نبذة عن ورقة بلوت + حملة ( تسذا … ماهوب تسذا ) لتوعية الحريم


بسم الله الرحمن الرحيم
السلام عليكم ورحمة الله وبركاته

صبحكم بالخير << بدون نفس

والله مالكم صديق يالشيون ، هالحين رفيدزكم غايبن له حول الشهرين ولا أحد أرسل له يقول عسى ماشر ورا
رجلك منكسرة ؟
وشوله حاطن الجبص على رقبتك ؟

الله يسلمكم ومايجيكم الشر .. بس السالفةومافيها إني احترفت بفريق ليفربول يونايتد ولعبنا المباراة النهائية لبطولة أوربا
قدام فرق جلكسي ، ومير يجي لاعب فرنسا زين الدين عدنانلاعب فريق جلكسي ويزحلق علي ويكسرن مع الرقبة << وين تركض على رقبتك أنت ؟
مير يجين رباط صليبي بالرقبة ، ويغيرن المدرب مير يخسر فريقنا ( 3/0) مع إننا كنا متقدمين بالشوط الأول (1/0)
بس يوم طلعت جاء الحكم وخصم الهدف الي أنا مسجله .

الا صدز وشلونكم وش أخباركم ؟ << أنت هالحين ورا ماتدخل بالموضوع ؟

الموضوع الأول :

:: نبذة عن حياة الكائن الحي ورقة بلوت ::

طبعاً لو أبكتب لكم تفاصيل حياة هالكائن تسان ألفت فيه كتاب كبر جبهة (جلوكوز) بس أنا أبعطيكم نبذه بسيطة
عن حياة هالكائن ، وإن شاء الله نكمل الباقي بعدين .

ورقة بلوت هو كائن حي بعضهم يقولون إنه نبات وبعضهم يقولون حيوان وبعضهم يقولون إنه إنسان ، بس أكثر
الناس والي يعرفونه من يوم إنه صغيّر يقولون إنه كان طحالب بعدين تجمعن على قرد بعدين صار ورقة بلوت.

يوم صار عمره ست سنين راح أبوه للمدرسة عشان يسجله ، بس المدرسة رفضوا يقبلون ويوم قال أبوه ليه ؟
قال المدير : أثبت إنه إنسان .

وبعد شيل وحط وافق المدير إنه يقبله بالمدرسة بس مايقبله كطالب بيقبله كوسيلة تعليمية، وفعلاً دخل ورقة بلوت
المدرسة وتحقق حلم أمه الي كنت تمنى إنه يفارق وجهه لو كم ساعة باليوم .

بعدين جاء المدير وحطه بالمختبر عشان يستفيدون منه مدرسين العلوم ، وكل يوم يشرحون عليه ، مرة يشرحون عليه
درس عن البكتيريا والفطريات ومرة درس عن الطحالب ، ومرة عن الثديات .
وإذا جت حصة الجغرافيا ياخذه مدرس الجغرافيا ويخليه يرقى فوق طاولة قدام الطلاب ويقعد المدرس يشرح خريطة
العالم على ثوبه .

بعدين جاء مدير المدرسة وحط شبك بحوش المدرسة وربط فيه ورقة بلوت ، وأي طالب مايحل الواجب وإلا يشاغب
ينزله عند الشبك وبعدها صاروا الطلاب كلهم مؤدبين و يحلون الواجب << والله يالمدير استغلالي

كان يلقب بـ ( ذو السروال الأصفر ) حيث أن شهرة سرواله بلغت الأفاق ، وفي يوم من الأيام توهق تسلب وعض ورقة
بلوت مع رجله – طبعاً العضة جت بالسروال – مير ينغلث التسلب وثلاثة أيام وينتقل التسلب إلى رحمة الله .

يقولون وأنا أدخل على الله ما أحط شي بذمتي << وجه ماسك دلعة ثوبه ويتفل بها
يقولون إن الحكومة يوم حرب الخليج استخدمت ورقة بلوت كغاز سام .

عاد يوم كبر ورقة بلوت صار حرامي << وش برايك يعني بيصير عالم ذرة ؟
ومافيه أسطوانة غاز ولا استبنة سيارة بحارتهم إلا سرقها الله يهديه بس


وأنا أكتب هالموضوع خفق فؤادي و شبّت قريحتي وكتبت قصيدة بورقة بلوت ، أقول فيها :

بلوتٌ أيها الحشري … بوجهكَ مجمعُ العبر ِ
فما أنت بإنسانٍ … ولا حتى من البقرِ
فقال البعض بكتيريا … تراها الناسُ بالبصرِ
وقال الآخرون بلى … هوَ نوعٌ من الشجر ِ
وقال الجنطُ لاندري … أحقاً أنت م البشرِ
إذا ناظرتُ خشتَكَ … ذكرتُ القردَ في الصغرِ
فأنت زلابةٌ كبرى … تفوقُ الشمسَ في الكبرِ
ومع هذا بعد تسبدي … فحبُكَ في دمي يسري
^
^
وش عقبه

يوم نشرت هالقصيدة وصلتن رسالة من وزارة التربية والتعليم يقولون إنهم يبي ينزلون هالقصيدة بمقرر النصوص
لثاني متوسط من السنة الجاية .

الصراحة إني ودي أكمل لكم قصة حياته كلها بس تقل أنبتن معدتي << ماعنده ضمير
أحس إني شبيت على الرجال شوي << أجل شوي ؟


الموضوع الثاني :

:: ( تسذا … ماهوب تسذا) حملة الدكتور جنط السفينة الأولى لتوعية الحريم ::

استمراراً لخدماتي الإنسانية الي أقدمها للمجتمع والتي تساهم في تقدم المجتمع << لو يفتك المجتمع منك أنت وأبوجلمبو
تسان صار من الدول المتقدمة

فإني أنا الدكتور جنط السفينة أعلن إنطلاق حملتي التوعوية الأولى بعنوان ( تسذا … ماهوب تسذا )
والتي تهدف لرفع مستوى الوعي عند بعض الحريم الداجات الي يدربن روسهن ولا يدرن وش الطبخة.

والنصايح ذي أقدمها من خبرة سنين وتجارب عديدة << وين يا أبوالشباب .. قد حملت ؟

:: الوحام ::

أول شي لامن حملتي تبي تصيرين بثرة فوق بثارتس المعهودة وتبي تكرهين رجلتس وتبي تبدين
تشوفين إنه شين زيادة على إنه أصلاً شين ، وتبي تبدين تكرهين ريحتة مع إن ريحته مخيسة من قبل

و تبي تخرب الأخلاق عندتس وتبي تبدين بس تهاوشين أنت ورجلتس ، همن بتبدون تضاربون
وكل يوم بيفقع وجهتس ، آخر شي بتهجين لبيت أهلتس .

بفترة الوحام تبي تنفخين مع كل جهة ، وبتكرهين ريحة الأكل ، والله يستر عاد وش توحمين عليه …
بعض الحريم يتوحمن على تراب وفيه حريم على مخ قرد ، بس أنت أتوقع إنتس تبي توحمين على
تسرشة بعير نيِّة .

انتبهي لنفستس بالأماتسن العامة .

:: الركادة زينة ::

بعض الحريم الله يهديهن مايجوز لهن المطامر إلا لاحملن ، وأنا من هالمنبر أقول اركدي واقضبي
أرضتس لاتجيننا بتسر تصيحين وتقولين : ( سقطت ) .

:: المشروبات ::

لا وبعض الحريم الله يهديهن يشربن المخزي ذاك الي قارورته تسبيرة.

:: الأعمال المناسبة لصحتتس ::


اختاري العمل المناسب ، يعني إذا انعرضت عليتس وظيفة سواق تريلة وإلا بنشري لاتقبلينه.

:: لاجيتي تضنين ::

أول شي لاجيتي تروحين للمستشفى ماله داعي تضفين كل أثاث بيتكم معكم ، وهذاكم ماحلفتون << بدا النصب
أكاليوم شايفن بعيني وحدة جايتن تضني بالمستشفى وجايبتن معه ( قز ) واسطوانتين غاز ،وخيشة كراث ،
وجايبتن معه شنطة حديد ذيك حقت القديمين مليانة حلتيت ومرة وكمون ، وجايبتن
معه قميصين روز ، وزمزميتين ، ورفرف سيارة << لما هالحين ما أدري وش تبي فيه


لاجيتوا تروحون للمستشفى خلي رجلتس يركد عشان مايصدم خلق الله ، بس تسان الي على السيكل
بنقالي مايخالف اصدموه وذنبه برقبتي.

:: الإضناء ::


الطلق وما أدراك ما الطلق ، فيه حريم واجد ماتن وهن يضنن ، وأنت إن شاء الله تبي تموتين
وأنت تضنين عشان تصيرين شهيدة.

:: مابعد الإضناء ::

حطي ملابس الحمل بكرتون ولا تلزقينهن بحلدز رجلتس ، شوفوا بس وجه رجله والله ياهو سبيكة
لا وترى القارورة الي بيده من المخزي الي قلت لكم عنه قبل شوي .

:: مستلزمات البزر ::


وفي النهاية هذي نصايح واحدن يبي لكن الخير ، فما كان من صواب فمن الله وماكان من خطأ
فمن أبوجلمبو والشيطان

******

خلاص خلصنا
دمتم بأحلى ابتسامة
أحسن واحد بالعالم
د. جنط السفينة


تعليقات 42

  1. مبدع وابداعي ولكن اين بقية حلقات الخال اوباما عمت صباحا يا اخا العرب

  2. ياويلي ويلاه .. ماعاد اقوى من الضحك.. ماقول ال بسم الله عليك وسلامتك من الكسور والاربطه الصليبيه .. جعلها بالطحالب كلها ولا فيك.. والله ماينلام ورق بلوت اذا قب عليك .. بلاك املح منه .. وانا الي كنت اقول مهنى املح من الحالب .. لكن من هاللحظه ماراح اقول الا : تسذا .. ماهوب تسذا.. معا يدا بيد لدعم حملة فخر الامه .. الدكتور ..د.جنط السفينه.. ومشكور عالموضوع المقلع..

  3. منور يالدب بس صراحه يا انت قطعت بذا المسكين ورقه بلوت احسه صار دفتر ابو عشرين مو بورقه خخخخخخخ ورقه بلوت مالك داعي اذا ما رديت عليه ذاك الرد الي يمزع التسبد من الضحك على جنط الدباب خخخخخ<<<حيلهم بينهم اخوكم المشاكس دحوم،

  4. والله انك ابداع في امتاع شرشحت خويك ورق بلوت بس عليك عتب وين قصة الخال أوباما الجزء 2

  5. جنط السفينه والله من النصب يعني علي بالك بتسكتنا بحقة ورقة بلوت لا ياحبيبي نبغى اوباما يعني نبغى اوباما لا تتصفق الحين

  6. كح كح … والله وزمااااان ما شفناا رساايلك (:’ سلااااامااتون من كل شرر خيوو.. الله يوسع صدرك بالخير والطااااعه قسم ونستني ^_^ بس صدق رحمته ورقة بلووت هههههههههههههه الله يرضى عليكم ^_^ واحلىىىى من هيــــك حملة شي ماافييييش خخخخخخخخخخ توعيــة غير شكــــــل (: موفق خيووو وودنا تكمل لناا قصة حيااته .. حبيبك بلووت << كااسر خاطري بس ودي اعرف عنه اكثر ( وجه نصااااب ) خخخخخخخخ ^_^

  7. بصراحه موضوعك جميل ويموت من الضحك بس وش بك على ورقه بلوت والله انه مسكين والله لو كنت بمكانه لاكتب موضوع واسوي فيك نفس ماسويت بوه ابوك يالتحريش بانتظار جديدك

  8. ياليت يكتب الموضوع او المواضيع مستقبلا باللغه العربيه ….. انا ماعندي مشاكل اذا كتبت بأي لهجه بس من باب التنوع …… لان الايميل حيعرض علي الوف مألفه من الناس فمن الحكمه كتابته بلهجه عاديه …. وشكز

  9. فريد من نوعك في كتابتك لهذه النصائح الجميله . عاد انا عيالي في الشهر الثامن اخاف تقرا رسالتك بعدين تنزل الولد من الضحك . مشكور على المشاركه الجميله

  10. ايها الجنط سلاما ….. ولكم مني التحية قد خبصت اليوم اوراق البلوت بخبث نية ! استلمت ابن البلوت بكل انواع البلية نبذة عنه وعن سيرته غير الزكية وبأوراق من الأحوال كانت لي خفية اكذا يبدو بهذا الشكل مثل الطوفريه اعتذر منك ومن صاحبك حمّال الأسيه لا تزعل ورقة تراكم جميع تبسطونا الله يوسع صدوركم بالإيمان وطاعة الرحمن تقبلوا تحيتي

  11. هههههههههههههه تكفى كرر من حقت تسذا … ماهوب تسذا وسعت صدورنا الله يوسع صدرك بالعافية إيه بعد باقي شي لا عاد تصيف علينا مرتن أخرى

  12. ياحليلك مواضيعك كله ملح وتوسع الصدروعلى طارى الكسوروالجبص لاتلعب وانت اصلع وماتشوف شر

  13. هههههههههههه الله يغربل إبليسك ياجنط السفينه على هالحمله .. ذكرتن بحريم أول اذا ولدت الوحده تجيب معه قرصان وجريش وماتشتهيه الأنفس تحلف إن الواحد عايشن بمجاعه .. رسمت البسمه على خشتي يابعدي .. الله يدوم عليك المحبه يارب .. في امان الله ..

  14. أول شئ اوهاويو… بصرااااااااااااااحه دائما مواضيعك ترسم البسمة على براطم الشعب (-: أما صورة بطاقة الهوية لورقة بلوت مسكته ولا نصائحك للمراءة الحامل خطيره.. أتمنى لك المزيد من النجاح والتقدم ودمت بخير… جاااااااانا

  15. واااااابطنيييييييييييه ههههههههههههههههههه والله يانت جنط صدززززي .. ياخي عجزت اقتبس ,, كل سطر يقول للي عقبه اقضب الارض .. انا ازين منك ,, مبددددع يا احلى دكتور بالدنياااااا . . . صلوحكا

  16. ههههههههههههههههههههههههههههه وناسة الله يعطيك العافيه وحودلله ع السلامه في البسة ولا فيك ههههههههههههههههه

  17. وش اخبارك عساك بخير ووش اخبار الاهل منااك >>>اخلصي وش اسوي راعيه مقادير وواجب ياحبي لي الللللللللله يالدنيا ذكرتني بايام ورقه بلووت وايام الهيااط كان صقيقي الصقوق عشاني اقوى منه بس ويخاف منّنّ انا داريه ان صداقته لي مصلحه بس اني ارحمه الضعيف كلن يهوشه مع جهه 🙁 مآآر انك مزززديين بووهـ >>>قلبت على الرجال وقلبت قصمنجي بعد خخخخ ومع هالحمله صار عندي نفس اني احمل شكلي شكلي بأحمل بس احمل بواحد والا بتوأم ؟؟ الا صزز مافيه تعليمات للي يحملون بتوأم وش اسوي بعمري لا حملت بهم !! تكفى انقذني الله يسعدك قبل لا اتوهق 🙁 يعافييييك ربي أخي الحنون على هذه البادره الطيبه منك فلا اعلم حال مجتمعنا لا صار به عشرتون من امثالك فقط عشره لا نريد زود لله درررك تبا لك >>محد خانه التعبير

  18. لبا قليييييييييييييييبة .. جنط السفينة .. ابدعت بورقة بلوتوث ,, شخصية من زمان نبي نعرف تاريخها لووووووووول … مبدع ياجنط

  19. الله الله الله وش هالزين وش هالنصايح القيمة الهامة بصراحة تستاهل تنكة كليجا بالتوفي على مجهودك ونصايحك ان شاء الله باخذه بعين وش اسمها ذاك الاختبار مدري الاعتبار احمد ربي ان قريتها وان باول حملي عشان استفيد منها لان بصرحه تسذا الحتسي والا بلاش ونصايحك ولانصايح مريم نور الله يعطيك العافية ونحتر ي الجديد

  20. السلام عليكم اخي جنط السفينه انا متابع جيد لمواضيعك ومواضيع باقي الاعضاء من ناحيتي ان ما كتبت مؤخرا لا ينبغي ان ينشر فما دخلنا نحن باقي الاعضاء بما يجري بينك بين ورقة بلوت ومن ناحية اخرى اتمنى من منك ومن بعض الاعضاء عدم استخدام بعض المصطلحات الغير مفهومه والتي يقتصر فهمها على شريحه معينه قليله لا يفهمها غيرهم فمجموعة ابو نواف اعضائها القاصي والداني وهي عامه للحميع وليست لشريحه معينه فجعلوها عربيه سعوديه هذا من وجهة نضري … وشكرا

  21. هههههههههههههههههههههههههههاي قصم بالله مزعت تسبدي من الضحك وهـ بس الله يخليك لنا وللشعب ولنصف المجتمع الثاني اللي هو حنا – اولااااه تسثر من هالنصايح _ترى حريمنا محتاجين توعيه بهالامور خاااصه من انسان خبير مثلك @ يااااااويل فلبي عليك ياااااورقه 🙁 تحطم ومستقبله وسمعته تخربشت كله من سبتك ياجنط >> الله لايسامحك >> لا احد يقول امين 🙂 رقرق من عقب هالكلام صاااار صفحه من جريده قاااالب لونه اصفرررر من العوامل النفسيه التي هبت من ناحيه جنط 🙁 ياقاسي ياجنط *لاتعتذر مالك عند ورقه عذر* ورقه لو انا مكانك لايمتكن اسكت على مثل هالهرج بالله من بترضى تاااخذك عقب ماشهر فيك هالجنط ونشر صورتك بهالنت >>حررررام كل هالوسااامه وتقعد عااانس >>عفوا اقصد عزوبي …… تنتظر رد رقرق على احر من الجمر واتوقع يكووون رد جاااامد قوي .. يالله يااابلوت متى تنزل ردك .>>> والمه للشر (*ن*) تالي الكلام : على طااري الانقطاع والعوده احب اقولك ياجنط لاعاد تقطع بنا تسذا هماااه؟؟ وفيه نفر ثااني مافيه انا شوف من زماان هزا نفر مدمن شاهي هزا بس سوي كلاام عن كتاب هو بعدين مافيه شوف ……>>> اتمنى يكون المانع خير وسلامتكم

  22. جينا للمسخرة .. بالله ذا موضوع؟؟؟ عيييييب والله.. وربي ما ضحكت بالعكس بغيت ابكي…. يوووووووووووووه

  23. هههههههههههههههههههاي اسلوب وكلام يضحك ابداع بصياغة الجمل والله اني استانس ليا قريت لك . اما الكلام بين الاعضـاء فهذا ينم على قوة العلاقه بينهم اذا صار بيهم خذها ذقها 🙂 اضحك الله سنك ياجنـوط وقبلة على راس ورقة بلوت ولا يزعل السالفه مزوح وننتظر ياجنط الجزء الثاني من قصة اوباما لايكون نسيتها بس

  24. هههههههههههههههههه لين دحين قريت موضوعك يجي تلاتة مرات ولا فهمت حاجة لازم تراعي اختلاف اللهجات < بررااا باللهي

  25. السلام عليكم اخوي الجنط ، ولك من اسمك نصيب ماعليش حنا نقرا بالقروب من زمان بس انها تصل للأسلوب هاللي جالس تقول صارت الدعوه مسخره . بصراحة راح اقولك اسلوبك مايرتقي لذائقتنا كقراء ومتابعين ومنتسبين لهالقروب الحلو . نصيحة لك وانا اختك انك تترفع عن هالطريقة لأن حتى اهل خفة الدم منت منهم ويبغى لك شوية تدريب عشان تصير واحد منهم لأنك وبهالطريقة ماراح توصل لهم لأنك مع احترامي تتميصل بطرحك ومواضيعك المعتاده . ربي يهديك / آمين

  26. رحال هلا بك يابعدي الحلقات الجاية بالطريق إن شاء الله انشغلت عن الموضوع ونسيته لكن إن شاء الله قريب تشوفه ………. النوري وش حها وقرونها وراها خخخخخخخخخخخخ عليك اسم << مايشوف نفسه الله يسلمتس ويجزاتس خير على دعم الحملة 🙂 والشكر لك على المرور والحتسي الزين ........ دحوم يامال المر وش بك تحرش بين الأحباب لا يغرونك العواذل ياورقة يابعد تسبدي ........ عوض منورة بوجودك ياخلفهم وإن شاء الله تشوفن تسذا ولا تشوف تسذاك ........... ظل المافيا هلا والله بك والجزء الثاني قريب إن شاء الله ........ albehany خخخخخخخخخخخخخخخخخخخخخخخخخخخ قسم بالله خبل أبشر فيه إن شاء الله قريب .......... ألفا الله يسلمك ويوسع صدرك دوم بعدين مالقيتي ترحمين إلا هالحرامي معافيتس ربي ياوخيتي ...... فاتن بلاتس ماشفتي وش يرسل بايميلاته 🙁 ياحبكن للشر يالحريم

  27. macbook هلا والله فيك ورأيك على عين وراسي والحقيقة هو هاجس يدور في بالي من وقت لعله يكو إن شاء الله حقيقة في وقت قريب ……. ابوغانم الله يسعد أيامك ويوفق أهلك إن شاء الله ويسهل عليهم بس نصيحة لاتشوف الايميل ترى بتقلب عليك خخخخخ …….. سليمان الذويخ الله الله خلوها خخخخخخخ الطوفرية خخخخخخخخخخخخخخخخخخخ خخخخخخخخخخخخخخخخخخخ خخخخخخخخخخخخخخخخخخخخخخ خباااااااااااااال قسم بالله خبااااااال صح لسانك وقصيدتك تعتبر تأييد لمشاعري تجااه هذا الكائن خخخخخ …….. ساشا الشكر لك بالنسبة للهجة ياليت علمتني وش الكلمات عشان أشرحها لك :)) …… ههههههه إن شاء الله نجيب لكم الجديد ………… أبوعلي الملح بمرورك يابعدي ……… منصور هلا والله ومسهلا خخخخخخخخ عليهن طقوس الحريم لا وهالحين طايحيين ببلاوي تقول يازين أيام من أول مرورك عسل وعسى خشك ماتنصك أبد من الابتسامة ……..

  28. انقلش سينسي القروب منور بوجودكم والشعب وش بقى له غير البسمة الله يرفع عنهم مابلاهم فيه 🙁 ……… صلوحكا ياعل بطنك ينشق من الضحك << ترى دعوة خير وشلونك يابعدي عساك بخير ؟ .......... جويل الله يسلمك ويديم الوناسة ........ دودي هلا والله فيك وكلنا بخير الحمد لله ورقة بلوت كل ماجاه يستاهله عساه للمر خخخخخخخخخخ ولو فيه عشة مثلي تسان فتحنا قروب وتركنا أبونواف << قلب على أبونواف خخخخخخخخخخخخخ خخخخخخخخخخخخخخخخخخخخخ خخخخخخخخخخخخخخخخخخخخخ ......... ببسي تلقيمة لبى قلبك أنت من زين هالتاريخ الله يحوم تسبده خخخخ ........ ام مابعد ولدت الله يرحمتس شكلتس تبي تموتين خخخخخخخخخخ ربي معافيك ....... someone وعليكم السلام ورحمة الله وبركاته هلا والله ومسهلا فيك يالغالي بالنسبة للمناوشات بين الأعضاء هذا شي إيجابي والقصد منه الابتسامة لا أقل و لاأكثر وشخصية ورقة بلوت شخصية جذابة وتستحق من يناوشها وأنا أعتز بمعرفته وميانتي عليه . أما بالنسبة للهجة صدقت بكلامك وإن شاء الله بحط هالشيعلى بالي في المواضيع القادمة . ألأف شكرك على مرورك وملاحظتك ولطفك لك مني خالص الشكر والثناء والمحبة ....... بداخلي طفلة عسى تسبدتس تنفقش من الضحك ، وأنا لا والله ثم أنا تسان أنتم متوهقين << بدا الهياط بعدين من حين ورقة بلوت أشهبن ألهب وش الجديد يعني خخخخخخخخ ياحبكن للتحريش والفتنة يالحريم بالنسبة للانقطاع إن شاء اله مايكون طويل ، ومدمن شاهي هالحين بمستشفى الأمراض النفسية يقولون إنه محاولن ينتحر <<ماتعوق معه خخخخخخ الله يسلمك ...... شاادي لا ماهوب موضوع ذا ايميل 🙂 بس وش الي بكاك صدق علمني خلنا نبكي معك 🙂

  29. بسم الله الرحمن الرحيم هههههههههههههههه<<هاذي بدايتهــا الله يقطع ابليسك يادكتورنا الموقر والله أن سوالفك بتعأد يابعد تسبدي...... ياقلبي عليك ياورقة بلوت أقوولك شي؟؟ ×سامحه ترى المسااامـــح كريـــم× <<انتبه للإشارة ههههههه الله يعطيك 1000عافية ,,,,,,,,,,,,,,,,

  30. السلام عليكم اعذرتي بتكلم بالعامي اخوي جنط دايم اتابع ايميلاتك واقرأها واستمتع فيها الا هذا يعني الصور اللي حاطها عن الحريم مررره مو حلوه مو علشان تسيء للبنت يعني انا قصدي انت وشعليك من الحريم وسوالفهم ومايدخل فيهم الا اللي فيه بلاء اسلوبك مره حلو وممتع بس للآسف استخدمته في شيء مو حلو الاجانب اذا قروا هالأيميل شبيقولون عننا ؟ يعني التخلف فينا فينا انا ماكنت اصدق بس للآسف ايميلك اثبت لي ان في رجال ماهمهم الا النسوان والصور اللي حاطها مره تلوع الكبد الله يهديك وترجع لنا زي اول وبخصوص ورقه بلوت والله لو انه اخوك بيتضايق من كلامك حتى لو ماقالك مره كلامك مايرضي احد وقبل لا يرضينا مايرضى الله ورسوله بهذا الشيء لا تقول خويي وراضي في ناس بتمشي على النهج اللي انت ماشي عليه ياخي خويك تنطز معه بينك وبينه مو قدامنا وتراك أسات بلهجتك للمدينه اللي انت منها اتمنى ان تقبل نقدي بصدر رحب لأن نقدي بناء مو هدام تقبل تحيتي دلال الجندان من اشد المعجبات بأيميلات ابو نواف

  31. بيور سول إن شاء الله هالأمر غاب عني بهالايميل وإن شاء الله أنتبه له بالايميلات الجاية . …….. مروقة العين وعليكم السلام ورحمة الله وبركاته عفواً أختي لاتتكلمين عن الجميع نصيحتك على العين والراس بس لاتتكلمين عن الجميع شوفي الردود الي فوقك أغلبهم أعجبه الموضوع ، وأنت إذا ما أعجك الموضوع مايعني ذا إنك تجبرين الناس على ذوقك . احترمي ذوق غيرك ، وخفة الدم أنا ما أدعيها بس يكفيني إن ثلث الي يدخلون موضوعي بيتسمون ما أقول يضحكون يكفيني إنهم يبتسمون بس . ما أدري متى تبي تؤمنون إن أذواق الناس تختلف ، ما أعجبك الموضوع اطلعي منه ما أحد أجبرك تقرينه ، وإذا عندك نصيحة إيميلي موجود في الموضوع أعلاه . الله يتقبل دعاءك …….. محمد خخخخخخخخخخخخخخخخ ومن يقول << يحسبها مدحه خخخخخخخ ........ رووووري ربي معافيك وعسىالضحكة دوم إن شاء الله 🙂

  32. لا والله اللي تقطعت جنوبي من الضحك حايمه تسبدي من المذاكرة ولقيت اللي يلهيني ويوسع صدري الله يوسع صدرك ياخي انت كذا-فله نكته -رجه وش اقول وش اخلي بصراحه يخوني التعبير اذا بمدحك ^ــ^ اقوووول لا يكون شارب من ذاك المخزي كنك بديت تخورا وتقط خيط و خيط وتسب خويك الله يصلحك بس لاعاد تكثر من ذا المواضيع <<< ايه من جنبها لوووولز لايهمونك العذال ومروقة العين اذا اسلوبه مايرتقي لذائقتك ليش تكملين الموضوع ولا لا تقرين له من الاساس جنط ياجبل مايهزك ريح 🙂 انا اشهد ان كلك خفة دم وعقل <<ترى والله امزح من جد مشكور عالموضوع الخفيف اللطيف والله لا يحرمنا منك ومن مواضيعك آسفه عالاطاله 🙂 وسامحني اذا غلطت عليك او ضايقتك بكلامي ^ـــ^

  33. دلال الجندان وعليكم السلام ورحمة الله وبركاته حياك الله وبياك وبيض الله وجهك أختي الصراحة حيرتيني ، ما أدري وش فيها الصور ؟ ، الصور عادية جداً وهي مزحة فقط لاتعدى هذا الشي أبد لا أقصد فيها الإساءة ولا شي أبداً من الي راح بالك له . يا أختي تراك مكبرتن الموضوع ، وش أجانبه الله يستر علينا ؟! بالنسبة للأخ ورقة بلوت يبدو لي إنك ماتدخلين مواقع فيها مزح بين الشباب ، حسب تجربتي وخبرتي إنه ذا الشي عادي جدا بس الظاهر أول مرة يمر عليك ، يا أختي قبل سبوع ورقة بلوت نفسه حاطن صورة قرد بايميله ويقول ذا جنط السفينة << قسم خبل على فكرة ترى شخصية ورقة بلوت والجنط كلها شخصيات افتراضية بحتة ولا تمثل الواقع أبداً ، يعني إذا مزحت عليها أوعلقتها عليها فأنا أعلق على شخصية افتراضية زي شخصية جحا مثلاً . فيه كتاب للامام ابن الجوزي رحمه الله اسمه ( أخبار الحمقى والغفلين ) كنت أقراه وكان يذكر واحد اسمه عبدالله الجصاص ويحش فيه حش أنا استغربت قلت كيف عالم مثل ابن الجوزي يغتاب واحد من المسلمين ، بس يوم بحثت عن هالشخصية لقيتها شخصية افتراضية وكان ابن الجوزي يحطها بالقصص الي مايعرف شخصياتها . أشكرك جداً على أسلوبك الراقي وغيرتك المحمودة ........ وجدان أقول لايكثر وقومي ذاكري لا أهفك بالشاحن خخخخخخخ الله يديم الضحكة ياوخيتي

  34. ابشر ان شالله اول ماعرس وافكر اجيب لي ورع ابي امشي على ذي التعليمات بس وربي انها تحفه هههههههههههههههههههههههههههههههههههههههههههههههههههههههههههههههههههه لا تحرمنا من ذي الموضيع الحلوه

  35. الســـــــــلآم عليكـــــم ورحمـة الله وبركـاته الف حمدلله ع السلامه من جد ايميلاتك مالنا غنى عنهاا فيها سعة صدر .. مليناا من الجد << تدق باللي يقولون مانبي تسذا هع اوما ورقة بلوت شخصيه رائعه تستحق المتابعه واللحين من تعريفك له صار شي وشويات اثره ماله هويه ههههههههع يعطيك العافيه وكثر لنا من تسذا والا اقول ماهوب تسذا نبي ازين من تسذا << علقت هع دمت بخير

  36. ههههههههههههههههههههههه تسذا … ماهوب تسذا نصايح مهمة .. الله يعطيك العافيه … وشرشحتك لورقة بلوت والله ضحكني بقوووه.. بس ماكأنك قسيت عليه ..هو صحيح انه يستاهل 🙂 بس عاد انت عطيته بالقاضيه ..مبروووك 🙂

  37. دزميييل دزدن ماقريناااو قبل قليل ;p >> تعجيزيه اللهجه ولا 😀 شسمه بصراحه بصراحه مايصلح تسذا ياجنط تستغل اختبارات ورقة وتفضحووه و ترز صوووره و كل ابو شي .. ترا فيه مراهقات :$ :$ >> برااااااا ههههههههههه ورقة بلوت اقرأ على عمرك و ان تسان تبي تغطى تغطى ترا المعجبات واجد و العين حق ههههههههههه 😛 حملة الحوامل فضييييييعه اعجبني التصوير صراحتن حسيت انهم بيسوون لها لقاء صحفي وهي تولد هههههههههههههه فعلن راهيييييب …. كثرلنا من هييك حملااات

  38. خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ تمصعت جنوبي من الضحك أول شي ماتشوف شر سلامتك خطاك السو أنت ورقبتك صدز يقهرني الي يقول لااا لا تقول ولا تفعل والله كل واحد حر في كلامه وكل واحد وله جمهوره .. يعني صدز انا أول أشتراكي في هالقروب كان عقب ماشفت أيمبلات الي تسذا تأشر على أيميل الدكتور يعني ما أحد أجبركم انكم تقرونه الدختر جنط السفينه عساك دوم تسذا موب تسذاك لاهنت يالمجرم >> بحكم انك مفطس كثيرين من الضحك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

نبذة عن ورقة بلوت + حملة ( تسذا … ماهوب تسذا ) لتوعية الحريم

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول