والسبب ؟؟ سطل زبالة


بسم الله الرحمن الرحيم
أسعد الله أوقاتكم بكل خير
 
عودة مجددا ً بعد عيد الفطر .. من خلال القروب الأروع
وكل عام والجميع بخير
 
موضوعنا اليوم يتكلم عن دوامة بين مركز الشرطة والدفاع المدني .. سببها سطل زبالة !!
تفاصيل هذه الدوامة :
 
انتشرت في حارتنا حادثة غريبة جدا ً ..!! وهي ( إحراق سطول الزبالة ) من قِبل مجهول !!
 
شخصيا ً تفاجئت جدا ً بعد ما قالي اخوي .. شفت سطل الزبالة اللي عند بيتنا .. محترق …!!!
وهذي صورة السطل بعد ما تحلل ( الصورة بالليل .. اعتذر عن عدم الوضوح )

والسبب

من اللي احرقه .. و ليه .. وش مصلحته .. لو امتد الحريق لأكثر من كذا وراحت ارواح لا قدر الله ..!!!
اسئلة كثيرة دارت في بالي .. ولا قطع هالتفكير الا جملة يارجاااااال هي واقفة على سطل زبالة ..!!
وبعد ان تحلل السطل البلاستيكي .. وراااح ملح !! بدأ المجهول في احراق سطل آخر ..
هذه المرة لحقت على بدايات احراق السطل .. ولكني للأسف ما شفت المجهول
 
ألنسة الهب كانت قوية .. خصوصا وان المادة المصنوع منها السطل .. بلاستيكية
كان بجانب السطل .. مجموعة من الزبايل – اعزكم الله – وكنت خااايف يمتد الحريق للأكياس .. ويمتد الى اكثر من كذا .. ويوصل بيت او سيارة لا قدر الله !!
صورة للسطل بعد ما طفوه مجموعة من سكان الحي

والسبب

قلت يا ولد .. مالك الا الدفاع المدني .. لا خلا ولا عدم
وادق على 998 ردوا بسرعة الله يجزاهم خير
السلام عليكم .. عليكم السلام
اخوي السالفة كذا وكذا .. وسبق ان تم احراق سطل والآن يحترق سطل ثاني .. السواة ؟
قال ثواني خلك على الخط ..
تركني على الخط دقيقتين .. وانقطع الخط بوجهي !!
دخلت البيت كان فيه ولد عمي .. قلت له امش خل نطفيها .. قال ابكلم الدفاع المدني , قلت توني مكلمهم .. وسكروا السماعة بوجهي
المهم انه كلمهم .. واخذوا الوصف
شوي قاموا مجموعة من سكان الحي بإطفاء الحريق .. فقام ولد عمي بالاتصال على الدفاع المدني والغاء البلاغ ..
 
انا ما ارتحت ..! قلت اذا اليوم طفوها سكان الحي .. بكره يمكن مانلقى احد يطفيها ..
تدري يابو صلوح .. دق على الشرطة بس شف وش يقولون
وادق على الشرطة .. سلام عليكم ,, عليكم السلام
السالفة كذا وكذا .. اذا بالإمكان متابعة هالموضوع .. ؟؟ قال لابد من ارسال فرقة سرية .. تتابع بس انت دق على شرطة العليا يفيدونك ..
قلت خير ان شاء الله ..
دقيت وانا متفائل ان الموضوع ما يتعدى اني اعطيهم الوصف .. عشان تطلع للحارة سيارة سرية .. تتابع الحارة .. وان شاء الله تتعرف على المجهول وتفكنا من شره !!
اللي حصل .. اني كلمت شرطة العليا .. هو يوم سمع طاري حريق ,, قال دق على الدفاع المدني
ويوم فهمته السالفة .. قال طيب لحظة احولك على واحد ثاني ..
ويحولني ..
واعطيه الزبدة .. قال والله بالنسبة للفرقة السرية .. مانقدر نطلعها الا لازم تقرير من الدفاع المدني
يثبت ان سطول الزبالة تحترق بفعل فاعل .. ماتحترق من نفسها !!!!
قلت اكيد بفعل فاعل ..!! شلون يعني تحترق ؟؟؟
قال ايه هو صحيح .. لازم انها تكون بفعل فاعل ,, ودام انها اكثر من مرة .. فأكيد انها بفعل فاعل .. بس لازم تقرير
قلت طيب الدفاع المدني اصلا ً ماجاء .. عشان يعطيكم تقرير .. لأن السطل قاموا مجموعة من سكان الحي بإطفاء الحريق .. فماراح يجي الدفاع المدني .. عشان يشوف ويرسل تقرير مادام ان السطل طفا ..!!
قلت يعني لو احترق سطل مرة ثانية .. نتركه الين يجي الدفاع المدني ويطفيه ويقولكم انه بفعل فاعل ويرسل تقرير عشان تتابعون الموضوع ..؟؟؟؟؟
قال اييييييييييييييييييييه امممممممممممممم والله يا عزيزي .. انت كلم الدفاع المدني وشف وش يقولون لكم .. وان شاء الله ربي بيحفظكم
قلت خير ان شاء الله
اتصلت على الدفاع المدني .. وبلغته بالموضوع ,, وان الشرطة ما تقدر تتابع هالموضوع الا لابد من وجود تقرير من الدفاع المدني ..!! اليوم سطل .. وبكره الله يستر وش يحترق ..!!
قال والله حنا .. ما نقدر نرسل شي ولا نقدر نطلع مادام انه مافيه حريق قائم الحين ..!
حسبنا الله ونعم الوكيل ..
الى متى وحنا .. ارسل تقرير .. كوّن لجنة .. ارسل تقرير .. كوّن لجنة ..!!!!!

صلوحكا


تعليقات 5

  1. ياخي زبالتكم موب صايره اعز ولا اكرم من زبالة الهرم خانوم ,, كل يومين وهي محترقه وبعل فاعل والمفعول به هالعمال المساكين يتطايرون عشان يطفونها<><> ولا بدل حرايق ولا بدل روعه ولا هم يحزنون ,, والمشكله ان الزباله بوسط السيارات,, الله يستر ويحمي المسلمين ,,

  2. عاااااتي وسع صدررررررررررك يااااامااا ويااااماااااا مواقف تصير والله ياقصص تشيب الراس.. ناس ابوهم انكتم ودقوا ع لاسعاف علبالهم اسرع من انهم يودونه وبعد انتظااااار جاء الاسعاف .. وطلع مخلص الاكسجين اللي بالسياره وتوفى الرجال الله يرحمه..باللهي شرايك؟؟ شدعوى ياخوي والله لو انك بأمريكا عشان تستنكر…

  3. شعب كسووووول أنا ما استغربت من رد المرور والدفاع المدني بقد ماني مستغربة من ردود بعض الناس هنا أيش يعني صار عادي الشي اذا يتكرر ؟ عارفين ليه يتكرر ؟ لأنو مافي ناس توقف للحق وتدافع عنه سطل زبالة احترق ؟؟ عااادي ايش الشعب الكسول هذا لااااا أكيد مو شي عادي تطلع فرقة ايش عندهم مشغولين ؟؟ ماهم فاضين ؟؟ ليه ما يوظفون عالم فاضية ؟؟ مع احترامي لك يابو سليمان هذا اسمه تخاذل اذا أمن الناس وراحتهم مش مهم ايش المهم ؟؟ وش يدور في قسم الطوارئ مش وظيفتنا نعرفه لكن قسم الطوارئ هذا وظيفته يعرف ايش عندنا أنا ما عندي شخص معين أتهمه أو جهة معينة أحملها مسؤولية اللي صاير لكن هذا ما يعني انك تبرر بأن الموضوع غريب وماله داعي متى بيصير له داعي؟ لو زاد الضرر لا سمح الله؟ الله يبعد عنا وعنكم الشر يارب واللي يحرق الزبايل هذا يجيه نعاس كل ليلة ما يقومه الا الفجر ويفكنا من شره بعدين انا اشوف ناس تحرق شمعه .. عود .. إن كثرت ورقة أما زبالة بكبرهاااااا < كل شي جايز وترا بلغت عنك يا ماجد وقالوا لي ماعليكي هذا واحد من الفرقة اللي طلعت كح وبالأخير ما أقول يا صلوحكا إلا الله يكثــــــــــــــــــــــر من أمثالك وبلغ الجيران كلهم قبل ما ينامون يخبون الزبالة كح

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

والسبب ؟؟ سطل زبالة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول