقل

لاحظ معي كيف ان المدينه نظيفه جدا .. والناس هنا يعتبرون الشئ هذا من الحضاره .. يعني لما يكون جزء من ثقافتك انك ترمي النفايات في أماكنها المخصصه , هذا يعتبر شئ مميز .. كذلك البنايات في غاية الروعه .. كلها تقريبا وبدون استثناء .. وفيه اهتمام في أدق التفاصيل بالنسبه لـ تجميل المدينه .. يعني ما تلاقي زاويه الا مسوين فيها شي ومعطينها شكل حلو .. على سبيل المثال اللمبه اللي في الصوره بالأسفل .. يعني ما حطوا أي شئ يؤدي الغرض وخلاص .. بل تم اختيار ما يتناسب شكلاً ولوناً وتصميمأ مع المحيط الخراساني .. ابتداءاً من لون الاناره مروراً بالعمود وانتهاءاً بالقاعده .. وهذا مثال بسيط ممكن تقيس عليه جميع التفاصيل الأخرى .. لذلك تظهر المدينه كأنها لوحه متكامله رسمها وأبدعها شخص واحد

شوف شبكة الاسلاك المعلقه .. هذي عشان اذا واحد سكران مثلا .. طاح من السطوح او من البلكونه او من طياره او اللي هو – بعيد عنكم يعني – .. تمسكه هالاسلاك عشان ما يطيح على الارض .. وتعطيه شوط كهرب من ابو 1000 فولت .. اللي يشغل حاره كامله .. الشوط هذا كفيل بأنه يفوّق السكران وفي نفس الوقت يوجه له رساله تقول لا تتعودها مره ثانيه

هناك عمق ثقافي وتاريخي يتم إظهاره للسياح بشكل حضاري من خلال التماثيل والأشكال والمنحوتات الفنيه التي تنتشر في المدينه .. ولا تخلو مساحه من واحد أو اكثر من هذه التماثيل .. كلها تحكي تاريخ البلد أو تاريخ أشخاص معينين أو أحداث كان لها تأثير كبير .. بالإضافه إلى ذلك فإن وجود مثل هذه التماثيل يزيد في جمال المدينه وجاذبيتها

الجمال الطبيعي له حضور وسط هذه اللوحه الخراسانيه .. إما بشكل طبيعي أو بتدخل خارجي كما في الصوره بالأسفل .. حيث تجد على جانبي الطريق أحواض زراعيه .. والأحواض هذه برضو تتكامل كـ شكل خارجي مع المحيط .. وبالنسبه للجمال الطبيعي فإنه لا يتم المساس به مالم يشكل عائق .. لذلك حصل فيه توازن نوعا ما

باختصار اقدر أقول ان دافع الضرائب في هذه البلد خصوصاً , وفي عامة البلدان الأوروبيه عموما يجد مقابل لما يدفعه من جميع النواحي .. ولو اني أوروبي كان دفعت الضريبه وأنا مرتاح البال والخاطر دام هذا المقابل .. على عكس ما نراه في كثير من بلداننا العربيه

ما راح اتكلم كثير عن وين لقيت نفسي بعد هالجوله .. وعن الى اي درجه كنت تايه في المدينه .. لدرجة اني حسيت نفسي وصلت لمدينه ثانيه مشي .. لكن بقول تخيل انك جبت هندي توه جاي السعوديه وفكيته في الرياض الصبح .. وخليته يمشي على رجوله .. ورجعت له المغرب .. يعني لو نزلته في النسيم .. كان بيمديك تلقاه في البطحا .. المهم استطعت العوده لمحل ما نزلت .. وركبت القطار اللي كانت محطتي فيه هي آخر محطه .. أي الحدود السويسريه مع فرنسا .. وتهت مره ثانيه في القريه .. ووصلني فرنسي راعي دباب .. دخلت الفندق ونقنقت على اللي في الثلاجه .. وما حسيت بنفسي الا انا نايم

في الأخير أكرر شكري لكل من شجعني وكل من راسلني وعلق على مواضيعي .. واتمنا اني قدمت شي يليق بقراء هذه المجموعه .. وأرحب بأي ملاحظات أو استفسارات

والسلام عليكم ورحمة الله وبركاته

 

مقالات ذات صلة

‫35 تعليقات

  1. مشكور على الموضوع حلو مرة:D:) بس ياريت تقولنا كم كلفتك الرحلة ومن أي خطوط رحت يعني كذا علشان تفيدنا ياالأخو حتى أنا بسافر 8)8)8)8)8)

  2. تقريرك رائع بس لو مايكون فيه تجريح للانديه الاخرى لان حسيت من كلامك فيه نقص في العقل ياليت تكبر عقلك بدون ما تخرب تقريرك تقبل نقدي ومروري

  3. مشكور يالاخو على التقرير … بس وراااك حااااقد يعني جلست تعبر عن فريق وسلختهم سلخ .. واشكرك مرة اخرى .. بس نصيحة .. اذا وضعت تقرير لاتكتب عن فرق .. عشاان مايصير تنفير للاعضااء او مشااكل وعنصريات ..8)

  4. التقرير رائع ولاكن ارجوا من المحترمين عدم التجريح باي نادي (المحترمين فقط)

  5. أبو ناصر ومشعل واللي بعدهم هذا بدال ما تقوولون للأخ شكرا بصرااحه أرحمكم على كبر العقل اللي عندكم وأنت يا أخ فهد من جد الموضوع أعجبني بالمرررره ولا تحرمنا من مواضيعك المميزه وبالذات لأنني مسافره إن شاءالله إلى ميلاااانو فتحمست من بعد الموضوع

  6. وش علاقة الموضوع بالنصر اللحين !!! شحطت فينا شطحه مالها سنع وقمت تسب في ذاك النادي سب بدون سبب او مبرر !! مشكور اخوي على التقرير الرائع بس تمنيت انه بدون شوائب

  7. والله التقرير كويس بس خربه شيئين : 1- التعصب الي يدل على الحقد الدفين 2- كثر الصور في المكان الواحد

  8. الزعيم معقدكم:$ حتى وانتم في ميلان شاغل بالكم ما اقول الا الله يشفيكم اجل شال النصر وفنيلته يبيعونها في ميلان:$ تضحك على مين يالحبيب وثاني مره بتكتب موضوع تكلم عن الموضوع نفسه ولا تخرج عن محاوره ok :> تحياتي لكل عاقل 8)

  9. قال ايش قال شال النصر يباع بإيطاليا ههههههه يبوي تضحك على مين انت !! للدرجه هذي تستخف بعقولنا .. الهلال محرق رزك وانت رايح تتمشى بإيطاليا ههههههه انت تقول غيره اكبر همه يجيب الدوري السعودي !! ونادي النصر وش اكبر همه !! هو الفوز على الهلال اتمنى ياخوي تبتعد عن التعصب في مواضيعك .. صدقني بتخسر الكثير ياليت تتعلم من بعض مواضيع الرحلات اللي بالقروب عندك الاخ رسلان والاخ فايز والاخ المايسترو .. يوصفون رحلاتهم بشكل جميل بعيد عن الانتقاص من الاخرين تحياتي لك

  10. اقتباس : ———————————- والمشكله على عدد بطولاتهم لو تجيب واحد من الكويت .. من قريب يعني .. وتسأله عن الفريق هذا .. ماراح يعرفه ———————————————- انا كويتي .. واللي اعرفه ان الهلال اكبر نادي واقواها بالسعوديه وهو زعيم الانديه الاسيويه .. حقق 47 بطوله بينما النصر 19 بطوله ومن 10 سنوات ماحقق بطوله على مستوى الكبار … بينما الهلال حقق بالاربع سنوات الماضيه 7 بطولات هذا ناديك العالمي ؟؟ اجل لو مو عالمي وش بيصير

  11. هههههههههههههههههههههههههههههههههههههههههههههههههههههههههه الله يرجك فهد اقسم بالله ضحكت ضحك .. والله تقرير رهيييييييب .. ونتف بيديك ورجليك .. مع اني هلالي

  12. عيب يا اخوي اترك التعصب الاعمى عنك حتى بايطاليا حارق دمك الزعيم ….. كبير يا زعيم

  13. هههههههههههه حلوة بطولاتهم في مواقف بنده ….. بس ترى فيها تعصب زايد شوي وانا اخوك .. محب نصراوي

  14. الاخوان الهلاليين ليش معصبين .. انا ماجبت طاري الهلال ياخي .. ياخي دايم تطبون فيني اذا مدحت النصر وما جبت طاري الهلال .. يعني بالله لو يجي واحد غريب ويقرا الكلام ويرجع ويقرا الردود .. بيقول انه فعلا الهلال كذا .. اثبتوا على نفسكم يا اخوان بدون ما تدرون .. حاشاكم يعني الى الاخوان اللي سبوا وشتموا ووصفوني بنقص العقل وعدم الاحترام والتخلف العقلي والسماجه .. والاخوان اللي خرموا عيني وضربوني بالشلوت .. والاخوان اللي سبوني من خلف الشاشات .. والاخوان اللي ارسلوا لي ايميلات .. والاخوان اللي اتهموني بتدبير مؤامره حاقده لتدمير الهلال ومحاربته اعلاميا .. اقول لهم الله يسامحكم .. الاخ غير البشر .. اسعدني الحقيقه مرورك بشكل كبير .. وفي نفس الوقت احزنتني كلمة تستخف بعقولنا .. ياخي ما استخفيت بعقلك ولا شي .. يعني بالله عليك هل من المنطق انو احد يصدق ان فنايل النصر او الهلال او غيره .. تباع في السان سيرو!! .. يعني واضح اني قلت كذا استهبال .. ولا من اسلوبي اني استخف بعقل أي احد .. وبعدين انت تقول ابعد عن التعصب .. وانت ردك كله تعصب .. عموما انا مازعلت الا من كلمة تستخف بعقولنا .. والا الباقي عادي :$ .. والاخوان اللي ذكرتهم على راسي كلهم ونتعلم منهم .. ارجع واقول انه اسعدني مرورك التهزيئي .. واحب اقول اني من المتابعين لمواضيعك الاخ الكويتي .. أنا ما جبت طاري الهلال .. انا قلت (الفريق هذا) .. لكن عموماً مشكور على المعلومه .. والهلال يستاهل اكثر من كذا .. الله يبلغه العالميه ان شاء الله .. لا تنسى تبلغ تحياتي لكل اهالي الكويت الحبيبه .. ولعيال خالاتي عندكم .. وابي ازوركم في فبراير ان شاء الله .. يامرحبن بك والله الاخ دوريتوس .. ياخي اللي معنا شال النصر .. يعني النصر اللي شاغل بالنا في ميلانو .. مو الهلال الاخ وش دخل النصر في الموضوع .. ياخي شلون وش دخل النصر .. اذا ذكرت الملاعب العالميه والفرق العالميه لازم يذكر الفريق هذا .. عموما مالومكم .. انكم ما تعرفون وش يترتب على العالميه

  15. في الاخير يا اخوان انا ترا احب اتحرش واضايق وكذا يعني .. خصوصاً في هذه المواضيع .. بثاره يعني .. وما كتبت كلامي عن النصر وكذا الا وانا عارف انه بيجي هواش وكذا يعني :$

  16. الاخوان جميعاً .. للاسف ردودي ما توصل كامله لذلك حسيت انها بدال ما تكحلها اعمتها .. عموما ناسي وش كتبت لكن اعتذر لمن شال في خاطره وهذي بوسه على راس كل واحد منكم .. الهلال كبير والانديه كلها كبيره ولها احترامها .. ادعوا للمتوفي يا اخوان واكسبوا الاجر وخلوا النصر والهلال

  17. B آبوي وآلـاـه موضوعـك روعـه بس خربّـه تعصبـك .. وآقـولك عـاـى ذآ آلطريقـه بتفقـد آلكثيـر مِـن متـآبعينـك وآتوقـع إني بـ آكون من ضمنهم عـاـى ذآ آلآسـاـوب .. ولكن ذآ آلشيء مآ يخـاـيني جـآحـد ولآ آشكك عـاـى موضوعـك .. وليتك تقتدي بـ آلمآيسترو . ورســلآن .. شكـراً .. (( وردهـ ))

  18. تكتب عن النصر وتجرح في الفريق المنافس للنصر وتقول أنت ما قلت الهلال مثل اللي يمدح الإتحاد ويقول الفريق الثاني بطولاتهم جايبينها بالحظ راح يكون من الفريق الثاني يا شاطر أكيد الأهلي والله ما حد مثير التعصب الرياضي إلا أنت واشكالك الدعوة رياضو ووساعة صدر وتراكم صجيتونا عالمي وعالمي أشوفه مثل نادي الإتحاد يوم مثلنا شرفنا عشان كذا ما راح تحققون ولا بطولة مدرسية حتى لأنكم تطاعلون الأندية الثانية وتشككون في بطولاتهم وأنتم محلك سر

  19. اسمعني يافهد…أنا متابع لمواضيعك..هي رائعه و تقاريرك حلوه لكن الله يسامحك مالك حق تسب الفريق المنافس على قولتك يعني ادري انك نصراوي أنت و صديقك لكن هذا مايسمح انك تتكلم على الهلال بهذي الطريقه…لك كل الود و الإحترام الله يسامحك….ورده لغير البشر و ورده ثانيه لك يافهد

  20. 😀 صراحة أول شي قبل أقرا تعليقك واللي ترمي فيه على الهلال وواضح ومايبي لك تبرر قررت أمسح ايميلك ولا أكمله .. لأن تعليقك أساء للصور .. وعن بطولاتنا ما بغت تجيكم جلطة من كأس فيصل والفرحة امحق عالمية .. والهلال أكبر منكم ..وإذا شال فرحان فيه حضرت المباراة .. الهلال لعب مع الإنتر بكبره .. وخم شلك خله لك 😀

  21. يا اخواان الله يهدييكم ,, وش فيكم عالرجال!! الرجاال يمزح ويستهبل ويضحك وضحكناا معه صراااحه وكل اللي قاله واضح انه مزووح واضافة فاكهه ونكهه على التقرير يعني انا هلالي ولا اخذت الموضوع جد الله يهدييكم يااخوان لهالدررجه يعني وصل التعصب,, يعني لوو يغلط واحد وقاال كذ1 وكذ1على الفريق الفلااني,, كنه غلط على اهله!! عالعموووم يعطيك العاافيه يافهد على سلسلة التقراير اللي طلعتهاا,, ولاا ودنااا انك تنقطع ,, حتى لو من البطحاء يااشيييخ بس صرااحه ساالفة السووواق روووووووووووعه الله يرووجك بس ضحكت من قلب حسييت انه من اتباع قوود فاذر خخخخخ سلااام

  22. شي حلــو يوم ان الواحد يتعرف ع انظمه الدول الي برى ، ويعرف قوانينها يعـطيك الف عافيــه اخــوي واول مشاركه اشارك فيها واني تابعت كل الاجزاء ورديت مره ووحده وابيك تبوس راس خويك عشاني خخخخخخ يعـطيك العافيه تقبل مروري المتواضع

  23. دايم الهلال شاغلهم في حلهم وترحالهم !! ابوفهد يمدحون أبها !!ّ

  24. :$ ليش البعض زعل وقال ليش كل هذا الحقد عادي موضوع رائع وجميل بعدين سبحان الله بعضهم عرفو منو يقصد والي على راسو بطحى يتروش :$:$:$:$:$:$ بعدين يقولون الحقيقه مؤلمه فهد السعوديه والله موضوعك رائع واي عضو سبك فالمسبه ترجع له

  25. يعطيك الف عافيه على الموضوع ونا مني ضايف شي عن اللي ضافوه الشباب اللي فوق من سب …..الى مدح

  26. ولاحظ شال النصر اللي شراه من الفانز ستور حق السان سيرو .. نعم .. موجود هناك .. لانه فريق عالمي وكل العالم تعرفه .. واعلامه تباع في اي مكان في العالم بجانب اعلام ريال مدريد وليفربول ومن على شاكلتهم من الفرق العالميه .. خخخخخخخخخخخخخخخخخخخخخخخخخخخخ نكته لا وش نكته إلا صاروخ الموسم يا حليكم شعوركم بالنقص يخليكم تطلعون بطلعات حلوة

  27. @@@@@@@@@ @@@@@@@@@ يعطيك العافيه تقرير حلوووووو بس اكتشفت شي صراحه انه النصراوي مهما كان مشجع بسيط او مثقف او دكتور او انسان لف دول العالم كلها يضل الهلال ازمه نفسيه تلاحقه هههههههههههههههههههههههههه ياخي ارحم نفسك رايح ميلانو وتفكر في الهلال ((( حسبي الله عليك يا الانتر لو انك لاعب بالطقم الابيض كان ما تذكروا عقدتهم الزرقا ههههههههههههههه )) بس نرجع ونقول تقرير حلووووووووووووووووو عقبال ما نشوف تقريرك عن السودان فيه معلومات تهمك هناك كثير هـهـهـهـهـهـهـهـهـه سلااااااااااااام

  28. الى جميع الاخوان الهلاليين اللي على راسهم بطحا .. انا مادري وشهوله شابين علي .. يا اخوان نحن كنصراويين لا نحمل ضغينه على احد .. والى جميع الاخوان اللي تعدوا علي شخصياً .. ابي اقول انه ماكان فيه داعي انك تغلط على انسان عشان سالفة هلال ونصر .. الى جميع الاخوان اللي قروا الموضوع ولما وصلوا لفقرة الهلال والنصر وقفوا ومسحوا الايميل .. ابي اقول لهم اني حزنت لذلك .. لاني اكيد ابي الناس تقرا موضوعي .. وحزنت اكثر لما عرفت انه فيه ناس ممكن انها ترفض او تقبل او تكره او تحب او تفضل او تمسح او تكنس بناءا على الميول الرياضي وما شابه .. الى الاخوان اللي يردون علي برد كله تعصب بعدين يقولون اني انا متعصب وينصحني بالابتعاد عن الشي ذا .. اقول له مشكور وعلى راسي الى الاخ النصراوي اللي يقول انه ماراح يتابعني مره ثانيه لان اسلوبي مهب كويس وكذا .. اقول له ان الشئ هذا يحزنني ويحز في نفسي وياليت تتراجع عن قرارك وابشر بالحق الى الاخ ابو عبد العزيز .. ماعندي شي اقوله لك لاني ما فهمت ردك .. لكن حياك الله ونتشرف فيك والحقيقه يا اخوان انكم شبيتوا علي .. وبعضكم غلط علي وكذا .. صحيح انه فيه تاريخ اسود للهلال مع النصر .. وصحيح انه في تراكمات على مر التاريخ بين الفريقين وكان للاسف ضحيتها الهلال .. وصحيح ان النصر عمل كل شي يتمناه اي مشجع من فريقه .. وكانت اكثرها على حساب الهلال .. وصحيح ان رجعة النصر للبطولات كانت برضو على حساب الهلال البطل .. وصحيح ان الهلال من طاح النصر الى الحين .. ماتعدوا عدد مرات الفوز على النصر الا الموسم الماضي او اللي قبله .. يعني الهلال احتاج 10 سنين او اكثر وهو يستغل النصر الطايح عشان يطاوله او يتعداه .. وهذا شي طيب يا اخوان ونشجعه .. برضو التنافس مطلوب .. لكن يا اخوان هذا حال الكوره يعني .. ومافيه داعي للزعل .. وبعدين يا اخوان رجاءا لا تتدخلون بيننا وبين الانتر .. احنا فرق عالميه ونفهم بعض وفي معسكر واحد يعني .. وانتوا خلوكم في اللي انتوا فيه والله يوفقكم ويوفقنا بوسه على راس كل واحد منكم

  29. شفيكم ..؟؟:~ انا اشوف انا اشوف الموضوع ما يستاهل كلهاعصبيه معني والله مادري وش قال.. بس والله استغربت من تعليقاتكم … المهم التقرير يجنن يعطيك العافيه :$

  30. ياخي للأسف والله إنه يحزنني أن تفقد موضوعك بريقه .. فمجرد سفرك وتسجيلك لتلك اللحظات شئ جميل ومجهود يستحق الشكر والثناء .. وأنا أشكرك وأثني على موضوعك لكن يا عزيزي أتمنى أن تكون على ثقة بأني لست من مشجعي كرة القدم أو الرياضة للأسف .. وهذا عيب في شخصي .. ولكن أتمنى أن تضع الأمور في موازينها وأماكنها الصحيحة .. وأنت شخص عاقل بالغ ولست أكثر منك معرفة ً وإطّلاع .. لذلك ومن كلامك في الإيميل ومن ردود الإخوان ومن ثم ردك عليهم .. أرى بأنك مخطئ وتدين لـ ( نفسك ) بإعتذار .. لذلك فأنا من هذا المنطلق أتمنى أن تصلني إيميلاتك القادمة بأذن الله متحليّة بالإبداع وليس فيها إنتقاص من أي شخص كائنا ً من كان ..

  31. اللهم اغفر لـ ابو سعد وارحمه , وعافه واعف عنه , لقّه الأمن والبشرى والكرامة والزلفى , اللهم إن كان محسناً فزد في حسناته , وإن كان مسيئاً فتجاوز عن إساءته , اللهم اغسله بالماء والثلج والبرد , نقه من الخطايا كما ينقى الثوب الأبيض من الدنس , أبدله أهلاً خيراً من أهله , وداراً خيراً من داره , وجيراناً خيراً من جيرانه , اللهم لا تحرمنا أجره , ولا تفتنّا بعده , واغفر لنا وله.. جزاك الله ألف خيييييير والله يجعله في ميزان حسناتك ياااارب .. ومشكوووور ع التقرير الحلووو .. بصراحة استمعت كثير وان شاءالله ازور ايطاليا قريب .. الله يعطيك العافيه اخوي فهد ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى