مقاطع شعريه -1


مساء الخير أعضاء قروب أبو نواف ..
ين يدينكم أول مشاركه لي .. عباره عن مقاطع من أبيات شعريه أعجبتني كثير .. وحبيت أشارككم فيها .. وأتمنى تحوز على رضاكم وأعجابكم
***********************************
تصدق يابحـر أني توقعتك تشيل هموم
ولكن للأسف أنك غرقت بدمــعه .. من عيني‍‍‍‍‍‍!!؛
******************************
ضايقه بالحيل محتاجه أشتكي .. لولاطبع فيني يمديني شكيت
بس أدوّر عذر من شان البكي .. لو يدوسون بطرف ثوبي بكيت
كل ماجيت أتريّح وأرتـــــكي .. يرتسم في خاطري ألفين بيت
ويش بيدي أفعله غير الحــكي .. قاصره خطوات رجلي لو مشيت
أسرعي يــانفس موتي وأهلكي .. صرتي همي يوم بالدنيا شقيت
******************************
من يظفر لي جدايل هالملل .. من يسامرني وأنا ليلي طويـــل
*****************************
‌ الصمت يكفي ويشفي صدر راعيه .. لاصار كل الحكي ماله معاني
والقلب ماعاد تعنيه المــشاريه .. والعين ماعاد تغــريها الأمــاني
والخــاطر الغمس من يقدر يسليه ..الناس .. ولا الشعر .. ولاّ الأغاني
******************************
المقبلات أدري بها هّم وقبور .. والماضيات سنينها من زماني
******************************
أهــنيك ياعيون عن الدمعه سليه ..ماذكرها قاسي الوقت وأظهر سدها
أضحك من القلب والضحك من شر البليه .. والبلاوي كل يوم مضيع عدها
******************************
من عجز لايدوس الهم بأقدامه .. لازم أنه مع الأيــام ينداسي
******************************
ياكثر ماقلت باكر تشرق أنواره .. ويمر باكر كنه أمس بالصوره
ماغير حزنٍ تنامت فيني أشجاره .. لولا فحيحه لا أقول الروح مقبوره
******************************
اللي تهرب من مواجه سنينه .. يلقى على دربه سنينه تحــراه !؛
******************************
الليل يوحش والضحى يجرح العين .. والحزن يكتب من عذابي غناتي
أمنّي عيوني من الحين للحين .. عســــى الفرج مع طلعة الصبح ياتي
*****************************
من صحوة العــمر وأحلامي هي أحلامي .. مالله كتبها مع الأيام تتحقق
*****************************
كل يوم أقول في باكر أمل .. وأن حضر باكر رجيت اللي وراه
أرفع الهقوات لو حظي نزل ..وأقنص القاع الذي ما أحدٍ وطـــاه
*****************************
إذا كان الزمن خصمك من اللي تقدر تدينه
لمن تشكي وهالعــالم جسد يحكي .. بدون آآآآذان
*****************************
سجين بس أسمي سجين التفاكير .. عزلت نفسي من خلاي بخلايه
الحظ مقفي والليالي مدابـــيــر .. ومن لوعة الدنيــــــا خذيت الكفايه
****************************
من كثر صدماتي بناس قريبين ..صرت أتحرى صدمتي في ظلالي
***************************
مابقى بالعــمـر مقدار ماراح فيه ..كل مازال يومٍ ..يوم بالعمر ولىّ
مايعرف الجمر مثـل اللي يكتويه .. أحد يدفا بناره .. وأحد فيه يتصلىّ
****************************
كل مادقيت في أرضٍ وتد .. من رداة الحظ وافتني حــصاه
****************************
زماني مُر وأحسه مٌر .. ويكتبني الزمان المر
زماني يشبه الغيمه و أنا أرضى في حرى قطره
تخاوينا انا والمّر وأصبح لي صديق العمر
يفوت الأمس مع يومي وأنا أقول الفرح بكره
****************************
بكيت ومالقيت اللي على قلبي يعـزيني
خفوقي ماخذاه الموت .. ولكن .. قسوة الأيـــام
****************************
رضيت بالهّم ماهو الهّم راضي بي .. ياجور الأيام في همّي وتعذيبي
أن جيت أبشكي منهو بس يفهمني .. وأن جيت أبخفي وأجامل ينكشف عيبي
*****************************
وين البخت يافلان وتقول مبخوت
رحت اشتغل دفان محدٍ رضا يموت
تحياتي لكم
أختكم : البســمه الحزينه

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مقاطع شعريه -1

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول