رسائل المجموعة

انشر تؤجر .. مهزلة الاستعطاف

السلام عليكم ورحمة الله وبركاته
أعزائي أعضاء مجموعة أبو نواف البريدية

بداية أود أن أشكر الأخ الغالي أبونواف على هذه المجموعة التي أنتمي لها منذ بداية انتشارها حتى هذه اللحظة .. لم تسعني المشاركة فيها من قبل الا مرة واحدة قبل أيام قليلة لنشر مقال لي قد كتبته بعنوان
الجدار بين الماضي والحاضر

والآن أطل عليكم بهذه الشخبطة التي تصلكم من بقايا مخي المصون .. واسمحوا لي أن أستخدم اللهجة العامية لبساطتها
اليوم أبغى أتكلم شوي عن شغلة بصراحة كثير قبلي تكلموا عنها .. وهي موضة انشر تؤجر !! وما يلحقها من عواقب

اخواني اللي ترسلون الرسائل اليومية واللي تكتبون بالمنتديات واللي ترسلون بالجوال .. أبغى أسألكم مجموعة أسئلة .. هل تعتقدون ان اللي ترسلون له  ما عنده عقل يفكر فيه ؟ كبر في هالدنيا وهو ما يعرف الصح من الخطأ ؟ ما يعرف الحق من الباطل ؟ ما يعرف يقيم الأمور ؟ طبعا الجواب بيكون لأ طيب دام لأ .. ليش الاستعطاف وتذييل الرسائل المفيدة بعبارة حامت كبودنا منها وهي انشرها ولك الأجر .. لا تحرم إخوانك ولا نفسك من الأجر .. تحدى شيطانك وتحدى نفسك ومدري وش من هالكلام الفاضي .. ما أنكر ان بعض الرسائل الواحد يلقى نفسه مشدود انه يرسلها للأهل والأصدقاء .. لكن يا جماعة الخير اتركوا المجال شوي للعقول انها تقييم أفضلية النشر والتمرير من عدمها !! إلى متى هالمهزلة ؟

يعني فيه مرة رسالة وصلتني فيها حديث .. ما أقول انه موضوع .. لا ولا أحب هالتسمية .. اللي أحبه هو انه يكون اسمه حديث مكذوب على النبي صلى الله عليه وسلم .. وصلني من أكثر من شخص .. وكلهم مرسلين الرسالة وفي ذيلها .. انشرها لتكسب الأجر وتكسبني الأجر .. طيب انت يوم بغيت الأجر الله يجزاك خير .. هل تأكدت من مصداقية الحديث وسنده وصحته ؟ والا الانترنت بالنسبة لك ثوابت ومسلمات تخلوا من الكذب والافتراء ؟

طيب الكثير من القصص اللي تجينا والرسائل والعبر أغلبها ما لها أي أساس من الصحة !! طيب كيف توثق بالمرسل ؟؟ معليش اسمحوا لي بهالتعبير .. لكن كاتب هالرسالة الأصلي .. احنا ما نعرفه وما نقدر نثق فيه .. يمكن هو يستخف بعقولنا .. يعني نترك له المجال يستخف بعقلي وبعقلك ؟ طيب إلى متى إخواني بنستمر بهالمهزلة والمساهمة فيها ؟؟

يا إخواني ما أبغى أطول عليكم .. لكن أبغى كل شخص مننا وأنا أولكم .. ياخذ عهد على نفسه انه لما تمر عليه رسالة هو متأكد من صحتها .. يتأكد أكثر من خلوها من الدعوة للنشر لان المستلم له عقل وله مبدأ .. ويقدر يقيم الرسالة إما يمررها أو يحذفها .. بدون أي مؤثرات عاطفية .. وإذا ما كنت متأكد من صحة الرسالة .. ما يحتاج تمررها وتزعج غيرك برسائل هو في غنى عن انه يتأكد من صحتها بنفسه أكثر وأكثر

انشر تؤجر .. لا أقول دائما .. ولكن أحيانا تكون مصيبة .. فلا تسمح لنفسك انك تساهم في نشر هذا الداء

وقفة .. لا أشوف هالرسالة بكرا بالمنتديات والمجموعات باسم غيري .. وتحتها مكتوب ..إن لم تستفد منها .. انشرها ليستفيد منهاغيرك 

ختاما .. انشر تؤجر

بقايا مخ .. لمخ باقي

مقالات ذات صلة

‫44 تعليقات

  1. ياخوك اقلقتنا هالرسائل رسالتك ذي راح انسخها وارسلها لناس عندي مسوين قلق عشان يفهمون 🙂 تسلم يدك على ماكتبت ..

  2. أشكرك على مجهودك …ولكن:>اذا كان الشيء المرسل صحيح وفيه أجر فعلا :)فما المانع من كتابة تلك العبارة B وذلك يدخل تحت قوله تعالى ( وذكر فإن الذكرى تنفع ىالمؤمنين) مع احترامي الشديد لمخك المتبقي… انشر … تؤجر

  3. صح لسانك اخوي لاااااااا وبعض الايميلات فيها دعاء عليك اذا مانشرتها الله يعين بس

  4. يسلم لنا مخك وتسلم على هالكلام الدرر فعلا لازم يكون فيه توعيه في هالمجال وانا شخصيا مستحيل ارسل اي ايميل ديني احس انه غريب او جديد علي..مانقول إلا حسبنا الله ونعم الوكيل وأذكر بقول الرسول الكريم: ((من كذب علي متعمدا فليتبوأ مقعده من النار)) لاهنت بقايا مخ

  5. السلام عليكم.. عساك على القوه أخوي صراحه صح لسانك أختك با لله الي جالسه تكتب لك أساسا مالي با لنت وتقريبا صارلي أقل من شهر وأنا مشتركه في ها لمنتدى الوحيد من كذا شاده حيلي وسويت فيها أبي أكتب موضوع على أساس الكل يقراه والله ما لك علي يمين كان هذا الي في بالي لكن الي طيح وجهي طلعت زائره مسكينه وأنا مادري وش الطبخه المهم وأنا أختك أنت كفيت ووفيت لا تقراء كلامي وتقول تتكلم واجد وفاضيه أسفه على الايطاله الله يسعدك:D:D:D:D

  6. موضوعك جميل واتفقك معك الا بحاله واحده اذا كان الموضوع جميل وفيه فائدة لمستقبل الرساله ابي اكتب بآخر الرساله (انشرها ولك الأجر) هل هذا حرام أخوي ؟ بعدين مو كل الناس مثلي ومثلك فاهمين وعارفين ؟ والدليل على ذلك انسياقهم وراء العبارات هذي صح كلامي والا غلط اذا أنا غلطان ياليت تصحح

  7. 😀 كم بقي في مخك قرارة والاحكاكة والالحاس عموما مشكور على التنوية وابشر ليعونك وعيون حبيبنا الغالي ابونواف

  8. معك 100% بسالفت نقل المواضيع من غير التأكد من مصادرها وضدك بـ 70 % على أقل تقدير بسالفت كتابة انشرها تؤجر لأن الدال على الخير كفاعله قال تعالى وذكر فأن الذكرى تنفع المؤمنين وبالنسبه لي مو كل مايجيني من رسايل مذيله ب انشر تؤجر اروح انشرها إذا اعجبتني وحسيت أنه فيه أحد راح يستفيد منها راح ارسلها أما إذا ما أعجبتني فـ راح أقول جزاك الله خير ولا راح أتذمر منها أبداَ …

  9. بارك الله فيك .. لكنك متحمس شوي .. فعلا .. تحصل بعض التجاوزات .. ومن الطريف .. واحد مرسل لي (( فلان ناجح من الثانوية .. انشر تؤجر …))

  10. يسعد ايامك ياشيخ وربي صجوني بهذلوني احيانا ً يعجبني المسج بس اذا شفت ( لو مانشرتها بتدخل النار ، امانه في رقبتك ترسلها ) احط ديليت عناد 8) ماقصرت والله

  11. تسلم ايدك ويسلم مخك جيت على الجرح صراحة لان الرسائل هذي فيها استخفاف كثير بعقولنا دايم احذفها كل ماجتني النوعية هذي يسعد صباحك مرة ثانية

  12. ماشاء الله على بقايا المخ معليش أعذرني إن لم تستفد منها .. انشرها ليستفيد منهاغيرك

  13. مشكور أخوي بقايا مخ .. أنا عن نفسي لا يمكن أن أمرر رسالة إلا إذا أعجبتني واحسست أنها تستحق الإرسال … وأنشر تؤجر .. فيه ناس تبالغ فيها (( جعلك في النار لو ما أرسلتها لـ 10 من أصدقائك !!! )) لكن إظهارك لها بالشكل .. فيه إجحاف … الإنسان يحتاج للذكرى والتذكير دائماً … والحسنه بــ 10 أمثالها و نشر الخير و الدال عليه كفاعله … وطبعاً أكيد ما راح ترسل شيء أنت مو متأكد منه … سواء في أمور الدين أو غيره .. لانه خدش في مرؤة الإنسان أنه ينقل معلومه غير متأكد منها !!!

  14. السلام عليكم اخوي الواحد اذا تاكد من صحت الي مرسل له,,, يحاول ينشرها ليعم الخير ,,, لاكن في ناس ذكر الله مايبونه>> هذي الي تنرسل لذكري تذكر بعقاب الصلاه وتذكرنا بذكر الله دايما اذا نسيناه وحنا علي هالشاشه جالسين ,,, وشكرا:$

  15. لا خلاف علي ان القلب يصدأ كما يصدأ الحديد ومعلوم ان الحديد الصدئ اذا اردت تقويمه ينكسر فذكر ان الذكري تنفع المؤمنين وبعدين انت معك مخ او بقايا مخ فتقرر ايهما غث فلا تهتم وايهما سمين فتنشر . ومن ركز علي شذوذ ففي القاعده لديه شذوذ 8) تحياتي

  16. اخواني بالنسبة للأخت هديل .. تقدرين تسجلين وتصيرين عضوة في القروب وتوصلك المواضيع كلها بالايميل .. أما عن الاخوان اللي قالوا ان بعض الرسائل تستحق النشر .. أنا ما أختلف أبدا معكم .. والذكرى تنفع المؤمنين .. لكن سالفة انشر تؤجر صارت مهزلة هاليومين .. علشان كذا انا نوهت ان الرسائل تخلو من الدعوة للنشر .. لأن مو كل الناس بنفس تفكيري وتفكيرك .. ماهو حرام انك تذيل رسالة انت متأكد منها بدعوة لطيفة للنشر .. ولاهوب انا اللي أفتي انها حرام أو حلال أو مستحب .. أبدا .. لكن الكلام هو ان فيه ناس الله يهديهم .. يشوف الرسالة جاية من فلان .. الكلام فيها أعجبه وهو يحب فلان ويحترم أفكاره بغض النظر عن نوعيتها .. وتتكرر هالحركة من واحد لواحد .. ونلقى هالرسالة بكرا حديث المجالس .. ومنتشرة حتى برسائل الجوال .. وكلها بحسن نية .. طيب الواحد ليش يقرب الشبهات ؟ الذكرى تنفع المؤمنين .. ما أختلف .. ومن حقك تذكر أخوك المسلم .. لكن ما قصدت .. هو الابتعاد عن مواضع الشبهة .. مو أكثر أشكركم على الردود .. نختلف في وجهة النظر .. لكن تبقى المودة بيننا ..

  17. جدا عجبني رايك ووجهة نظرك في الموضوع لان اغلب المواضيع تستخف بعقول الناس فعلا تكفى تكفى ابوس ايديك انشرها ؟ الاسلام عمره ماكان بهذي الطريقة ولكن اصبح النت داهية عظيمة غسلت عقول العالم

  18. أما موضوع التثبت من الأحاديث .. فهذي بحق .. مثل ما قلت .. كثير من الرسائل تاصل ويطالب صاحبها بتمريرها .. لكن يوقفني عدم التأكد من صحة الحديث !! ما أذكر مرة جاني واحد يطالب بتمرير رسائله وقد خرّج الحديث أو ذكر المصدر ، ليساعد غيره على إرسالها .. مشكور أخوي مخ !!

  19. :):):)لاتخاف برسل الى كل عزيز وغالي بس عشان اساعد في نقل الرساله :):):)

  20. قرأت طرحك لموضوع ( أنشر تؤجر) وقرأت أيضا التعليقات من الأخوان، ومع أن طرحك كان موضوعي و منطقي، حبيت أضيف شي مهم، كثير من الناس ما يعرفونه، وهو السؤال: لماذا يرسل هؤلاء الأشخاص هذا النوع من الرسائل؟؟ هذا النوع من الرسائل يسمى علميا( الرسائل المتسلسة)Chain Letter والذي يعطي عائد نقدي لصاحب الرسالة عند ارسالها لعدد معين من الأشخاص بدون جهد كبير مستغلا العاطفة والحالة النفسية لديهم. طبعا كثير من الناس ما يعرفون هذا الشي، ويقومون بأرسالها بغية الأجر أو ماشابه ، ولكن هناك شخص آخر ( صاحب الرسالة : المرسل الأول) ما يريد الآ المصلحة المادية. جزاكم الله خيرا، ووفق الجميع لما يحبه الله ويرضاه

  21. لا يا عزيزي ما يصير الكلام اللي انت قاعد تقوله .. انا معك في مسألة التأكد من مصداقية الرسائل … ولكني مو معك في اضافة عبارة انشر تؤجر .. وش فيها لو ذكرت اخوك بان الرسالة فيها اجر .. وبعدين يمكن اطيح بواحد مثلك ما بقى شي بمخه علشان لازم انبهه واذكره واقوله انشر تؤجر

  22. قلت الكلام الي كنت ناوي أقولة من زمان , والمشكلة بعض الاحاديث فعلاً مكذوبة عن النبي صلى الله علية وسلم .. اذكر رسالة أتتني قبل ثلاث سنوات . من قبل أحد الأخوات تخبرني بقرب يوم القيامة بالتاريخ حتى .. وتطلب مني بشدة نشرها لجميع من أعرف .. وقتها فقدت اعصابي من شدة سذاجتها وسذاجه رسالتها .. وأخبرتها بأنها اذا ارسلت لي اي رسالة مستقبلية لاتحترم عقل المتلقي سوف يكون الحظر والدليت مصيرها .:D .. وفعلاً لم ارى منها اي رسالة تذكر بعد رسالتي لها .. اشكرك فعلا ً على هذا الموضوع ..

  23. والله صادق أخوي صح مانختلف في بعضها تستحق النشر وتتمنى الكل يقراها وحلو انك تذكر الناس بالخير وذكر الله بس بصراحة هالشغلة زائدة وخصوصا الي يحسبوا حسناتك كم حتكون هاي الشغلة ابدا مو حلوة الله عز وجل هو العالم بالحسنات وعددها مو العباد موضوع جميل وهادف بصدق سلمتم

  24. والله فعلا يا أخي بقايا مخ كلامك صحيح وبعدين بضيف حاجة وهي أحيانا وفي بعض الرسائل يحلفك بالله ويقولك أمانة في ذمتك ليوم القيامة أنك ترسلها وإن مارسلتها راح تكسب ذنب وأشياء كثيرة مالها داعي وتدل على جهل صاحبها في الدين وفي المنطق وأنا يا أخوي جاتني فعلا رسالة لحديث مكذوب على حبيبنا صلى الله عليه وسلم ولم أكن أعلم ثم بحثت في النت عن صحته ووجدت موقع خاص لكثير من الأحاديث المكذوبة وفتاوي شيوخ وعلماء معروفين فيها مثل إبن عثيمين وغيره وقمت بإرسالة الفتوى لصاحب الرسالة وأعتذر فورا وأخذ عهد على نفسه للتأكد من ذلك دوما وأحب أفيد أخواني وأخواتي هنا في شبكة أبو نواف بالإستفادة من هذا الموقع الذي سيفيدنا بإذن الله فيماسبق التعليق عليه : http://www.islam2all.com/dont/dont.htm

  25. تسلم يالغلا ويعطيك الف عافية …… في انتظار جديدك

  26. بالعكس هالشي من باب التذكير صح لازم نتحرى من صحة الرساله بس جميل اننا نفيد بعض حتى لو غصب 🙁

  27. بداية اقتباس مشاركة [احساس رسام زائر 67691 كبر مخك شوي !! 20/04/2009 13:10:42 لا يا عزيزي ما يصير الكلام اللي انت قاعد تقوله .. انا معك في مسألة التأكد من مصداقية الرسائل … ولكني مو معك في اضافة عبارة انشر تؤجر .. وش فيها لو ذكرت اخوك بان الرسالة فيها اجر .. وبعدين يمكن اطيح بواحد مثلك ما بقى شي بمخه علشان لازم انبهه واذكره واقوله انشر تؤجر أخي صاحب الرسالة أعلاه .. الموضوع أنا أرسلته .. ويعبر عن وجهة نظري .. جميل جدا ان نتناقش ونتحاور .. ولكن .. أنا لا أجبرك على أن تقتنع بوجهة نظري .. ولا أقول أن ما يخالف كلامي خطأ أو أدخله في متاهات الحكم الشرعي التي أجهل السير فيها .. لذلك لا تتعصب لفكرتك أخي بارك الله فيك] نهاية الاقتباس أنا أقصد مجرد أن نقف عن هذا الشيء .. من لا يستوعب نشر العلم ونشر الأحكام الشرعية وتوعية الناس .. فهذه مشكلته الخاصة .. وأنا أوجه الرسالة له .. من وجهة نظري .. أننا نستطيع الاستبسال في الحديث عن طريق الرسائل عن أهمية نشر العلم .. فيكفي خيركم من تعلم القرآن وعلمه وتكفي بقية الأحاديث .. فبالقياس يفهم الألباب !! أخي .. عندما يتأكد الشخص من مصداقية الرسالة أو الموضوع .. وصحته .. فلا أعتقد أنه مخطئ حين يذكرك بنشر الرسالة .. ولا أحتاج عندما أكتب موضوعا عن مهزلة استغلال التذكير باستحباب نشر الخير وتعميمه .. أن أستثني أو أخص أو أذكر كل نواحي وجوانب الموضوع وأعطيه أكثر من حقه وأطيل أكثر ليمل القارئ من الموضوع قبل إتمامه .. فانا أتحدث عن مهزلة الاستعطاف .. وأشرح وجهة نظري أن الرسائل التي تستحق النشر لا تحتاج إلى طلب نشرها بالأساليب المبالغ فيها .. فإن كنت معارض .. فلك حق المناقشة والحوار وليس أن تتهمني بالخطأ .. لأنها وجهة نظري وليست علما أو فتوى أنقلها نصيا .. وإن كنت مؤيدا فلك حق التعقيب أو الإضافة أو التوضيح وعلى فكرة .. ليس بالضرورة أن تكون بقايا الشيء .. تالفة .. فبقايا الذبيحة .. عظم قاس .. والبطيخ نأكل حلوه .. ونترك بقاياه المرة وبذوره التي بها فائدة أكثر من لب البطيخ نفسه والأمثلة كثيرة 8) بقايا مخ .. وللحديث بقية

  28. والله انك حطيت الدواء على الجرح والله ماقدر اقول الى(((((((((((((جزاءك الله خيرررررررررررررررررررر))))))))))))))))))

  29. هلا اخوي و اهنيك على موضوعك فعلا كلامك صح وصلني ايميل بحديث مكذوب و رسلت لصاحبه تأكد من الحديث و للاسف قالي الحديث صحيح و هو ما يعرف سنده و حجته انه معروف و للاسف ان احد الدكاترة في جامعة الملك عبد العزيز بجدة نشر اوراق بنفس الحديث المكذوب بدون راوي و بدون سند و للاخوان لا تنشر كل ما تقرأ و لا تنشر اكثر مما تقرأ و لا تصدق كل ما ينشر

  30. انا اقول ان الاحاديث المكذوبة تبان للاعمى لاننا معظمنا يسمع احاديث من وقت لآخر في اوقات العصر والفجر ويوم الجمعة اللي ما يعرف صحة الحديث او ما يثق في الكاتب لا ينشر دمتم بخير

  31. كفى بالمرء كذب ان يحدث بكل ماسمع( ياأيها الذين أمنو ا إن جاءكم فاسق بنبأ فتبينوا) أين نحن ياأصحاب الأدمغة الكاملة من هذا المبدأ الخطير لتمحيص الأخبار اياً كانت وقد قال الشافعي هم نقلو عني مالم افه به وما أفة الأخبار إلا رواتها وان كان ماقاله احد الإخوة المعلقين أن هذه الرسائل تجلب لصاحبها مالا كانت الطامة طامتين أبكلام رسول الله نتاجر اف لنا عندها واف وان كان هذا النت كل يوم يخرج لنا بطامة جديدة فلا عدمنا أمثال صاحب هذا المخ ومن يسير على دربه من اعمال العقل بعد اعمال الأذن وبعد أخذ الصالح من كل مستحدث وجديد وايجاد الصمام بعد الصمام على كل وارد شره ممزوج بخيره فنحن أمة مافتأت تستخرج اساليب تكيفها مع مستجدات العصور مع المحافظة على اصالتها ومواطن فخرها وقوتها وعزتها ألا ورأس ذلك كله دينها

  32. السلام عليكم في البداية اشكرك على هذا الموضوع الذي طرحته لان كثير من الناس تحدثوا حول ذلك ويجب فيه التوضيح فاما قولك انشر توجر وانه كلام فاضي فهذا خطاء اعذرني لان الاجر من الله ليس كلام فاضي ومن دل على خير فان له اجره واجر من عمل به الى يوم القيامة والعكس واما الخطاء الموجود في الرسائل الذي يجب عليك ان تنبه عليه هو وجود بعض الرسائل يقول في اخرها اسألك بالله ان ترسلها لغيرك او ارسلها وسوف تجد مايسرك واذا لم ترسلها فسوف يحصل لك شيئ سيء وانت يجب عليك ان تنظر بمنظور رب العالمين وليس بمنظور عقولنا المصونه ولك مني كل الاحترام والتقدير والناس يريدون الاجر من الله فلا تحجر واسعا .

  33. الله يعافيك على المقال الرائع و شخصت الداء ،، بالنسبة للأخوة اللي يتكلمون عن قضية التذكير وما إلى ذلك سأتحدث عن ذلك وليعذرني صاحب المقال لا نختلف على أن التذكير شي رائع لكن المصيبة اذا أتتك رسائل بـ مثل هذه قل ( سبحان الله وبحمده ) الآن نبتت لك نخلة في الجنة قل لا إله الله عدد ماكان وعدد مايكون وعدد الحركات وعدد السكون ( الآن الملائكة تكتب حسناتك إلى العام القادم ) قل ( لاحول ولا قوة إلا بالله ) الآن أعطيت كنزاً من كنوز الجنة بكل تأكيد لا أعارض الذكر ذكر الله سبحانه شي محبب إلى الله سبحانه لكن الاختلاف في الطريقة هل تعلم الغيب ؟ هل أنت المفوض بإنبات النخل أو إعطاء الكنز أو امر الملائكة عليهم السلام بالكتابة ؟ أمور غيبية لماذا ندخل فيها والله سبحانه يقول في محكم تنزيله ( إن الله عنده علم الغيب … الآيه ) نعم الذكر من القربات اللي يتقرب بها إلى الله لكن الاشكالية في الطريقة هناك أكثر من طريقة للنصح والتذكير بـ ذكر الله سبحانه من الطرق تذهب وتجمع الاحاديث الخاصة بذكر الله سبحانه وتنسقها و تخرجها تخريجاً صحيحا وتضع روابط مصادر الأحاديث حتى تكون رسالة موثوقة بشكل كامل لماذا نجعل الناس يضحكون علينا كـ مسلمين ويقولون هؤلاء بدون عقول ويصدقون أي شيء ولو ترسل لهم شي على الايميل حتى لو كان خطأ صدقوه وعملوا به مشكلة البعض انه يبي يرسل رسائل حتى لو كان المحتوى خاطئ 100% ياخي اذا تبي ترسل رسايل نافعة صح شف لك أي كتاب تفسير واختار آية وتفسيرها وارسلها لـ الناس لكن بدون اضافات انت الحين اخذت 240 حسنة ارسلها وخلاص نفس الحال للأحاديث أي كتاب حديث ومع شرحه وتنسقها بالايميل وترسلها الرسائل المفيدة والنافعة ما توقفت على انشر و تراك أخذت 20 حسنة واذا ما ارسلت هذه الرسالة ربي يحطك بالنار بصراحة مع رسايل الايميل التي ذُكرت في الموضوع أصبحنا ملطشة الحمدلله أنا لست من نوعية رسايل انشر و الشيطان لعب عليك وتراي ما أسامحك هناك طرق تؤثر في الناس أكثر من الكلام الغير موثوق صورة المسلمين الذين يصلون الفجر في ماليزيا صورة زبد البحر المذكور في الحديث لا نجعل أنفسنا مقيدين على منهج واحد لابد من التنويع لـ تحظى بالقبول لدى الكثير أتمنى ما أكون أطلت وأثقلت عليكم في الحديث ألف شكر

  34. الحين بنسخ برسل هالرسالع لواحد مــبــلــشــنــي قــلــــــقB هههههههه الله يعطيك ألــف عــآفيــه حبيبي

  35. والله إن هذا الموضوع يتكلم بلسان أغلب من يعانون من انتشار موضة انشر تؤجر .. ومن ضمنهم أنا أصبحت هذه الجملة الختامية نوع من الروتين، حتى لو كان موضوع الرسالة عن البسكويت المقرمش .. والطامة الكبرى كما ذكرت هي الأحاديث المكذوبة أو الآيات المزعومة والقصص الملفقة .. وأنا متأكد من أن صاحب الرسالة الأصلي يستمتع بالضحك على عقول بعض الناس.. أنا أؤمن بأن تترك الحرية لصاحب الرسالة في أن يقرر ما إذا كانت هذه الرسالة تستحق النشر من عدمه.. ويسلم لنا باقي مخك يا شيخ انشررررررر تؤجرررررررر

  36. اخواني في الله ما اورده الكاتب هنا .. اكثره او كله حق فالزام الناس بما لم يلزمهم الشرع به خطأ كبير جدا بقي انبه على الاخوان في الاحتياط عند كتابة الايات القرانية لانه لفت انتباهي خطأ اخونا هتلر – غير المقصود – في كتابة الاية ( إن الله عنده علم الغيب … الآيه ) فليس في كتاب الله هذه الجملة بل الصحيح ( و عنده مفاتح الغيب لا يعلمها الا هو )

  37. من زمان هذي الظاهرة منتشرة ورافعه ظغطي انشر تؤجر ولك الأجر ..الخ يعني ناس مدري وش يحسون فيه!! الله لا يبلانا جزاك الله خير

  38. الله يجزاك خير وبياض الله وجهك لانه كثير من الناس يرسله والله ما يدري وش الطبخه لو في الرساله قدح في العقيده يا ناس انتبهو وخافوا الله في هذي الرسايل

  39. و الله يا بقايا مخ الفكرة في راسي من زمان و كل رسالة تجيني فيها هذا العنوان دائم ارد على صاحبها و اسأله هل انت متأكد من الكلام اللي ارسلته و لا على طول ارسال لكل القائمة المهم انا لقيت تعبيرك رهيب و استأذنك فقط في نقل الفكرة بتصرف و راح ارسلها لكل من يرسل لي مثل نوعيه هالرسايل

  40. كلامك فيه جزء من الصحة .. لكنك تهجم هجوم شرس .. المسألة بسيطة الرسالة اللي ترى إنه غير مناسبة .. احذفها .. أما إنك تحاول إن تقنع الناس أن هذه مهزلة .. أتوقع إنكم بعيد عن الصواب .. لأن بعض الرسائل فيها تذكير بالله .. ونشرها فيه الأجر والحث عليها من قبيل الدال على الخير كفاعله .. وذكر فإن الذكرى تنفع المؤمنين .. أما كوننا لا نحث الناس على فعل الخير .. ولا نوجههم إليه فهذه هي المهزلة .. ونحن أمة تأمر بالمعروف وتنهى عن المنكر .. وفقك الله ..

  41. الســــــــــــلام عليكم أخوتي ..معك أخي بقايــا ..وهناك أمر آخر للذين يقولوا انه لا بأس في تمرير رسائل الاستعطاف (إذااااااا ) كان محتوها يخلو من المكذوبة والضعيفه .. ولكن الكثير يغفلون أن الــــــذكر عبادة والعبادة تحتاج حضور القلب .. أي رسائل الذكر تسبيح ، استغفار .. يجب ألّا تقرأ والقلب لاهي.. بتأفف ولسان يردد فقط يستنى متى يخلص من الرساله وياخذ الأجر!!ويصل لغيره الأجر تبغى تكسب أجر علللم الناس .. بتفسير آيه .. أو حديث إعجاز علمي في القرآن والسنه السنن المهجوره تنبيههم .. للأحاديث الضعيفه والمكذوبه و البدع والمحدثات في الدين مع التأكد من صحة الأدله مشكوووور جدا بقايا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى