رسائل المجموعة

إذا أتى الوالّي .. افرشوا الزوالّي !!

السلام عليكم ورحمة الله وبركاته

عزيزي القارىء ..  هل تعلم ان حياتك ليست سوى مسرحيه ؟؟ <<—  هل تعلم انك تسمع بشد الإنتباه في المقدمات !!

هل تعلم انك تعيش في مجتمع تهيمن عليه المناظر الكذابه؟؟ .. هل تعلم انك مجرد أداة يسوقها التميلح و الترزز ؟؟ .. هل تعلم أن الزرافه لا تنام في اليوم الواحد سوى 9 دقائق على الرغم من طول رقبتها ؟ <<— زارف المقدمه من إذاعه مدرسيه :خخخ:

وما الحياة إلا مسرح كبير

        

المسرحية  الأولى

في مدرسة ابتدائية حكومية صغيرة , كئيبة و مريبة  في نفس الوقت !! ..هناك بدأت دراستي .. <<–  ما حسيتو اني غازي القصيبي وأنا أقول هناك بدأت دراستي :خخخ:

لم تكن المدرسة تحوي أي وسائل تعليمية أو تربوية .. كان شكلها من الخارج أقرب إلى  المقبرة منها إلى المدرسة !! .. كانت واجهة المدرسة تحوي على القليل من الأشجار الميتة وفي داخلها الكثير من الكتابات المشينة ..  لم يكن هناك أي معامل للتربية الفنية مثلا ً أو النشاط عموماً !! .. أو غرفة للتربية الرياضية حتى !! .. فلم  تحوي المدرسة إلا معمل واحد لمادة العلوم والذي بدوره كان يحّوي على عدد من القوارير المليئة بالحشرات و الثعابين التي لم تتحرك منذ أمد الدهر ولم تستعمل إلى يومنا هذا !! … ولازلت اسأل نفسي إلى يومنا الحاضر وش فايدتها !

ذات يوم دخّل علينا مدرس التربية الفنية الفصل وقال لنا : يا طلاب من عنده أعمال أو رسومات أو على الأقل خطه زين ويعرف يخط  ومستعد يشتغل معي ؟! .. رفع عدد من الطلاب أيديهم وكنت أحدهم .. قال لنا المدرس : يالله اجل تعالوا معي .. نظرات الغيرة من زملائنا الطلاب لم تكن أوضح منها قبل هذا اليوم .. فمن قدنا طلعنا من الدرس !! .. خرجنا من الفصل ومشين  خلف المدرس إلى أن وصل إلى غرفة المدرسين  عندها قال لن  : بعد أسبوعين بيجينا مدير التعليم .. ونبي نفتح غرفة التربية الفنية ونبي نـ … لم ننتظره حتى يكمل كلامه وقاطعناه بصوت واحد : يا أستاذ عندنا غرفة فنية ؟! .. رد علينا المدرس : إيه عندنا .. المهم يا طلاب نبي نفتحها وننظفها ونعبيها رسومات و لوحات وأعمال .. من فيكم يبي ينظف ومن يبي يرسم ومن بيجيب أعمال ؟!  إيه صح وقبل لا أنسى ترى الشغل ذا عليه درجات و لا تخافون بعطيكم ورقة موقعة مني أنا والمدير عشان تطلعون من الحصص وتشتغلون معي ..

رجعنا إلى الفصل والفرحة تعتلي محيانا .. وبعد أن دخلنا بدأت الأسئلة والعبارات تنهال علينا من كل طرف .. ( هاه وش سويتوا ؟! –  وش صاير ؟! –  أحلى من قدكم فآتتكم حصة القراءة !  – ناقتي يا ناقتي .. وهلم جره  ) .. جلسنا في مقاعدنا وبدأ كل طالب يخبر من بجانبه عما حدث .. وبعد عدة دقائق دخل علينا مدرس التربية الرياضية وقال لنا : يا شباب أي واحد يجيب لنا عمل للتربية الرياضية سواء كان صحيفة أو مجسم راح يلعب في الدوري …  قاطعناه وقلن  بصوت واحد: بس حنا ما عندنا في المدرسة دوري كوره يا استاذ ؟! .. رد علينا : هاه !! .. طيب مهيب مشكلة نسوي لكم واحد .. بس لا تنسون جيبوا الأعمال في اقرب وقت !!

بعد حوّالي الأسبوع والنصف أصبحت المدرسة نظيفة براقة .. تشع نوراً من كل جهة ..  فأصبحت واجهة المدرسة مقاربة لقصر الأفراح بعد أن كانت مقبرة مهجورة .. لم يكن ينقصها إلا لوحة تم الافتتاح .. نظفت الممرات وتمت إزالة جميع الكتابات المشينة و علقت  اللوحات الفنية على جدران جميع الممرات التي سوف يعبر مدير التعليم منها … وبالطبع تم تجاهل الممرات الأخرى التي لا يمر منها إلا نحن الطلاب !! .. افتتح معمل التربية الفنية وكان يحوي على العديد من الأعمال الفنية والرسومات .. معمل التربية الرياضية حوى بدوره على العديد من المجسمات والمنشورات الرياضية ..  تلك الفترة كانت  أفضل مرحلة قضيتها في المدرسة .. فلم ندرس في اليوم إلا حصة ً واحده !! .. وباقي اليوم فيذهب إما في تعليق الصور على الجدران أو الرسم وعمل الأعمال ..

في اليوم الذي يسبق الحفل أرسل مدير المدرسة رسالة مع الطلاب إلى أولياء الأمور كتب فيها ( أعزائي أولياء الأمور .. نفيدكم بأن يوم غد سيقام في المدرسة حفل كريم .. سيشرفه مدير التعليم .. لذا ندعوكم مشاركتنا الحفل .. وترى فصل الصيف دخل له شهرين فياليت لو تغيرون ثياب عيالكم الشتوية واللي الأرض أنظف من  كمومها .. وقبل لا أنسى ترى حصة الرياضة بكرة ملغية .. فيا ليت ما يلبسون الطلاب تكميلة تحت الثوب ) .. وفي اليوم التالي و بعد حضور مدير التعليم .. وانتهاء الحفل الكريم .. عاد كل شيء إلى وضعه القديم .. وأغلقت المعامل ونزعت اللوحات والتصاميم .. وكأن شيئاً لم يحدث  !! وعدن  للدراسة في المدرسة القديمة ..

وأغلق الستار  وانتهت  المسرحية  !

طبعاً هالمسرحية بالذات كان لها أثر سلبي على أهلينا .. فصاروا يرفعون الكيسان الزينة للعزايم ويخلونا نشرب في كيسان جبن سايل

        

المسرحية  الثانية

كبرت وبلغت سن الشباب وكأي شاب كنت اجلس في الشارع مع أصحابي في الحارة , كان شارع حارتن قديم وإنارته سيئة و مهتريء جداً إلى درجة أن السيارات  تفضل المشي على الرصيف بدلاً من الشارع ..

في حارتنا وفي وسط الشارع كانت هنالك حفرةَ كبيرة بمقابل منزلن بالضبط .. لن أكذب لو قلت إنها إحدى أبرز المعالم في الحارة .. فـ بسببها لم نكن نعاني من مشقة في توصيف بيتنا لأي شخص , حتى عمال التوصيل التابعين للمطاعم لم نكن نقول لهم سوى بيتنا قدام الحفرة   وبعد عدة دقائق نجده عند الباب , وزيادةً على أن الحفرة معلماً من معالم الحارة فهي ملعب ومرتع لأطفالها أيضا .. كنا نجلس بالقرب منها ونلقي فيها الحجارة حتى نملئه , ثم بعد ذلك نخرج الحجارة ونعبي الحفرة مرة ً أخرى <<— خلاص خلاص درينا أن الحفرة مهمة

ذات يوم وأنا في طريق العودة من المدرسة إلى المنزل , تفاجأت عندما دخلت الشارع ولم أجد الحفرة !! التفت يميناً وشمالاً لكي أتأكد بأنني في نفس الحي الذي اقطن فيه !! وتفاجأت أكثر عندما رأيت الأعلام و الإنارة و عيون القطط والتي لم تكن موجودة سوى في الشوارع الرئيسية وحتى جابوا لنا هذيك اللي كنا نحلم فيها من يوم اننا صغار , العمود اللي يصير في أخره دائرة حمراء مكتوب عليها كلمة ( STOP ) قلت في نفسي ربما أنا احلم !! قطع حبل أفكاري وتساؤلاتي صوت شتم وسب , التفت لأجد جارنا واقفاً أمام منزله وهو في حالة يرثى لها ..

ذهبت إليه وسألته : وش فيك عسى ما شر ؟! , رد علي وهو غاضب : الله لا يبارك في العدو  قل آمين , رديت عليه : آمين .. بس وش صاير لك ؟! ووش صاير للحارة ؟! لا تقول لي انهم يزبطونها عشان يطرحونها للاكتتاب !! ,  رد علي : لا .. لا .. هم  دفنوا الحفرة و زفتوا الشوارع وغيروا الإنارة عشان فيه مسؤول كبير بيمر من هنا .. رديت عليه : طيب وش فيك معصب كذا عاد !! .. رد علي : اليوم الصبح والعمال يشتغلون ويزفتون الشارع  شافوا باب القراج حق بيتي مفتوح .. وأنا الحوش حقي ما يواجه .. فخافوا أن المسؤول يمر من الحارة وباب بيتي يصير مفتوح .. رديت عليه وانا مستغرب : طيب وش دخله ؟! .. قال لي : زفتوا حوش البيت .. قال أيش .. ما نبي نخاطر ويمر المسؤول وباب بيتك مفتوح !! لانه منظر غير حضاري ! .. رديت عليه وقلت : احمد ربك يا رجال أن عيالك مهوب  في الحوش ولا كان زفتوا رجل واحد منهم بعد !! :خخخ:

ويغلق باب القراج .. أقصد ويغلق الستار!!

        

المسرحية  الثالثة

تخرجت من المرحلة الثانوية و تم قبولي في الجامعة , فرحتي كانت لا توصف فلقد تم قبولي من بين الألآف و خطوت خطوةً مهمة نحو المستقبل .. أتتني التهاني من الأقارب .. ولا عجب في هذا ولكن الشيء المستغرب أن البعض كان يدعو لي بالعون والنجاة والفكه من الجامعة كما لو أنني ذاهب إلى سجن أو راحل إلى علاج .. تم تحذيري من الجامعات و ظلم الدكاترة وما يحدث من مشاكل .. ولكني لم أعبأ بما قيل لي لأن التعليم العالي كان طموح بالنسبة لي وهدف لا بد من تحقيقه !  بعد أن درست وتوغلت في ثنايا الجامعة رأيت وسمعت عن أشياء لا تخطر على بال بشر .. من ظلم وتعدي على حقوق الطلاب و تسيب و استهتار بالنظام .. طبعاً كلنا عارفين وما ننكر الضغط اللي يواجهه الدكاترة والموظفين .. بس هالضغط  ما يخلي الأمور توصل لأنهم ينجحون طالب متوفي من بداية الترم !!  ولا أنهم يحرمون الطلاب المنتظمين في الحضور من دخول الإختبار ويعلق أسماء طلاب ساحبين ملفاتهم من الجامعة !!  وما أعتقد أن الضغط  بيشفع للدكتور بأن يدخل على الطلاب وبكل عنجهية يقول : أنا ادرس الترم هذ  ست قاعات خمس منهم اشتكوني عند العميد وش تنتظرون انتم ؟!  , وأظن ما فيه عذر للدكتور بأنه ما يصحح أوراق الإختبارات ويحط لك بدافع الشفقة درجة ( د = مقبول ) بدال ما  يصحح الورق ويعطي الطلاب على قد تعبهم وجهدهم !!

الضغط ما يسمح لهم بأنهم ينزلون لك مواد وبعد ما تدرسها تكتشف أنها محطوطة لك بالغلط  ومالها دخل في خطتك الدراسية..  وبعد ما تكلم رئيس القسم يقول لك : شف يا عزيزي .. دراسة مواد زياده عادية جداً .. ومفيدة لك وما تضرك أبد .. أهم شيء انك ما تتخرج وانت ما خلصت المواد المطلوبه منك .. خخخخخخخخ !! <<— بالله هذا كلام واحد إداري ؟!

تخيلوا طالب خلص مستوى كامل ولما أنتقل للمستوى اللي بعده ما قدر ينزل مواد وقال له الموظف انه عندك أربع مواد رسوب من المستوى السابق ! .. طبعاً هو كان ناجح ومعه الأوراق اللي تثبت وكل شيء كان موجود .. ومع ذلك جلس ترمين ( سنة كاملة ) رايح راجع عشان يعدلون الخلل اللي ما كان له أي دخل فيه !!

يوم كنت في المستوى السابع كنت مثل أي طالب جامعي فرحان بقربه من التخرج ولازم يطبع سجله الأكاديمي ثلاث مرات في الأسبوع , دخلت مره على مكتب المسؤول عن الطباعة وبعد ما طلبت منه سجلي الأكاديمي قال لي : أنت طالب جديد وتوك مسجل عندنا مالك سجل أكاديمي !! .. قلت له وش لون أنا طالب جديد وأنا لي أكثر من أربع سنوات أدرس عندكم !! أطبع لي السجل لو سمحت .. بعد ما طبع لي السجل لقيت معدلي صفر وكأني ما درست ولا ترم ! .. رحت للعميد وقلت له السالفة ونادى هو بدوره المسؤول عن إدخال البيانات وأستفسر منه عن الموضوع وبكل بجاحة ابتسم وقال يمكن سقط سهواً .. و فعلاً كما يقال شر البلية ما يضحك اكتشفت أنه فيه 15 طالب سقطوا سهواً مثلي .. وأبشركم تم علاج هذا الخطأ بسرعة خارقه وتم التعديل  بعد ثلاثة أشهر فقط !

أذكر كان عندنا دكتور في الجامعة ..  مشهور بالشر و الظلم و ترسيب الطلاب وعنده  طلاب ما بقى لهم ويتخرجون إلا مادته هو بس !! .. وجلسوا عنده حدود السنة أو السنة ونصف .. يجون للجامعة ويدرسون مادة وحده بس !! .. ويرسبهم وبدون حسيب ولا رقيب !!  .. رحنا كلمنا رئيس القسم وقال لنا : الدكتور فلان !!  لا تكلموني فيه لو سمحتوا !!  رحنا للوكيل وللعميد حق الكلية وبرضو نفس الكلام !!  حتى اذكر إن واحد من أخوياي مكلم رئيس القسم بعد صلاة العشاء في المسجد اللي عند بيته .. لعل وعسى انه يفيدنا وبرضو نفس الأسطوانه المسجلة الدكتور فلان !! .. لا تكلمني عنه !

بعد فترة سمعنا عن مؤتمر كبير لعميد الجامعة والمؤتمر بيحضره وجهاء البلد وبعض المسؤولين , حضرت أنا وبعض زملائي المؤتمر وبعد عدة دقائق من دخولنا بدأ العميد بالتكلم عن الجامعة  ( نحن نفخر بأن طلابنا .. ونحن نفخر بأن جامعتنا .. ونحن .. ونحن … ) .. قام أحد الزملاء من مقعده وهو غاضب وقال له : طيب بالنسبة للدكتور فلان !! .. تفخر به بعد ؟! .. التفت عليه العميد وقال له : لو سمحت مهوب هذا وقته الحين !!  .. انا معه  صحيح مهوب هذا وقته .. هذا وقت انه يجلس يصور مع كل الموجودين ومن بكرة نفتح جريدة الجامعة ونلقى صوره معبية الجريدة ومصور مع فلان وعلان !! .. هذا وقت انه يتكلم ويفخر للحاضرين عن طلاب ما عمره شافهم أو حتى يدري عنهم !! .. صدقني لو استمر وضع جامعاتنا على كذا بعد كم سنة بتلقون نفسكم تدرسون الكراسي والطاولات !! <<— كلام كبيييير :خخخ: :خخخ:

طبعاً في مسيرتي في الجامعة شفت دكاتره مالهم مثيل ولا بديل وكنا نكن لهم كل احترام وتقدير , لا من أمانة وخلق وحسن تدبير, ولا بعد وفوق هذا كله يحاولون   تطوير الجامعه ! .. بس للأسف كانت توجه لهم الكلمات المعتاده من الزملاء الحسودين والمتكاسلين  ليه !   –  وشهولة ؟! – ماله داعي تسوي كذا ! .. إلى أن يستسلم أو يمل ويصير مثل غيره إلا من رحم ربي

        

المسرحية  الرابعة

تخرجت من الجامعة وتغيرت نظرتي للحياة وللمجتمع ..  وصرت أبحث عن سبل المعيشة بشتى الطرق و طوال اليوم ! .. لدرجة أني ما لقيت لي وقت اشتغل فيه  ! .. بعد ما قضيت مدة وأنا على هالحال اكتشفت اني مجبر أقدم تضحيات عظيمة لأغراضي الموجودة عندي في البيت ..  و اضطرّيت أبيع كل السياكل اللي في بيتنا و أبيع المكيفات اللي مالها سنع  وبمساعدات من الوالد والوالدة ( الله يشفيهم ويحفظهم )  طلعت لي بمبلغ 15 ألف ريال سعودي .

كنت كل ما أسال واحد وش المشروع اللي تنصحني فيه ؟!  يرد علي وهو مطمئن  سوق الأسهم لا يفوتك .. و بعد المشاورات اتكلت على الله ودخلت بفلوسي في الأسهم .. ما أخفيكم إني ما كنت مرتاح لها !! .. لأني كنت أحس أني أبيع وأشتري الهواء !! .. يعني حتى لعبة المونوبولي إذا شريت فيها شيء يعطوني صك له .. وتأخذ 200 في نهاية كل لفة وتقدر ترهن المحطات وتقدر .. <<— خلاص خلاص عرفنا أن عندك مونوبولي

دخلت في السوق والحمد الله  مع إني كنت ما اعرف شيء فيه إلا إني كنت اكسب !! .. ومع إني كنت ضد نظرية انك تخاطر برأس المال كله إلا إني خاطرت به  .. طبعاً المخاطرة براس المال كله غلط صغير بالنسبة للي يبيع بيته أو يتسلف مبلغ كبير !!  المهم .. في يوم من الأيام فتحت جهاز الكمبيوتر على  محفظتي الاستثمارية وما دريت ألا وكل شيء في الشاشة احمر حتى أسمي بعد !

طيحت سوق الأسهم كسرت ظهر الكثير وترتب عليها الكثير من المصّايب والمشاكل والخساير  وزاد المصيبه اننا نخسر من هنا والمعيشه تزيد من هناك على سبيل المثال السكن والعقار ..

وقبل مدة قريبة قريت عدة مقالات أغلب محتواها كان ( أننا نواجه مشكلة غلاء في المهور وأن أغلب الشباب ما يبون الزواج وأنهم ليسو على قدر المسؤولية لفتح بيت !! ) .. أنا من وجهة نظري أشوف أن المهور مهيب ذاك الغلا !! أو على الأقل الأغلبية منها أسعارها معقوله .. اما بالنسبة لفتح البيت فأكيد ما راح نفتح بيت أو نعيل أسرة .. إذا صار الواحد وهو عزوبي يالله يكفيه راتبة أجل بالله فطورنا صحن الكبدة بعشرة ريال و طبق البيض 18

إذا صارت أغلب الوظايف الموجودة ما تطلب إلا جامعي وبتخصص معين ومعه خبره من ثلاث إلى خمس سنوات وتشترط عليه إجادة اللغة  الأنجليزية تحدثاً وكتابة بالإضافة للتعامل مع الحاسب الآلي وبراتب ألفين أو ثلاثة أكيد ما راح نقدر نفتح بيت !! .. و إذا صارت المولات والأسواق توظف السعوديين بألف وثمان مئة ريال في الشهر وتجبره يوقع معها عقد يقول فيه أنه لو تركهم خلال أول سنتين راح يدفع لهم ست ألاف ريال !! .. طبعاً قمة القهر  أنك تتخرج ومعدلك ممتاز و تخصصك مطلوب  وما تلقى وظيفة .. بينما واحد ثاني متخرج من تخصص مكتفي من عدة سنوات ومعدله متدني ويتوظف ويمكن يطلع له بعثه ويسافر ! عشان أبوه منصب ويعرف فلان وعلان .. بينما أبو الشخص الأول ما يعرف إلا أمه بس !!

وهالحين  أصحاب الشقق صاروا يرفعون الإيجارات على المستأجرين من 14 ألف ريال إلى 22 ألف ريال خلال سنة وحدة !! مع العلم أنه ممنوع عليه زيادة الإيجار أكثر من 6% في السنة !! بس على ما قال المثل لا غاب القط العب يا فار والحين موب فار واحد الا فيرااان بس الله يرحم الحال 

وفي الختام احب أقول لكم وبحكم أني شاب وعاصرت الشباب أن أغلبهم ودهم يتزوجون .. وإذا علي أنا ودي أتزوجكم كلكم .. بس أسمحوا لي اقولكم ما عندنا مهور أو بالعربي المهور أخذها الهامور !! ويغلق الستار مرة اخرى !!!

نسيت أقول لكم أن المسرحية هذي كلها مكتوبة قبل زيادة الـ 5% التراكمية

        

المسرحية  الخامسة

تتوظف في إحدى الدوائر الحكومية براتب زهيد .. وتبدأ تشتغل بذمه وتتعب وغيرك جالس يقرا جرايد وحاط رجل على رجل وكل شوي يسأل هاه ما جعتوا نطلب فطور ؟! .. يزعجونك أهلك بالسفر وتضطر انك تطلب إجازة .. تروح للمدير وتقول له و يرد عليك بـ لا .. لا .. ما نقدر نعطيك إجازة من ينوب عنك ؟! .. تقول له ينوب عني زميلي في المكتب ( أبو رجل على رجل وجرايد ) .. يرد عليك المدير : لا .. هذاك ما يعرف شيء وما نستفيد منه ! .. ترجع للمكتب وإجازتك مرفوضة .. وبعد أسبوع تتفاجأ بأن زميلك ( أبو رجل على رجل و جرايد ) مقدم على إجازة و وقع عليها المدير .. تروح للمدير وتكلمه و يرد عليك بكل بساطه : خله يروح ويفكنا … تراه ما يعرف شيء أبد !!

بعد مدة .. يدخل عليك المدير في مكتبك ومعه معاملة مستعجلة يعطيك إياها ويقول لك شف لي هالمعاملة .. ترفع راسك والمعاملات مالية مكتبك وتقول له طيب عطها فلان ( أبو رجل على رجل  وجرايد ) شفه فاضي وما عنده شغل !! .. يرد عليك ويقول : فلان ما يعرف شيء أبد !!

بعد مدة .. تدخل المكتب وتسأل عن فلان ( أبو رجل على … إلخ  اكيد عرفتوه عاد ) .. يردون عليك زملائك ما دريت فلان منتدب ..!! تروح وتكلم المدير ليه يروح فلان وأنا لي كم شهر قايل لك الإنتداب ذا بالذات أبيه .. يرد عليك بكل برود : خله يروح ويفكنا .. فلان ما يعرف شيء أبد !!

والله يستر في الأخير لا يصير أبو الجرايد هو مديرك !! .. ويغلق الستار!!!

        

المسرحية  السادسة

دايم وأنا أتفاعل مع أخبار الجرايد كان أي واحد يقول لي لا تصدق ما تقراه ترى أغلبه كذب وكنت أقول له  مهوب معقول يا أبو فلان ان كلها نصب ! يعني يكتبون الأخبار من روسهم ؟! يمكن فيه إضافات ومبالغات بس بنسبه قليلة .. هذا كان رأيي .. لكن بعد ماصار لي هالموقف صرت ما استبعد اي شيء !

أحد الأيام وأنا أتسوق في إحدى مولات الرياض , وقف بالقرب مني رجل ومعه ميكرفون وقال لي : معليش يا طيب بس ممكن نسألك سؤال ونصورك عشان تطلع في التلفزيون ؟! .. ابتسمت في وجهه وبعدها مررت يدي على شفاتي لكي ابلله ثم مسحت بيدي خصلات شعري المنسلة على جبيني وجاوبته بكل اريحيه : ايه , وليش لا .. بعد ما وافقت على طلبه مد لي ورقة صغيرة والتفت على صاحبه وناداه بأسمه فلان .. يا فلان تعال وجب معك الكاميرا وبعد ما نادى صاحبه والتفت إلي سألته : الحين وش ذا الورقة ؟! .. ضحك وقال لي أن هذا هو الجواب اللي تبي تقوله الحين إذا جينا نصورك !

رديت عليه بأستغراب : يعني أنت معك السؤال و معك الجواب وانا بس مجرد كمبارس أو شخص يمثل لك إجابتك ؟! إذا الدعوه على كذا اجل اكيد أنكم تدورون على شخص حسن الوجه عشان يقول إجابتكم .. صح ؟! , أبتسم وقال لا يالطيب حنا ندور الناس اللي شكلها عادي جد وشكله مو إعلامي أو بالعربي شيون .. رديت عليه بأستهجان :  بعد ! اسمح لي أنا بقول الجواب اللي في بالي ولا ما راح أصور !! .. بعد ما قلت له كلامي هذا اخذ ورقة الإجابة مني وذهب يبحث عن كمبارس آخر وللأسف كان هذا مذيع لأحدى القنوات السعودية والتي من المفترض أن تعكس  لنا رأي الشعب لا أن تمثله علينا !

        

المسرحية  السابعة

الساعه 2 الظهر وأنت في سيارتك ومتجه للبيت بعد دوام متعب , فجأة تطلع عليك سيارة من أحد المخارج  وتدخل عليك في طريقك مع إن أحقية الطريق لك ! تحاول تتفادها لكن ما باليد حيلة تتصادمون , تنزل من السيارة وتروح لصاحب السيارة اللي صدمك وتكتشف أنه سائق أجنبي ماله شهر في السعودية ! , تتصل على المرور وبعد أمد من الدهر يجونك . في بداية الأمر يحاول يقنعك العسكري بأنك تتنازل لأنه مهوب فاضي ينزل ويخطط الحادث في الحر , ترفض عرض العسكري السخي وبعد الرفض يضطر ينزل من السيارة عشان يخطط الموقع وبعد التخطيط يصير الخطأ 100% على السائق . يسألكم العسكري هل معكم تأمين ؟! تردون عليه  بالموافقه , بعده يرسم العسكري التخطيط و يكمل باقي المحضر على كبوت السيارة وفي الأخير يطلب منكم مراجعة قسم المرور لكي يتم إكمال باقي الإجراءات وعشان يعطيكم  ورقة إصلاح السيارة .

من بكرة و في مركز المرور .. أول ما تدخل على مكتب الضابط يطلب منك تجيب رقم محضر الحادث ,  تروح للمكان اللي بتاخذ منه الرقم وتتفاجأ بأنه قدامك طابور طويل , توقف فيه وبعد ما يوصلك الدور وتأخذ الرقم .. تفرح  بأنك خلصت من هالطابور وترجع لمكتب الضابط عشان تكمل إجراءاتك وتخلص لكنه يقطع فرحتك ويقول لك رح أوقف في طابور ثاني ومعك رقم المحضر عشان يعطونك أوراق تقييم للورش.. تروح تقيم سيارتك في ثلاث ورشّ وبعدها ترجع للمرور عشان يصدق لك التقييم .. وتجيب أسعار قطع الغيار مختمه .. وبعدين تبدأ مطاردتك خلف شركات التأمين وقد تجلس بالشهرين أو الثلاثة وارجع للمرور خذ ورقة اصلاح طبعا ما يحتاج  أقول لك لا تضيع رقم الحادث عشان ما يتعيجز العسكري يراجع في السجلات ويمشيك سريع سريع ..المشكلة ان كل هذا و الخطأ فيها مهوب منك وتقرير المرور يفيد بذلك 100% ! .. أيه صح نسيت أقول لكم وش صار على السواق .. بصراحه كل اللي سواه انه عطى المرور صورة من التأمين وبس !

يمكن تقولون أن هذا شيء طبيعي ولازم تأخذ الأمور مجراها بالشكل هذا وأن الطوابير والتأخير شيء عادي .. بقول لكم تراني عطيتكم مثال على حادث بسيط وما فيه أي إصابات .. طيب تخيلوا لما يجي مراهق يفحط ويصدم سيارة فيها عائلة ويتوفون !

أنا لي صديق عزيز أعتبره مثل أخوي صار له حادث  صادمه واحد يفحط وتوفت زوجته و ولده الصغير -الله يرحمهم – وجلست القضية ست شهور الين ما وصلت للمحكمة ! وبعد وصولها للمحكمة بدأ التأجيل اللي ما يقل عن شهرين .. وصدقوني ما فيه أشين من أنك توقف قدام واحد قاتل أهلك ولما القاضي يطلب منه الأوراق يرد بكل بجاحه ويقول ما دريت أنكم بتحتاجونها ! .. وما يكون من القاضي إلا الرد بكل بساطه تأجل القضية لمدة شهرين !!

طبعاً كل هالتأجيل اللي صار للخصم ( المفحط )  وهو  ما عنده أي واسطة بس كانت واسطته الوحيدة هي البيروقراطية  .. وأعتقد لو كان عنده واسطة كان الحين صديقي مسجون من ثلاث شهور وقايلين له أحسن من قايل لك تطلع ومعك أهلك  !

ودي أغلق الستار بس القضية ما انتهت إلى الآن ! عشان كذا أبقول يؤجل غلق الستار لمدة شهرين ..

        

المسرحية  الثامنة

قبل فترة وأنا أمشي في إحدى مواقف مستشفيات الرياض لقيت قدامي بنت قالت لي الله يعافيك يالطيب أنا جاية أسوي لأمي مراجعة وفلوسنا كلها راحت على الدكتورة والعلاج ونبي منك الفزعة يالأخو وما أبي منك إلا قيمة التاكسي .. أنا لا إرادياً دخلت يدي في جيبي ومديت لها عشرين ريال .. طبعاً كان السبب هو تحرك جانب الرحمه والأخوه والرجولة وكان وفيه سبب ثاني وهو أني خقيت على البنت وفهيّت وعطيتها الفلوس وانا ما ادري بس هذا سبب ضعيف جداً عشان كذا خلونا على السبب الأول أحسن وأوجه

بعد ما مديت لها العشرين ريال قالت لي بس عشرين ؟! رديت عليها باستهجان لا تقولين لي حتى الشحاذة غلت بعد !! وبعدين وش فيها العشرين ؟  تدرين اني كنت ناوي أخليك توقعين على إيصال إستلام على العشرين ريال :خخخ:.. ورحت وتركته

وقبل أسبوع وأنا في إحدى محطات الوقود جاء لمي واحد كاشخ ولابس لبس أحسن من لبسي .. لدرجة اني أول ما شفته توقعت انه بيقول لي : والله أني رحمتك أنت وسيارتك ذي عشان كذا بكتب لك شيك وأشتر سيارة جديدة .. بس الطامة الكبرى أنه عطاني ذا الورقة

        

قبل لا اعلق على الورقة أحب اقول لكل اللي شافوا علامة تويوتا على الدركسون أن سيارتي مهيب شرط تصير كورلا يمكن تصير جيب لاندكروزر مثل <<— فضح نفسه :خخخ:

  ايوه وين وصلنا .. نعم يا اخوان عطاني ورقة ملونه ومطبوعة بالكمبيوتر ولا بعد تدرون وش القهر ؟ انه يوم عطاني الورقة طلع جواله من جيبه وأتصل  وأبعد عني شوي عشان ياخذ راحته بالكلام .. أنا على طول طلعت جوالي عشان أصور الورقة وبعد ما صورتها شفت جوالي وتذكرت أني أنا بكبري جوالي مفصول ! .. رجع لمي الشحاذ الكشخه عشان يأخذ ورقته .. مديتها له وقلت له : الله يرزقنا ويرزقك , وترى جوالي مفصول كان معك شيء لا تقصر معنا الله يعافيك

بعد ما شفت هالشحاذ المتطور صرت ما استبعد أن الواحد وهو واقف عند الإشارة تجيه رسالة بلوتوث مكتوب فيها ( السلام عليكم يا صاحب السيارة أنا الشحاذ اللي واقف تحت عمود الإشارة  , لو تكرمت عطني ما تجود به نفسك على رقم الحساب المذكور أدناه )

فيه ملاحظة أنا ملاحظها ومدري يمكن أني غلطان أو بالأحرى أتمنى إني أكون غلطان .. الحين ليه اللي يبيعون خضار و جح في الشوارع ما يمديهم يوقفون في الشارع ومعهم بضاعتهم إلا والبلدية طابه عليهم  وينقلب الشارع كله اصفر في اصفر ! صحيح انه غلطان ومخالف بس على الأقل أفضل من اللي يشحذون عند المساجد والإشارات واللي ما عمري شفت احد يمسكهم أو يكلمهم حتى ! .. مع إن اغلبهم كذابين و القهر أنهم يطلعون دبل راتب موظف البلدية و دبلين اللي يبيعه بياع الجح الممسوك من قبل البلدية  وكله تحت راية ( أعطوني من ما أعطاكم الله )

        

نعم يا أخونا حياتنا كلها عبارة عن مسرحيات وإن لم تكن البطل فتأكد بأنك من الجمهور

طبعاً الموضوع واقعي وقد يكون تخلله بعض المبالغة والمزح من أجل عرضه بأسلوب مرّح عشان ما تملوّن فإن أصبت فمن الله وإن أخطأت فمن نفسي والشيطان .. وقبل لا تهزئوني عشان الموضوع طويل ترى أبو نواف هزئني قبلكم وأرسل لي قطارة وقال لي يا إما انك تكتب مواضيعك بها ولا بحول رسايلك على الجنك ميل :خخخ:

ونأسف على الإطالة

( وفي الختام احب أن اشكر من صمم لي هذا الفاصل الجميل )


Mr. A
منتديات الضياع
www.alzya3.com


سبحان الله وبحمده .. سبحان الله العظيم

مقالات ذات صلة

‫39 تعليقات

  1. قرأت، بل إلتهمت مقالك حرفاً حرفاً قرأت كل كلمة فيه حتى اني كنت ابحث عن المزيد لانه موضوع رائع و كتب بأسلوب جذاب و يعالج قضايا أقل ما يقال عنها أنها حساسة و هي سبب كوننا في مؤخرة الأمم أطال الله عمرك و استمر في كتاباتك و ذكر صديقك انه لا يضيع حق ورائه مطالب و فوقه رب لا ينساه.!!

  2. بصراحه الموضوع كان اكثر من رائع..مو لأن المحتوى غير الكلام المكتوب نقراه يجي 50 مره في اليوم ..بس الأسلوب ربيعي ورايق كذا ويخليك تفرمل كل ابو شوي وتقول الله كريم بصراحه شئ يقطع القلب اللي صار لصاحبك..وما بيدنا الا الدعاء (كالعاده) ..ربي ارحم ضعفه وضعفنا واجبر كسره و قلة حيلته تهون الدنيا وفلوسها..الا الأستهتار بأرواح الناس والله لو تطبق السما على الأرض ما تهون ارواح المسلمين وبالنسبه لسالفة الجامعات ..حتى في جامعة سعود البنات نعاني و يا غافلين لكم الله لامن درا ولا من شاف ولا من سمع انقذونا من ذا المعوقات فكريا اللي اسمهم دكتورات وجيبولنا اوادم مو كتل هوامش بشريه!!! كفيت ووفيت اخوي

  3. كلامك كله في السليييم .. وتمنيت الموضوع ماخلص حسيت بسعاده يوم تقول انكم ماتاخذون الا حصه وحده في اليوم سعاده مخلوطه بدموع خخخ الموضوع صح طوييل بس يستااهل والمفروض يصير اطول من كذا والله

  4. موضوع يغطي كل المواضيع اللي تتكلم عن نفس الفكره لو بغيت تشرح لواحد المعاناة اللي عندنا بس توريه هالموضوع شكرا كثيرا لك على اسلوبك ( هذا هو واقعنا ) والله قهر

  5. موضوعك روعة واسلوبك يشجع الواحد انه يقرا كامل الموضوع بقعده وحده حتى لو كان مشغول. بصراحه اعجبتني مسرحياتك عن المرحلة الابتدائية، تذكرت الماضي الأليم. والمخصرة اللي عشناها. يعطيك العافية على هالموضوع.

  6. هههههههههههههههههههههههههه قسم قسمااات انها رهيبه وابدااع ,,, تسلم هالانامل وهالفكر النير .. لاتغيب كثير خيو ننتظر دهااائك بفارغ الصبر

  7. حقيقة أمتعنا أسلوبك الرائع في الكتابة وتعليقاتك الراااااائعة بس أنك ضيقت أصدورنا بطرح واقع اليم نسأل الله أن يخلصنا منه

  8. لااخفيك اني اتجهت الى نهيت الرسالة فورا كعادتي لاتجه الى مسح الرسالة فورا بعدا ان لا ارى شي يشدني بالرسالة ولكن ما ان قرات المسرحية الاخيرة اعجبت بكاتبك واسلوبك في الكتابة الجذاب ثم قرات الرسالة بالعكس ^_^ من المسرحية الاخيرة الى المسرحية الاولى اهنيك على اسلوبك الجذاب

  9. بصراحه موضوع اكثر من رائع ولو كان مية مسرحيه ما أظن ان احد بيمل من قراءته ,, على العكس تمنيته أكثر الله يعطيك العااااااااااافيه … وننتظر المززززيد

  10. يعطيك العافيه على المسرحيات الحقيقية ايها المخرج المبدع … اجمل تحيه

  11. من عادتي عدم قراءة رسائل القروب النصيه الطويله .. سبحان الله وجدت نفسي أقرأ جزء من منتصف المسرحيه الاولى .. شدني اسلوبك .. رجعت وقريت كااااااااااااااامل الرساله .. رووووعه موضوعك بصراحه … وبالذات مسرحية موظفي الحكومه .. انا بفهم اذا واحد ماتبونه ليه محد يقدر يفصله .. على فكره كل إداره حكوميه في ظني فيها هالعينه من الموظفين .. ليه مدري ! (( نعم يا أخونا حياتنا كلها عبارة عن مسرحيات وإن لم تكن البطل فتأكد بأنك من الجمهور )) هذه العباره تكتب بماء الذهب .. استميحك عذراً على استعارتها لتوبيك ماسنجري !

  12. هلا مستر اي.. مشالله عليك بكل مكان .. مرزوز .. بس جد جد جد … كلاامك جاء على الجرح .. وصدقني نعلم .. جيدا اننا عايشين بمسرحيه كبيره دراميه مؤلمه .. متى بس تنتهي .. >>>ماظن بس احاول اكون متفائله ..! مسرحياتك كلها ماجت من فراغ .. كلها من واقعنا المؤلم .. بس الصراحه رحمتك يوم رجعت ريما لعادتها القديمه ..ورجعتوا لروتينكم البايخ .. بعد النشاط والحياه اللي دبت بمدرستكم .. بس احمد ربك حسيت انك طالب بمدرسه نموذجيه ولو لااياام معدودة .. احسن من اللي ماقد حس هالاحساس.. الا قبل لاتجي الموجهه بدقايق …خخخخ >>>>احس اني شطحت .. بس العذر والسموحه منك ….

  13. فعلآ وللأسف كل اللي قلته وآقع مرير وشفته بعيني .. ! الوآحد يالله يحصل له كم ريآل بس علشآن يشتري خبر ..! وبالنسبه لموضوع الجآمعه خذ وخل :(.. مأسآه والله مأسآه .. شي يقهر .. مآ نقول إلآ الله لنآ .. وربك رحيم .. موضوع فتآك وأكثر من رآئع .. أسلوب رآقي وممتع .. الله يسهل لك أمورك ويوفقك وين مآرحت 🙂

  14. اول حاجه .. حبيت اشكرك على موضوعك الرائع .. واسلوبك الارووع .. وبقوولك الله يكون فعوونك ..ويسهل اموورك .. ويسرها لك.. ويرزقك بنت الحلال الي تحطك فعيونها .. وتنسيك الدجه والفقر .. والا على ديرتنا .. الله يخلف بس 😀 اختك .. nonah

  15. موضوع رائع أجبرني على عكس العادة مع المواضيع الساخره على قراءته من أوله لآخره حيث أن اسلوبك ليس سخريه من أجل السخرية بل هو معنى عميق جدا وقرائه متفعمه للواقع وبعض سلبياته. وصدقني لو كتبت جميع فصول هذه المسرحيه باسلوب جدي ( مثل أسلوبي الثقيل 🙂 ) كان من أول سطر وأنا مرسلك على الدليت ولكن روعة حضورك وطريقة مزجك بين المعنى الجدي والهدف السامي والاسلوب الرائع الخفيف. أنتظر مواضيعك القادمة بفارغ الصبر. إلى الامام

  16. والله انك ذكرتنا بأيام المدارس وايام زمان … وخلتنا نفطس على بطوننا من الضحك … الله يرجك من جد …….

  17. ياربيه يا مستر A الحين كل هذا في ديرتنا .. وانا مسويه نفسي مثقفه وادري باللي حولي شوي .. طلعت كسيرة بنت ماصله 🙁 .. اعوذ بالله وش ذا .. كل شي يضيق الصدر لامن تعليم ولا من اقتصاد ولا ومن حياه إجتماعيه .. الله يكتب لنا اللي فيه الخير والصالح وييسر أمورنا وأمور المسلمين ويرحم زوجة صديقك و وليدهم ويرزقك بالزوجه الصالحه والذريه الصالحه وإيانا :$ انبسطت بهالمسرحيات ولو انها تضيق الصدر :S

  18. ..من جد حاله..الله المستعان بس..اسلوب روعه وفكاهي ننتظر جديدك ..

  19. من عاش في الدنيا بغير حبيب فحياته فيها حياة غريب نتمنا ان لا تحرم حبايبك الابداع هذا فجميع القراء حبايبك

  20. بصراحة ، استمتعت بالقراءة الا أني كنت أتجاوز بعض الفقرات او اقرأها بسرعة لاني اعرف ماذا ستقول ، لكن أعجبني اسلوبك واريد ان اعطيك قصة قصيرة جدا تستفيد منها ايضا (( في احد الايام ادخل اسد الى حديقة الحيوان ، وبالخطأ ، أقول بالخطأ ، كتب الموظف المسؤول بدل ( أسد ) اسم ( قرد ) وبقي الاسد يأكل مزا مدة شهرين ، خوفا من أن يقولوا الموظف (( أخطأ ))

  21. اولا انا مانيب زائر لأني مانيب اسد انا انسان عشان كذا وشوله أزئر . ثانيا اانا عضو وأقسم يالله اني عضو من سنة جدي يعني وشوله تجمعون الاعضاء مع الزوار الكرام << شكلي ابنطرد من القروب ثالثا/ اخوي صاحب المسرحيات الحقيقية نحن من الجمهور وفيه جمهور يبي يشوف المسرحيه بس ماقلت لي بكم التذكره طال عمرك؟؟<<< لازم اتميلح يعني مايعرف التميلح الا انت. رابعا/ مواضيعك اكثر من رائعة اخوي عزوز وخطماتك ونطلاتك جدا مضحكة خصوصا جملة كاسات الجبن من جد ضحكتني 🙂 خامسا / كني كثرت البربره عليكم تشااااااااااااااو

  22. انا راحت عيني على طول عالورقه اللي معطيكياها شاب في العشرين ولابس ثوب ابيض وغتره وجاكيت اسود ياربي نفس الورقه اللي عطانياها الولد كننا موقفين عند محطه طالعين من الرياض ورايحين لمحافظه من المحافظات القريبه بس وربي شكله ينرحم واضح الانكسار في عيوونه الله يعينه ويعين الجميع على فكرهـ اسلوبك قمه في الروعه شدتني المسرحيه الاخيره واصلي ابداعاتك

  23. السلام عليكم والله اعلظيم ورب الكعبة والذي نفسي بيده انه كلامك صحيح << بالله هذا اول رد اكتبه في حياتي وماكتبت هذا الرد إلا على موضوع اكثر من رائع ويمس واقعنا الحالي خاصة اني اعايش عدد من هذه المسرحيات واولها مسرحية المرور وارجووووووك يا مستر أ تكمل ابداعك وماتحرما من مسرحياتك وشمرا

  24. يا سلام عليك ….. والله انك مبدع.. اشكرك على هالشفافية والوضوح… وياليت تكمل المشوار بمثل هالمسرحيات

  25. موضوع رائع .. بكل صراحه شفت الموضوع طويل .. وقررت أطلع على طول .. لكن قريت منه شوي .. ما دريت إلا أنا مخلصه وأدور الباقي .. حكايات حقيقية تروي واقعنا التعيس .. دام لنا بريق قلمك .. لا تحرمنا رشاقة قلمك وخفة ظلك

  26. بكل صراحه الموضوع ممتع والكاتب يصلح لكتابة الروايات. أقترح عليه أن يتجه للكتابه اذا كان لايزال بلا عمل، أو ليزيد دخله فهو يملك أسلوب جميل وجذاب.

  27. أشكرك على هذا الطرح الجميل والشامل ،، لأبرز المسرحيات في عصرنا ،، باختصاااااااار مميـز وللأمام

  28. أنا بالنسبة لي لا أحب القراءة في المنتديات وأفضل الصور لكن اليوم في إحدى الدورات التدريبية عن الجودة الشاملة في التعليم) أعطتنا المدربة ورقة طلبت قراءتها وكانت تحوي (المسرحية الأولى ) وأعجبتني الأحداث وطريقة روايتها الهزلية,وسررت عندما وجدت باقي المسرحيات في إيميلي الذي لم أفتحه منذ أيام . عموما : يعطيك العافية أخي الكريم على أسلوبك الجميل المرح وتعليقاتك الجانبية اللطيفة وأشكرك على انك جعلتنا نيتسم بالرغم من متاعب العمل و(الغبار)

  29. تعبير اكثر من رائع ، هذا وانت داخل مدرسة مثل هذه وشلون لو قدروا المواهب 🙂 .. الف شكر

  30. ما شاء الله عليك وفقت في الطرح بشكل حلو و طريف وواضح و بالفعل نحن نعيش في هذه المسرحيات بل و أكثر سوء واااصل يا بطل و لا تحرمنا جديدك و الكرولا للبيع ؟؟ =)

  31. بس انا مخلص المسرحيه الرابعه وباقي ادخل بالخامسه ادعولي الله يكتب لي بوظيفتن عدله تناسب شهادتي البقرتيوس

  32. مو من عادتي أعلق على المواضيع ..!! بس الموضوع عجبني مرة وأسلوبك حلو يخلي الواحد يقرا الموضوع كله .. ماشاء الله وجامعاتنا الله يرحم حالها في نهاية العالم بس اش نسوي مضطرين ندرس فيها مو بكيفنا حتى اذا تكلمنا ولا سألنا الاداريات قالوا: ما ندري ..ماندري..! والمشكلة حتى العميدة.. ما تدري طيب مين اللي يدري؟!! انا لو عندي جريدة أحط لك صفحة كاملة تكتب فيها الله يكثر من امثالكـ بانتظار مواضيعكـ ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى