رسائل المجموعة

العياير .. أسبابها ومسبباتها

بسم الله الرحمن الرحيم
السلام عليكم ورحمة الله وبركاته .. وبعد :
الإخوة  والأخوات الأعزاء أعضاء قروب الغاااااالي أبو نواف ،تحية طيبة لكم
والشهر عليكم مبارك
( بدري) وأسأل الله أن يتقبل صيامكم وقيامكم وأن يجزل لكم الأجر والمثوبة وأعتذر عن الإنقطاع طوال الفترة الماضية ( الله من واحد يقول شرهتك علي اللي جايب ٍ خبرك )،
ويشرفني أني أشارك معكم بثلاثة مواضيع  بس لاترتاعون تراها صغيّرة مرررررررررة أصغر من وسائط أبو نواف 

1
 رمضان بين الواقع والمأمول

رمضان

 

2
كيف تصبح رئيساً لأمريكا في خمس دقايق

كيف

* عندما تريد أن تكون طبيباً هنا يجب عليك أن :
1- تأخذ نسبة فوق 98% .
2- تتقن لغتين على الأقل .
3- تدرس 7 سنوات .

* أما عندما تريد أن تكون مهندساً فعليك أن :
1- تلقى لك أحد تعرفه  يقبلك في كلية الهندسة
2- تلم  بالانجليزي والرياضيات والعلوم والنحو والرسم والتعبير .
3- تذاكر 25 ساعة متواصلة يومياً .

*  وإذا اردتَ أن تكون معلماً فعليك أن  :
1- تتخصص تخصص نادر .
2- تدوّر لك واسطة .
3- تتحمل تنطيلك 9 سنوات من ديرة في ديرة .

 * ولكن عندما تريد ان تكون رئيساً لأمريكا  فلا يشترط أن تملك أي مؤهلات ولا فكر ولا ذكاء ولا بُعد نظر ما عليك إلا أن :
1- تخف بالشعب وتقنعهم إنك تبي تحسّن مستواهم المعيشي ( حتى تحظى  بصوت الشعب )
2- تعلن على الملأ  إنك تبي تحارب الإسلام المسلح والمسلمين المتطرفين ( حتى تحظى بدعم الكونجرس)
3- تصرّح في كل محفل بأنك  ستدعم إسرائيل وأن أمنها شيء مقدّس ( حتى تكون رئيساً )

أوباما

 ** وهذا ما يلاحظه أي متابع لحمّى الانتخابات الأمريكية ، فالإسلام أصبح جريمة يجب  إعلان البراءة منها !! واليهودية أصبحت شرفاً ينبغي  الافتخار بها .!!  والتصوير بجانب فتاتين محجبتين عارٌ وشنارٌ قد يلقي بصاحبه خارج أسوار الترشيح ، ولبس الطاقية الشامرة و التبيكي بجانب حائط البُراق / المبكى   أمست  قنطرة ً لا يمكن  الوصول للبيت الأبيض   إلا بعبورها !!

 

3
العياير .. أسبابها ومسبّباتها
دراسة سيكولوجية  و سوسيولوجية 

عدنان

تعريفها  :
العياير هي الألقاب إلا أنها تكون بقصد الذم والتحقير دائماً أما اللقب  فهو يشمل المدح والذم معاً  ،  ومفردها عيارة ،  وللناطقين  بالقصيمية معيارة .

حكمها :
حرام ٍ جرام ، قال تعالى وَلا تَنَابَزُوا بِالألْقَابِ بس مشكلتنا  أننا نحرّم بعض المكروهات ، ونغفل عن بعض المحرّمات ، بالله كم عدد الخطب والمحاضرات والدروس التي تتكلم عن التنابز بالألقاب وأضرارها الدينية والاجتماعية والنفسية ، كم من واحد راحت حسناته لأن  ماعمره سمّى أحد باسمه ، وكم عدد الذين حصل  بينهم   قطاعة  بسبة المعاير وكم من شخص جاه قلق وإكتئاب وتوتر وإحباط ورهاب بسبب إن عيارته الذبانة وإلا الضفدع وإلا البرصي ، وغيرها من الألفاظ اللي تنقط عسل  والمشكلة أن أهله  تعبانين على الاسم ومسمينة  فؤاد وإلا لؤي !!

أماكن إنتشارها :
لاشك أن العياير ظاهرة عالمية  ومنتشرة في جميع أصقاع  العالم و لو ذهبتَ للصين مثلاً  أضمن لك تلقى لك نصف مليون واحد عيارتهم 浑身没劲儿 يعني البطة باللغة الصينية ، كما أن للعياير  جذور ضاربة في القدَم كذلك  ، ولكن أفضل بيئة لها والتي تنتشر فيها وتشتهر  وتزدهر وتدّهر هي  القرى وبالذات القرى النجدية  ،
فقلما تجد أحد يسكن في قرية مالصق فيه عيارة ـ الحمد لله أني ساكن ٍ في مدينة ـ كاد المريب أن يقول خذوني ،  إلى درجة أن العمّال الأجانب اللي يسكنون فيها لم يسلموا منها ، و أعرف هندي يعمل حارس حديقة في إحدى القرى  معيّرينه  زعتور .. حسبي الله عليكم جاي يترزق الله سنتين ويرجع لأهله  ولا وفّرتوه  !!

أسبابها :
 أعتقد أن السبب الرئيسي في نشوء العياير وتداولها هو إعتقادنا النفسي  أننا لايمكن أن نرتقي إلا بتحقير الآخرين كما أن البعض لا يستطيع أن يعلو بنفسه لا بمال ولا جاه ولا علم ولا سلطة فيحاول أن يقلل من قيمة الآخرين ويحقّرهم لكي  لايعتلونه ، ومن الأسباب كذلك تشابه الأسماء في العائلة الواحدة فتجد الواحد له أكثر من سميّ في العائلة قد يصلون إلى العشرة .. فلا يجدون بدّاً من لطه بعيارة هي أشبه بالوشم الذي لايُمحى .. وتستحضر العيارة بعد الاسم مباشرة  بحجة  أنه أسرع   وأعرف واحد اسمه محمد بن عبدالله بن محمد بن عبدالله بن محمد بن عبدالله بالله وشلون بيعرفونه إلا إذا لصقوا عليه ستيكر العيارة !!

لولو

مصادر العياير :
للعياير مصادر متعددة من أهمها :
1-العيّارين ، حيث تجد في كل قرية شخص عيّار أو أكثر عنده موهبة كاريكاتورية لفظية ولكنها نووية ، يستطيع أن  يدمْر بها أي شخص وذلك بتشبيهه على جهة التحقير بشيء مقارب له في الحجم أو الشكل أواللون أو الطباع

 مثلاً إذا شاف أحد دب سمّاه الفقمه وإذ شاف أحد نحيف سماه السلقة وإذا شاف أحد متمططة عيونه سماه الكوري ومن يومها وهي علَم عليه لا يُعرف إلا بها .

2-ربما تكون الأخطاء المطبعية مؤثرة على الصحفي أو الكاتب أما الأخطاء اللفظية فهي قاتله لقائلها ، حيث أن الكلمة التي سيخطىء في نطقها الشخص ستصبح إسماً آخر له وربما تغطى على اسمه الأصلي ، فأهل القرية مايصدّقون خبر أن يخطىء  أحد  في نطق الكلمة حتى يحطونها فيه عيارة ، فلو أراد شخص أن يقول : جيت أمس من المدرسة وقال المدرشة   .. فالله يرحمه !!

3- المغامرات وما أدراك ماالمغامرات ، فمنذ أن تبدأ مغامرة جديدة حتى تلتصق جميع أسماء أبطالها  بـ  عيال الديرة ومن أهم المغامرات المغذية للعياير : عدنان ولينا ، ولولو الصغيرة ، و قريندايزر وغيرها .

أنواع العياير وشموليتها :
أغلب العياير ماهي إلا أسماء لشخصيات مشهورة على سبيل التهكّم وشخصيات  كرتونية وحيوانات وطيور وحشرات وأواني منزلية وكل ما يخطر على بالك وما لا يخطر كذلك ، ومن شدة ولعنا في العياير لم نجعلها تقتصر على البشر فقط ، بل أننا ألصقناها في بعض المدن والقرى والقبائل والأندية الرياضية والقنوات الفضائية والصحف والمجلات الخ !!

لعنة العياير
لا تكمن مشكلة العيارة في التصاقها  بالشخص حتى يوارى الثرى فهذا أمر هيّن ويسير ، مشكلتها الحقيقية في أنها تورّث للأبناء والأحفاد  ، فلا يعرفون إلا بعيارة أبيهم أو جدهم  ، وصدق أن الدنيا حظوظ فالبعض ورث من أبيه وجده مليار ريال و 100 عمارة والبعض لم يرث منهم  إلا  العيارة   ، و الله يستر بس ليني طبيت في عيارة أبو نواف أو أحد من الشباب اللي يشتغلون معه ويمصعون مقالي هو والمقالات الأولة كلها عقاباً لي وردعاً لأمثالي .

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ 

عذراً على الإطالة
وتقبّلوا فائق المودّة والإحترام
أخوكم : أبو طارق .
  ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
سبحان الله وبحمده .. سبحان الله العظيم

مقالات ذات صلة

‫25 تعليقات

  1. ما أكدت ان القصمان رواد بالمعايير لدرجة انك لو رحت تسال عن احد هناك ممكن ما يدلونك عليه (ما يعرفونه) الا لازم تقول معيارته (باس وورد) والجزء الثاني هو التصغير>>> اعبيد..الدحمي..سليم..عليان..محيميد..صويلح..سعيدان..احصيصة..اميضي..امنير..انويرة.. والمشكلة ان كثير من العادات اندثرت الا المعايير تقول الاهرام

  2. بصراحة موضوع مميز فيه تغيير للروتين ولي عتب بسيط ليتك ما حددت أحد من المناطق حتى ترفع من أسهم موضوعك القصيم جزء من قلبي فأرجو لو لم تأتي بذكرها ..

  3. السلام عليكم ورحمة الله ابا طارق وين عنوان مدونتك !؟ 🙂 المعايير … باكر تلقى واحد من هالشباب لاطشه ومقدمه بحث ماجستير ! وقل ما قال لي … والحي يذكر الحي ! سلمت ولا هنت اسلوب مميز بحق

  4. بصراحة موضوعك كان غاية في الروعة بس لو كنت ماجبت طاري القصمان لأنك راح تشوف التعليقات من بعض الزروار وبعض الناس مايعلق إلا ع الغلط بالموضوع .. تقبل تحيتي ..

  5. ………… لقبي بين أخواني ( فيس مطنش ) رسالة لكل من يعاني مثلي هذول الناس طنشوهم واحقروهم إذا نادوكم كذا لي اسم وإذا مايعرفوه أعلمهم 8)عصبت ولا تبينون إنكم زعلتوا من التسمية عشان ماياخذوها عليكم شكراً لك

  6. السلام عليكم ورحمة الله وبركاته … في البداية أشكر أخي العزيز أبو نواف على نشر هذه المشاركة لأصافح بها هذه الوجوه الطيبة ، و أشكر كل من قرأ وعلق وكل من قرأ ولم يعلق وكل من علق ولم يقرأ ، أما اللي ماقرأ ولا علق يسمح لي 🙂 الأخ / m.alameel والله العياير وأنا أخوك مافيها رواد كل ٍ فيه حقه ، وحبايبنا القصمان رواد في العلم والمعرفة والتقدم

  7. موضوووع تووووووووووووووووحفه تسلم يمينك على هيك موازيع

  8. السلام عليكم… الموضوع فعلاً مضحك ومبكي في نفس الوقت. أقترح على العلماء والمشايخ الكبار التركيز على هذا الموضوع في محاضراتهم لأن مثل هذه التصرفات المحرمة لن تنتهي إلا بنشر الوعي الديني وحكم الإسلام بها. تحياتي

  9. .. بالفعل كما ذكرت أخي الفاضل .. العيارة تلتصق بالأحفاد والأجياد المستقبلية .. 🙂

  10. السلام عليكم مدري وش السالفة أرسلت الرد هذا بس طار أغلبه ، 🙁 وأرسلته ثانية وماوصل 🙁 🙁 أبجرب الثاله . بسم الله الأخ / m.alameel والله العياير وأنا أخوك مافيها رواد كل ٍ فيه حقه ، وحبايبنا القصمان رواد في العلم والمعرفة والتقدم

  11. هلا واللله حبيب قلبي ابو طارق… وشلونك يالغالي ؟ وش اقول ووش اخلي … دكتور مع مرتبة الشرف. لا تبطي علينا مره ثانيه … ترا طلتك غيررر … لاعدمنااااااااك .

  12. أسلوب بديييييييييييع ماشاء الله .. ابو طارق لاتبطي علينا مره ثانيه 😀

  13. يا حليلك هذا صار شي عادي عندنا بالديره عوائل بكبره ما تعرف الا بمعيارتها… بس انك تحدد بالقصيم هذا غلط بكل المناطق بالسعوديه وغير السعوديه يعانون من هذي المشكله اذا بغيت تحل المشكله لا تزعل ناس على الناس الا اذا كنت قاصدها…

  14. والله ياني مخرج ٍ دمار 🙁 بسم الله الأخ / m.alameel والله العياير وأنا أخوك مافيها رواد كل ٍ فيه حقه ، وحبايبنا القصمان رواد في العلم والمعرفة والتقدم ( مايمشي الا بالعين الحمراء ) 🙂 شكراً لحضورك . حبيب قلبي أبو مالك / أشكرك على تعليقك وتسلم يالغالي ووالله إن القصمان أخواني وحبايبي وربعي وأفتخر فيهم ، أما التحديد فليس القصد منه انتقاص أو سخريه ، لا والله إنما هو لبيان أن المسمى يختلف من منطقة لمنطقة فقط ، ولا أعرف مسميات باقي المناطق وإلا لذكرتها . الأخ خراب السفينة ، شكراً على حضورك المورق ، تشرفت بك . الصديق العزيز 🙂 سليمان الذويخ ، تو ماتشرف الموضوع بحضورك ، وأنور بنورك ، وتصدق انك مخمختها في راسي ، أبكتب رسالة الماجستير عن العياير والدكتوراه عن المصاقيل وإذا جاء معي حرف ( د.) أضمن لك اني أبمسك منصب في إحدى الوزارات لأنهم مايهتمون بـ ( نوع ) المؤهل بقدر مايهتمون بـ إن اسمك يبدأ بدال ، والله يذكر راعي ( دكتوراه البصل ) بالخير 🙂 الأخت rora مشكورة على تعليقك ومن ناحية القصمان مثل ما أسلفت انا ضربت مثال بأن مسمى العياير يختلف من منطقة لمنطقة وماقلت فيهم الا كل خير . ومن ناحية القرى النجدية فأنا لم إحدد منطقة أو قرية بعينها نجد كبيرة عريضة وتالد ولا تغذى على قول المثل ( ياشين اللي بيضرب أمثال بالقوه ):) الأخ فيس مطنش ( بدأ يمون ) 🙂 والله نصيحتك مسكته ، شف مسلّم اللي في باب الحارة قرر إنه يسفه أي واحد مايناديه بأبو مالك 🙂 هذا وهم ينادونه بالاسم مهوب العياره !! ( عسى مايهوشني أبو مالك الي فوق 🙁 ) بس المشكلة إذا عيروك في ظهرك وش الدبرة !! الأخ اللي رمز لإسمه بابداع : مشكور يالغالي على تشريفك ، ومنووووور . الأخ خالد : الجميل هو حضورك المشرق . شكرا يالغالي . الأخ أبو عبدالرحمن ، اقتراحك رائع وهام وليتهم والله يولون الموضوع جزء من اهتمامهم للقضاء على هالعادة الاجتماعية المتأصلة في أعماق الأعماق 🙂 الأخت أم وافي : شكراً على مرورك وتشرفت بحضورك . لي عودة بإذن الله لبقية الأعزاء تحياتي ومودتي للجميع .

  15. بالنسبع للعياره..احنا سكان الحساء ..وخاصه ايام السبعينات منتشره بشكل فضيع …. واشهر واحد مانعرف اسمه الحقيقي .. الحبص وهو بياع في سوق القيصريه ..يبيع كل مالا يخطر على بال بشر ..وسبب تسميته كماورد لي هو شدة بياضه ..والله اعلم ..

  16. ياحظي ونا عيرتي (أم البقششة ).. لأسباب لا استطيع ابدائها شكرا لكم

  17. مقال رائع .. ولكن حبذا لو انك لم تحدد القصيم .. لان العياره موجوده ليس فقط بالسعوديه وانما ايضا بالخليج فأنا اعرق صديقه لي بالامارات لها ولاخواتها عيارات .. هداكـ الله يااخوي .. جرحت مشاعر القصمان بهذا المقال وانا من بينهم ..

  18. صباح الخير .. هلا والله وغلا بابو فهد 🙂 حي الله الزميل اللي فقناه 🙁 وتشريفك للموضوع يسوى عندي واجد ، المهم ترى أبو فوزي بينقل ارجع لنا والا ترى أبكبّ عيارتك هنا 🙂 منووور والله 🙂 الاخت الشهبا فور ايفر تسلمين والله وكلك ذوووووووق مشكوورة . أخوي ASOOM وراكم شبيتو فيني هالحين ( وجه خانقته العبرة وينشق ) 🙁 أنا ماخصصت القصمان ولا شيء ، قلت أن اسمها العيارة والقصمان يسمونها المعيارة بس ؟ ولوني أعرف وش أهل الجنوب أو الشرقية يسمونها قلتها !! وين التخصص فيه ؟؟ وقلت انها تشتهر وتدهر في القرى النجدية ونجد تشمل ( القصيم ، والوشم وسدير والمحمل ، والوادي والرياض ، وعبيلة وشواله ( لا ذولي مالهم دخل حسبي الله على حسن كراني كانه حاس ثقافتنا ) والقصمان مثل ما أسلفت حبايب قلبي ( قلبي يرقع يسمعه اللي في قندهار ). 🙁 أبو كريم : ياهلا والله ومسهلا بالحساء وأهل الحساء تراي أحب الحساء من حبي لواحد دارس ٍ عندكم 🙂 ( صورة لكزس رايحة واجهتها مع العج ) أبجي لكم اسأل عن عيارته جالس اربع سنين أكيد انكم صاقعينه بوحده 🙂 والف شكر على أضافتك المميزة وعلى حضورك يالغالي . لاعدمتك . أختي أم البقششة شكراً على اريحيتك ، والعيارة واضحه مايبي لها شرح ، شرفتينا . الأخت the tulip الرائع هو حضورك ، ,انا معك في كل كلامك وقسم بالله اني ماخصصت القصمان بالعياير ( أصيح عشان تصدقوني ؟ 🙂 🙁 أرجو الرجوع لردي على الأخ ASOOM ، وآمل يكون كلامي واضحاً ، وإنه مايجي أحد زود ويقول وراك على القصمان عشان ما أشقق ثيابي 🙁

  19. :~ اسلوب جميل واشكرك على الموضوع الجميل والعيارهمشهوره كثير بين المجتمع الله يعطيك العافيه :~:~:~

  20. والله موضوع ما شا الله عليك طرح رااائع .. و خطير .. اما عن العيارات .. فأنا اكثر واحد بين اخواني له عيارات كل يوم طالعين لي بعيارة جديده ههههههههه :$ واكيد انا ما سلمو مني لا اخواني ولا عيالهم كل وله عيارة بس مدري ما احس ان فيها الزعل .. :~ بالعكس توسعة صدر .. واللي يزعل البحر قريب الله لا يهينه يشرب منه وبالعكس تطلع له عيارات اكثر خخخخخخخخ ( الزعل ممنوع ) .. < نظامنا في البيت .. وشكر لأبو طارق الصراحة بدعت في طرحك للموضوع

  21. طرح حقيقة سلسل وممتع اخوي ابو طارق للموضوع ، يعطيك 1000 عافيه. اممممم بيني وبينك هذا هو حال شعبنا ، تقدر تقول شر لابد منه ما فيه احد ماله عياره بهالبلد.

  22. انــــــــــــــا لله .. ياخي انتم وش بكم .. هو ظرب مثال بالقصيم ونطيتوا فيه .. شوي شوي .. الصراحه انا عن نفسي اذكر وحده بالمدرسه قالت لي ام عيون نايمه > وانا ياعمري الصق وجهي بالمرايه اسبوع .. اتأكد من عيوني .. :(:( واخوي الصغير ( الله يطلعه بالسلامه ) كنا مسافرين وأحدهم سماه عبسي .. وضحكنا عليه واستمرينا نقوله كذا طول السفره .. لمين اخر شي قعد يصيح .. يقول لاتقولون لي عبسي .. خخخخ ___ اشكرك على الموضوع الرائع .. تستحق الشكر بصراحه .. 8) ___

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى