نعمة تطور التعليم أصبحت نقمة


السلام عليكم ورحمة الله وبركاته
مساكم الله بالخير أو صبحكم الله بالخير
يعتمد على حسب وقت قراءة الرسالة
هذه أول رسالة وإن شاء الله ماتكون الأخيرة

ولكتابة الرسالة سببين
السبب الأول : أخوي صاحب الشكوى على الجامعة
السبب الثاني : موضوع الأستاذ منصور
فيتامين واو

بسم الله نبداء

قبل فتره بسيطه أخوي جلس يشكي لي حاله وحال أصحابه بسبب عدم قبولهم بجامعة الملك سعود وبعض الجامعات الأخرى ، مع العلم بأن درجاتهم ممتازه ونتائجهم مشرفه وطموحهم عالي
استغربت .. قلت له هذا إهمال منكم .. كما الحال بأغلبنا في حالة ردت الفعل .. بأن الخطاء غالبا ً مايكون منا .. لايكون من مصادر تعليمنا
قالي وبرد والله يكسر الخاطر .. والله ماهو ذنبنا .. رح شوف شروط القبول بالجامعات .. وشف درجاتنا .. وبتعرف انك ظلمتنا
قلت يكون خير .. وجلست أفكر في حالهم ..وأقول معقوله ما إقبلتهم الجامعه مع انهم جايبين درجات مشرفه .. ؟
مع إن العلم في مراحل متطوره من قبل كم سنه .. واختبارات واهتمامات
فحاولت أبحث عن الأسباب .. ماحصلت إجابة للتسائل إلا بعد سرد الذكرى والمقارنه من أيام الإبتدائي حتى تخرجي من الجامعة والفرق بين دراستي ودراستهم

طبعا ً من وجهة نظري البسيطه بعد الذكرى والمقارنه .. اكتشفت إن تطور العلم عندنا فاشل .. بالإضافه لفشل جامعاتنا الموقره بقبول الطلاب
خصوصا ً وإن جامعة الملك سعود اخذت مركز جديد .. يعني الأمر يدل على التطور
وببساطه هذه هي المقارنه بطريقة مختصره جدا ً كرؤوس أقلام
من عـام 1420 هـ حتى عـام1429 هـ

الطالب في المرحلة الإبتدائيه إذا كان فاهم ..يعني ناجح .. وإذا ماكان فاهم دويره حمراء كبر راسه بالشهاده .. يعني راسب
صف خامس ابتدائي كان صعب وبشكل مايوصف لطلاب المرحلة الإبتدائية ..
وحاليا ً .. الموضوع اصبح تقويم مستمر .. فاهم يعني ناجح .. منت فاهم يعني ناجح .. ماصار فرق بين المجتهد والكسول
المرحلة المتوسطه .. ثاني متوسط اصعب مرحله فيها وممنوع الطلاب اللي بثالث متوسط يمشون مع طلاب أول متوسط والعكس
ماتغيرت ..ولكن تبي تتغير هالسنه لأنهم بيعتمدون التقويم المستمر عليهم .. والله يستر
المرحلة الثانوية .. اختبار ثالث ثانوي لنهاية السنه .. من الوزارة .. وطلاب أول وثاني ثانوي خايفين من هالأسئله وهم مالهم دخل
وبصريح العبارة .. لكل مجتهد ٍ نصيب .. مع انها كانت صعبه بس كنت تطلع بمعلومه ..

حاليا ً .. وبكل آسف والله

عام 1424 هـ
طلع شئ يسمى اختبار القدرات .. وسبحان الله وبقدرة قادر .. تم دمج درجاته مع نسبة الثانوية .. حيث يحسب للقبول بالجامعة
من مجموع درجات الثانوية العامه 65% و 35% بالمية من اختبار القدرات
مع العلم بإن الإختبار جديد على الطلاب وفكرة متطوره كثير عن مستوى التعليم عندنا
ولكن تم إعتماده بشكل مجحف بصراحه .. والمفروض يكون أول سنه تجريبي ..
ومع الآسف طلاب كثير .. مانالوا مرادهم .. بسبب اختبار القدرات المفاجئ .. وقرار دمجه بشكل مباشر دون تجربه
وبعد تطبيق هالإختبار .. الطلاب صاروا يحسبون له أكثر من ألف حساب .. ويهتمون إنهم يعرفونه ويجيبون درجات زينه فيه
عـام 1429 هـ .. تم إلغاء اختبار الوزارة لثالث ثانوي .. ودمج درجات ثاني ثانوي وثالث ثانوي بعد التخرج
وصارت الإختبارات كأنها اختبارات متوسط .. مذكرات تباع بالمكتبات واللي يدرس خصوصي .. ياخذ نموذج الأسئلة عند بعض المدرسين
والمصيبه .. انهتم وضع إختبار جديد اسمه التحصيلي .. وإعتماده والأعظم من هذا كله تم تحديد النسبه الأعلى للقبول عليه ..
مثال : جامعة الملك سعود .. اختبار التحصيلي 40 % .. الثانوية العامه 30% .. القدرات 30 %
هذي وهي الطموح عند الأغلبيه .. مع اني ماتطرقت لأرامكوا وسابك والبترول والمعادن لأن طلباتهم أكيد أكثر من هالنسب

..ً سابقا ..
كان القبول بالجامعة .. تقريبا ً معقول والواسطه آخذه حقها .. وكذلك كان لكل مجتهد نصيب والمجتهد ياخذ التخصص اللي يتمنى

..ً حاليا ..
أصبح القبول بالجامعة .. مستحيلا ً للمجتهد .. والواسطه آخذه حقها بالكامل .. وكذلك ماكل مايتمناه المرء يدركه
أسئلة تتردد في ذهني من ذلك الوقت وحتى كتابة هذا الموضوع
هل أتطرق لباب الواسطه ؟ لأن اخي وأصدقائه لم يحصلوا على قبول بالجامعة ؟
هل أستسلم لتطور التعليم لدينا وأراه يحطم طموح شباب .. نسميهم شباب المستقبل ؟
انا متأكد بأنه ليس أخي وأصدقائه الغير مقبولين .. لأن
قرار التطور أصبح فشل للمجتهد .. و نجاح لفتامين الواو
والله ما إنكسر قلبي عليهم الا بعد كلمه قالها اخوي .. بعد طموح الهندسه .. صرنا نتمنى قبولنا بكلية السياحة والآثار ..
مع احترامي لطلاب هذه الكلية
في نهاية طرحي .. أسعدني قرائتكم لموضوعي .. ويشرفني طرح ارائكم وتعليقاتكم

لكم مني كل التحيه والتقدير

My Sweet Heart


تعليقات 42

  1. بصراحه ربي يعطيك العافيه موضوعك اكتر من حقيقه لانه ناس كتير طموحاتهم راحت في الهواء وانا منهم واتمناانه نلاقي حل لدي المكشله:(

  2. بسم الله وصلاة والسلام على اشرف المرسلين سيدما محمد وعلى اله وصحبه اجمعين يا اخواني لماذا هذا التدمر هل تعلم اني مدرس رياضيات وقد تم سؤال طالب في السنه الاولى متوسط عن ناتج حاصل ضرب 2 في 2 ؟ الجواب : لا اعرف قلت له انت من جدك ما تعرف قام وحلف بالله انه لا يعرف في زمننا من كان يطلع من الابتدائية ومايعرف جدول الضرب كان من النوادر والان اصبح العكس من النوادر ان يتخرج من الابتدائيه طلاب يعرفون جدول الضرب وشىء عادي انك ما تعرف الضرب وانت خلصت الابتدائيه فل نفترض ان اخوك انسان مجتهد ولكل مجتهد نصيب انت قلت في موضوعك الان المدرسون يحطون ملزمه ولا 10 ورقات ويقول لطلاب روحوا المكتبه الفلانيه بتلاقون الملزمه او الورقه وذاكروا منها يعني اخوك ولا اخويه ما عنده نص المعلومات الي كانت عندي او عندك ايام تخرجنا من الثانويه اذا يا اخي الكريم نمسك الطرف الثاني وهو المعلم المعلم هذا لو اعطى كل ذي حقا حقه سوف تجد الرسوب بشكل كبير جدا مثل ما حصل معي هذه اول سنه ادرس فيها واعطيت الطلاب كل واحد درجته الي استحقها وجاني المشرف وقالي انت عندك رسوب 67% قلت ايه وش فيها قالي يعني الخطاء عليك وانت يمكن ما وصلت لهم المعلومه وانا اقول وبكر امانه انهم يخرجون من عندي وهم اغلبيته الفصل فاهم الدرس ولكن لا احد يذهب ويراجع ما اخذه وتعرف وش قالي لموجهه قالي استاذ فلان يعني انا ما حضرت عندك درس بس من النتائج احكم عليك بانك فاشل طبعا بعدها صارت هوشه ما نبي ندخل في هذا الموضوع وللمعلوميه فقط في اخر اسبوع سويت معهم مراجه لمده 3 ايام وكل الاشياء الي ارجعها من الاختبار المهم عدد الطلاب الي جايبين امتياز 7% واغلبيتهم اجانب عدد الطلاب الي جايبين جيد جدا 5% عدد الطلاب الي جايبين جيد 9% عدد الطلاب الي جايبين مقبول 12 % والباقي ضعيف راسبين يعني 67% والله لو اني كنت جالس على الكرسي وجالس اللعب في الجوال كان افضل ولكن اولا واخرا الخوف من الله الذي يجعلني افعل كل ما بوسعي ومع ذالك لا يفيد ناسف على اني اخذت من وقتكم كثير

  3. :~:~ السلام عليكم حبيت اوجه عتبي على كاتب الموضوع لماذا هذه السخرية من كلية السياحة والأثار لماذا الإستخفاف بهذا الشيء انا لم اشاهد كاتب في جروب ابو نواف يكتب مثل هالأشياء اطلب منك الإعتذار لكل طالب في السياحة والأثار اليس هم طلاب علم هل تعلم ياكاتب الموضوع ان هذا القسم من افضل الأقسام في العالم ؟؟؟ اتمنى ان لايتكرر هذا الشيء كل الشكر لقروب ابو نواف

  4. معك حق في الي قلتيه الطالب يطلع من الإبتدائي ميح بسبب سوء تطبيق وتنفيذ التقويم المستمر اللي المفروض انه يطور الطالب وتقولين انه بيطبق بالمتوسط يعني يفتح الله وبعدين يطالبون الطالب انه يصير نابغة عند دخول الجامعة

  5. كلامك صحيح للأسف نظام التعليم مأساة انا اخوي متخرج العام الي فات ب 98 ماشاء الله وكان وده يدخل طب جامعه الملك عبدالعزيز لسبب واحد ما يبغى يتغرب بس للأسف كانت في شروط غريبة جداا اهمها انه يكون سعودي معنه مولود ومتربي في السعودية؟؟ ممكن ما ينلاموا لانه تكون الاحقيه لابن البلد مافيها نقاش لكن لمن تجي للمنطق المجتهد له الاحقية!! في اي جامعه في العالم شف شروط اي جامعه في برطانيا مثلا عمرهم ما يقولولك لازم تكون بريطاني عشان تسجل عندهم يشوفوا لمستواك ودرجاتك …. عشان كذا تعليمهم ممتاز جذا …. نصيحتي لك اذا مقتدر خلي اخوك يدرس برا عشان لمن يرجع ينفع نفسه وبلده …. سلام

  6. السلام عليكم كلامك سليم وابشرك انا من ضحايا هالسنه المتطوره والله من زين التطور ماراح اكلمك عن نفسي بكلمك عن صاحبي جايب 98% ماشاء الله عليه ومن مدرسه حكوميه متشدده وكان يحلم بالطب ..وإذا مره مافيه كان يبي هندسه وحاسب كرغبات ثانيه وصاحبنا بس زل بالقياس شوي… بس وبالأخير…وبعد ماحط رغباته الـ30 الي تجبرك الجامعه تضعها بالترتيب تدري وش طلع له؟ طلع له كلية العلوم بالله عليكم مو حرام؟! هالسنه ماقابلت ولا واحد للحين طلع له الي يبيه مانقول الا حسبي الله ونعم الوكيل اخوكـ : الي طلع له قسم علوم بكلية المعلمين لا والفصل الثاني m i k O

  7. السلام عليكم .. اخوي .. اشكرك جزيل الشكر على طرحك للموضوع .. لانه بصراحه الموضوع كبير ولا سمعت احد تكلم فيه .. عندي عيال اخوي اثنين .. واحد جاب 94% والثاني 92% .. لكن مع شروط الجامعه المتزمته ما لقو قبول الا كلية معلمين وتخصص علوم !! ما اقولها استهتار بالتخصص .. ولكن اللي يقهر ان التخصصات المعتبره زي التخصصات الصحيه والهندسه … الخ .. يقبلون اعداد محدوده جدا من الطلاب .. تخيل كلية الصيدله تقبل قرابة 150 طالب !! وكلية الطب اقل من ذلك .. والمشكله ان التخصصات هذي وبمعدل التخريج الحالي ماراح تغطي حاجة البلد من هالتخصصات .. اقتراحي ان الفلوس اللي تصرف على مشاريع تكميليه .. وبناء مدن ماندري وش بتفيدنا فيه .. تصرف على توسعت الجامعات وزيادة طاقتها الاستيعابيه … وتحياتي للجميع

  8. السلام عليكم وبعد لاترى اخوك مهو اول واحد ولا اخر واحد انا لي اللحين سنه ولاجامعة قبلتني يعني وين اروح يقولون ليش العالم تخرب وتنحرف انا اقول من الضغط والقهر مثال بسيط نسبة ولد عمتي 93 علمي من مدارس الظهران وقدراته 77 والتحصيلي 70 تصدقون وين قبلوه كلية المجتمع ولا بفلوس واللحين ضاع مستقبله ونفسيته تعبانه وصديق لي نسبة 92 قدرات 82 التحصيلي 75 وقاعد في بيتهم وناوي يكمل با على حسابه وانا اللحين عاطل لا جامعه ولادراسه ويقولون ليش السعودين مايتطورون كيف يتطورن واحنا جامعتنا بالواسطه ولا غير كذا يقسمون نسبة على نسب اول وثاني وثالث ثانوي اي نظام بالعالم يسوي الشيء ذا والله اني قبل شهر شايف في قناة الجزيزه وحده عمرها 65 سنه وقبلوها تمريض واحنا يتدمر مستقبنا ولاحد داري عنك اللهم يامجيب دعوة المستجاب انصرنا على من ظلمنا:( وجزاك الله خير اختي عالموضوع

  9. :(:(:( والله انك صادق ياخووي,, صح ان كلامك عن الاولاد,, بس حتى حنا البنات هالسنه صارت لنا بهذله ماعمرنا شفنا مثلها,, تحس انهم ذالينا على هالجامعات وكنهم يقولون مانبي احد,, صارنا ياهالدفعه فئران تجاب’’ كل شوي واحد يحط براسه فكره ويله ينفذها علينا.. اول شيء جابوا التراكمي اللي حاس اهلنا حووووس’’ وبعده جا نظام البحث حق المكته اللي استنفد كل طاقاتنا,, وبعده جانا القدرات والتحصيلي اللي خسف بدرجاتنا الارض,, وعندنا نظام القبول الالكتروني اللي مدري وش يبي وحاس البنات.. اللي ماعندها نت واللي اهلها قالو ماعاد نبي ذا الدراسه اللي جابت لنل الهم’’ ………………….الخ من التجارب اللي صارت علينا نظام زي الزفت للأسف,, وفرحانين فيه,, قال ايش قال‘‘ تطوير التعليم’’ لكــــــــــــــــــن ما اقول الا حسبي الله على اللي كان السبب,,,

  10. صباح الخير والله العظيم ياناس اي احد بيدخل اي جامعه في السعوديه يصاب بالاحباط من القهر والذل والظلم ومن ضمنهم انا الا اتخرجت والحمدلله من سنتين يعني النظام هذا ماكان موجود اصلن ولكن دخلت الجامعه وطلعت عيني من انواع الظلم حسبي الله عليهم الظاهر انه اسلوب الاحباط هو الا متبع في التعليم هنا سواء للناس الا دخلت الجامعه بالنظام القديم او الا لحقت النظام الجديد فقولو الحمدلله يالخريجين الثانويه انهم بيدربوكوم ويهيؤا نفسياتكم للاحباط واتعودو على كده الى ان تتخرجو على خير يارب واتأسف لو احبطكم او زعلتكم لكن هذه هي الحقيقه . مع تمنياتي للجميع بالتوفيق والحظ الأوفر الله يحقق امنياتكم ياخرجين الثانويه ويزيل همومكم وينصرنا على الظالمين.

  11. مرحبا اخواني واخواتي انا حابه اعلق على الموضوع مجرد اخفف عليكم معاناتكم !!!! وانا عارفه محد داري عنا مهما قلنا لكن لنا الله . اولا حابه اقول للي جاب نسبه 95واللي جاب 92 الخ …… انتو لازم تسكتون ولا تتكلمون بعد اللي بقوله وتحمدون ربكم على اي تخصص يجيكم . اختي حصلت على نسبه 99.4 علمي ومن مدرسة حكومية متشددة!! وهي من المتميزات طوال السنوات الماضية !! لكن تجيها رساله بالجوال تهدم طموحها كان نص الرساله ناسف لعدم ترشيحك بالكليات الصحيه وكلية التمريض !!!!حتى التمريض رفضها !!!لا تعليق بصراحه ماعندنا واسطه طيب وش العمل وش اكثر من النسبه هذي اللي تشفعلها تدخل باي مكان تؤشر عليه حلمها تكون طبيبه وتخدم بنات جنسها هذا هو حلمها !! وش الذنب اللي ارتكبته هل هو تفوقها اللي هلكها بالدراسه وهلكنا معها والبيت كله ايام الاختبارات عاملين حالة طوارئ الى ان بشرنا بالتفوق والفرح ملا العالم لكن الحزن الان غطا البيت فقط ولا احد يعلم بحالة المسكينة الا الله فدعواتكم لها اخواني الافاضل لها ان ترجع زي اول ولا نبي لا طب ولا فراشة !!!!!!!!! لكن حسبنا الله ونعم الوكيل

  12. السلام عليكم الحقيقة أقل ما يمكن قوله عن اختبار القدرات أنه أهم اختبار للقبول،فهو المقياس الوحيد لعقلية و قدرة الطالب التحليلية،وبدونه لا يمكن التمييز بين الطلاب،فشهادة الثانوية قد يكون تحصيلها عن طريق الكد و التعب لا أكثر

  13. السلام عليكم كل ما كتبته يدك في عين الصواب في وقتنا الماضي الطالب او الطالبه يشيل هم الاختبار بشهر وبعد الاختبار والنتيجه ناجح ويسال من اقربائه هل نجح؟ .. كم نسبتك؟.. ويقاله مبروك وعقبال التخرج من الجامعه اااااااااااااما الان يشل هم (القبعه السحريه) اقصد اختبار القدرات وهم القبول في الجامعه ويسال من اقربائه هل انقبلت في الجامعه؟.. كم معدلك في القبعه السحريه اقصد القدرات ؟.. الطالب او الطالبه يتخرج باعلي نسبه من الثانويه وفي الجامعه انت وا انتي في ادنى نسبه انا مو قاهرني ومطلع عين اللى اختبار القدرات سميتها القبعه السحريه صار التعليم عندانا تفوز بالقبعه السحريه تفوز الجامعه لو نسبتك في الثانويه ميح اعذروني عن الاطاله واشكر اخوي علي تطرقه لهذا الموضوع

  14. يوم الثلاثاء الماضي تم قبول ابني الكترونيا بجامعة القصيم وما عرفت الا يوم الأربعاء وكنت بالرياض ويوم السبت قالو تم الغاء قبوله !!! وش رايكم فيه افشل من هذا النظام ؟ لنا الله يا ابناء الوطن الحضارة حرام علينا يقولون لازم تتوسد النت الين نمن عليك بقبول ابنك وتجينا بنفس اللحظه

  15. معك اخوي بكل حرف كتبته:> انا مو عادتي ارد او اعلق دووم متصفحه بس هالموضووع يححر القلب يعني حنا بنات الخبر افضل شي عندنا فييصل والكراسي اساسا قليله ويطلعلنا هالتعجيز؟؟ السؤال الي دووم ببالي ليييه؟؟ مع العلم ان الطالبات ماكان لهم الا فرصه وحده مو نفس الاولاد اكثر من مره:( ليه ماعندنا طمووح؟؟ واللي يعوور القلب زياده ان اككثر النسبه الموزونه على التحصيلي؟؟ والنسبه تراكمي للثنوي؟؟ صار ماافي فرق الا بالكسور بين اللي جايبه ميه واللي جايبه 90…؟ انا طموحي هندسه بفيصل بس لغو امتحان المهااره وحطو ال40% حقته على التحصيلي؟؟ليييه….؟؟ مو المفرووض الطالبه تكوون كفئ لهالقسم وعندها المهارات الاساسيه..؟ مو عن واسط بس انا اعتبره تعجييييز … واللي ينرفزك زياده ان نص اللي متقدمين لجامعة فيصل الدمام هم طالبات الحسا؟؟ والله انا لو يحصلي الحسا كان رحت

  16. طالبه متفوقه من ذو بدايات دراستي ولم اقبل في اي جامعه من جامعه بلادي التي انعدمت وطنيتي وولائ لها كنت اطمح دراست العلوم الطبيه لسد عجزالنقص في بلادي من هذه التخصصات التي يصرح وزير الصحه ان نسبه السعودين في هذا القطاع تمثل 17% هنيئا للأجانب في بلدي المفقود فهل من مستمع لندائي وداعا ياوطني لم يعد لك مكان في قلبي حيث افقر المجتمعات يجدون لأبنائهم قبول في جامعاتهم اين ذهبت اموال البترول ؟

  17. يا استاذي الكريم انا اتخرجت السنه الماضية بس انا صراحة من المؤيدين لاختبار القدرات والتحصيلي انا اعطيك وجهة نظري هذا موقف حصلي السنة المضيه في الاسبوع الاول من الاختبارات النهائية وزااااااارة مرض لمدة اسبوع كامل درجة حرارتي كانت من 39 و38 ما تقل عنها طول اليوم وحمد لله بعد اسبوع ربي عافاني وبعدها كملت الاسبو الثاني من الاختبارات وانا حالتي النفسية تعبانه لما اتخرجت طلعت نسبتي 85% طبعا زعلت والبيت كله زعل مني ولما اختبرت القدرات جبت 88 والتحصيلي 80 فانا راح اعطيك وجهة نظري مع احترامي للكل اش ذنب اللي يمرض ولا يسيرله حاله طارئة وقت الاختبار النهائي اختبار القدرات ينعاد اما الوزارة والثانويه ما تنعاد لو الا اذا كنت راسب بسسسس ارجو انو تكون وصلت وجهة نظر مع احترامي للكل

  18. والله ياخوك انك صادق .. انا الحمدلله بالسنه الثانيه يعني عديت ،، بس الحمدلله كانت نسبتي عاليه مررره يعني غصب عليهم ادخل اللي طمحت له وهي الهندسه ،، ولا يمكن مااكمل الجامعه خخخ .. انا بدايه العطله سافرت وكان شاغل تفكيري ولد خالتي وصديقي مسالة القبول بالجامعه .. كنت واثق بيدخلون للي يطمحون له ،، لكن الفاااااااااااااااجعه واحد لغه فارسيه ترم ثاني والثاني علوم .. هل هذا يعقل ؟؟؟؟؟؟ يعني مافي اي مكااااااااااااااان ؟؟ انا احس بالموضوع فيييييييييييه ( إن ) .. وفتحت المجال لدخول الواسطه بشكل كبيررررررررررررررررررررر .. مثل ولد خالتي وصديقي الذين اجربتهم الظروف لافحام الواسطه بالامر .. فعلا الكل منصدم من هالتخبط .. قسم بالله اني ضايق صدري عشانهم .. اجل فارسيه ؟؟!! خخخ الله يكون بالعووون .. الف شكررر كل خيوو .. والله يكون بعون الجمييييييييييع ..

  19. الشكوى لله تعليمنا فاااشل ياحسرة علينا كنت في أولى ابتدائي أختبر وتأسست عدل مو مثل أخواني اللي لحقوا التقويم يدوب يفكون الحرف

  20. 🙁 والله انك صآآدق بكل كلمه.. أنظمه فاشله وتجيب الاحباط من مدري وين.. شي يقهر.. انا بالنسبه لي مادخلت القسم اللي ابيه لكن اللي انا فيه حلوو.. صديقتي تبي صيدله وبتموت عليه..من حين حينها..واللحين انقبلت فنيه..شي يقهر جد وعندنا دائماً نقص في الكوادر الطبيه السعوديه ومدري ايه طيب كله منكم اقبلوا طلاب طمووحه خلها تنتج وتغطي النقص الحاصل.. لي متى واحنا بيدين هالاجانب يحركونا ويصرفوون امورنا ييعني النسبه بوزاارة الصحه مرره مريعه لعدد الموظفين في المستشفيات من السعوديين تبون تغطون النقص اقبلوا طلاب بطموحهم مستحيل احد ينتج بغير المجال اللي يبيه الدعووى مو غصب انا احب شي يرغمونك تدخل شي انت ماتبيه ولا تفكر فيه..بكذاا ماراح تهتم ابد وبتقول خرباانه خرباانه 🙁 مرررا شكراً قلت كثير في نفسي بس ليت عندك احد يقراا ويهتم ويطوور من الانتقاادت اللي تيجه

  21. انا من ضحايا مركز قياس مااقول الا الله يدمرهم مثل مادمرونا سنه كامله الواحد يذاكر عشان يجيب نسبه زينه في الثانويه ويجيب ممتاز واخرتها بس 30% يعني تعبك حق سنه مايعتبر شي واختبار القياس اللي في خلال ساعات هو اللي يحددلك مستواك ومستقبلك هذا الظلم بعينه. وشكرا لكم واشكر الله على كل حال

  22. انااا متخرج هالسنه ولله الحمد ونسبتي 91 والقدراات 80 والتحصيلي الي جاااب فيني العييد الي مدر منين طلع لي جبت في68 اناا من الخبر وماااحصلت قبووول الا بكليه المعلمين بجاااامعه حاااايل:~ ولااا جااني القبووول يووم الاربعاااء ومطلوووب احضووور يوووم الخميس والله قههههههههههههههر عاااد بااقي فيصل مااااصاااارتنتااايج مااا طلعت لين الحين عاااد دعووواتكم لي:( ورربي اكااد اترعرش خووفا خخخ:$

  23. والله انه امر محزن ان يضيع تعب الانسان وطموحه في هذه الحياه يتعب من اجل هدف وعندما يصل يجد ان احلامه انهارت امام صخرة الواقع …وفعلاً طلاب هذي الايام معدومي الثقافه الامن رحم الله اتمنى ان يكون فيه مشروع لتثقيف الشباب وانقاذهم مما هم فيه اتحدى كثير من الشباب من الجنسين ان يكون قراء كتاب او موضوع مفيد

  24. لن يتغيرحال التعليم عندنا وسيبقى هكذا إلى ما شاء الله ، ولو أردنا سرد القصصل للقبول في الجامعات ، والنجاح من الثانوية ومختلفها في جميع مراحل ومجالات التعليم لتعبنا ، ولكن لنا الله أولاً وآخراً .

  25. السلام عليكم ورحمة الله وبركاته موضوع جذبني للرد عليه والله قهر بس من بين كل جامعاتنا ما عجيتني الا البترول والمعادن ابشركم ما تعترف بخرابيط الوزاره ولا قرقعتهم نسبتك حلوه تعال مو حلوه الله يوفقك يعني لا قدرات لا تحصيلي واذا رجعنا لجامعاتنا الموقره فمن حق اللي حطوا هالانظمه يغيرونها .. ويصعبونها ويلعبون بها ما همهم لا شباب ولا طموح ولا طاقه ولا مستقبل امه ووطن وشعب اهم شي ولده او بنته بيدخلون لو جاب 50% اما الباقين ما همه لكن .. ربك كبير ما يخلي احد وبيجيهم يوم هالظلم كبير ويطول ناس كثيره مو شي سهل والله مفقوعه كبدي

  26. السلام عليكم ورحمة الله وبركاته… يبدو أن طرح مثل هذا الموضوع اصبح بلا جدوى مجرد تفريغ شحنات من ابناء يعانون ولا يزالون تحت نظام عشوائي متخبط بلا هدف واضح أو خطه مرسومه.. وسمحوا لي ان أفرغ غضبي معكم.. وجه نظري بسيطة وإن كنت اتوقع أن لا أحد يسمع ولا يقرأ… التعليم الجامعي من حق الجميع، كل من تسمح ظروفه أن يكمل تعليمه وليس بحاجة الوظيفة للكد على أهله فمن حقه أن يكمل تعليمه، وما هو المانع؟ هل يعتقد المسؤولون أن من يتوظف بشهاده جامعيه هم أكثر تميزا من غيرهم بسبب تفوق مهاراتهم وقدراتهم؟ أبدا وغير صحيح وهنا أرد على الأخ ربيع ما ذا يعني أن اختبار القدرات مهم؟ هل كل من لم ينعم اله عليه يقدرات ذكاء عاليه يجلس في منزله من قال أن كل الأذكياء موهوبون ومبدعون في مجالات العمل المختلفة ، كم قالبت أناساً تفوقوا في دراستهم ولم يحققوا حتى الأدنى من الابداع في وظائفهم وكم قالبت من كانوا اقل منهم في النسب والدرجات والقدرات ثم ابدعوا وبشكل لا يوصف في مجال عملهم، المفترض أن تأتي أختبارات القدرات والتميز أثناء المقالبه للوظيفة وليس للتعليم، بل وحتى للمتقدمين للوظائف يجب أن لا نأخذ بالنسبة بل بالمهارة والابداع، لا اكتب من فراغ فأنا أستاذه جامعية قالبت الكثير من الطالبات اللآتي كن متفوقات في الثانوية ولم يرتقين لا في الأسلوب ولا التعامل ولا حتى الثقافه للطالبات كن أقل مهارة أو ذكاء.. وأحب أن أطمن كل من لم يجتاز القدرات أو التحصيلي بأن الذنب ليس ذنبكم ولا يجب أن يلبسكم الخجل أبدا، فهذا كله نتاج تعليم لسنوات طويله وفشلكم يعني في المقام الأول فشله، لن أطيل عليكم ولكن أحبائي اعلموا أنني درست طالبات في السنه الثانية والثالثة الجامعية كن يخطئن في أبسط الكلمات الإملائية لا وحتى في التعبير والأسلوب.. لا اقصد الإهانة ولكن أبكي على أطلال التعليم

  27. السلام عليكم و رحمة الله و بركاته انا من الناس المؤيدين للقدرات و التحصيلي ليش؟ لانه تثبت الطالب اما شهادة الثانوي ما اعتقد انه له ذاك الاهميه بالنسبه للجامعات خصوصا بعد نظام التراكمي وانا احس ان هالنظام احسن من اسئلة الوزاره انا من طالب السنه الماضيه اخر سنه اسئلة وزاره والحمدلله جبت 95 اما بالنسبه للقدرات ما اعتقد انه ذاك الصعوبه خاصه اذا كنت من الطلاب المجتهدين اما التحصيلي يعتمد على معلوماتك من جميع مراحل الثانوي والحمدلله دخلت الجامعه اللي ابغى وهي البترول اما بالنسبه للي يشتكون فيه ولد عمتي متخرج قبلي بسنه قبلوه البترول ما مشى فيها والصراحه داااج الدراسه بجهه و هو بجهه الموهم نسبته الثانوي 88 و القدرات 75 و التحصيلي 72 و قدم هالسنه على الكليه الصحيه و قبلووه و بدون واسطه ولا يحزنون الغريب ان في نسب مذكوره اعلى بكثير من سبته ولا انقبلووا ليه مادري مع العلم ان الكليه موجوده بالقصيم تحديدا بالرس وانا اقوول ان كلامك ايضا صحيح بنسبه والتعليم كل ماله تحت حتى الجامعه نفس الشي والله يعين و موفقين جميعااا

  28. بس حاب اذكر نقطة يمكن الاخ ما انتبه لها اختبار القدرات مطبق من اكثر من خمس سنوات و طلاب السنة ذي كان عندهم 4 فرص مقابل فرصتين للطلاب قبل خمس سنوات اما بالنسبة للاخوان ذوي النسب العالية فأنا عاصرت كثير من الطلاب يكونو ذوي نسب عالية و اول ما يدخلو الجامعة تشوف الرسوب والاخفاقات لهذا الغرض جامعة الملك عبدالعزيز حتطبق نظام السنة التأهليلة يعني الواحد ماعليه الا انو يجيب نسبة تدخلو الجامعة و بعد كذا هوا و شطارتو يثبت نفسه يدخل الكلية اللي يبغاها غير كدا يفتح الله بس هذا اللي عندي و اتمنى التوفيق للجميع م/ ابو اسامة

  29. 🙁 اشكر الاخ من كل قلبي ع الكلام الرائع والجميل الذي صدر منه . وهاذي السنه تشديد من ناحيه القبول في الجامعه حتى الاقسام التافه مثل التدبير المنزلي وغيرها مثل الخياطه والنسيج بالنسبه للبنات في اليوم الواحد يقبلو 10 بنات كاحد اقصى وطبعا لازم تكون النسبه عاليه وانا الحمد لله انقبلت في الكليه . وان شاء الله مع السنين بي تتغير القوانين لي الافضل .

  30. قسم بالله انك صادق 🙁 حسبي الله عليهم مناهج متخلفه وتنعاد واختبارات تلقاهم موب عارفين سالفتها وقسم بالله انا من الحين خايفه هذا وانا لسه مادرست ثالث بس بدرسه بعد شهر وشوي :$

  31. اشكرك اخوي على المقال وابي اعقب على نقطه وحده تشمل اكثر من نقطه كنت اتمنى انك ماتكون قاسي على الجامعه لان الخطأ في القبول مو منهم الخطأ واضح وانت ذكرته ان الطالب يتخرج من الابتدائي والمتوسط والثانويه وهو مو فاهم شي وبدرجات عاليه لهذا السبب حطوا اختبار القياس لكي يوضح مستوى فهم الطالب (للمعلوميه انا من اول دفعه دخلت اختبار القياس وجبت نسبه ولله الحمد ممتازه ) ياجماعه والله موضوع اختبار القدرات والله سهل ولا تخافون ترى الاختبار سهل مره ومايبيله دوخت راس وخوف للدرجه اللي وصلتوه لها ادري في ناس الحين يقولون لاني جبت درجه ممتازه قلت انه سهل لا والله اي واحد يقدر يجيب درجه سهله وفي ناس دخلوا معنا الاختبار ونسبتهم بالثانويه ممتازه وافضل مني وجابوا درجات ضعيفه جدا ياجماعه ترى نسبة الثانويه العامه ماهي دليل ان الطالب هذا ممتاز كثير من الطلاب دخلو الجامعه ونسبهم مرتفعه وللاسف الشديدفصلوا منها وماقدروا يكملون دراستهم فيها يقولون صعبه وحطوا في بالكم ياللي تبون تحققون احلامكم شطر بيت الشعر هذا ماكل ما يتمناه المرء يدره تحياتي لك اخوي الغالي اخوكم / طالب في كلية اللغات والترجمه

  32. والله موضوع ع الجرح انا بعد نفس اخوك والله جبت درجه ممتازه بس بسبب التعليم المتطور ع قولتهم انا فشلت … والله يعين بس الله يوفق اخوكـ

  33. كلامي موجــه للمؤيدين لهذا النظام.. هالنظام بيسبب انحراف للشباب والبنات…الفراغ يسبب بلاوي.. دام مافيه لا وظايف ولا دراسه.. يعني مافيه دخل.. وبالتالي فقر.. والنتيجه بتكون مصااااايب .. ارجع اقولكم أدعــــــو عليهم بالثلث الأخير من الليل ياضحايا هالنظام.. وكان الله في عونكم..

  34. ياخي العزيز انت تنفخ بقربه مقطوعه لان عندنا الرجل الغير مناسب في المكان الغير مناسب يعني ماعندك احد ولكن اتوقع خلال 100 سنه القادمه سوف تفرج اكيد لاننا محتاجين تغيير الجنس بشري

  35. بسم الله الرحمن الرحيم ياجماعة … انا اتأسف لكل شخص ماقدر يحقق طموحه و ( يدخل الجامعة ) !!! وكأنو الطموح هو دخول الجامعة واذا فرضنا جدلا بصحة هذا الطموح ليش كل المجتمع السعودي طموحه ( طب واذا ماقدر هندسة > لاحظوا الفرق بين التخصصين , ثم ( ارامكو ) ؟!!!!! وكأنو ارامكو تخصص يااخوان نحن قاعدين نضحك على نفسنا , أغلب الشباب و بنسبة فوق 95 % في الحقيقة ماعنده طموح ولو دخل الطب أو الهندسة أو أي تخصص غالبا ومو الكل ( سيفشل ) ترى ياجماعة هذه حقيقة الموضوع ليست لعبة نحن نتكلم عن شباب بيحملو ا مجتمع بعد كم سنة لو تركنا المجال لكل من هب ودب يدخل الجامعة ويكمل طموحه السعودي الموحد لن نستفيد , ولااا ننكر انو اغلب المتخرجين من الثانوية ليسوا بمؤهلين بل المجتهدين هم أشخاص فقط حافظين , وكثير من الطلاب بالنسب العالية متخرجين من مدارس تبيع الدرجات هذا معناه نحن نحتاج لمعايير أخرى لأنه لا توجد ثقة اصلا في الشاب السعودي ( ولهم الحق في هذا ) , بالله عليكم جاوبوني كم طالب طموح هو شخص قارئ ؟؟؟ أو كم طالب طموح على الأقل يملك فكرة عن التخصص إلي يباه ؟؟؟؟ أو كم طالب طموح يبغى يكمل تعليمه ليفيد أمته أو على الأقل ليحصل على العلم ؟؟؟ الحقيقة أغلب الطلاب الطموحين .. هم طموحين لوظيفة .. يتخرج ويتعلم العلم فقط ليتوظف !!!! بالله عليكم دعونا نراجع نفسنا دعونا من ( الكلام الفاضي ) و من يملك الطموح لن يتوقف .. سيشتغل لكي يتعلم .. من يريد العلم .. وليس لكي ( يفل أمها ) في الشوارع ويدشر ويتخرج وعنده وظيفة وفي الحقيقة ترى نحن نعاني كشباب بسبب جهلنا وليس بسبب وزارة أو جامعة أو واسطة ولو كان عندنا طموح كنا شفنا المكتبات مزدحمة ( قسم الكتب طبعا ) لأنو هناك المستقبل الحقيقي ومرة ثانية أعيد .. سيبونا من الكلام الفاضي

  36. ابني نسبته هذا العام حوالي 96% لكن مع دمجها بنسبة 2 ثانوي أصبحت 92% ومع التحصيلي والقدرات نزلت للحضيض قدم على جامعة البترول ولم يتم قبوله قدم على جامعة الملك سعود حتى تخصص تربية بدنية ولم يقبل أبدًا قدم على الكليات العسكرية الجوية والحرس الوطني وبالواسطات وحب الخشوم تم قبوله مبدئي بالكليتين ورسب باختبار الجوية والآن الأمل معقود على الله ثم الحرس طبعًا بالواسطات القوي جدًا جدًا الشي اللي يغث أنه قدم على الجامعه المهزلة جامعة القصيم وجلسنا وتعطلت أشغالنا بسببهم من قل الدبرة مخلين كل فترة دفعة ولا يدري متى ينزل اسمه لأنه لازم على طول يروح للجامعه وشخصيًا يروح كأنه الانسان فاضي ولا عنده شغل غيرهم طلع قبوله يوم السبت الماضي ولازم احضور الأحد ويوم السبت والأحد كان عنده اختبار ومقابلة وكشف طبي بالحرس والكلية الجوية الحمد لله فزع لنا واحد من قريبنا يشتغل بالجامعه ووصل الأوراق لهم ربما ابني ولله الحمد عنده قدرة وواسطة لكن حرام أصدقاؤه اللي نسبهم 98 و97 ولا قبلوا إلا بالقصيم الفاشلة نطالب بعودة النظام القديم واختبار الوزارة وفكونا يا ناس من القدرات التحصيلي والله ما وراها إلا الغثا والتعب وصرف الفلوس وإذا كنتوا تبي تضمنون مستوى الطالب بدل الغش اللي حاصل أعتقد ما عندنا بالقصيم أي غش بالعكس الأسئلة السنة هاذي أصعب من الوزارة من زود الذمهB ولا تحذيف ولا أي مساعده خلونا على وضعنا الأول

  37. وللمعلومية أغلب المتقدمين اللي كانوا مع ابني بالكليات العسكرية ومن مناطق الجنوب والمناطق النائية آخذين نسب عاليه بالقدرات 95 و96 وهم ما يدبرونه … والكلام هذا من ضابط أجرى المقابلة معهم يعني تيتي تيتي زي ما رحتي جيتي الغش حاصل حاصل

  38. يعطيك العافية على هذا الموضوع الحساس صراحة انا موظف بأحد الجامعات في شمال المملكة وممن كان في لجان القبول للطلاب المستجدين صراحة اكثر شي ادمى قلبي وكان متعبني نفسيا أن 95%من الطلاب المقبولين بكليات الجامعة هم من طلاب المدارس الاهلية اللي والله باين عليهم الذكاء المفرط B وماأقول غير الله يرحم اللي بيطيح بين ايدينهم هذا اذا تخرجو وياقهري على طلاب المدارس الحكومية وصراحة نظام التعليم العالي جدا سيء وماراح نتطور بالطريقة هذي والله يعدل الحال على كثر ماتكلمت مع ادارة القبول بشأن وجهة نظري الا انه لاحياة لمن تنادي

  39. بسم الله انا أحد طلاب الثانوية ألعامه كافحت وتعبت حتى أخذت الشهادة الثانوية والحمد الله انا أدخلت اختبار القدرات العامه وجبت فيه 64 مو أهمل مني ولا كسل ولا لني ما اعرف الاجوبه لكن إني رحت الاختبار وكنت تعبان جدآجدآ لدرجة إني ما اقدر اللون با القلم ع الاجابه الصحيحة وألان بسبب اختبار القدرات والله إني ما انقلبت في مكان وكان طموحي إني اخش ارامكو بسبب إخواني وألان اطمح إلي العسكرية وفعلن قدمت في العسكرية لأكن ما قبلوني بسبب الطول ناقص اقل من نصف صانتي لكن الله يعين ومااقول إلا الله يعين الجميع ويسهل أمرهم تحياتي أخوكم جالس في البيت هع @_^

  40. حسبي الله ونعم الوكيل من جد موضوع يضيق الخلق والمشكله لا جيتهم بقسم مرغوب مثل الصيدله والحاسب والطب والهندسه هذا الكلااام بجامعة فيصل يقولون لا ~ لازم نقبل عدد قليل عشان نحافظ على جودة التعليم !! تمشياً مع الجامعات العريقه بـ أوربا ؟! لاآ والله صحييح تعرفون أنتوآ جامعاات أوربا تدلونهأ ؟ الطلاب هنآك تعليم 100% الطالب يتخرج ضامن له كرسي إذا مو أكثر من الجامعه و مافي كلام عن تعليهم هنآآك ~ وهنآآك عندهم بالمدينه الوحده أكثر من جامعه سته وستين تخصص تحتاار وش تختاار ! فـ لو سمحتوآ لاتقارنون الوضع و تسوين لي فيه تطور ~ لانكم عمركم مارح تتطورن للآسف وخصوصاً بـ التعلييم :$ لا نسبه ولا قدرات ولا أبو أبو النسبه تدخلك إذا ماعندك واسطه و حتى الجامعات الاهليه الي تنعد ع الاصاابع شهاده مثل وجييهمـ 8) أجمل تحيه للتعليم المتطوور ~ واذا لنآ حق بناخذهـ بيوم الحسااب :>

  41. .. للأسف كل بيت سعودي به هذه المعاناة 🙁 .. وليس لدي زيادة على ما ذكر سابقا سسسسسسسوى نرجو النظر مرة أخرى في طرائق التعليم من الصفوف المبكرة إلى الجامعات !!! .. لك كل تقدير فقد أثرت المواجع :(. .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

نعمة تطور التعليم أصبحت نقمة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول