بسم الله الرحمن الرحيم
حبايبي إدارة وأعضاء وزوار قروب أبو نواف
السلام عليكم ورحمة الله وبركاته .. وبعد
أخباركم إن شاء الله تمام
التماشي طيبة والله
يعني مرة عالمرور ونمر عالبلدية ونشطف الجامعة وماننسى الصحافة ونتابع الإيميل مع بعض وأسأل الله أن يحوز على إعجابكم وياصبر الأرض علي
3
2
1
Let’s Go
آبار إرتوازية في شوارع الرياض
كنت أسولف أنا وأخوي وجبنا طاري الحفريات وقالي فيه حفر بير إرتواز في الشارع الفلاني .. ياهووه مرة وحدة حفر بير في الشارع .. حاولت أدخل الفكرة براسي يمين يسار .. مااش والله عيت تجي لحد مارحت وتأكدت بنفسي
المهم رحت .. والله العالم شغالين حفر وشغلك لايختلف .. لقطت لي كم صورة وجيت عند البق تبعهم سلمت عليه وسألته فعلاً تحفرون بير ؟ قال الله الله .. شفت ملامحه كأن الشغل مو عاجبه سألته قال المهندس طنقر (طنقر بمعنى هنق وهنق بمعنى مسكت معه غلط ) عالحفر هنا وقال واصلين لـ 35 متر وللحين في مجاري أكرمكم الله والمياة الجوفية على بعد 150 متر وكله عشان ري الشوارع لكن الحفر وسط الشارع هو اللي شوي غريب ..
بعض الصور من موقع الحدث >>ترفق عليهم ياعبدالكريم سماره ؟
صورة من نفس الشارع
مشروع حفر آبار وسط الشوارع
يالله موية .. موية بارد
في إنتظار الفرج
لوحاتنا والمرور
والله بيني وبينكم لوحاتنا الجديدة مااش ماجازت لي أبد –>لاياشيخ ؟
لاشكل زي الناس ولاترجمة معقولة للحروف ولافيها شي تقول إسم الله عليه
خلونا نشوف مثلاً رقم اللوحة ن ا ر 470
في اللوحات الجديدة تضيف الصفر عاليسار(على طاري الصفر المرور قالوا وش ناقصنا عن الإتصالات يوم تضيف صفر في الجوالات وحنا لا ) نرجع لـ لوحتنا نلاقيها بعد الإضافة تصير ن ا ر 0470
طيب للحين حلو
خلونا نشوف ترجمة الأحرف للأنقليزي
النون –N
الألف — A
الراء — R
لكن يعني دام إن الأحرف مكتوبة بالأنقليزي شي طبيعي تكون من اليسار إلى اليمين زي كذا
NAR
نشوف اللوحة :
لكن صار الأنقليزي يُقرا من اليمين إلى اليسار
من متى ؟
مثلها مثل اللوحة
وأشـكيك لمين ؟
جـامـعـاتـنـا والأعــذار
من المعروف في قانون القضاء إن (المتهم برئ حتى تثبت إدانته ) لكن في جامعاتنا الطالب كذاب حتى تروح تسأل من وراه وتشوف هو صادق وألا لا
والله ياجماعة هذا اللي صاير
يعني مثلاً تغيب عن الجامعة لعذر طبي وتحضر اليوم الثاني وعذرك معك عشان مايحسبون عليك غياب
تتفاجأ يقولك مانقبل أعذار مستوصفات أو مستشفيات أهلية لازم عذر من مستشفى حكومي ومختوم وموقع بعد 
يعني لاسمح الله لامرضت أنت يالطالب تقوم تفر الرياض كله عشان تدور على مستشفى حكومي يعالجك لاسيما وأن أغلب مستشفيات الرياض في أحياء متباعدة عن بعضها والاغلبية لامرض راح له أي مستوصف يتعالج فيه عالسريع وبلا زحمة وبلا هم
والله الواحد خلاص صار يغيب وهو مطنش لأنه حتى لو جاب عذر ماأحد راح يصدقه
وكلها تهون ولا تدق إدارة الكلية على المستشفيات عشان يتأكدون من العذر
ماصارت في كليتنا أبد
أتكلم عن الوضع عندنا وماأدري عندكم ياللي تدرسون الحال من بعضه وألا لا
وياحيااة الشقا
صـحـافـتـنـا الـفـلـة
بيني وبينكم
توي أكتشف إن ماعندك أحد أبد
كنت أتصفح موقع جريدة الرياض الإلكتروني ليوم الجمعة اللي فات ولفت نظري الخبر
اقرأ الخبر وأصير مثل ذا
مر علي الخبر والله لكن وين ماأدري وتأكدت لما كتبت تعليق للخبر في الجريدة وبينت فيه إن الخبر صار من مدة ماهي قصيرة لكن لم يُنشر التعليق
::
بالرجوع لصحيفة الوئــام الإلكترونية قبل حوالي 7 شهر نلقى الخبر نُشر من قبل لكن بمدينة مختلفة وبمحرر مختلف وبصحيفة مختلفة بعد والأسبقية طبعاً للوئـام
تاريخ نشر الخبر
ماأدري وش أقول ؟
لكن هل الصحافة في ركض حول أخبار الآكشن لجذب أكبر عدد من القراء ؟
أو رغم درايتهم باللي صار هل الحركة إستغفال للناس اللي جالسة تقرا وتشوف ؟
وألا خلصت الأخبار خلاص ؟
وألا ماحولك أحد ؟؟
مني لكم إختاروا الأخيرة
ومرة ثانية
أشكيك لمين ؟
والـــديـــنـــا
قال تعالى
وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا
صدق الله العظيم
والله ياجماعة إنا مقصرين في حقهم ومقصرين وااجد بعد
يالله إنا نسألك رضاك ورضا والدينا عنا.. آآآمين
الدعوى تذكير من باب فذكر فإن الذكرى تنفع المؤمنين
بني آدم كلما كبر في السن يحتاج لمن يكون حوله يقضي حوايجه ويخلص أموره ويساعده في بعض الأمور وأغلب والدينا تجاوزوا الخمسين سنة أسأل الله أن يطيل في أعمارهم .. آمين
بعض الأمور اللي بعضنا يمكن يكون غافل عنها والله لايحرمكم الأجر
الهدية : كثير منا مايعطي ذا الشي إهتمامه إلا في المناسبات ومو كلنا بعد ، والهدية تصير احلى وأحلى لاصارت بدون مناسبة تصير من القلب للقلب بعيد عن مجاملات المناسبات والافراح ، يعني بين الفترة والثانية تصير تقدم هدية على قد اللي معك من فلوس لوالدينك وصدقني والله تكفيك دعوة حلوة منهم
تسهيل بعض الأمور التي هي حق عليهم : أعرف ناس أهلهم يعانون منهم مثلاُ لاصاروا يصحونهم صلاة الفجر تلاقي أنواع المعاناة خااصة مع الوالد وفي القومة مع أول نداء عليك إنه بيكون عندك وقت تتوضأ وتجهز نفسك قبل تقام الصلاة وكمان أفضل له لأنه ماراح يعاني كل يوم لاصار يصحيك فالأحسن إنك على طول تصحى ولاتماطل تقول أبنام شوي أو أبريح قبل أقوم وياكثر ماراحت نومات زي كذ ومايحتاج أقول شي عن السهر لكن جربوا مرة وناموا قبل 11
عاد هذا اللي جاء ببالي وأنتم فيكم الخير إن شاء الله لهم
فــتــوى
تصير تقريباُ بشكل يومي ويصير فيه تردد في نفس الشخص إنك لادخلت المسجد والإمام في التشهد الأخير ، هل تدخل معهم أو تنتظر لإقامة جماعة أخرى ؟
الفتوى بصوت الشيخ عبدالعزيز بن باز -رحمه الله-
F A M I L Y
Father And Mother, I Love You
وختاماً
إلا رســول الــلــه
عرضي فدا عرض الحبيب محمدٍ .. وفـداه مـهجةُ خـافقي وجَناني
عليه أفضل الصلاة وأتم التسليم
وفي الختام
لايسعني إلا أن نتقدم بجزيل الشكر لإدارة قروب أبو نواف بعد الله عز وجل
ولكم أعزائي القراء أيضاً
أسأل الله أن يحوز ماقُدم أعلاه على رضاكم وأن يرتقي إلى ذائقتكم
ونلتقي في إيميل قادم إن شاء الله
والسلام عليكم ورحمة الله وبركاته
أخوكم
عبدالله العمري
walatz3aal@hotmail.com
