مواقف حصلت لي -الجزء الاول

مراااااحب يا اعضاء قروبي العزيز ..
 
اليوم قررت اني اكتب لكم بعض المواقف واليوميات
اللي حصلت لي في حياااتي الحافلة بالهبال والمغامرات
 
مواقف حصلت لي بالكلية
 
انا بالكلية مو من النوع اللي جاية عشان اللعب .. بس بعض الاحيان تجيني طنات هبال وافكار غريبة ومتهورة المهم  عندنا دكتور غثيث مرررررة وثقيل دم وقرقه وكل بنات القسم مايطيقونه والمشكلة ان المحاضرة مدتها ساعتين ونص !!
تخيلوا ساعتين ونص كله لاصقة بالكرسي ولا همسة وولا حركة والمشرفة فوق راسي وزحمة وحر وغبار وغثة يعني جو رومانس ماتتخيلونه ..
عاد انا ما قصرت خلصت كل رصيدي من الغياب بهالمادة من كرهي لها .. بس يوم جت اخر السنه توهقت وصرت مضطرة احضر  .. وذات مرة وانا طفشانة بالمحاضرة شفت البنات يطلعون بدون استئذان ولا يحزنزن استغربت .. وقلت ابطلع حالي حالهم .. بس عرفت من اشكالهم انهم منحاشين (يعني يطلعون بدون ماتشوفهم المشرفة)
قلت انا خلاص ابسوي زيهم ولأن القاعة كبيرة مرة وفيها ثلاث بيبان (ابواب .. لغير الناطقين باللغة العربية) وزحمة القاعة ومافيه الا مشرفتين بس ولا يقدرون يتحركون – المشرفات- من الزحمة ..انتهزت الفرصة وقمت بسرعة للباب اللي قريب لمي وانا عيوني على المشرفة خايفة تشوفني ويوم وصلت الباب .. التفتت علي المشرفة .. قلت انا عاد ابخربها ابطلع وهي تشوف لأنه مايمديها تاصلني من الزحمة جيت ابفتح الباب واناظر واتلمس وافتح عيوني زين وقلبي يرقع من الخوف قلت لاااااااااااا … تدرون ليييه؟؟
لقيت الباب ماله مسكة (عروة) ومقفل بعد .. والمشرفة تناظرني وعيونها تتطاير منها الشرر .. تدرون وش قلت لها ؟؟
قلت وانا ميتة من الخوف والفشيلة : تسمحين .. دورة المياه ..!!
والبناااات متشققين من الضحك ..
قالت المشرفة : توك تتفطنين تستأذنين ؟؟ ولا ناوية تنحاشين ؟؟ هاااااااااااااااااااااه ..
(عاد وش تتوقعون موقفي بهذي اللحظة !!)
 
الشبشب
 
مرة انا وصديقاتي اتفقنا اننا كل وحدة عليها الفطوور لمدة اسبوع ..لأننا ملينا من كافتيريا الكلية غالي ويجيب المرض .. عاد تبون الصدق حنا تركناه حسد للعميدة وسوينا اضراب مانشتري شي منهم ابد ابد لأنهم غالييييين ..المهم وبما ان عددنا انا وصديقاتي تسع بنات قلنا كل وحدة تاخذ الفطور اسبوع بالدور عشان نرتاح طول الترم .. وسوينا قرعة من اللي تبدا باسبوع الفطور طلعت انا .. اول يوم بالاسبوع كنت طافّه مسوية سلطات وسندوتشات بالدجاج وتوست بالتونة والخضار وحركات .. بس باليومين الاخيرات مليت صرت اسوي لهم توست بجبن سايل وبيبسي ويحمدون ربهم بعد ..
وكنت اسويهم بالليل بعدين اقوم الصبح بدري عشان اسخنهم واحطهم بشنطة الفطور .. بس مرة قمت متأخرة وعلى طول اول ماقمت ركضت على المطبخ عشان اسخن الفطور وأزهبه لأني مابي اتأخر على سواق جيراننا تروح مع بنت جيرانهم ..
المهم يالله لحقت اسخن الفطور واتلبس حتى شعري ما سرحته قلت اسويه بالكلية .. ركضت عند باب بيتنا انتظرهم يمروني ورحت للكلية وانا امشي رايحة لطاولتنا اسمع صوت غريب … وشت ..وشت ..وشت ..وشت
والبنات اللي امر من عندهم يلتفتون علي ويطالعون رجليني !! وانزل راسي اناظر رجليني ..طاح قلبي ببطني ياللهول ماذا ارى !! وصرخت يمااااااااااااا لااااااااااااااااا ..
تدرون وش لابسة ؟؟؟ (شبشب المطبخ ) من العجلة نسيت البس جزمة الكلية !!
تخيلوا شكلي طالبة كلية لا بسة  شبشب مطبخ !!.. وطول اليوم انزل تنورتي شوي عشان مايبين شبشبي اخاف احد ينتبه لي .. وصديقاتي بس يعلقون علي يقولن من القرامة جايتنا بشبشب المطبخ خخخخخخخخخخخخخخخ
قلت حرام عليكم كل هذا عشانكم انتم وفطوركم .. هين بدل ما تعطوني جزمة وحدة منكم تقديرا لتعبي قاعدين تتريقون علي .. هين والله لأسوي بكم مقلب لأخليكم تندمون على فعلتكم هذه .. سأنتقم!!الزير سالم على غفلة
وقعدت يومين افكر وافكر بطريقة انتقم منهم .. عاد مرت الايام واتفقن البنات اننا نغيب يوم الاحد كلنا لأنه مافيه الا محاضرة وحدة وقلنا نغيب اصرف .. وجت ببالي فكرة (فكرة الانتقام).. ورحت دقيت على كل وحدة وقلت لهم: بنات بتجي بنت خالتي للكلية يوم الاحد ابيكم تجون ..قالوا: يوووه ماتقدرين تأجلينه ليوم ثاني لأنه مايمدينا نستعد لبنت خالتك بالحلويات والفطوور و..و.ووو.. قلت: ماعليكم هالشغلات خلوها علي انا انتم بس تكشخوا عشان تشوفكم بنت خالتي والباقي علي انا .. ووافقوا .. يوم جا يوم الاحد غبت عن الكلية ونكبتهم مسكينات جايات وكاشخات ومامعهم فطوور ولا استعدوا بفلوووس انواااع النكبات يعني .. وبعد هذا الانتقام حسيت اني استرديت جزء بسيط من حقي تحسون انها تطق لأبليس باصبع من النذالة !!
عاد لو تشوفون البناات وش سووولي .. تبوني اقولكم … لاماراح اقول … عشان ماتضحكون علي .. بس لا تخافون البنات اخذوا حقهم وزيادة ..
___________________
 
يالله عاد مليت من الكتابة اشوفكم بالجزء الثاني ان شاء الله ..
 
اتمنى اني ماكون ثقلت دمي عليكم ..
 
بااااااااااااااااااي مع تحياااااااااااااااااتيييييي العذبة لكل اعضاء القروب …