هالمره القصة بدون جدتي " هيلة " اللي ابلشتكم عليها لكن الموضوع فيه شي من وقتها اللي كانت فيه ولو إني بنصب عليكم شوي بس تحملوني ..
أول الناس ما يتراسلون إلا بالقصيد أو الكلام المنقول مع "العقيلات " الرحالة اللي يدورون الرزق فيقولون لهم بتلقون فلان سلمولنا عليه وخلوه يرجع كافي جمع دراهم ،، والمسكين تلقونه فالها بالعراق أيام العز وش يبي بنجد وجوعها .
مشكلة التقنية إذا كانت في بداياتها ،، تصير حديث الناس بين قبول ورفض لكن الحين ماعاد نهتم كل يوم يجد علم جديد صرنا إذا ودنا نشري جهاز كمبيوتر نقول بكره وإلا بعده أخاف اشري اليوم وبكره يطلع شي جديد ، هاك الوقت طلع لهم التلغراف " البرقية " وين الناس يقالهم متطورين ويقولون أرسل مكتوب لفلان .. وشلون كانوا يرسلون مكاتيبهم ؟؟
يطلعون لمكتب التلغراف ويسجلون رسالتهم ويعدون الكلمات كلمه كلمه خبركم من أول التلغراف بالكلمات كم كلمه طيب تخيل اللي بترسله الرسالة ومقتصد بالكلمات مايفهم صح ؟ أو الدولة تحسب رسالتك شفره وفيه مصيبة ..!! زي واحد أرسل رسالة لواحد بيعلمه عن واحد من ربعهم اسمه ( محارب) وعلشان يوفر ومايدفع دراهم كثيره كتب بالتلغراف :
( الوعد السبت ومحارب بالطريق )
ويمسكونه حقين التلغراف ويأخذونه على الإمارة ويحققون معه في هالرساله والمسكين مايقصد شي ومحارب اسم واحد . 
تطورت التكنولوجيا والحين صار فيه تلفون صندوق اسود وله هندل تحركه ويرد عليك موظف الترنك ( السنطرال ) وتطلب منه اللي تبي تقوله عطني بيت فلان .. وعاد تعال شف المذلة ( بس ولو مذلته أهون من مذله موظف الاتصالات )
وبحكم إن اللي عندهم تلفون عددهم شوي وموظف الترنك عرفهم كلهم إلى درجه انك تقوله الله لايهينك حولني على بيت الفلان فيقول الموظف من تبي من هم ؟ تقوله ودي اكلم فلان يرد عليك بجواب جاهز يقولك مهوب فيه معزوم .. أو يقولك مسافر المهم انه ما يحولك عليه .. والله المذلة صدز
وإلا تتصل عليه الحرمة وتقوله ياوليدي ودي اكلم أم فلان يشوف موظف الترنك انه مشوار يمد السلك فيقول خطهم مشغول كلمي بعدين ..خخخخخ
تطور كفر التقنية بعد ما كانت منفشه وصار التلفون مباشر بس ماكان فيه خدمات عن طريق التلفون تقدم عليها ومشت أمور الناس وصاروا يكلمون بعض بعيد عن مذلة موظف الترنك .
وبعد ما دخل الهاتف في مجال التقدم التكنلوجي حط رقم مختصر تتصل عليه ويقدم لك خدمات و مميزات كثيرة وخرابيط ،، بس ولو لازم تراجع اقرب مكتب اشتراكات عباره ماراح تنتهي ابد . اجل وش خانة الرقم اللي نتصل عليه وندفع دراهم وإلا لازم نصف سرا ؟؟
لكن بعد هالمرحلة الزمنية من التطورات التي يشهدها الهاتف لدينا هل نتوقع انه بيجي يوم نستغني عن مذلة موظف الهاتف ونتحمل بجاحة الكمبيوتر والرد الآلي ؟
