رسائل المجموعة

تقرير مصور : هين هين يا الضبان

السلام عليكم ورحمة الله وبركاته
مساكم الله بالخير جميعا
كيف الحال عساكم بخير الله الله بالمذاكرة شدوو حيلكم < علم نفسك
نعتذر عن الانقطاع المفاجىء والظاهر انها وعكه انترنتيه عند الكثير بس بدت تتحسن
وكلها اسبوعين ونعطل ونبلشكم بالمواضيع < هدي شوي يابوو
اليوم موضوعنا رحله لاصطياد مجموعة من الضبان البريه
بعد قرار اداري قررته ادارة استراحه
( دير بالك ع حالك )
وبيني وبينكم كان وهونالك معارضين وفيه المؤيدين
بس اذا تبون الصدز الصدز
ان قعدت بالرياض حرررر وطفش< ماجبت شي جديد
وان طلعت للضبان حتى لو انك ماتدانيها يا انك بتطفش وبتنشوي من الحر
ولا بتنبسط وبتنشوي من الحرر < يعني الحر فيكـ فيك
ومن هذا المنطلق وافق الجميع ماعادا اثنين


وتنطلق الرحله
انطلقنا الله يسلمكم من المقر الرئيسي بظهرة لبن
وهذي صورة لمدخل الرياض الدحديرة اللي تنطق ولاتكتب
عرفتوها ..؟ الدزديه مدري القديه
أبي أعرف ليش مايقولون القديه ويفكونا

وش رايكم بالاخراج ..؟

وهانحنوو ندحدر من هنيا

هذا اللي يسمونه خشم طويق

وهذي قصور ال مقبل< مرشد سياحي

ودعسناها نبي نلحق قبل الليل < 180 بس ما اسرعنا ابد

وانا منشغل بتصوير الطبلون شوي وانقز بحضنه من الابداع الفوتوغرافي
الا وحن ملحمين بشايب على هايلوكس بغينا نضفه معنا < الله يستر لايكون صكنا بدعوه على العصريه

ترى لفينا يمين مع المخرج < قل قسم

اعتذار رسمي لاهلضرما ودنا نصوركم بس خلصت البطاريه ما انشحنت الا بمرات
وهذا جبل كميت بمرات

فله ذا الجبل فيه فوق الحدائق المعلقه لاتفوتكم زوروه < ترى صدز أسألوا اهلهاا

وخذيت لي غطه لين وصلنا شقراء < أمحق خوي من اولها نوم

بصراحه الشقراء هذي مهيب هينه غابات وانهار وشلالات < ماينعطى وجه

وأخيراً وصلنا للمفرق وانتقطع الزفلت وجا وقت تنسيم الكفرات

وش رايكم بالعزبه كلها مويه وعصيرات < بينجلد

وصلنا بالوقت المحددوبما اني الشقردي فيهم نزلت لهم العزبه وسويت لهم العشاء < ترى مهوب يتسذوووب

يم يم

تراها كبسة حاشي مهيب ضبان الضبان بكرة توكم ماشفتو شي
لاحقين على حومة الكبد

وش رايكم بالحبحب على السكين تعطيك عقب العشاء

تدرون ليش صورت الترمس ..؟
لانه من يوم خلقت مابعد كشت مع احد الا ويصير ترمسهم بورتقالي
أبي اعرف وش السر بين اللون والطعم

وصبح صبح ياعم الحج

بعد طلعت الشمس وبعد ماصلينا الفجر جاء وقت الفطور

بر وعلوم مراجل واخرتها معلبات
مربى بطيخ وقشطه وكرفت دنمركي < يتحرش
كلها تهووون بس تونه < لوني كاشت مع قطاوة الله يعز النعمه

وبعد الفطور والصحصه على كوبايت شاااي جاء وقت المراجل

بدأ وقت توزين الرشاشات قبل المقناص< أومااا عاااد رشاشات سيكتون ومنعفطه
على فكرة ترى السلاح مصرح به على ماأظن < يبي يوهقهم

وبعدين الله يسلمكم بدت الرحله وقاموا الشباب بتصفيط الزل
عاد انا ماعندي شغله خذيت الخيزرانه وقمت اشخمط < هذا اللي فالحن فيه

والحين بدت الرحله ومطولين على ابونايف
البر يشرح كل صدر ويقلب الضيقه سرور ** وانا الاجيته يمر الوقت ماأحسب له حساب
ياما حلى طوي الخبوت وسجت الخاطر شهور ** ولامعك غير النشامى اللي يعزون الجناب
الله الله
شيلووووه

بلله وش رايكم بالصورة ..؟

وبدأ الشغل الصح وخذينا لكم مقتطفات علشان مانطول عليكم
هذا ابوراكان يصوب على هذاك اللشسمه

بااانق باانق وصادوووة للمرة الثالثه < هع
طبعاً الديره اللي حنا فيها نظامها تصيد ضب يعطونكـ واحدن مجان< قايل لكم مهوب تسذووب

وهنا الله مير يسلمكم ويحييكم عملية تسمى غر الضبان بالماء
نتترككم مع الصور
بطولة : أبو سارة

والنتيجه كالتالي
قايل لكم واحد مجاني بس ماصدقتوني < بينجلد

وهناابو ابراهيم الله يعطيه العافيه السفاح حقنا شغلته تحليل الضبان < شكله بيذكيني

وأخيرأ وصلنا للمقيال وفي رواية المضحى وكلن يسمي على كيفه
الزبده انه المكان اللي بنتغدى فيه

وهذا حصاد اليوم

طبعاً ماكثرنا بس حق الغدانا وعشان

صراحه البيض شي ثاني
الكشته بحال والبيض لحاله < أفكر أفتح مشروع لبيع بيض الضبان
انت تخرج الحين وفيها 1000 حلال

هنا ابوسارة يشلوط الضبان على النار

دام ابوسارة معك مايحتاج ملقاط < قل ماشاء الله

وبعدين قمنا بتحكيك هذا اللي محترق علشان ينظف < مسوي مشتغل معهم

حتى اصبحت هكذ

وجاء وقت الانتظار نتقهوى في الحررر اللي شوان شوي
بس على قولت الدووب فايز نسوي تاااان

ونلعب سبعه نضيع وقت
شباب نصيحه للي مايعرف يلعب بلوت يتعلم لعبة السبعه
حقت غشماااان بس نلعبها علشان الكل يشارك
بس فله اكثر واحد يقعد ساكت

تراااااااا لقد عدنا
وهذا كبستنا الضبيه < صاقط بالتعبير

أبوووك يالاخراااج

يم يم

وبالهنا والشف العاجل

عاااااد أقولكم : فيه ناس مايحبون هالحركات مثل ثلاث ارباعكم
عاد مضبطين انفسهم ومجهزين اعمارهم بكبسة لحم

وبعد الكبسه ودق بالخمس والتدليخه اللي على كيف كيفك
ج وقت التبطح
كلن مسك له زاويه ورقد < ال ان مدري وش مقعدني بهالقوايل

الين جاء العصر وصلينا وقمنا ندوج شوي لين جتنا ذيك العجه اللي خربت علينا ورجعنا مع المغرب
تصدقون لولا العج كان قعدنا اسبوع من الوناسه < اقول اهااا بس ماصدق على الله ترجع

وعلى قولة :سعد بن علوش
بري حالي لانتهى العصر وأعلن لأنسحاب ** وخلت الشمس الصدارة ومالت للغروب
وأذن المغرب وساد الفضاء مثل الضباب ** وأظلمت والليل لبس الاماكن لبس ثوب

وعاااد يروح فيها أبوعلوش لين تنتهي القصيدهـ < توهق
واذن المغرب وسريناها للبيت

وفي الختاااام الله يسلمكم
اللي جازت له الرحلة يولم قطته بعد الاختبارات
واللي حامت كبده ولايحب هالحركات لايزعل علينا يتقبل الموضوع بروح رياضيه
وبس
لاتنسونا من الدعاااء بالتوفيق بالاختبارات
فوووتكم بعاااافيه

تقبلووو تحياتي
.. فارس الكلمه ..

مقالات ذات صلة

‫43 تعليقات

  1. عجبتني الصوور والرحله الحلووه وبالعافيه بس ابي اسال هو شلووون صاير طعم الضباان شكرااااا

  2. هههههههههه ينعن ام الفلهـ اللي عشتوها ليتني معكم 🙁 << تقلعي بس الصراحهـ اول مرهـ بحيآتي ارد علىآ موضوع بهالشبكهـ بس روعهـ موضوعكـ اجبرتني ارد << قولي ق الله مير يسلمكـ ع الموضوع الرائع وتقبل مروري

  3. ماشا الله .. تبارك الله .. بصراحة : إبداع من جميع الجهات .. وشغل على كيف كيفك .. وشي يفتح النفس .. ومناظر تاخذ العقل .. مشكووور على هيك موضوع ..

  4. كويتيه>>>تسألين عن الطعم حدث ولا حرج والله حركه ودي بالطلعه وطرد الضبان لكن الله يقطع خشم الاختبارات شكل حالك من حالي متخرج مشكووور بالتوفيق

  5. السلام عليكم ورحمة الله اخي فارس رحلة ممتعة والحمد لله على السلامة صور غطت الموضوع تغطية شاملة ( تقول ابراج الإتصالات ) ماشاء الله تبارك الله لكــــــــــــــ( ويلك من لكن ذي )ــــــــــــــــن من وين بعثتوا مربى الجح ؟!! اخر مره شفته انا كان عام 1392هـ :9 اما رسمتك لأينشتاين فتدل على موهبة في الطريق شكرا لك

  6. إتقو الله يا أخوان ، الجميع يعرف أن الحياة البرية والكاءنات البرية لدينا في الممكة في طريقها للإنقراض . ونحن في خير من العيش والبدائل موجودة في كل مكان . لماذا هذا العمل اللامسؤل من قبلكم ؟! لماذا هذا الإفتراء في البحث عن تلك الحيوانات في بطون الصحاري وذبحها وأكلها ؟ هل هو الجوع ؟؟ فعلاً شعب لامسؤل ولا أدنى إحساس بالمسؤلية والنظام . لا … وتنتظرون الأمطار .

  7. بصرااااااحه يافارس رحله جميله وحاب أقول للأخ سعود السعود المطر وقف على صيد الضبان !!!!! هع هع أجل لا عاد تاكل الخرفان وماأدراك مالخرفان موضوع جميل واللي محلي الموضوع التصوير ياأخي حسيت أني معااااكم موفقـــــــــــــــــــــــين

  8. ما شاء الله وش هالزين تقرير مســـــــــــــــــــــــكت و التعليق احسن ما فيه و الله وانا اخوك الضبان هالسنـــــة ماش منقطعــــــة ما جاها ربيع حتى صولر الضبان مبينة ما فيها ثروووووووب انا طلعت مرة و لحقت واحد قاعد ينلظرني و حالته تكسر الخاطر مسكته و وديته لمحل ازين من اللي هو فيه اما الاخ اللي زعلن عليك يقول لا تصيدون الله يهديه وش انت شايف الشباب الله يقويهم ما صادوا الا على قدر حاجتهم ما كسر خاطري الا المكون هالبيض حسافة يروح ……… جزاك الله خير و الى الامام

  9. السلام عليكم ورحمة الله وبركاتة مشاء الله رحلتكم موفقة وصيدكم طيب ياليت تعلمني ووين موقعكم ولاهنت شكرا

  10. والله يافارس طلعتكم حلوه جدا ياخوك حمستنا على البر بس درجة احراره هاليومين فوق 45 .. لكن احلى شي اللي امنوا لهم الكبسه خخخخخخ عوافي يارب

  11. الله يعطيكم ألف عافيه ألف عافيه أخوي فارس الكلمة. والله وي برحلات زي كذا في الربيع

  12. ياوجدي على الضبان يالذيب والله لي حول سنة ماذقتها ومشتاق لها لكن الظروف ما تسمح وتعجبوني انكم ما صدتوا الا حق عيشكم بعض الناس يصيد فوق طاقته ويتوهق بالباقي وبالنسبة سعد السعود .. ياخي انت وش محرق رزك!!! دام الواحد ما يصيد الا قدر عيشته مافيها شي ياخي!!

  13. ما شاء الله عليك، أنت فارس الكلمة والصورة!! أما الرحلة فهي روعة ،هذي الكشتة وإلا فلا !!مع إني حزنت على الضبان المسيكينة وتقززت من شكلها وأنتم تاكلونها ،بس الطلعة وناسة بالمرة . والله يوفقكم ويسهل أمركم في الاختبارات وغيرها. ودمت سالماً أيها الفارس الهمام ….

  14. يالللللللللللللله ياللللللللللللللله يمين بالله ياعندكم قلب ماعمري شفته احد ياكل وزقات يالللللله ويم ويمي على ايش وربي قلبينها محرقة يهود جالسين تشون في الرجال وكبسه كبسه وربي كنت بطرش على الابتوب يالله ماني مصدق هذا يذبح من جد ويقطع الراس كانه طلي وربي لازم تعملون دورات على هذي الاشياء لااااااااااا وجيبين ببسي وربي مخلينها مطعم غوزي كويس ماحطيتوا مكرونه على الضب وربي اهنيكم على قوة قلبكم بصراحه واحد يصيد الضب بمسدس خلتوا غزال مو ضب راسه راح فيها كانه صاروخ جاء في راسه مو رصاصه بس طلعه خطيييييييير

  15. بسم الله الرحمن الرحيم.. الصراحــة تســــلم ايدينـــك على هالتقرير ولاا اروووع …… كله كووم واللي مامنين لهم كبسه لحم كووم ثاااااني هههههههههههههههههه الله يعطيك العافيه ,,,,

  16. ماشاء الله رحله جميله وتصوير وتوثيق رائع كله من استاذك الكبير هههه ابداعات يافار س الكلمة بس ابطت البطارية هههههه

  17. تقرير ولا أروع بس الله يهديك يومنك متعيجز تطلع راسك من السيارة عشان تصور ,كان أقلتها شي غسلت السيارة وألا على أقل تقدير مسحت القزازة خخخخخخخخخخخخخ أما فطوركم كوم ومبربى الجح كوم ثاني ياني كحيت من الغبار ياقدمه الحق ينقال طعمه خيال . لكن عندي سؤال وش طعم الضب؟؟إذا شكله بهالقرف الله يديم النعمة كيف بيكون طعمه استغفره الواحد يقعد بجوعه ولا يأكل هالكائن الغريب بالتوفيق اخوي بامتحاناتك والجميع

  18. صراحه ابداااااع التصوير والي محلي الموضوع تعليقاتك ^_^ وبالعافيه عليكم الضبان ومطرح مايسري يمري<< الله يكرم الفضل

  19. الله يوفقكم الرحله حلوه مرره بس 180 السرعه موطايره الدنيا بتلقون الضبان <--تمزح بس بيض الضب قرفتني وع لحم يابس ههههههههههههه موفقين ومره ثانيه لاتسرعون لانكم راح تضررون وتضرون الي ماشي بالخط الى اللقاء في رحله بدون فطور احسن عشان ماتنشطون للصيد خخخخخخخ

  20. حركات والله تضبيب متعووب عليه والصووور اما الاخ اللي يرد ويتفلسف مسوي من الحياة الفطريه هعععع خلهم يستمتعون دام ان صيدهم غير جائر ولاتحرمن من جديدك..

  21. كان عندي امل اني اكل من عكرة الضب على شاني لكن تصدق عقب صورك هذي ماعاد اطيق اشوفه لا وبعد لو تبي ضبان على مستوى خروف اضرب خط الشمال من يم النعيريه الى رفحا وانت تشوف انتبه لايشكني الضبان على منظمة حقوق الحمير

  22. اولأ ، يا اخي العزيز ، سعود السعود ، طالما إن الموضوع حلال ، والذبح بالطريقة الاسلامية ، ناهيك عن كون الشباب لديه طاقات مختزنة كبيرة ، ايش المانع من الاصطياد بالحلال، يعني اذا داجوا الشباب في الشوارع ، القيتم باللوم عليهم، ياخي العزيز الشباب ارادوا ان ينفسوا عن شئ مما في داخلهم بطريقة لا ينهى عنها الشرع ولا العرف ولا الاخلاق ، لكن قصة الحياة الفطرة وهالخرابيط والافكار الاجنبية ، ما انزل الله بها من سلطان، انت في دولة اسلامية ، وخل عنك التطبيل والفلسفة . واذا على نزول المطر ، ما شاء الله عليك ، فعلا اللي يصيد الضبان اصبح مذنب ولا يرجوا مطرا ولا مغفرة.؟؟؟؟؟!!!!، ياخي تكلم في شئ يقبله العقل ، اصبحت الضبان هي الحاجز الوحيد لقفل باب الرزق ، ونسيت يا حضرة الاستاذ سعود القروض الربوية والتأمين و … و…. الخ. ، اخوي ابو سعود ولدك ترضى له يطلع مع رجال يخاشرهم في سلوم الصناديد، ولا تبيه يطلع يسربت في الشوارع من دون فائدة ، وعلى فكرة ياخي ربما هالصيد اللي بعرق جبينهم أحب إلى الله من بعض الرواتب الغير مشروعة . انتهى

  23. يعطيك العافية اخوي .. تصوير جدا رائعـ ورحلة جدا ممتعة .. بس لونك مصور لمرات وشقراء والدير المريت فيها صور اكثر .. كان تصير توب .. علشان بس الناس يتعرفون اكثر على المحافظات … وشكرا مره اخرى .. يعطيك العافية .. تسلم يدك اخوك.. ابو شهد

  24. والله باتقوطرت سعابيلي الله يهديك بس ماعلمتون مفروض تحطون إعلان عن الرحلة اما عن تعليق الأخ الدحمي اها بس لو انك تذوق كبسة الضبان ماعنك وعن البران كل نهاية اسبوع فارس الكلمة الله لايهينك كثر من هالمواضيع الروعة ولاتنسون المرة الجاية

  25. لا جد والله اول مرة اشوف طريقة الصلخ والطبخ . حنا اذا بغينا نصلخ الضبان اول شئ نطبخهم بماء حار وبعدين نطلعهم ونصلخ جلودهم حتى العكر بعد نصلخهم . وبعدين نطبخهم بدون كبسة رز … يعني ايدام ولحم بس ناكل اللحم بخبز والايدام نرشفه رشف .. يعني نشربوه شرب هههههههه الله يعطيكم العافية وياليت لو انت قانص ارانب لان هي الرحله الممتعة صدز

  26. واوووووووووووو صراحه رحلة تهوس………اي تجنن ينفع مدرسات يروخووون معكم هههههههههههه بس صراحه ضبان وبيبسي ماتصيرررررررررررررر

  27. كبسه كبسه ابي كبسة الحاشي مالي دخل امييييي ابي كبستهم..:( ماشاء الله كبسة حاشي وصلتني ريحتها>>امسكو الارنب الصرحه كشته خطيره وفطور خطير وكبسة حاشي لذيذه>>كبدي لاعت من الضبان ما ادري كيف اكلتوها ماشاء الله على فكره ماشاء الله اللي طبخو الكبسه ناس محترفه لونها جنان ممكن طلب اقطع يدين اللي طبخو الكبسه وارسلها لي اطبخ فيها وارجعها لهم:)

  28. الموضوع رائع والرحله مره روعه ومو مخرب الرحله الا طبخة الضبان هههههههه مادري كيف كذا ماستوى عدل الضب نيء ..!! وكيف كذا ذبحه يااااي الرقبه ماطاح الراس اكلتوا البيض نيء ياااي ..!! بس الرحله حلووووه وشئ وفله .. يعطيك العافيه

  29. مساكين الضبان رحمتهم صديقك ابوساره مررره سفاح الله يهديه يقتل الضبان بطريقه بشعه ):

  30. فارس الله يهديك لو انك مرسل لي كول مي قبل لاتروح اخاويك هههههههههههههه ياخي رحلة جنااااان لو انك مكمل سيدة للدوادمي والقرنة بتلقى هناك ضبان شي بس روعه من جد وسلمني على ابو سارة قلبة قوي ماخاف من العقارب لانه معروف العقرب عمة الضب انا بصراحة ما اكل الضبان بس احب اقنصها .. ذكرتني ايام زمان والله الرمي فلة بس تصوير حلو وكاميرتك ماشاء الله عليها تصويرها واضح مرة تقرير رائع والتعليق اروع سلمني على النشاما اللي معك وان شاءالله بسوي رحلت قنص قريب قريب سلام

  31. اللللللللله أحلى شيء فطوركم وخاصه مع حليب بوني وااااااااو بس سؤال وشو هالشيء اللي في وسط بطن الضب ييييييييععععععععع قسم قلبت كبدي مدري كيف تجيكم نفس تاكلونه الله يكرم النعمه يارب ولا يحدنا احس كل جسمه جلد ويابس بعد وش لاقين فيه .؟. هو فيه لحم اساسا .؟؟. والا بس هالدوائر استغفررررررر الله كل ما ذكترها تأزمت حالتي 🙁 المهم ترى المره الجايه مكاني بالصندوق ولازم تطعسون فينّنّ 😀 وأهنيك على تصويرك جونااااااان وقصصصمن باستثناء الدوائر والدم والسفاحه

  32. السلام عليكم ورحمة الله وبركاته ماشاء الله تبارك الله رحله موفقه وصيد موفق اهنيك على الصور بأنتظار جديدك

  33. الصراحه يوم شفت هالايميل قررت اوقف اكل اسبوع.تري الطبيعه حلوي بس تنظيف الضب اكله ابدا مو حلوي..يعني كان مولازم تحط هالصور يا اخي..تحياتي

  34. يمال العافية أخوي فارس الصراحة كشته ترد الروح السقيمة ذكرتني بأيام جلد الضبان والله ياعليه طعم هبال والعكرة لحالها واللي منقرف من الضبان أقوله : أخشوشنو فأن النعم لاتدوم أكرر شكري لك أخي فارس على الرحلة والتصوير والشباب النشامى نصيحة أخوية /حبيب قلبي لاتسرع فأنت غالي علينا وربي يوفق الجميع بالامتحانات

  35. وهـ بس وهـ يازين البر زينآآه مع اني ما احب الضبآن اذكر يوم كنت صغير ما آكل الا كعرة الضب الحين ما ادانييه بالمره ريحته بالبيت مهيب زينآآه ابد .. : بس من جد ما شاء الله عليكم طلعة رهيبة كذا الشباب والا فلا وناسه فيما احله الله .. الله يهنيكم ويثبتكم .. : واللي يقول المطر ماينزل من الضبآن بالله باسألك سؤال .. هل في احد الايام جاك ضب واشتكى منهم ! اللي منع الامطار المعاصي اللي منتشره في كل مكان عقوق الوالدين .. سماع الاغاني .. الافلام …التدخين .. الربا .. الخ : ههه قال ضبآن قآل الناس يصيدون ويبلعون .. ماصادوها وحذفوها : ياخي مره ثانيه ثمّن كلامك لاتسوي فيها حقوق الضبان هههه : تسلمون والله يالرجاجيل على هالطلعه والفله ربي يسعدكم دوم الدوم

  36. ماشاء رحله روعه تجنن بس مدري كيف طعم الضبان يووووووووه الحمد لله

  37. ابذمتك تسافروتروح بر عشان ها القرف قسم بالله انكم اشوي وبتاكلون فيران مثل الاسيويين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى