رسائل المجموعة

المحرومون من السياحة

والله لي مدة ماكتبت لكم والمعذرة خبركم الصيف

والواحد يالله يحك خشمه !!

طبعا مقالتي اليوم مافيها شي جديد …. بس كذا شي صك

ببالي قلت انثره لكم ….

والله و طاقتني الفضاوة مع جنبي ((آآآآه بس قسنب بالله ان نسيت لون الافضاوة وشو ))

المهم اني جلست اقلب بكم عدد قديم لجريدة الوطن خبركم احب ذا الجريده

مدري ليه ؟؟؟

والله واعجبني مقالة للكاتب( صالح الشيحي)

تكلم فيه عن ارتفاع اسعار تذاكر الطيران للرحلات الداخلية

بين مدن المملكة …. وبمقارنتها مع الرحلات الدولية ترا مافيه فرق..ياجماعة

يعني لو ودي اصيف…والله احجز على القاهرة ..ولا احجزعلى ابها أو الطايف والسبب ؟؟

وليه سبب  !!!إلا

كذا عنااااد بخليهاخمسين الف سبب اولها الغلا والثاني

الخطوط السعودية وخدمات الحجز فيها اللي تفتح النفس

 والبقية متحفظ عليها لأسباب سيكلوجية بحتة !!!

وهمن بعد ماقصرت (نشميت كوم )قالت مافي خاطرها عن اسعار الشقق والفنادق

في المناطق السياحية وقالت انها غالية غلا يشق القربة !!!!

فجاء في بالي شخمطة من كيبوردي البسيط

عن سياحتنا الداخلية ..بس ماراح اتكلم  وابربس عن الغلا وعن ارتفاع اسعار

السكن او ارتفاع اسعار التذاكر لا باتكلم عن  !!!

فئة معينة من الناااااااس

فئة ياناس قسنب بالله ماكلين هوا

والسبب الغلا…

تدرون منهم؟؟؟

(هم المحرومون من السياحة )

ترى سياحتنا الداخلية زينة ياجماعة الخير

ياحلو منتزهاتنا..مقارنة ببعض الدول اللي تعج بالسياح ولاعندهم إلا خرطي

واهم شي …الامن والامااااان لحد يقلي مافيه امن عندنا ترى بعارضه وبشدة بعد

ومن مميزات السياحة الداخلية في ربوع وخميس وجمعة ممكلتنا الحبيبة

بالأضافة للأمن والأمان

اول شي سياحة نقية وخالية من الامراض والحمد لله

قريب من اهلك ..من عاداتك .. تقاليدك ..هذا إذا كنت راعي تقاليد وعادات

أما إذا كان الوضع (فري) عندك… فالله لايسفهنا !!!

ولو جيت تكلمه وتنصحه … قالك رح يابدوي يامتحجر…

سبحان الله صار اللي يلبس جنز في صلاة الجمعة

ويحط جل  على قذلته…وقبل مايطلع يحط من مكياج اخته

عشان الشمس… يشوف نفسه

بلغ هرم الرجولة….!!!!

المهم

وفوق هذا كله ومن اهم المميزات في سياحتنا الداخلية

انك تكون قريب من تعاليم دينك

طيب حلو ..هذا كله حلو وشي يسعد ويبهج قلب كل مواطن سعودي

ولكن ؟؟؟؟ = جينا في المهم

إذا تبي سعادة ووناسة لك ولعيالك ولأهلك ..؟؟؟

نبي منك طلب واحد

انك تدير العداد لجه الهاي

يعني ان يدك تكون في جيبك …للدفع..

ولاتنسى … لازم يكون جيبك مليان بالربط الزرقاء وإلا

هالبطاقات ,,,,الفيزا واختها الماستر كارد ..عشان ماتجي في موقف

مال امه داعي ….ويلعن خامسك عشان سياحة !!!

طبعا وإذا وفرت الشرط البسيط هذا ..

اكيد بتشوف سياحة داخلية…رااااقية  وزينة ونحول !!!

تبي تمتع عيونك بمنظر جبل اخضر ؟ اددفع

تبي تشوف منظر وادي وغابات ؟ ادفع

تبي تدخل انت وعيالك حديقة عامة ؟ ادفع

تبي تدخل حديقة حيوان تشوف قرد عرج ؟؟ ادفع

تبي تدخل سوق تتمشى وتمشى ام العيال والبزارين ؟ ادفع

طبعا انا هنا قلت ام العيال والبزارين يعني للعوايل بس

اما العزاب …لا اشوف مهب وجه وبس لا أشوف رقعه وجهه ؟؟؟؟

وترا فيه فرق بين اشوف وجهه واشوف رقعة وجهه … بس ابي ذكي يقرا مهب سحلة !!!

والله انصح الشباب يعرسون ويفلحون اصرف لهم من السلتحة اللي مالها سنع

وبالمرة عشان يلحق يشوف الأسواق !!!

= متشقق يبي يشوف العليا مول ماخلوه …

نجي للمهم في سالفتي 

طيب تذكر وانت تدقع ….وتدفع …وتدفع …

طيب إلى هنا مافيه مشاكل ابد

ربي منعم عليك وميسر امورك …

لكن ماتذكرت في يوم من الأيام

ناس او فئة معينة محرومه من السياحة !!!

ماتذكرت ان فيه اشخاص راوتهبم لا تتعدى ال  1500 ريال

وعنده سته او سبعة في البيت يالله تكفي ال 1500 لأكلهم ولنومهم

لكن تدري انهم هم بعد يتمتعون بالسياحة!!!

ايه يتمتعون بالسياحة من ورا شاشات التلفزيون

..هذا إن كان عندهم تلفزيون بعد …

حتى ابسط حقوقهم…قالو لهم…لااااااااا؟؟؟؟؟

 منعوهم  بعد من نصب الخيام … اللي تفكهم

من حرارة الأسعار في الصيف ؟؟؟

يتخيلون ان ابها ….والطايف…والباحة…وجدة…والخبر

مدن خيالية …هذا اللي صور لهم تلفزيونهم الفقير ..؟؟

وإلا سوالف جيراناهم واللي حوليهم !!!

لكنهم فوق ذا كله يعيشون بسعادة … ومبسوطين وفالينها

تدرون ليه؟؟؟؟

لأنهم ماااااااااااايدفعوووووووووون..ومأكليييييييين السياحة الداخلية هوااااا!!

والله صرت اخاااااف يجي اليوم اللي يقولون فيه لاتدخل المسجد

إلا بعد ماتدفع ضريبة السياحة الداخلية..

يالجنة ياسياحية شوفو لنا حل ؟؟؟… وإلا ترى قسنب بالله اقرب رحلة للقاهرة وإلا لجاكرتا أظن انها ارخص!!!

=حسباله يهدد يارجال الخلا بس!!!

طبعا تضامنا … مع المحرومون من السياحة  الداخلية مثل حالتي …

قررت اسوي لنا مهرجاااان هناااا في قروب ومجالس بو نوااااااف

وبيكون باسم

((مهرجان الصيف))

المحرومون

جوايز …. وفلة حجااااااااج

بس انتو انتظروووووونا…

مع قروبكم (قروب أبو نواف) ==ابو نواف عطني جايزة على ذا الشعار!!

واقصد انتظرونا يعني للناس اللي مثل حالتي مساكين ومنكرفين

اما اللي بيفلونها هالسنة …. في الشرق والغرب!!!

فلااااا اشوووووف خشة واحد = تحسون انه منقهر "وجه واحد مشرقه عيونه"!

تحياتي

 مخاوي خويه

**حبايبي في القروب أحب اوضح لكم حاجة صعنطوطة !!

طبعا وردني قبل فترة رسايل من قروبات ثانية

وبلغني واحد من الشباب أن فيه عضو

يكتب في احد القروبات بنفس يوزري

(مخاوي خويه) !!!

فاللي ابي اقوله

اني مالي أي  مشاركات في قروبات ثانية ولا في منتديات بهذا اليوزر

هذا للتوضيح بس واللي يبي اليوزر عادي تراه مسيوم مني

بكمبيوتر سوني الجديد يقولون الدوري الياباني فيه

مهب صاحي وسلامتكم **

==ياشين اللي مايعرف يعبر !!!!

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى