هل سبق وزرت صحراء الربع الخالي ؟؟ – بالصور

هلا قروب …

حبيت اني اعرض لكم صور لصحراء الربع الخالي
التقطها اثناء كشتتنا الاخيرة هناك
وذلك بعد معارضة شديدة من ربعي ولكن بعد معاناة من الاقناع والنصب والهلس
تم أخذ الموافقة منهم على ان اعرض فقط 4 صور فقط
أتمنى انها تحوز على اعجابكم ورضاكم
………………………………….

هالصوره عاد أثناء التجهيز والتشييك النهائي على السيارات قبل الدخول الى صحراء الربع الخالي
لان اي خطا حتى لو كان بسيط قد تكون مصيبة لا تحمد عقباها
والموقف المضحك في هذه اللحظة هو ان واحد من الشباب كان وده يقضي حاجته …….. عاد افهموها
وكان مستحي يقولنا…. فراح ورا كفر السيارة وشلح هدومه وجلس … طبعاً حنا حسينا فيه ..فقمنا وطمرنا بالسيارات ومشينا باقصى سرعه
طبعاً خوينا جا ببالة اننا نسيناه … وما عمرنا سمعنا ان فيه احد مفقود نجا هناك
ومير مسكين يوقف من الروعة ويركض ورانا ويطيح من ملابسة … لين ما رحمناه ووقفنا له

………………………………..

هذي صورة لاقرب محطة بنزين والغريب ان بنزين هالمحطة ماله ريحة ابد
انا اخبر اذا جيت اعبي سيارتي استمتع برائحة البنزين … اما بهالمحطة فتبي ريحة جيف
والا ريحة السوداني الي يعبي بنزين والى ريحته كنها ريحة ثلاجة فيها لحم خربانه من 6 شهور
………………………………..

صورة لسوبر ماركت الربع الخالي … بأختصار شديد
كل شئ منتهي مدته من سنتين تقريباً والمشكلة الى يبيع نفسه في خشمه
جلست ادور شئ يفيدنا بالكشتة ما لقيت شئ ابد ومير اقول لراعي البقالة ورا ما تقلبها بنشر اصرف لك مالقيت
شئ يفيد عندك ما فيه الا عشش عناكب وجحور عقارب … ومير يقول لى اخرج من البقالة والله
ما ابيع لك منديل ؟؟؟؟…. قلت له تكفى يا بنده العزيزية انقلع يا ضفدع اقريح انت وزبالتك .
……………………………….

وهالصورة لها قصة مضحكة وهي أن هالشخص الي تشوفونه قدامكم أول مرة يطلع بر
ويتميز هالشخص بالسرعة والفداغة . واثناء وقت صيد الارانب كان جالس يناظرنا نصيد
المهم يوم نط وقال أبي أصيد ارنب قمنا وعطيناه البندق … قال لا ابصيده بدون بندق
ومير ينط ذيك النطة الى تقول نمر بري له 3 ايام ما اكل شئ ويركض ورا الارنب
والارنب طار عقله من الخوف … وينط ذيك النطة الى ما تشوف الا الرمل يتناثر
ويوقف خوينا وهو ماسك الارنب…. ويقول لنا…. هاه وش رايكم يا راعين البنادق؟؟؟؟
وهو يوم قالها طحنا من الضحك لدرجة اني وانا ميت من الضحك حسيت بثقل برجلي اليسار
ويوم ناظرت رجلي … اثرها داخل نصها بجحر ثعبان
والي لقاء قريب مع رحلات برية أخرى
…………………………………
تحياتي للكل
هـــواوي