‎البحر والرق وأنا


يمكن من أسوأ الاشياء اللي تمر على الانسان .. لما يوصل لمرحلة ما يلاقي احد يتكلم معاه في موضوع طبيعي انساني ماله اي علاقة بالشغل
انا نوعا ما دحين حاس اني فيها .. فقلت الحق على نفسي واتكلم هنا .. اقلّها احد بيعرف انا ايش بسوي وايش شغلي اللي الى هدا اليوم ماعرف اوصفه لأصحابي وعائلتي

ليا في الشغلة دي دحين 3 سنين تقريبا .. كتب ربي ان رزقي يكون في دولة ماليزيا في شرق اسيا .. وبروناي مقسم وقتي بينهم
كيف وصلت للمكان دا .. وليش اخترت الشغلة دي .. وليش لغاية دحين انا هنا ؟ .. هدي الاشياء يمكن بكتب عنها بعدين ان شاء الله .. دحين ابغى اوصف وين انا وايش يعني رق

كتير مرات في الفيس بوك او التويتر اكتب اني رايح الرق او جاي من الرق .. بس ماحد بيعرف معناها الا اللي شافها قبل فقلت اعطيكم فكرة

كلمة رق ماهي عربية .. هي مأخوذة من الكلمة الانجليزية
Rig
وكاملها
Offshore Oil Rig
يعني بالعربي حتصير حفارات النفط البحرية .. بس بحكم اننا نستخدم الانجليزي فخلاص صرنا نسميها الرق .. بس في بعض الدول زي مصر وليبيا يسموها حفارة

على حسب الدولة ومكان تواجد البترول .. فممكن انها تكون بحرية وممكن انها تكون على البر .. بس حظي رماني في ماليزيا فكل البترول موجود تحت البحر
=D
هذي صورة للمنشأة أو الحفارة أو الرق بشكل عام

تخيل كدا البحر حوليك على مد النظر .. حلو ولا ؟؟

نجي على شغلتي .. طبعا التنقيب على البترول عملية طويلة وفيها كثير من المراحل
تبدأ بالدراسات والبحث .. ومنها يتحدد الموقع وخطة الحفر .. بعدين يجي الحفر والقراءات .. بعدها الانتاج

أنا وسط الطبخة دي كلها طحت في مرحلة الحفر والقراءات .. ماحدخل في التفاصيل ايش نسوي بالضبط بس احنا اللي نحفر ابار البترول ونعطي قراءات ونقولهم اذا كان في بترول أو غاز أو بس ضيعنا وقتنا ههههه

أكيد بيجي سؤال على خاطر اي أحد .. كيف نوصل دا المكان ؟؟
يعتمد على ميزانية المشروع نفسه .. اذا كان شي معتبر فنروح ونرجع بهليكوبتر << أول يوم ركبتها كنت متحمس هههه
وأحيانا يكون العميل بخيل فنروح ونرجع على سفينة .. بس نادرة تكون

تختلف عملية الحفر ومدتها من مكان لمكان حسب طبيعة الارض وايش نتوقع منها .. لكن بشكل عام نقعد في وسط البحر كدا بالشهور أحيان
أكتر فترة قعدتها كانت تقريبا 5 شهور عشان نخلص بير واحد

=D أحس كدا كفاية كمقدمه .. عارف انها مملة وكلها اشياء ما تنفهم .. بس اقلّها لما اجي بشرح بعدين يومياتي يكون في فكرة عامة عن الوضع
دحين على وشك نبدأ حفر بير ان شاء الله .. دعواتكم يخلص بسرعة وعلى خير بدون اي مشاكل
وبعدها نرجع لكم ان شاء الله في يومية تانية

وبما إنه رمضان نستغل الفرصة ونقولكم كل عام وانتم بخير .. اعانكم الله على صيامه وقيامه

أحمد
@AAJunaid
http://d3waa.com/blog


تابعوا جديد شبكة أبونواف على فيس بوك وتويتر

   


تعليقات 15

  1. كلام كثييير بخاطري , بسس ما اقول الا الله يكون بعونكم وييسر امركم ويصبركم على ما انتم به , أدري انها شغله صعبه بس لقمة العيش وماتسوي متابع لك وبانتظار القادم ..!

  2. هلا بالزميل .. بس انا بالبر :$ صرآحه عمري ماتوقعت في مهنه اصعب من مهنتي ألين .. عرفت ان في ارياق بعد بالبحر << طبعا هذا الكلام من سنين :$ عموما الله يعينك على الشغل وعلى الصيام في نفس الوقت واصبر وانا اخوك الصبر زين ولو في يوم .. حسيت باليأس .. تذكر ان وظيفتك هذي لها مستقبل كبير واللي قاعد تسويه .. يحتاج انسان ذكي ومختلف .. وانت انحطيت في هالمكان لانك الرجل المناسب بالمكان المناسب 😀 عموما احب اقولك نصيحه تعينك في شغلك وفي اي ظروف غيرها (( اليوم .. كذا كذا مآشي )) سواء كنت على شواطئ هاواي او بالـ RIG فحآول تتعايش مع يومك وانا متأكد لو خيروك بين انك تكون بطالي ومرتاح وبين الـ RIG وشغله المتعب صدقني راح تختار الـ RIG فـ حط في بالك انك .. مميز ولك عآآلمك لان مو اي شخص يشتغل هالشغله اخيرا اتمنى لك التوفيق ومنهأأ للأعلى ان شاء الله

  3. 😀 ومن رايي انك تشتري يخت كشخه وكبير وتسكن فيه وتكون قريب من شغلك في مكان بالعالم بالعربي بتكون { بباي } العرب والله يحفظك ويوفقك امين ومبارك عليك الشهر الكريم .

  4. سلام عليكم كل عام وانت بخير وعافية وشهر مبارك واسال الله ان يعينك على الصيام وعلى عملك كمان والله من وجهة نظري بما اني عاشق للبحر .. وكنت اتمنى اني اعيش في مكان معزول عن الناس ومشاكلهم 8).. تروح عملك وترجع تجلس بهدوء تام وتناظر البحر :$.. وتسمع صوت الامواج 😀 .. لكن الروتين يذبح .. والبعد عن الاهل يذبح أكثر .. 🙁 كل شغله فيها الحلو وفيها المُر .. والله لو ضابط او وزير او موظف عادي .. مافي احد في شغلته مبسوط 100% ولكن مثل ماقال أخوي أحمد اليوم كذا كذا ماشي ..:) فأستغل يومك بكثرة الاستغفار وصلاة على النبي عليه الصلاة والسلام .. و أسأل الله ان يبارك لك في رزقك .. وو قتك .. ويعينك على كل خير ..:D سؤال جانبي دائما في بالي وانت الان تقدر تشبع تساؤولي هذا .. ** هل تقدر تصيد سمك من مكانك هذا ؟:D سموح او ممنوع ؟ ** هل السمك ممكن يكون غير صحي في البيئه اللي حول الرق ؟ ** هل تقدر تمارس رياضة الغوص خصوصا وانك في بحر مفتوح ؟ B أٍستمتع بمنظر البحر عند الشروق و الغروب فصدقني كثير من الناس يتمنى ان يقضي ولو جزء بسيط من اليوم في مكان مثل هذا للتمتع بالشروق او الغروب وإلتقاط أجمل الصور لها .. ياليت تصور لنا ( عامة ) أو لي ( خاصه ) منظر الشروق و الغروب :$ فأكون لك ممنون .. ختاما سجلني متابعا لك ان شاء الله أستودعك الله الذي لا تضيع ودائعه 😀

  5. يا هلا بالزملاء 🙂 انا اشتغل في مصفاه بترول و دايما انظر الى التنقيب عن البترول اسهل من وظيفتي اللي اهيا تكرير البترول وعملياته حيث انك تكون مسؤوول عن plant كامل ولكن اتضح لي انه الـ off shore rig اكثر تعقيد من التكرير ما ازيد عن الاخ اللي كتب قبلي واقوول لك اصبر و صابر وحاول تعلم اشياء جديده وتكون خبره فيها حتى اذا اردت ان تنتقل الى مكان اخر الا ولديك الخبره التي يريدك الكل لاجلها

  6. السلام عليكم ورحمة الله وبركااته اخوووي شغلتك نفس شغلة اخووي بالسااابق كاان في شركة تسماا شلمبر قير الا الان هو فيها بس ترك الرقووق وقاام يشتغل في المكااتب هي شغلة حلوا الرقووق بس لااا طول فيها يعني حلااتها تشتغل مدة 4 او 5 وترجع اما تقعد بالاشهر 🙁 مو شي

  7. الحربي آمين يارب وانتم كذلك .. سبحان الله الرزق ربي يحدد مكانه 🙂 شكرا لك سيدي حمد شهر مبارك على الجميع ان شاء الله كلامك على عيني وعلى راسي وأكيد نستفيد من أهل الخبرة في هذا المجال مثلكم سيدي .. ان شاء الله نكون على قدر المسؤولية ونعدي هالمرحلة على خير .. جدا كلامك رفعلي معنوياتي الله يسعدك .. التوفيق للجميع بإذن الله أبو محمد تسلم =) أخوكم / أحمد

  8. الله يعطيك الصحة و العافية يا أخي في الله أحمد الجنيد على هذا الموضوع و على المعلومات و على التفسير للموضوع.

  9. أعتذر لمن فاتني الرد عليهم سابقا .. فالردود تظهر متأخرة قليلا =) .. سأكمل هنا أبو يزن الله يسعدك .. ولا يهمك لو صار واشتريت قارب بعطيك خبر =) أحمد سامي مع الروتين أحيانا ننسى اننا في بحر وما أخفيك تمر ايام وما اطالع فيه اصلا … سبحان الله الانسان لما يتعود على مكانه مو مثل اول مرة .. بالنسبة لأسئلتك سيدي: – متشددين كثير في حكاية الأمان فممنوع علينا الصيد أو الغوض .. 90% من وقتنا نكون مشغولين بالعمل وكذا وباقي الوقت للراحة .. بس ولا يهمك بإذن الله المرة القادمة باخذ كاميرتي وبصورلك كم لقطة .. شكرا لك وشرفني تواجدك مشعل الحمدلله أكيد مافي خسارة بالموضوع غير الغربة والبعد عن الاهل .. شكرا لك سيدي هادي ان شاء الله نلحقه قريب 😀 نور ونجارة شكرا لكم سادتي =) أخوكم / أحمد

  10. اخ احمد كل عام وانت بخير ورمضان مبارك عليك إن شاء الله اولا نادراً ما ادخل على رسايل ابو نواف واليوم بالصدفه دخلت وشفت كلمة بحر قلت اشوف الرساله خاصه لاني متعلق جداً بالبحر .. موضوعك عجبني وسجلني عندك من اشد المتابعين لاني حالياً بدرس انجليزي وادرس في معهد للغوص ونفسي في وظيفة او شغله زي شغلتك ماشاء الله مستعد اغيب بالسته وبالسبعه اشهر ما عندي اي مانع ولو فيه اي نصايح او اي شركات ممكن اقدم فيها ياريت تساعدني واكون شاكر ومقدر لك يا غالي .. شي ثاني الصوره الثانيه في موضوعك شدت انتباهي نفسي اعرف المبنى هذا كامل كيف تم بنائه على البحر ولو شرح بسيط بس عنه كم مره اشوفه في صور وفي افلام ونفسي تأكلني ابغا اعرف كيف تم بنائه اشكرك يا غالي ووقت ما تكون طفشان تعال وبربر زي ما تبغا ناس كثير وانا اولهم نعشق مواضيع البحر عامه

  11. مبارك عليكم الشهر الكريم اخي أحمد مهما كانت الشغلة صعبة مادام انك تحبها راح تصير سهلة وحلوة على قلبك تذكر ان في ناس وايييد يتمنوون الجو الهاديء المنعزل عن الناس والازعاج والقيل والقال والحسد وباقي الأمراض القلبية المزمنة… احلى شيء في الدنيا انك تقعد برووحك بهدوء تتامل حياتك وين ماشية…واذا عن السوالف سولف معانا على القروب متى ما حبيت الله يحفظكم ويرعاكم

  12. ماشاء الله الله يحفظك ويعينك على شغلك وعلى الرق لانه باين مره صعب بس بغيت اسال يعني انت ليه ما ترق بدولتك يعني ليه عند الاجانب والمملكه او الوطن العربي بحاجة امثالك يعني انت تخلي كل النفط الي عندنا وتروح الاجاانب يلا ما علينا بتوفيق بس وقت ما تشتري قارب وتصير بباي العرب طلبتك اعطيني خبر الله يرعاااااااااااااك

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‎البحر والرق وأنا

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول