مواصل غير مرئي ! تعالو كلكم أعلمكم الاختفاء


SalaM

 لا يقولي احد وشلون وما وشلون تصير غير مرئي ! انتم كملوا هالموضوع وتدرون وشلون صرت غير مرئي .. طبعاً قمت هذاك اليوم من النوم ولإني ولد كيوت فمن الطبيعي اول شي اسويه اشوف شكلي بالمرايه عشان اعرف الناقص من اعضائي الي ممكن اكون ضيعتها في حلومي .. خبركم أحلامي دايما مليئه بالحركه و الدراما , لكن ياولد يوم قربت للمرايه ومافيه احد !! يمين شمال افرك عيوني مافيه بالمرايه احد انادي و انادي وتصطرني المرايه تقولي وش دخل الصوت بالصوره يا ثور ؟ وبعدين خلاص انت انسان غير مرئي مايشوفك احد انقلع قلت لها اما عاااااااد يعني الحين اقدر اسوي الي ابي ولا احد يشوفني ؟؟ قالت لي ايه الحين لك الخيار تبي تصير غير مرئي ولا تبقى مثل ما انت عاهه متحركه ؟ قلت بدون تفكير حتى خليني زي ما أنا محد يشوفني

وأجيكم مستانس على هالاختفاء والي اكثركم حاسدني عليه .. واروح افصخ ملابسي عند باب الشارع و اطلع اركب موتري (( أبفصخ بكيفي محد يشوفني !! )) وادق سلف واقول مابدهااااش تفكير بروح ادخل الفيصليه و ابن أمه السيكروتي يقولي عوايل , لكن ما امداني اطلع مع الشارع العام الا وانا وموتري في اول نخلة بالطريق ! واسمي بالله واشوف الا والله دوريه الي دافني ومدخلني بالنخله ومعه ثلاث دوريات محوطين على سيارتي وواقفين يتحككون بدون مايدرون وش السالفه ! وافتح الباب وانزل وينحاشون كلهم الا واحد ماشالته رجلينه وجلس يصيح عند الدوريه ويتعوذ من ابليس ويقول تكفى لا تدخل فيني تكفى قلت وش تكفاه و ادخله ؟ والله لو انك الفيصليه ولا المملكه عشان ادخلك ! قالي تفووه اعوذ بالله منك وش تبي ؟ قلت ياخوي وش الي وش ابي .. مدخلني بالنخله وتقولي وش ابي ؟ ووقتها تذكرت اني غير مرئي وان هالعسكري مايشوفني .. واقوم امسكه على جمب واحاول اقنعه ساعتين اني انسان صدقي بس مختفي ولا يشوفني احد .. وبالاخير عطاني مخالفة عدم وجود ملامح و إتلاف أموال الدوله المتمثله بالنخلة ! وقالي لا تعودها لان النظام مايسمح الا للاوادم يسوقون ! وكأني مش آدمي يعني ؟؟؟

وتقفل معي الاخلاق وأهون عن روحة الفيصليه لاني بصراحه ما احب يشوفني احد وموودي مو كيوت <<– أبذلكم بكلمة كيوت تشوفون .. المهم واقرر اني اروح للفوال القريب وافطر وفعلاً دخلت عند الزعيم ابو نعمان واجلس بأقرب جلسه واقوله قلابه مشكل مع سفن يا زول .. ويرد ابونعمان وهو يناظر خويه بنظرات توحي بشر و يقوله داير إمتى حتبطل حركات الاستهبال دي و الحكي من بطنك ؟ وتخنقني العبره بعد ماحسيت اني هامشي واقوم بنفسي عشان اطلب من عنده .. لكن للأسف تكررت معاناتي وكل مامسكت سرا جا واحد وخطم علي وعلى هالحال لين أذن الظهر وطلعت قبل مايقفل ابونعمان الباب لانه لو قفله ماعاد يفرق بين مرئي ولا غير مرئي الي في راسه بيطيحه هههههههههههه

واستمريت على حالي طوال اليوم ! أدخل البقاله و اعطي الهندي الحساب كل مره ويجلس يضحك ويقول الهمدولله فلووس بلاش من ربي ويحطها بالدرج .. اخش ابي اغسل يديني في دورات المياه يرجفني واحد ويغسل مكاني .. حتى بيتنا رجعت ولقيت غرفتي محولينها أهلي لغرفة جلوس ..حتى بالصلاة مالقيت مكان أصلي فيه مع الجماعه ! .. و ارجع للمرايه و اقولها يا مرآتي العزيزه من اجمل امرأه ؟ لا اصبرو مو هذي سالفتنا هههههههههه .. رحت للمرايه وقلت لها خلاص مليت من هالميزه الي حولتني هامشي رجعيني انسان طبيعي ارجووووووك ولك الي تبين

وردت علي قالت حس بالتهميش الي يحسونه أخوانك المعاقين يا مواصل  .. وانكسرت منتحره وتركتني غير مرئي و على المجتمع انه يتقبلني زي ما انا .. غير مرئي

فـللأسـف بطل هالقصه الي قريتوها ماهو انا ولا اي شخص غير مرئي .. إنما شخص من ذوي الاحتياجات الخاصـة والي همشه المجتمع وحوله إلى إنسان غير مرئي لا يعتد بوجوده للأسف ! مواقفهم الخاصه في كل مكان تغتصب .. لا احترام لهم وتقدير لأوضاعهم في الاماكن العامه وكثيراً ما ينسحبون بخجل لصعوبة تأقلمهم مع المكان , فلا وسائل تساعدهم في أغلب المنشآت الأهلية و الحكومية بالإضافـة لنظرات الشعب الدونيه لهم !! لا أنا ولا أنتم ولا أكبر الوزراء يضمن عدم تعرضه لحادث يحوله لأحد ذوي الإحتياجات الخاصة .. كل ما يطلوبنه هؤلاء الأخوه هو معاملتهم كأناس طبيعيين فقـط ؛ 

ما يستفاد من الموضوع

أن النخل غالي
أن ابونعان لازم تزوجونه بأقرب وقت وتفكون العالم من شره
أن العالم وصلو كوكب المشتري وحنا تونا يقولون ممنوع الدخول للعوايل فقط

وأخيراً .. إن الإعاقـة الفعليه فـي التفكـيـر لا الجـسـد

شكـراً كثر ما أبثرتكم
 مواصل


تعليقات 17

  1. فعلا معاك حق وانا مالاحظت ان المقعدين مهمشين الا لمن اتغربت وشفت كيــــف المقعدين بالدوله اللي انا فيها كيف وضعهم نص المواقف لهم واللي يوقف فيها بدون حق شالوا سيارته ولا خالفوه الشوارع تلاقيها كلها نزلات وطلعات لهم الحمامات العامه مجهزينها لهم اللي ماعنده قيمة الكرسي المتحرك يعطونه الدوله حتى التكاسي لهم تكاسي خاصه تدق وتطلب تاكسي معاق هذا شي بسيـــــــــــــــــــــــط جدا مما رأيت في بلاد الكفر يقدرون المعاق لانه انسان له مشاعر الله يعوضهم يارب بالجنه المعاقين المسلمين

  2. والله فعلا اخوي كلامك واقعي للاسف ياليت المسؤولين يعيدون النظر في حال المعاقين ماظيعنا الا الانا الاعلى والانانيه والنرجسيه في المسؤولين الكبار يارب نفتك منهم وينحط الشخص المناسب في المكان المناسب مافي شي بعيد عن الله واعجبني مايستفاد من القصه فعلا الاعاقه الفعليه في العقل مو بالجسد ياما معاقين جسديا تظربلهم مليون سلام برقي تفكيرهم وحضورهم وياما سليمين جسديا ومخهم ترللي مفهين ومنحطين قاعدين يظيفون نقاط سودا للمجتمع ومسوين زيادة عدد برظو يارب نفتك منهم 😀

  3. والله وصلتها اسلوب رااااااااااااائع بحق ماشاء الله والله يثيبك على احساسك تجاه هالشريحة من المجتمع وتذكير الناس بهم

  4. طرحت موضوع اخوي مهم مهم مهم مهم أنا اعاني من المواقف في كل مكان كأن ليس لنا وجود بالبلد لا مواقف عند المستوصفات وخصوصاً البنوك والمستشفيات اذا فيه مكان مخصص محجوز لناس غير محتاجينه الحكوميه يفتح الله ،،،

  5. بصراحة أحترمت إسلوبك واللي استخدمت فيه طريقة أفضل من الموضوع السابق (هالحين ليه ما يعلمونا أصول المغازل من الطفولة ؟؟ ) والموضوع أكثر من رائع ويخلينا نحمد الله على أحوالنا وندعي لأخواننا إن الله يرفع عنهم إنه على كل شيء قدير

  6. الصحيح أن موضوع ذوي الاحتياجات الخاصة موضوع مهم جداً لان هذه الفئة تمثل جزء كبير من شرائح المجتمعات العربية ودورهم في الحياة مهمش جداً،، ودورهم في التنمية والعمل والمشاركة في النهضة الوطنية فير مرغوب فيه وهذا شب ما ينسكت عليه،، نظراً للطاقات التي يمكن أن تتفجر إذا تم الاهتمام بهم والابداعات التي سيدعمون بها مسيرة مجتمعاتهم نحو التطور والرقي.. شكراًً وآسف للإطالة

  7. كلام حلو وجميل واسلوب مميز وطرحة فكرة الموضوع بشكل قصة جميلة اشكرك والى الامام

  8. السلام عليكم ,,, ما شاء الله عليك اسلوب قوي في توصيل الفكرة كنك صافقني على وجهي يوم قلت كلمة معاق غير اسلوب الكتابة الي يجبرني اني اتابع القرأة ولا اضغط على زر ديليت الين كملت الموضوع . صراحة نحن بحاجة لمثل قلمك.

  9. هههههههههههههههههههه هههههههههههههههههههه هههههههههههههههههههه هههههههههههههههههههه قصه رائعه واحلا حزء فيها الرومنسي >>>اي رومنسي واي منسي هههههههههههه لا والمايستفاد منه خطير تحس داخل على الموضوع وماخذ كل الافاده منه >>>اي اثرك طلعتي على الهامش مثله بس نهاية القصه مؤثره وحزينه هههههههههههههههههههههه الله يعين اللي غير مرئيين ههههههه بس ماقلت صاحب القصه للحين مارجع لوضعه الطبيعي…؟ لا وربي قمه في الرووووووعه يعطيك الف الف عافيه مواصل وربي ابدعت بالكتابه وقصتك تستاهل النشر ههههههههههههههههههههه تحياتي جي جي

  10. اشكر الجميع على ردودهم لكني تمنيت هذا الوعي في مقالي السابق فمهما اختلف المحتوى يبقى الهدف واحد و الفكره واحده .. لكن الفرق في وضوح الصوره هنا وغموضها هناك . اتمنى من القلب في رسايلي الجايه اذا امد الله في اعمارنا انكم تترون قبل الحكم وتتيقنون ان خلف كل مقال من مقالاتي أياً كان مدى الفكاهة و الهزليه فيه فخلفه هدف المطلوب منكم ان تستشفوه . واكرر شكركم واعتز بردود كل شخص منكم سواءً هنا أو على البريد فهي شهادات تدفعني للاستمرار في هذه التجربه الفريده أخي ذو الاحتياجات الخاصة .. صدقني جميعاً هنا نختلف عن المسئوليين ( المعاقين ) .. فالمجتمتع يشعر بحاجاتكم ولا ينظر لكم إلا اخوان و أحبه .. وشخصياً لي العديد من الأصدقاء العزيزين من ذوي الاحتياجات الخاصة تؤنسني جلستهم أكثر من الكثير من غيرهم . لكن للأسف القرار بيد الأقليه التي لا تشعر بوجودكم ! لكن تذكروا قلوب الأغلبيه لكم ومعكم 🙂 أطيب تحية للجميع

  11. بجد موضوع اكثر من رائع واسلوب اروع عجبني طرح للموضوع بدرجه ما تتخيلها بالرغم اني ماحب القرائه 🙂 عوااافي خيوووو

  12. ماشاء الله عليك اولا اهنيك على طريقه الطرح الجميله الهادفه لاحول و القوه الا بالله ماشالله انت ذكرت موضوع مهم جدا الا هو اخواننا المعاقين كان الله في عونهم وعوضهم خير

  13. أول مره اضحك من رسالة ثم ارجع ابكي نعم فحقوقهم مهضومة ليت اصحاب المعالي يقرأونها لعلها تحرك ساكنا…

  14. ما شاء الله عليك اخووي.. لقد اوصلت الفكره بطريقه جمليه جدا جدا…. بارك الله فيك….

  15. أخي العزيز مواصل حياك الله وزادك بصيرة أشكرك على هذا الموضوع الهادف والطريقة المبتكرة للتذكير بهؤلاء المعاقين الذين نسأل الله العلي القدير أن يعينهم على ما ابتلاهم به . وفعلاً لو كل واحد منا فكر بما فكرت فيه لعم الخير ولقل الشر ولجبرت الخواطر ، ولكن وللأسف الشديد نحن نعيش حالياً في زمن المادة ولا شيء غير المادة ، حتى بات الإنسال يمسي ليله وهو يعد ما اكتسبه في يومه الماضي ويصحو من نومه وهو يفكر كم سيكسب في يومه التالي ، حتى إن أكثرهم نسي أرحامه وما يجب عليه تجاههم بل ولا أبالغ إن قلت إن أكثر هؤلاء نسوا ذكر الله إلا عرضاً والعياذ بالله . والموضوع يطول لو أسهبت فيه ولكن أكتفي بهذا نفياً للملل .

  16. اضحك الله سنك اخي مواصل .. ورغم ابتسامنا إلا أنك كمن أيقظنا من تغافلنا عن هذه الفئة من الناس .. بصراحة ولله الحمد والمنه وليس من باب الافتخار فدولتي مهيئة لهذه الفئة جميع احتياجاتها .. ولكن الدور والباقي على المجتمع الذي للاسف لايرحمهم .. عجبي أولسنا مسلمين؟ أختكـ

  17. اسلوبك في طرح الموضوع رائع بارك الله فيك وفي جهودك تابع ونحن معك اما عن موضوع المعاقين فالله يكون في عونهم ويفرج كربهم أمين

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مواصل غير مرئي ! تعالو كلكم أعلمكم الاختفاء

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول