يا ضحل !


السلام عليكم ورحمة الله وبركاته

مساء الهدوء والكلام العذب
أبيات قديمة و حديثة أطرحها بين أيديكم ، و أتمنى أن ترتقي لأذواقكم .

– يا ضحل ! –

يا ضحل قل لي كيف تفهم يا ضحل ؟
يا ضحل أنا وبكل صراحة بك بحل

لمحت لك والحين أصرح لك وأقول
الي يحبك وسط قلبي قد رحل

من أولٍ يرجي عسى سُحبٍ تجي
بس للأسف ما جته والدنيا محل

لذلك تشوفه رحل وأبعد بعيد
لو في يدينه هاجر لكوكب زُحل

يبغى يهاجر عنك لو لأبعد مدى
خايف يشوفك صدفة بأية محل

والحين جيت تقول لي اصبر علي
و أعاهدك إني لهالورطة بحل

هالحين مالك حل لأية مشكلة
يومي أحبك كان لك مليون حل

بينك وبين رضاي أرضٍ مهلكة
فوقك سما تمطر و رجلك في وحل

عشت بدحل طول السنين الماضية
والحين جاك الدور … عش مثلي بدحل
——-
بحل : متوهق ، محل : جدب ، دحل : حفرة ضيقة في الأرض .

فيديو القصيدة :


– كثر الخطا –

كثر الخطا جفف منابع جمالك
شف صورتك هالحين لونه رمادي

لمحت لك أبغى يبين الخطا لك
لكن أشوفك مستمر بالتمادي

وضحت لك كل الخطا في فعالك
وتقول لي : هذا ترى شي عادي

خطاك سيلٍ في ثرى القلب سالك
والحب رجلٍ ساكنٍ وسط وادي

أخاف تلقى الحب في يوم هالك
بأسباب سيلٍ من خطاياك بادي

أصحى معي لا تخسر الي عنى لك
وتعض من قو الندم بالأيادي

ثمٍ تجي تبكي على الي مضى لك
و أقول لك : هذا ترى شي عادي

فيديو القصيدة :

وتقبلوا التحية


تابعوا جديد شبكة أبونواف على فيس بوك وتويتر

   


تعليقات 22

  1. يااااااااااااااااااحبيبي يابو صعب يارووووووووووووووحي جمهور متحمس صح لسانك .. تدري وش اللي قاهرني ,, اني يوم كنت معك في سكن الجامعة .. اني ما أستغليتك وخليتك تكتب اشعار وملاحم عن بطولاتي !!

  2. ارجو تقبل رأيي بصدر رحب لا وزن ولا قافيه ابيات ركيكه ومكسوره وان لم تصدقني اعرضها على اي مختص لان ماتسميه شعراً فهو عار على الشعر مع كل الاحترام لشخصك ارجو المعذره مجرد رأي

  3. فارس هههه صح بدنك يا رجال أنت ملهمي الأول وتستاهل من يكتب فيك معلقة :$ ……. خيماوية صح بدنك وحياك الله . ….. خالد العريفي أول شي حياك الله وبياك ثاني شي سبق وعرضت القصيدتين على شعراء و قالوا إنها شعر 🙂 كنت أتمنى أن تقول لي وش المكسور أو الركيك حتى أستفيد . عموما حياك الله يا أبو وليد

  4. كونك تحاول تشعر فهي من ابسط حقوقك اما انك توهم نفسك انك شاعر فهذا صعب شوي لاقافية ولا وزن ولامعنى (كلام يعني) وانا استغرب من الي يقولون صح لسانك ..!! اذا انت تبغى تصير شاعر حاول تتعرف على ابجديات الشعر الصحيحه حاولت تطور من نفسك اعرض هالكلام على أكثر من شاعر حقيقي وشوف النتيجه ؟؟ طور من نفسك لان هالكلام ليش شعرا ولا نثرا مجرد كلام وجهة نظر عابرة

  5. صح لسان يا أبو محمد.. وبالنسبه لخالد العريفي .. مسوي فيها الدكتور غسان مثلاً !!! ومن أنت عشان يصدقك والا مايصدقك ؟؟ وبصراحة وجودك بهالصفحه هو الي عار … وأنت حدك هديل العلي وجاي …

  6. اضم صواتي لصوت اخوي خالد العريفي وان اللي قلته مو شعر ياليت تشوف لك شي غيره او تطور من مستواك لان الاسلوب جداا ركيك وزي ماقال اخوي خالد اعرضه على اي شاعر وشوف كيف بيرد عليك تقبل ملاحظاتنا لك بصدر رحب فنحن نحبك وشكرا لك

  7. جميله تلك الأبيات ورائعه ,,,نابعه من قلب صادق مملؤ باالمشاعر الجميله لك كل المنى باالتوفيق في كل حياتك

  8. B B B افضل قصايد للاسف لم اجد فيما قلت شعراً 04/01/2011 09:43:53 ارجو تقبل رأيي بصدر رحب لا وزن ولا قافيه ابيات ركيكه ومكسوره وان لم تصدقني اعرضها على اي مختص لان ماتسميه شعراً فهو عار على الشعر مع كل الاحترام لشخصك ارجو المعذره مجرد رأي :(:$8):~:D:o:o:>:>:>:(:(:(

  9. لؤلؤة تسلمين وشكرا لك …… نقد بناء طال عمرك أنا شاعر ولد شاعر ومن يوم أنا طفل و أنا غارق في الشعر ومجالس الشعر وكتب الشعر وشرطان الشعر . ولا أرى أي كسر في البيت أو خلل في القافية أما المعنى فيختلفون الناس في إدراكه ، وللمعلومية عرضت القصيدتين على شعراء ولا ذكروا لي أي خلل . ياليت توضح لي وين الكسر والخطا في القافية حتى أستفيد . وحياك الله بأي وقت و أي مكان 🙂 ….. ريان صح بدنك واذكر الله :$ …… أبو دحيم حياك الله وبياك بأي وقت ونفس الكلام الي وجهته لنقد بناء أوجهه لك الله يطول بعمرك . ……. دلال ألف شكر وتسلمين على كلامك الجميل . …… صالح ياليت والله :$ بيني وبينك صوتي دمااار :$ الله يعطيك العافية ….. عبدالعزيز هلابك ومسهلا والصراحة ردك غير واضح بس الله يعطيك العافية على كل حال 🙂

  10. اولا: اهنيك صالح الصعب على القصائد الجميله ثانيا: اهنيك على سعه صدرك على الاطفال الذين يحطمون الواحد بردودهم اللي يسمونها نقد ثالثا: استمرارك بطرح القصائد يزيد من غيض الحاسدين ويزيك من اقتناص السلبيات التي لديك لتفاديها وتقبل تحياتي : هيا بنا نذهب بنا …..

  11. أنا من وجهة نظري بأن النقد هو حالة تقويم وتصحيح ، فكلّما كنت دقيقاً في نقدك ، بلا جور ولا انحياز ولا تعصب ولا افراط ولا تجاوز ، كنت أقرب إلى العدل والانصاف ، وبالتالي أقرب إلى التقوى ، قل في منقودك ما له وما عليه .. قل ما تراه فيه بحق ولا تتعدّ ذلك تلك القصيدتان من أروع ماسمعت بدون أي مبالغه …….

  12. فاعل خير ألف شكر على النصيحة وحياك الله :$ ….. هيا بنا أنا الي أهنيك على روحك الايجابية وتسلم لي على كلامك اللطيف . النقد إذا كان غير موضوعي ما أنظر إليه إطلاقا. ألف شكر لك على حضورك وردك الكريم 😀

  13. أرجوا أن لا يأتي يوم ينطبق عليك الصنف الرابع من هذه الاصناف 🙁 الشعراء في الوجود أربعة . فشاعر يجري ولا يجرى معه وشاعر يسبق وسط المعمعه وشاعر لا تشتهي أن تسمعه وشاعر لا تستحي أن تصفعه !!! و ياليت تسأل اهل الخبرة قبل النشر

  14. حاول مرة أخرى !! اخي وبدون زعل أنت أبعد عن الشعر منّا عن عين الشمس يمكن نقول الإلقاء جيد لكن اللي مكتوب قبل شوي يمكن اسميه تخاريف ضحل ضحل ضحل بداية لم يسبقك اليها أحد من العصر الجاهلي حتى الآن ولذلك سوف أرشحك لجائزة نوبل لضحالة الشعر مع خالص تمنياتي لك بدوام التوفيق وأنت تترك هذا المجال لأنه ليس لك ولست له ودمتم سالمين

  15. صوتك يشبه أحد الأمراء الشعراء في السلك الرياضي !! يشبه نواف بن فيصل .. عندي نقطة واحدة يا ليت لو تلقيها أمام أخوياك أو جمهور وتسجلها مع صوتهم في نفس الوقت ….

  16. دلال شكر الله لك ، والله يجزاك خير الجزاء . ….. maaan :$ أضحك الله سنك ، يا حليلك بس 😀 ….. رومانس الشتم سهل لكن النقد صعب جدا ، أنت شتمتني ولم تنقد أي شي في القصيدتين 😀 … قال سليمان حياك الله وبياك صدقت بالنسبة للإلقاء لكن مايحصل لي أحيانا ، علي فكرة القصيدة الثانية مسجلة من أمسية . الله لا يهينك

  17. اخوي الالقاء ممتاز والشعر ضعيف جدااا اكون صريح معك واعرضها على شعار اذا قالوا لك ان قصيدتك سليمه فهم ليس شعاراً ملاحظه مفيده لك ولغيرك اذا بتعرف اذا قصيدتك مكسوره ولالا لازم تشيلها شيله(شله) واذا حسيت ان فيها لكه(يعني ماتجي معك) اعرف انها مكسوره تحياتي لك

  18. هلا أبو ناصر يالله حيّه بارك الله فيك على النصيحة . صدقني ما أزعل من النقد أبد ولا أتحسس . و الآن قدامك حول عشرين بيت ، طلع لي بيت واحد مكسور . والكلام لك ولكل من تكلم بهالموضوع 😀

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول