وين الأمانة ياوكالة هوندا


بسم الله الرحمن الرحيم

في البداية أحب أن أشكر أدارة قروب أبو نواف على هذا النجاح الباهر

قال الله تعالى :{إنا عرضنا الأمانة على السموات والأرض والجبال فأبين أن يحملنا وأشفقن منها وحملها الإنسان إنه كان ظلومًا جهولا} ألأية 
وقال صلى الله عليه وسلم 🙁لا إيمان لمن لا أمانة له، ولا دين لمن لا عهد له) .

في البداية يعلم الله ليس الهدف من قصتي تشويه أو اشهار أو لمصلحة خاصة ولكن هذا ماحصل معي
وليأخذ كل ذي حق حقه ولأن الشركة لم تلقي لي بالاً لذلك وجب النتبيه لمالكي هوندا لكي لايكون ضحية مثلي


 أملك سيارة هوندا أكورد 2005 ومن عادتي كل 6 شهور اسوي فحص في الوكالة وتشيكات بحكم أنهم أخبر –أمحق خبره – ويعطونك ضمان (5000 كيلو) بعد الفحص المهم دخلتي سيارتي لمقر وكالة عبدالله هاشم المحدودة – طريق خريص – وكان يوم الأحد الموافق (2007/11/04) وبدأت في تعبئة النماذج وكل شي وقالوا لي بندق عليكـ بكرة تجي تاخذ موترك لاتقفل تلفونك أو تشغله ( طبعاً تشغله تصريفه ) المهم أنتظرت اليوم الثاني أتصالهم الكريم ولكن يامضوح في خلاه ماعندك أحد قمت أنا طال عمري وأتصلت عليهم وسألتهم عن موتري قالوا كم رقم أمرالتشغيل وعطيتهم قالوا ايه هذا الموتر توهم مخلصين منه ألحين وكنا بندق عليك ( ياكبرها عند الله ) المهم الله لايهينك أنقز لمنا الحين على شان تستلم موترك قمت ونقزت لهم وكان دوامهم ينتهي الساعه 7 المساء المهم وصلتهم الساعة 6 يعني قبل يشطبون بساعه قالوا تعال حك جيبك (يعني أدفع الحساب) قلت ابد ماطلبتوا شي ودفعت لهم مبلغ وقدره (594 ريال) عطوني مفتاح موتري وجلست أدور عليه ساعه لقيتهم موقفينه في إبليس يالله حصلته ويوم قربت والقى الموتر كنه طالع من طعس وألا براحه يعني ماغسلوه (لأن الوكالة يغسلون السيارة بعد الفحص وهذا مو مهم) المهم قلت المشكى على الله ويوم جيت طالع وألقي المهندس يمشي على رجله قلت له يالأجودي ليش ماغسلتوا موتري لواقولكم خفضوا لي ريال طرتوا فيني قالوا المعذرة الوقت متاخر المهم أنه صرفني .
الزبده خذيت تقريباً أسبوعين ويوم جيت طالع يوم بروح أجيب رسائل لي من أحد صناديق البريد ماوعيت ألا حرارة السيارة فوق النصف وقفت عند مشحمة سيارات وطلبت منه يفحص لي وش العله وش سبب ارتفاع حرارة السياره قالي يالطيب السبب زيت السياره له أكثر من 6 شهور ماتغير ؟؟؟؟
قلت ياولد تستهبل (أنتم عاد عارفين كم يمشي الزيت يعني لو تمشي عليه 3000 كلم عادي ماعندك مشاكل فمابالك توني مطلع السياره قبل اسبوعين من الوكاله يعني يمكن مامشيت 500-1000 كلم ) قلت غير لي زيت وعطني فاتورة واشهد معي باللي شفته وأنا وياك ياعبدالله هاشم هذي نهاية الثقة .
في اليوم الثاني أتصلت على وكالة هوندا وطلبت مكالمة المدير العام قالي سكرتيره مشغول المدير اي خدمة
شرحت له موضوعي قالي ابشر ومايصير خاطرك ألا طيب عشر دقائق يكلمك المدير وحنا مايهمنا غير سمعة الوكالة –حركات الشميسي يعني– أنتظرت العشر دقائق الموعود بها وعلى قولتي سابقاً يامضوح في خلاه ماعندك أحد في اليوم الثاني دقوا ولارديت كنت نايم يوم صحيت دقيت عليهم وقالي معليش على العشر دقائق حقت امس كان المدير في أجتماع وخرابيط قلت ياحبيب قلبي ماعندك مشاكل تيك يور تايم قالي على العموم مشكلتك عند مدير قسم الصيانة وراح يكلمك الحين أنت قفل الخط طال عمرك قلت شوكرن وقفلت وبعد عشر دقائق دق علي مدير الصيانه
مدير فرع الصيانة : ألو ؟
ضحية وكالة هوندا : مرحبا !.
مدير فرع الصيانة : أزي حزرتك ؟
ضحية وكالة هوندا : الحمد لله .
مدير فرع الصيانة : معاك أحمد مدير فرع الصيانة بوكالة عبدالله هاشم المحدودة
ضحية وكالة هوندا : حياك الله .
مدير فرع الصيانة : أنت الأخ صاحب السيارة هوندا رقم أمر التشغيل كذا واللي مقدم شكوى بخصوص سيارتك ؟
ضحية وكالة هوندا : بالزبط أنا !.
مدير فرع الصيانة : حزرتك أيه المشكلة ؟
ضحية وكالة هوندا : قلت المشكلة من طقطق الى سلام عليكم ماخليت شي!.
مدير فرع الصيانة : بص حزرتك دحنا بنشكر حزرتك على ثقتك فينا وشكواك ديت بتدل على حرصك على سمعتنا
( أمحق سمعة والله أنك في وادي والصيانه في وادي ) لكن أنت غلطان بائه انت لو بعثت السياره لنا على سطحه كنا بائه عرفنا المتسبب وحاسبناه ( طبعاً هذا تمهيد للزحلقه والتصريف ) لكن بوعد حزرتك هنتصل بيك في اقرب وقت حال عرفنا المتسبب والمشكلة وأعزرنا على اللي حصل .
ضحية وكالة هوندا : يعني هذا اللي عندك على العموم يصير خير !.
مدير فرع الصيانة : مع السلامة .
ضحية وكالة هوندا : ماقلت له مع السلامة من حرارة رده علي وقفلت .
 
الأستنتاج في نهاية المعضلة :-.
أذا كان خصمك القاضي فمن تقاضي .
أنصحك بالفحص في الصناعية على شان ماتنقهر مثلي.
 لو قدر الله عليك وفحصت في الوكالة حاول أنك تشيك بعد فحصهم نظراً لأمانتهم .
خارج الأستنتاج أنا على أستعداد تام على اثبات جميع ماذكر وأتحمل المسؤلية كاملة اذا ثبت عكس ماذكرت
 
في النهاية
. صورة مع التحية/ لمدير عام شركة عبدالله هاشم المحدودة للأمانة .
. صورة مع التحية /لحماية المستهلك للمتابعة .
 صوره مع التحية/ للضحية القادمة للأحاطه .

كما اشكر أدارة قروب أبو نواف على المتابعة الدائمة لمثل هذه القضايا ونتمنى لهم التوفيق
[email protected] للطلب والتأكيد


تعليقات 2

  1. انا غاسل يدي من صيانة هوندا من بدري وابشرك ماجي غير خدمة سريعة يعني تغيير زيت

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

وين الأمانة ياوكالة هوندا

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول