من المسئول يا معالي وزير التربية والتعليم…؟؟


في يوم الاحد الموافق / 12-10-1430هـ
راجعت مكتب ديوان الخدمة النسوي بالرياض . وذهبت الى مكتب مراجعات البيانات للتوظيف للمره الثانيه , واستفسرت عن سبب التأخير في الرد.. واخبروني اني مستبعده عن التوظيف وعند سؤالي عن ذلك:
فقالت: لي الموظفة (حصه ) أن المؤهل عندي خطأ وانه ( إعداد معلمات للمرحلة المتوسطة )
وانا لدي في الاستبيان الاصلي الدرجه العلمية ( إعداد معلمات للمرحلة الابتدائيه )
وهو نفس المسمى لدبلوم الكليه , والتخصص لديهم ولدي مكتوب اللغه العربيه والعلوم الاجتماعيه ,فكيف يكون جامعيه_المقصود هنا المؤهل_ بالعقل والمنطق حيث ان التخصص الجامعي يكون لغه عربيه او تاريخ او جغرافيا بينما الدبلوم هو من يجمع بين اللغه العربيه والاجتماعيه.
حيث دار بيني وبين الموظفه الحوار التالي:
قلت :انا عندي نسخه من بياناتي الاصلية
قالت : تعالي يوم الاثنين وأرينا ما لديك وحضرت لـ نفس المكتب واستطلعت على شهادتي الموظفه ( بدريه ) وشرحتُ لها الوضع انا المؤهل لدي كذا و كذا ولم تقتنع بذلك الأمر.
وتقول انّ الكمبيوتر تراجع عن الوظيفه لانك دبلوم , وليس جامعيه … وقد تم تعيينك على انكِ جامعيه وحيث اتضح لدينا انكِ لستِ جامعيه وقد ادخلتي بياناتك على انكِ جامعيه وهذا يعتبر خطأ في البيانات لذا تم استبعادكِ.
وهذا الكلام غير صحيح وقد تم تغيير البيانات من قِبل احدى الموظفات او احد منسوبي ديوان الخدمه ليحل مكاني اخرى تحمل واسطه.. يا ترى من المسئول..!!! واثبت انني لم اخطئ في بياناتي على النحو التالي:
بأني أخذت صورة برنت سكرين لكل خطوات التسجيل ..؟! وهذي هي الصورة

فهل من المعقول أن اشاهد الخطأ وأكمل بيناتي وقبل كل كذلك حين فتحت الملف وجدت أن بياناتي صحيحة 100%
إذا من المتسبب بتغير البيانات لي ..؟! على وجه الخصوص.. وبعد ذلك كله لم تقتنع علماً بأن تغيير البيانات المدخله تم تعديلها لأعداد كبيره من المرشحات..
وإذا كنت أنا المخطئة ولنقل ذلك على سبيل اذا كان المتكلم مجنون فالمستمع عاقل .؟!
لماذا الديوان كان صاخب الصوت لأكثر من متقدمة بين ( أنتِ كاذبه وأنا صادقة )
إذا كنتم لا تريدون فتح باب التوظيف لماذا هذا اللف والدوران .. طالما ان التقنية غير متقدمه لديكم .!
لا تسلكوا طرقا ليست لكم يا معالي وزارة التربية والتعليم دعوها
كما كانت ملفات خضراء تحمل روح النماء طويلة الأجل .. وتكتب بخط اليد لما تحمله من عدم تزوير وتلاعب بالبيانات
أفضل من الضحك على عقول بلغت ما بلغت من العالم ..
نريد فقط احترام العقول ولم نعد نريد أكثر من ذلك ..
ناهيك عن العشوائية في التقديم مما دعى الكثير من اللامسؤلين اخلاقيا عن التقدم باسماء وهمية لأن الفراغ صنعة من لا صنعة له
فكان الضغط على الموقع لتضيع الكثير من الفرص للكثير من بنات الوطن يا وطني ..!
فالرجاء التفادي لهذه المشكله لعل وعسى نستفيد بنتيجة صادقة المسئولية


Comments 35

  1. الله يعينك اختي الريم وربي يفرجها عليك وعلينا ان شاء الله بس ياريت تتأكدي من تاريخ يوم الأحد!!! B

  2. 😀 تأكدي من تاريخ زيارتك للديوان يا اختي الكريمة B كاتبه 1430هـ واذا كان ما تقولينه صحيح اذهبي الى وزير الخدمة المدنية فهو رجال طيب وبيعطيك حقك … الله يوفقك

  3. فعلا اختي الريم انتي صادقه انا بعد و وحده من زميلاتي صار معنا مشاكل انا الحمد لله انحلت بعد مراجعتهم لان فعلا صار عندي خطاء و انحل بفضل الله ثم بفضل الاستاذ حمد الجعوان الله يجزاه كل خير .. لكن زميلتي مسكينه لمى راجعتهم قالو انتي كل شي عندك أوكي غريبه ما نزل اسمك و ما كملتي باقي متطلبات الترشيح و جالسه اسبوع رايحه راجعه على الرياض و الوزاره و بين إداره التربية و التعليم عندنا و كل وحده ترمي الخطاء على الثانيه و في الاخير قالو الخدمة المدنية لها خلاص هذا الاسبوع راح يوصل اسمك للإدارة ( هم يقصدون الاسبوع اللي فات ) و هذا احنا دخلنا اسبوع جديد و الى الان ما وصل شي ……. ياليت على قولتك نرجع لسلحفاتنا الخضراء قصدي ملفاتنا الخضراء و الله فيها الخير و البركه .. و كل كلاااامك يا اختي الجميييع مأيده .. و اللف و الدوراان هذا كله مااااله اي داعي و اقول حسبي الله ونعم الوكيل و الله لا يجعل ارزاقنا بيديهم آآسفه عالاطاله لكن من جد شي يقهرررر

  4. والله انك صادقة إذا مايبون يوظفون ناس كفو للوظايف لايلعبون علينا . وبصراحه ماحد صار يصدقهم لما يقولون دخلوا بياناتكم بالنت لأن اللعبه صارت مكشوفه. ومادهورنا الا عقليتهم المتخلفه هذي الله يفرجها بس

  5. لا حول ولا قوةإلا بالله … كان الله في عونك ووفقك إلى ما ترغبين في خير … وهذا حقكـ لا تسكتي عنه .. وكما يقال ما ضاع حق من وراهـ مطالب .. حاولي وإن لم تستطيعي ارفعي شكواكـ إلى مقام خادم الحرمين .. ولا تنسين نفسك من الدعاء قبل كل شيء … اتمنى لك التوفيق …

  6. كان الله في عونك اختي الكريمه .. سمعت كثير عن بنات صار لهم نفس ماصار لك .. لا تسكتي وان شاء الله ربي مايضيع لك تعب .. ذي حياتنا صارت كلها واسطات وربي شي يرفع الضغط بس الواحد مايقول غير حسبي الله ونعم الوكيل .. كلنا بحاجه ماسه للوظائف وخاصة البنات اللي ضروفهم صعبه مثلي بس ناقصنا فيتامين واو وللاسف الشديد ماعندي ..

  7. أنا لمن قرأت قصة الأخت حسيت انه انا انا متخرجة من كلية التربية وعندي دورات اضافية ودبلوم علوم حاسب وانجليزي ودورة في برنامج وزارة المعارف وخبرة سنه إدارية في احدى المدارس ولكن للأسف كل مرة اتوقع اسمي في دفعه من هالدفعات لكن الحين بعد ماقرأت قصة الأخت متأكدة انه فيه تلاعب بالبيانات ما اقول غير حسبي الله ونعم الوكيل يازين الملفات الخضراء واضحة وصريحه وقلبها اخضر انا اللي يبيع في المكتبة حفظني اول ماادخل القرطاسية يعرف يجهزل لي الملفات ماخليت مكان ماقدمت فيه عندي كل المؤهلات لكن ناقصني الواسطة الله يفرج همي وهم السامعين والزائرين

  8. ياقلبي ليه معصبه…؟؟ انتي عندك وزارة تمشي بالبركه وبالواسطه …. انا لي 8 سنوات متخرجه وكل هالسنوات كنت موظفه وتخصصي اجليزي… وماقبلت,,,, ياترى ليه..؟؟؟؟؟ بياناتي كامله واتحدى اي وحده وواحد انه يلقى عليها اي شي…. so خيتو… عندك رب بياخذ حقك مضاعف…. والله لايحلل اي احد من الوزير الى اصغر عامل في الوزاره له دخل باللي يصير لنا… take care:)

  9. السلام عليكم قبل ايام الملف العلاقي الأخضر والفرز اليدوي كانت الذمة الوسخة تعيش بنعيمها !! يستبعدون ويشيلون ويحطون والواسطات تلعلع اليوم جاء الحاسب وظنينا ان الأمور بتمشي صح واذا بهم يعودون للف والدوران لأن المسؤول عنهم يريد ذلك يبي يمشي هو اللي يبي وانتم شوفوا شغلكم الله المنتقم الله لا يبيح كل من اساء لمواطن وظلمه واخذ حقه

  10. ياناس ماتلاحظون فيه ازدياد باللعب بعقول المواطنين ,, فيه استخفاف بنا. ياناس وربي اللي قاعد يصير لا يرضي الله ولا رسوله,, بصراحه الملك عبدالله قاعد يحاول جاهدا انه يسوي شي ,, ولكن نلاحظ ان الوضع من خلفه في انحدار.. لا من وزير التربيه والتعليم ولا من اخوه وزير التعليم العالي ,, ولا من وزير المالية اللي مناشب وماكثر ربي من اللجان حقته كأنه قاعد يصرف من حق ابوهـ اللي لا احلف ماورث من وراه ولا شي ..

  11. بسم الله الرحمن الرحيم السلام عليكم ورحمة الله الله يكون في عونك اختي الكريمة ومازلنا نقول ونستمر في القول فساد فساد فساد فساد فساد والكل يصفق لهم حسبي الله عليهم معالي الوزير اختي الكريمة مو فاضي لاحد . فاضي للبشت و وين يقضي اجازة وفاضي للوناسة

  12. بسم الله الرحمن الرحيم السلام عليكم ورحمة الله الله يكون في عونك اختي الكريمة ومازلنا نقول ونستمر في القول فساد فساد فساد فساد فساد والكل يصفق لهم حسبي الله عليهم معالي الوزير اختي الكريمة مو فاضي لاحد . فاضي للبشت و وين يقضي اجازة وفاضي للوناسة

  13. لعله خير اختي الكريمه وقولي ان لله وانا اليه لراجعون، اللهم اجرني في مصيبتي واخلف لي خيرا منها وان شاءالله بتتوفقين في مكان افظل فالرازق الله لا هم حسبي الله عليهم دمت بحفظ الله

  14. اعانك الله ورزقنا وإياك بالرزق الحلال شوفي حبيبتي الإداره من زمان يبيلها (قشع ) من الجذور اذا ماعندك واسطه لاتتقدمين حالتك مثل حالة اختين تخيلي طلعت اساميهم وراحو يراجعون وصاروا نفس الخطأ اللي عندك بدال كلية التربية للمعلمات حطوا الكليه المتوسطه يعني راحت عليهم الله يعينهم ويرزقهم بخير منها . لاتزعلين وتضيقين حالك وما حولك احد الله وحده هو الرازق والناس ماهم إلا اسباب . مودتي واحترامي.

  15. هلا احتي وكلي امرك للي خلقك وفيني 10 سنوات متخرجه ولا حياة لمن تنادي ابي وظيفه بالي هي به منب لاقيه ياله متى ماكتب لي ربي الرزق بيجي والحمدلله

  16. اكبر عماليات النصب والاحتيال في هذي الوزاره اجل يعقل ان مدرسة متوفية راتبها ماشي 6سنوات ولم يتم الكشف عن ذالك الا بعد ماتقدمة اختها على التقاعد المبكر ووجد ابنها اسم خالته المتوفيه الموضوع مين الي يلهف الراتب وشي ثاني قريبتي طبقت في مدرسه حرم معالي الوزير اياه مديره فيها الاثنين ماتجي الا بعد الساعه 10 ورمضان دوامها من 11ونص الى 12ونص من المسؤل عن تسيبها جوابها ماتقدر تطلع ومعاليه ماطلع 🙁

  17. مس الريم من قاصرها يالغلا … اذا ماعندك واسطة لا تقدمي ابد … ادري كلة على الله وكل واحد يسوي الي علية ونعم بالله ماقنا شي … لاكن خذي نصيحتي ولا تقدمي الا بواسطة ولا ترى بتتعبين اساليني انا ماخليت مكان بالمملكة الا روحت فية الين قالوها بوجهي ماعندك واسطة لا تقدم ابد والله يوفق الجميع

  18. ولا ننفك من معاناتنا الى ان يفرجها الله لنا نلعم جميعآ اننا في انحطاط مباشر ولا لنا حماية لا حقوق انسان ولا حقوق مواطن ولا حقوق مستهلك للأسف اننا تحت وطأت وزراء لا يخافون الله ولا يراعون حقوق الموان ولا ينفذون واجباتهم ابادهم الله عن بكرت ابيهم امين وادام الله ملك الانسانية خادم الحرمين الشريفين الملك عبد الله لقد جهز الكثير للمسؤلين لكن لاجدوا لهم واتمنى ان اصواتنا تسمع وتقمع شوكة المشاغبين

  19. :>والله اني حسيت بمعااانااتك مره وحسيت كانه انا بمكانك بس جعل من حاسكم الله يحوس عياله وبناته يارب ولاهالدنيا لازم القوي ياكل الضعيف حشاء اجل لوناااا 70 مليون نسمه وش بيسون ذولي يسكرون التوظيف وكلش شكلهااا والله اللي عندها واسطه هي اللي بتعيش ياما وياما ناس متوظفات باسماء معلمات وهم اداريات وتااخذ راتب معلمه ليه وين العدل بالله والاداريه تحوس وتدوس وعساهم بثبتونهاا وتترسم والراتب ماكمل 4الاف مانقول الاحسبي الله ونعم الوكيل على كل من ظلمناا يارب

  20. انتي مظلوومه ودعااء المظلووم مستجاااااب ادعي على كيفك والله يفرجهاا عليك وعلى غيرك …

  21. مو بس عندك .. بكل مكاان .. وانا اطالب ببدل فاقد بالاحوال لي 12 شهر وكل ما رحت قالو اصلا ما عندنا لك اوراق ههههههههه طيب واوراقي اللي قبل كان عندي بطاقه قال لي الموظف جب واسطه وتعال بعد الظهر خذه .. هع هع اللي عنده واسطه يقول بطلع بطاااقه .. B

  22. حسبي الله ونعم الوكيل(((يكفي استخفاف في العقول))) وجعلهم يلاقونها في عيالهم ويعسر دربهم مثل ما عسروا دربك..

  23. الحمد لله الذي لا يحمد على مكروة سواه والله يا اختي ما احد يعرف وش الخيرة فية لكن انا لله وانا الية راجعون هذا الامر حاصل على اختي تم ترشيحها ولكن طلبو اثبات سكن انا من المنطقة المرشحه فيها والمصيبة جبنا عقد ايجار وورقه من المركز ولكن دون جدوى رفضوها حسبنا الله عليهم.

  24. الله يفتح لك أبواب الرزق الحلال المبارك يارب .. لاتشيلين هم …يؤلمني كثيرا اللي يصير لكم ..من قتل لطموحكم وأحلامكم وشبابكم ..وترى هذا مو في السعودية بس!!!! تراه في كل الدول العربية بلا إستثناء .. مخطط كبير لإفساد الشباب بقفل أبواب العمل في وجوههم ..وتركهم يهيمون على وجوههم بغير هدى ومن ثم تعرفين إلى أين يتجهون وإلى أين بعدها سيصلون..الفساد والهلاك.. البعض ينصح بعدم اليأس من معاودة التقديم ..والبعض بالدعاء على من ظلمك ..أو تسوين إعلان في الجريدة تطلبين فيه $واسطة قوية مع صمغ بتكس مجانا$ تشغلك وتلزقك على الكرسي إلى الأبد. أنا اقولك يا أختي الكريمة(( صنعه في اليد أمان من الفقر…)) فكري بأي صنعه أو اي حرفه تتقنينها أو حتى تميلين لها ..تعلمي تمرني, إقرأي, تثقفي, وإبدأي لك مشروع قوي .. لاتعتمدي على شهادتك أو تنتظري رحمة أو رزق من عبيد فقراء لا يملكون لأنفسهم ضرا ولا نفعا .. بمجرد تخرجي من الجامعة أتجهت لاقرب جمعية وتعلمت الخياطة..صديقاتي كلهم توجهوا للديوان والبنوك والمدارس الأهلية بينما استغربوا مني لما توجهت للخياطة.. سألوني ليه:أربع سنين دراسه جامعيةوكرف وبعد تبين تدرسين.. لا وخياطة بعد..!! قلت لهم .. وشي الاربع سنين من مجموع تعب 16 سنة دراسة وإستعباد في مدارسنا (عاد ماعليها كلام)شبعت من تمثيل دور المرؤوس.. ما ابي يكون فوقي رئيس يحركني وين مايبغى..أو يطردني ليضع أحد أقربائه مكاني متى ما اشتهى لاأريد ان اتلقى الإهانة بتسول الوظائف وهي متوفرة ولي الحق بها وأموت قهرا . أريد أن امتلك نفسي عملي حريتي احترامي راحتي واطمئناني بأن املك أولا صنعه بيدي لا يستطيع أحد إنتزاعها مني مهما حاول ثم أكون عملي برأيي ورغبتي وذوقي .. أجل وين يروح نتاج ال16سنة اللي درستهم ؟؟!! احوط عقلي ونفسي من جديد في وزارة ومكتب ومديرة تمشي كلامها علي ومجبورة انصاع لأوامرها وألتزم برها حتى ما تغضب علي وترفع أمروتصدر قرار بأني عاقة وأستحق الفصل..يكفي ما سمعنا ورأينا من إذلال .. نداء للشباب السعودي رجال و نساء ..أعملوا بسواعدكم كما فعل أجدادكم..فما عمرت بلادكم إلا بضربة معول وعرق جبين أسود من ضربات الشمس الحارقة وآخرالكلام أكثروا من الإستغفار فما حرمنا الرزق ولا سلط علينا حكام جور وبطانة خبيثة إلا بذنوبنا..فتفقدوا أنفسكم وأبنائكم وخصوصا نسائكم(لباسهن) كم بعدنا عن الله الغني الذي بيده الرزق وقربنا من العبيد الفقراء الأشحاء

  25. ادعي ربك والله يرزقك بلأفضل … وحبيت أقول لا الوزير ولاغيره فاضي للمواطنين كل واحد يشووف وشلوون يجمع بس الفلووس الحمدلله والشكر .. يااارب لاتسلط علينا من لايخافك فينا ولايرحمنا .. وربي يررررزق كل محتاااااااااااااااج عاجلا غير اجلا .

  26. الصبر مفتاح الفرج قومي في الليل وصلي ركعتين مع الدعاء وا نشاء الله يفرج همك ويمكن خيره لك وانتي ماتدرين الله يعوضك خيرا منها

  27. السلام عليك اعانك الله اختي انا مابغى اقول الا الله الله بسهام اليل فائنها لا تخطئ

  28. السلام عليكم . حقيقه كنت امس في ديوان الخدمه المدنيه اراجع لقريبتي في نفس الموضوع خطا في الاستماره (خريجه كليه تربيه)ومعدله الى كليه اعداد معلمات.(وغيرها ممن اعرف في مدينتنا كثير )نفس الخطا ويقولون انهم وظفوا اكثر من تسعه الاف .قال الموظف ما فيه مشكله ترجع اوراقها الينا وتدخل من جديد في المفاضله القادمه ؟؟؟؟؟؟؟ وراح تتعين

  29. اختي الوزارة تعبانة جدا وخاصة القسم النسائي وكلش تعقيد مافية مرونة وشوفت النفس للسعوديات قسم بالله اني شفتي في عيني اكرة ارجع اي قسم نسائي اللهم عدل ولا بدل ياحياتي يالاجنيات والله تساعدك ونفسها زينة وتاخذ وتعطي ام السعوديات لا والله ياماالمحي طبعا مو كلهم بس الغالب والوزير نايم وتحسس هل الكرسي موجود ولا لا ليش فية استهتار في المواطن ؟؟

  30. السلام عليكم ورحمة الله وبركاتة مع أحترامي ليجمع الوزراء زيهم زي الكرسي الي جالس عليه والله تتطور الدنياء وحنى نرجع وراء 100سنة لكن الشكوى لله عز وجل الله يعين الجميع

  31. انا تخرجت احمل من الطاقات في مجال عملي ما لااااا تتخيلون وكنت واثقه من نفسي بقوه وتبخرررررررررر كل شي في الهوى ى ى ى ى ى دامكم مارح توظفون ليه تخرجونا عاله على المجتمع واهلنا؟؟؟؟؟ما تستاهلون والله مثلي..!! :)))احبك يا وطني هه؟؟؟

  32. أخيتي لاتجين من وراء وزارة التربية والتعليم خيراً فقد أصبح للواسطة المقام الأول ، ولا أظنك إلا سمعت عن طريقة قبول الوظائف في جامعة البنات تحدثي ولا حرج .

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

من المسئول يا معالي وزير التربية والتعليم…؟؟

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول