رسائل المجموعة

خلّك شديد .. ترى رايك سديد .. !

صفوا سرا باركوا لي<< طراه ان ابوه يبي يعرس بثالثة ويدق الثانية بالحامي

ياشين القطاعه وشوفة النفس ..

 
ابو نواف سلّ سكينك وارخ يدك وتلّ رقبتي وخذ حقك …
دواي التستله لين استادب … داري بتقول : والله ياأنت ماتستحي .. قاطعن بنا ولك وجه تحتسي بعد .

ياخي هي تسذا الدنيا .. لازم يجي يوم وتشوف نفسك .. أجل مع ولد خالتي حمد كامري فتحه وماتبيني اشوف نفسي عليكم .. لا ومن زود الرهجه رايحن بها للبحرين وطول الطريق فاتحتن فتحته من فوق .. اقول له وراك تسوي تسذا .. يرد هالمبترم : ياخي خلني احلل دراهمي ووفّر مكيفي .. !

هذا من نفس الصنف التقليدي اللي يحسب المكيّف يسرف بنزين!

ياحبني له بس .. توّه جاي من جدّه وأوّل مرّة يركب الطيارة . ياهو ضافّن نص عفشهم  .. مارجع للرياض إلا ومخابيه مليانتن من اغراضهم  .. سكاكين الاكل وملاعقهم وسكّرهم .. حتى أكياس الاستفراغ ضافّها ومايدري وش سالفتها  .. المهم انّه ضف كل شي حتى الصابون خذه وأعواد الاسنان والجرايد بعد ماسلمت منه ..

قايلن أكثر من مرّة بكذا مقال .. يامدير خطوطنا .. أمنعوا القراوى يركبون الطيّارات والا ودوهم على طياره مابها إلا كراسي ومضيفتن وحدة .. عن قولت ماشافوا حرمة ماتغطّي شعرها وتلبس ضيّق الله لايضيّق علينا .

قبل كم يوم زارقن للشرقيــة .. ياهي رطوبة بشكل .. صرت قطنه بليّا دار ..
من دخلنا وهالرطوبة تمشي مليون .. وعاااالى طول بالحضن الله لايخلينا ..

هما عندهم بس بحر ..
وهما بس عندهم جسر البحرين ..
وهما عندهم سمتش وتشنعد ..

هذي تكفينا ياهل الرياض ..
منطقتنا سمومن تفقع التسبد ثلاث مرّات ..
ولذلك لَزِم الأمر أننا نزاحمهم على كورنيشهم وندق صخلنا هناك ..
شافني راعي كفتيريا على الكورنيش .. وقال لي : انتا من الرياض ؟
قلت ليش .. شايفن بوجهي وسم ؟
قال لا .. بس واضح انك متحمّس وانت لابسن فخّاذي وجالسن ماد كراعك بالبحر ساعتين وماطفشت !

هذا حنّا ياهل الرياض .. نموت بشي اسمه بحر .. عندنا نقص عواطف بحرية من سنة السبلة ومالقاها إلا هل الشرقية ولايهونون الغربية وحنّا تقرصنا الخطمة ويطقنا الحرّ ومانقول لا .. بس مايهوّنها إلا ان عندنا : سوق عتيّقه والا يهون حراج بن قاسم اللي من عرفته وانا اشوف الكنب اللي على الدايري مصفوفن مابيع !

خلونا بالمفيد

أقــول بالماضوع من فوق : خلّك شديد .. تراي رايك سديد .. !

خطاب مفتوح اربعه صانتي باثنين لكل مستشار بالدولة .. من أوّل حتّه ومستشار فيها مايعرف فاتورة الكهرب .. لأنه طبعاً عنده ببلاش .. وحتى آخر بشت مستشار مايداوم إلا ساعتين بالاسبوع والراتب يجيه بالمليم ..

الكل سمع وقرا رأي الدكتور عبد الله الطويرقي .. مستشار الدولة وصاحب الكُرسي الهُمام ..
طبعاً قراره كان مُفاجأة لنا كشعب سعودي .. وطبعاً بالدول الثانية يُعتبر طبيعي جدّاً لأنه رأي .. والرأي هو لسان شخص له الحق أنه يتكلم وأن يُطالب وأن ياكل تبن إذا زوّدها ..

طالب الدكتور قبل فترة بإعفـاء وزير الصحّة نظراً للتخبطات الإدارية الواضحة في وزارته ..
حالات موت .. حالات تشنّج يعقبها إختلال عقلي .. حالات مآلُها للكرسي المتحرّك  .. والبركة كل البركة في سعادة الدال اللي تسبق إسم رامي وسامي وخالد جعلهم للتسونـامي ..

رأي الدكتور عبدالله كان صريح بقدر الألم اللي ذقنـاه فترات طويلة .. بجد آلمتنا وأحزنتنا .. خاصّه مع اللامبالاة اللي نشاهدها في الإعلام المقروء أو المسموع .
نعترف جميعاً أن الخطأ وارد .. ونعترف جميعاً ونبصم بخشومنا أن العمل الطبي مُعرّض للزلل بأي لحظة ..
بس ياجماعة .. الأخطاء صارت أكثر من شعب بنجلاديش العريق ..
الأخطاء بالطنّ ماهو بالكيلو أو المثقال ..

لنفترض جدلاً .. نقول جدلاً مُراعاةً للدال .. أن الخطأ كان خطأ .. وأن الدلالة عليه كانت محل اجتهاد ..
طيب هنــا نقول . قوّاك الله وماعليش وماصار إلا خير ..
بس يطلع لي مسؤول طبّي في الإعلام ويقول : إحنا مانخطئ  .. ويتبجّح بكل عراقه أمام المُقدّم وولي أمر أحد الأطفال اللي كانواضحية هالوزارة .. !

طيب والمقصّ اللي طول رقبتك اللي نساه الدكتور ببطن المريض  .. وين موقعه من الإعراب ؟
طيب خلنا من المقصّ .. الطفل اللي كان وحيد أمه وابوه .. راح للمستشفى عشان ياخذ علاج بسيط .. ويجي سعادة الدكتور ويسوي له شغلة تخليه مُعاق طول عمره وكل من شافه دفّه عشان يدخّله دورة المياة لأنه مايقدر يخدم نفسه !

بلا شكّ .. هنا اللي راح يُعاني ولي وولية أمر هالطفل الضحيّة .
والطبيب وفي نفس ذاك اليوم .. راح ينزّل السماعة من على صدره وينزع سترته البيضا الطبّيه وبيروح يتعشّى نواشف مع المدام وصلى الله وبارك !

أشدّ على يد الدكتور الطويرقي واقول له : تسلم ويسلم لسانك بحكم أنك مستشار دولة ولك رأي ..
رأيك نادر مانسمعه  .. قصدي ماقد سمعنا مثله لأنه بمجتمعنا شي غريب .. لأن صاحب الكُرسي مُقدس وله حصانه وعنده بيت بحي العقيق تراكض به الخيل من كبره !

قبل أيام أيضاً قريت خبر إماراتي جميل عن إعفاء وزير دولة وإحالته للقضاء ومحاكمته لأنه خان الأمانة !

قرار حلو .. فكرة ومضمون ومصلحة ..

يجب أن يقتنع ويعرف الجميع أن المسؤول مهما كان مسؤول لابد يُحاسب عن خطأه ويجب أن يُعرّى إذا ماكان أهل للمنصب ..
يجب محاسبته عن تقصيره .. عن أخطائة وخياناته .. عن كُل صغيرة وكبيرة .. وعن ماسترعاه الله من أمانة ..

ياكثر من خانوا الأمانة  .. وياكثر بعد من ودّه يقعد على كراسيهم ليله عشان يعرف يدبّر أمور الخلق والناس ..

تصبحون على خير ..


وراي قومتن من باتسر الصباح بدري ..
زرقة خفيفة
لمستشفى حكومي .. ويارب يارب لايتهورون وينسون لهم مفكّ والا عفريته في بطن من باخذه معي لهم عشان يكشفون عليه !

منتديات كواليس

مقالات ذات صلة

‫15 تعليقات

  1. قبل كم يوم كنت أتكلم مع بنجلاديشي عن أوضاع دولتهم وقالي إحنا عندنا رئيس الوزراء السابق له الان تسع اشهر في السجن لأنه سرق من أموال الدوله،،،، وقالي انتم الكبراء لمن يسرقوا محد يسوي لهم شيء أما احنا نجازيهم ،،،،،،،،،،،،، الفساد أعظم من السرقه لأن السرقه جزء منه و هو أعم

  2. وينها عنا هاالقرارااات من اول لكن تبي الصراحه لسه باقي خلق واجد يبيلها محاسبه لكن الشكوى لله

  3. والله صح لسانك اخوووي حنا عندنا مافيه احد يقول رايه ابدا وعندنا الواحد اذا صار وزير خلاص المفروض انه صح في كل اموووره لكن المفروض حتى الوزير يتحاسب حتى لا يظلم ناااس على حساااب ناس وشكرا لك اخوي

  4. سلام يا عمده كلامك حلو والله ياليت يطبقون هلاانظمه كنا عايشين في بحر ..السمكه الكبيره تاكل الصغيره والربيان يتفرج ( شدخل ) ولا امور كثيره ما ينتحاسب عليها كبار المسؤولين مو بس الاخطاء الطبيه حتى عندك الي صار بالكهرباء وانقطاعها ذاك الاسبوع المفروض الوزير يتعلق من عرقوبه على الي صار بالعالم لكن ما نقول غير حسبنا الله ونعم الوكيل

  5. هذا الحاصل في المستشفيات من سنين موبس من عهد المانع، بس مانقول إلى حسبي الله ونعم الوكيل .

  6. فعلا والله الحياه صايره ما تنطاق في بلداننا .. مافي احساس بكرامة الانسان .. الله يعينا .. بس الي حصل للوزير الاماراتي ظلم لانه الى الان ما ثبتت ادانته وما صدر حكم محكمه عليه .. فليش التشهير به

  7. والله إنها حالة .. وربي .. يخرجون ويتشدقون .. وكأنهم لم يعملو سيئاً .. . . أذكر في وقت مضى .. تم تشخيص الوالد ـ حفظه الله ـ ( الحمد لله انه تشخيص .. أنه لن يقوم .. وأحمد الله أنه أبطل تشخيصهم .. وقام بالسلامة .. ياشيخ هذولا (( سباكين )) مو أطباء .. :$

  8. من أمن العقآب أسآء الأدب.. وبعدين بالعقل الطبيب يخطأ والوزير يعآقب!!!! لو على العقآب والله يآكثرهم الوزرآء اللي مآلين الكرآسي وشغلتهم النهب البحتهـ,,

  9. صح كلامك اخوي وسلمت يداك المفروض الكل يتعاقب صغير او كبير حسبي الله ونعم الوكيل

  10. صدقت ياااخووووي وحده من قرايبي قالولها ((الدال))بانه عندهااا ( ربو ) ومن علاج لعلاج وبعد عدة سنينن.. اكتشفوا بقدرة القادر انه ما عندها أصلاً ربو كلششش بس عندها لحمية بالأنف!!

  11. ويييييييييييييين ؟؟ انت تقول ان المكيف ما يصرف بنزين ؟؟ وبسبتك نورة بنت خالي عبدالرحمن خسرت مية ريااااال هه ,, تراهنت هي ونورة بنت خالتي بسبت هالموووضووع خسرت مية ,,

  12. طيب شوفو الكويت (قريبين مو بعيدين) خلونا ناخذ منهم هالشي الجديد والمفيد الي طالعين فيه صار شي بأي وزاره على طوووووووول استقال الوزير وانا ماااااعمري سمعت ان وزير استقال كل هذي ثقه بالنفس.. ما اقول إلا يااااااليتني مو سعو ديه بس

  13. خليني اقولك على اللي صاير بمستشفى الملك خالد بحفر الباطن المكيفات اللي بغرف المرضى كلها خربانه حتى اضطروا اهالي المرضى يجيبون مكيفات صحروايه لأهلهم ثانيا : فيه اخ حفرواي اخذ ابوه للمستشفى وعطوه علاج منتهيه صلاحيته بس الحمد الله اكتشف الولد وعلى طول نشر الخبر .. وغير وغير لكن ان فلتوا بالدنيا ما يفلتون بالآخره .

  14. 🙁 امانه صدق المكيف مايصرف بنزين ترى زوجي ذابحني بالحر والسبب البنزين يقول يصرف ويوم سمعت هالكلام انصدمت لهدرجه حاقد علي ومايخليني ابرد مثل خلق الله يحسدني حتى على البراد B

  15. كلام سليم ما قصرت يالغالي .. بس الله يستر والله الثقة في وزارة الصحة نزلت -200% عقب موضوعك الله يعين ويصلح الحال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى