رسائل المجموعة

ذكرياتي يوم أني قزم ..

السلام عليكم ورحمة الله وبركاته ..
أما بعد أنا حالتي حاله .. ومعاناتي لاتقف عند أي حد ..
شوفوا وشي .. وتحمدوا ربكم على العافية ..
بصراحه طولي مقلقني هاليومين مره .. خصوصاً عقب الي صارلي امس .. تخيلوا ولد عمتي الي بسادس إبتدائي .. أمس يوم جا يسلم علي .. جثى على ركبتيه عشان يجي طولي ..
توني استوعب وش قد أنا ( . ) بالحياة ..

ولعل هذا الموضوع تنفيس عن ما بداخلي من كبت قصري ..

ثمة أمراً غريب..!! ماهذا الكائن الغريب؟! .. عجبي..!! اهو انسان؟!
هذي الكلمات نطقت بها الممرضه الفلبينيه اول ماشافتني .. ومن يومها وانا داري اني عاهه اللهم ياكافي .. يعني فلبينيه تقول عني كذا وش خلت لرجال باقي الدول؟! .. من يوم سمعت كلامها وانا داري ان عمري بيآصل 21 .. وللحين اركب سيسي .. للحين ادخل ملاهي الروضه مع امي وخواتي .. للحين شغالتنا تدخل معي للحمام .. للحين اركب سيكل ابوثلاث كفرات .. للحين اركب ورى مع السواق .. للحين ألبس ثياب الدفه .. للحين ما اعرف شي اسمه مقوصر .. للحين اختي الكبيره تنقي لي ملابسي .. للحين ابوي يشيلني ويحطني على فراشي إذا نمت بالسياره .. للحين الشغالة تربط جزمتي .. للحين آخذ معي خبزة جبن وعصير الربيع حتى وأنا بالجامعه .. للحين ابوي يسكتني بريالين إذا زعلت .. للحين امي تقولي متى تكبر واشوفك رجال .. للحين شغالتنا تنام معي بنفس الغرفه .. للحين للحين للحين للحين .. طبعاً تطول اللحينات لين بكره .. أن عانيت في حياتي وما زلت أعاني .. فمثلاً البارح كنت رايح الصبحية لغرناطة اشتري جزمة الله يكرمكم .. فدخلت مع البوابة متجه لمحل ( ألدو ) .. وأنا في طريقي للمحل .. فجأة مسك يدي السكيورتي .. وقالي وش أسمك ياحبيبي؟! .. الشهادة لله لوهله أنا شكيت انه يبيني في شي شين .. لكن سرعان ماتذكرت اني عفط .. فسميت بالله عليه عشان يبعد .. لكن ظل الرجال يبربر .. أنت جاي مع بابا؟! .. ولا جاي مع ماما؟! .. وأنا ابي اسحب يدي من يده لكن حيل الله اقوى .. شوي خذاني لغرفة الأمن وياليت محد يسميها قسم الأمن .. لأن هذا موضوعي وأنا حر بالي اكتبه(ينافخ القزم) .. شوي ويقعد ينادي بالمكرفونات .. يوجد بقسم الأمن طفل تائه <- يقصد غرفة الأمن .. المواصفات شين وشكل أهله متقصدين يضيعونه .. فقع خوية الي جنبه ضحك .. قال شكلك قلت ان اهله متقصدين يضيعونه عشان يعرفون انفسهم على طول .. خطمت عليهم واقعد احلف لهم اني انسان واعي لما يدور حولي ومنيب ضايع .. وبعد اخذ ورد .. اقتنعوا اني بالغ وكبير وفي الحقيقة ماهضموا الأولى .. لكن زي ماقلت موضوعي وأنا حر .. اعتذروا مني ورحت في حال سبيلي للعودة للمحل الي ابي اروح له .. ما ان دخلت المحل .. إلا ويخطم علي الهندي مافيه جزم ولادي .. واسفهه واقعد ادور لي جزمه وهو جنبي .. يحلف ان لوفيه مقاسي في ذا المحل .. انه يترك الشغل .. عقب الحلف اقتنعت انه صادق .. طلعت من المحل وأنا اجرجر رجولي .. وابكي بحسرة على حالي .. وكل الي يمر على بالي تلك الأثناء .. جموع من ربعي رايحين لنفس المحل وقايسين كل الجزم الي فيه الله يكرمكم .. ويقولون ياصديق هذا جزمه ضيق .. ويزيد بكائي ونحيبي .. وأنا مغير اتعبر واكتم الصرخات والطعون الي تأتي ورى بعضها .. كنها حبوب سبحه منقطعه .. لأني وأنا طالع من المحل .. إلا ويجيني هندي يشيل بلونات يقولي ابغى بلونه؟! .. انا جيب اثنين بخمس ريال .. وصديت عنه متجه لسيارتي(ادري انكم منتم مقتنعين ان معي سيارة .. بس تكفون حاولوا ) .. وأنا في طريقي إلا العودة إلا سيارتي إلا وامر من عند محل نسائي وينتق علي بزر طالع من المحل .. ومعه كورة هوا .. يقولي خل نلعب مع بعض <- والله ياذي جامده .. هذيك اللحظه كنت اتمنى ان امي ماولدتني .. عفوا كنت اتمنى اني ماطلعت نفره في يد امي .. وقشعتني وحطتني بمويه دافية يومين .. لين كبرت .. كم تمنيت اني اكون طفل سوي .. افرح إذا قالت امي كما باقي الأمهات .. ياوليدي أنا احبك .. وشلون ما احبك وانت طالع من هالبطن؟! .. في الحقيقة أخواني انا من عرفت نفسي وأستوعبت اني قزم .. وأنا اتمنى ان امي مانفرت بي <- وين هو له؟! اهه اهه اهه .. تحملوا مصالتي رجائن .. فمازلت انتحب واتحسر على مجد تليد .. نعم مجد تليد .. مجد ابوي وعماني واجدادي .. أنا عار على العائلة .. كلهم عمالقه إلا أنا .. حتى أني قلت لأبوي ذات ليلة .. يبه ليه أنا من بدكم قزم .. قالي ياقزم كل تبن تراك جاي بالغلط وبدون نفس .. عشان كذا طلع فيك خلل .. قلت له وشلون .. قال الظاهر ذيك الليلة امك كانت على جريف .. وما أن لامست يدها .. إلا وخرجت أنت للعالم الخارجي .. اللهم إني استغفرك واتوب إليك <- فكر بالإنتحار وهو يكتب الموضوع .. هذي بعض الأمور الي تحدث معي .. وما خفي كان اعظم .. لكن اذكر ذات ليلة كنت طالع مع عدد من الزملاء وكنا نتسامر .. وفجأة نتقت عليهم وقلت لهم ياعيال ورى مانسافر لكوريا؟! .. ولا هونج كونج؟! .. امصلهم قال لا يارجال مالها داعي نضيعك بين ذا القزمان .. همن وش يفكنا من امك؟! .. خنقتني العبره بشدة .. إذ اني اقترحت عليهم تلكم الدولتين .. عشان مايزلق علي واحد منهم بمثل هالمصاله .. لكن عمري ما تخيلت اني اقصر من الكوريين والهونج كونجيين بعد .. خويي بذيك الكلمة .. هدم اغلى حلم كان عندي .. الحلم الي كان يخليني اتحمس وانا ادرس .. يعني قسم بايخ مثل السياسة .. وش يخليك تتحمس وانت تدرس فيه؟! .. الإنسان السوي مايدخل هالقسم ابد .. انا دخلته عشان اوصل للحلم .. حلمي كان اني اتخرج وترسلني الداخلية اشتغل في سفارتنا هناك .. واستمتع بالذب على الكوريين والهونج كونجيين .. ولكن انهدم الحلم .. كأنهدام السد العالي الي بمصر لو تجيه قنبلة من إسرائيل .. انتم تخيوا الفوضى الي بتصير تلك اللحظة .. كل هذه الفوضى سجلت دخول في قلبي .. واصبحت من المتواجدين الآن .. والي بيزلق ويقول ياملف طيب بالنسبة للمويه الي بتبعثر مصر بسبة انهدام السد العالي .. وشلون بتتواجد عندك؟! .. احب اقوله عيوني ذرفت دموعاً ودماً .. واصبحت ممزق الأشلاء .. هل تخيلتم معاناتي؟! .. صدقوني معاناتي لم تقف عند هذا الحد .. ولن تقف عند أي حد .. فشخص مثلي يتألم من مجرد .. خروجه للشارع .. من مجرد اختلاطه بالناس .. لعلي اذكر لكم قصه اخرى هي حقاً سبب آلامي .. قبل ستة اشهر كنت قد ذهبت مع اخي ووالدي لكي نخطب لأخي الكبير .. المهم أني ذهبت معهم .. ومن هذا المنبر اشكر أخي الي رفع معنوياتي وابا إلا أن آتي معهم .. ولا ابوي كارشني .. تمت الخطبه بنجاح(تحمل صورة أنت؟! اهه اهه اهه) .. وبعد ذلك قمنا بتجاذب اطراف الحديث ولأحقاق الحق لم استطع ان اجذب شيئاً .. بعد مده من اجتذابهم اطراف الحديث .. ألتفت علي والدها قائلاً .. عقبالك ياملف وترى عندي بنت اصغر منك وأنتم نعم العايله .. وتنشرون بالملايين والله .. والنعم فيكم وفي اهل شقراء احسن ناس انتم <- مشكله الي يبي يمدح بالطقاق .. وفعلاً حدثت الكارثة بعد أن ألقى ابيها تلك الكلمات .. إذ ان ابي ضحك بأستهزاء .. فصرح قائلاً: منتب ملزوم تنطل بنتك على واحدن وصل ال( 21 ) .. وهو مابعد بلغ .. اصبت بنوبة قلبيه حاده + غيبوبه شديده .. لم افق منها إلا بعد ان اشطرت على الدكاتره .. أن اكون عارياً فيدخل علي والدي .. ليتحقق من مسألة بلوغي شخصياً .. وفعلاً وافق ابي على ذلك الشرط ليس حباً فيني .. ولكنه توهق بقومة الصبحية عشان يودي اختي للدوام ..
وعلى العموم كل ما أتمناه أن تكون هذه الأمور من الذكريات ..
لأني قررت اسوي عملية تطويل جسم .. ولو مافيه عملية زي ذي ..
صدقوني بخترع هالعملية بأي طريقة ….

وفي النهاية أحب أن أقول يا أعزائي أن هذه ..
المآسي ليست سوا غيض من فيض .. وما في الصدور يُدخل القبور ..
وياليت تواسوني كلكم .. وتقولون لي ..
لايرجال تراك حاقر نفسك بزياده .. تراك اطول من ماتتصور ..

حقائق ملموسة تأكد أني بالغ:
1-اقسم بالله اني بالغ .. والدليل ظهور طفح جلدي لونه اسود في مناطق متعدده من الجسد ..
2-محد قال أن كل القزمان مابلغوا .. اغلبهم بالغين وأنا على رأس القائمة ..

يقول الشاعر:
لاتحقرن صغيراً في مطارحتن ### إن البعوضة تدمي مقلة الأسدي
<- باين اني حسيت انكم بتشطبون عضويتي ..
الموضوع برعاية جزم ألدو النسائية .. تحت شعار مع الكعب لادموع بعد اليوم ..
نشوفكم على خير….

مقالات ذات صلة

‫80 تعليقات

  1. الله ايعييينك اخوووي سمعت في دواء يبيعوونه يطول كل ست اشهور 7 سانتي ونص اخذه يمكن تطول بعد جم سنه 😀 يلاا سلاام

  2. يا كثرك يا القزم .. حبيت اكون اول من يعلق في اول ايميل لك بابو نواف .. على فكره هههههههههه وينك اليوم ما جيت للشقة ؟

  3. لآآآآآ يــــآ رجــــــآل انت حآقر نفسك وآآآجد …,:D ولآانت وش طولك لـكن مالاحظت … وسع صدرك بــس الدنيا فانيه هههههههه ..

  4. الله يكون بعونك ويسهل أمرك يا ملف ليه ما تشوف الجوانب الاجابيه وتتناسى لو بعض السلبيات يعني بس من مقالك أستخرجت عدة إجابيات منها على سبيل المثال لا الحصر:قدرتك على التعبير عن مشاعرك ولو تلاحظ أن هذي ميزة يتمناها من فقدها. ثاني شي اسلوبك الجذاب بالكتابه وإلي يدل على هالشئ ان موضوعك مره طوووويل ولكن إلى يبدأ من أول كلمة ماراح يتوقف لين ينتهي من قراءته كله. وفوق هذا داخل قسم سياسه وغير ك حتى متوسط ماقدر يكمل. واحمد ربك أنك بعافيه وغيرك يتمنى العافيه لو كان قصير. مابي اكثر عليك بالايجابيات لكن ((لا تنظر في بياض الصفحة عن نقطة سوداء))

  5. ياخي وسع صدرك و تعوذ من الشيطان تدري ان الحجاج بن يوسف الثقفي كان قزم و حكم العراق و كان مرعبهم الي اقصده هو ان القوة في الشخصية المهم ياخي انت مبدع والله كلك ملح و الف شكر و ياليت تكتب اكثر!!!!!!!!

  6. السلام عليكم ورحمة الله وبركاته اما بعد اول شي لا تقنطو من رحمت الله ياخي الله اردك كذا تقدر تسوي شي لا والله ماتقدر تسوي شي لاكن انتا احترم ان الله خلك كذا انشاء الله انشاء الله ان الله يديك على حسن نيتك والله بعدين انا عندي اخويه والله قصار اكثر من ما تتخيل والله بس الي يعجبني فيهم انهم ما يشكون في انفسهم والله واذا قلتلو يا قصير قالي احذر شر من اقترب من الارض والي كاتبو ربي لك انشاء الله بيسير واذا ما ارد ترهااا انشاء الله حكمه من عند ربك والله يوفقك ويطولك يارب امين اخوك ماجد وشكرا

  7. للمعلومية أغلب العلماء كانوا قُصار القامة يعني ماعليك من أحد دع القافلة تسير والطوال ينابحون 🙂 أنت طالع الناس اللي أردى منك , شف اللي مالهم لا رجول ولا يدين الله يعافيهم ولا يبتلينا , شف اللي أعمى , شف المعاق أحمد ربك على العافية وترا ذي أول مرة أعلق على رسالة , يمكن أسمك له دور : ) فمان الله

  8. هههههههههههههههههههههههههه أما مسألة البلوغ هذي لحاله بلشه :(:( الله يكون في عونك أرق تحية ..

  9. بالله انت من جدك؟ ترى وقسم احسبك تمزح ومن الصبح قارح جوي من الضحك ومن شفت التعليقات تبققن خشيماتي وطراقعت كبدي كمدا وحزنا على مايحصل لك B عموماً شف انت لاتزعل واجد وتصير حمق ترى كل مايعصب الادمي يقصر

  10. شكلك متعقد من الطول بحق اكبر دليل طوووووول موضوعك وبااخي يكفيك الحجاج كان قصير:$

  11. عاااادي ياابني انا قصيرة ونحيفة وصغيرة وكل شي سواء في الحجم أو في الملامح :$ وماخدتها ببساطة 😀 بالعكس لما الناس يعطوني اصغر من عمري انبسط:D وعاد احلى شعور لما يحسبوني اصغر خواتي :$ ومرة رحت اسجل اختي في اولى متوسط المديرة جات تسأل اختي ع اساس هي الكبيرة : اختك من اي ابتدائية متخرجة :$ قمت ادف اختي من قدام المديرة واوقف على اصابعي واقلها هيييي ترى هي اللي متخرجة مو أنا :$:$:$ < ثاني جامعة:$ بس ابشع شي لما يجون الحريم يقرصون وجهي ويقولي ياناااس هذي اللحظة الوحيدة اللي اتمنى فيها ان الارض تبلعني خخخخخخ بس دامك في الواحد وعشرين عندك امل تطول خد فيتامينات واسبح والعب رياضة وكل سمك 😀 دعواتي لك 🙂

  12. انا بعد ودي اسوي عمليه بس تنقصني المعرفه والخبره وياريت تكتب لنا في حال نجحت عمليتك وعلى فكره مره مره كلامك مرتب وجميل ومبدع

  13. غريبهـ أرسلتهـ بالقروب؟ كنت أعتقد من بعد التحطيم إللي بالإقلاع بتتركـ النت:D كنت برد عليكـ بس الإقلاع مآيفعلون بسرعهـ:( — الحين أنت صدق قزم.؟! والسآلفهـ إللي فوق صدق.؟!

  14. اهم شي النفسيه وانا اشوفها حلوووووه مره بعد ماشالله تبارك الله والدلليل موظوعك المنسق المنمق حذاً ولا علك من الي يساهزئون والرسول صلى الله عليه وسلم قال ((اتقي من قارب الارض شبراً)) وهذا الدليل على الشجاعه مثال الحجاج الذي حكم العراق وقال الله تعالى ((اكرمك عند الله اتقاكم)) يعني القصر مايهم عند الله اهم شي صل واعبد ربك ولا عليك من احد وخلك جبل مايهزك ريح………… وتقبل تحياتي/ اخوك مزبزن بيرق

  15. أسلوبك خيال وربي كنت طفشانه وزعلانه بس مت ضحك على اسلوبك صرت أضحك زي الهبلا

  16. الجميع صدقوا..المفروض ماتشووف ها الشي كشي سلبي..وبعدين نابليون والكثير من العبااقره معروفين انهم اقزام..تحلى بالصبر ترا عقلك هو الأهم..وهذا الي اشوفه من كتابتك..ما شاء الله خليتنا نقرا من اول حرف لأخره..مافي داعي حلف وانته تعبر بها الطريقه تراك قدها وقدوود.. =) اهم شي الرااحه النفسيه واذا تبيها..اقنع نفسك انك عالأقل احسن عن غيرك بوايد اشياء.. تقبل مرور الكرام وحسن النيه..

  17. ياحليلك ايها القزم الشجاع اجل مالك امل تشارك بالدفاع او امن المنتشائات

  18. اسلوبك حلوو مشاء الله عليك بس اقوول احمد ربكـ شكلك اطول منى :$ههههه بس انا طولي 160 وفي الجامعه يعني انواع التعليق …:(:(……………فمــان الله

  19. أنت يا أخي الكريم تمتلك صبر عظيم وإرادة جبارة اللذي فقدها غيرَك. أنت عندك هدف ورؤية واضحة تسعى الى تحقيقها اللذي فقدها غيرَك. أنت عندك طموح كبير اللذي فقدها غيرَك. أنت رجل مبدع في التعبير والبوح عما يجول في خاطرك اللذي فقدها غيرَك. لا تنظر الى النقاط السلبية !! بل انظر الى النقاط الايجابية.. 🙂 وتذكر دائما: لا تهتم ولا تبالي بمن يثبطك وأسأل الله لك السعادة في الدارين وأن يرزقك الزوجة الصالحة. والسلام عليكم

  20. السلام عليكم ورحمة الله وبركاته .. الحمدلله على نعم الله .. وأحمد الله على أنك معافى رغم قصرك وتذكر أن الله له في كل شيء حكمه لا يعلمها إلا هو .. وتذكر أشياء صادفتها وخذها من الجانب الإيجابي فترى أن الله يحبك ومعك في كل حين .. فهناك من يتمنى فقط الصحة وإن كان قزماً .. ولكن تجده يعاني من أشياء كثيرة .. وكم تعاملت مع أناس معاقين وأقزام ولكني أجدهم مسرورين بحياتهم وأغبطهم على روحهم المرحه لأنهم لم يتركوا اليأس يغلب عليهم .. فتعاملت من معاقين كثر من دول الخليج في أحد المخيمات التي تقام لهم كل سنة .. وكم كنت مسرورة بتعاملي معهم .. فكم وجدت أنهم أفضل مني بالرغم من إعاقاتهم المختلفه .. فكنت أغبطهم وأتمنى أن أتعلم منهم مما اجهله .. لأنهم ما شاءالله عليهم إبداع برغم الإعاقات ولم يتركوا لليأس طريق في قلوبهم .. فالله يأخذ شيء ويعوض بشيء آخر .. وكم استمتعت بطريقة كتابتك وتعبيرك .. فأنت ما شاءالله عليك .. تملك ملَكة الكتابة .. خذ الأمور ببساطه ولا تنظر إلى قصر قامتك .. فالهمة الهمة .. واترك الناس يقولوا ما يقولوا ولا تلتف لهم ولا لقولهم .. وخذ كلامهم بروح مرحه فستجدهم إن شاءالله متأثرين بك .. ومعجبون بروحك الطيبه .. ولتعلم أن هناك من صحابة رسول الله صلى الله عليه وسلم من كانوا قصار القامة .. وكذلك من السلف الصالح من كان قصير القامة… أدام الله عليك الصحة والعافية .. وملأ قلبك يقيناً وإيماناً بالله والرضى والقناعة لما خلقك عليه ..

  21. يا ابن الحلال ميسي لاعب برشلونة ما غيره عنده اعاقه بالنمو من يوم هو صغير وشفه اللحين من اغلى رواتب اللاعبين حاليا…

  22. ألحين ذي ذكريات أجل وش الصدز عساك بلغتا هالحين حامت تسبدي ورحمتك وشين الله يهون ضده المهم عطنا جزء ثاني وعلمنا وش صار

  23. يكفي قلبك واحاسيسك وجمال اسلوبك ومتاكدة لو اننا نعرفك اكثر بنلاقيك مليااااااااااااااااان صفات تقوطر عسل:D يا صديقي الفرق بين الناس مو في الطول والقصر لالالالالا التعامل الاخلاق الدين قبل كل شي صدقني انت لو نظرت داخلك تلاقي شخص عظيم سي يو

  24. يقولون انهم يسوون عملية تطويل في الاردن ماادري عاد هو صدز والالا ؟؟

  25. صباح الخير ياخي خذ طولي وعطني اسلوبك الرائع وخفة دمك انت موهبه يا رجال احمد ربك على العافيه بس

  26. فعلا كل كلمه قالوها صدقوا فيها اهم شيء تعود نفس على هالوضع وماتنتقد نفسك لان هذي خلقه ربنا اولا واخيرا .. ويكفي اسلوبك الشيق واللي جذبنا كلنا صراحه 🙂

  27. السلام عليكم ورحمة الله ليس لي تعليق على الموضوع برمته ،، ولكن هناك أحد الذين علقوا على الموضوع كتب حديثاً عن الرسول صلى الله عليه وسلم مفاده قوله : ((اتقي من قارب الارض شبراً)) فهل له أن يأتينا بالسند؟ لان كذباً على الرسول صلى الله عليه وسلم ليس كمثله كذب بارك الله فيكم

  28. هههههههههههههههههههه ههههههههههههههههه ههههههههههههههههههههههه هههههههههههه ههههههههههههه هههههههههههههههههههههههه يخي احمد ربك يا ملف انك انت بالذات صعب الواحد ينساك او ينسى شكلك مجرد يقابلك من اول مره .. يا اخي يكفيك اني لو حطيت اي ايقونه تضحك في الماسنجر اتذكرك على طول :$ موضوع عيار ومقلع يا منسسسسم .. لنا فتره طويله عن هالمواضيع في القروب اهنييييك والله 😀 الا قولي بالله وش شعورك وانت الى هالحين ممكن تركب السيكل حق اخوك اللي بالابتدائي وتدودل رجولك من على الكرسي ؟ 😀 لا جد جد لما تروح الخياط وتفصل ثوب صحيح يقول لك خذلك لفه عشر دقايق وارجع وتلاقي ثوبك جاهز ؟ 😀 صدقني يا ملف انت الوحيد اللي مرتاح في الرياض على الاقل كلمه عوائل في اي منتزهـ او مطعم ماتعني لك شي :$ لا يغرك ذولا ترى يريشون فيك يوم يقولون الحجاج انت تذكر بس ان ايام الحجاج ماكان في اصانصير يعني بصراحه مالها داعي شايل معك سلم وين مارحت:$ مبدع يبو شقراا ولا تحرمنا جديدك واحب في الختام اهديك اغنيه نانسي شخبط شخابيط لخبط لخابيط :$

  29. والله يا اخي انته مشكلتك مشكله بس نتمنى من الله ان يستجيب دعائنه الك وان يخلصك من الشغاله بتاعتكم

  30. هلا والله أخوي ملف وشخبارك وشعلومك ان شاءلله بخير تبغى الصدق والله العظيم في البدايه كنت أحسبك تستهبل والله بس يوم قريت التعليقات أكتشفت إنك صادق والله… ياخي بسألك سؤال وياليت تكفى تجاوب عليها مع نفسك..؟؟ الحين بالله عليك تتمنى إنك تمشي ع عربيه والا تمشي ع رجولك وتسوق وتروح وتجي بدون محد يساعدك مع رغم قصر قامتك..؟؟ أي افضل عندك تكون مالك يدين والا رجول والا متعافي وتمشي مع مع العالم رغم قصر قامتك..؟؟ تحب تكون أعمى وماتشوف واللي من حولك هو اللي يدلك ع طريقك والا تمشي ع رجولك بدون مساعده أو أحد يذلك ع مساعدته برغم قصر قامتك..؟؟ أنا قلت سؤال واحد بس طلعت أسئله فياليت تتقبل أسألتي بصدر رحب وناخوك… وبعدين ياخي والله العظيم إن فيه ناس يتمنون إنهم يمشون بس عشان يروح يصلي في المسجدمثل الناس والله.. تبغى تشوفهم والا تشوف ردة فعلهم..؟؟ رح للمستشفيات وشف الناس المعاقه بإعاقه مستديمه والا شلل ربعاي وهم مهب قادرين ع المشي والله.. (أعذرني ع الجمله) وإنت جالس تتشكى وجالس تقول انا قصير وأبغى أطول…ياخي صدقني ملف والله العظيم إن الله ياخذ ويعطي وإن شاءلله إن الله أخذ منك طول القاااااااامه لكن والله العظيم إنه أعطاك أشياء كثيرررررره وميزك عن ناس كثيرين والله وصدقني والله لو تجلس مع نفسك وتشوف إيجابياتك اللي الله وهبها لك وتجلس تقيسها وتقارنها مع الناس اللي من حولك صدقني والله العظيم إنك راح تلاقيها موجوده عندهم والله… ياخي مدري ليه أحس إن عندك صفات وميزات مابعد إكتشفتها بنفسك والله…والله العظيم إني ما أقولها عشان أرفع من معنوياتك والا شي لااااااا والله مجرد إحساس ويمكن تكووون أكييييده والله بس حاول إنت تكتشف وتقارن فيمابينك وبين الناس وصدقني راح تحصلها ان شاءلله… وفي الأخير ياليت ونا خوك تحمدربك وتشكره ع النعمه والصحه والعافيه…ولاتعترض ع خلقة الله… وبعدين تعال انت وخشتك

  31. هههههههههههههههههههههه ملف كل جبن مقلي يا شيخ وربي مت من الضحك عليك حرام عليك عندي ولد اخوي العن منك بس بعلمك شغله رهيبه تخليك طويل رح فصل س…. طويل والبس جزمه خشب دلع وخل فالاخير نعله وآنت بكرامه المهم وخل الخشب طويل مره صدقني بتصير اطول من الباكستاني ولا الامريكي بس انت نفذ الي قلت لك عليه بصراحه اول مشاركه اقرها لك حبيت اعلق عليها رهيبه مرررررررررررررره مشاركتك كنها حلاو كوره كانك تذكره

  32. السلام عليكم أنا مب من نوع اللي تقرأ مقاله كبيره…بس اصدق كتابتك جذبني وخليتني أقرأ حتى النهايه كلنا عندنا عيوب خلقيه…وان شاء الله ما تتأثر نفسياً استمر في جديدك

  33. السلام عليكم .. حياكم الله .. للأمانه الموضوع اخذ منحنا آخر :$ .. ترى الموضوع مجرد ضحك .. أو بالأحرى صيغة مبالغه 8) .. يعني انا حاولت انقل الموضوع بشكل مبالغ فيه .. لكن انتم ماصدقتوا خبر هههههههههههههههههه .. العرب يموتون بالحزن :$ .. ترى الموضوع كان مزح بيني وبين شلتي .. لأنهم دايم يقولون عني قزم .. فقلت خلاص ياعمالقه انت وياه .. بكتب موضوع وبنشوف وش ربك ييسر .. ردودك كلها اسعدتني خصوصاً الي يحسبون اني معاق :$ .. وإن شاء الله .. اشوفكم بمواضيع ثانيه لي .. والله لايخلينا من ردودكم وطلتك .. مع تحيات القزم ملف :$ ..

  34. مشاء الله عليك .. اسلوب , خفه دم , جذابيه كلامك .. وتبي تصير طويل ياخي والله الطول شين خذها مني واكبر دليل هالمثال الي انتشرت بين العالم الطول طول ثلاجه والعقل عقل دجاجه يارجال يامناحيليك بس كلنا فينا عيوووب ومااحد سالم من العيب غير وجهه سبحانه

  35. حتى انا والله قصيرة واخواتي كلهم عمالقة تخيل اني كبيرة 25 وعيال اختي الي بالابتدائي رابع اطول مني والقهر ان اخوي الصغير يقولي تخيلي يا عسل انك متر ونص بس خذ الامور ببساطة وما زال فيه امل ان طولك يزيد العب سلة واتعلق على الجدران وراجع دكتور ولا تقول عن نفسك قزم لان القزم يكون ذو ملامح واضحة الرجلين واليدين قصيرة بس انت تقول باين عليك ولد صغير وهذا افضل والحمد لله يا رب على الصحة

  36. ابشرك قرأت موضوعك اخيرا الله يرج عدوك كل ذا يطلع منك …بطل الموضوع والله ماتوقعت كذا ابدد بس حرام الناس يحسبونك قزم صدق .. ترا الولد طبيعي صح انه قصير مو قزم عاد .. لاترحمونه يعني .. قطعوه بالذب تكفون

  37. اهلآ بك .. شف انت وش بيدك تسوي .. الله خالقك كذا .. انت اللحين المفروض بدال ما تقعد تتنرفز من ادنى تعليق والا يضيق صدرك ..تتآقلم مع الوضع وعادي الحمد لله .. القصر مو عيب .. والانسان ما ينقاش ع حجمه ..ينقاس ع عقله .. وربي يسهل عليك ..

  38. خذها بايجابية .. وابعد عن السلبية .. وانك قصير ما هوب عذر .. الابداع يكون بأي عمر وفي أي شخص .. اتمنى لك التوفيق واسلوب رائع . لم اتوقف الا لما خلصت المقال كله .

  39. يوم شفت الموضوع قلت ياطوووووووووله وهووب على السطر الاخير جذبني ورحت رجعت واقرا الموضوعمن البدايه ماخليت ولاسطر ابدا ماشاء الله عليك اسلوبك جذاب .. ذكرتني بنت اختي بس همها انها تطول . شف وانا اختك فيه حبوب زيت كبد الحوت رياضه القفز عل الحبل تتعلق باقرب حديده وتطلع فوق وتحت >> مدري وش اسم هالرياضه ههههه وانت تصير اطول من مايكل جوردن ,, موفق اخوووي وربي يعطيك الف عافيه

  40. 🙁 صرت أشعر بالذنب لأني طويلة !! لو يصير جان عطيتك من طولي بس للأسف الكرم ما يجي بكذا شغلات !!

  41. 🙂 الحمد لله على كل شي ترا القصير زيادة أو الطويل زيادة يذموهن الناس أهم شي العزة والثقة بالنفس هذا الله مبتليني بالطوووول الحمد لله على كل شي بس كأنك تتكلمين عن مجمع إبن خلدون بالدمام!! ؟ لأن عندهم جنب البوابة على طول محل ألدو على اليمين ودايما السيكريتيين موقفين جنبه:D

  42. لا وانا اخوك صح ان الطول عز لكن القصر مب شين الحين تخيل انك انت راجع لبيتك وما معك مفتاح شارع ونفترض ان الفتحه الي تحت الباب كبيره شوي تدخل من الفتحه وتفتح الباب :$ باااايخ صح ؟ لا والله تبي الحقيقه ترااك زودتها وش فيها اذا كنت قصر اهم شي الاخلاق وحب الوطن 😀 نصيحه لا تستحقر نفسك وخل عندك ثقه بنفسك ولا يهمك كلام احد 8) وصراااحه استمتعت وانا اقرا القصه

  43. ماانكر ان الواحد لازم يهتم بشكله بس شو الفايده لا صار طويل وحلو من غير ثقافه ومنطق وادب واخلاق ؟ حلو الواحد يحب نفسه صدقني انا جاتني فترات كثيره ابي اسوي العملية بس استخرت وحبيت نفسي اكثر وصرت اطور نفسي وشخصيتي والحمد لله راضي عن نفسي ع العموم العملية اسمها ليزاروف يسوونها بمستشفى خالد الجامعي شاطرين فيها وكمان فيه دكتور بالنخبه بس ناسي اسمه اذا سالت بيقولون لك عليه لانه مشهور اسمها اعتقد بالعربي الاستطاله شئ زي كذا استخير واقرا عنها علشان تقرر تسويها او لا لان زي مالها ايجابيات لها سلبيات 🙂

  44. 😀 تصدق حسدك على انك قزم وخفة دمك واسلوبك الراقي في الكتابة ياقزم . معليش صرت امون عليك والله حسيت اني اعرفك انت قمة واسلوبك روعه من زمان ماقريت موضوع كامل لاكن اسلوبك في الكتابه خلاني اقرا حتى: للتعليق على الموضوع او مشاهدة التعليقات الاخرى ههههههههههههه خالص التحايا

  45. أول شي: لايرجال تراك حاقر نفسك بزياده .. تراك اطول من ماتتصور .. وترى عملية التطويل موجودة تقدر تسويها أتوقع انها برة مثل فرنسا ومشهروة فرنسا بمثل هالعمليات

  46. يارجال انظر للجانب المشرق بالموضوع تقدر تخش اماكن الطوال ماخشوها على سبيل الذكر لا الحصر تقدر تخش أماكن ولا تردك كلمة عوائل:( اللي صدق عجزت امسك بطني من الضحك سالفة ثياب الدفـه فعلاً معاناة ووسع صدرك ترا الدنيا فانية عالعموم اذا انت ناوي تسوي العملية ترا الامها شديدة وطريقتها يكسرون عظامك ثم يبعدون بينها بقدر بسيط جدا يمكن خمسة سانتي ويركبون لك اصياخ وبعد سنة يفكونها طبعا الفراغ اللي بين العظمين راح يمتلاأ بمادة نسيت اسمها حقت العظام لكن صدقني التجربة مؤلمة شفتها بأم بي سي 4 الله يسهل امورك يارب

  47. احس ان الكلام مو صحيح , يمكن انك قصير صح بس الكلام الي كاتبه والمواقف الي صايره مــــو صدقيه احسها استهبال :~ الا هي استهبال بعينه وعلمه :~ اجل ابوك يتاكد من بلوغك عشان مايتوهق باختك في التوديتها مدري وشو B ورجال الامن كذا ينادون على الاطفال :~ انا متاكده انك تستهبل بس الي حيرني ردود الناس هم فاهمين غلط ولا انا الي فاهمه غلط :~ والله اني مدري بس موضوعك شيق وممتع ومشكووووور 🙂 وفي انتظار جديدك 🙂

  48. 🙂 يا ملحك بس قزم مملوح احسن من طويل على الشجره قصدي طويل خانس

  49. :D:D:D والله بالعادة صعب جدا جدا اني اقراء الرسايل الطويلة حقت القروب حتى وان كانت من اشهر الكتاب ,,,, لكن هاذي اول مرة يمكن بحياتي اقراء الموضوع من اوله الى اخره ثم اعيد بعض السطور …! اسلوبك جذاب وسلس لابعد درجة ,, في البداية حسيتك تتريق وقعدت اضحك لكن من تعبيرك عن نفسك حسيت انه مع هذا الضحك الم جواتك وشكله عميق في نفسك … اضحكتني وابكيتني… والله اني حاس فيك اخوي ملف كلمة لك يا ملف انت الان كبير جدا جدا بعيني والله …. اتمنى صحبت امثالك والله خاصة اني اشترك معاك في الآم الطفولة التي كانت تعيسة لابعد حد بسبب مشكلتين في مظهري الخارجي … لكني احمد الله على كل شيء ارجوك لا تحرمنا من ابداااعك

  50. :$ 🙂 ما شاء الله عليك اسلوب يجبر الكل على القرأه والتعليق وان نشوف جديدك

  51. هههههههههههههههههههههههههههههههههههههههههه ههههههههههههههههههههههههههههههههههههههههههههههههههه هههههههههههههههههههههههههههههههههههههههه واتقي شر ما قرب من الارض انت صاروخ ارض ارض هههههههههههههههههههههههههه الله يعطيك الصحه و الطول هههههههههههههههههههههه ويارب يارب نشوفك سفير للملكه في كوريا :$ والله يسعد قلبك

  52. الحين انت من جدك قزم؟ ولا فيك قصر طبيعي وتبالغ ؟؟ اذا انك قزم ترا عــــــــــادي.. واذا انك قصير ترا عـــــــــــاديين

  53. وش بيفكنا منك الله يقلعك الحين مدحوك هالعالم وبتحسب انك مملوح هههههههههههههههههههه كانت أيام جميلة هههههههههههههههههههههه

  54. صراحة معنات الله يكون بعونك انا بعمري مارديت على احد بس علشانك رديت وسع صدرك

  55. ابي اعرف كم طولك …ههههههههههههه مو لقاافه بس حب استطلاع انا على اني مو طويله بس دايم يسموني طويله مدري ليه ههههههههه كنت احسبهم يتريقوون علي بس طلع من جدهم B B

  56. 🙁 ((ابراهيم زائر 39305 والله افضل موضوع قرأته في ابو نواف من سنين 19/10/2008 16:57:17 ياخي وسع صدرك و تعوذ من الشيطان تدري ان الحجاج بن يوسف الثقفي كان قزم و حكم العراق و كان مرعبهم الي اقصده هو ان القوة في الشخصية المهم ياخي انت مبدع والله كلك ملح و الف شكر و ياليت تكتب اكثر!!!!!!!!))

  57. ليسوا العظماء من طالوا ومن قصروا فلعظمة في القلب فالرجال مخابر وليست مناظر اخي العزيز تذكر بأن هناك شخصيات كثيرة في التاريخ كانت مظاهرهم لا تبهج ولكن افعالهم تنهج وتعلقنا بذكرهم على مرار السنوات فقد كان عطاء بن رباح عالم الدنيا في عهده وكان مولى اسود افطس اشل مفلفل الشعر والاعمش الذي كان محدث العرب ماكان الا مولى ضعيف البصر فقير ذات اليدين ممزق الثياب رث الهيئة والمنزل ابو العلاء المعري شاعرنا المميز كان فاقداً للبصر ولكنه ليس فاقداً للبصيرة فلا تفقد البصيرة اخي الكريم وتطلع في العالم ومن حولك فما فعل الطوال بطولهم وما خسر القصار بقصرهم بالعكس فانا اعرف فتاة اقصر مني تكاد تقترب من الارض من شدة القصر واذا وقفت امامها خيل لي باني من طولي سابتلعها ولكن اللهم لا حسد ماوصلت له هي بقصرها اكثر مما وصلت اليه بطولي وانا وبصفتي فتاة اتكلم عن نفسي افضل ان اقترن برجل على قصره طموح حالم نابغة زمانه وعصره على ان اتزوج طويل يذهب لعمله ليعود ويستلقي امام التلفاز فكن طويلاً بعملك لأنه ما سيفيدك ولا تقنط من رحمة الله .. المآسي ليست سوا غيض من فيض .. وما في الصدور يُدخل القبور .. يقول الشاعر: لاتحقرن صغيراً في مطارحتن إن البعوضة تدمي مقلة الأسدي لايقول هذه الكلمات الرائعة إلا بالغ والسلام بيني وبينك اخي الكريم الى يوم السلام

  58. اول شي كنت احسب موضوعك من باب المزح ما انتبهت الا بالاخير ان المساله جديه ياخوي مو انت اقصر واول واحد قصير بالدنيا ولا اخر واحد عاادي ارضي بالي كتبه لك ربك بالنسبه للعمليه انصحك ماتسويهااا انا اعرف وحده سولها عمليه وعطوها ابر وبهذلو فيهاا وفعلا طالت بس الي طال الظهر فقط فسبب لها ميلان (( وش يسمونها محدبه يعني الله يكون بعونهاا وانت انصحك تحمد ربك وماتسوي شي والله يصبرك

  59. هههههههههههههههههههههههههههه وانا الي احسب السالفه من جد وقوول ياربييه من جد مسكين 🙁 يعطيك ربي الف عافيه والله يوسه زدرك مثل ماوسعت زدورنا 😀

  60. السلامـ عليكمـ ماشاءالله أسلوبكـ حلو بالعادة أخلي الموااضيع الطويلة أقراها بعدين أو احذفها بس وأنا أقرأ مررة أقولـ صدق ومررة أقووولـ كذبـ خصوصاً ساالفة غرناااطة الأمن لو يشوفونـ بزر ماشي ماسألوهـ وين ماما أو بابا إلا إذا كااان يصيح كنتـ مجهزززة كلااامـ برررد عليكـ وخفف عنكـ بس حلو طلع مقلبـ الله يـ ع ـطيكـ العافية ياملف عقبالـ ماتصير مجلد :$

  61. والله ماتلعب ياملف إثرك مشهور وانا مدري!!! أقول بس لا يلعب عليكم موب قزم ولاهم يحزنون بس قصير شوي >>عادي كلنا بالهوا سوا وأنا أأيدك في حملة القصر موب عيب:D أجل أنا وش أقول إلي واصلة ثالث جامعة وطولي توه ماوصل 153 المعاناة الوحيدة لي اني مصادقة بزارين لا وأطول مني بعد!! 🙁

  62. مبدع……مبدع……….مبدع العاده لمن اشوف موضوع طويل اقرا نصه وما يعجبني……. لكن موضوعك شدني الى الاخير على فكره(دمك خفيف) تنفع تكون كاتب (ماامزح)……… وان من جد انك قصير لهذه الدرجه ترى مو عيب طالع للي اقصر منك وعايشين خليك قريب من الله والله الهموم هذي حتتلاشى وحتحس انه قصرك حكمه من رب العالمين وقول الحمدالله على العافيه(ايش الفايده لو طويل وعندك امراض الدنيا) نسال الله العافيه لنا ولك …….. والله ولي التوفيق……..

  63. ترا هذي أول مرة ارد بالقروب بالعادة اسحب ولا احب ارد بس موضوعك شدني بصراحة بس مدري أحترت بالموضوع وردك الأخير ؟ المهم انا بقول الي عندي كان إلي قلته حقيقة أو لا والله يعزيني بعض الردود الي ردوا فوقي وجاين يعايرون هنا ولا إلي تقول .. ودي أعطيك من طولي ولا إلي يقول يامسكين. بدون ما يراعون الي كتبته على الأقل وهمهم انهم يوسعون صدورهم بالله مدام اكثر هالنوعية من هالناس الطوال هذا كلامهم ترضى تكون منهم ؟ ما عليك من هالنوعية هم شغلتهم بالحياة يحطمون غيرهم ويضحكون بس بدون أي مراعية لمشاعر غيرهم وفي مثل راكب عليهم (الطول طول نخلة والعقل عقل صخلة) الصحابة كانوا يضحكون على الصحابي عبدالله بن مسعود وقال لهم الرسول _ صلى الله عليه سلم _ (أتضحكون من دقة ساقيه، والله إنها عند الله أثقل من جبل أحد) الطول مو مهم المهم شخصيته المحترمه الي تفرض على الكل احترامها وأحترامه للأخرين ويراعي مشاعر الناس بالكلمة الحلوة والطيبة وبعدين حتى لو كانت فيه عملية تطويل الشخص الله خلقك بهالهيئة ليه تغير ما خلقك الله عليه مو عاجبك خلقة الله وعندك اعتراض عليها ؟ الواحد يحكم عليه من خلال شخصيته وصفاته مو بطولة والي يحكم على الشخص من خلال طولة فقط بدون ما يعرف عن شخصيته شيء قط ؟ فأحترامي له إنه انسان ساذج وانت مشاء الله تعبيرك وأسلوبك بالكتابة مبدع والله لدرجة حسبتها مزح بالبداية وجلست اضحك وتراها دنيا فانية لا تغرك التفاهات بطول ولا غيرها كلها 60 سنه (الحمقى هم الذين يتحسرون على باقي العمر بالطول الناقص بدال لا يستغله بالتعلم ولا بشي يعوضه بهالشي خير منه) إنت شيء أخر لم يسبق لك في التاريخ مثيل ولن يأتي مثلك في الدنيا شبيه وحط ببالك شي أكيد لابد منه أخوي ملف أن الله إذا اخذ منك شيء فأكيد عطاك شيء خير منه وبالمناسبة البنات القصار الي منقهره من طولها ترا اغلب الرجال يحبون البنت القصيره لأنهم يحسونها عاقلة وواعية عكس الطويلة الهبيلة 🙂 وشسمة اسفين على الأطاله

  64. حبيبي انت روحي انت اقسم بالله العظيم وربي شاهد علي انا طويل يمكن طولي 189 والله ان بغيت تسوي عملية ولا شي انا جاهز اعطيك من دمي ومن لحمي فديتك والله اخوك عاشق راشد

  65. بجد القصة واقعية ..ولاتلعب بمشاعرنا..المهم إنى تأثرت واجد بالقصة 🙁

  66. وعليكم السلام ورحمة الله وبركاته حبيبي الكبر ماهو بالطول ولا بالعمر الكبر بالعقل ومدى تفكيره اقسم بالله ان كلامك ولا اروع وتشبيهك في بعض الجمل ولا اروع ويشهد الله علي اني ما أجاملك في شي هذا زبدة كلامي وياليت تتواصل معي على الإيميل

  67. ما شااء الله عليك اسلوب جميل و جذااب في الكتاابة و لا عليك ترا الطب تطور .. 🙂 و فعلا فيه أدوية تزيد الطول

  68. :هاي كيفك والله موضوعك كتير حلو وباين انك خفيف الضل وهاد الشي كتير حلوو فعادي ما تزعل لانك ئصير واطلع للموضوع من ناحية ايجابية وما تفكر فيه كتير طيب انا كمان ئصيره بس بشتغل في شركة وحاكمتهم حكم ههههههههههههه:$ اسنع تئبرني شو رأيك بما انه احنا التنين ئصار شو رأيك نتزوج هههههههههههههههههههه :$

  69. الحمد لله على كل حال ان كانت القصة من نسج الخيال فقد نجحت في ان تلمس شغاف القلوب وان كانت حقيقة فقد نبهتنا لامر كنا عنه غافلين وهو كيف نتعامل مع اخوة لنا ابتلاهم الله بقصر القامة وامتحننا نحن بكيفية التعامل معهم من منطلق الاسلام . ان لي قريب في مثل حالك ولم نشعر بمدى معاناتة الا الان بعد ان قرأنا القصة . شكرا لك اخي الكريم وفي رد مساعد التميمي الكفاية

  70. السلامـ عليكمـ اخوي ملف انا ادرس حاليا وبالفصل طالبه جديده جاالسه جنبي تعتبر من قصار القامه مو قصيره الا قزمه بس الله لايضرها وربي ماني اباالغ ولا شي اذا انتهى الترم افطن ان ماا اخذت الاولى مكرر 😀 اللي بقوله حتى وان كنت قصير الاكيد انك تحمل صفاات مايحملهاا الطوال لاتقتدي باللي يحطمون نفسهم ويشفون الجزء الفارغ من الكاس بالعكس خلك ايجابي بكل شي واثبت لنفسك ولاهلك واخوياك وغيرهم انك فعلا منت عاله عليهم بس بالاول خلك ايجابي واقنع نفسك بهالشيء بعدين تقدر بعدها تقنع اللي حوولك … أخيرا ذكروها قبلي بس احب اكد من وجهه نظري القاءك جدا متميز وجذاب ومشوق .. لاتبطل عزيمتك وانت توك صغير قدامك عمر .. والشكر لكـ

  71. عاادي …. أصلاً غالباتكون الامثال في مدح الاقزام… 1\في كل قصير فطنه:D 2\اتقوا شر من اقترب الى الارض8) 3\الطول طول نخله والعقل عقل سخله:D بعديييين لا تنسوا شي مهمB B :…… عبدالله بن عباس حبر الامه طوله لم يتجاوز الخمسة اشبار!!!B وهو فقيه الامه وامامها

  72. لا تضيق صدرك انت طويل بس اللي معك اطول منك بس..8) والا انت منت قصير مره ..وأطول مماتصور :$:D < كني شايفتك هاللحين .. تنفيس رائع بانتظار باقي تنافيسك8)

  73. اللــه يااخذ بلييييييييسك مررررررررره مررررررررررره ضحكتني:D:D اول شي رحممممتك:(:( مرره بعدين يوم عرفت انها مززح فطست عليك:$:$:$:$:$:$:$:$:$:$:$:$ الموووهيم شوف الردود كل اللي ردوا ماعرفوا انه مزح للحين :$:$ ههههههههههههههههههه

  74. هلا اخوي انا نفس مشكلتكـ ب الظبط باقي لي 6 سانتي واصير طولي طبيعي لكن الشكوىآ لله علعموم انا سمعت عن جراحه في جده بس كم سعرها والله ما ادري اذا كان عنك معلومات الله لا يهينك خبرني على فكره الرياضه الي تتعلق بماصوره جربها ترا تطول الظهر

  75. لااله الا الله صار على الموضوع الحين حوالي ٨ سنوات يعني عمرك الحين ي ملف ٢٩ او ٣٠ هاه بشر طولت ولا نفس الموال ?? امزح معك يالغالي انا مادري ايذا انت راح تقرا ردي هاذا بعد السنين هاذي كلها لاكن عجبني اسلوبك بالكلام مادري شقول صراحه والله يحفظك ويحميك من كل شر تحياتي ي ملف ٢٠١٧/١/١٧

  76. يا خي في حل لك حتى لو تعديت ال20
    الحل هو تمارين كرة السلة
    سهل جدا
    في السنة تطول ممكن 13 سنتيمتر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى