رسائل المجموعة

تواصل واهداء

بسم الله الرحمن الرحيم
مساء الخير لكل أعضاء القروب الاعزاء وأقول ويك إند سعيد على الجميع
ولا تواخذوني على الكلمة لان ثقافتي روسية رغم إن بأمكاني أن اقول نهاية
أسبوع سعيد بس وش أسوي بعلمكم إن معي لغة —> أقول اثبر بس
عرف كم كلمة وازعجنا ولا بعد مسروقة من كتاب أخوك
نرجع للموضوع اللي أحب افرشه – وخروا خششكم عن الشاشة لاتعورون – في هذه
الصفحة ألا وهي خاطره متواضعة
مني أرجو أن تحوز على رضاكم —-> يمديكم على الاخلاق حقتي
والحقيقة أن هذه الخاطرة التي قد يعتبرها البعض قصيدة وفي الحقيقة ماهي إلا
مجموعة احاسيس – قل والله – نثرتها قريحتي المتدفقة ومشاعري الجياشة
صراحة استاهل بريق شاهي على هالجملة ولايهون النعناع
إيه ماعلينا نعود اليكم ابقوا معنا – وش قاعد أقول أنا وخشتي – وين ياعم
برنامج الاتجاه المنتكس والله يخوفي تاخذوني عني فكرة شينة عقبن
وش يشيلها ولاحتى الفرمته تلغيها وكني أشوفكم تساسرون وتقولون
أبو الشباب شكله شارب فليت وهويكتب هالصفحة الله يكفينا شركم بس
وأنتم فاهمين غلط وأنا ياغافل لي الله و ماتدرون إن كل هالخنبقة
كلها لاني ماني مصدق إن كلمة قريحتي المتدفقة وتوابعها تطلع مني أثري
منيب سهل إذن نصل إلى نتيجة مفادها إني مثقف >>> تكفى يا اقليدس
فاليخسأ الحاقدون وليسقط المشككون >>> أقول أركد يالحبيب
تراك دخلت في السياسة ياقربهم مصاعين زمارة رئبتك يالمنفلوطي
ماعليش ياشباب استروا ما واجهتوا أنفعلت حبتين – إلا قل درزن
حبات – تراها مسألة إثبات وجود لان دحيم ولد عمي دايم يقول إن
تفكيرك سطحي على فكرة ياشباب الأمة وش معناها لأني رجعت
لقاموس ابن زليخة المشهور ( البرابيس في ماخط في القراطيس ) وما
لقيتها والله العالم إنها شتيمة روح ربنا ينيلك ياشيخ
عاد ماطول عليكم – كل هذا وماطولت ياظالم – اللي حبيت أقوله في هذه
العجالة وزبدة الموضوع إن هذه الخاطرة التي قد يعتبرها البعض قصيدة
ربما يوجد فيها الكثير من القراشيع والابيات المكسورة لذا أفضل تسميتها
خاطرة وأخلي الشعر لاصحابه راجي من الله أن تلامس مشاعركم
وتجد لها القبولية في نفوسكم – وش رايكم صرت منظبط ماعاد لكم هرجة – واللي
وده عاد يحش عساه على القوة والله يحلله ويبيحه ومانستغني عن كراتين الأجر
وفي الختام تقبلوا خالص تحيات أخوكم صادق الاحساس

ياحظ اللي مكبرين الوسايد
هنيهم اللي ذايقين السعادة
لي خليل ٍ شد ما هوب عايد
يم الوشم أهل السنع والجوادة
أتصبر عن غناتي والهجر كايد
والبلا قلب ٍ تناثر كنّه أقلادة
إنما تعدل الحال فالموت فايد
جسم ٍ يالله الكافي تشوفه جرادة
سوات صقر ٍ يلاحق له طرايد
طايح ٍ حظه من زود القرادة
والسبب خل ٍ حبه على الناس زايد
والله إنه ماخذ ٍ على زينه شهادة
صاحبي على كل المماليح سايد
أبو شعر ٍ طويلٍ يحطه له وسادة
عزوتي نخيتكم بوقات الشدايد
تكفون أبيه يرجع ماعندي جلادة
ولايهون أهل نجد ياخير السنايد
ترى الطيب والمعروف لكم عادة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى