من الغباء المعاصر ،،، رؤية مصورة لجماعة الفاغرين


حدثنا العلامة الدافور ( شحاتة السيد بسطويسي ) في الإذاعة المدرسية قائلاً بصوته الأجش المصاحب لصرير المكرفون المزعج: أخي الطالب .. هل تعلم ان العضو الذي يستهلك 40 % من أوكسجين الدم هو المخ !! .. ثم أختتم قائلاً: و في الختام أشكر مديري الفاضل و أبائي المعلمين و أخواني الطلاب .. مع تحيات صف ثاني متوسط .. قزاكم الله خير قميعاً و شوووكرن ( عالطاري تراه مسجل في جماعة التوعية بعد ) !! .. ثم عاد ( شحاتة ) لصفه و كيسة سندوتش الفول تدودل من جيب ثوبه البني حتى لامست طرف شماغه البرتقالي القصير ذو البصمة السوداء !!

و بعد إنطلاق جرس الحصة الثانية .. كانت قدماي تتسحب في قدومها إلى المدرسه و الغمص متربع على عيناي ( يعني من جدكم بحضر الطابور و اسمع الإذاعه بعد.. بس انا مجند الداوفير يعلموني بأي شي يستجد في المدرسة حتى الإذاعة ) .. و ما إن وطأت قدمي عتبة المدرسة حتى أستوقفني الوكيل ( مردد ) وهو يلوح بخيزرانته مزاعقاً: إيش قومك متأخر و الحصص قدها باديه .. فين كنت ؟؟ .. ثم أردف متذمراً: هبلك حمى تقطع شرايينك .. عقاب لك راح اسجل اسمك مع ( جماعة الفاغرين ) ذا الحينه .. هيا روح وقف في الساحة تحت الشمس يا أمّ خبل !! << جماعة الفاغرين: الأسم البديل لصعوبات التعلم في مدرستنا .. سميت بهذا الأسم نسبة لمصالة وكيلنا ( مردد ) !!

وبعد وقوف حصتين تحت الشمس .. رحت لفصل الفاغرين و القى طلاب الصعوبات جالسين على شكل حلقة يتبادلون خبرات الغباء مع بعضهم و الأستاذ ( سويلم ) جالس بينهم يسجل في ورقه .. حسيت اني داخل على مركز إعادة تأهيل المدمنين مثل اللي يجلسون في الأفلام الأمريكية و يخقون لبعض !!

نطق ( فتاق ) – أحد الطلاب الدلوخ – وهو يرفع نظارته بإرتعاش قائلاً: انا اليوم سمعت ( شحاتة ) في الإذاعة يقول ان المخ يستهلك 40 % من أوكسجين الدم .. و بصراحه حنا كرموز متوطن بها الغباء في المدرسه يستحيل نصدق مثل هالمعلومة خصوصاً ان ( شحاتة ) يقيس هالمعلومة على نفسه !!

فقاطعه ( حمود ) – الدلخ الثاني – قائلاً: يعني المخ حارمنا من الذكاء و من الدم بعد !! .. ثم التفت على الأستاذ هائجاً: طيب إلى متى يا أستاذ وحنا محرومين .. إلى متى و حنا نسأل و ما نجاوب الا على رد السلام .. إلى متى و المجتمع يتهربون مننا و يرمون أسئلتنا على بعضهم عشان ما يضطرون يشرحون لنا الإجابة !! .. إرتسمت إبتسامة الثقة على شفاة الأستاذ ثم قال بنبرة مطمئنة وهو يمسك بريموت جهاز البروجيكتر: هدىء من روعك يا بني .. فقد أثبتت الدراسات بأنه لا يوجد عقل خال او كما نقول ( غبي ) .. بل ان الذكاء موجود في كل عقل و لكن بنسب متفاوتة و درجات مختلفة.. و الأن اسمحوا لي بأن أعرض لكم بعض النماذج المعاصرة للغباء .. و اتمنى ان تتمعنوا التركيز فيها لأني سأقيس ذكائكم من خلالها … فلنبدأ بأول صورة حيث تم التقاطها في لبنان الشقيق !!

ما إن وقعت عيناي على الصورة حتى ضحكت بمليء أشداقي قائلاً: ههههههههههههه هالحين شيابنا عشان لمبة محروقة في الحوش ما يخلونا نلعب كورة يخافون نكسر اللمبة هذا إذا ما فقعوا الكورة عشانها .. شلون عاد لو قنبلة .. بس واضح ان اللي كاتب هالورقة لاعبه في مخه رسايل ( عزيزي العميل ) .. أجل إرهابيين يقول لهم ( و شكراً ) .. يعني بزعمه بيحرجهم و يخليهم يشيلون قنبلتهم لحارة ثانية بهالكلمه .. ما يدري انهم حاطين القنبلة في درج موترة و مشغلين العد التنازلي عقب ما قروا رسالته هههههههههههه !!

قطع الأستاذ ضحكتي قائلاً: لا أرجوك .. فبإستطاعتي أن أعالج الغباء .. و لكن المصالة صعب .. صعب جداً .. لذا اتمنى منك ان تعيش إستراحة محارب مع نفسك و تتابع معنا بصمت .. و الأن دعوني انتقل و إياكم إلى الصورة الثانية !!

طمرت من مكاني ضاحكاً: ههههههههههههه وين ( لا تعبث بها ) و الوجه معبوث به خلقه اجعله في ذا النسر اللي يحلق فوق ثمه … لا و رابط شماغه المقطع يعني اني انا إنسان عملي .. انا اقول بس لو يترك الإنتخابات و يخيط شنبه بطانية و يتغطى بها اصرف له .. بصراحه المفروض يكتب بدال هالكلام اللي أسفل الصوره: ( أخي الناخب: هذه صورة من يمثلك في مجلس الشعب فلا تستفرغ عليها ) ههههههههه
صفقني الأستاذ بريموت البروجيكتر حتى تورم أنفي ثم أستطرد وهو يركب حجار الريموت: لكل داء دواء يستطب منه .. إلا المصالة أعيت من يداويها !!

أشار الأستاذ بأشعة الليزر إلى وجه الرجل في الصورة قائلاً: تمعنوا في ملامح وجهه المستاءة و الغاضبة لاسيما وانه يشعر بثقل الثلاث جحات فوق رأسه على الرغم من أن يداه خاويتان .. يعني نستنتج من هالصورة ان الرجال ما أستغل ذكاءه في إستخدام يديه .. طيب خلونا نشوف الصورة الرابعة !!

رمقنا الأستاذ بنظرات حادة تخاطب ذكائنا الباطن ثم قال: والأن .. ما ملاحظاتكم على هذه الصورة ؟ .. فقاطعه ( فتاق ) قائلاً: انا الاحظ ان كاتب هاللوحة ما أستغل ذكاءه !! .. فأستبشر الأستاذ خيراً ثم قال: أحسنت يا ( فتاق ) و ما الذي لم يستغله كاتب هذه اللوحه ؟ .. فأجابه ( فتاق ) بنبرة الواثق: انه ما أستخدم يديه مثل راعي الجح!! .. عندها قاطعه الأستاذ غاضباً: يعني كاتبها بسرّه و معلقها بشعر خشمه … يا لوووح سر غباءه في حواق الإملاء ما تشوف !!

لم تكد الصورة أن تكتمل في الظهور حتى صرخ ( فتاق ): حتى ذولا ما يبون يستغلون ذكائهم بعد .. مع ان بصراحه قمة الذكاء انك تستخدم يديك في مثل هالوضعيات!! .. فأستشاط الأستاذ بغضب: الله يقطع ام ذا اليدين اللي شاغلتك .. ياخوي صورة الجح راحت خلاص .. شف لك ملاحظة ثانيه .. جبت لي الفتاق يا ( فتاق ) !!

أفقت من غيبوبتي على الصورة ثم عطبتها ضاحكاً: هههههههههههههههههه الله عالنزاهه و النرجسية الكاسحة .. الا قل لا أملك الا الترنق ابو خطين اللي لابسه يا مدرس الرياضة.. اجل بالله ذا منظر مرشح لمجلس النواب .. هذا المفروض يرشح نفسه لمنصب حارس إستراحة هههههههههههههههه الله يرجني يا ناس والله اني مصرقع ههههههه !!
أشار ( الأستاذ ) لي بريموت البروجيكتر قائلاً: يعني ما كفاك رضاك عن مصالتك و تمدحها بعد .. الظاهر ان خشمك حن لصفقة الريموت .. لذلك انثبر و خلني أكمل عرض الصورة السابعة دام النفس طيبة عليك !!

أخذ الأستاذ يقلب قلمه وهو يتمتم بقراءة السطور في الصورة: ( كاميرا سرية ) .. ( الحمام مراقب ) .. ثم استطرد ساخراً: صارت بلكونة مهيب حمام لأن الخصوصية و السرية التامة من أهم متطلبات الحمام .. و ذا الدلخ راسم كاميرا و يقول الحمام مراقب كأنه يقول لحد يدخل الحمام ابد .. اجل وشو له تصلحه يالهيس ؟؟ .. انا بصراحه اشوف ان هذا نموذج لغباء فاحش.. ولا وش رايك يا ( فتاق ) بهالكلام ؟
استوقف ( فتاق ) تمعنه في الصوره ثم قال: انا اشوف ان اللزق مهوب قوي .. وهذا دليل ان اللي حطها ما أستخدم يديه مضبوط !! .. لم يكد ينهي حديثه حتى صرخ الأستاذ في وجهه: يا ذا اليدين اللي امتحنت أمنا عليها .. هذا وانا موضح لك نقاط الضعف في الصورة يا تنكه !!

إبتسم الأستاذ ثم أردف ساخراً: يعني على بلاطه لا تدين !! .. عندها لم أستطع كبح مصالتي , فضحكت حتى تشققت أوداجي قائلاً: الا ان كان العجوز بنت صباح بتشتري من هالمحل , فالشروط متوافقه معها لكن في حال لو بتجيب أمها بدال ابوها هههههههههههههه يا ملحي .. قسم بالله جلستي ما تنمل ههههههـ أأأأأح <<< الريموت سنتر في خشمي للمره الثانيه !!

أردف الأستاذ مبتسماً: الحكمه و بوس الواوا .. امحق مدرسه !! .. لم يكد ينهي ذبته حتى استرسلت معه قائلاً: هههههههههههههههه والله انك صادق .. الظاهر هالباص جاي من شارع الهرم ههههههههههه ياربيه بديت احس اني أشكل خطر على حياة الناس لا يغصون بضحكه على ذبه من ذباتي !!

رمقني الأستاذ بإحباط ثم قال: اهااا .. هالحين عرفت ليه اللي يغص يحاول يطرش دايم .. اثره من مصالتك الله يغثك انت واياها !!

نظر الأستاذ لي بنظرات لعينة وهو يشير إلى الصورة مستدركاً: هاه .. وش وجهة نظرك يا زيكو ههههههههههههههه !! .. فلم يكن مني إلا أن عضيت على شحم و بلعت العافية درءاً للوقوف تحت الشمس !!

أطلق الأستاذ ( سويلم ) تنهيدة عميقة ثم أدار وجهه نحونا قائلاً: هاه وش تقييمكم للي شفتوه قبل شوي !! .. بادر ( فتاق ) بالإجابه قائلاً: بصراحه انا حاولت اركز معك و استخدم ذكائي .. بس ذكائي وقف بعد صورة راعي الجح !! .. فقاطعه الأستاذ بسخرية: هذا على أساس أنك قبل صورة راعي الجح كنت ذكي .. وانت يا ( حمود ) وش رايك ؟ .. أفاق ( حمود ) من غفلته قائلاً: ابد .. انتظر نماذجك اللي تقول بتعرضها!! .. عندها أنفجر الأستاذ ضاحكاً ثم تبعته ضحكات ( فتاق ) و ( حمود ) و انا مبقق عيوني بينهم مدري وش السالفة !!

وما هي الا لحظات حتى داهم الوكيل ( مردد ) الفصل وهو يصرخ ملوحاً بيخزرانته: بقعاء تصوعكم .. إيش مجلسكم هنا و الأستاذ قده غايب من أول الدوام .. قسم انكم فاغرين .. و إنت يا (سويلم) قووم من كرسي الأستاذ قامت قيامتك يا أمّ خبل .. هيا كلكم وقفوا في الساحة تحت الشمس << الظاهر لو يجي غيم في مدرستنا ما داوم الوكيل !!
و بعد محاولات إستيعاب عديدة إستغرقتها مع نفسي وانا أتحسس الورمات في خشمي حتى أدركت بأن الأستاذ ( سويلم ) ليس إلا مجرد طالب دلخ مثلي مثله , فما كان مني إلا أن هبدت بالكرسي على خشمه قائلاً بهستيريا: حس يالكلب !!

– ما يستفاد –

الغباء هو أن لا تستغل ذكاءك * << راجع الهامش السفلي

– فلاش باك –
صح ان ما فيه عقل غبي لكن وكيلنا ( مردد ) كسر القاعدة لأني بعد صراع ست سنوات دراسة في المدرسه , اكتشفت ان الساحة – اللي دايم يوقفنا فيها – مضلله وما تطبها الشمس ابد !!
* من أقوالي المأثورة ( نصاب )
__________________________
شطيط


Comments 25

  1. ادخلوا على مدونة صاحب الموضوع وروحوا لمواضيع صادوه لتعرفوا عقلية هذا الشخص ، وكيف يتقمص دور بنت ويراسل البنات في المنتديات وينشر رسائلهم الخاصة في موقعه .

  2. اخوي إذا انت داخل الموضوع مدرعم فأتمنى انك ما ترد , التقمص و نشر الرسايل اللي تقول عنه كان عباره عن فعالية مقالب في أعضاء منتداه وانا سبق و قريت هالمقالب في نفس المنتدى و أول الردود عالموضوع كانت ردود الضيوف اللي سوى معهم المقلب و تقبلوها بصدر رحب هذا غير ان صاحب الموضوع ذكر انه طرحها في مدونته برضاهم و بعد الإعتذار منهم في المنتدى ما أقول الا الله يعينك على نفسك وإذا هالفعاليه ما عجبتك ابحث في قوقل و بتلقى أغلب المنتديات مسوين مثلها مشكورين جميعاً

  3. شطيط سلمت يمناااااااااااااااااااااااااااااااك على هيك اسلوب قمه في الدشاره صراحتن مااقول الا الله يكثر من امثاااالك تدري حتى عندنا الوقفه تحت الشمس بس تدري وشو الغريب اني اللحين دريت انوه مابوه شمس يعني المدرسه مضلله 😀 B طيب وش الحكمه من الوقفه ماادري 😀

  4. :D:Dوااااااااايد زين موضووعك يرسم البسمه بالقووه اشكـــرك بجد تستاااهل واااصل ابدااعك

  5. أولا انت وش صلاحياتك عشان تقولي أرد ولا ما أرد سكرتير صاحب الموضوع حضرتك ولا عينك محامي عنده ؟، وإذا كنت صاحب الموضوع ليه ماترد باسمك ؟ ثانياً : هات الرابط اللي تقول فيه أن الأخ ذكر انه أعتذر من الأخوان وطلب الأذن منهم في نشرها في مدونته ؟ أو هات نص الكلام نشوفه . وحاب اقولك إذا حركة أنك تتقمص دور بنت ودلوعه كمان عاجبتك فهذا شخصيتك وأنت أدرى بنفسك ، لكن أغلب الرجال ماترضى أنها تتقمص دور بنت وتتمايع وتدلع في المنتديات مثلك . أنتظر ردك اللي أشك أنه جاي .

  6. اما ان سويلم مهوب الاستااااذ .. صدمـــه !! بس الولد ذكـــي .. :$ و مردد لا هو مو غبــــي .. بس قلبه طيب .. على اساس انه يعاقبهـــم بس قلبه ما يطاوعه .. فيخليهم تحت الظلال .. خخخخ .. >> تبي تثبت ان مافي عقل غبي .. 🙂 اسلوب مشوق جدا في عرض الصــــور .. تسلــــمـ ننتظر جديدكـ

  7. مجنوون ياشطيط مجنون .. صور خالعه .. لكن صدقني بدون تعليقاتك ماتسوى شي .. خبل ومبدع وش خليت لــ يابعدهم 😀 .. يعطيك ألف ألف عافية ..

  8. الله يعطيك العافيه اخوي شطيط وصراحه قمه في الابداع وننتظر جديدك يااام خبل ردددد على حقاااني ياااخوووي انت وش دخلك وش حشرك يتقمص دور بنت ولا دور حرمه وش عليك والله ناس حشررين صاادق وش مسوووي الهيئه على رؤوسنا وعيب عليك تتدور ورا عيب الناس

  9. يمين الله انك خيال موب صاحي دموعي صبايب من الضحك جزاك الله كل خير وأصلحك ان كانك منعوج وجعل الضحكه ماتغادر شفاهك رهييييييييييييييب لاتحرمنا من هالحركات

  10. صبحك/ مساك الله بالخير حلو ان الواحد ينزل مواضيع حلوة و فيها فرفشة و توسع الصدر لكن عيب ان الواحد يتريق على الأغبياء و على اللي أقل منه ذكاء أو اللي يدرسون صعوبات التعلم و يتخذهم مصدر للسخرية و الاستهزاء و هذي خلقة ربي فيهم. صح في النهاية بينت ان كلكم فاغرين لكنك خليت ردودهم تبدو مثل المجانين، كنت أتمنى ان يكون في احترام أكثر للي عقلياتهم أقل مننا. سلامي ،،

  11. اقتراح بسيط لك ياكاتب الموضوع والله لو تستغل موهبتك المرجوجه وتكتب روايات وقصص زي الي كتبتها اقسم بالله ثمانين ان تصير مليونير…\\ وشكرا لكم

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

من الغباء المعاصر ،،، رؤية مصورة لجماعة الفاغرين

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول